☆DOZER☆ - 19 By Dingdi Pachuau

☆DOZER☆ - 19 By Dingdi Pachuau

In ka thlena ka nutei'n min lo hmuh chuan," E, i lo thleng ta maw? I rawn lei ang chu tiraw?" a lo ti vat a, a ngaihna hre lo zetin ka nutei chu ka en hau a, chutah, ka hre chhuak leh chiah! Ka va theihnghilh chiang tak! Ka pu ka hmuh ațang khân ka rilru a pângngai thei rih tlat lo va, tunah pawh hian kha thil kha a thleng tak tak em tihte ka la ngaihtuah chho leh a ni, a tak ni tùr hian ka ring ngam lo ni berin ka hria. 

"Ka theihnghilh chiang lutuk! Ka va chhuak leh ang e, ka rei lo ang," tiin ka tlãn chhuak leh nghâl vat a, ka nutei chuan min ko zui nain ka lêt chuang lo, ka rilru hi chawmawlh hûih tho siin ka hlim tho bawk si a, thil dang ka ngaihtuahnaah a leng lo a ni ber,  thil thleng mawlh kha, min ngaihsak tùr thu sawiin ka chalah a fâwp a...

Ka lu thingin ka biang chu zàwi tê têin ka bêng thep thep a, ka inthin harh vat a ngai a ni, mi ã ka ang dâwn êm mai, ka nutei thil min chah pawh ka theihnghilh daih thei a nia, ka pu zet chuan min ti danglam hneh tak zet a ni.

Zànah lo lêng an awm lo bawk a, ka room lam ka pan thuai a, vawiin lam thil thleng kha ka ngaihtuah leh ta veng veng a, ka hlim veng veng a, a chângin," Aaaa...!!" tiin ka insik leh vak a, thil thleng tak tak a ni chiah em tih hre chiang tùrin a nia ka insih ni, a chângin ka nui leh var var țhìn bawk a, min lo hmu rutu awm se chuan mi ã emaw min ti ngèi ngéi ang. Ni e, mi ã ang maiin ka awm tih chu ka hria; mahse, ka hlim êm vàng a nia, mi pawhin min dem thei bîk lo ang, ngaihsaktu neih hi ka tân chuan a hlu bîk ngawih ngawih si a.

Min hmu tùr leh kha thu min zâwt tùr ngat khân Aizawlah a rawn kal tihna em ni le? Ka phone number a nei bawk a, engtin nge a neih theih? Khawi ațangin nge a neih? Tu nge a zawh? Nge min lo hre ru reng zâwk? Min lo chhui rù em ni? Zawh tùr ka va ngah tak! Rei lo tê kan inhmu a, a duh chin leh a hriat duh chin chiah min zâwt a, a kal leh nghâl daih a, zawhna zâwt tùrin hun pawh ka nei ve lo tluk a ni, zawh tùr ka ngah ve tehlul nèn, ka zawh ve chhun lah kha min chhâng lo zui a.

Phone lo țangkai lohzia hi tunah tak hian chiang takin ka hre thar, khâwl awmze nei lo mai a lo ni. Ka biak duh ber ka biak theih chuan si loh chuan eng nge a țangkaina? A hmaa țangkai ka tih țhinna zawng zawngte kha eng mah lo mai a lo ni ta. A nih loh tal pawhin, amah tal hian min rawn biak tum se... mahse, a sawi duh a sawi zo tawh a, eng nge min rawn biak ngawt ang? A be duhtu zâwk tân zawng biak hun tùr hriat a har êm asin, tlânga a han kal phawt loh chuan signal a nei thei dâwn si lo va, a tlâng kal hun tùr lah ka hre lâwk bawk si lo. Hre lâwk ngat ila chuan ka va be hmasa zâwk mai tùr a nia...

Ka hna lama ka kala ka àwl châng leh mahni chauha ka awm chângin ka pu bâk ngaihtuah ka nei ngai ta lo, ka lo ngaihtuah leh veng veng țhìn a, ka ngai a ni, ka phone-a a thla ka hmehsak leh kan lâk dunnate pawh ka thlîr ãwl lo ta mai. A mit meng mawi takte, a khabe hmul leh a hmui hmul tam vak lo dum hlap sï leh a hmêl țha pà takte chu ka mitthlain ka hmu reng a, a hmêl țha tak ti lang chiang tùrin a bek sam a nawr kawlh vek a, a chhîp sam erawh a zuah sei viau thung a, a la inhmeh êm êm zui, a hairstyle tùr atân liau liaua an hmuh chhuah ni àwma mawi a ni. Mi dang chuan an inhmeh ve pawhin ka ring lo, ni leh lo, ka ring lo mai ni lovin ka pu inhmeh ang hi chuan an inhmeh thei lo hrim hrim.

March thla kan chuang kai a, khua a rawn lum chhoh leh tâkah phei chuan Phaizawl ka ngaih a zual tak zet, kal leh ka châk a ni. Ka pu pawh ka hmu leh châk tawh bawk, ka ngaihtuah a, hetia ka pu ka han hmu châk thar ta êm êm mai hi, a hma ațang tawh khân ka lo duh rilru a ni ngei ang tih ka ngaihtuah a, min ngaihsak tùr thu min hrilh avànga han duh thara hmuh châk thar thut thu a awm lo ka ti tlat a, chu vàngin amah duhna rilru ka lo pu reng tawh a ni ka ti a ni.

Túkțhuan kan kîl laiin ka patea'n ka pain ka nu Aizawl lama rawn phurh phei mai a duh thu a hrilh chu min hrilh ve a, mak ti zet hian," Engtin nge ka nu chu a awm a?" ka lo ti hau a, ani chuan thil serious tak a nih a rin loh thu a sawi mai a, ka pa chuan min rawn hrilh duh lo a ni chiang mai, min rawn hrilh ve mai se, buaipui pawh ka lo buaipui thei ang a.

"Hetah an rawn innghat ang chu tiraw?" ka tih leh chuan," Nghat lo ang, i pa sawi dànin. Chanmari West lamah sâwn i nu chhûngte an awm ni àwm tak a ni, an pan zâwkin ka ring," tiin min lo chhâng a, ka nutei chuan," Hetah rawn innghat mai se aw... Partei tak hi chu a! A inthlahrung leh lutuk țhìn a, min tih buai khàt tehlul nèn, kan buai phah àwm tawp si lo va," a lo ti ve vang vang a. Ka patea chuan," Thisen zawmpui zâwkte awm ve reng laia helai rawn pan chu a duh bîk lo tawp ang," a lo ti ve leh a.

Ka hna lam pana ka chhuah hmain ka pa chu ka va be chhin a, ani chuan," Ka lo hrilh duh lo che a nih kha, i hna lamah i buai àwl si a ka ti a, lo ngaihtuah duh suh, Lungleia inentîr leh țhin ngawt ai chuan ka tih vàng a nia, hlauhthàwnawm a ni lo," a lo ti a, ka thaw a veng deuh huai mai. Ka nu tak ni lo mah se ka pa nupui leh ka naute nu a ni a, a natte zawng ka duh bîk miah lo.

Ka nu nèn inbe ngai lêm lo mah ila Felfeli erawh ka text zauh zauh a, phone call-in vawi hnih ka be tawh bawk. Nau a nei hnai tawh nasa a, a u ka nihna angin a chanchin ka han ngaihven ve a, ka nu nèn an inbiak chàmchî chu ka ring tho a, nau a neih hunah pawh ka nu awmpui a duh ngeiin ka ring a; mahse, ka nu chu a hman kher ka ring lo, bâkah,  Champhai daiha awmpui tùra han kal chu a buaithlâk duh ngawt ang, kâr a hla si a. J-a  chhûngte an fel a ti tho a, a farnute'n an lo buaipui ve tawh mai ang chu.

A nau neih a lo hun chuan ka nu chuan a awmpui thei lo ta ngei a, a rûk tak chuan ka khawngaih reuh kher mai. Hetiang hunah hi chuan hringtunu ngei awmpui an duh țhìn a, an thla a muang duh bîk an ti a, a rûk tak chuan ka nu awmpui chu a duh ve ngawt ang le! Kei lahin ka awmpui hman dèr si lo, bâkah, keia awmpui chu duh pawh a duh lo ang. Tluang takin fanu a hring a, len lamah pawh a lian pângngai viau a, amah pawh a inhliam nasa vak lo a ni àwm e. J-a nuin a awmpui a, a zia deuh ang chu, farnute pawh a nei ve tho nain chhûngkaw nu berina awmpui ta chu a ngaihtuahawm lo tùrah ngai ang.

Vawiin chu mikhual lo thleng thar an awm nual mai a, ka buai ve deuh hlek, foreigner pahnih leh kan Indian-pui pahnih, Delhi ațanga rawn kalte chu ka buaipui deuh bîk a, Mizo lam erawh ka ngaihsak ngai lo tluk a ni. Khualchhàwn ang ni mah ila a țûl apiangah ka buaipui tho bawk a ni. Keimah chauh ka ni bîk lo va, pahnih chu kan awm ve a, kan buai dàn azirin kan inpui tawn mai țhìn.

Ka nuin rilru a kam ve deuh reng a, an rawn thlen hnaih tawh leh tawh loh ka buai loh laiin ka zâwt a, an  rawn chhuah hma lêm loh avànga an la rawn tlàn mêk thu ka pa chuan a sawi a, rei kan inbe lo. Toilet ațanga ka chhuah hma chuan message ka en kual zawk zawk a, rin loh lutuka ka pu message pakhat lo awm ve khar mai ka hmuh chuan mak ka ti kher asin! Ka en deuh vang vang nghe nghe, ka han khap sak sak a, a mak êm a ni,  chumi hnuah phùr avànga khùr deuh dar dar hian ka open ta a.

*Naktûk tlai dâr lî-ah ka rawn bia ang che*  tih hi a lo ni a, ka thin chu phu dup dupin ka hmui ka hup a, hlim avàngin ka au chhuak țhelh anghe nghe, ka insûm thei hrâm a, ka kut erawh làwm avàngin ka hûm ruh nasa viau thung a, ka 'Yess' mawlh mawlh bawk.

Zàn lamah ka nu va tlawha kal ve pawh țha ka tih riau laiin ka patea'n a phal tlat lo va," Hmeichhe tân accident a hlauhawm, zànah chuan chhuak lo ang, chhùn lamah i tlawh zâwk dâwn nia," a ti deuh tlat a, ka pa pawh a be nghâl bawk a, pawi ka ti tehchiam lo khawp mai, ka peih lutuk bîk chuang si lo va.

Mut hmunah ka pu message bawk chu ka chhiar leh a, a thu tin mai chuan hlimna min thlen ka ti mai, naktûk tlai dâr li lo thleng tùr chu kei aia nghâkhlel an awmin ka ring lo. Cartoon chu ni ila chuan ka thinphu hi 'love-sign' hlîrin a phu dut dut ang a, ka chhiar laiin a sen ngei maiin ka meng 'love' pawp pawp bawk ang chu. Mu pah chuan ka pu ka biak dàn tùrte chu ka ngaihtuah  a, a hma ang khân ka be bawrh bawrh thei ang em le? Nge ka zak ang a, ka sawi tùr leh zawh tùr pawh ka zâwt ngam lo zâwk ang? Eng pawh ni se, zah loh hrâm chu ka tum ang, a hma pawhin ka zah êm êm chuang lo va.

Mahse, a hma kha chuan min ngaihsak zël tùr thu leh mipa dang min ngaihsak ve pawh a phal loh tùr thu min la hrilh tlat lo va, ka en dàn pawh a la dang thei lo alawm, tunah chuan a chunga ka rilru put dàn a dang tawh a, a hma anga nêl sárh kha chuan ka be thei tawh náng, min hmu thei dâwn chuang lo pawh ni se ka lài tawh tho ang, min hmu thei phei phei se... ka nervous dâwn tih ka hre chiang lutuk tlat.

Ka la mangphan zui, biak tumin ka lo nghâk reng a, min rawn be miah lo. Ka phone dâwnin a tlang thei si lo va, ka tum ka tum hnuah vawi khat chu a tlang ve thei ta hlauh a, hmeichhe awin min la rawn chhâng zui lehnghâl a, ka lo lungawi lo nasa mai a. Ka harh chuan ka thaw huai thei, tak tak a ni lo chu ka lãwm hlê a ni.

Ka tûk chhuak a va nuam tak! Ni chhuak te chu ni dang zawng aiin a mawi bîkin ka hria a, ka hlim vàng nge ni ka patea leh ka nutei pawh chu tûk dang zawng aiin ka hmu hmêl țha dùn! Chaw ei khamah phûr sârhin hnaa kal tùrin ka insiam malh malh a, ka zai pah rât rât bawk a, vawiin zet zawng ka phûr lo thei lo a ni e.

Ka nghâkhlel bawk a, dâr chu a kal muang chiang a ni, heti êm êm hian dâr hi a lo kal muang ngai a ni tih vawiin hian ka hre chiah! Tlai dâr lî rîk har ber țum a ni chiang alawm. Hnaah kan buai viau lo va, ka lãwm tak tak a ni, kan buai zual châng chuan dâr nga deuhthawahte kan bâng thei chauh a nia, vawiin chu kan bâng hma deuh thei maithei, ka beisei takzet, dâr zât pawh ka thlêk sek reng mai. 

Vànneihthlâk takin mikhual rawn thlen belh tùr an awm tawh loh vàngin kan bâng hma thei ta hlauh a, vànneih nî kan nei ve țhìn rêng a ni. Hun thãwl tak hnuaia ka pu nèn kan inbe thei tùr chu ka lãwm viau mai, hmanhmawh takin ka haw a, ka room ațanga zalèn taka biak ka duh avàngin ka hmanhmawh rêng a, ka thlena ka nutei min lo biakna pawh chu," Aw, ka puar a, ka duh lo mai ang e, ka'n inthlâk nghâl ang e," ka ti a, room lamah ka lût nghâl vat a. Inthlâk pawh ka inthlâk hman ta chuang lo, phone a rawn ri nghâl ta mai si a.

Phûr zet hian ka la a, ka phùr tehlul nèn, Zela a lo la ni zui a, ka thin a va rim tak! Timing lo lutuk! Dâr lî chu a la ri chiah lo nain minute hnih pawh a tling mang tawh lo, Zela lah chuan ka rilru hmanhmawhna chu hre ve lo tih hriat zet hian min rawn fiam lehnghâl a, a rûkin ka inpet ka inpet mai.

Min be rei lo ta hlauh. Kan inbe tàwp chiah tihah ka phone chu a rawn ri zui leh zat a, hei chu ka lo nghah ràn rán leh vawiin nilênga ka mood fuhna chhan ka pu phone call ngei a ni ta e. Ka âwm dawmin thâwk ka la vak phawt a, ka aw thian leh a, ka chhâng ta chauh a.

"Hello?" Ka phùr lutuk avàngin ka aw chu a khùr deuh thei nia! A hriat loh hrâm ka beisei.

"I țha em?" A rawn ti ta chiah mai, ka aw khùr chu a rawn hre chiang a ni, zia lo ti tak hian ka áwm chu ka dawm leh a, thâwk la leh vakin," Ka țha e, ka lo nghâk reng tawh che a," awka zãngkhai thei ang ber chuan ka ti ta ringawt a. Ani chuan," Dâr li a ri chiah a," a rawn ti dût a, țhen sakin," Nia, i punctual khawp mai, ka lo nghâkhlel mah mah che a nih ka ring," ka ti leh a, ka sawi zo chiah chu ka inchhîr leh nghâl zat, ka nghahhlelhzia ka hrilh chiang lutuk a; mahse, ka sawi zo vek tawh bawk si, ka ngawi ta daih a.

A ngawih vung vung hnua," Kan inan loh tehlul nèn, chumi kawngah kher chuan kan inang chiah a nih chu," a rawn tih chuan ka nui sak a, min lo nghâkhlel ve tho chuan ka rilru chu a ti hlim leh ta viau mai; mahse, ka nghahhlelh ang êm hi chuan a nih ve ka ring lo, kei chuan ka mangphan hial a nia.

"Vawiin lamte, i chau em?" a rawn ti leh a, hei chu ka zawh zâwk tùr ni àwm tak a ni, hna a thawk leh ngei ang a, hna thawh nân chuan ni a sâin khua a lum dâwn ropui mai si, ka mitthlaa a hmêl hmu rauh rauh pah chuan," Ka zawh tùr che min zawh khalh daih!" ka ti phawt a, țawng zawm lehin," Kei chu ka chau lo, chauhna chhan tùr awm lo chuan. Nang zawng, i chau ngawt ang tiraw? Ni a sat viau chuan maw, daihlimah chàwl daih zêl la," ka ti leh a.

A nui hawk a," Ka chawlh chuan tuin nge hna thawk chuang ang?" a rawn ti ve thung a, kei chuan," Ni leh tho bawk si. A, i pute hnênah hna thawk tùr dang chhawr tùrin hrilh tawp mai la, nangmah puitu tùr che a tlêm berah pakhat tal a ngai. Pakhat ringawt tân chuan hna kha a tam mah mah a ni, a hmun lah kha a zau nasa mai si a," duhthawh tak chuan ka ti mawlh mawlh a, a dik chiah a, a pute hian an ti mah mah deuh chu a ni. Hah takin ni tin hna a thawk a, a hmun enkawl leh thlai chìn chu thuhran, ui leh âr a la vulh tel zui, sangha dîl pawh maw le, pakhat tân chuan a hautak ve êm asin.

"I lo kal hunah nangman hrilh la?" a rawn tih chuan nui miah lo mah se min fiam ve ngei a ni tih ka hria a, fiamthu mah ni se kei chuan ka ngai thutak viau tho.

"Ka hrilh duh tak tak ang, a ni lo leh lutuk alawm, hna i thawk nasa si a, hlawh tam taaawwwk an pêk loh che phei chuan... ka thin a rim ngawt ang!  An phone number min lo pe nghe nghe teh, ka'n phone nghâl teh ang, ka hau hrep dâwn," ka ti a, ka ngam dâwn chuang lo tih hre mah ila a thlâvang tal hi hauh ve ka duh hrim hrim.

"Nula huaisen! Ka duh chî tak!" A rawn tih zauh chuan min hmu thei lo mah se ka biang a sa hat hat nghâl thei nia! Inhmu thei phei ila ka va lài dáwn tak! Țawngkam pawh a lo thiamin mi tih laih pawh a lo thiam viau a lo nih hi.

Eng eng emaw ho tê tê sawiin kan inbia a, ho tê tê tihah, a thil sawi rêng rêng chu thil holamah pawh ka ngai chuang lo va," Ka ngai riau che," a tih phei chuan thinlungah sawi thiam hleih theih si loh hian ka hlim veng veng. Mi tih hlim dàn a hria a, mi tih laih dàn pawh a hria a, min hmu thei lo chu ka lãwm tak tak a ni. A țawng duh zâwk min tih laih leh țhin avàng chuan kan ngawi leh rauh rauh țhìn a, kan inbiak tàwp dâwna," I lo kal leh hun ka lo ngaichâng reng a nia," a tih chuan min ti hlim leh veng veng mai! Kei pawhin kal leh thuai ka châk, hun remchâng awm veleh ka kal leh ngei ang.

Patea rawn hawin," Vawiinah i nute chu i kan thei àwm si lo va, zàna kan ai chuan tunah hian kan va kal dâwn em ni ang? Nichîn deuh khân an haw tawh a," a tih chuan phûr tak hian," A țha ngawt ang," ka lo ti vat a, ka pu Dozer-a nèn kan inbia a, min ti hlim a, tunah tak hi chuan ka hlim êm vàngin tu mah huatna ka nei lo hial ang!

Kan va kal ta ngei a, ka patea'n a hrilh lâwk bawk a, ka pain min lo chhàwn a, ka nu pawhin ni dang ang lo takin min lo be hmasa teh tlat a! A chhûngte awm ve vàng nge, ka patea a awm vàng zâwk pawh ka hre lo, chu pawh ni se min lo be hmasa ve hrim hrim chu nuam ka ti, ka tum sa ni miah lovin ka țawng ve țeuh phah hial a ni.

Rei tak kan awm lo va, zanriah ei ve nghâl tùrin min sâwm nghe nghe a; mahse, kan hnial a, kan haw dâwn chuan ka pain scooty kan hùnna thleng min thlah a," Naktûk lamah chuan zanriah rawn ei phei kan tum dâwn nia; mahse, test neuh neuh tùr a la awm nual a, kan hman hmâ thei kher lo ang," a ti a, patea chuan," E, in lo thlen hun hun kha kan ei hun tùr chu a ni mai, a hmanhmawhthlâk loh bâkah in lo inthlahrung ngawt ang e," a lo ti ve a.

In kan thlen hnu lawkah chaw kan ei a, kan kham hnu, hmun kan ti fel zo tihah Benson-a leh Zela an rawn lang teh tlat a, Zela phei chuan min rawn nuih var var a, Benson-a min dem leh tih ka hria tih vak ngaihna hre hek lo i, Benson-a hmuh lohin lei ka chhuah khum vak ringawt a.

Kan han țhu khâwm kan titi vêl lai chuan ka lo ngaihtuah mai mai a, Benson-a hian a kawpnu kha a la be țhìn ang em tih leh a biak țhin tawh loh chuan bialnu a nei ve tawh ang em, tlangvâl chhe lo leh awmthei ve tâwk tak niin, mahni pawh inchãwm zo a ni a, nula chuan an zar hneh ngawt ang, kei oawhin ka mitin ka hmuh ve ngei tawh tho kha, engtin nge a hma khân min lo duh ve theih zâwk le? Kan la inkawp rei ve êm êm zui kha a nia tiin ka ngaihtuahna chu ka kàwm kual a, ka duh ve țhìn viau a nih kha, ka pu Dozer-a nèn ka han khaikhin chhin a, tu nge chhe lovin pà zâwk ang? Tu nge bùk rit zâwk? Ka nui sak a, ka lu ka thing deuh nar nar a.

"A mak vur vur mang e aw!!" Zela'n a rawn tih chuan ka harh chhuak ve chiah! A va màwlthlâk tak êm!! Inlêng neih lai laia chutiang lo ngaihtuah te chu a, mi ã ka ang ngawt ang chu.

*I HRIAT PHÂK LOH RUAM LAMAH ENG EMAW HARSATNA A LO NEI RENG THEI, CHU VÀNG CHUAN, I LO TAWN HRIAT TAWH LEH I LO PAL TLANG TAWHTE HMANGIN MI DANG TEH CHÎNG SUH*