☆DOZER☆ - 15 By Dingdi Pachuau

☆DOZER☆ - 15 By Dingdi Pachuau

Kan rei vak ka ring lo kha a nia, ka rin ai chuan kan rei ta phian! Mahse, pawi ka ti tehchiam hran lo, a bula awma a țawng han ngaihthlâk vêl pawh hi nuam ka ti, thawk reng pah chuan a țawng ve mai a, chau àwm pawhin a awm lo; mahse, a thawk nasa êm mai a, a chau viauin ka ring. 

Thingpui in tùr leh a hmeh tùr a lo keng deuh thlap niin, kei a hmeichhia zâwk pawhin ka lo ngaihtuah thlen miah loh a ni si a, ngaihtuah kim hi ka ti khawp a! Kei ve chuan tui bottle lian vak lo ka keng ringawt kha a nia, kan lo inngaihtuah thui hleih khawp mai.

Kan chawlh lai chuan hostel-a ka awm lai chanchin bawk chu min zâwt leh a, zêp nei lo chuan ka hrilh malh malh a. Hlimawm lam tam hran lo mah se ka hrilh vek duh bîk lo va, ka chêt chhiatna hrang hrangte chu ka hrilh a, a hun lai khân nuihzatthlâk viau loh mah se hetia han sawi chhuah tâkah chuan a lo nuihzatthlâk ve ta mai mai.

A buai ve theih êm avàngin a tân siam zauh zauh a har àwm si a ka tih vàngin a țha thei ang ber tùrin kawng siam chu ka ti tlat a, kan haw lam chu chauh pawh ka chàu ve khawp mai, kei pawh ka chauh chuan ani phei chu a chàu viau ang. Chutiang ka ngaihtuah rauh rauh lai chuan," Zanriah rawn ei rawh aw, i chau dâwn si a, tui takin ka lo bâwl ang," a han ti a, hlim zet hian ka en chho a, nui sâng chung hian," Yes...!! A va làwmawmin a va nuam dâwn tak! Kan pahnihin ruai kan țheh ve dâwn tihna a nia, ka hnial phal teuh lo mai!" ka lo ti vat a, ka rilru hlimzia chu, ka hahna zawng zawng pawh chu a reh nghâl vekin ka hria!

Inbualna tùr tui lum awm hek lo, tui vâwt zet chuan ka han inbual a, ka țê chhuah loh nân ka inthunun hrâm hrâm a ni, a va vawt tak! Ka khawng vek mai dâwnin ka hria, ka rilru hlim êm lo se chuan ka khùr nasa ngawt ang chu! Tui kha chu a lum theih ngei mai a; mahse, ka lum a nih chuan ka rei dâwn, ka pu ina phei thuai thuai kha ka duh bawk si a, lum loh law law kha ka ti ta a ni.

Ka phei chuan khua a la êng viau a, a lo inbual ve tawh ngei a, rawng a lo bâwl mêk a. Puih ka tum chuan," Lo țhu mai mai teh, Coffee i duh em?" a lo ti dût a," I buai êm kha, ka lo pui ang che," ka tih leh pawh chuan," Coffee chu?" a lo ti leh sup a, hnial chi nia ka hriat tâk loh avàng leh a coffee siam in ka châk tho bawk si avàng chuan," Aw le," ka ti ta nge nge a.

A coffee siam chu a tuiin ka kham lo lek lek a ni. A tui êm avàng chuan ka han faksak nghe nghe a, a lo nui ve suk mai. A nui suk hmêl chu thil hmuh nuam tak a la ni zui, a lan nèlawm sawt bâkah mihring nui ve thei, hlim ve thei hmêl a put phah a, nui zauh zauh se a țha ngawt ang, nui deuh reng tùr erawh chuan ka duh lo.

Ka puih a duh loh miau mai a, a bul hnaiah erawh ka lo awm ve reng a, a thil siam lai chu uluk takin ka lo en ve a, a thil siam rêng rêng chu a ulukin a duh thianghlim ka ti, a thil hman tùr rêng rêng chu fai sa pawh ni se a sil leh thlap thlap mai a, 'ni mai mai teh se' tih lam kha chu a apply lo ve khawp mai, hmeichhia zâwk hian tluk lo ka intiin ani lakah hi chuang ka lâng chiang hlein ka hria. A ei siam dàn chu ka siam țhin dàn nèn chuan a inang lo khawp mai lehnghâl a, ani siam hi chu a nih dàn tùr dik tak a nih duh hmèl bâkah a tui hmèl bîk ngawih ngawih, ei siam lam a lo thiam lehzel mai hi mak ka ti a, ka bèl chiang telh telh a, thil a thiam tam si, ngaihsànna tùr ka hmu chho zêl dâwn a nih hmèl. 

Kei ve hi, Hostel-a awm chho char char kha ka ni bawk a, ei in siam lamah hi chuan ka inchhuang lo ve chiang a ni; mahse, Mizo chu hnam dang nèna khaikhin hi chuan ei in kan duh tui lutuk lo deuh a, kei pawh hian ka ti chho ve nãw nãw ka ti mai, nula ka ni a, thiam viau tùra ngaih chu ka niin ka ring; mahse, kei hi chu min bèl chiangtu awm ve ngat se zawng, ka tla chiang vang vang ngawt ang chu!

"I ril a țâm tawh em? Ei nghâl mai ang aw?" a rawn tih thùm dût chuan ka ngaihtuahna ram ata harh chhuakin," Pawi hleinem," ka lo ti ve mai a, ka ril chu a țâm lutuk pawh a ni lo; mahse, a ei siam hi a rim a tui hlawm si a, ei ka châk tawh viau hlawm a ni.

A rim a tui ang chiahin a lo tui hlawm bawk!! Chawhmeh chi li chauh a siam a, chu pawh tam lo, vawi khata ei zawh theih vek tùrin. Keini chuan a lehpeka rin theih tùrin kan siam kêp țhìn a ni sia, chutia vawi khat ei khawp lek a siam chu a chhan ka záwt lehpek a," A thar siam zêl hi a hrisël ber alawm," a lo ti mai a, a sawi chu dik chu ti ve tho mah ila chhûngkaw member tam thamah chuan a tih dàn hi a buaithlâk deuh maithei chu ka ti a; mahse, ka sawi chhuak chuang lo.

A phal lo chungin thlèng ka sil a, tui a harsa lo bawk nèn, nuam ka ti, ren pawh ka ren lêm lo khawp mai. Kan inah leh Aizawlahte kha chuan tui a harsat deuh țhin avàngin ren deuhin ka sil țhìn a; mahse, hetah hi chuan ka ren peih lo.

"Tui a harsa lo bawk a, ka ren lo a nia," tiin ka pu DOZER-a( a hming hi a pà rem rem hi ka tia) chu ka hrilh a, ani pawh chuan," Ren a ngai lo," a lo ti ve a, ka sil fai sa chu a lo rem fel zêl a, ka sil zawh chuan," In tùr i duh em?" tiin min zâwt leh a. Coffee a nih ringin," Ka puar êm mai, tui viau dâwn mah se ka pumah a leng tawh lo ang," nui chung hian ka lo ti a, ka puar êm lah tak a, thil dang a len theih tawh ka ring lo a ni.

"Lentîr hrâm dàn kan ngaihtuah mai dâwn nia," ani chuan a lo ti thung a, a chhuar ațangin wine no ni àwm tak pahnih hi a rawn la chhuak zui nghâl a, ka en zui zêl a, chutiang no chu nichîna coffee ka in khân min hmantîr tawp si lo, eng atân tak chuan la chhuak ni maw ka tih rilrûk lai chuan chhuar ațang vêk chuan wine bottle ni àwm tak hi a rawn lek chhuak ta mai a!!

Wine kan in dâwn tihna em ni?!! Kan pahnih chauh lehnghâlin?!! Ani pui roh hi, min hrài ruih a tum a ni ang ka ti, ka ngainatna leh ka nèlna hian a rilruah thil dik lo a tuhsak a ni mai thei ang em?

"Grape ka um ve chhin e ka tia, a in tlâk ve riau nghe nghe asin," tih pah chuan bottle chu a han tauh hawng zui zat a, wine noa a han thlit sen tar tar chuan in a châkawmzia ka va hmu chiang tak! In tùr sen lam chi  hian ka mit a la hrim hrim bawk. Hmun danga hna ka thawh lai khân in chi lam hi ka ti ngai lo hrim hrim a, hnam dang bulah hlauh phei chuan tem chhin hlek pawh ka duh lo hrim hrim bawk; mahse, a taste erawh hi chu ka hre ve chhin châk țhìn tih chu ka zêp lo ang.

Țhutna remin kan in hmain kan han in- 'cheers' hmasa te te phawt a, ka han in hlek a, a thlum tui dàn chuan thluak a fan vawng vawng theiin ka hria!! Ka hrawk erawh a sa thla ve deuh chuan ka hria. Ka han in leh a, a hma ang bawkin a thlum tui leh vawng vawng. Heti tak hian grape um hi a lo tui thei ang tih ka lo hre miah lo, tui ka va ti tak!

"Ka in vawi khatna! A va tui vawng vawng êm!! Nangma um ngei chu a ni si a maw?!! A tui tak zet a ni," ka han ti vang vang a, a tui êm a, ka zêp duh lo a ni. Tlêm chuan zu rim chu a nam ve deuh a, ka țawng zâwng pawh chuan ka ka rim chu ka hre thei, mi chuan hre ta se zu pângngai in emaw min ti hrim hrim ang, a rim ka nam tlat.

"A ruih theih ang em?" ka han ti leh a, ka han dût leh hlak bawk a, ani chuan," I in tam chuan theihin ka ring," a lo ti ve mai a, nui chung hian," In tam chi miah loh a nih chu, no khat bâk hi ka in thei lo ang, ka ruih hlauh chuan a fuh dâwn miah si loh a," ka ti ve leh a; mahse, a tui êm mai a, min thlit lui ta ang se, ka hnar phal ngút lo maithei a ni.

"Min hlau tih thu khuh deuh taka sawi tum i ang," a tih sup chuan meng phar deuh ãwk hian," A teuh lo mai! I hlauhawm hleinem, ka tân phei chuan i nèlawmin i ngainatawm hlê a ni, ni lo'm ni? Engah nge maw ka hlauh ngawt ang che?" duhthawh tak hian ka lo ti thuai thuai a, ka pu hi pâwn lamah nèlawm lo tak angin lang mah se kei chuan a nèlawmna ka hmu thiam tlat, min duhsakna leh min ngaihsakna pawh ka hre thiam, a sawi chhuak kher lo; mahse, min ngaihsaka min duhsaktu hre thiam rual chu ka ni ve tawh alawm. Duata ngaihsaktu ka tawng zen zen lo va, hetiang mi hi ka tân chuan an hlu êm asin.

No khat kha ka'n ti ve tak naa, tui ka ti êm a, ka hnial zo lo tak tak! Ka in  leh a, țawng pawh a nuam ka tiin ka ka pawh a kal zual viau a; mahse, chhûngril lamah nuam tihna ka nei tlat mai a, ka rùi a ni maithei, ka țawng barh barh reng a, zawhna ka zâwt a, ani pawh chuan min chhâng zêl a, a țawng duh chho ve ta bawk nèn, ka duh duh ka zâwt chho ta pawp pawp ni maiin ka hria. 

A tûka ka harh ruai chuan ka taksa zawng zawng chu a na vek ni maiin ka hria, meng chiang mang hlei lo chuan ka ke ka han dah sawn dâwn a, a na lutuk a, ka kutin ka dawm a, ka chawi sawn tawp, ka lu lah chu a na deuh fek fekin ka hria. Chumi vàng chuan ka harh chiang ta a, ka taksa ka han her dâwn pawh chuan ka na sup sup a ni ber, a va nuam fahran lo tak! Dâr zât erawh ka en hrãm a, dâr 9 a lo ri hnai tawh niin! Thawh tumin ka han inbeng kãng a, ka 'Ai Ah' nghâl tuar mai, ka rawl a lo nih chiah hi, nimin lama kawng khuar hnawh nâna lung lâk khâwm leh lei laih vàng kha a ni chiang mai.

Tlai tawh viau mah se tho chhuak peih lovin ka mu leh vang vang rih a, a vâwt ve tho bawk si a, tho chhuak lovin nilëngin ka mu mai dâwn em maw ni tih ka ngaihtuah rauh rauh nghe nghe; mahse, 'êm a' ka ti leh deuh a, a hnu deuhah peih lo zet leh sil țhûm chung chuan ka tho ta țuih țuih a.

Thingpui sa ver vawr ka dawm khûk hlat hlat lai chuan nimin lam leh nizàn lama ka hun hman dàn ka ngaihtuah lêt a, nizàn lam ka ngaihtuah chhuah chuan ka khi sak a, a chawhmeh siam tui zet kha, ei leh ka châk! Chuan, dár eng zâtah nge ka haw tâk kha? ka haw dàn lah kha ka va hre chiang ta lo ve! Ka pu khân min paw haw em kha? Min paw thâna ka hriat chu! Chuti chu lo ni se, ka lo rùi viau em ni? Chal dawm meuhin ka han ngaihtuah a, dâr zât hre lo mah ila a in ațanga kan chhuah kha chuan min la paw lo chiang mai a, kha kha chu ka hre chiang ve ngang mai; mahse, a hnung lum nuam tak kha ka nghèng tlat si a ni, engtin nge ka nghen theih? Nge, ka mumang em ni zâwk? Ni lo, ka mumang chu a ni chiah lo... in ka hria, ngaihtuah chhuak thutin kawngka lam ka pan vat a, chhûng lam ațangin ka lo kalh miah lo!! A dik ngei ang, ka han nam chhin a, a lo inhawng zui nghâl mai a, a lo inkalh miah lo, ka hre thiam lo zual ta sawt. 

Ka hmai chu ka han hup vang vang a, hetiang a nih chuan ka pu hi ka hmu ngam tawh ngût lo ang, nizàn lah khân zawhna ka zâwt țeuh a nih kha, ka zawhna zawng zawng kha hre chhuak thei vek tawh lo mah ila ka hriat chian pakhat chu nupui a neih tawh leh tawh loh ka zawhna kha a ni, min chhànna pawh ka hre chiang ta chuang lo, ka ngaihtuah lêt pawh hian... a va hahthlâk tak! Ka lo rùi thei nasa a lo nih dâwn kha, in kha chu ka in tam lua lo asin e! Ka pu khân nula zu in nasa leh in thei deuhah min ngaih loh hrâm ka beisei, ka zawhna zawhte khân lungawi lohna leh thinrimna an siam loh hrâm beisei bawk ila... thâwk ka la hawk hawk a, tihngaihna a awm tawh bawk si lo, ngaihdam ka dìl ngei chu a ngai leh dâwn a nih hi, zahthlâk dâwn viau mah se.

Intih harh nân leh exer ni pah fãwmin pâwnah ka chhuak a, kal bãi deuh saih saihin, muangchâng chuan ka kal kual a, kal chak thei hek lo i, ka petek deuh hlek châng chuan ka țhen leh sak sak țhìn, heti khawp hian ka lo rawl thei ang tih ka hre lo rêng rêng; mahse, ka pu ka puih ve vàng a nia, mi tân thil țha ka tihpui ve a, ka inchhîr chuang lo.

Mahse, grape tui ka in mawlh kha! A zahthlâk mah mah chu a ni, a lo tui êm kher bawk si a, no khatah khân lo lungawi hlè hlè ila țha tùr hi a nia aw...

"I tho thei maw? Nimin khân i thawk nasa si a, i rawl viau ka lo ring rêng a."

Ka pu a ni tih ka hriat chian êm avàng chuan a lam hawi pawh chuan ka inher duh lawk lo va, nizàn lama ka thil in ka ruih vàngin tho țha hlei thei lo tùrah min ngai ngei ang, nimina ka thawh ve kha chu ani thawh lakah chuan eng mah lo mai a ni a, a sawi ve mai mai a nih hi, ka zah viau loh nân.

"Ka rawl vak lo," te chu ka han ti mawi ve a; mahse, ka kal dàn ațangin a hriat vek si a, ka bum thei lo ve chiang khawp mai. Ani saw chu a rawl ve pawhin ka ring lo, lung a chàwi vêlna leh a vuak kehna lamah erawh a bân a kham ve deuh hlek maithei thung a.

A hmêl pawh en ngam lo chuan," Nizàn vàng khân ngaihdam ka dîl e, ka ti buai chein i duh loh zâwng thil tam tak ka zâwt--" ka la țawng lai mêk chuan," I kawngka bulah thil ka dah kha," min lo tih khalh a, min kalsan zui nghâl daih bawk, a awm dàn chuan min ti hamhaih zâwk hial mai. Ngaihdam ka dîl a, thil dang min sawi hnanin min kalsan zui nghâl daih bawk a, hriat thiam hi chu a harsa ve det a ni.

Rûn ka thlen chuan a sawi ang takin kawngka bulah chuan eng emaw ni bâwmtê, mau ațanga siam, a chhìn nei hi a lo awm a, ka han la a, ka hawng a, ártui, damdawi leh leh noah eng emaw ni tui hi a lo awm a, khawizu lam rim a nam deuhin ka hria, lehkhaphêk thleh tawp, hlai vak lo hi a lo awm tel bawk a. Ka han pharh chuan 'Hêng hi ei la, i mu lum vang vang dâwn nia' tih hi a lo inziak a.

Naupang thu âwih tak angin a thu chu ka zàwm a, ka muhìl ka harh leh meuh chuan tukin lama ka harh dàn nèn kha chuan inang lo tak a ni, ka ni ta vâk mai, ka taksa rawl lutuk pawh kha a lo zia huai a, reh erawh a la reh vek bîk lo, a thil min pêk kha a lo țha viau a nih dâwn hi.

A tlai deuh tawh avàng chuan tho chhuak nghâlin tlai lam ei tùr ka insiam nghâl a, kawngka rawn kik ri ka hriat chuan," Lo lût rawh," tiin ka lo chhàwn vat a, ka pu bâk a nih ka ring lo, a lo ni ngei rêng bawk a.

"Hei hi a sat lai hian in zo vek rawh," rawn ti supin flask lian vak lo hi min pe zui nghâl a, thil dang sawi leh tawh lovin a chhuak leh nghâl daih bawk a, țawng pawh ka țawng ve hman hleinem, a va mak thei țhìn tak! Ka tlãn chhuak ve vat a, piah deuh tak a lo thleng leh hman tawh a, au zuiin," Ka pu, ka lãwm e," ka han ti zui lawm lawm a, a hria a nih pawhin a rawn hawi lêt lo rêng rêng a nih chu! A che maksak thei ve ngawt mai.

Khua a thim tak tak hmain thil min pêkna hmanruate chu ti faiin pe tùrin a chènna lam ka pan chhat chhat a, khua vâwt var mah se ka inthuam lum a, vâwt pawh ka hre hran chuang lo. Ka pu min duhsakna leh min ngaihsakna thil tihte chu ka ngaihtuah neuh neuh a, mi hausa tak pawh a ni bîk lo, mi hnuaia hna thawka chhawr ve mai a ni a, heti chung pawh hian a theih ang chin chinah min duhsakin min ngaihsakna a rawn ti lang zêl chu a nia, kan hun hman dun chhúng hi a la rei miah lo; mahse, kum kha leh chen ka pain min ngaihsakna a tih lan ve ngai loh kha ani hi chuan ni nga ni ruk chhûng lek pawh hian a ti lang tam mah mah tawh a ni. Ka tâna min tihsak hi a tam tawh mah mah a, làwmman atân ti ila ka làwm thu sawi nân haw dâwnah tips ka pe țeuh ang!

A inah chuan a lo awm lo va, ka han nghâk deuh rèn ráwn a, a thãwm hriat tùr a awm loh êm avàng chuan ka thil kenho chu kawngka bulah fel takin ka dah a, haw nghâl mai ai chuan tiin ka han kal kual leh a, a vawk vulhna lama vawk ngêk ri ka hriat chuan ka nui sak a, chaw a pe a ni ngei ang chu.

A hla hran lo bawk a, ka va kal a, chaw chu a lo pe zo tawh a, âr lam zâwk a lo buaipui leh tawh hi a lo ni a," Ka lo pui ve ang che," ka han ti lauh lauh a," Chaw hi lo pe rawh," a lo ti ve mai bawk a, min lo hnial lo chu ka lãwm hlê a ni, chaw ka pêk hlànin ani'n ârtui chu a lo la khâwm thung a.

Árpa lian ve tâwk tak chu a lo duhthawh deuh a ni ang, ka kuta chaw tlêm la awm chu a rawn chuk fawk mai a, ka phu zawk thei! Ka en chian chuan ka kut chu a chuk pilh a ni tih ka hre thei nghâl, a hmui chu a hriam àwm hlê mai ka ti.

A buai ve êm avàng chuan âr chaw ka pêk zawh chuan tih tùr dang ka zâwt leh a," A ngai lo, ka ti thei tawh e," a rawn tih pawh chuan," Ka pui duh che alawm," ka lo ti tlat a, ani pawh chuan," Chuti, ãr kha i làwi ngam ang em? Âr no hruai lai kha?" a rawn ti ve leh a, làwi awmzia ka zawh hnu chuan ârpui lam chu ka pan nghâl a, vawi khat mah ka la làwi lo nain làwi ngam lo rual ka ni tawh bîk lo, ka upa ve tâwk tawh.

La hre ve hek lo le, huai tak chuan ka pan phei a, a lo țuk hluk hluk a, a no pakhat man tuma ka ban chiah tihah min rawn zuanin min rawn lim ta âwrh âwrh mai, ka țê tuarh a, ka tlãnchhe zui nghâl bawk a; mahse, min rawn ûm zui zêl a nih chu! Ka hlauhzia mai chu a!

*'KA THEI VE LO ANG' TIH AI CHUAN 'ENGTIN NGE KA THEIH ANG AW?' TI ZÂWK RAWH, CHU CHUAN NANGMAHAH CHONA A SIAM ANG A, A TÀWPAH HLAWHTLINNA A THLENPUI ANG CHE*