☆DOZER☆ - 5 By Dingdi Pachuau

☆DOZER☆ - 5 By Dingdi Pachuau

"Engati maw? Ka khûp vàng hian maw?" tiin ka han zâwt a, ani erawh chuan min chhâng leh tawh chuang lo. Ka khûp chu ka han en a, rin aiin a dam har reuh tawh a, ka lo sawh pilh thúk deuh nge ni, damdawi chu ka ngeih chiah lo zâwk ni pawh ka hre thiam tawh lo.

Chutih lai chuan motor chu a che laih a, hma lamah bu deuhin ka va intauh dâwrh lo chauh a ni! Ka pu chu ka en vat a,  ani chuan," Kawng a khuar deuh a nih kha," thûm dût hian a lo ti mai a, a ni ve lah tak a, a țan tìr lamah kha chuan a zâwl ve deuh a, tunah chuan kawng chu a sawtin a bumboh chho ve ta deuh a ni.

Kawng țhat lëm loh avàng chuan kan tlãn chak thei lo va, kawng zàu loh chu thuhran, a rualrem lo ka ti mai, a chho ve deuh euh euh bawk si a, muang taka tlàn theih ni bîk hek lo le, kan insawh leh dawt dawt țhìn nghe nghe; mahse, nuam ka ti leh tlat pek a nih chu, ka nuih a ti za tlat a, kan han insawh bûk lâwp châng phei chuan insûm thei lovin ka nui chhuak ziah.

"Ka pu, hei aia kawng zau leh mâm deuh zâwk hian--" ka tih lai mêk chuan ka kãng leh zawk mai a, truck chung ka han tauh dawt a, ka inrin hman hma chuan," A naa..!!!" ka'n ti zui nghâl a, ka tuai zui vat vat nghe nghe. Ani chuan," Inring renga awm a ngai asin, invuan nghet viau tawh rawh," a lo ti mai a, kei chuan," Ka pu, ka ring tawh êm êm lo, min ngei deuh te hi a ni zâwk lo maw? I khalh sawt lui deuh ni tlata ka hriat chu," ka ti ve thung a, ka lu ka han tauhna chu ka la chûl vat vat reng a.

"Khai a!!" tiin a lo nui huk a, kei chuan," A ni tak tak! A thlàwn pawhin ka ti miah lo, thil pawimawh lutuk tak mai lei tùr ka neih vàng chauh tak tak a nia, ka lei zawh veleh kan lêt leh nghâl thei ang a, hna pawh i thawh chhunzawm thei ang. Chuan, ka ti buai tawh miah lo ang che," ka ti leh mawlh mawlh a, amah pawh en duh lo chuan kawng lam chu ka melh ngar lui ve tlat a.

"Khuaa kal chu ka lo tum sa alawm," a lo ti leh dût a, ka ring hran lo nain ka chhâng zui tawh lo. Ngawi reng chuan kan tlãn bup bup a, khua kan chuan chhuah tâk hnuah erawh a lo zâwl ve ta deuh a, sawt pawh a sawt nêp ta. 

Thingtlâng khua dik tak a lo ni a, mak pawh ka ti hial zâwk a ni. In pawh chu ràngva in ka hmu zeuh zeug ringawt, a tam zâwk chu di in a nih ka ring. Kan motor thãwm a ring bawk a, kan tlàn pelh apiangte chuan min lo en duh viau zêl mai a, kei lahin hmuhnawm ti takin min entute chu ka en zui ve zêl bawk a, hlimawm ka ti lehpek tlat a! Naupang țhenkhat kan chuanna rawn ûmtute chu enin tlãn chak tùrin ka lo fuih hlawm a, hma lam en hman lo lêkin ka lehhawi reng mai a ni.

Kan din hnu chuan," Kha lai kha dàwr chu," a ti sup a, a melhna lam chu ka en nghâl vat a, min hrilh lo se chuan dàwr a ni ang tih ngaihna ka hre hauh lo ang. In pângngai ang tho a nih vàng a nia, chhuk ve vatin ka lût zui nghâl a. 

In chhûnga lo awm nu pathum chuan ka lam an rawn hawi vek a, kei chuan," Ka pi, hei hi dàwr a ni em? Thil lei ka duh a," ka han ti ve tawp a, a neitu ber pawh ka hre chuang lo; mahse, a sîr bera țhu nu tê lam deuh chuan," Aw, he lamah hian," tiin a rawn tho a, bed sheet ni àwm tak pâr buai mai zàr chu pawt hlîmin," Eng nge i duh?" a ti zui leh zat a.

"Sanitary pads ka duh a," ka han tih chuan," Chu chu eng nge ni? Han zawng teh, a awm em?" a ti a, ka han en kual a, a awm loh hmèl riau mai, snacks lam leh sweets lam erawh a tam ve mai a.

"A awm lo a ni ang a... ka pi, ka mamawh asin le. In khuaah hian dàwr dang a la awm em?" tiin ka zâwt leh a, a awm tawh loh thua min chhàn hnu chuan," Mami, i thil zawn kha eng maw i tih kha? Ei chi a ni em?" tiin min zâwt leh a, ka chhàn hnu chuan," Ei chì ni bawk si lo, chu chu eng tihna nge? Mizo țawngin eng tihna nge tih tal sawi la?" a ti leh a.

Nuihza ru angreng taka ka hrilh hnu chuan," E, chutiangte chu kan nei reng alawm," tiin a țawng chu a'n ti zàwi deuh a, ka beng bula rawn kûn hnai deuh hian," Hming dangin i sawi a, tuna i sawi ang kha chuan sawi la ka hre nghâl mai tùr a nia, saw laiah sâwn ka dah biru bîk alawm," a ti ta sap sap a, a va la thuai a," Pakhat hi a tâwk ang em?" a tih chuan," Pahnihin ka lo la ang e," ka lo ti vat a, a va ri sat sat a, eng a va ti chu ni maw ka lo ti rilru a, hun eng emaw chen a va hmana a rawn phei leh chuan lehkha hian a lo va tuam a ni tih chu ka hre thiam mai a, ka nuih a za angreng khawp mai.

"Thil dang i duh tel em? Ngawi rawh aw, a kenna tùr sahãr ka han zawng ang e," tiin chhuar hnuaia parcel chu a'n hai rawk rawk a, polythene lian vak lo hi a rawn phawrh chhuak a, chutah chuan ka thil lei tùr chu min thunsak thlap a. Chu chauh chu lei tum mah ni ila a chêt dàn chu ka lawm reuh tlat avàng chuan thil dang pawh chu leisak nual ka tum ta a, ka en kual dan dan a.

"Mami, i mamawh loh chu lei țeuh suh, mi dangin lei tùr an chang ve lo palh ang, i mamawh tâwk chauh lei la aw?" a rawn tih leh tâkah phei chuan ka en hau tawh, a thil sawi dàn chu danglam ka ti lutuk a ni! Chutia ka en hau chu," Thinrim lo la aw, nang chu puitling i nih tawh kha, hmawmsawm kha chu nakinah naupangin an rawn lei duh ve ngei ang a, kan lo neih tawh loh chuan an lunghnûr dâwn ém asin," a ti leh sap sap a, inthlahrun hmèl tak si, ka hriat thiam duh hmèl takin min en a, a tìrah chuan ka hre thiam lo lek lek; mahse, a hnuah erawh ka va hre thiam si tak! Pawisa kîr tùr pawh ka lâksak duh loh phah ta nghe nghe.

Dàwr ațanga ka chhuah chuan ka pu chu ka hmu mai si lo va, ka thil lei chu ka țhutna bula dahin ka han ding vang vang phawt a. Naupang pahnih, truck hnunga lo chuangin min hmuh chuan inthiam loh hmèl deuh hian min melh zak zak a, ka hauh an ring a ni maithei. Kan piah deuhah a dang paruk vêl tùr hi an lo ding khâwm ve thung a, ka lam rawn hawiin an phun deuh sep sep a, an sawi erawh ka hre thei lo.

Chutih lai chuan ka hmuh theih chin kawng tàwp ațang chuan naupang rual khat hi eng emaw thil kual vua hian an rawn tlãn phei khat khat a, ka lo thlîr reng a, an vaw lìr thiam ka ti ngang mai. Han bahlah zeuh leh han tih sual deuh îk pawh nei lo chuan an rawn tlãn phei zêl a, ka vaw châk ve ta tlat pek a nih chu.

"Mama, khawngaihin ka lo vaw ve chhin ang chu, i phal em?" tiin a hnuhnung lama rawn tlãn chu ka ko ve ta tawp a, a din rual chuan a thil vuak, kual pap pawh chu a man ding zui nghâl zat bawk. Min en hé hâw phawt a, chutah," I va hmêl țha ve! I ngo bawk si!" a rawn ti ta reuh a, kei nula țhan kin tawh pawh hi a țawngkam chhuak avàng chuan ka lài țhelh chu a ni; mahse, lài lo ang takin," Ka vaw ve chhin dâwn aw?" ka ti leh a, ani lah chuan," I khûp a nat kha, i tlànpui thei lo ang," a ti leh ta khut reuh a. Kei erawh chuan," Ka thei ang, a na tawh lo, vawi khat chiah a ni mai," ka lo ti ve thung a.

Ka rin ang a lo ni miah lo! Dik taka vuak lirh chu a lo har zêk a, ngîl tak phei chuan ka thiam lo nasa, a kal kàwi nghâl zêl mai a, nui awr awr chung chuan ka ti lui zêl tho nain a lìr tluang ve thei lo, ka thiam lo lutuk chu naupangho pawh chuan min lo nuih ve nasa mai a, ka hawi chhuah chuan min lo thlîr țhap tawh hi a lo ni a; anni mai bâkah kan awmna bul vêla in kawng inhawng ațang pawh chuan lu a rawn dâk fur tawh bawk.

A tàwp nân tiin vawi khat chu ka'n lìr ve leh hrâm a, a fuh chho ta viau, a lìr tluang dâwn e tiin ka hlim rilru viau hman tawh a; mahse, engtin nge maw ka inbilh theih tehrêng ni, ka tlu leh ta thlawp mai, ka khûp ka tih nat tawh sa thíp nghâl vang vang chu ka hre nghâl ram ram, a va thîp leh dâwn êm! Tho chhuak nghâl mai lo chuan ka khûp chu ka'n en chiang a, a nâ dam lam pan ve țan tawh chu a rawn thî leh sûng tawh! Ka khûp lehlam leh ka kiu vei lam pawh a lo pilh nuan tho bawk a, thil ka lirh lah chu ka piah lawk banah  chuan insûin a lo vir kual ve nawk nawk bawk a.

"E he! A thî a nia!" Naupang pakhat chuan min rawn hnaih pah chuan a rawn ti a, a dang pawh chuan min rawn hnaih zêl a, pakhatin," Nula a ni sia, a tlu ve thei tho a nih chu," a tih sap chu  ka hre pha a, a bula mi chuan," A khûp thî saw a na ngawt ang!" a lo ti ve sar sar thung a, pakhat lah chuan," A ngozia saw! Sâp a nih loh pawhin sâp thlah chu a nih ka ring deuh tho," a lo ti ve leh bawk a, an țawng chu ti zàwi ve viau mah se ka hre pha vek si a, nâ ti ru viau mah ila ka nuih an tih zat avàng chuan ka țhen sak sak a.

Ka rin loh deuhin kut tha chak zet hian min rawn pawm tho nawlh a, truck seat-a min nghah pah chuan," Naupang chhia leh lutuk!" a ti nghut a, ka pu a ni tih ka hre thei nghâl. A thil sawi chu huatah pawh ka chãng lêm lo, chu ai chuan thahrui a ngahzia chu ka lo ngaihtuah daih! Nula chér chhia ka ni miah lo a nia, zo zeta min rawn pawm nawlh kha, a chak ka ti tak zet a ni, a upat ve tawh tehlul nèn. Truck-ah chuan rawn țhu lût ve nghâlin a han ti nung nghâl a, kei chuan," Kan lêt tawh dâwn maw? Ngawi lawk aw, naupangho thil ka'n sem lawk," tiin polythene chu ka ban zui a.

Eng mah sawi lova a tlàntîr tâk avàng chuan hmanhmawh zet hian ei tùr chu ka la chhuak a, naupang lamah chuan ka'n vawrh darh a, an inchuh ta nak nak mai," Ka lo kal leh hunah kan la inhmu leh dâwn u nia," tiin ka han au zui a, bân chu ka vai vak vak a, an zînga țhenkhat pawh chuan min rawn vai lêt ve bawk a.

Khua kan tlàn pelh hnu chuan," A thîp hle mai," tiin ka khûp chu ka han chhêm hoh hoh a, ani erawh a ngawi kur mai. Kawng a chhuk țan a, speed pawh kal lam ai chuan a muang thei deuh ang chu, kan insawh dawt dawt tawh loh ka beisei, ka tûn dinhmunah hi chuan insawh leh pawh ka zuam tawh lo, ka peih tawh rih lo a ni ber ang chu.

Ngawi renga rei ve tâwk tak kan tlàn hnu chuan," A khaw awm dàn kha a la thingtlângin a nuam reuh ngawt mai, dàwr nghâktunu kha a lawmawm tawp a, ei tùr lah kha lei țeuh a'n phal lo ngei bawk ah! Ka lei zawh vek a hlau a nih chu, ka làwm tak tak a ni," țawng duh ta na nâ nâ chuan ka ti leh ta ngê ngê a, ani lah chuan ka thu sawi chu a hre lo nge ni, hma lam chauhin a motor khalh lai chauh a ngaihtuah niin a lang.

"Naupangho thil bial khalh kha eng nge ni a hming? Ka hmu ve tawh țhìn chiang mai a; mahse, slum area naupangho tùrah ka lo ngai mai țhìn a," ka ti leh a, ka mitthlaah TV-a ads lo lang țhìn țhenkhatte chu ka hmu lêt uar uar a.

"Lirhbiang a nih kha," a rawn tih ve tâk supah chuan," Aw, a ni ngei ang, an vaw lìr alawm, han tih ve chiah kha chuan a har reuh phian asin, naupangho kha chuan an han hneh khawp a, an duh dàn dánin an khalh kual ni maiin ka hria. Nang pawhin i thiam viau bîk miah lo ang, a har ve reuh lutuk!" ka lo ti vat a, ka rin loh deuhin a rawn nui chhuak huk mai!

Ka melh ralh a, min rawn en chuang lo hian kawng lam chauh chu a lo la en a, a mit meng leh hmêl lang thei chinah chuan nuih za hmêl a lang lo. Naupangho khalh 'Lirhbiang' kha a naupan laiin a khalh ve țhìn ang em tih chu ka ngaihtuah zui ta mai mai a, a naupan lai pawhin ani hi chu a inla pà ve ngawtin ka ring, hei inla pà khar khar ang chî hi, a han țawng țhat duh loh vêl dàn ațang hian ka ring nghet tlat.

Kan thleng hnai ta, kawng zâwl chin kan thleng leh ta a; mahse, a ding ta tlat mai. Hre thiam lo tak hian ka en hau a, eng mah sawi lova chhuk thurhin kawng bula hnim hring buk deuh leih chu a țhãm ta mawlh mawlh a, eng atân chuan ti chu ni maw? Vawk chaw tùr a ni maithei.

"I khûp chu?" a rawn tih tâkah chuan ka meng nghâl zawk a, ka țhut dàn chu siam remin eng nge a tih dâwn pawh hre lo chuan," Ka khûp chu, eng atân maw?!!" ka ti hê hâw a, ka en nghâl vat a, thì chu a lo thî tawh bîk lo; mahse, a la thîp a ni. Chutih lai chuan eng emaw tui hi a rawn sàwr hnan zui ta mai a, a tìrah chuan engtin mah a awm lo va, a hnu lawkah chuan a rawn thîp ta vâwt vâwt mai a, ka khûp lehlama rawn sàwr leh a tum pawh chuan," Ka duh lo, eng thil nge ni? A thîp si," ka ti chiam a, ani chuan," Damdawi," a lo ti thûm dût duh lek chauh a.

Ka thlenna kawtah chuan min drop a, ka ding vang vang reng phawt a, hmm... inbual ka va peih lo tak! Pilh ka ngah si, a thîp dâwn hlawm si, ka kâwng lah chu a kham țhûm bawk a, ka inbual ai inbual tùr awm na se chuan, tunah tak hi chuan ka ngam sâng ngawt ang!

Ka inbual zawh chuan ka țhu dawr dawr phawt a, ka kâwng nat dàn êm êm chu, vawiin motor ka chuanna, min sawh nasat vàng kha a ni ngei ang. Eirawng bàwl pawh a va peihawm loh ve hetiangte chuan, ka nghei leh tawp mai dâwn em ni ang.

Che peih lovin ka țhu reng a, a hnuah ka period a rawn ințan tâk avàngin ka mu leh rih bawk a. Chaw chhum pawh ka peih lo, duh leh ka peih hunah thingpui sa tâwk tak ka in tawp mai ang. Khumah chuan a vial kawi thei ang berin ka mu a, ka tãi nâ chu ka dawm pah reng bawk a, țha deuha mut ai chuan hetia mut hian a nuam deuh zâwk tlat a ni.

Khua a rawn thim țan dêt dêt tihah chuan ka kawngkhàr a rawn ri dat dat a, peih lo zet hian ka tho chhuak a, bãi phei saih saihin hawn ka tum lai chuan hmêl hriat loh mi sual a nih palh tâkin tih ka ngaihtuah chhuak zawk a, chemtê ka la leh rih a, fîmkhur takin," Tu nge?" kawng ka hawn hma chuan ka ti leh rih a.

"Keimah, min hlau duh suh."  A aw ațang chuan ka pu a ni tih hriain tàwi khawmuang lovin ka hawng ta vat a, lo lûtin a thil khai pahnih chu dawhkànah chuan a dah a," Hei hi a sat lai takin i in dâwn nia," tiin flask ni àwm tak chu a kâwk a, pakhat ve thung chu," Hei hi chu charge a ngai, i mut hmain i khûp leh kiu damdawi hnawih theihnghilh suh ang che," a ti leh a, ka țawng ve hma chuan a inher vut a, a chhuak zui leh ta daih a.

Flask ni àwm tak chu ka han hawng chhin a, a rim ațang chuan soup a nih ka ring, engti tiha min rawn pe ngawt nge a nih le, pakhat chu ka en leh chhin a, tui lum ip current-a charge chi ang kha a lo ni a! Ka pu hi, ka period a ni tih eng tin nge a lo hriat theih le?!! Vawiin lamah khân ka la țan miah si lo, sanitary pads ka lei kha a lo hmu ru reng tihna em ni? Mahse, lehkhain a zuartunu khân a tuam vek bawk si a.

Kawngkaah chuan va dâkin," Ka pu, ka lãwm e!" tiin a kalna lam nia ka rin lamah chuan ka han au vak a, a hre pha ang em tih lam pawh ka ngaihtuah lêm lo, a hriat loh pawhin naktûk lamah làwm thu chu ka hrilh leh tho ang chu. Zanin chu amah vàngin ka hrehawm tawrh tùr a chanvèin a kiam phah thei dâwn si a, period lai hi chuan soup sa ver vawr in ila, tui lum ip hian tãi hi han dep tlat bawk ila, tãi nâ hi a chhâwk ve kuar țhìn a ni. Chuan, ka pu hi, a tlangvàl laiin a zei roh ngawt ang, a nupui pawh a duatin a ngaihtuah thiam dâwn a nih hi, a hriat reng mai, hmeichhe dinhmun a hre thiam tlat.

Ka mut țhat theih ka rin loh nèn, ka rin aiin ka mu tui phian a! Ka khûp avàng erawh chuan ka harh zauh zauh lo thei lo va, puan a sin theih si loh a, mut a chiang thei tak tak lo a ni; mahse, ka rin aiin ka mu țha tho tho.

A tûk zîngah erawh a va hrehawm tak! Ka khûp ka char ngam leh tawh lo va, a pilh nasa lo lam pawh ka char ngam chuang lo, a buaithlâk a ni tawp mai. Nuih pawh a za lo, ka țhen tlawk tlawk a ni ber. Țiațam loh nèn, ka la period zui, mi țawp tak chu ka lo ni. Ka pu hnêna Flask leh tui lum ip pe tùr pawhin ka chhuak peih lo, ka mu tlawk tlawk a ni mai.

Chawhnu dár 2 hnu lamah erawh chhuah ve hrim hrim ka duh avàngin thovin ka inphih harh a, tiang chuan inhawl chhuakin zàwi muangin ka kal chhet chhet a, ka kut lehlamin tiang ka vuan a, lehlamin Flask ka khai bawk a, ràl ațanga min lo hmutu awm na se chuan ka kal dàn chu fiamthu thawh nân min hmang nasa ngawt ang chu. 

Ka kal chak thei lo bawk a, ka pu awmna chu ka thleng har khawp mai. Inah chuan a lo la awm lo zui a, flask chu kawngkhàr bulah ka dah rih a, kal sawnin ka pu chu ka han ko vak vak a; mahse, a awm hnai lo a ni ang, a thãwm a reh êm mai. Haw leh ngawt mai chu dikin ka hre meuh lo va, kal ka harsat bawk nèn, bâkah, amah hmu lo leh làwm thu hrilh lova haw ngawt chu fuh ka ti chiah lo va, a in bula țhutna thing tum ațanga siam, tlo hmèl zetah chuan ka țhu ta rih a. Pangpârte chu ka en kual mai mai a, an pár chiai hlawm a, nalh pawh an nalh. An pu ang lo takin an theihtâwp chhuaha mawiin an pâr a ni àwm si a, a chìn ni thei pawhin an lang lo ka ti; mahse, a chìn an nih loh chuan tuin nge chîng chuang ang? Heta thawk a nia, a chìn chu an ni ngèi tùr a ni. Pangpâr ngaina mi a nih hmèl si loh, a ni lo sa, a awm dàn nèn phei hi chuan pangpár hi chu a inhmeh hlawl lo.

"Ka pu...!!" tiin in lam pana a lo kal ka hmuh veleh chuan ka lo ti vak a, a phut zawk ka rin nèn, a phu miah lo nia! Ka awmna lam a rawn hawi zawk a, chu zawng chu a ni mai.

"Nizàna i thil min lo pêk vàng khân làwm thu hrilh che ka duh a, ka lo nghâk char char che a ni. Ka lãwm lutuk aw, soup kha a tui bon tawp tawp! Flask kha kawngkhàr bulah ka dah, i lo awm si lo va. Chuan, tui lum ip erawh kha chu ka la kawl rih aw, i mamawh vutin ka ring chiah lo deuh a, a ni em?  A, i chungah hian ka lãwm, engkimah ka lãwm vêl vek a ni mai, a țûl tàwp a nih loh chuan tih buai che pawh ka tum tawh lo ang," tiin ka han ngawi leh rih a, ngaihtuah chhuak thutin," E, a tàwp nân, khawi laiah nge phone hi ka hman theih ang? Signal awm theihna lai min hrilh thei ang em?" ka ti leh zat a.

A lu thing deuh nur nur ka hmuh chuan," Aih, min hruai tùrin ka ti lo che a nia. Tak takin. Min hrilh tawp mai rawh, min kawh hmuh la, phone hman ka duh hunah ka kal ve mai ang. Ka kal thei alawm, hei tunah pawh ka rawn kal mai hi," ka ti a, dingin ka ke chu ka'n per chhin a, harsa ti ru tak chuan ka kal kual vêl bawk a.

*THIL ȚHA LAM A NIH PHAWT CHUAN 'KA TI THEI NGEI ANG' TI ȚHÌN ANG CHE*