☆DOZER☆ - 6 By Dingdi Pachuau

☆DOZER☆ - 6 By Dingdi Pachuau

"I kal thei lo, hmang rih lo mai rawh," a rawn tih tâkah chuan," Sawi mai a har viau loh chuan sawi mai la," ka lo ti ve thung a, hmanhmawhthlâk tak chu ni lo mah se khawvêl pang lehlama thil thleng pawh hriat a țha ve tawh alawm. Bâkah, ka lo ngaihtuah tlêm deuh hlek a, hàwnna tùra taxi hman tùr ka lo be lâwk miah lo tih ka ngaihtuah chhuak a  ni.

"I ke dam hunah," ti leh supin a kal sawn zui ta daih a. Au zuiin," Lal-pu, sawi mai chu a har viau em ni? Min hrilh mai rawh..!!" ka ti vak a; mahse, chhànna a awm lo, amah pawh hmuh zui tùr awm lovin a pil zui daih bawk. Hmm, he lai hmun neitute hi ka dem ta lek lek mai, heti khawpa mahni thu duh enkawltu atân dah rêng rêng, nimin lama fel ka tihna zawng zawng pawh kha a thai chhe zo țêp a ni. Han sawi mai se sentence khat bâkin sawi a ngai àwm chuang si lo va. Ngawi teh, ka zawng kual ve mai ang, min hrilh kher a ngai lo, ke ka nei ve alawm.

Chumi tlai pum pui chuan hmun sâng lam deuh panin ka inhawl kual a, phone ka phawrh kual sek reng bawk; mahse, tum khat lek leh signal awm chu sawi loh, ka phone battery a la low zui, a hnuah phei chuan a thi ta hmak mai a, luck lohna hi ka lamah a va țang chiang tak! Ka haw thlâk lamah lungte ka rap hrual a, ka tlu țhu leh hnawk zui a, ka khûp chu ka tih nat belh lo nain a thîp belh leh ta a ni.

Ka rilruin ka titau ru nghawng nghawng a, ka pu khân min hrilh ve mai se, hetiang teh hrep chu a! Ke na chung chungin ka inhawl chhuak ve êm êm a, ka battery a thi a, ka tlu zui leh a, chutah, ka tui a hãl êm êm bawk nèn, vànduaina hi ka lamah țangin vànneihna hian min hnuchhawn a nih tâk ber hi.

Vànneihnain min hawisan tâk miau avàngin ka awm ta tlawk tlawk a, ka chhuak peih tawh lo. Ei tùr pawh ka siam peih ngawr ngawr a ni, ka ti vêl mai mai, dik tak chuan ka vànduai theih lutuk avàng chuan ei in pawh ka hlauthãwng ru deuh hial tawh a, 'ka in sual ang a' emaw 'ka ei sual ang a, ka hâk ang a, ka thih phah mai ang' tihte ka ngaihtuah kai a, haw thuai thuai ka rilruah a awm phah. Awm rei tuma kal ka ni lo sa hrim hrim a, phone hmang thei ila, haw thuai ila a țha ang, ka khûp dam hun nghah kher a ngai lo.

Ka mumangah Benson-a ka la hmu zui, min rawn ûm zui niin. Kawngkhàr a rawn ri karh karh a, ka va hawn chuan nui sâng chung hian a lo ding reng tawh a, makti taka enin eng nge a rawn tih dâwn tih ka zawh chuan," Ka rawn zawng che maw le, Teruat. Ka hmu ta che a, ka lak ațangin khawiah mah i kal bo ka phal tawh dâwn lo," tiin zahna nei map lo hian min chhâng a, chumi rual chuan min rawn pan hnãi pah bawk a. Zak lo hi ka han ti khawp a, min rawn hnaih chu duh lovin ka lo hnung tawlh zêl a, ani lah a rawn tawlh hma zêl si, chutia ka tawlh zêl chu tukverh inhawngah chuan tla chhuakin tuala ka zuk insawh dawt chuan ka phu zawk mai a, ka harh phah ta nghê nghê a ni.

Ka ngaihtuah zui ta mai mai a, mumangah leh zêl pawh kan inbe țha hlei thei lo a nia, tunahte hian a hringnun engtin tak hmang ve ang maw? Ka ngaihtuah tùr chu a awm miah lo nain ka mumanga ka hmuh avàng chuan ka ngaihtuah chhuak mai mai a ni, hlim taka a duhthlan dàn ang ngeia a awm beisei ang.

Zîngah dâr 10 vêlah chaw tak tak ei peih lovin salad leh eng eng emaw ka siam chu eiin, tukverha dâk kual pahin ram hmunhma chu thla ka lâksak pah mai mai bawk a. Ka haw huna en lêt leh atâna ka tih a ni, ka hmêl lang ngeiin ka la têl bawk, a ngaihawm ve dâwn reuh êm asin, ka kal leh hun tùr ka hre hauh si lo, Angaihi thlàna kal huna hmuh atân pawh a țha dâwn lutuk tlat. 

Angaihi ka han ngaihtuah chhuah leh tâkah chuan mak ka inti ru kher mai. Dik tak chuan hetah pawh hian amah vàng liau liaua kal ka ni a, amah ka theihnghilh theih nâna kal ka ni hauh lo; mahse, ka hre chhuak lo ta zauh zauh chu a nia, mak ka inti a ni. Khati khawp khân min han kalsan ta kha hrehawm ka ti kha a ni a, ni tin dârkâr tin deuhthawin ka ngaihtuahnaah a awm a, hlim pawh ka hlim thei lo rêng a ni; mahse, tunah chuan chutiang chu ka ni ta miah lo, he lai hmuna ka kal hi ka tân ngei hian a lo țha a nih hi.

In thla ka lâksak kual lai chuan eng emaw ri deuh rek rek hi ka hre leh a, nizàn pawh khân chutiang thãwm chu ka hre tawh kha a nia; mahse, thli thãwin a tih rîkah ka ngai mai a nih kha. Tunah chuan thli a thaw lo, chuti a nih chuan chukchu emaw rûl emaw a ni thei mai ang em? Rûl tih ka ngaihtuah chuan hlauhthàwnna ka nei nghâl a; mahse, a reh leh vat a, Lalpu-a khân damdawi a phul chhuah vek kha, rûl tak chu a ni kher lo ang. Chuti a nih chuan chukchu emaw rannung tê dang eng emaw a ni ang, bangdàidêp pawh a ni maithei. Ka hmuh hlauh chuan ka rap hlum ngèi ngéi ang, ka hlauh loh zâwng tak an ni vek.

Ka han veh kual ta țhem țhem a, ka theihtâwpin ka thãwm ka dìm ve bawk. A awm sawn châk reuh zêk a ni ang, a rîkna chu a sawn zung zung a, pakhat mai pawh a lo ni lo maithei a ni, pahnih emaw pathum emaw pawh lo ni raw sek sek, ka hmuh hunah chuan an châk lo nasa ang, rah hlum nân ka slipper hi a chhah țha ve tâwk e.

Ka hmu mai thei lo va, ka zawn kual zak zak hnuah dawhkàn kil lamah rî ka hre ta," I va thi chiang dâwn tak!" ti rilruin thãwm nei hauh lo chuan ka veh phei a, ka han hmu chiah chu ka va phu nasa tak! Ka pên sawn tùr ka ke rahna tùrah chiah chuan a rawn tlãn phei hman chiah bawk chu ka țê ta chiam chiam mai! Zu rap chaih miau hek le, ka ke chu ka la sawn ngam tawh teuh lo mai! Chu thil lah chu ka rap fuh chiang a ni tih hriat takin ka slipper chhanah chuan a che deuh nak nak a, chu tak chu ka râp zual! Ka hlauh lutuk vàng chuan ka thlah ngam tawh lo va, kal sawn pawh ka ngam chuang lo, țê vawn vawnin hlauh lutuk avàng chuan ka țap lo chauh a ni!

"Eng nge ni?!" tia aw ka hriat chuan hlauh avànga khùr aw lek lek hian," Ka rap bet! Lo vaw hlum rawh!" ka ti thâm țuak a, ka ding kâk țù a, ka kut ni se ka hûm ruh tlat bawk. Ani chuan rawn en hnaiin," Sazu a ni maw? Khawi, i ke kha khai rawh," a rawn ti a, ka hlauh êm avàngin eng nge ka rah pawh ka hriat loh bâkah ka en ngam lo hrim hrim a, rannung dum eng emaw, țuan țha deuh a ni tih erawh ka hria, ka ke ka han khai sawn tùr pawh chu ka khai sawn thei mai lo nghe nghe, ka thâ a zãwi vek ni maiin ka hria.

Bang nghèng chuan ka ding hlè hlé a, ka thâ a la khùr nasa a, ka âwm dawmin ka maimichhîng vang vang bawk, chutiang chuan ka lungphu normal hun ka nghâk tawp mai a ni. A hnua ka zia deuh tâkah erawh chuan meng chhuakin ka han hawi kual a, ka hmaa Lalpu-a ka hmuh rual chuan ka thinrim deuh tlat pek a, en pawh en duh lo chuan ka inher deuh hmak a, signal awmna min hrilh duh mai lo kha ka ngaihtuah chhuah leh vàng a ni.

"I pângngai tawh chuan signal awmna lamah chuan kan kal tawh dâwn em ni?" a rawn tih chuan en pawh en duh lovin ka ngawi deuh reng phawt a, a hnu deuhah," Min hrilh mai la, hruai kher ka ngai lo, ka kal ve thei," ka ti ta sap a, min hruai kher ka phût lo, a buai ve tâwk tih ka hre ve a ni, bâkah, tih buai ka tum tawh lêm lo.

"Ka kal dâwn tho a," a lo tih chuan âwih vak lo hian ka han thaw hawk a, phone a hman duh hun chauha min hrilh a tum chu ka ngei rilru tho, nichinah khân rawn kalin sazu kha ti hlum mah se tunah tak hi chuan a chunga ka làwmna aiin ka làwm lohna bùk a la rit zâwk tlat. "I duh leh han kal rawh," tih mai pawh ka duh viau laiin min kalsan daih chuan signal awmna ka hre leh dâwn chuang dèr lo, phone hman ka ngai tawh bawk si.

"Sazu pawh i hmu leh thut maithei asin," a rawn tih leh chuan inherin ka bul vêl chu ka en kual vat vat a, sazu ka hmuh loh avàng chuan amah chu ka en leh a. Ani chuan," Hetah ka ti lo. Insiam rawh, kal ang," a lo ti sup a, a ding a, a chhuak zui ta mai a. Hmui pet fan fanin ka han maimichhîng vang vang phawt a, ka din ngaia rei vak lo ka din hnuah ka phone chu lain ka chhuak ve ta a.

Kein kan kal dâwn emaw ka tih laiin a bike hlui ve deuh tawh, ri ring zet mai chuan tlâng lam kawng chho zîm zetah chuan kan tlãn chho ta rawk rawk a, a tìrah chuan ka hlau khawp mai a; mahse, ka ti lang duh hauh lo thung. A khalh thiamzia leh a bike cheng a manzia ka mit ngeia ka hmuh chian hnuah erawh ka hlau ta lo, a kâwngah erawh nghet theihtàwpin ka kuah a, min tlûkpui ka hlauh vàng lam a ni lo, ka tlâk daih ka hlauh vàng zâwk a ni.

Rei lo têah tlâng chu kan han thleng chho ta thuai a, ka rin ang a lo ni miah lo, a lo thengthaw nuam reuh khawp mai a, ni a sa deuh nain thlî a lo thaw her her a, nuam reuh tak a ni. 

Kan chuan hnuai lam chu ka hawi sauh sauh a, ka han au ta vak mai a, ka aw thangkhãwk chuan min rawn chhàwn nghâl rawi rawi a, chutiang chuan vawi thum vawi li lai ka au leh a, a va nuam mai mai tak! Hei ngei hi ka lo mamawh a nih hi, ti hian ka lungawi lohna ka paih thâwl vek a ni, ka pu chunga ka lungawi lohna pawh a reh chawpchilh nghâl vek bawk, dam man a va awm hliah hliah tak!

Lalpu-a lam ka va hawi phei chuan ngun zet hian min lo en rùn reng lo niin, mak min tih hmèl viaua ka hriat avàng chuan ka zak deuh hlek a, ner khum zohin," A nuam reuh êm mai! Ka ke dam țhat lai ni se ka ti ngawt mai," ka ti a, ani chuan," Mi dangte pawhin nuam an ti viau țhìn niin ka hria," a lo ti ve a, "Kein kan kal dâwn emaw ka ti a," ka tih leh chuan," I ke a nat kha maw," a lo ti ve thung a.

Phone chu ka phawrh chhuak a, ani chuan," He lai deuhah hian rawn kal rawh, thinga han tun khian signal tum hnih a awm thei a, tlêmin a zia deuh," a rawn ti a, phone chu ka han en a, signal chu a la awm miah lo tak tak a. Ka pan phei a, a thing sawia ka han tun chuan signal tum hnih a rawn awm nghâl țhãih tih ka han hmu pha a, data ka on sa bawk nèn, a rawn ri nghâl zut zut mai.

"I hmang ve dâwn a ni lo'm ni? Dah ve ta che," ka tih chuan," Hmang phawt rawh," a lo ti mai a, phone chu ka dahna ațanga lâk sawn ka tum chuan," La sawn suh, hmun dangah a hman theih loh," a lo ti leh a, en hauin," A nih, ti hian ding reng chung hian ka hmang ang maw?!! Țhuin a hman theih loh em ni?" ka ti a, ani chu a lo bu nghut ringawt a.

Thurûk sawi tum pawh ni ila tih ngaihna a awm hlawl lo; mahse, thurûk sawi tùr ka nei lo hlauh, ding chungin loudspeaker on-in ka biak duh nèn chuan kan inbe ta làwng láwng a, mi dang hriata pawi tùr a awm lo hlauh chu a zia e. 

Ani erawh chu thingah chuan a han lâwn a, loudspeaker pawh on ve lovin pângngai takin a han be bîk a, ka ngei ru roh tak tak! A tìrah khân min hrilh țha ve mai se, ka lâwn thei ve maithei a, a hriata phone hman lùng lúng kher kha a ngai lo tùr. Inbiak lùng lúng kha a lady-like lo va, ka duh bîk lêm lo asin le; mahse, a làwnna chu ka han en chho țha leh a, ka làwn theih tak tak pawh ka ring chiah lo, thing ka lâwn ngai bawk si lo va, chutah, ka khûp a la dam chiang bawk si lo.

Phone a hman chhûng chuan ka kal kual a, nawm chu a nuam chiang a ni. Kan awmna lam kha ka zu thlîr thla a, he lai ațang hi chuan a hniam ve raih raih viau a, a lan dàn ațang pawhin a nawm hmèl viau tho, a nuam rêng bawk a. He lai hmun neitu hi chu a vànnei ve ngawt mai, heti khawpa hmun nuam han neih bîk chu, a boruak a thiangin eng pollution mahin a ti buai phâk dèr mai si lo va, duh berte nèn phei chuan vàn ram tla fual, lei eden a tling tak meuh meuhin ka ring.

Ka lêt phei chuan thing ațangin a lo chhuk tawh a, ngawi rengin min lo en reng tawh. "In inbe țha thei maw?" tiin ka han zâwt a, a lo bu nghut a, chutah," I en kual zawh tawh chuan kan chhuk thla tawh dâwn em ni?" a ti sup a, kei pawh chuan nuam la ti viau mah ila a buai theihzia hriain chhuk tùr chuan kan insingsa nghâl a.

A upa ve tawh viau a nia; mahse, a bike khalh han hneh êm êmzia chu mak ka ti zâwk a ni! A nghet churh mai ni hian ka hria, kei pawhin hlauhna pakhat tê mahin ka nei lo va, amah chu ka ring tâwk êm êm a ni. Chhuka kan tlàn chak deuh laite chuan ka au thla rawi rawi a, ka hlauh vàng a ni lo, nuam ka tih vàng záwk a ni, amaha rinna ka nghat ngam lutuk chu mak ka inti hial zâwk, ka hriat chian mi tak ni se chuan ka hre thiam, ka la hre chiang  hauh bawk si lo.

"Bike i khalh thiam em?" tia min zawh chuan," Scooty ka khalh thiam," tiin ka lo chhâng vat a," Ka rin dàn chiah," a lo ti zui sup a," Car pawh ka khalh thiam," ka'n ti zui leh a, ka sawi zo chiah chu ka inchhîr zui leh deuh thut. Min záwt pawh a ni si lo va, insawi thei min tih loh vêk pawhin naupang chhia min ti ngawt ang chu, a màwlthlâk ngawt mai.

Chuta țanga ni hnihna, zîng dár 10-ah haw tùrin ka insiam a, ka sùlhnu zawng zawng ka en lét a, tih hnawk leh thil theihnghilh ka nei lo tih ka hriat chian hnu chuan bag chu ka ak a, Rûn chu ka kalh țha a, pâwnah chuan ka pu chu ka lo nghâk a. Min thlah kher ngai ka ti lo nain a tih dàn a lo ni ve a ni ang, gate bul thleng min thlah  dâwn a ni. Heta țangin gate kha a hla lutuk lo khân ka hria a, ke pawha kal thlen ka huphurh lêm lo; mahse, chahbi chu pêk a ngaih dáwn tho avàng leh gate pawh ka pu hawn leh tho a ngaih dâwn avàng chauhin ka lo nghâk a ni.

Motor thãwm a rawn awm a, ka riahna rûn leh a bul vêl chu ka'n en kual leh a, ka ngai ve reuh ngei dáwn tih ka hria, ka hmu leh thuai thei rih àwm si lo va, Pathian zâra ka dam chuan kal chu ka la kal leh ngei ang chu. 

"Țha tê têin lo awm ula, ka rawn hmu leh ngei ang che u, dam takin kan inhmu leh dâwn u nia," tiin ka phun sap sap a, ka hawi kual leh vek phawt a, chumi hnuah ka khûp belkàng dam chho thak țan chu tuai deuh nak nakin ka pu lo tlãn phei lam chu ka hawi ve ta chauh a.

Truck chu ka bulah a rawn ding a, ka țhu lût thuai a, hma lam chu ka en ding nghâl ngar a. He truck hlui tawh lam pawh hi ka ngai hialin ka ring, hlui ve viau tawh mah se ka duhna leh mamawhna lamah eng mah sawisèl leh chhiatna nei rêng rêng lovin min hruai ve thei zêl chu a nia, a duty a hlen țha êm asin, he truck țãwng ve tawh, upa ve tawh tak hi truck thar țha tak aiin a pawimawh nêp bîk rêng rêng lo, an tih theih a inang vek tlat.

"I va ngawichàwi ta ve!" ka bula țhuin a rawn tih chuan," Ka lo țawng tam viau țhìn tihna a nia, ka duh tawh lo," tiin ka lo chhâng a, a nui hawk a," I inhmeh alawm," a rawn tih leh chuan ka melh phei ralh a, chu mai duh táwk lo chuan ka en țha leh ngat a; mahse, inhre chhuakin ka hawi sawn ta thuai a.

Ka pu a ni emaw ka ti a; mahse, a ni lo em maw ni, a nih loh tal pawhin a lo inmêt fai tawh a ni ang, a hmaa puan dum hlai hlawp hlawpa lu khuh bûra biang leh khabe hmul pawh zuah buk deuh ang kha a lo ni tawh miah lo, a lu erawh a la khuh tho nain a biang vêl erawh a lo ti fai ve tawh a, chu vànga en chiang leh ngat kha ka ni.

Ka ngawi reng leh thei lo," Ka pu kha i ni em? I ni tiraw?" tiin ka dìlchhût a chhuak leh tlat pek a, a aw chhuak leh a awm dànah erawh mi dang a ni chuan ka hre chiah lo va; mahse, inti bawrchhawr deuh tawh lova a han awm meuh chuan keimah ka inringhlel leh deuh si a, 'amah a lo nih loh hlauh tâkin'  ka ti a ni.

"Tu nge nia min hriat a?" 

"I inmêt fai deuh sia... ka pu kha i ni tak tak tiraw? Nge... a fapa em ni i nih?" ka ti leh a, tunah chuan a hmêl tak tak a lang chiang thei ta deuh a, a hmaa putar kha hmuh tùr a awm mang ta tlat si lo lai hian min tibuai.

A lo nui hawk a," Chu, min lo hmu tar viau elo?" a ti leh a, kei chuan nuam lo a tih phah ka hlau deuh a, zahzèlah," A, tar viau chuang lo ve, a hma khân i inzuah buk ve êm a ni, min dem thei lo ang," ka han ti phawt a, sawi zawm lehin," 'Ka pu' tiin ka ko ringawt lehnghâl che a, kan inrual deuhthaw hial lo maw?" ka ti leh a, chu zet chuan a nuih a ti za ngang a ni ang, a nui chhuak ta hawk hawk a.

"Kum 20 mi hmêl hmuhin min hmu tihna a ni maw?" A nuih za zualpui a reh hnua a rawn tih leh chuan," Kum 20 ka ni ngawt ngawt lo aw, ka pèl thui ve tawh chiang êm!" ka lo ti vat thung. Kum 20 te zawng, ngaihtuah zâwng ringawt pawhin a nuihzatthlâk e a! Ka pelhna a rei ve tawh chiang êm mai.

Gate bul kan thlen chuan a ding ta a, pâwn lamah chuan taxi pawhin min lo nghâk vàng tawh nghe nghe. Motor ațanga ka chhuah chuan hre chhuak thutin Rûn chahbi chu ka pu hnênah chuan ka han pe a, nuih sakin," Ka lo kal leh hunah a hmun ngaiah khân ka rawn thleng leh ang," ka ti a, ani pawh a lo bu ve nghut a, ka en chhoh avàngin a biangki veilamah ser a lo nei reng a ni tih ka hmu ve chiah, a la inhmeh êm êm zui! A ti lang pà ka ti leh tlat.

Gate chu a hawng a, ka bag nèn ka chhuak a, min lo nghâktu taxi driver lah chuan min lo en duh khawp mai lehnghâl. A chhan ka hre chiang, kekawrtláwn nei tawh hek lo i, kekawrbùl tan rual lo zet ka ha miau mai a, min en duh lo thei lo.

Taxi-ah chuan ka bag chu ka dah lût a, hawi lêt lehin ka pu chu ka'n bye zauh a, ani erawh chuan ngawi renga dingin min lo en reng ringawt, a kut pawh min rawn vai lêt ve lo. A nungchang ngêng deuh ngulh leh fel ru phian si saw, ka ngai ngèi ngéi ang, kâr khat chuang ka hrawn kha a ni ve a, mamawh ka neih apiang a hnênah ka thlen zêl a, min tihsak zêl bawk a. A fel ve êm asin, ngaih a ba ve tlat.

Kan tlàn liam dáwn chuan vawi khat ka hawi lêt leh chhin a, ka pu pawh a dinnaah a lo la ding ve reng mai, ka ti buai nasa sia, tunah chuan a thaw huai huai thei tawh ang chu; mahse, min hre chhuak ve zauh zauh tho ang, ka ti buai hneh ve êm mai a, ngei tùr atân tal pawh min hre chhuak ve țhìn thoin ka ring.

*THIL ȚHA LO LAM NGAIHTUAHIN EMAW 'KA THEI VE LO ANG' TIH RILRU PUIN EMAW AWM NGAI SUH, MAHNI INPAWH HNIAMNA A NI NGAI E*