☆DOZER☆ - 13 By Dingdi Pachuau

☆DOZER☆ - 13 By Dingdi Pachuau

Zîng exer atân a lo țha khawp mai. Thlan tla phungin Lirhbiang chu ka han lìr tak tak mai a, thiam erawh ka thiam chak lo khawp mai thung a; mahse, nuam ka ti a, ka rilru a hlim tho, rilțàm pawh hre lêk lovin zîngkâr hun ka hmang ral țhak thei a ni.

Ka upa ve tawh tho nain ka duhnaah hi chuan harh ve thei tak mai ka ni a, ka mood a fuh deuh châng leh ka bula awmte azir hian ka harh zualin ka țawng duh viau bawk. Angaihi bulah khân khawhar hi ka hre lo țhìn a, a chhan chu min uap hneh ka ti mai, kan awm tlàn tawh phawt kha chuan hlim loh hi a phal lo va, khawhar hi a phal lo ka ti mai, kan hlim dùn thei viau rêng a ni. Thil dang ngaihtuah duh lovin kan hun hman mêk zêlah khân kan rilru kan pe a, hlim lova awm kha a rem ti lo a ni ber. Benson-a khân tlangvâlin nula a thlâkhlelhna, duhna leh ngaihsakna rilru min hriat thiamtîr thung a, Angaihi avàngin hlimna nei ve lo nia ka inhriatna kha a bo a, ka hlim êm êm tawh hnuah mipa hnên ațangin hlimna dang ka chhar leh a, ka tân chuan khawvêl kha a nuamin a pâr ve tak meuh a ni; mahse, a lo daih rei lo êm lulai a, ka dam chhûng zawng a daih ka rin tehlul nèn khân. Tunah zawng thil a lo danglam ta, ka hlimna tùr nia ka hriat phawt chu thil dang ngaihtuah lovin pan zêla hlim taka hun hman ka duh, mi dang tel lova mahni chauh pawha hlim theihna ka duh a, mi pawi sawi miah lova ka tûn hun zêla hlim hi ka duh ber chu a ni, mi danga innghah zawng kan rin ang an lo nih lohin rilru natna bâk kan hlêp si lo. Chu vàng tak chuan he lai hmunah pawh hian ka theihtâwpa hlima hun hman ka tum a, ka têt laia ka tih ve ngai loh thingtlâng naupanghoin pawisa sèn ngai hauh lova hlim tak leh nuam ti taka Lirhbiang an khalh ang nun kha tem ve ka châk rêng a, ka zir mêk bawk a ni.

Nilêngin Lirhbiang khalh chu ka zir ta teh rêng a! Tlai lamah chuan ka thiam ve viau tawh a, thui tak tak pawh ka lìr ve thiam tawh a; mahse, duh hun huna zîm tê têa kàwi ka la thiam thei lo, naktûka ka zir leh erawh chuan ka thiam tawh viau chuan ka ring.

Pâwn lam ațangin kei tih loh mi dang an awm lo tih ka hre chiang tawh a; mahse, ka hlauh phah chuang lêm lo. A thawventhlâk zâwk ka ti mai, ka pu tih buai ka duh loh avàngin mahni chauh pawha ka hlim theihna tùr infiamna lam ka ngaihtuah kual a, marble perh ka ngaihtuah chhuak thut a; mahse, ka nei lo tih hriain a dang ka ngaihtuah leh a; ka têt laite ngaihtuah lêtin ka tih ve ngai loh infiamnate ka ngaihtuah zêl a, in-rubber-zuan ka mitthlaah a rawn lang a; mahse, chu pawh chu, rubber ka nei chuang lo. Khuaah kal ta ila, an lo zuar ang em le? Mahse, ka pu ka tih buai leh a ngai dâwn asin.

Ei tùr ka siam chu ka pu ka va pe ve a, ani chuan a bike a lo siam mêk a, ei tùr ka pêk lai chuan," A tui dâwn mang e!" a lo ti sup a, kei chuan," I ei nghâl loh chuan a dài ang a, a daih chuan a tui tùr angin a tui tawh lo ang," ka ti ve thung a, chutia ka tih vàng chu a ni ngei ang, a kut chu pawnchhiaah tât nawk nawkin," Ka kut a bàl sia, min lo kensak zêl mai loh chuan..." tiin a in lam pan chuan a kal zui ta nghâl a, ka zui ve nghâl zat a.

Ina kan luh chuan," Ka pu, i in sak dàn hi a danglamin a mâwi reuh sia, i ei chhûngin i in chhûng hi ka en kual thei ang em?" tiin ka han dîl a, ani chu a lo bu nghut ringawt a, ei tùr ka kenna bowl chu dawhkànah ka dah a, ka kal sawn zui nghâl a.

A in hi a nuamin a mawi reuh ka tih tawh kha. Hmeichhe chènna a ni lêm lo bawk a, hmeichhe kuthnu a vângin hmeichhe bungraw lam hmuh tùr a vâng pharh bawk. Ka en kual zêl a, bang kila Guitar intung ka hmuh chuan," Ka pu, i zai țhin em ni?" tiin ka han zâwt a, ka țawng a hre phain ka ring sia; mahse, min chhâng miah lo a nih chu, a sawi zak deuh a ni thei mai ang em? A perh thiam lo pawh a lo ni thei asin.

He lai hmuna in an sak dàn hi a danglam ka tiin ka mit an la viau a, a chhan pawh a chhûng lam chei dàn chu sawi loh, a pâwn lam lan dàn hrim hrim pawh hi Mizorama kan in sakte nèn hian a inang lo lulai êm a ni. A tê fel kher khawr viau a, ka pu chènna erawh hi chu a lian deuh a, nawm pawh a nuam viau a ni.

"Ka pu, hêng laia in an sak lai hian hetah hian i thawk ve hman tawh em?" a hnu deuh, a bul hnaiha ka awm tawh hnu chuan ka han ti a, ani chuan," Aw," ti chauhin min lo chhâng a, min chhàn tàwi manah ti rilruin," I thawh țantirh lai chuan i la upa vak bîk dâwn lo tihna a nih chu.  A ram hmêlhmang lan dàn ațang hian hetiang tùra buatsaih chhoh a nihna hi a rei ve tawh hmèl si a," ka ti leh a, ani pawh chuan," A dik alawm," a lo ti ve leh mai a.

"He hmun neitu leh hetianga siamtu hi chuan remchâng a hre ngawt mai ka ti, a hmun hian a zir bâkah in sak dàn hian a zir leh êm êm bawk si a, tu sak nge ni rêng rêng le? Hnam dang an ni ang tiraw?" tiin ka zâwt leh a, Mizo iráwm chhuak a nih chu ka ring chiah lo, a lo nih pawhin a satute chu hnam dang an ni tho ang, an kuthnu a mawi êm mai.

"Ka pa nèna kan sak vek a nih hi, ka chei hnûm chhunzawm zêl a," a lo tih chuan mak ti zet hian ka en hau a!! Ka âwih lo dâwn a; mahse, dâwt min hrilh ngawt chu ka ring chiah lo deuh bawk si a. In a sa thiam a nih chuan mistiri a lo ni reng tihna a nih chu, a kuthnu a mawiin sawisèlna tùr lah chu a awm miah lo va! Huan a enkawl a, helai hmun hi a kutah a awm bawk a, chutah, a truck ni se a siam țha thiam mai bawk a.. bike lah a khalh thiam nasa mai si, thiam a lo va ngah tak! Ka ngaihsàn zâwng tak a ni.

*******

Lirhbiang chu khalh thiam tawh tak ka ni, nuam ka tih vàng hrim hrim pawhin ka khalh nasa a, ka thiam tawh viau pawh hi a àwm a ni, tunah chuan khuaa naupangho pawh kha inkhalhsiakah ka cho chiang tawh khawp mai, ka pu hian khuaa kalah min sâwm hlauh se aw...

Krismas ni hma chiahah tûkțhuan chawhmeh atân tiin ka pu chuan a vawksa kan min rawn suah a, kei pawh eirawng ka lo bãwl zo ve chiah a, làwm thu hrilh pahin ka chawhmeh siam pakhat chu ka suah lêt ve a, pâwna a chhuah dâwn chuan," Naktûk khian khuaah kalin Krismas ruai han țheh ila, i duh em?" tiin min rawn en a, meng zau deuh kâwk chung hian," I kal dâwn maw? A châkawm tawp... mahse, pawisa ka thawh ve mang si lo va, ruai țheh ve tawp chu, a zahthlâk duh àwm êm mai," ka lo ti ve thung a, pângngai thei ang bera chhuak tùrin ka aw chu ka thunun a, châk lutuk anga min hmuh ka duh loh vàng chauhin a ni, chhûngril lamah erawh phûr over tak ka ni!

Ka pu ka hlau miah lo hi a mak ve ngawt mai! Ka lo hmêl hriat țhin leh ka kawm nèl êm êm tawh, têt tê ațanga ka hriat chhoh chu ni se ka hre thiam; mahse, chutiang chu a ni miah lo, a hming takngial pawh ka la hre hauh lo a nia, mak ve tak chu a ni! Nèl hi chu ka nêl tawp a, hmân ațanga ka lo hmêl hriat tawh ang maiin ka en niin ka hria, a chanchin lah hi ka'n hre lo khawp a, mistiri a ni tih ka hre ve țâwk a, a khaw hming, a nu leh pate, a chhûngte chanchin, an la dam em tihte pawh pakhat mah ka hre lo, ka la záwt chhin ang.

Kawta Lirhbiang ka khalh laiin a rawn kal a, chawhmeh ka suahna bowl kha a rawn keng va va a. Kei chuan lo au vatin," Kan inkhalhsiak dâwn em ni ang? Min cho em?" ka lo ti a, inti thiam zet hian ka han lìr kual vêl a. Ani chuan," I thiam daih zâwk ang, ka cho lo che ni mai teh se," a lo ti mai a, nui deuh chung hian," Han lìr ve chhin hrim hrim teh, a lunglènthlâk ve alawm," ka ti leh a, Lirhbiang chu ka ka pe zui nghâl a.

A lirh thiamzia chu a! Ka lìr kha min hmu ve reng sia, a zahthlâk zâwk mah mah mai! A thiam êm vàngin min cho lo angin a lo insawi mai mai a nih dâwn hi, ka pu tak hi chu, thiam loh pawh hi a nei dâwn em ni le tih ka ngaihtuah phah hial a ni.

A tûkah chuan khuaa kal tùr chuan a truck-in kan chhuak a, Rûn kalsan daih chu a him dâwn em ni tia ka zawh chuan ngaihtuahawm a nih loh thuin min chhâng mai a, kawng chhoah chuan kan insawh chho leh ta bawp bawp mai. Ka rilru hlim tlat lo se chuan hrehawm ka ti ngawt ang chu, a hma aiin khuar chu a lo tam tawh lehnghâl a, insawh dawt dawt pah chuan," Haw lamah a khuar zualpui hi hnawh thla ila?" ka han ti a, kan insawh leh dawt a, kan insãwi kual nasa bawk si chu taksa chêtna kan chang a nih duh hmèl hi ka tia, ka nuih a za ru angreng.

"A hranpa liau liaua hnawh tùra thawh chhuah a fuh zâwk ang," a tih chuan," Chuti, naktûk lamah kan hnawh mai dâwn em ni? Ka inpeih reng a nia, chak viau dáwn lo mah ila pakhat chauh ai chuan pahnih tha thawh chu a sâwt deuh zâwkin ka ring," ka lo ti vat a. Min rawn en zawk a, kawng lam en leh nghâlin," A harsa lo, ka ti thei alawm!" a ti daih thung a, kei erawh chuan," Hna rorum ka thawk ngai lo va, ka thawh vawi khatna tùr a ni hial ang, ka tih ngai loh thil hi sual lam a nih ngawt loh chuan tih ve chhin zêl ka duh a ni, thawh i tum tho a, lo puih che ka tum ve a ni mai a," ka ti leh duah a, ka hnial lét avàng chuan a țawng peih ta lo a ni ang, a ngawi ta daih a.

Khuaa kan han luh lai chuan khuang ri ka hre vau vau a, Krismas nî a nia, an inkháwm ve tak ang chu maw le, inkhâwm hmanin lo kal ve zâwk ila, a nuam reuh phian maithei a ni. Sana ka han en a, an bâng tawh ang, an zâikhâwm khuang a ni zâwk ngei ang. Țawng lo chuan kan tlãn zêl a, khawi laiah pawh min hruai se thingtlânga Krismas ka vawi khat hmanna tùr a ni a, a phùrawm tho tho. An chêtphung leh an nun dàn ka hmuin ka hre chiang ve thei deuh dâwn a ni, ka pu hi zâwt ila chuan min hrilh tùr a nei țeuh ngei ang; mahse, a taka tawn ve ngei hi a châkawm a, hriat pawh hriat bel a awl a ni. India ram chhûnga chêng țheuh țheuh chu sawi loh, Mizoram ang state zîm tê chhûnga chêng, district țheuh țheuh pawh kan chêt dàn leh khawsak dàn, kan nunphung hrim hrim pawh a inang lo nuai hlawm a nia, thingtlâng phei chu a inang lo nasa thei ngawt ang.

In pakhat kawtah hian a ding ta a, a chahbi phawi pah chuan," Ruai țheh hmaa lèn kual vêl i duh chuan hun i la ngah a nia," a ti sup a, amah chu chhukin inah chuan a lût zui nghâl a. Chechàng lo chuan ka en zui deuh reng phawt a, a hnuah ka chhuk ve ta chauh a. Ka chhuk chiah chu in ațanga ui lian vak lo rawn tlãn chhuak chuan min rawn zuan teh ngawt a! Hlau lutukin ka au țhat a, ka tlu zui nghâl a.

In ațanga tu emaw au țhawt paha rawn tlãn chhuak hian min rawn kai tho tih ka hria a, ka hlauhthàwn êm avàng chuan eng mah pawh ka hre chiang lo, ka khùr nasa viau tih erawh ka hria. Min kai thotu chuan min pawm kãng nawlhin truck seat-ah chuan min nghat chho a," A seh che em?" tia a rawn țawng chhuah tâkah chuan ka pu a ni tih ka hre chiah.

"Ka... hre... lo," buh niai leh aw khùr dar dar chuan ka ti sap a, khùr dar dar chung chuan ka han indap a, nâ ka neih àwm ka hre lo. 

"A seh chein i hria em?" a rawn ti leh a, ka lung phu nasa lutuk avànga ka âwm dawm vang vang pah chuan," Ka hre lo... nâ ka nei pawhin ka hre lo, min zuan thlu ringawt a ni ang," ka lo ti ve leh a, thâwk chu ka la hawk hawk a.

"Inah sáwn lût ila, inen chiang teh," tiin min rawn pawm kãng leh a," A seh em?" tia mipa dang țawng rî ka hriat chuan mi dang an awm ve a ni tih ka hre chiah. Ka pu chuan chhâng lovin hmanhmawh takin inah chuan min luhpui a, țhutthlèng pakhata min nghah pah chuan," Inen chiang viau rawh," tiin amah chu a inher vut a, pâwnah a chhuak zui ta nghâl a, kawngkhàr a khãr ri pawh ka hre zui zat a.

Ka han inphelh sawk sawk a, ka han inen kual a; mahse, ui sehna hnu àwm leh min hamna hnuhma àwm ang pawh ka hmu chuang lo, min bawh thlu ve mai mai a ni ang.

A hnua ka pute an rawn luh hnua kan inbiak hnu chuan in neitupa ni ngei tùr chuan," A, a thlunna ka phelh hlim lutuk tha tho bawk si khân a zuan mai mai che a ni ang, heti chen hi kan lo vulh ve tawh a, tu mah a la seh miah lo asin. A zia lo tak tak a ni," a lo ti a, kei pawh chuan," Ni e, min seh niin ka hre lo, a rawn tlãn chhuak chak deuh hlek khân min rawn su thlu palh a ni ang, kei lahin khatia rawn tlãn chhuak , tlän chak ve bawk si chu ka lo hlau sa bawk si a," ka lo ti ve a.

Mahse, ka pu chuan," Tlãn lêt leh rih lawk mai ang," a ti ta tlat mai a, hre thiam lo zet hian ka en hau a, ani erawh chu țawng leh tawh lo chuan a chhuak ta vut a, in neitupa lah chuan nuam lo tih hmèl tak hian min lo en a, nuam lo a tih tluk deuhthawin nuam lo ka ti ve tho.

Hnial theih ni hek lo, kan tlãn lêt leh ta a, ka awmna kawta ding lovin a in lam min panpui nghâl a," Eng nge kan tih dâwn?" ka tih chuan," I inbual phawt ang," a ti ta tlat a, ui vàng kha a nih ngei ringin," Min seh loh kha," ka lo ti a; mahse, awmzia a awm chuang lo e, a tih tùr chu a ti tawh tho si a. 

A inah chuan lût lawkin sahbawn sen a rawn hûm chhuak a, kan tlãn lêt leh a, ka awmna Rûn kawtah dingin," Hei hian uluk takin inbual chhuak vek ang che," tiin sahbawn se  chu min pe zui nghâl a, khuaa kal leh thuai a ngsih dâwn avàngin thu âwih takin truck ațang chuan ka chhuk ta thuai a.

Dárthlalanga ka inen pawhin min sehna àwm a awm lo, ka hmu lo; mahse, uluk takin sahbawn sen chu ka inhnawih phuan suah suah a, ka innuai ka innuai hnuah ka duh tâwk chauh a ni.

Khuaah chuan kan han kal leh a, kan han thlen meuh chuan a lo tlai ve ruih tawh a, ruai țheh nân hun tam a awm tawh lo bawk. Naupang rual khat hian kan tlãn lai chu min rawn ûm a," Apu Dozer, min lo phur ve? Apu Dozer? Apu Dozer??" tiin an rawn au lauh lauh pah bawk a.

"Tu nge chu chu?!! Nangmah hi Dozer-a i ni tihna maw? I hming chu Dozer-a...!!! tiin ka pu chu ka han en a, a lo kiai suk duh chauh nia.

*THIL RÊNG RÊNG HI A HUN DINHMUN AZIRIN KAN HRE MAWIIN KAN HRE MAWI LO ȚHÌN. ȚAN DÂR RI HI CHU RI MAWI ANGA HRIAT A HAR A, KHA DÂR VÊK KHA, BÀN DÁWN HUNA A RÎK ERAWH CHUAN RI MAWI BER ANGIN A HRIAT THEIH LEH SI*