☆DOZER☆ - 16 By Dingdi Pachuau

☆DOZER☆ - 16 By Dingdi Pachuau

In pakhat in hawngah chuan ka tlãn lût tawp a, kawngka ka khãr zui nghâl bawk. Ka thin chu a phu nasain ka kaihza thâ pawh a khùr dar dar bawk a, kawngkhàr pâwn lama min lo chàn loh hrâm ka beisei. A thuhrimin, a va han tlãn chak êm êm ve le! A kawlh bawk si, ka man ngam tawh teuh lo mai!

Ka nghah deuh vang vang hnuah kawngka chu ka hawng dêk dêk a, ka han bih chhin a; mahse, ârpui chu a lo awm miah lo, a notete bulah a phei tawh a ni chiang. Ka làwi ngam tawh dér si lo va, ka pu hnêna ka hrilh mai a ngai dâwn a ni, "Ka lo pui ang che," ka ti ve êm êm a, ârpui mai mai pawh ka hlau chu a ni si a, nêp min ti ngawt ang!

Inthiam lo ru taka âr awmna lama ka phei chuan a lo làwi fel diam tawh niin, ka zak deuh chuan," A pui kha ka rin aiin a lo kawlh phian a," ka ti ta ringawt a, ani chu a lo nui hawk a," Ka hmu che alawm," a lo ti a nih chu! Ka en hâw a," Min lo hmu maw?!! A tlàn chakzia kha tiraw? Ka hlau tak tak a ni!" uar zet hian ka han ti a, ârpui ûm nih chu ka zak leh tawh hran lo.

Ârtui chu kan hàwn nual a," Zànriah lo ei la?" a tih chuan nizàn lam ka hre chhuak nghâl zawk a, en pawh en ngam lo chuan," Ka ei zing tawh êm mai," ka ti ngam țâwk a, ani erawh chuan," Vawi khat chauh," a lo ti sup a, ka hre tho nain ka che nãwi leh ang tih ka hlau tawh, tui tih vàngin ka insûm thei si lo.

"Ei tùr ka siam vek tawh a," ka ei tùr siam mitthlà rauh rauh pah chuan ka ti leh a, ani chuan," A nih tak chu, ârtui hi i hàwn țhen dâwn nia," a lo ti ve ta zâwk a, ka duh lo viau nain ka hnial thiam chiah lo va, ka hàwn leh ngê ngê a. Ka ei tùr siam țhen țhen chu a thil ka pêk kìrah khân ka suah ve hlawm a, hrilh kher lo mah ila a hmu ngei ang tih ka hria a, ka hrilh duh kher ta lo a ni.

Ka rawl chu a reh har lo, chu vàng chuan phone signal awm theihna tlâng lamah khân ke ngeia kal chhoh ka châk a, ka pu erawh sàwm buai ka tum hran lo. A buai ve thei si a, bâkah, țûl tehchiam lova va zar chhên ka inthlahrung ve tawh bawk. Ka chungah a fel êm zâwk a, min ning angin a awm lo mai mai zâwk a ni, ka țawng peih si. Țawng peih sawi tâkah chuan ka pu ni lo mi dang bulah chuan ka țawng chiam ngai lo va, ka pu bulah lëm, țawng duh ber of the year award dawng tlâk ka ni ang tih hial tùr khawpin ka țawng tam thung a, a mak ve thlâwt, a chhan ka hre bîk lo, a bulah hi chuan țawng tùr hi a rawn inthuah tup tup ni berin ka hre mai. 

Ka kal ta ngei a, tui bottle leh phone ka keng a, kawng chanve vêl ka thlen chhoh chuan ka hah chu ka ding rih a, minute nga hnuah ka kal leh a, ka kal chak thei lo bawk a, a hmun ka thlen chhoh meuh chuan a țantìr ka kal ațanga chhûtin dârkâr khat deuhthaw ka hmang; mahse, a pawi lo, ka thleng chho tawh tho, ka hah pawh a dam nghâl sawng sawng thei nia.

He tlâng hi chu a nuam ve thlâwt a ni. Thlifîm thaw heuh heuh chu dawngin ka han țhu chàwl vang vang phawt a, a hnu deuhah chuan ka fang kual leh chauh a. Phone hman tuma kal ka ni lêm lo va; mahse, phone camera erawh ka lek kual nasa leh viau thung. Ka kal chhan a nia, ka duh tâwkin thlâ ka la ang chu.

Haw thlâk leh thuai ka ui avàngin thing lian ve deuh pakhat nghèng ar ar chuan ka țhu a, phone-a zai chu ka play a, ngaithla pah chuan ka maimichhîng zui vang vang a. Ka hla play ber kher chu Angaihi nèna kan duh deuh țhìn 'Graduation' tih hla, Vitamin C sak a ni a, mi play kan ngaihthlâk fuh ațanga kan hriat a ni a, kan duh ta êm êm a nih kha. Hla hlui deuh lam tawh chu a ni ang; mahse, hla chuai thei tawh lo tùr chî ka ti ve tlat thung.

A hla thu ngaihtuah rân chungin Angaihi nèn kan graduate hun laite kha ka mitthlà chho zut zut a, ka lung a va han lêng thar vawng vawng tak! Kan hlim dun ve theihzia kha, tu dang mah kan ngai bîk lo va, min hmangaiha min ngaihsaktu țhian ka nei kha ka hlim êm asin! Khâng hun laite kha engtikah mah kan ko kîr tawh dâwn si lo, koh kìr chu sawi loh, amah Angaihi ngei pawhin mual a liam tawh bawk a, a reh vawng vawng tawh si. Hun a liam zêl a, hun liam zêl chuan kan nun a rawn her danglam a, her danglam zêl mah se nunhluia kan hlim lai nîte kan ngaihna erawh a bâng thei tak tak lo, kan hre reng lo a nih pawhin kan hre chhuak leh țhìn a nih si hi.

Ka han meng a, ni êng a lo dul deuh raih tawh niin, niin min chhun țhat loh tâkah chuan a vawt ve deuh sãk a, ka thlan tla a dài hneh tawh bawk nèn, peih lo zet chuan thovin ka han zi mar ar ar a, ka chhuk thlâk leh tawh mai loh chuan... E, ka chhuk leh hmain tih tùr ka la nei tak. Thlang lam hawi chuan ka han ding rem rèn ràwn a, ka kut pahnih ka hmui bula ti kumin," Ka pu Dozer..." tiin ka han au vak a, chutiang chuan vawi thum ka au, ka aw thangkhãwk raih raih chu ngaithlain ka nui sak a.

Hmanhmawh lo tak chuan ka chhuk a, ka hmanhmawh loh chhan pawh ram thlìr kual leh ka duh vàng a ni. Helai ram hi chuan ka mit hi chu a ti tlai ve thlâwt a ni, Mizoram, tlâng ram ngeia piang ka ni a, ngaina lo thei lo chu ka lo nih dâwn hi, vai ram kha ka ngaina hlawl lo va, ka ning ngawih ngawih pawh kha a àwm a ni, helai hi zawng Vai ram nèna khaikhin kha chuan... a, khaikhin lo teh zâwk ang, a inthlàu vawng vawng lutuk êm mai.

Zâwl chin ka thlen thlâk chuan ka pu ka hmu thut mai a, min lo en rùn mai lehnghâl a, ka au kha a hria ang a, a lungawi lo a ni maithei a ni.

Nuih sak chung hian," Tlângah ka han kal a," ka ti ringawt a, sawi lo pawh ni ila a hre àwm tho si, bâkah, eng atân nge ka hrilh ngawt ni? Ka kalna min zâwt pawh a ni si lo.

Țawng lo chuan min en kur reng a, inen hian thal tawp theih ni ta se min en dàn avàng chuan ka thal tawp tawh ngei ang, a hminga ka au vak kha a lungawi lo a ni ngei ngei ang, ka lo ngaihtuah chiang lêm lo va, ka ko vak ringawt kha a ni a, ka tih sual liau liau a ni.

"I hming lama ka au vak ringawt avàng khân tih palh, ka tih palh liau liau a ni, ka ti nawn leh--" ka bâna a rawn hmer thut avàng chuan ka țawng tàwp chiang teh e!! Ka en hau mai a, a hmêlah chuan thinrim hmêl chu a lang chuan ka hre lo va; mahse, engati nge? Min tih hlauh a tum vàng em ni? Min hmer nghet êm êm bawk si, tàl chhuah tum ni ta ila ka tãl chhuak lo nasa ang chu!

"I bo ta emaw ka ti hman alawm," a hnu deuha a rawn tih sup tâkah chuan ka thaw deuh huai a, ka kut a hmerna pawh a thlah dul ta hret, ka bo emaw tiin a lo hlauthãwng a, a thinrim vànga min tih nat leh min tih hlauh tumin min hmer a lo nih loh tawp chu, min lo ngaihtuah vàng zâwk a lo ni.

"Bo nâng, ke ngeia tlânga kal kha ka châk ve a. A lo nuam bawk sia, ka duh aiin ka han rei ta alawm," ka ti leh malh malh a, a mit taka ena hlim taka nuihin," I hming lam khân ka au vak sia, chu vàng chuan i thinrim ta emaw ka ti hman alawm," ka ti leh a, ka hlim tawp a ni mai, min ngaihtuah a ni tih ka hriatna chuan min ti hlim lo thei lo. Ani erawh chu eng emaw sawi hian a phun deuh sup a, ka bân a hmerna pawh chu a thlah zui ta nghâl a, min hmerna chu ka tuai nghâl vat vat a, a hmer na ve deuh bawk a, a sen deuh tàn mai.

"Ei tùr a awm, min rawn zui rawh," tiin a kal zui nghâl nul nul a, zui ve ngawt mai loh chuan. Ka bo emaw tiin min lo ngaihtuah ve êm êm a, ngaihtuahtu neih hlutzia ka hre chiang tawh, chu vàng chauh pawh chuan zui chu ka tih ngèi ngéi tùr a ni, lungawi ru zeta nui sakin ka ûm zui ve zat a, ka rilru chu a hlim veng veng hi a ni tawp mai.

A ei tùr siam tuizia lah chu, ka ril a lo țâm ve deuh tawh bawk nèn, ka ei țeuh mai. Ei lai chuan hlim takin làwm thu ka hrilh malh malh a, ani erawh chuan," Khatianga chin hriat loha i kal dâwn chuan sawi hmasa tawh ang che," a lo ti nghut thung a, lu bu nghat chung hian," Aw le," ka lo ti vat a, min ngaihtuah tih ka hriatna hian min ti hlim lutuk a, eng mahin min ti thinrim thei rih lo ang.

Ka thlalâk leh video-a ram thla ka lâk kualte chu phûr zet hian ka hmuh ve a," Tihian, social media lamah ka han post darh ang a, en apiangin lo kal an châk ve dâwn tih lah chu a chiang reng mai si a, a la rawn lùn dâwn chauh," ka han ti zui zat a, helai hmun hi hriatpawh a nih tak tak hunah chuan ka pu hi a buai zual ngawt ang, keimah ang chi an kal ve phei chuan an han ti buai ve ngei ang a...

Zàn dang zawng aiin boruak lum deuh mah se pâwnah mei kan chhêm leh a, guitar a rawn keng leh ngei a, kan zâi a, hla ka duh zâwng ka han thlang zat zat a, mizo hla hi ka ngaithla tam lutuk lo va, lãr deuh pawh hi ka hre lêm lo; mahse, vawi khat ka ngaihthlâk ațanga mawi tih chu ka nei ve tho a nia, tuna ka thlan 'Awm lo ta la' tih hla pawh hi ka vawi khat ngaihthlâkna ațanga ka duh a ni, youtube lama ka hmuh fuh a nia, a hla thu leh a thlûk tê hi fuh ka ti thlâwt.

Hla thu en theih ni hek lo, ka thiam ang angin ka sa a, ka pu erawhin a lo thiam phian a, a la hmasa zâwk zêl nghe nghe. A zârah ka sa chho thei ve zêl a, ka thiam chhunah erawh ka sa pàwr thei tawp thung. Kan sak zawh chuan uar takin kut ka bêng a," A máwi êm mai, kut ben a phû," ka ti a, a lam hawiin," Le, i hun ve thung, i duh thlang ve tawh rawh," ka ti zui leh zat a.

Ka rin loh lutukin 'Don't let me down' tih hla kha a rawn thlang ve khut a, hei pawh hi ka hria, a satu hian kan awmna hmuna Mizovin function kan neihnaa zai tùra sàwm a nih țumin a rawn sa a, a rawn thlawh fuh êm êm zui a, kei pawhin ka thiam ve deuh nghâl mai, mawi ka ti ve viau tho a nih kha.

Ka pu zài thiam rohzia chu a, a hla thlan chu sak màwi a har teh rêng nèn, a sa thiam lutuk tlat, record ka duh vàngin ka lo zàwm ve duh vak lo va; mahse, a mawi tâwk tùrin ka lo zàwm ve zauh zauh tho. Kan sak zawh chuan uar takin kut ka bêng leh a," I thiam lutuk! Chàwl rih lawk ila, i hrawk pawh a lo kham palh ang. Chuan, kan chawlh chhûngin interview nei ang aw," ka ti sauh sauh a, min en ringawt a, tui bottle chu a chhìn hawn sain ka pe a.

"In phawt rawh, i dang a ro palh ang, i zâi nasa si a," ka ti a, ka țhut dàn chu siam rem deuhin," Interview tihah khân huphurh viau duh suh aw, zawhna ho tê tê chhàn kha a ni mai a, a huphurhawm loh," ka ti leh a, tui a in hnu chuan a hmuh loh laiin ka phone-a record-na chu ka hmet zeuh a," Aw le, tunah chuan zawhna inzâwt țan ang aw. 'Ka pu' ti hlîrin kei chuan ka ko mai che a, i huat loh hrâm beisei ta ila, i hming hi Dozer-a a ni tak tak em?" tiin zawhna hmasa ber chu ka zâwt țan ta nghâl a.

"Naupan chhiatthlâk!" a ti hluk a, kei chuan," Zawhna chhàn loh âwih loh, thil harsa a ni lo bawk a," ka lo ti ve thung a, a ngawih deuh vung vung hnuah," Mi min koh dàn chu a nia," a ti ve ta a, ka nui sak a, step khatin hma ka sâwn ta phawt e.

"A nih, i nu leh pa hming min hrilh thei ang em? I hreh deuh leh i hming pum tal?" ka tih leh chuan," Ka pa- Liankima, ka nu- Zomawii," thu âwih tak hian a lo ti leh a, a hming pum erawh a sawi tel lo. Ka zâwt chho zêl a; mahse, tãwi tê tê bâkin min chhâng lo. A tàwpa ka zawhna," Nupuite hi, neih i tum hnai ve tawh em?" tih chu," Tum hnai lo," tiin min chhâng dût a. Tum hnai ve se țha tùr hi a nia, a mal si a, a upa chho zual mai dâwn bawk nèn, nei se țha ka tihpui; mahse, chutih rual chuan nupui a nei daih a nih chuan tuna ka tih buai ngam ang hian ka ti buai ngam tawh lo ang a, ka ti buai thei tawh hek lo ang. Chu chu ka ngaihtuah chuan nupui neih a tum hnai lo chu ka lãwm leh ang lawi a.

Ani chuan zawhna min zâwt ve lo. A sawi ve erawh chu," Helai ram chhûng hi fan kual i duh a nih chuan min hrilh hmasa la, ka fan kualpui mai ang che. Ka ram chhûng hi kei hian ka hre chiang a, kei aia hre chiang tùr an awm chuang lo, fan kual phal vek a ni nain min hrilh hmasa thei la chu ka ti," tih a ni, thil harsa a ni lo, min ngaihtuah vàng vek a ni alawm. 

Mahse, helai ram hi 'ka ram' a ti ve ringawt a!! A, a lo enkawl rei ve tawh a, amah chauh a ni bawk nèn, a ram nia a sawi pawh chu a àwm lo hran chuang lo ve, neitu rilru a pu thei tawh hial ang chu. Rûn zawng zawng ni se a pa nèna an sak vek ni khán a sawi bawk a nih kha, a tân zawng a chènna hmun a ni bawk a, a ram dik tak a ni thei ang chu.

Kan ințhen hma chuan," Ka pu, âr kha i làwi thei bîk a, engtin nge i tih? A pui khân a rawn lim ve lo che em ni?" tiin ka han zâwt leh rih a, ani lah chuan," Min hlau alawm, 'Lût r'u' ka tia, an lût vek mai," a lo ti mai a, ka âwih chiah lo deuh a, a hmêl ka en lah chuan a lo nui hauh bawk si lo, a hmêl pà zet hi Ârpui chuan a lo hlau tak tak em ni zâwk le?

"Tukverh leh kawngka khãr țha rawh, ruah a rawn sûr maithei a nia," a tih chuan," Zaninah hian maw?" kd lo ti vat a, a bu nghut ka hmuh chuan mak ka ti deuh a, tûn ang huna ruah sùr te chu a, a va hit àwm lo ve! A sûr a nih teh chuan khua a vâwt zual ngawt ang.

Min chah ang chuan ka ti thlap a, mit hmunah ka pu zai ka record chu ka ngaithla a, a interview-na nèn, ka nui sak sak a, țha tak khân min chhâng ve zél mai kha a nia, " Ho mai mai," a tih duh hmèl tehlul nèn, a fel roh ka ti tak tak a ni.

Ruah chu a rawn sûr tak tak a! Engtin nge ka pu khân a hriat le? News-ah khaw chin a en a ni ang tih tùr lahin phone signal pawh a awm lo hrim hrim bawk si, tlâng zâwlah khân a rawn kal ve lo tih lah ka hre chiang viau si a. Ruah sûr chuan mut a va ti nuam tak! Mutpuana invûr țha sauh sauhin tui takin ka muhìl ta siai siai a.

A hma zawng aia ka pu chu ka nèl tawh avàngin chhùn lama ei tùr ka siam pawh chu ka va pe ve a, nizàn lam ruah sûr vàngin khua a vawh belh bawk nèn, ka inha chhah lûk mai a, ani erawh a inthuam belh chuang lo a nih hmèl, a ngai ang têin ka hmu. Ár a lo talh a, a lo buaipui mêk a ni.

"Vâwt i ti ve nange?" ka ti hial nghe nghe a, ani lah chuan," A vawh belh hran em ni?" a lo ti mai a, vawh belh teh rêng mai, chhùn lam mah ni se ka khùr lo chauh chu a nih hi, zàn lam aiin chhùn lam hi eng mah tih lêm loh chuan a vâwt zâwk hialin ka hria.

"Kha, kum thar sa tùr a ni ang maw?" ka han ti a, ani chuan," I ei châk em?" a lo ti thung a, ka ei châk lutuk hran lo nain a siam dâwn chuan ka ei châk tho, kan leh chhum hi chu kan ei nasa țhìn a, danglam deuh taka siam dàn te hi awm thei se ka ti țhìn.

Hetah hi chuan Pathianni lo thleng hian awmzia a nei lêm lo khawp a, ni chu a kal ngai rengin a kal a, biak ina inkhâwm tih kha a awm ve thei bawk si lo va, han awm tawp chu ka inthlahrun deuh avàngin Bible thu chhiarin ka țawngțai a, hei hian ka rilru a tih nawm ve phah a ni. Khawi hmunah pawh awm ila Pathianniah hi chuan A lam hawi hi a țha hrim hrim, kan tih ngèi ngéi tùr a ni bawk ka ti ve tlat.

31 zànah Ârsa kan hem ve a, mi dang awm lo ta chu kan pahnih chauh kan ni leh tawh a; mahse, mi dang ka mamawh lêm lo. Min ngaihtuahtu ka pu bulah ka awm a, ka hlim tâwk viau, a boruakin a zir bawk a, in chhûng chêp takah hun hmang lovin pâwnah, mei lum bulah kan țhu a, nuam ka ti viau a ni.

Zàn rei tak men ve chiam kher ngai kan tih loh vàngin hma ve deuh hlekah kan ársa hem chu kan ei a, a hâng tui nasa mai si a, tui ka ti tak zet a ni. Thingpui nèn kan hmeh a, a dai lam kha chu ka in duh tawh lo, ka ngam tawh lo a ni, zanin angah hlauh phei chuan.

Sihal a rawn û rawng rawng a, ka phu zawk lehnghâl, a hnai ve êm bawk a ni; mahse, ka puin a hau vat a, an kiang thuai mai. Ka hlau hran lo nain an u dàn hi ka ngaina êm êm lo. Tui bottle la tùra ka pên chu eng emaw hi ka pal palh hlauh a, ka țê țhat a, ka tlu tùr chu bân tha chak zet hian min rawn dawm hman a, ka taksa rihna erawh ka thunun thei tawh chuang lo; mahse, ka tlu bawkkhup thlawp dâwn emaw ka tih laiin nghet zet hian a kut pahnih chuan ka kâwngah rawn manin min pawt kãng lawp a, a lamah min pawt nghâl dâwrh bawk. A âwm ka nghèng rawk a, ka kuah zui lo thei lo. Hun rei lo tê chhûnga thil thleng a ni nain ka thin a va phu nasa tak! A chhan chu a taksa lumna ka feel thei tlat a, ka chhîp a rawn thâwk khum lum bawk, kan taksa ni se a insi tlat bawk a.. A lum nawmzia mai chuh! Mipa taksa dik tak ka nghèng niin ka inhria. Mipa taksa hi ka tawk khât a, ka nghèng khât hrim hrim tihna. Benson-a kha ka bialpa chu a ni ngei a, fawh pawh kan infâwp ve reng reng bawk; mahse, tûn ang êma inhnaih leh insi chét hian kan la ding dùn lo hrim hrim!

A vawi khat nân țawng mai tùr ka hre ta lo, ka ngawi kar mai. Ka thin chu a phu dup dup a, ka mar phû pawh a phu pãwng awt awtin ka hria, sawi tùr ka va duh tak! Ka kuahna hi ka thlah mai dáwn em ni? Thlah tùr pawhin amah lah ka la nghèng tlat alawm.

"I țha em?" a rawn tih sup tâkah chuan harh chhuak thut anga langin ka awm dàn chu ka insiam țha a, ka thinphu ring lutuk chu a hriat loh hrâm ka beisei. A phu nasa lutuk a, ka âwm pawh hi a rawn päwng ri dawt dawt maiin ka hria, Temple sanapui inkhâwng rî ai pawhin a ringin ka hre hial mai ka ti.

A țawng duh zâwk ka ngawih tâkah chuan thãwm a ring duh ta khawp mai a, mei alh ri hliai hliai leh zàn lama ramhnuai rannung rî tih loh chu thãwm a vâng, Sihal lah a rawn û duh tawh bawk si lo va, rawn û leh tal se ka va ti tak! Ka bula țhu lah hi biak loh chuan sawi tùr a hre lo, chèngkawl ang mai lah ni chuan, kei lahin sawi tùr ka hre tawh dèr lo, a bo vek, bâkah, ka zak alawm.

*I TÛN HUN HMAN MÊK ZÊL KHA A ȚHA THEI ANG BER LEH HLIM THEI ANG BERA I HMAN PHAWT CHUAN INCHHÌR NÎ I NEI NGAI LO ANG*