☆DOZER☆ - 17 By Dingdi Pachuau

☆DOZER☆ - 17 By Dingdi Pachuau

"Zànah vâwt i ti țhìn em?" a rawn ti thûm dût a, mak ti deuhin ka en vat zui a! Mak ka ti lo thei nâng, min be hmasa ve miau alawm. Min lo en lêt ve rùn a, ka zahna dah bovin second rei vak lo chhûng chu ka en a; mahse, eng emaw vàng khân ka en reng ngam lo thung.

"Ti ve tho," tiin ka chhâng. A dik chiah a ni, vâwt ka ti a, vâwt ka tih vàngin ka inthuam lum vak țhìn, chu vàng chuan ka mu lum thei țhìn chauh rêng a ni. 'I mu lum thei lo em?' tiin min zâwt lo a, vâwt ka tih țhin leh tih țhin loh min zâwt zâwk a ni.

"Lo nghâk lawk rawh," tiin a tho thut a, a in lam panin a kal ta nul nul mai,  engtizia nge maw ni le? Sin tùr min rawn pêk belh dâwn em niang? A ngai lo asin, ka mu lum ve thei reng alawm.

A va rei lo, tui lum ip kengin a rawn phei leh a, pahnih lai a lo la ni zui. Min pêk pah chuan," Mut puan kha chu phawrh belh tùr a awm kha," a ti a, kei chuan," Ka mu lum thei, a ngai lo," ka lo ti ve thung a, lâksak pawh ka duh lo. A zawhna ka chhàn dàn khân a zir lo deuh nge ni, ka mu lum thei lo-ah a ngai a ni ngei ang.

Ka lâksak duh loh vàng nge, Rûnah chuan lûtin amah ngei chuan a han dah a, a rawn chhuah leh hnuah sa hem bãng la awm chu kan ei leh a, kan țawng lêm lo nain ka melh ru zauh zauh thung, eng emaw taka a laka ka 'eng emaw' ang hian ani saw chu a awm ve àwm si lo va, chu chu sawi loh, a rilruah hnà leh helai enkawl chhoh zêl dàn tùr bâk a awmin ka ring lo.

Mut hmun thleng pawh chuan ka ngaihtuah zêl a, ka pu hi ka ngaina a, ka nêl a, min ngaihsaktu a nihna hian min ti ngaina zual; mahse, a lakah hian rilru eng emaw, nulât tlangvàlna lam ang hi, ka la pu ngai lo va, chutiang chuan ka la en ngai lo bawk, a hmêl hi chu a țha ka tih bâkah mipa nih dàn tùr taka piang chhuak niin ka hre bawk; mahse, zanina kan awm dàn ațang khân, ka rilru a buai chho ta deuh tlat a ni. Kan inpawmchilh hnai ve êm bawk a, a chakin thahrui a ngah mai si a, min pawm khân him riau ka inhriat rualin ka zãm deuh bawk a nih kha, a kuah kha a lum nuamin ka rilruin nuam ka ti a, engah nge nuam ka tih ngawt le? Kei hian tisa takin ka lo ît ru reng em ni zâwk?!! Awi, ka rilru mai mai chuh, a va zahthlâk tak! Ka pu lakah rilru tenawm leh hurherh tak ka pu thei lo ang, ngaihtuah pawh ka ngaihtuah chhin tùr a ni lo, tihchi loh lutuk!! A, muhìl ila, naktûk zîngah chuan theihnghilh vek teh ang.

Ni thar, kum thar a lo inher chhuak leh ta. Kum thar a nihna angin kei pawh hmasâwn tumin hmâ takah ka harh ve a, khum ațanga ka thawh chhuah hmain Pathian hnênah Kum thar min hruai thlen avàngin làwm thu sawiin ka țawngțai phawt a, ka hma lam hun tùr zawng zawng pawh a hnênah ka kawltîr nghâl bawk. Pâwnah chhuaka inti harh lêm lovin ei tùr ka siam nghâl malh malh a, nizàn lam thil kha chu ka ngaihtuah chhuak duh tawh lo. Vawiin chu ni thar a nihna angin rilru thar nèn ka pu ka duhsakna lantîrin chaw eiah ka sâwm ang ka ti ve a, min duhsakna leh min ngaihsakna ka rulh lét ve nân làwm thu ka sawi ve ngêi a ngai, ka inbuatsaih ve sauh sauh rêng a ni. Khua váwt viau mah se chaw ei kham lam chu lui kam lam fang kual leh mai mai ila, ka haw a hun leh țêp tawh si a ka ti a, chu lam ka ngaihtuah chuan ka rilru a hnîm nghâl ruih thei nia! Ka ngaihtuah chhunzawm duh ta lo va, ka tûn hun zêl hi hlim takin hmang zâwk teh ang. Ei tùr siam pah chuan 'Awm lo ta la' tih hla kha play-in ka zàwm rât rât a, ka la sa sual zui a, min lo ngaithla awm na se chuan aw...

Kawngka ka hawng a, ka pu chènna lam pan ka tum lai chuan amah nèn kan intâwk ta chiah a, mak ti deuh hlek hian," Lo kal ka tum chiah a! Mahse, i lo kal bawk sia. Kum thar chibai le, ka pu... Dozer," ka han ti ban deuh a, inthiam lo leh deuhin ka nui zui leh nghâl a, ka koh dànah a lungawi lo hran lo a ni ang, a lo bu nghut a," Nang pawh le," a ti sup a, a hmui liak huh zauhin," Tûkțhuan eia rawn sàwm che ka tum a," a ti leh a," A ni maw?!! Kei pawhin rawn sàwm che ka lo tum ve chiah a!" ka ti vat a, chutah," Engtin nge kan tih ang? E, ka hnênah i lo la ei ve miah lo, lo ei ve tawh zâwk rawh," ka ti zui zat a.

Min lo hnial khauh a, a hnuah a in lamah kan inchawi phei ta ringawt a, ei tùr ka siam ve țhintîr ringawt ka duh bîk si lo a ni. A chawhmeh lo siam sa nèn, chawhmeh chu kan ngah ta khawp mai a, a palen ang hùin ei tùr lah chu a heh hran lo viau bawk si nèn," Ei țeuh ta che, i chak thei nâng," te chu ka han ti ve a, ani erawh chuan," Ka duh tâwk viau," a lo ti mai thung a. A la bãng tam si, țhing tùr atân chuan ka ui hlawm a, ka ui ei ta țeuh ringawt a; mahse, ka ei zo thei chuang lo va, vawk chaw atân kan dah ta ringawt a ni.

Chaw ei khamah chuan eng nge ka tih châk min zâwt a, ka hrilh chuan," 

Sangha i man châk em?" a ti leh a, ka phûr nghâl zar mai! "Sangha man tùr a awm... maw?!! Yess... ka châk tawh lutuk! Ngèi ngéi aw," phùr lutuk avànga awki sâng zet hian ka lo ti thuai a, ka phùr dàn chu ka sawi thiam lo záwk, phûr tawr tawr tak ka ni.

Lui kam chhak deuh lawkah chuan dîl a lo awm niin, lui tui chu lo lian pawh ni se a chîm phâk dâwn lo, a ko tlângah chuan thing eng emaw hi a phun kual vek a, a kûr suau hlawm lehnghâl a, hmuh a nuam tawp. Boruak vâwtin tui chhûngril lam pawh a ti váwt ve ngei ang a, a pâwnlâng lum lam an rawn hnaih ve deuh em maw ni ka ti, sangha chu an lang noh noh a, ni lum an ai ve pawh a ni maithei. Hmuhnawm tiin ka âu chèl chúl mai a, ka hmu khât ve êm mai a, man phei chu hla tak hi a ni ringawt. Vawiin phei chuan kan man dâwn bawk si a, ka phûr êm a ni.

Lèn a dêng a, keiin a lèna a man sa chu ka lo la chhuak zêl a; mahse, ka chhuah leh zêl thung, ka khawngaih tlat mai pek a! Bâkah, man khâwl țeuh ringawt kha awmzia a awm lo, a ei tùr atân a tam berah pahnih bâk a ngai dâwn chuang lo va, min pe ve dâwn a nih leh pathum a ni leh mai a, a vawi khat denah lah pathum aia tam zêl a man bawk si. A man sa ka chhuah zêl a ni tih erawh chu ka hrilh duh miah lo, lehlam a hawi hlànin ka chhuah ru zêl a ni; mahse, man vêl chu a nuam ka ti ve hrim hrim, sangha man ka ni tho tho.

"Eng zât nge kan man tawh?" a rawn tih chuan ka nui ringawt a, a chhan chu bucket-ah chuan pakhat mah a awm tawh tlat lo a ni. A thinrim ka ring hauh lo nain ka nuih tlawn deuh a," An inperh chhuak leh vek a nih dâwn hi," ka tih chuan," I lo chhuah vek a ni maw?" a ti a. La nui reng chung hian," Ka ti tak tak! An inperh chhuak vek a ni ang," ka ti leh a, min en rùnin a rûm nghut ringawt. Ka kiai sak a, rûm nghut mah se a thinrim hmêl ka hmuh loh avàng erawh chuan nuam ka ti, ka rilru pawh a hlim.

Hlim takin hun ka hmang a, kan sangha mante chu thla ka lâksak a, nakin lawkah an thi mai dâwn si a, ka khawngaih dùn reuh viau mai; mahse, kan ei tùra Pathian min pêk a ni bawk sia, an awm dàn tùra Pathian ruat chu lungawi takin an pawm ve mai a ngai a ni. An thi ang a, kangin tui ti takin kan ei leh sawr sawr mai a ni ang chu.

Zàn lamah pâwnah mei kan chhèm leh a, vawiin lama kaikuang leh sangha tê tak tê tê kan man tel kha a rawn keng a, mau a rawn keng bawk a, eng a ti dâwn chu ni maw ka ti a, mau chu tan tãwiin chutah chuan sangha leh kaikuang chu a thun ta vek a, a bàwlhlo tùr ni àwm tak thil dang pawh a thun tel bawk. Hnahin a chhìn phui a, chu chu mei alhah chuan a rawh a, ngawi rengin a chêt dàn chu ka lo en reng tawp.

A hnu daihah mau chu la chhuakin a phel a, a chhûnga mi chu hnahah a bun a, a rim tui reuhzia chu a! Ei chhin tùrin min ti a, ka tîm deuh hlek nain thil pawi tùr chu ei chhin tùra min tih ka rin loh avàngin tlêm ka ei chhin a, ka rin ang a lo ni miah lo! A hâng tui tawp, a tui lutuk chu ka lei ka lem tel lo chauh ni berin ka hria!

"A hâng tui lutuk!" ka ti hliai a, a lo nui suk a," Hetia Mautheia hem hmin hi chu a hâng tui duh bîk asin," a ti ve sup a, kei chuan," A ni maw?! Chuti, sa dangte pawh hi a hem theih ang em? A hâng tui ve thei tho ang chu tiraw?" tiin ka zâwt a, ani chuan," Theih e, chawte pawh kan chhùm țhìn alawm. Ramhnuaia kan kal chânga chaw chhumna tùr Bêl kan ken loh chuan Mauthei hian kan chhùm țhìn," a lo ti ve leh a, a thu sawi chu mak ka ti a, remchâng an hria ka ti riau bawk, bêl ken buai kher kha a ngai dâwn si lo va.

"Chutiang chuan ei ve chhin a va châkawm! A tui ngawt ang. Hawh, naktûkah ramhnuaiah chuan kal ve ila, chhùm ve chhin ang?" tiin ka han sâwm leh thâwr ringawt a, chutianga tih ve chu ka châk zek zek. Ani chuan meng zîm deuh san chunga min rawn enin," Ramhnuaia kal kher a ngai hleinem, hetah pawh a tih theih tho," a han ti a," Tak tak maw? Yess... chuti, naktûkah chaw chu chhùm ve chhin ang aw? I duh loh pawhin a tih dàn min hrilh ang a tiraw? Ka ti buai tam tawh viau na chein min hrilh leh poh mai a ni ang chu, khawngaihin?" ka ti leh a.

Ka ti buai tam tawh a; mahse, tih buaina tùr hi ka la hre tam nasa mai si a, a bulah hi chuan ka tih ngai loh hi tih ka châk et et zêl bawk nèn, mi sual deuh ni phei se chuan min vìn nasa thei ngawt ang, dawhthei takin min dawh hrâm hrâm zêl zâwk a.

Ka châk apiang min tihpui ka ti mai, hna a thawk hman meuh pawhin ka hre lo, ka inthlahrung deuh a," Hna thawh tùr sawi la, ka thawhpui ang che, chak lovin zei vak lo mah ila ka thawk sâwt ve tho ang. Ka ti buai nasa tawh si che a, ka inthlahrung ve tlat tawh," ka tih chuan," Min tih buai tùrin alawm ka awm," a lo ti mai a, min chhàn dàn avàng chuan sawi leh mai tùr ka bo daih.

Ka haw hun a lo hnai ta, ngaihtuah duh lo viau mah ila ka ngaihtuah lo thei ta lo. Ka va huphurh tak! Helaia awm reng theih hi ni se, a hmun ka ngainat hi chu thuhran, ka thil tih châk apiang sawisêl hauh lova min buaipui zêltu ka pu hi ka ngai dâwn bawk a ni. Ka ngai dâwn tak tak! Ka rin aiin ka ngai mah mah ang.

Ka haw dâwn zànah chuan pâwnah bawk mei lum kan chhêm leh a, ka tûn hun zêl chauh ngaihtuah duh mah ila ka thei pumhlûm bîk lo, naktûkah ka haw tawh dâwn, he hmun nuam leh ngainatawm tak hi ka chhuahsan leh tawh dâwn a ni, chu chuan ka rilru a kam lo thei lo. Chu vàngin, zàn dang angin ka ka pawh a kal thei lo va, ka ngawi leh vung vung țhìn. Ka ngawih chuan a reh hmak a ni mai, ani mi țawng tam lo a ni bawk si a, mei alh hlap hlap ri tih loh chu thãwm dang a awm lo.

"I thaw a veng huai tawh dâwn a ni," ka han ti chhuak a, min rawn melh rulhin," Engah chuan maw?" a ti sup a, kei chuan," Aw, naktûkah ka haw tawh dâwn a, ti buai rengtu che ka awm tawh dâwn lo va," ka han ti a, ani chuan," Min ti buai hleinem," a lo ti mai a.

"A hma pawhin 'Min tih buai tùrin alawm ka awm' i tih kha; mahse, kei chuan ka ti buai nasa mah mah che tih ka hria; mahse, ka pu, ka nèl êm vàng che a ni, ka țhiannu boral ta tih lohah chuan nang hi ka nêl ber che a, i felin ka tih apiang min tihpui peih a, chu chu nuam ka ti êm a, ka lo thlahlel lutuk a ni ang, min hre thiam hrâm dâwn nia," ka han ti ve luam a, ka rilru tak tak ka sawi a ni, a tân ninawm mai ni dâwn mah ila min ngaihtuahtu ka pu hi kei chuan fel ka ti lutuk, ngaih pawh ka ngai dâwn bawk, ani ang hi ka tân chuan an vâng a, ka tawng tawh kher lo ang.

"Kha lam kha chu duh tâwk la, i lo kal leh hunah chuan helai pawh tûn ai chuan a lo changtlung deuh thei tawh tùrah ngai ang," a lo ti thung a, ka lo nui a," A nuam ngawt ang chu, tunah pawh hian nuam ka ti sa reng a nia, he intê phei hi chu 'ka intê' ang hialah ka ngai tawh, ka lo kal leh hunah pawh hetah tho hian ka awm leh ang," ka ti leh a, ka intê naktûka ka hawsan tawh mai tùr chu ka en a, hei pawh hi ka ngai ngawt ang. A, helaia thil engkim mai hi ka ngai vek ang, tun ațang pawh hian ka ngai țan tawhin ka hria.

A tûka ka tho chhuak chu ka phûr lo kher mai, phûr lo tak ka ni. He hun hi a lo thleng dâwn tih hre lâwk vek mah ila a taka a lo thlen meuh chuan a phùrawm lo zual. Pâwnah chhuakin ka hawi vêl a, boruak a vâwt vur a, ka phùr lohna min hriat thiampui lo tih hriat zet hian khua lah chu a thiang nuam viau lehnghâl a.

Ka lût a, tui lum inin tukverhah ka dâk leh vang vang a, sawlaia thing leh phùl mawi tak takte saw naktûk lamah chuan ka hmu tawh dâwn lo,  a piah deuha theihai kûng buk țha zet pawh saw ka kal leh hunah lo chuan ka hmu tawh dâwn lo. Chutiang chuan ka en kual zêl a, ka hmuh tàwpna tùr ti ni àwm takin uluk takin ka en kual vek a ni mai.

Kawngkhàr a rawn ri koh koh a, ka chhàwn vat a, ka pu chu pâwnah lo dingin kawng ka hawnsak chuan," I haw hmain tlânga kal leh i duh em?" tiin min lo zâwt teh ngawt a, zêp lohah chuan ka lo ngaihtuah miah lo, kal ka duh pawhin ka hre lo; mahse, ka pu hian kal a duh a nih chuan ka kalpui ngei ang.

A bike chuan kan tlãn chho leh ta țek țek a, boruak a vâwt a; mahse, ka pu hnungah chuan bei tlãnin boruak vâwt ka tâwn ve lo, a lum nuam ka ti, heti hian awm reng thei ila, haw ngai tawh lo se ka ti; mahse, ka duh angin hun ka kaltîr thei si lo.

Tlâng chu a boruak a lo dang leh a, a vâwt țha var var viau mai. Ka hnâr ka han khawih chuan a lo vâwt țha thlar thlar khawp a, kan thaw pawh a khu luai luai mai. Kan thlang lam chu ka hawi thla a, tuna ka hmuh ang chiah hi ka mitthlaah châm reng teh se, ka maimichhîng vang vang a, he ka mitthlaa ka hmuh ngei hi ka lunglèn zual chângin ka suangtuah lêt ziah ang.

"Helai hmun hi i ngaina tih ka hria a, chu vàng chuan i hmun ngainat êm êmah hian i țhiannu boral ta hriat reng nân eng emaw tal hnutchhiah țha ka tihpui che a ni, i duh lai ber hmun thlang rawh, i țhiannu tân chuan pangpâr mawi tak ka lo phun ang. Chuan, tuna i awmna Rûn pawh khu, a tân leh i tân liau liau mi dang luah ve theih loh tùrin ka dah ang," a tih chuan ka pu hmêl chu ka en reng ringawt a! Hei chu ka lo ngaihtuah loh lam daih a ni. 

Ka inher leh thuai a, thlang lam hawi chuan," Angaih..." tiin ka han au vak a, chutianga vawi thum ka au hnu chuan ka maimichhîng vang vang a, ka rilru chuan," Angaih, i lo hria tiraw? Ka puin nangmah hriat reng nâna a thil tih tùr hi, i lãwm em? I kal châkna hmunah khân nangmah hriat rengna tùr thil a awm dâwn a nih chu," ka ti mawlh mawlh a, làwm avànga ka mittui far lum pap pawh chu ka hre reng a.

A hnu deuhah chuan," Ka pu, ka lãwm e, ka țhiannu aiawh pawhin làwm thu ka sawi e, a tâna i thil tihah hian a lãwm ngawt ang," tiin ka pu chu ka en a, pan hnãiin zah pawh dâwn lo chuan ka kuah a, hetia kuah reng hi ka va châk tak!

"Helai hmun hi ka ngai ngawt ang, thil engkim hi ka ngai ang, ka pu, nang pawh ka ngai ngawt ang che, ka chungah i fel si, chutiangin Angaihi chungah pawh," ka ti sap sap a, ani pawh chuan min rawn kuah lêt ve a, chutia min kuah lêt ve tâkah chuan ka kuah nghet sauh a, khaw vâwt pawh ka hre tawh mang lo, min kuah dàn chu nuam ka ti tak zet a ni, duat taka naute an kuah ang hian min kuah niin ka hria.

Chaw ei kham chuan chhuak mai tùrin ka inpeih at tawh a, ka scooty pawh ka puin min en felsak vek tawh a, petrol ka hmuh theih hmaa ka mamawh tùr chin pawh min thunsak diam tawh. A ngaihtuah kim tak tak a ni, kei chuan ka ngaihtuah pha ve hauh lo.

Gate thleng min thlah a, gate chu a hawng a, ka tlàn chhuah hma chuan," Ka pu, lo inenkawl țha rawh aw, hna kha lo thawk vak vak lo la, a tâwk têin i lo thawk dâwn nia, dam taka kan inhmuh leh beisei ang," ka han ti a, ani chu a lo bu nghut a, țawng erawh a țawng ve lo.

"Chuan, làwm thu ka sawi nawn leh e, engkimah ka lãwm a ni tawp mai, ka kal tawh ang e, Dozer," ka ti leh a, ka nuih a; mahse, ka nui lui mai mai, ani chu a din ngaiin a ding reng a, min en rùn reng bawk. En reng theih chu ka duh ve reng; mahse, ka tlàn chhuah thuai a ngai; min nghâk ve reng bawk si a.

"Mang țha le," tiin ka kut chu ka vai zauh a, muangchângin ka tlãn chhuak zui ta a, scooty side glass ațang chuan ka la hmu thei a, min rawn en zui ve reng tih ka hmu a; mahse, kawng kãwia ka tlàn liam tâk hnuah erawh ka hmu zui thei ta lo, ka pu leh Phaizâwl hlatsan chuan ka tlãn zêl a, ka rilru erawh Phaizâwlah hlîr chuan a châm thung. Engtikah tak tlawh tùrin kal leh thei ang maw?

*PHUBA LÂK AI CHUAN HRIAT CHHUAHTÎR TUM ZÂWK RAWH*