☆DOZER☆ - 9 By Dingdi Pachuau

☆DOZER☆ - 9 By Dingdi Pachuau

"Benson-a chuh!! Inhmuh a va khât ve?! He lamah i lo awm reng tawh a ni maw?" Zela chuan a ti ve vat a, ka maimichhîng vang vang a, he pa hi ka la hmu leh ngei ang tih chu ka ring sa rêng a; mahse, he laiah kher hi chuan ka hmuh ka ring lo asin, ka la inring chiah lo. Ti ila, inrin hun tak tak ka nei thei lo ang.

"Nimin piah khân ka rawn chho a, i lo dam țha maw? A thuhrimah,  i va vànnei ve a!! Tlangvâl vànnei mei tãwi an sawi ngei chu i lo nih hi," nui hawk hawk chung hian Benson-a chuan a rawn ti leh a, min la hmu chiang lo a ni ngei mai, min hmuin a  nula țhutpui pakhat zâwk hi keimah ka ni tih hria se zawng...

"Nang tak hi chu aw...!! Lo țhu ve nghâl la?" Zela'n a tih chuan," A, ka țhiante min sàwm chhuah ka nia, ka hnial che ni rih rawh se. Thil țha deuh ka rawn hawn che a nia, i hman hunah rawn lêng chho la?" ani chuan a lo ti zat a, ka en lo va, a hmuh theih loh lamah ka hawi sawn daih bawk a, min hre lo tih ka hre mai. Bâkah, keimah ka nih a ring pha chiah lo pawh a ni ang.

"Kher kher a che! Aw le, ka hman hunah ka rawn be dâwn che nia, va kal tawh rawh," Zela'n a tiha," Aw le, tui deuhin aw ni ang," tia a pên sawn thãwm ka hriat zui tâkah chuan a rûkin ka thaw huai huai thei. Tunah tak hi chuan a hmêl hmuh ka duh rih lo a ni, ka thinlung a rawn na thar leh palh ang.

Tui ti tak pawhin chaw chu ka ei lo, ka chaw châkna a bo tlat a ni. Ka boruak tawn hre ve hauh lo chuan Zela leh Ruthi chu an titi malh malh a, Zela chuan Benson-a chanchin ca sawi zui ka rin tehlul nèn, a sawi lang miah lo a nih chu. An titi chu ka hre kim vek lo nsin ka ngsithla ve reng a, a hnu deuhah erawh chuan thil dang daih ka lo ngaihtuah kual ve thung a. Zela leh Benson-a chu engtia inhria nge an nih le? An lo inhriain an inpawh hmèl viau bawk si a, an inbiak dàn ațang kha chuan. Kan inkawp lai khân kan chanchinte kha a lo hrilh ve țhin ang em? Zela hian min lo hre sa reng ang em? Mahse, mipate hi chu hmeichhia nèn kan inang lo va, anni hi chuan thil hi an sawi ve vak ngai lo va, a hrilh kher lo maithei, ka ngaihtuah viau pawhin Zela hian min hre sa ni chuan ka hre thei lo. Lo inhre sa an ni tih chu hria ila chuan Zela hi ka hnaih hauh lo ang, tunah hi chuan kan lo inkàwm vein kan lo inzui ve nasa tawh a, han kawm duh loh daih teh ngawt chu a duh tawh dâwn hauh si lo, engtin nge maw ni dâwn ni?

Benson-a hmuh leh ka duh tawh loh avàng chuan ei zawh vata haw thuai thuai ka duh khawp mai a, ka duh dàn min hriatpui lo tak hian anni pahnih lah chu an hmanhmawh loh hmèl nasa bawk si; mahse, ka ngawih reng vàng chu ni maw, Zela chuan," I va țawng duh lo ve! Hlim zàn a nia, țawng ve bawrh bawrh rawh, a changtunu berin ngawih i chuh tlat a," a rawn ti a, kei chuan," In titi kha ka lo ngaithla a, lo țawng ve kher a ngai hleinem," ka lo ti ve thung a. Ruthi chuan," Ani hi chu, chèngkawl zaipâwl ang deuh hian a reh țhiap thei țhìn a, a thãwm hi a na lo mah mah țhìn chu a ni," a lo ti ve a, ka nui ringawt. Ni e, min la hre chiang lo êm mai a, min ngaih dàn ang ang hian min han ngai phawt mai teh se. Min duhsakna avànga dine-out kan ni tih chu hre tho mah ila, ei zo tê tê ila, a țhing âwm lova chhuanlam siama haw thuai ka duh a ni; mahse, a mawi chu ka ti chiah lo deuh ve tho. A, ka ning, bo daih ka va châk tak!

Vànneihthlâk takin Benson-a ka hmu nawn ta lo, a tihchi tak tak a ni. Haw pawh kan haw har lo va, haw tùra kan chhuah chuan ka thaw huai mai. Zela'n," Zanin chu Teruati a țawng țha duh lo lutuk a, a nawm dàn tùr ang pawhin a nuam lo. Chaw pawh kha i ei mang pawhin ka hre lo," min rawn en paha a tih chuan," Ei țeuh e, ka ei țeuh mai," ka lo ti a, Ruthi chuan," A ei tlèm leh a ril a țâm leh hma dâwn tihna a ni mai a, ei puar ngam lo rual lah a ni tawh hek lo," a lo ti ve thung a. Kei pawh chuan," Ni ngawt tak mai, a upa ve tâwk tawh, zak rual pawh a ni tawh lo," ka lo ti ve vat a, Zela chuan ner nâng nâng chung hian," In ninawm! Inla senior dùn lutuk suh u, in la senior lo tih hi ka hre ve chiang êm!" a ti leh a, Ruthi nèn chuan kan inen a, kan nui dùn hawk hawk a.

Ka patea chuan ka hna ka bànsan tùr chu a ui khawp mai a; mahse, min ui bet ngam chiah bîk lo, ka hna ve hi chu a phuahchawp êm mai a, hlawh ni se a tam vak bawk si lo va, ka hna hmuh thar hi chu hlawh pawh a zia dâwn a, ka inchãwm zo thei ve tùrah ngai ang.

Angaihi thlàn ka tlawh khàt deuh avàngin tlawh tùrin ka insiam a, hna thar ka neih tùr thu pawh hrilh ka duh pah bawk a, la dam phei se chuan min lawmpuitu hmasa ber a ni dâwn tih ka hre chiang a ni. Ka patea scooty ka hmang leh mai a, thlàna dah tùr pangpâr leiin thlàn awmna lam pan chuan ka tlãn ta vang vang a. Hna thar ka thawh tak tak hnuah chuan ka tlawh zut theih loh hmèl si a, ka hman theih hun chhûng, free taka ka la awm theih lai hian tlawh a țha a ni.

A thlànah pangpâr chu fîmkhur taka dahin," Ka lo kan khât deuh hlek che a, min ngaidam rawh aw, i țhian nih hi ka tling lo chu a nih hi tiraw?" ka ti sap sap a, a thlàn chunga hnah tlà deuh niai chu chhar faiin," Angaih, hna thar ka nei ve dâwn a, min lawmpui dâwn tih ka hre sa kar a ni, tunah chuan i țhiannu hi ngaihtuahawm lutuk ka ni tawh bîk lo a nia, min lo ngaihtuah viau ang e, ka zia viau tawh a, țhian fel tak tak pawh ka nei ve tawh aw; mahse, chutia ka tih avàng chuan ka țhian i ni ta lo tihna a ni lo, ka dam chhûng leh ka thih ni, chatuan thleng pawhin ka țhiannu i ni reng ang," ka ti leh sap sap a.

Chutah, Benson-a ngaihtuah chhuakin," En teh, Benson-a kha a rawn haw chho ve tawh a, hmuh pawh kan inhmu teuh viau asin; mahse, ka en duh lo tlat a, min hre chhuak lo a ni ang, tûn dinhmunah hi chuan hmuh loh rih hi ka duh ber. Amah avànga ka natna hi a la dam hauh si lo va, nang lehzêlin min han awm lohsan zui bawk nèn, hmuh ka zuam rih lo a ni e. Țhiannu, nêp min ti em? Ka nêp tiraw? Min dem viau maithei a ni; mahse, ka thinlung hi duh duha thunun theih a ni bîk si lo lai tak hi a buaithlâk a ni," ka ti a, ka inthiam lo leh deuh bawk a, min dem phal lo pawh a ni maithei a, min dem pawh ni se ka thiam tho ang; mahse, nêp deuh chu ka inti ve tho.

"I thu min chah kha ka hre reng a nia, a lamah lêt leh ka tum chuang lo, min rawn beisei leh pawh ni se. A, min beisei tawh lo ang tiraw? Min duh tawh lotu chuan engah nge min beisei leh ngawt ang? Ka va mãwl țhìn tak! I țhiannu chu heti mai hi ka ni si a, min kalsan hma mah mah chu a ni, i ngaihawm ngawt mai," tiin  a thla chu ka be leh mawlh mawlh a.

Min rawn tlawhtu tùrte chuan kan kohhran chu min rawn tlawh ta ngei a, kan lo ur ve ber zaipâwlte'n hla kan rem chu kan zai țha ve khawpin ka hria a, zai nasa ber ang ziazângin kan zai zo chu ka chau deuh nghulh thei hialin ka hria, ka lo țang ve viau a ni ang; mahse, ka zai nasa viau pawh chu a ni si lo va.

Ruthi hi kei ai chuan upa mah se a che naupang chhia ve țhìn tho a, min rawn tlawhtute zînga tlangvál senior ve lam deuh, fellowship hun kan hmana chairman ber chu a star tlat pek a, Zela chuan," Hmeichheho lah hi star hi in lo nei ve hman ziah, mipa chhe lo in tih deuh hlek in hmuh apiangin, a dik em?" tiin a fiam zui a, ani chuan," Dik mai mai lo! A ho e, star tih mai mai, ka duh loh hunah a hriat lohin ka bàn leh mai dáwn alawm. A, ani saw chu tlangvàl lai ațanga upa ni thei ngat a nia, a ngaihsànawm ve hrim hrim, star luai luai tlâk a ni," uar zet hian a ti nghat nghat a.

"A fel tih a hriat mai," ka lo ti ve a, nui sak chung hian Ruthi chuan," Chu chiah chu!" tiin a kutzungpui chu a han ti pir vâ a," Zela nèn hian bùk dùn ta ila, Zela hi chu a kãng vai vai ang!" a tih zawm leh kher a, Zela chu a lo ner nasa ngang mai. Chu chuan nuih a ti za a, ka lo nui hak a, Ruthi'n," Inner khum lo teh ang u, khawvêl hi a uih hmél êm mai," a han tih leh phei chuan runluih nân a hma aia nasain a han ner lui leh a, dâk âwrh âwrhin kan nui lo chauh a ni!

Ruthi hian a dàwra lëng tùr hian min sâwm ve fo a; mahse, ka la lêng miah lo va," Hna i zawm hmain min rawn tlawh rawh, nakinah chuan i hman dâwn lo," a tih tâk tlat avàng leh sàwm tak têa min sàwm avàng chuan hun ãwlah ka va lêng ve ta a, a dàwr chu a lian lêm lo nain a lo nei chikim ve khawp reuh a, haw a phal lawk loh avàng chuan ka tum aia rei daih ka va lêng ta nghe nghe a.

Ka haw lamah nutei'n chawhmeh lei haw tùra min chah avàngin thlai hnah leh rah tam lo tê chu ka lei a, muangchângin ka haw ta hnak hnak a, motor thãwm bengchheng kâra thãwm bengchheng dang lo ri leh rum rum țhinte chuan thil dang min ngaihtuah chhuahtîr daih a. Hmun reh reih rawih, boruak thiang nuam leh hrisêl tak hmun kha ka mitthlaah ka hmu leh daih tawh a, tunahte hian tlawhtu an awm ang em? Keimah anga nuam tiin em ni hun an hman ve tho ang tihte chu ka ngaihtuah a, kal leh châkna chuan min tuam hlup hlup ni berin ka hria. Tûn ang hunah hi chuan phùlte kha a hring dup ang a, ruahin a chãwm hneh dâwn bawk si a, a hring mawi ngawt ang, chutah, ruah kha a han sûr ang a, ka do châk avàngin ka do ang a, huh hnâpin, ruah sùr bànah Chhimbäl a han zãm ngei bawk ang a...

"Teruat..?!!" 

Min kotu lam hawia inher vatin ka ding zui nghâl bawk a, Benson-a mak ti hmêl meng phãwk deuh ka hmuh tâkah erawh chuan ka suangtuahna rilru ațang chuan ka harh chhuak chiang khawp mai. Ani hian eng atân nge min koh? Hmuh ka duh hleinem, ka be châk lêm lo bawk, min ko kher lovin min kaltîr mai mai se aw...

"Hetah i awm maw?!! Heta ka hmuh che hi ka ring pha hauh lo nia! I dam țha em? Khawiah nge i kal dâwn a?"

Han chhàn loh ngawt chu ni theiin ka hre chiah lo deuh a, min zawhna chiah chiah chu ka chhâng ta nge nge a. Biak duh lova han thinrim khum ngawt chi niin a lang lo, amah zâwkin min be hmasa a, a nih dàn tùr angin keiin ka chhâng bawk a, thinrim taka ka kalsan nghâl loh avàng ringawt chuan beiseina ka siamsak lo tùrah ngai ang.

"I ngaihawm hle mai. Kan inhmu khât tawh si a, ka lo thlah dâwn--" a sawi zawh hma hma chuan," Thlah ka ngai lo," ka lo ti vat a, ka chhâng rang lutuk chu mak ka inti zâwk! A chunga ka rilru put dàn a hre thiam ang chu maw, amah ka beisei lohzia leh hun pêk ka tum lohzia hria se ka duh, insawi fiah phei chu..han tum nâ teh se, ka pawm dâwn teuh lo! 

In ka thlen hnua phone ka enin a message a lo awm hman tawh! A number ka delete tawh nain ka hre chiang ve tawh a, tute emaw anga han block ka tum deuh thut thut a; mahse, ka ti rih lo, a duh leh message mai maite chu a dozen pawhin lo thawn țawk țawk ang hmiang, ka chhâng chuang lo ang.

Ka chhiarsak ta lo rêng a! Inbiak loh hi a țha ber, kan ințhen tawh a, ințhen tawh chuan inbiak lehna chhan tùr a awm tawh hleinem, ințhen chuan ințhen vang vang mai tùr, message inthawn pawh a ngai lo.

Zela lo lêng chu ka patea nèn an inkàwm deuh zâwk a, mipa hi chu an titi duh zâwng an inhriatpawh laklawh chuan an țawng ve țeuh thei a, lo inrawlh pawh ngai ka ti lo, an titi chu ngaihnawm ti takin ka lo ngaithla hlauh zâwk a ni. Zela chu High school zirtirtu lai a ni bawk a, sawi tùr pawh a hriain a hriatna pawh a zau thawkhat tih a titi dàn ațang chuan a hriat hliah hliah.

Patea kal kian hnuah erawh thil ho tê tê kan sawi ta thung a, engtiangin nge kan sawi luh țan tâk dàn ka hre lo, a bialnu hlui chanchin a sawi chhuak a, an intawn dàn leh an inkawp chhoh dàn sawiin an ințhen dànte chu min hrilh malh malh a, a sawi kârlakah ka lo inrawlh zauh zauh a, zawhna ka lo zâwt zauh zauh a ni ber ang chu.

"Ka chanchin hlîr ka sawi, i chanchin  min hrilh ve tawh rawh, kimchang takin. Kei pawhin a nihna ang ngau ngauin ka hrilh vek che," a rawn tih chuan," Ka nei ve hleinem," ka lo ti vat a, âwih loh hmèl taka min enin," Mi ang pãngngai i ni a, ni leh lo, mi pãngngai chung lam i ni a, bialpa i neih loh hi chu ka ring bau lo," a ti ve thung a.

Benson-a chungcháng sawi lovin ka țhiannu Angaihi min boralsan dàn chu ka hrilh ve ta a, ngun takin a lo ngaithla a, ka sawi zawh chuan," A khawngaihthlâk hle mai, chutih rualin nang pawh i khawngaihthlâk. Cancer hi chu a huatthlala tak zet ka ti, nunna a suat hnem tawh êm mai," a lo ti ve a, kei pawh chuan," A dik alawm, hmuh theih niin chema sah sawk sawk theih ni se ka sât sawm vek ngei ang, ka țhian țha ber leh min hmangaihtu min lâksaktu a ni si a," ka ti ve bawk a.

Chumi zàn ka mut dâwnah Benson-a'n min rawn biak tumin min rawn call a; mahse, ka chhâng lo, chhàn tumna ka nei lo hrim hrim. Min biak lehna chhan tùr ka hre tlat lo a ni, a ngai pawh ka ti hek lo, tuna kan awm dàn ang hian awm ila a țha ber, inham buai ka tum tawh lo.

Mahse, ka han ngaihtuah chiang a, ka awm dàn, a message leh a phone call han chhàn duh loh ngawt mai chu, a puitlin lohthlâk ka ti leh deuh a, min rawn message vàng leh min rawn biak vàng maiin kan ni leh dáwn tihna pawh a ni chuang lo va, engah nge ka lo ngaihtuah thui leh chiam ni? A țha lo lam ngawtin ka ngaihtuah lehnghâl!

*******

Kâr khat hnuah hna ka zawm tawh dâwn a, lehlamah chuan ka huphurh viau laiin ka phûr tho bawk a, hna duhin ka zawng a, ka hmu ve ta chêng a, huphurh tâk tlat chu țha ka ti lém lo. Țha takin ka thawk ang a, pawisa ka thawk chhuak țeuh ang a, kum tàwp lamah chuan Phaizâwl lamah Krismas chawlh hmangin ka zin leh ang a...

Kan țhian thum group-ah Zela'n *In ngaih dàn ka hre duh, entîr nân, ka bialnu ka kawp lai ngei leh ka duh êm êm, hun rei ve táwk tak chhûng ka lo kawp ve tawh kha eng emaw harsatna vàngin ka țhen a lo ngai ta a, kan ințhen ta a, inhmu lo vang vangin hun eng emaw chen hnuah kan inhmu leh a, ka duh dàn a la ngai reng a; mahse, ani chuan biak pawh a duh tawh lo, ka la duh êm êm si, engtin nge țan ka lâk ang? Hmeichhia in nia, in rilru ang pu ka bialnu rilru hneh theih nân engtin nge hma ka lâk ang?*  tih thu hi a rawn ziak chhuak thlap a.

Ruthi chuan  *Hmeichhia hi chu kan rilru chhûngril hi a nêm a, mipain tih tak taka a duh chuan tu hmeichhe rilru mah hi a luhlul reng lo ang*  tiin a rawn chhâng a, kei erawh chuan *Hmeichhia pawh kan rilru a inang vek lo va, i bialnu i țhen tâkin a be duh lo che chu ka dem miah lo, buaina lak ata inthiarfihlìm a tum a ni mai a, a demawm loh, nat nawn leh a duh tawh lo tihna a ni mai, rilru chhûngril tak hi a hmuh theih loh ang bawkin a inhriat theih bawk si loh a, kei mi sual hian thuràwn han pêk chea hma lâkpui dàn tùr che ka bangbo riau mai*  tiin ka chhâng duah thung.

*Țawngkam i va thiam, i lo ril ngei mai*  Zela'n a rawn tih chuan Ruthi chuan  *A sawi thiam dànah a bialpa nèn i rawn sawi ang boruak hi an tawng ve tawh a ni ngei ang,  tu tak ni ang maw?*  tiin a rawn tlip zui ve zat a, kei chu ka ngawi ta hmak, min man chhuak palh rêu rêu ang.

Chhang leia ka chhuak chu Benson-a ka hmu leh tlat mai! Ani pawhin min rawn hmu ve nghâl chat a, min rawn pan zui nghâl a, biak duh lo teh mah ila ka tlànchhiatsan hman lo, bâkah, tlãnchhe nun hi a ninawm ka ti, thla a muang lo, Benson-a hmuh hlauthãwng rêng rênga hun hman hi ka ning tawh.

"Teruat, khawngaihin, ka be lawk thei che ang em?" A țawngkam chhuak a danglam leh daih tawh. 'Khawngaihin' tih a hmang a, miin khawngaih min dìla tih hlawhtlin loh hi chu a nunràwnthlâk ka ti țhìn a nih kha, mi nunrãwng nih ka duh bîk lo. Chutih rualin, a duh ka tih hlawhtlinsak avàngin min beiseiin amah beiseia ka rilru danglam leh taah min ngai thei lo ang.

Kawng sîra inbiak tawp ai chuan tiin restaurant-ah kan lüt a, ka țhu bet lo khawp mai. Nuam ka ti lo va, ka rilru ni se a nuam lo, ka ni hrû mai.

"Teruat, min ngaidam rawh, ka thiam loh vek a ni. I țhiannu Angaihi i chân tih niminah ka hre ve chauh a, pawi ka ti tak zet, pawi ka tihzia leh hrehawm ka tihzia hi sawi ngaihna pawh ka hre lo hial zâwk a ni."

*INTHIAM LOHNA ENG ANGA NASA PAWHIN HUN KAL TAWH A SIAM ȚHA THEI LO VA, CHUMI AVÀNGA RILRU HAHNA CHUAN HMA LAM HUN A THLÂK DANGLAM THEI HEK LO*