☆DOZER☆ - 14 By Dingdi Pachuau

☆DOZER☆ - 14 By Dingdi Pachuau

Truck chu ti dingin naupangho chu a han chuantîr ve a, an hlim nak nak viau mai, an țê chèl chûl a, an hlim hmêl chu hmuh nuam ka tih êm avàng chuan inher meuhin ka en reng hlawm a, an bàl phing pheng hlawm viau nain an kawr erawh an Krismas kawr mawi ni ve hlawm chuan a lang. Khua a zau lêm loh avàngin khaw tàwp thleng ka pu chuan min tlànpui a, inhera tlãn lét lehin a hmaa min dinpuina, ui neitute kawtah khân min dinpui leh a, naupangho hnênah chuan," Le, he tah hian chhuk vek ang u aw, ruai țheh zawhah in chuang leh dâwn nia," a han ti a, anni pawh chu thu âwih tak chuan an chhuk sap sap hlawm a, an hmuhnawm sap sap hlawm reuh hi ka tia.

"Ui kha chu a hlauhawm tawh loh ang," tiin min be sup a, amah pawh chhuk ve nghâlin inah chuan a lût zui nghâl daih a, kei pawh ka hawi kual hrak hrak hnuah ka chhuk ve ta chauh a. Khuang rî pawh a la țha viau, an tui viau a ni ngei ang.

Ka pu leh Ui neitu, in neitupa ni bawk Pu Țhiangate nèn chuan kan titi a, kan titi ti ila ka pu chu a țawng tam lêm lo khawp mai, Pu Țhianga nèn kan țawng char char zâwk ti ila a dik zâwk ang chu, ka ngainat leh nèl záwng tak mai a lo ni a, an khaw mihring zât leh an khawsak dànte chu ka zâwt a, ani lah mi țawng duh ve tak a lo ni bawk a, kan țawng tui dùn hluam hluam viau mai.

Ui chu in hnuai lamah an lo thlung daih niin, a bulah ui dang a rawn kal țhin avàngin a chângin chhuah ngènin a räk zauh zauh a, an ri leh khut khut țhìn a, chumi vàng chuan in hnuai lamah an thlung a ni tih ka hre ve chauh a ni.

Ruai chaw a ei theih hunah dâr an vaw ri mai dâwn emaw ka tih laiin pa pakhat, aw țha zet mai hi kan chhak tlâng lamah chuan a rawn äu ta lauh lauh mai a," Ruai a kîl theih tawh e," tiin. Rei rial lovin ka pute nèn chuan kan inzui chhuak ta vat a, khuang rî pawh a lo tàwp ve tawh nghe nghe. Ruai an siamna hmun, an mual neih zau ve ber kan han thlen chhoh chuan ka thil hmuh chu hmuhnawm ti takin ka thlîr ta reng a.

Chaw leh sa, thlèngah kan dawh dâwn emaw ka tih laiin mual zâwlah chuan Changêl hnah hi an lo phah thliah thliah a, pakhat chu mi panga vêl kîl theih tùr a nih ka ring, chûng Changel an phah thliah thliahah chuan chaw hi a kuala dahin a laiah sa chu an chhûng khu vut vut mai a, fatu țhenkhatin âr nghal deuh leh ui nghal deuh ni àwm tak chu hnawtin an lo au țhat țhat a, țhenkhat chaw lo bâr mawlh mawlh tawh hmuh tùr an awm bawk. Hetiang hi chu TV-ah pawh ka hmu zauh zauh tawh, a nawm hmèl ka ti thei viau țhìn nghe nghe a ni.

"Khawi hlui ber saw nge kan kîl ve ang?" Pu Țhianga'n a tih chuan 'hlui' a tih chu eng tihna tak ni ang maw ka lo ti rilru a, amah vêk chuan," He lamah hian miin min rawn chingphùl lo deuh ang," a ti leh a, a kal zui nghâl a, keini pawhin kan zui ve mai bawk a.

An-tui emaw tui in tùr emaw a awm si lo va, ka helh hlauin tlêm tê têin chaw chu ka ei ringawt; mahse, ka la tih ngai loh dàn anga ruai ka țheh chu hlâwkthlâk ka ti a, nuam ka ti tho, ka naupan deuh lai pawhin hetianga ei hi ka châk ve țhìn a nih kha. Ka lo ei tlêm ta deuh a niha ka ril a lo țâm leh ta a nih pawhin kan haw hnuah ei tùr ka insiam leh thei dâwn tho, a harsa lo êm mai.

Phone la chhuakin video-in ka la ta char char a, keimahni pawh ka inlâk ve tho, nakinah ka la thlîr lêt leh duh ngei dâwn a, a la hlu dâwn lutuk tlat a ni, mi dang pawhin an hmu ve duh ngawt ang chu. Kum hnih kum thum a liam hnuah phei chuan... a lunglènthlâk ngawt ang!

Pu Țhianga hnênah chuan an khaw dàwra marble an zawrh leh zawrh loh chu a thuphungin ka han záwt a, an zawrh chu ka ring vak chuang lo va, ka rin ang ngeiin ani chuan an zawrh loh thu min hrilh zui zat bawk a, ka thil tum pakhat chu ka ti thei lo leh ta phawt tihna a nih chu.

Ka pu chu hre lo an awm mang lo a ni tih hriat tak hian tu pawh mai chuan an be thei zêl mai a, naupang lahin an ngaina phian a ni ang, ruai kîl zawh ațang chuan an rawn ko lauh lauh reng mai a, a hnuah chuan a phur kual leh ta nge nge a, chutih laiin Pu Țhianga leh a nupui keiin ka lo kàwm thung a. Krismas an hman dàn tlângpui min hrilh a, kei pawhin ka hman tawhna hmuna mite tih dànte chu hrilh vein Krismas ni taka ruai kan siam ve ngai loh thute chu ka hrilh a, an lo hre ve tawh pawh a ni maithei, an lu an bu nghat nghat a. 

Ka pu pawh a rawn lêt har lo, kawng a bumboh avàng leh duh anga a țhat tâwk loh avàngin khaw èn laia haw mai chu a rawt a, kan haw dâwn chuan naupangho vawrhsak atân tiin sweet ka lei țeuh a, truck ațang chuan ka han vawrh a, an inchuh leh nak nak mai.

Haw kawngah chuan ruai kan țheh dàn chu nuam ka tih thu sawiin in tùr An-tui emaw tui emaw awm lo erawh a hrehawm țêp tih thute chu sawiin ka țawng barh barh reng a, Pu Țhianga nèlawm ka tih thu thlengin ka sawi bawk. Ani erawh chu a ngawi reng thung a, ngawi mah se ka țawng loh phah chuang lo. Kan thlen dâwn erawh chuan," Min hlau em?" tiin a rawn țawng thûm ve dût a, a thil rawn sawi chhuah lah chu, engah nge ka hlauh ngawt ang? Mi sual a nih loh hi.

"Engah nge ka hlauh ngawt ang che? I fel êm hi, ka hlau teuh lo che!" tiin uar zet hian ka lo chhâng a, chu chu duh tâwk lovin," Hlau che ila chuan he tah hian ka rawn kal nawn hauh lo ang. Engati nge min zawh a? Miin an hlau tawh che em ni?" ka tih chhunzawm leh a, hlauh chu sawi loh, ka ngainat rûk tehlul nèn, fel ka ti bawk a, țawng duh chiam lo mah se a bula awm hi a hahdamthlâk ka ti ve tlat.

"Nausen pian zàn a ni si a, mut nghâl teh ngawt ai chuan zanin chu pâwnah mei chhêmin kan ai dâwn em ni ang?" a rawn tiha ka phùrzia leh a thil rawn sawi chu ka rin phâk bâk a nihzia hre nâ se chuan aw... min sâwm ta chu a inchhìr loh vêk pawhin a inchhîr lo viau ang!

"Aw, a nuam ngawt ang chu! Guitar perh pahin zai bawk ila, thla a êng bawk sia, a va nuam dâwn tak!" ka lo ti hliai a, ka phûrzia chu, nuam dâwn lutuk! Guitar perhtîr ila, zai pawh a zai thiamin ka ring tlat, ani hi chuan thiam loh a neih pawh ka ring lo.

A chènna ațangin Guitar leh kan țhutna tùr a rawn keng phei niin, khua a thim deuh chhalh tawh na a, thil a la hmuh theih ruai ruai a, thla a èn avàngin light pawh ka on duh lo nghe nghe, ka lo inpeih diam tawh a. A thãwm ka hriat veleh ka chhuak vat a, ka awmna Rûn hnuai hniam chîn chên ațang chuan thing bung tãwi tê tê a la chhuak a, puih ka tum chuan," A harsa lo, lo țhu mai mai rawh," a ti deuh tlat a, ka puih a phal si lohah chuan a Guitar chu ka ban ta vat a. Ka perh thiam pawh a ni lo; mahse, khawih ve hrim hrim ka châk vàng a ni.

Mei a chhèm alh hluah chu aiin kan țhu a, lum nuam hliai hliai tak a ni! Ka rilruah thil dang a awm lo bawk a, nuam ka ti veng veng. Eng dang mah ngaihtuah ka duh lo va, ka hun tawn mêk zêlah chauh hian ka rilru pêk ka duh.

"Guitar perh la, zai ang?" ka tih chuan Guitar chu a ban ve nghâl mai a, a han herh dik zung zung a," Eng hla nge ni ang?" a rawn tih chuan," I duh duh, i lâk apiang ka lo zawm ve ang che," zai thiam ber ni àwm fahran chuan ka lo ti vat a, Krismas lai a ni bawk a, Krismas hla  hmangin bul kan țan phawt a. A lo zai thiam phian zui a, a aw chu a thûm chhur chhur viau nain a mawi ve tlat, mipa aw dik tak a ni a, pà takin a zai ka ti lo thei lo.

Zai reng chuan hrawk a ro duh êm hi, bottle-in tui in tùr ka la a, zài kârlakah chuan kan in zauh zauh a. Zai chhunzawm zêlin sâp hla lam kan hrût chho leh a, country lam kan hrût ber. Ka rin aiin hla pawh a lo hre tam daih mai! A lam dàn lah chu a mawiin sâp zai pawh a ang ka ti, tûnlai zai thiam tam tak ai hian a zai thiam daih zâwk ang!

Kan chawlh lai tak chuan kan chàwl rih tih hre lo ni àwm tak hian Sihal a lo û ve rawng rawng a, min lo zawm ve a tum pawh a ni maithei a ni. Ka hlauh a ring deuh nge ni ang, min rawn en a, ka lo en ve lai tak a ni bawk sia, ka nui ringawt.

"I hlau em?" a tih chuan," Min hlau daih zâwk ang," nui chung hian ka lo ti a," Hostel-a ka awm lai, ka la tét deuh lai a nih chu, zànah kan hostel thlangah a û vak vak ţhìn, chutih lai chuan ka hlau thei lutuk! Ramhuai emaw ka ti țhìn a, mi dang pawhin an lo hre ve tho a, Sihal a nih thu leh 'mi a ti na lo ang' tih an sawi hnuah ka hlau lo ve chauh a ni, kan hostel thlang lam kha ramhnuai ang hi a nia, hostel an sak hmate phei chuan Sakei pawh a awm țhìn an ti," ka ti leh duah a.

"A va hlauhawm dâwn ve!" a lo tih chuan ka âwih lo viau mai, a hlauh ka ring miah lo, ani hi chuan hlauh a neih ve pawh ka ring lo.

"Hlauh i nei ve em ni?" tiin ka zâwt a, mei êng avàng chuan a hmêl chu chiang takin ka hmu thei a, a nui deuh suk tih pawh ka hmu, a hmêl hi a chhe lo asin, a chhe miah lo tak tak. 

"Hostel-a i awm lai chuan kum eng zât vêl nge i nih? I la naupang àwm reuh!" ka zawhna chhâng hauh lo chuan zawhna dang min rawn zâwt ve daih a, hlauh a neih loh avàngin ka zawhna kha chhàn ngaiah a dah lo a ni ang.

"Naupang ve tho, zirnaah ka hnufual bîk hlauvin ka pain min dah lût a, ka têt tê ațangin a ni mai ang chu. A tìrah chuan hrehawm ka ti lutuk! Ka lung a lêng a, ka pa ka ngai a, zànah pawh ka țap ru fo," ka ti sap sap a, a hun lai kha ka mitthlaah rawn langin chumi hunah chuan ka chêng leh ta veng veng a. Zirtîrtu leh warden-in min enkawl țha a, mess ni se hostel danga awmte ei phâk loh hlîr kan eiin kan in a, a àwm ve tho, kan fee chàwi kha a sâng fâl deuh tlat a ni.

"Chûng hun lai chu tûn hnua i ngaihtuah lêt hian i ngai em?" tia min zawh leh chuan," Ngai lo tawp mai! Ka lung kha a lêng êm a, inah ka pa bula haw kha ka châk ngawih ngawih țhìn. Chu vàng chuan, khami hun lai kha ka ngâi thei hlawl lo a ni ber mai," tiin dik takin ka chhâng a, 

Ka chanchin ka sawi ka sawi hnu chuan a chanchin lam rêng rêng kan sawi ve lo tih ngaihtuah chhuakin," Nangmah chauhin he tah hian i awm a, i khua a har duh àwm ngawt mai! I nu leh pa leh i unaute, i chhûngte hrim hrim pawh khawiah nge an awm ve? Sawi i hreh chuan min hrilh a ngai chuang lo a nia," tiin ka han zâwt a. Ani chuan," Sawi hrehna chhan tùr a awm hleinem, khîtah khaw chhak lamah khian an la awm ve e; mahse, kan kim tawh lo va," tiin ka rin loh deuh chuan min chhâng ve a.

"A ni maw?!! I tlawh zauh zauh thei àwm si lo va, i ngai ve țhìn tho em?" tiin ka zâwt leh a, ka zawhna a chhàn țhat duh lai hian ka hriat duh chu zâwt vek teh ang.

"Ka zin chhuak zauh zauh alawm. Ka awm loh laiin khuaa mi tu emaw ka chhawr mai a," a lo ti ve leh mai bawk a. Ni dáwn tak e, Aizawlah pawh ka hmuh tak kha, a chhûngte pawh a tlawh kual  zauh zauh ngei ngei ang.

"A nih, i nu leh pa an la dam em? I unaute pawh... i nei em?" Dik tak chuan engkim zawh mai ka duh, ka insûm hrâm hrâm a ni.

"Ka pa chu a boral tawh a, ka nuin min la dampui thung. Ka nauin pasal a nei tawh a, hmun dangah an awm," tiin ka zawhna chu chipchiar ru tak, thui lo tê chuan min chhâng a, chuti a nih chuan an chhûngkua chu pali an ni tihna a nih chu. A pa a boral tawh a, tunah phei chuan a nu nèn chauh an awm tawh a, ani lahin he tah hna thawkin a nu a rawn kalsan tak dàwr dàwr a, a nu chu a mal ve ngawt ang.

"I nu chuan a ngai àwm țhìn che!" ka ti sap a, a lo hre pha tho niin. "Ngai ve țhìn e, haw tùrin min duh țhìn a; mahse, he lai hi enkawl a ngai bawk si nèn, a duh ka la tih hlawhtlinsak thei rih lo chu a nih hi," tiin min chhâng a. A țawng thui sâwt ve ta khawp mai, zanin hian a ni zualin ka hria.

Zàna ka mu chu mu tui tak ka ni! Chhùn lam leh zàn lama hlim taka hun ka hman vàng pawh chu a  ni maithei a ni. A tûkah hmâ ve táwk takah thoin ka exer lâkna 'Lirhbiang' chu ka han khalh chhuak leh a, a nuam ve êm a ni. 

Chhùnah kawng siamnaah chuan ka kal ve leh a, ni a sa țha bawk a, hna a hautak ve deuh bawk nèn, thlan a tla duh bawrh bawrh khawp mai. Ka pu pawh a bãng chuang lo; mahse, kei chu ani lakah chuan ka thawk nêp ve e, ani chuan lung a chãwi leh tâwrh tâwrh țhìn a, puih ve ka tumin lung chàwi kher chu a rem ti lo bur, "Hei hi chu mipa hna deuh a nia," a ti a, mipa hna leh hmeichhe hna ka lo thliar vak lo asin le, kan hmaa lum apiang hi chu thawh zél mai hi a țha a, lung chàwi pawh hi kei chuan ka pawisa hauh lo va, hah deuh takin hna thawk ila mut a tui zual sawt ang ka ti ve tlat a ni.

"I pa chanchin chiah kha i sawi a, i nu a la dam ve em? Unaute pawh?" tia min zawh chuan amah chu ka en vat a; mahse, min lo en ve lêm lo, a thil tih lai chu a ti mawlh mawlh a, min en lo chu ka lãwm viau a ni.

"Min hringtu ka nu tak hi chu ka hre lo, ka pian hnu lawk ațangin a chanchin ka hre lo nghâl ti mai ang. Nau chu pahnih ka nei a, pakhatin hmãnni lawk khân pasal a nei a," tiin zêp pawh nei chuang lo chuan dik takin ka chhâng a, zêp neih zawng invèn reng a ngai a, a țha lo. 

"Ka nu tak tak ka hriat loh vàng hian mak min ti em? A chanchin hre zui miah lova ka awm thei hi min dem em?" tiin a ngawih deuh reng avàng chuan ka zâwt leh a. Min dem a nih pawhin ka pawm mai ang, ka hre zui lo miau si a.

"Mak tihna chhan tùr che ka nei lo ang bawkin demna chhan tùr che ka nei lo. Chhan țha tak a awm a ni ngei ang," tia min chhàn chuan ka nui sak, a fing ka ti, ka ngaisang sawt bawk.

*HARSA HLÊ MAH SE,  I BÀNSAN LOH TLAT CHUAN A TÀWPAH HLAWHTLINNA I CHANG ANG, I HLAWHTLINNA AVÀNG CHUAN I HLIM ANG A, I CHHÛNGTE PAWH AN HLIM ANG A, AN CHHUANG NGAWT ANG CHE*