☆DOZER☆ - 7 By Dingdi Pachuau

☆DOZER☆ - 7 By Dingdi Pachuau

Chaw ei laiin ka pain ka zinna lam chanchin min zâwtin nuam ka tih leh tih lohte min zâwt luam a, kei pawhin thu dik takin ka chhâng a, nuam ka tih thuin; ka nu erawh chu a ngawi reng a, a hnu deuhah erawh chuan thil dang rawn sawiin ka pa chu a titi hranpui ka ti mai, keima lam chanchin hriat reng chu a lo ning a ni ang e.

Ka haw ațanga ni hnihna a ni leh tawh a, a ngai tein ka hun ka hmang chho leh tawh! Nguainain min rawn bàwm leh tawh a, hmun nuam reh raih mai ațang khân bengchheng chawlh lohna hmunah ka awm leh tawh a, zàn rei lamah chuan tlêm chuan a zia ve deuh. A bengchhen zual châng phei chuan ka zinna kha ka ngai vawng vawng, dik tak chuan kha hmun reh nuam lutuk khân a zàwlaidi min lo tât hman ngei a ni ang tih tùr khawpin ka ngai vawng vawng a ni.

Angaihi boral hma khân ka hnà ve kha ka bànsan tawh a, bànsan mah ila Pathian zârah ka intunnunna tùr khawp hna hi chu ka hmuh zawh loh ka inring chuang lo. Ka pa pawhin ka bànsan tih a hre tawh a, ti leh tùrin min nawr chuang lo, ka duhthlannaah a dah tawp ni maiin ka hria. Ni e, ka chungah hian thu neih chiam a tum lêm lo, hostel ațanga ina ka haw duh loh châng pawhin min en liam tawp țhìn a ni. Kei khân ngaihsak leh hmangaih kha ka thlahlel ngawih ngawih a, chutih laiin kan in chhûngah khatiang kha ka dawng ve ngai si lo va, kha vànga inah pawh haw duh ngai lo kha ka ni a, chu chu a hre chiang ka ti lo thei lo; mahse, ka pa hi ka haw hauh lo, ka têt laia min enkawlna, min hmangaihna leh ka tân thil țha ber ber duha theihtâwp min chhuahsaknate kha ka theihnghilh bîk lo, bâkah, ka pa a nia, a fanu ka ni. Ka laka pa a nihna kawnga a tih tùr lamah demna hlek chu ka nei ve tho nain a lak ațanga inlâk hran viau erawh țha ka ti lo va, hrehawm ti taka nuntîr ka duh bîk lo a ni. Thil pahniha duh thlantír phei chu ka tum lo hulhual, chu vàng tak chuan mahni ke ngeia din theih hi ka tum ruh bur țhìn, chu chu Angaihi ațanga ka zir chhuah a ni a, ani kha tawng lo ila tumruhnate hi ka hre thiam pha ve ang em aw ka ti hial a ni.

Nula ni ve ta chu, hna thawh nei lova ni tina ina han awm ngawt mai chu a zahthlâk ka ti ve a, chubâkah chhûngte lakah a inthlahrunawm ve bawk a, ei tùr ka duh ve tho bawk si nèn, hna eng emaw tak ka zawn leh chu a ngai a ni, Lungleiah hi chuan a vâng maithei a, Aizáwl lamah phei ila eng eng emaw exam tùr pawh a awm awlsam zâwk ang a, hna thawh tùr hmuh a awlsam zâwk ang.

Ka pa ka hrilh ve a, ani pawh chuan a lo rem ti ve leh mai a; mahse, a duhna erawh min hrilh zui a," I duhna hnialsak che hi ka duh ngai lo va, hlim taka i awm hi ka duh ber bawk; mahse, khuta i hna ber i chawlhsan rau rau chuan kan bulah awm ve tawh rih la chu ka ti khawp mai. I naute nèn pawh in inpawh zual thei deuh ang a, hetia in awm hran reng chuan unaute ngei ngei pawh in inmihran mai ang tih a hlauhawm a ni," tiin. A dik chu ka ti reng a; mahse, ka pa duh dàn ang hian awm ta ila, ka kum a upa chho zêl ang a, hna nei lovin eng chena rei nge ka awm ang, nakinah hna ka zawn hunah ka kum a over mai ang tihte ngaihtuah a ngai ve tho a, hlim lo tak leh inthlahrung taka awma ka nu mitmei vêng reng rênga awm chu ka ngaihtuah thui ngam lo, ani a hlim lo ang a, chhûngkaw nu ber a hlim loh miau chuan inchhûngkhur boruak a nuam thei ngai lo ang. Ka tel lovin hlim takin an awm thei a, ka tel avànga an hlim loh chu ka duh hauh lo bawk.

Aizâwlah, pateate ka va fin phei leh rih a, heta țang hian exam awm tùr apiang ka bei ve ang. Ka pa hian min duatna leh min hmangaihna ti lang huam lo mah se min ngaihtuah êm êm reng tho a, khawsak harsa leh hrehawmin ka awm ngai lo. In luah hran ka han sawi rîk ve deuh chuan patea'n a lo rem ti lo bur mai a," A ngai hauh lo, hna hmu tawh la chuan thuhran, chutah pawh chuan ka rem ti kher lo maithei. Tûn atân chuan in luah hran lam kha chu sawi ri tawh rih suh," a ti zêk a, ka ngawi rauh rauh mai.

Angaihi thlàn ka tlawh chuan mahni chauha kal ka ni bawk a, ka mittui ka sûm leh thei lo. Ka han țap leh rih a, a tâna pangpâr ka kensak chu dahin," Țhiannu, hei chauh hi i tâna ka tih theih chhun chu a ni tawh mai sia tiraw? I awm lo va, ka mal tawh sizia hi, i reh vawng vawng a, i reh hlen tawh dâwn chu a ni si a, min kalsan thei i la nih loh tehlul nèn, ka la mamawhzia che hi hria la chuan e min kalsan hauh lo ang tiraw?" tiin a thla chu ka be mawlh mawlh a.

A reh vawng vawng a, ka piah hla deuh takah chuan thlàn kal chu an awm ve tho nain an hlat deuh avàngin an thãwm a hriat phâk loh a, ni a sa vawl vawl bawk sia, a reh tak tak a ni.

"Hei en la, i kal châk deuhna hmun kha, keimahin ka va kal a, a nuam teh asin! Kal dùn ila nuam i ti dâwn tih ka hria a ni. En la, a mawi asin, i hmuh atân liau liau thla ka rawn la țeuh alawm," tiin phone-a thla ka lâk hrang hrang chu ka hmuh a, a thla ka bia a, ka bia ka ti tak nain keimah leh keimah ka inbe mawlh mawlh a ni zâwk ang chu.

Ka mitthlaah a hmun enkawltu ka pu a rawn lang a, ani pawh a ngaihawm ve vung vung ta mai. Ka ti buaiin ka chawk cham hneh viau a nih kha, ani lah khân dawhthei takin min dãwm zêl a, țawng tam lo viau mah se min sawisêl chuang lo va, ka mamawhnaah min hruai zêl a nih kha, kan inhmêl hriat țha pawh a ni lo; mahse, ka chungah a fel ka ti, kei anga ti buaitu kha tawng ve tawh tak ang maw?

"En teh, Angaih, he hmun enkawltu hi maw, pa upa lam deuh tawh a nia; mahse, a fel roh lutuk. Min hriat kha, ka dîlchhût a, ka ti buai hneh khawp mai bawk, chuti chung chung pawh chuan dawhthei takin ka mamawh chu min tihhlawhtlinsak zêl a nih chu. Hmu ve la fel i ti ve tho ang, a ngêng ve deuh e ti mah ila a nèlawm ka ti tho, kan pahnihin kal dùn phei ila chuan kan ngam dâwn teh asin, in inkàwm ngeih phianin ka ring bawk," ka ti leh mawlh mawlh a.

*******

Hna zawng chuan exam awm thei apiangah chuan ka exam chho ve ta a, hope awm lêm loah pawh chuan 'chàwi a awm lo, experience atân pawh a țha' tiin ka bei zêl a, ka tling lo țhìn rêng bawk. Dàwr nghah leh school-a han inhlawh ringawt chu ka peih chiah si lo va, hna țha hmuh hma chu inhlawh ve àwm tak ka nih laiin ka tum lo, ka thawk ting tang ang a, bànsan leh thuai a ngai si ang a, ka thawhnate ka ti buai mai mai ang ka ti ve tlat a ni.

Mahse, patea'n," Awm mai mai tùr a ni lo, tûnlaiah hna a vâng tawh a,  engtikah nge i hmuh dâwn a hriat loh. Tunah kan office-ah sâwn hna pakhat thawh tùr chu a awm a, hun ãwla inhlawh nân a țha ka lo ti ru viau a, i peih chuan. Computer kha i thiam a ni lo'm ni kha? Pu ber bulah ka lo sawi chhin ang," a ti a, an ina awm ka ni a, min huphurh hauh lo tih chu hre tho mah ila chutia a rawn sawi chhuah tâk sî-ah chuan lo hnial chu ka duh bîk lo. Computer chu thiam ve e, ka mamawh ang chin chinah chuan.

Kâr khat hnuah pateate office-ah chuan ka kal ve ta a, ka hna chu computer-a thil pawimawh chhut luh a ni ber ang chu, a hmaa lo thawk țhìnin pasal a nei ta thut a, a pasal chu an khaw lamah zirtîrtu hna thawk a ni a, ani hlawh ai chuan a pasal hlawh chu a sâng daih zâwk si a, a hna chu kalsanin pasalte khuaah chuan an awm nghâl ta a ni. Office lamah chuan thawktu mamawhna a lo sâng viau tawh a lo ni a, a nghet a ni lo bawk a, pu ber rem tihnain ka thawk ve ta rih a ni.

Hna harsa a nih loh bâkah ka huphurh lo hrim hrim bawk a, a zia viau. A tìr lamah erawh kha chuan  tlêmin hna kha a lo tam ve deuh lo thei lo va, a lo inchhêk kháwl tawh miau avàngin. Office hna thawkho lah chu an senior tawh hlawm viau mai a, patling pui pui niin an chàwl teuh tawh hlawm viauin ka ring, hmeichhe awm chhun lah chu nula senior over lutuk tawh ang chi hi a nia, zung pawh ni se tlêm tê hîng deuh tùr ang chi a ni tawh! Thawk thar ber ta chu, nula ka lo la ni bawk nèn, min fiam peih hlawm viau a, fiamthu an duh a, chutih rual chuan ka chungah an thilphal hlawm viau thung. Patea pawhin ka chhùn ei tùr man min pêksak chang lo, mi dang chuan 'ka treat ang che' an ti diat diat a, ka ei man ka pe hman ngai lo. An bula ka țawng duh loh tehlul nèn, ka chungah an fel hlawm ka ti tak tak a ni.

Hna ka ngaihven pah reng tho a, ka dìl theih chin apiang chu ka dîl char char a ni mai; mahse, ka tlinna tùr ngei nia ka hriat veah pawh chuan ka tling lo leh țhìn a, a châng chuan mak ka ti; mahse, a hnua ka hriat leh țhin dànin Political fitness vànga tling an lo ni țhìn a, kei zawng hmêl hriat ka neih loh bâkah hetianga tlin hi ka tum chhin ngai lo va, ka ngam lo bawk a, ka tling ngai lo rêng a ni.

Ka patea hi kohhrana inhmang lua ni lêm lo mah se Pathianni a lo thlen tawh hi chuan inkhâwm loh a phal ngai lo va, anni an inkhâwm chuan ka tân inkhâwm loh a mawi loh avàngin Pathianni apiang chuan ka inkhâwm ve zat zat a, țhian siam harsat viau mah ila a lo rei ve deuh hnuah chuan hmêl hriatte ka lo nei ve lo thei lo va, inhawng viau lo mah ila min lo kàwm ve duh an lo awm a, țhalai thil tihnaahte pawh kan chhuak ho ve ta zauh zauh a. 

Ka kawm deuh bîk zíngah ti mai ang, Zela leh Ruthi ka ngaina deuh ber a, anni pahnih hi an țawng duh a, min be peihin kan inah hial min rawn lènchilh țhin avàngin ka kàwm deuh bîk lo thei lo. A dangte nèn hi chuan thil tih kháwmnaah kan inhmuin kan inkàwm a ni mai a, in lam thleng min ûm zui peihte hi chu en dàn pawh a lo dang a, rilruah an lo tla na duh deuh bawk a lo nih hi.

Zela hi Aizawla school lãr ve tâwk tak pakhata zirtîrtu hna thawk a ni a, Ruthi erawhin thuamhnaw dàwr a nei thung. Kei hna mumal la nei lo ka ni a, rualawh a nâ ka ti a, bâkah, chhûngkaw dik tak bula awm lo leh fahrah ka nih avàngin an lakah pawh ka inkiltawih ru deuh țhìn a, chhûngrilah nuam lo tihna ka nei țhìn. Anni chuan min en hrang hauh lo, fel pawh an fel lutuk; mahse, ka inthlahrung tho.

"Tûn Saturday chu, Durtlâng lamah kan han lêng chho dâwn em ni ang? Kâr tàwp a ni ve a, chawlh hahdam pahin ka nuteite huanah theite kan lo ang a? Ruth, nang pawh chàwl ve la?" Zela'n a tih chuan ani chuan," A nuam ngawt ang chu! Boss berin i tih te chuan kan chàwl mai a ni ang chu. Kal ngei ang u," a rawn ti ve a, min rawn enin," Teruat, i hman ang tiraw? Kan chhuahho khàt êm hi," a rawn ti leh a.

Pateate pawhin an phal a, ni tina ka hna chu hahthlâk lo mah se han chhuah harh ve pawh chu châkawm ka ti ve tho. A rûk tak chuan ka phûr ve tho a, Durtlâng lam phei chu ka kal khât khawp a, Angaihi nèn khân vawi khat chu kan kal dùn ngei mai, chu pawh damdawi inah damlo kanin kan kal a, chu zawng chu a ni mai, ka tân zawng thil thar zêl a ni mai e.

Inrinniah chuan kan chhuakho ta ngei a, Zela'n car a rawn keng a, min rawn lam kual a, kan tlãn ta vang vang a, traffic jam-ah kan tâng ve hlek tih lohah chuan tlàn a nuam khawp mai.

Zela nuteite inah chuan kan lût phawt a, an in hmun chu a remin an in pawh a nuam khawp mai. Kawt záwl zau nuam tâwk tak an nei a, phùl a țo vek a, phùl lah chu enkawl ngun tih a hriat hliah hliah a, nimin lamah ruah a sûr bawk a, boruak chu a vâwt lam mah mah em aw tih tùr a ni, nuam tak a ni.

A nutei chuan min lo dawngsawng a, Zela'n a lo hrilh sa vek tawh a ni ang, kan hmingin min lo ko thei nghâl a nih chu! A țawng duhin min be nghâl bawrh bawrh a, a nèlawm tak tak a ni, a tunu kum 4 vêl mi nèn chauh an lo awm a, Zela chuan," Dearest Cassie hi a hmêl țha a nia aw!!" tiin a pawm nawlh nghe nghe a, ani pawh chuan nêl tih hriat takin a lo kuah ve châk châk bawk a.

Zela chuan," Khawnge patea hi?" tia a nutei a zawh chuan," Room lamah lehkhabu a chhiar a nih àwm kha, a rawn chhuak țêp ang, in rawn thleng tawh tih a hre lo a ni maithei," tiin a lo chhâng a. A sawi ang tak takin, a sawi zo deuh chiah tihah, filter tui ka in lai tak chuan room ațangin a rawn chhuak a.

"E, in lo thleng chho tawh a ni maw?  Zela, thingpuite in lo in tawh em?" a rawn ti chhuak a, a aw ka hriat veleh chuan ka en vat a, a aw chu ka hriat hnu ang ka ti rêng a ni. Office-a kan pu ber a lo ni, Zela nutei pasal lo ni reng chuan!

"Ruattei chu, i lo tel ve nawlh a! Ka rin loh deuha ka han hmuh che chu le! Zelate nèn hian in lo inhria a ni maw?" Min rawn hmuh chuan a rawn ti ve nghâl a, kei pawh chuan mak ka ti viau mai, office-a pu ber a ni bawk a, zahawm ka ti a, nuam lo ka ti rilru viau bawk.

Mahse, an fel nupa êm a, an țawng bawrh bawrh a, kan inhriat dànte sawi chhoin kei pawh ka țawng ve ta țeuh mai. Thingpuite kan in zawh hnuah an huan lama kal tùr chuan kan chhuak a, Cassie pawh chuan min zui ve zêl a, Zela nutei chuan," In lo lo țeuh dâwn nia, a tlâk ral mai mai ai chuan mi dangte pawh kan pe ve ang a, nangni pawhin in hàwn țeuh ang chu," a ti a, eng thei nge kan lawh dâwn pawh ka la hre ve miah lo.

An huan chu a lo hla hran miah lo va, âwih pawh a âwih hran lo. Âwih ve deuh lai chu a awm ve ngei mai a; mahse, zãwl a tam záwk. Thei kûng chi hrang hrang a lo ding țhuau țhuau a, Theihai, Tengtere, Theitê, Chèngkek leh Kâwlthei kûng chu ka hriat chian langsàr zual an ni. Theihai leh Theitê rah chu chiang takin ka hmu a, Theitê phei chu a lo hmin sen duk tuar nghe nghe a, a rah tam bawk sia, a sûr nghung mai a ni.

"A va rah tam êm êm!" kan ti chùl a, chu chu kan lo phawt a, a kûng a sâng si lo va, lawh a nuam khawp mai; mahse, nimin lama ruah sùr vàng khân a hnuai erawh a lo nãl deuh a, ka han tawlh thlu leh hrâm pek a nih chu, ka tho rang teh asin. Tlûk hi ka inhmeh ve tawh hrim hrimin ka hria, ka zinna lama ka tlûkna avànga ka khûp pilh a dam fel ve chauh a nia; mahse, tunah hi chuan mawng sawh zâwngin ka tlu a ni mai a, eng mah pilh a awm ve lo, ka mawng pawh a berh hran lo. 

Ka tlûk avàng chuan Ruthi leh Cassie nuih a za khawp mai a, Zela erawh a lo insûm hrâm hrâm thung. Kei chuan," In nuih a zat chuan nui vak vak rawh u, inthlahrung miah suh u, a na hleinem," ka ti a, chu chuan an nuih a ti za zual a, an nui ta vak vak a, kei pawh ka nui ve tho; mahse, ka zinnaa ka tlûk lai kha ka ngaihtuah lét daih thung.

Theihai hmin lam deuh kan lo leh a; mahse, keini hmeichhia chuan kan lo pha ve tawh lo. Zela'n a lawhna tùra an dah mau sei tâwkin a hawlh thla a, chu chu kan lo chhar a ni. Kan ei chhin a, a thlum tui êm êm zui lehnghâl a, kan kal chu a inchhìrawm loh hliah hliahin ka hria.

Chuta țang chuan Office-a pu ber chuan kan inhmuh chângin min be ve ta zauh zauh a, biak hmasak pawh ka chang hman lo. Pu ber a nihnaah biak ka hrehin hmuh ka hreh deuh țhìn a, han biak hmasak phei chu ka hreh ru ngawih ngawih; mahse, a lo fel êm mai, kei ang mai mai, a nghet lova chhawr pawh min han be ve bawrh bawrh duh a nia.

Hna zawnnaa ka exam pahnihah ka inziak tling ve ve a, personal interview erawh ka la hmachhawn dâwn thung. Ka huphurh hran lo nain politics a inrawlh leh ang tih erawh ka hlauthãwng deuh a, a inrawlh hlsuh chuan ka tling leh thei lo ang tih ka hlau a ni.

August ni 5, Zirtàwpnia interview tùra ka chhuak tùr chu ka inuluk ve viau a, ka tlin ve ngei a ngai tawh a ni. Ka duh ang thlapa ka insiam hnu chuan patea scooty chu ka la chhuak a, a hmun tùr lamah ks tlãn ta vang vang a, hma deuh taka thlen ka duh avàngin ka chhuak hma ta deuh a ni.

Dàwr kawt remchâng laiah ka ding zawk a, thil ka lei lawk a, pawisa ka pe zo ka hawi chhuah chuan ka awmna dàwr opposite-a dàwr chhûngah chuan Rûn enkawltupa ka pu ang deuh ka hmu thãnin ka hria! Ani hi Aizawlah a rawn kal ve tihna em ni ang! Mit khap sak sakin ka en deuh reng a, sîr lam hawi deuh zâwngin a ding a; mahse, min hnungchhawn záwngin a ding leh thuai a. Ka en reng a, ka pu ang lo takin ani saw chu a inchei fai pângngai viau mai, puan lukhum pawh a khum lo, a lu chu vikings hairstyle-in a met a, a meh fai loh lai sam chu a sei nghuau a, phiar vek a ni bawk.

*HARSATNAIN A HRUAL FÊP TAWH MIHRING CHU A CHHEL A, MI TAM TAKIN 'A HARSA ÊM MAI' AN TIH ȚHINAH PAWH ANI CHUAN HARSATNA NEI LOVIN A TUAR CHHUAK THEI MAI ȚHÌN*