☆DOZER☆ - 20 By Dingdi Pachuau

☆DOZER☆ - 20 By Dingdi Pachuau

Rilrua thil dang daih lo ngaihtuah tawh lovin ka inlêngte chu ka titipui ta zâwk a, hna chungchâng an sawi a, Benson-a chuan ka hnaah ka buai țhìn em tihte min zâwt a, buai châng kan neih thua ka chhàn chuan Zela chuan," I buai ve pawh ka ring chiah lo, i lo ding mawi mai mai zâwkin a nia ka rin ni," a lo ti a, ka melh vak ringawt.

A hnu deuha Zela ka ngeizia chu, phai lama ka hna thawh dàn leh ka khawsak dàn min zâwt chho pek a nih chu, helam hi min la zâwt ngai vak lo va, chhàn loh dâwnin a ni vak mang bawk si lo va, tum nei râna min zâwt a nih ka rin avàng erawh chuan ka hrilh vek lo, kan bulah ka ex a țhu ve reng bawk si a, a nuam vak miah lo, dâwt ka sawi leh sawi loh a lo hre vek dâwn bawk si a.

A hnu deuhah chuan," Mahni chanchin sawi reng chu a nuam lo duh êm mai, subject thlâk ang u," ka ti a, Benson-a chuan," Ni dâwn tak e, thil dang daih, vawiina ka thil tawn a nia, ka nuih a zain ka khawngaih bawk si a," lo tiin, vawiin lama nu pakhat che chhe deuh a țanpui dàn chu a sawi a, a nuihzatthlâk lai a sawi chuan Zela nèn pawh kan lo nui ve nasa mai, ka mitthlà ve chhin a, Benson-a lah chuan a sawi thiam bawk si a, mittui tla phungin ka nuih phah nghe nghe a ni.

Ka pateate hian Benson-a nèna kan chungchâng kha an hre lo hrim hrim a, hre tùr pawhin ka hrilh hek lo. Angaihi leh amah Benson-a'n an hria a, khuta awm vete khân an hre leh bawk a, tunah Zela'n a hre ve leh ta a, mi dang ka hmël hriat hnaite chuan an hre lo ang. Tunah chuan kan ni tawh lo lehnghâl a, hre tùr pawhin ka duh lo, hun kal tawh a nia, țangkaina a nei tawh lo êm mai.

Kan hotel-a rawn thlengte chu tourists ni tho mah se environmentalists an lo ni àwm a, Mizorama rawn kal an châk țhìn a, hun an neih remchàn loh avànga rawn kal har an lo ni nghe nghe. Reiekah an kal tawh a, Phawngpui tlawh leh an tum a, hmun dang han tlawh tùr țha deuh ka hriat leh hriat lohte min zâwt ve a, chutia min zawh ve tâkah chuan Phaizawl ka hre chhuak nghâl vawng vawng mai, Phaizawlah kal se an nihna nèn a inhmeh dâwn lutuk, an hlâwkpui ngei bawk ang a, an mit pawh a tlai ngeiin ka ring.

Min zâwt ve ta chu, ka han hrilh ve ta a, ka phone-a thlalâkte chu ka han entîr ve nghe nghe bawk a, anni pawh chu an phûr ve viauin ka hria. Phawngpui lama kal an lo tum hmasak tawh avàngin an kal phawt ang a, chumi hnu lamah an hun neih dàn azirin Phaizawl chu an tlawhin an tlawh lo ang. Reservation siam dàn tùrte ka hrilh fiah nghâl vek a, anni pawh an lãwm ve viauin ka hria. A rûk tak chuan ka lãwm daih zãwk, a chhan chu ka pu ka țanpui ve theihna awmchhun a nia, tlawhtu an tam kha a țha.

Mahse, a hnua ka ngaihtuah țhat leh chuan kan mikhualte khân Mizo țawng an thiam hauh si lo va, ka pu awmnaah va kal ta se ani khân a lo welcome thiam kher lo maithei a, ka hmuhsit vàng ni lovin, a lo buai pherh êrh zâwk thei a ni tih chu ka ngaihtuah chhuak leh a. Mizo pakhat tal an hruai loh chuan an tân pawh a buaithlâk ngawt ang le, kei pawhin ka pu ka duhsak luatah harsatna ka siamsak thei tho bawk. A, an va kal ta a nih pawhin a tu lam zâwk zâwk pawh buai hrep lo tùrah ngai phawt teh ang.

Ka nu inentîr pawh a zo tawh a, a nat dàn a serious lo va, damdawia enkawl dam mai theih a nih avàngin damdawi erawh doctor-in a chawh țeuh thung. Ka pa tân office chawlh reng a tih chi si loh a, an haw phei ta thuai nghe nghe a. An haw phei hma zànah ka pa chu rawn kalin thil mamawh ka neih leh neih loh min zâwt a, ka neih loh thua ka chhàn chuan," I inthlahrung a ni ang e, i pa ka nih hi, inthlahrunna tùr a awm lo rêng rêng," a ti ve ngial a, kei erawh chuan," Tam viau lo mah se hlawh ka nei ve tawh alawm, ka nu entîrna lamah i insêng țeuh zâwk lo maw?" ka lo ti thung a, ani chuan," Fanu fel tak ka nei che hi ka chhuang hlê che a ni, ngaihtuah pawh ka ngaihtuah vak lo che, ngaihtuah i ngai lo bawk a; mahse, i pa ka nihna angin zilh che hi chu ka tih tùr a nia, zilh ngai lo mihring kan awm lo. I pateate thu hi âwih hlê la, an thu chu ka thu a ni tih hriat reng i tum dâwn nia, i nutei pawh a theihna chin chinah i hman chuan chétpuiin àwl tum țhìn la, an duat êm che hi, an thu âwih zél ang che," a ti dap dap a, hetianga zilhna thu hi ka dawng khât khawp mai, a hnên ațang hlauh phei chuan. Min hringtu ka pa hnên ngei ațangin a ni a, țha ka ti khawp mai.

Felfeli pawh ka text zing ta khawp mai. Ka ngaihtuah mai mai a, rai lovin inru lo ta se pasal a la nei kher lo emaw a ni ang a, kei nèn pawh kan inkâr a la țha vak kher chuang lo maithei a ni, kawng lehlam takah chuan khatia a che buai chho ta kha kan inkâr danglam phahna a ni ka ti ve tlat a, țhatna lai riau a nei ve tlat. A naute lah chu a ni tèlin a hmêl a danglam zêl a, ni hnih khat leh kâr hnih khat chhûng lekin a hmêl chu a danglam zung zung ni maiin ka hria, ka làwm ve tlat a, a thlalâk ka díl ve zut rêng a ni, a taka hmuh pawh a châkawm khawp mai, Champhai lama zin dànte hi awm thei se... a, ka duh leh lo, Phaizawl lama zin ka chák zâwk, ka pu ka hmu leh châk tawh êm mai.

Biak ka duh a, amahin min rawn biak hmasak loh chuan ka tân duh hun huna biak ve mai theih a ni si lo. Signal a neih hun huna a hmuh atân tiin message ka va thawn ta ringawt a, tlânga a kal hunah a hmu ve mai ang chu maw ka ti a ni. Kal thuai se, hmu vat vat se ka ti, min rawn be leh thuai se, a aw ka hre leh châk tawh.

Ka rin aia hmain ka message chu a hmu a, ka thawn ațanga a tûk tlaiah a hmu a nih chu, min rawn chhâng lêt a, *Naktûk tlai dâr li-ah ka rawn bia ang che*  tiin, a message ka hmu chu ka hlim leh pek hlê, ka rilrua awm ta chu ka pu-ah hian ka hlimna a lo innghat thui viau a nih dâwn hi tih a ni, a message thui lo tê, thlum miah lo anga lang pawhin ka mood a ti danglam vek thei a ni si a.

A tûka kan inbiak chuan min zawh hmain," Vawiin lam i chau em?" ka tih khalh vat a, ani chuan," I aw ka hre leh dâwn tih ka ngaihtuah a, ka chau lo," a rawn thung a, a thil sawi thui lo tak mai pawh chuan min ti hlim leh pek viau a ni, laih erawh ka lài leh hlê a, min hmu thei lo chu ka lãwm.

"Hnam dang mikhual rawn thleng an awm mial lo maw?" tia ka zawh chuan," Awm lo, naktûk erawh khi chuan rawn thleng thar tùr chu an awm ngei mai a, engtizia nge ni?" a rawn ti a, thil awmzia chu ka hrilh a, a tàwpah," Anmahni an nih hlauh chuan Mizo țawng an thiam dèr si lo va, buaina ka rawn thlen mai mai ang aw ka ti leh deuh a" ka ti a, ani chuan," I rawn hruai lo a nih chu. Ka hmuh châk tawh che nèn," a rawn ti daih a.

Ka maimichhîng vang vang phawt a, a hmêl leh awm dàn tùr mitthlaa hmu rauh rauh pah chuan," Min hmu châk tawh maw?!" ka ti sap a, sawi nawn leh se ka tih vàngin ka zâwt nawn a ni.

"Lutuk! Rawn thleng thar tùr chu awm lo se hmu tùr chea rawn kal vang vang hial ka duh tawh asin," a rawn tih leh tâkah phei chuan amah ka ngaih chu a zual ta vawng vawng mai, a bula awma min ngaihsakna dawn leh tawh kha ka châk.

"Aih, lo kal suh, lo kal tum miah suh aw, hmuh che chu ka châk, rawn kal tùr pawhin ka duh viau tho na chein i buai si a, i hnain a tuar palh ang, ka khawngaih dâwn êm mai che. Ka hman veleh ka rawn kal zâwk dâwn nia," ka ti a, ani chuan," Ka naute hi ka bulah awm leh thei tawh la ka ti a ni," a lo ti sup thung a.

'Ka naute' min ti a nih chu. Chu thu chu hriat a va nuam tehlul êm! A va nuam tak! Tu mahin 'ka naute' tiin min la ko ngai lo, min hnaih bertu nia ka hriat țhin ka thisen zawmpui min hringtu ka pa takngial pawhin hetiang hian min la ko chhin lo hrim hrim! A them té pawhin. Ka mittui a hnai kuar thei hial mai, nula senior ve țan tawh mah ni ila zahah ka la teuh lo, ka lãwm daih zâwk! Ka tâna chu thu màwizia leh ka thinlung a dehzia chu hre ve tak ang maw?

"Ka pu, tuna min sawi dàn kha... A, ka ngai che e," ka ti sap a, ka ngaih a zualin a bula awm ka châk tak zet a ni, ka ngaih thu pawh ka sawi zak tawh bîk lo, a bulah awm leh tawh ila, min duatin min ngaihsak leh se, kha kha ka thlahlel leh tawh a ni.

"Kei pawhin ka ngai che. Ka pa boral hnua ka mi ngaih leh hmasak ber i ni."

*******

Kan hotel-a thlengte chuan Phaizawl chu an lo va tlawh ngei a ni tih a hnuah ka pu hnên ațang chuan ka hre chiang ta a, mi pali niin a sawi a, Mizo hruai an nei lo a ni ngei ang, țawng lamah buaina a awm àwm a sawi loh avàng chuan an buai lo ni tùrah ka ngai tawp a, ka zâwt chîk duh ta bîk lo a ni.

Kan hotel neitute zînga kan pu ber ka ti mai, Pu Lalfinga fapa tlum ber, an chhûngkaw black sheep Ruatpuia, foreign-a lehkha zir a rawn haw a, an inah pawh awm duh lovin kan hotel-ah ngat chuan a rawn innghat tlat a, a tìrah tak phei  chuan Mizo a ni tih pawh ka lo hre lo, foreigner emaw ka ti a; mahse, a hnua thawhpuite'n min hrilh tâkah chuan ka hre ve chauh a ni. Mi rama awm tih takah a inla changkãng hle a, changkàn pawh a changkãng ang, a inthuamna pawh branded vek a ni a, Mizo țawngin a țawng duh dêr lo bawk. Chutiang a nih avàng chuan keimah hlîrin ka chhàwn a, a rawn thlen țantirh lai chuan amah chauhin a ni a; mahse, ni hnih thum hnuah erawh nula chhe lo zet zet hi a rawn hruai lût ta zauh zauh a, a awm dàn chu a pa beng a thleng a ni ang, hotel-ah rawn kalin an ina hruai haw a rawn tum a; mahse, a hlawhchham chiang hle a ni.

Be thei ber ta chu, mi dang be duh hek lo, a duh duh ka tihsak a ni ta ringawt a, ka hna a ni lo tih chu ka hre ve reng; mahse, pu ber fapa a ni tih ka hre ve laklawh tawh bawk si a, chu bâkah, keima buaipui loha mi dang buaipui a duh bawk si lo, ka buaipui tihah hian min tîr a ni ber ang chu, mipain hmeichhia a ena hnuaichhiah taka min bia ang hi chu a ni chuang lo, min vìn ngai chuang lo bawk. Ka chunga a chêt dàn chu Pu Lalfinga pawhin a lo hre vat a; mahse, tihngaihna hre lovin ka hriat thiamna min dîl ta ringawt a ni, a fapa awm chhûng chu ka hlawh bâkah bonus min pêk tùr thu min hrilh phei chuan zahthlâk ka ti zâwk. Ka han hnial ve a, working hours chhûng bâka rei ka thawk bîk pawh a ni chuang si lo va, nuam lo ka ti ve a ni; mahse, Pu Lalfinga'n," A, min hre thiamin lo dawh hrâm hrâm zâwk mai teh, fa tlum ber a nihnaah kan lo duat ve țhìn si a, kan ti khawlo zo vek a ni. A kal leh hma chu i kutah hian ka dah tawp mai," a tih tâk leh zêlah chuan ka puih theih dàn kawng ni ve maiah ka ngai a, ka thawh rei phah chuang bawk lo nèn, a tih tih dàn chuan ti mai teh se ka ti ta ringawt a ni.

Ruatpuia buaipui ta rêng rênga hun ka hman avàngin chhùn lamah chuan ka pu pawh ka ngai hman ta meuh lo va, ngaihtuahna hun ka nei thei rih lo a nih záwk chu. Min ko ve chhên a, a pa zahawm ka tih êm avàng chauhin a duh ka tihsak a, ka tuar hrâm hrâm a ni. Zàn lamah erawh chhùn lama Ruatpuia ngaichãng ràn chunga hun ka hman țhin avàngin ka rilru mai bâkah ka taksa a chau ve a, hetah tak hian ka pu ka ngai zual ta țhìn. A bula awm ka châk zual a, hun hi forward thei ila ka ti ţhìn tak zet. Ruatpuia hi ka thawn bo hmak ang a, ka pu bulah hun ka hmang daih tawh ang.

Ka pu nèna kan inbiak chuan ka hna chungchâng min zâwt ve teh tlat a! Ka hrilh ve thlap a, kan hotel awmna leh kan hun hman dàn thlengin min zâwt zêl a, nui hak hak pah hian," Min zâwt chîk e, i lo thleng dâwn tihna em ni?" tiin ka han fiam a, ani pawh chuan," Thleng maithei asin, hma lam hun hi a sawi láwk theih hleihnem," a lo ti ve mai a, kei pawh chuan," Dik chiah, i lo thlen hunah chuan ka lo buaipui char char ang che," nui chung vêk hian ka ti leh a, buaipui sawi tâkah chuan Ruatpuia ka hre chhuak zawk mai nghe nghe.

*******

"Ka kal leh țêp tawh a nia, hrehawm i tuar chhuak țêp tawh," Ruatpuia'n Mizo țawng dik taka a rawn tih chuan ka en nghâl vat a, khuma țhu chung hian min lo en reng a, a lo nui sak lehnghâl a, a awm dàn hi a châng chuan a naupang chhiain ngaihsak a phût ka ti mai, a pain a ngaihtuah tehlul nèn, an inah haw ve mai àwm ka ti rilru țhìn.

"A țha a nih chu," ka ti ve mai a, a lo la nui hawk hawk zui a, a nuih a za tak tak pawh a ang.

"Nang hi chu mi dang i ang lo ngawt mai. Ka kal dâwn hunah bonus tam tâwk ka pe ang che," awlsam zet hian a ti leh a, ka nui ringawt. Mi hausa fapa nun tak hi chu aw... Nu leh pa, amah ngaihtuah êm êmtute a la nei a, engati nge an lakah a hel tlata ina a haw duh loh chhan hi ni ang? Sum lamah an buai lo tih chu a lang reng a; mahse, a awm dàn hi?

"Min ring lo em ni a? Ka pe dâwn chiang lutuk che. I phû alawm, nang ka thlan chat chhan che pawh hi mi dang i ang lo tih ka hriat chat vàng a ni a. I fel reuh dâwn tih ka hre thiam tlat asin, mi dangte hi chuan thil sual ti ang maiin min melh ralh ralh hlawm a, mi ã ka ni lo, min en dàn hi hre thiam vek, ka ngaithei miah lo," a ti leh bawrh bawrh a.

"I hre sual a nih chu, chutiangin tu mahin kan en lo che. Pu ber fapa i nia," ka ti ve thung a, ani chuan," Hre sual nãng, mi sual tak hmuhin min hmu a, ka pa vàng chauh tak takin he hotel ațang hian min paih chhuak lo a nih hi, ka hre vek alawm," a ti leh a, a ke thên lauh lauh pah chuan," Ka pa bulah khân nang hi chu i fel tih ka hrilh a, bonus pawh pe nual tùr chein ka hrilh nghe nghe. A hnuaia thawkte zîngah i fel ber hial lo maw?" a ti leh a, he pa hi, a la upa miah lo ang, a titi dàn ațang hian a upa thei lo hi a ni tawp mai.

"Zin chhuak ang hmiang, i duh em? Zinpui che ka châk tlat a nih chu, lo ngai kawi lo la, ngaih kàwi theih tùr zâwngin ka sawi lo a nia, Miss. I fel avàng hian zinpui che ka châk mai a nia," a tih phei chuan hetia en ngawt ang chi a lo nih lohzia ka hre chiang leh zual.

"Hna ka neih hi, ka duh duh dànin ka awm thei hleinem," ka lo ti a, a thil sawi chu huat enah pawh ka en lo. A naupang chhia êm a, a rilrua awm awm a sawi chhuak pawp pawpah ka ngai mai. Ani lah chuan," Ka pa kan hrilh mai dâwn alawm, ka dìl chuan a phal ngei ngei ang, chawlh a pe dâwn che tihna a ni mai a. Miss Remruatkimi maw i hming kha? A dik tiraw? I hming bula R a awm ve avàng ringawt pawh hian ka ngaina riau che, hming bula R awmho hi chu ka ngaina ve deuh ziah," te chu a la ti zui deuh deuh a, he pa hi eng emawti zawng takin a lawmawm ka ti ta tlat a nih chu.

"E khai, ka pu, i pa chu dîl buai lo mai ang. Chuan, ka chhuak thei tawh ang em?" ka ti a, ani chuan nui chung hian," Min 'pu' miah suh aw, Miss R. I chimawm thiam ve dâwn riauin ka hria. Ka ti buai rei tawh lo ang che, vawi khat leh chiah a ni mai, chawhnu lamah ka chhuak ang a, ka room-ah hian hmeichhe mamawh tùr min lo dahsak thei ang tiraw, khawngaihin?" ppolite zet hian a ti zui leh zat a, ka lu ka bu nghat a, ka chhuak zui ta nghâl a, hmeichhia a rawn hruai haw leh dâwn a ni ngei ang, vei tak roh hian a.

A sawi ang takin kâr khat pawh tling loah chuan min chhuahsan dâwn ta a, min chhuahsan dâwn tihah an inah a haw ve dãwn ta tihna ni lovin a zirna hmun lamah a kal leh tawh dãwn tihna zâwk a ni. 'Min buaipui man' tiin pawisa min pêk a tum a, ka la duh lo va, a pain min pêk dâwn tho avàngin. Ani erawh chuan a hre thiam lo va, a hnu deuhah phei chuan min pêk a tum zât a chanve chu ka lâksak ta ringawt a ni, a kal tùr car-a a luh dâwn chuan," Lo dam țha rawh aw, ka rawn lêt leh hunah khawiah emaw kan zin tak tak dâwn nia, thil țha deuh ka rawn hawn bawk ang che, Miss Remruatkim," a ti leh deuh kher a," Nang pawh dam takin le," ka ti ve a, min bye bye tak lauh lauh a. A tìrah ngeiawmin chimawm viau mah se a nungchang ka hre chho ve țan dâwn chauh a, kan ințhen leh sia, eng emaw châng chuan ka hre chhuak zauh zauh dâwn a nih hi.

Pathianniah Zela leh Ruthi an rawn lêng a, a lum deuh avàngin thlang lam veranda-ah țhuin kan titi a, ka pateate pawh sitting room lamah an awm ve nghe nghe. Zela phone a rawn ri a, rawn betu nèn an țawng dàn ațang chuan Benson-a a ni tih ka hre nghâl a, Zela pawhin min rawn en ralh mai. He pa tak hi chu aw...

Rei lo te hnuah Benson-a pawh a rawn lang ve leh mai a, ka patea'n a lo be nghâl bawrh bawrh a, ka țhian angah a ngai hmiah ni berin ka hria. Ni e, ka ex mah ni se tunah chuan țhian inkawmin kan inkàwm tawh a, nuam lo taka inkawm ai chuan hetia kawm mai hi a țha ka ti. Ani pawh hian min beisei ngam tawh pawhin ka ring lo, ngam tùr pawh a ni lo rêng a, ka kawm a duh chuan țhian anga min kawm mai hi a ngai rëng a ni. Kan inkawm apiang lah hian ka pu ka ngaihtuah chhuak ziah a, min hmu ta se ka bula mipate hi a thîk ang em tih ka ngaihtuah țhìn, mipa dang min ngaihsak kha a phal si lo va.

A tûkah chuan ka pu ngaihtuah rauh rauh chungin ka hnaa kal tùr chuan ka insiam a, vawiin chu message thawn leh tawh teh ang. Inrinni khân kan inbia a, ka duh dàn takah hi chuan rei tak biak hi ka duh țhìn a; mahse, a la tih tùr ka hriat ve vek tawh avàngin ka be rei ngam lo țhìn, kan inbiak rei leh a hnuah a buai rei dâwn tih ka hre ve kar si a.

Vawiin chu kan buai vak lo, mikhual kan nei nual a, Ruatpuia ka buaipui ațang khân thawhpuite hian min en dàn a dang tawh a, min en sâng ka ti dâwn nge, min dah sâng ka ti zâwk dâwn, ka buai hmain an lo ti fel zung zung țhìn. Inthiarnaa ka kalin ka pu message tùr chu ka type pah a, tlânga a làwn leh hunah a hmu leh mai ang chu, a hmuh hun chuan a nui ve vur vur maithei a ni.

Tlai dâr hnihah mikhual pakhat a lo thleng a, a lo thleng dâwn tih ka hre lâwk tho a, khualchhàwn ka nihna angin nui sângin ka lo welcome a, a hmêl ka hmuh chian erawh chuan ka nui tàwp chawt a, mak ka ti kher asin! Ka hmaa ding ka mi hmuh chu amah ngei a ni si, mak tiin ka en reng a, hlim avàngin ka thin chu a phu leh dup dup tawh, ani pawhin min rawn en chhuk ve reng a, a nui deuh suk zui.

A va chhe lo ngawih ngawih tak! Rin a har zâwk asin, T-shirt buang lam, vutbuak lam deuh rawng hi a ha a, a jeans hâk chu a hleitlingin a inhmeh kher mai. Tunah hi chuan Phaizâwla hna thawka thlan luang zawih zawih țhìn hmêl kha a lang tawh miah lo, a lang faiin hmuh a nuam tak zet a, khawi lam khualzin hmêl țha leh pà lutuk nge a nih tih ka inzáwt lo chauh a ni!

*CHEIBÀWL I DUH ANG CHIAHIN MI DANG PAWH CHEIBÁWL RAWH, I CHEIBÀWL DÀN KHA A HRE RENG TAWH DÂWN SI A*