☆DOZER☆- 8 By Dingdi Pachuau

☆DOZER☆ - 8 By Dingdi Pachuau

Ka ko vak mai dâwn em ni ang tih ngaihtuaha ka en deuh reng lai chuan," He lai scooty hi tu ta nge? Dah sawn vat rawh u," tia pa pakhat au lùng lúng ri hi ka hria a, chu lam chu ka en ta vat a, ka scooty bulah chuan dingin a lo hawi kual nasa tawh hi a lo ni a. Pan vatin," Tih palh lutuk! Ka pu, khawi, ka lo la sawn nghâl ang e," ka ti a, hmanhmawh tak chuan ka han la sawn a, chutih pah chuan ka pu ka hmuhna lam kha ka han thlêk pah leh zawk a, a lo awm leh tawh miah lo, a lo kal sawn hman a ni ngei ang, ka va ngei tak.

Ka tlàn chhûng chuan ka pu chu ka ngaihtuah zui ta reng a, ka lo ko vak mai lo kha mãwl ka intiin pawi ka ti tak zet a ni, amah a lo nih tak tak chuan min han hmu thut ve ang a, mak a ti ve dâwn êm asin. Hêng laiah hmêl hriat a nei tam tehchiam àwm bîk si lo va, a hmêl hriat tawh hnu min hmuh chuan ti lang chiah lo mah se a lãwm ve tho ang; mahse, tunah chuan awmzia a va awm tawh lo tak! Ka lo mãwl êm a ni.

Chutiang ka ngaihtuah avàng chuan ka thil tih tùrah pawh chuan ka rilru ka sâwrbing hlei thei lo; mahse, min zawhna erawh chhàn theih loh ka nei lo va, ka chhâng țha viau tho chu ka ti a, ka tlin leh tlin loh chu an thu thu a ni tawh mai.

Ka haw tlai êm avàngin ka hmuh kha ka pu a ni ngei em tih hre chiang tùr pawhin kha dàwr lamah khân ka pêng hman ta lo va, zànah ka rilruah a awm reng a, a tûkah thil lei tùr neih chhuanlama hmangin ka chhuak leh a, nimin lama ka pu ka hmuhna dàwrah chuan ka va kal ve leh ringawt a, a lo kal leh tâkin ka tih vàng a ni. Stationery dàwr a lo la ni zui, ka kal ve tawh tingtang si a, lei mai tùr lah chu ka'n hre lo khawp a, zahzèlah correcting pen ka lei ta ringawt a, beidawng takin ka haw leh hnawng hnawng ringawt mai a ni. Zànah ka la mangphan zui a, a hmêl ka hmuh dàn erawh a hmaa bawrchhawr deuh tho khán a lo ni a. Phaizâwlah khân ka lo kal leh a, ka awmna kha a hma ang kha a lo ni tawh miah lo thung, sak thar a lo ni tawh a, a hma ai kha chuan a nuam tawh lo. Ka pu pawh chu ka lo chhuahchhàl pek a," Aizawlah i rawn kal reng sia, min rawn zawn chhuah tùr alawm," tiin, ani lah chuan," Nang tê hi, min ngaizáwng reuh a ni ang ka ti? Nupui fanau nei tawh ka nih hi," a lo ti érh a, zak tak chungin ka țhangharh phah lehnghâl a. A tûka ka inkhâwm pawh ka mood a off zo vek.

Office ka chawlh ngei a ngaih avàng khân pu ber pawhin hna ka dîl a, ka interview a ni tih a hre lo thei bík lo va, kâr thar Thawhțannia min hmuh veleh chuan," Eng nge i interview chu? I ti țha maw?" tiin min lo zâwt vat a, nui chung hian," A, ka chhâng pângngai ve viau chuan ka hria a, eng nge maw ka an dâwn ni?" tiin dik tak chuan ka chhâng a.

"I tlin ka duhpui che a; mahse, i tlin chuan min kalsan daih dâwn tihna a ni bawk si a, i uiawm dâwn êm mai," a ti leh a, kei chuan," Sir, a zahthlâk ëm mai, ka tlin dâwn leh dâwn loh pawh a la hriat si loh," zak ru tak leh nuam lo ti ru tak chuan ka lo ti ve leh a. Ani chuan bu nghat chung hian," Vànnei zîngah i tel ngei tùrah ngai ang, kan làwm ang chu tiraw?" a ti leh a, chhâng tawh lo chuan lai leh zak ru tak chuan ka lo nui mai a. 

Ka ngaihtuah mai mai a, eng mah ka nih loh tehlul nèn hian pu ber chen hian office-a thawkte hian min ngaina der ve viau hlawm a, pu ber hian a zir ve hrim hrim bawk a, a fel êm vàng hian a hnuaia thawkte pawh an fel hlawm a nih dâwn hi ka tih phah a ni. Office-ah hi chuan ka chhûngte leh țhiante min koh loh dàn deuhin 'Ruatte' ti hlîrin min ko vek a, patea ber pawh hian min ko leh nulh zêl nia; mahse, ka êih ve zêl tho, min koh duat nân hming dang an chherah ka ngai ve hmiah.

Interview pakhat ka hmachhawn leh a, hei hi chu sawrkãr hnuaiah pawh a ni chiah lo, hna sâng chu ni lo mah se hlawh a țhat deuh dâwn bâkah thawh țhat dàn azirin hlawh chu up zêl tùr a ni dâwn a, hei hi ka duh riau chhan a ni. Ka inbuatsaih thiam chiah lo nain zawhna erawh ka chhâng țha ka ti tho, lo inzir lâwk dàn a vâng ve deuh bawk a, min zawhna lah chu ka mimal ngaih dàn lam zêl a ni bawk a, ka tling ve thei maithei a ni, politics a inrawlh loh chuan.

Zela leh Ruthi chuan chuan kan result chhuah hun chu an nghâkhlel khawp mai a, chutiang chiahin pateate nupa pawhin an sawi sek reng mai, ka nghâkhlel ve tho nain ka nghâkhlel over lêm lo, ka tling lo leh duai ang tih ka hlau a ni. A hmasa záwk result chu thlaleh ni 3-ah a chhuak ang a, a hnuhnung záwk erawh thla laihàwl vêlah a hriat theih thung ang.

Inrinni zànah kohhran țhalaiin hla kan zir a, min rawn tlawhtu an awm dâwn vàngin țhalai member tawh phawt chuan 'zir vek tùr' an ti tlat a, chu vàng chauh chuan ka zir ve a ni. Keini hi member kan pângngai ve viau a, țhalai pawh kan tlêm hran lo. Kan han zai chhin chu a mawi ve viau dâwnin ka hria, țhalai 70 vêl kan vai maia kan han zai chu mawi tham tam tùr hi a ni rêng a; mahse, zaipawl lama inhmang ngai rêng rêng lo kan kat ve nuk avàng chuan kan thiam rual lo viau va, a châng phei chuan kan nui leh ham ham țhìn. Kei chu ka aw pawh ka chhuah ngam ve mang lo, suprano part ka sa ve ngei a, chu part bâk chu thiam ve dâwn hek lo i. Kan tam tho a, ka aw lang ve lo mah se a ti phuisuitu ka ni mai.

Țhalai kal khâwm ngang kan ni bawk a, mipa lamah lo nam deuhte pawh an awm ve tho mai. Ka lo hre lawk lo va, Ruhthi'n min rawn hrilh chuan tlar hnung lamah chuan an lo pàwr ve deuh tawh hi a lo ni a, an țawng a rin tâk deuhah chuan an lam kan hawi ta țhap mai; mahse, hotute chu an lo fel khawp a, dam takin thil awm dàn an han zâwt a, anni lam pawh an inbengdài ve mai bawk a; mahse, kan zài leh hnuah pawh chuan pakhat chu a phun a phun mai a, conductor a rawn ko vak thùl, a hnu deuhah phei chuan a țhianpa ni àwm tak hian a hawpui ta daih a ni.

Chawlh lai chuan kan bula nula țhute chuan Lalpuia che țhing an tihzia chu an sawi sap sap hlawm a, a pa Dept pakhata Director a nih vàng leh kohhran upa a nih vàng maia inla ve viau a nih thu leh an ei loh thute chu an sawi bawrh bawrh bawk a. Ruthi chu ka en a, a lo nui ringawt a, chutah," An sawi dik ve chiah alawm, a pa hi chu pa țha ve tak a nia, a hna thawhna lamah pawh an fak ve viau țhìn; mahse, fate enkawl dàn hi a thiam vak bîk lo a ni ang, a fa dang pawh Lalpuia ang deuh vek kha an nia, hmeichhe awmchhun lah inkhâwm ngai miah lo a la ni zui," ti sap sapin a han chek zui hlak a, a lu a thing nar nar bawk a.

Kan piaha nula hmêl fai tak Feli chuan," Manner a hre lo leh lutuk țhìn a, a ruih loh châng hi chuan a fel ve reng. Dàwrah pawh hian a rawn kal ve țhìn a, a ruih chuan eng emaw pakhat tal hi bat min dîl ngei ngei. Chu vàng chuan rùi lova a lo kal châng pawh hian ka lo be țha duh vak ngai lo va," a ti sar sar a, a bula sam buang tháng chuan," A nu enkawl khawloh alawm an nih, an sualnaah pawh a țan zél a, an heti zo ta a nih hi, pawi deuh mai asin," a lo ti ve a, an hriat chian hmèl viau mai.

"A, han tih fuh loh châng hi a awm ve alawm, ani pawh a ti sual ve deuh a nih kha," mipa awin a rawn ti ve thung a, Feli vêk chuan," A pa hi ka khawngaih ve țhìn alawm, pa țha ve tak hi a ni sia, a fate vàng hian hrehawm pawh a ti ve țhìn tih ka pain a sawi ka hria. Ni e, upa lai a ni bawk sia, an chhûngkaw nun dàn kan hre fur bawk nèn, kohhran member-te han fuih țhin pawh hi hrehawm a ti ve țhìn ngawt ang," a lo ti ve leh a, hmm, a hre chiang viau a nih chiah hi, a sawi chiang ngam êm mai.

Kan haw kawngah chuan thupui ngai bawk Lalpuia chanchin bawk chu Ruthi chuan a rawn sawi chhuak leh a," Ti ve khanglâng ila, tûnlai țhalaiho hi chuan zahna hi an hre vak tawh lo, aia upa zahna pawh hi an bo zo tawh, chhetê mahin zahna an nei tawh lo, zanin te kha a zahthlâkzia kha! Lalpuia chauh pawh a ni lo, an ni vek tawh mai," a ti malh malh a. Zela chuan," Inla upa fâl mai mai asin!" a lo ti zauh a, ani chuan ," Upa ve tawh e, tûnlai mi ai thlâwt chuan. Han sawi ve ta mai mai ila, keini chu sikul kan luh lai pawh khân bus seat-ah kan țhu ngai hleinem, aia upate țhutna kan kian hrâm hrâm a, bengchhen phei chu khawi lamah! Ipte ni se kan hma lamah kan pawm țùng a, mi dang tân ninawm leh hnawksak a ni ang tih hlauin, min lo sawisêl deuh hlek an awm phei chuan kan inthlahrung ngawih ngawih țhìn," a lo ti leh a.

Kei chuan sawi ve tùr ka hriat loh avàngin ka lo ngawi kar a, Zela chuan," Túnlai țhalaite han ti tùr êm chuan i la upat viau bîk loh kha, i tel pha ve tho, inbàn suh, pasal i la neih loh hi," a lo ti ve thung a, ani lah chuan," Kum 30 ràl han kài meuh hi chuan kan lo upa ve viau tawh asin, nang i kai tawh em ni? Kai loh tawp kha, naktûk ațang chuan min u tawh rawh," a lo ti zêk a, Zela chuan a lo duh lo nasa niin," Teuh lo mai! Kei aiin i upa lo tih ka hre ve e, i têt laia in chhuata i tawlh hrut hrut lai pawh ka hre pha a nia. 'Ru-Ru' tia ka koh loh che leh 'Thi-Thi' tiin ka ko țhìn che a, i lâwm ve theih teh kha," a lo ti a, a nui pah hak hak a. Kei pawh ka lo nui ve lo thei lo, a sawitupa sawi chhuah dàn chu a nuihzatthlâk êm a ni.

Mahnia ka awm chânga ka ngaihtuah fo chu ka pu kha nupui fanau nei a lo ni rêng em tih a ni. Ka mumanga ka hmuh khân nupui nei ang khân a insawi a, a takah erawh kha chuan amah chauh khân a awm bawk si a, nupui fanau nei a lo nih chuan khawiah nge a nupui fanaute chu ni ang? Engati nge an awm tlàn loh le? Ti ila, a fate zirna avàngin an awm hrang ve thei tho a, chutiang chu a ni ngei ang. Ka lo ngaizâwng ru reng em ni tiin ka han ngaihtuah leh a, ka ngaihzàwn àwm ka hre lo, amah kha a fel a, ka nêl satliah ve mai zâwk a ni, engah nge ani ang putar tawh lam kha ngaihzâwng angin ka en ngawt ang? Teuh lo mai, chutiang rilru ka pu lo hrim hrim! Benson-a nèn kan ințhenna a la rei loh loh nèn.

Patea'n," I vànnei maithei a ni, tuna i hna hi post ruak angin a kal lo thei si lo va, i lo thawk silawng tawhin i thiamnain a tlin a, i thawh dàn ni se i tlin êm êm bawk nèn, pu ber pawh hi a lãwm ve viau țhìnin ka hria a, i lût thei maithei a ni, i luh theih hlauh chuan hlawh pawh a pângngai thei ve deuh ang a," tia min hrilh chuan," A ni maw?" ti ringawtin ka chhâng a,  làwm tùr nge làwm loh tùr ka hre thiam lo. Thawh hrehawm ka ti lêm lo nain hetiang hna hi chu thawh ka lo inring ngai lo hrim hrim a, a renga thawk tùr phei chuan ka peih kher lo maithei a ni; mahse, patea rilru hlimna chu tih chhiatsak kher ka tum chuang lo, ka hna dìl result-te han chhuak ve phawt mai se la...

Patea hi ka pa tak tak lo ni zâwk se, nutei hi ka nu tak lo ni bawk se aw tiin ka ngaihtuah fo țhìn, min ngaihtuahna hi a takin an lantîr țhìn ka ti mai, an fate nèn pawh hian min en hrang pawhin ka hre lo, hei vàng tak hian kei pawhin ka ngaina dùn a ni, ka pa hi chuan lan chhuahtîr dàn hi a hre ve vak lo nge, suma min vûr hi a duh tâwk mai zâwk ni ka ti țhìn. Keima lam dik tâwk loh vàng pawh a lo ni ang, ka nu ka nèl theih miah loh chhan hi. Ka pa tân nupui țha a ni tho si a, chutiang bawkin ka naute pahnih tân lah nu țha a ni tho bawk si.

Ruah a han sûr buan buan a, office kal loh ni hi chuan ka room tukverh ațangin pâwn lam ka han thlîr a, Phaizâwlah khân a sûr ve ang em tih leh ruah a sùr ve chuan ka puin eng nge a tih ve tâk ang aw tiin ka lo ngaihtuah hman ve ziah, a la buai êm êm reng ang em? Mi kal an awm ve ang em? A nih chuan ka thlenna rûnah khân thleng an awm ve ngei ang a, keimah ang tho khân ka pu kha an ti buai ve ang em tihte ka ngaihtuah kual vak vak a, ruah sùr zawhah phei chuan a hmun kha a mawi ngawt ang chu, thing kûng leh hnim hnah hring dupho kha ni zungin a'n chhun thar sur ang a, chhimbäl pawh a zãm maithei a ni, a mawi teh ang chu.

Zàn lam hun remchângah hla chu kan zir leh a, a hun a hnai ve tawh bawk a, kan thiam deuh vek tawh a, ka tân chuan hla thar mah ni se thiam sa an lo awm nual a, thiam tawh sa ruala sak chuan thiam a awl bîk êm a lo ni. Kan țhahnem a, kan thiam chian vak loh pawhin a langsàr vak lo ang, thiam sa an tam zâwk miau si a.

Result chu a hun takah a chhuak ta ngei a, a hmasa zâwkah chuan ka tling lo leh ta phawt a, patea chuan pawi a ti khawp mai a; kei erawh ka rilru a hnual phah êm êm hran lo. Ka tlin loh ruala tling lo an tam ve tho a ni tiin ka ngaihtuah a, a țha ber nih chu duh țhìn mah ila țhat tâwk lohna lai kan lo nei leh țhìn a, Pathianin ka tân a la ruat lo-ah ka pawm hmiah mai. Ni e, ka han ti zêl ang a, tlin hun chu ka la nei ve mai ang, ka la bei nasa lo êm mai. Mite pawh vawi tam tak an hlawhchham hnuah an bànsan loh tlat chuan a tàwpah hlawhtlinna an chang țhìn a ni tiin ka infuih ve sauh sauh a. Ruthi leh Zela pawhin min fuih nasa," Tih tak takah chuan vawi sàwm êm pawh i la exam tling hleinem, beidawng hauh suh," an ti a, beidawn chu an la phal lo kher mai.

Vànneihthlâk takin ka ti dâwn nge ni, a hnuhnung zâwk result-ah erawh ka hlawhchham ta bîk lo ve. Patea ka hrilh hmasa ber a, min lawmpui thiam khawp mai," Zaninah i tlin lawm nân vawksa tui tâwk kan hmeh ang," a ti deuh ngei a, Zela leh Ruthi pawh ka hrilh ve bawk, min nghahhlelhpui ve si a ka tia, anni pawhin min lawmpui khawp mai," Kan lawm ngei a ngai a nih chu," an rawn ti a, remchângah lain chaw ei tùr chuan ka sâwm ve nghâl nghe nghe a; mahse, a ruaibut deuh hlek tawh a, 'Ni dangah ka rawn ei zâwk ang e' an ti ve ve a, ka ti lui ta bîk lo.

Ka țhiante pahnih chuan ka tlin lawm nân tiin dine-out an rawt a, min lawmpuina a nih angin ka hnial lém lo, duh pawh ka duh lo. Anni hi Angaihi boral hnua țhian ka kawm lehte an ni a, ka chungah an fel êm êm a, min duhsakna ka hnarsak duh lo a ni.

Hotel tharah kan kal a, a lo nuam reuh khawp mai, kei hi zawng ka khawhawi hi a zau lo hrim hrim a, thil hlui pawh hi ka tân chuan thil thar a ni zêl mai. Helai hmunah pawh hian ka la kal lo hrim hrim a, Zela chu a lo kal leh tawh bîk a, Ruthi erawh chu keimah ang tho lo ni vein a vawi khat kalna ve tho a ni.

Kan ei țan dâwn tihah chuan," Zela ka han hmuh tlat chu! A âwihawm loh rum rum dâwn alawm le," ti ri kan hria a, en lo mah ila tu aw nge tih ka hre chiang khawp mai! Ka hre chisng lutuk tlat! Eng nge a rawn tih ve dâwn? Helamah a rawn chho tawh tihna a ni a, engti tùra lo chho nge a nih? Khutah hna a neih reng kha. Engtin nge Zela nèn chuan an inhriat ni? Zawhna, rilruah zawhna hrang hrang a rawn inchherchhuan nghâl tup tup mai.

*THIL TAM TAK TIH TUM LAM AI CHUAN I THIL TIH CHHUN CHHUN KHA ȚHA TAKIN I HLEN ZO ȚHÌN EM TIH LAM NGAIHVEN ZÂWK RAWH, I HLIM THEI ZÁWK ANG*