☆DOZER☆ - 21 By Dingdi Pachuau

☆DOZER☆ - 21 By Dingdi Pachuau

"Ka pu... nangmah maw?!! Eng nge i rawn tih dâwn?!" en reng chung chuan ka ti a, ka mit pawh ka khap phal meuh lo a ni. Heta ka hmu hlawl hi mak ka ti a, chutih rualin nasa takin hlimna chuan min chîm hlup hlup bawk a, a hmêl ka hmu thut hian min țháwng êm  a ni.

"Ka ngai tawh che a," rawn kún hniam deuhin ka beng bulah chuan a rawn ti sup a, ka beng a rawn thâwk khumna avàng chuan ka lo za chuai chuai thei nia! A thil sawi lah chuan min ti hlim leh viau bawk a, hlim takin ka nui sak nghe nghe.  Mi dangin kan pahnih awm dàn chu min hriat thiam ka hlau leh deuh a," I room lamah ka lo hruai ang che," ka ti ta daih a, ani pawh chuan," Ka lãwm viau ang chu," a lo ti ve leh a.

Hna kan thawh lai hian kan phone hi kan khawih ngai lo va, phal loh bur tih chu a awm lo nain kan chawlh lai leh kan inthiar lai bâkin kan khawih ngai lo. Ka pu a rawn lang thut a, ka rilru a chàwl thei lo, dik tak chuan awm hlè hlé pawh harsa ka ti tawh a ni, bàn thuai thuaia inhmuh thuai tawh ka châk, ka ngaihtuah zâwng ringawt pawhin ka phûr lutuk tawh tlat, ka laih viau loh ka beisei.

Kan bâng ta ngei a, hmanhmawh takin ka scooty lam panin ka kal ta vat a, phone ka phawrh a, signal a nei tawh dâwn tih hriain a hming ka hmet chhuak zui a, vawi khat chauh a ring hman tihah min rawn chhâng ve nghâl, min lo chãng reng tawh a ni maithei.

"Ka bãng tawh a," ka ti ringawt a, ani chuan," Ka rawn chhuak dâwn e," a lo ti ve sup a, chhuak mai thei tùra a lo inpeih ve reng chu ka va lãwm tak! Mahse... a chau viau maithei a ni, motor-ah a rawn chuang thui sia, a chau ru ngei ngei ang.

Ka lam pana a rawn kal chu ka lo thlîr reng a, hmuhnawm ka ti a ni. Ka thin lah chuan a lo hre rang ve khawp a, a phu rang ve zat bawk. Ka bul a rawn thlen chuan," Min phurh i tum chu a ni lo ang tiraw?" a ti thûm dût a, kei chuan," Phur dâwn lo'm ni?" ka lo ti a, ani erawh chuan," I phal chuan ka lo khalh zâwk ang," a ti leh a," Helmet hi?" ka lo ti vat a.

Kan khalh lo ta ve ve. Kein kan kal a, han kalpuina mai tùr ka hriat loh avàng leh a rilțàm ve tho ka rin avàngin restaurant hnai berah ka luhpui a, a lo hnial bîk lo va. A tihzia khawp mai lehnghâl, chàwl an lo tam lêm lo va, a kil sîr lama dawhkàn ruak lam chu ka panpui vat a.

Ei tùr kan order hnuah chuan," Eng chu maw i rawn tih dâwn tak tak a?" tiin ka zâwt leh a, inhmachhawna han țhut dun tâkah chuan a rûkin ka lài tak zet, a mit taka en ka duh viau laiin min en reng sia, ka zak leh lai bawk si chuan restaurant chhûng chu ka en kual vêl ta ringawt a ni.

"Min en phawt la," a lo ti ve thung a, en ka zah avànga hawi kual na nâ nâ; mahse, ka awm dàn thlâkin zak lo àwm tak chuan a mitah chuan ka en lêt ve ta a, ka hmui ka pet pah zauh nghe nghe.

"Ka ngai che a, hmuh che ka châk bawk a."

Mitko sàn ãk pahin ka nuih sak a, ka hlim leh veng veng tawh, hotel-a a hmêl ka han hmuh thut khân ka hamhaih a, ka hmu kha ka âwih hlei thei lo hial a, tunah min ngaih vànga rawn kal a nih thu a sawi nawn leh a, dâwt a sawi ka ring hauh lo.

"Kei pawh," zàwi deuh sap hian ka ti phawt a," Zaninah i rawn lêng dâwn tiraw?" ka ti zui leh zat a, ani chuan," Dâwn e, min lo kawm duh chuan," a lo ti a, ka chek hlak a," Sual suh aw, i lo lèn loh vaih chuan...," tiin ka han melh rum deuh a, ka ti tak tak lo tih a hre chiang bawk a, a lo nui ve suk duh chauh.

Kan ei tùr chah a rawn thleng a, ka ei tùr plate chu lain chawhpawlh tùr chu a chawhpawlh nghâl mawlh mawlh a, ka en reng ringawt a. A zawh hnuah ka hmaa rawn dahin," A ei theih tawh e," a ti sup a," nuih sak pahin," Ka lãwm e," ka lo ti ve sap a, ka rilru a va nuam veng veng tak!

Thil kan ei lai chuan," I message ka hmuh veleh i rawn kal hun nghâk zo lovin ka rawn pan ta ruak ruak zâwk che a ni," a rawn ti chhuak sup a, ka en vat a, min lo en reng tawh a. Ka message kha, engtin nge kha? Ka ngaihtuah chhuah chuan," A, sawi rih lo ang, ka zak!" ka ti a, a mitah pawh en ngam lovin ka ei tùr lam chu ka en thla ta daih a, ka biang sat ham ham dànah a sen nasa ang tih ka hre nghâl mai, engah nge maw khatiangte ka lo thawn rëng rêng ni? A zahthlâk ngawt mai! Mahse, ani erawh chuan," A zahthlâk hleinem, a hlimawmin a nuam viau zâwk dâwn asin," a lo ti thung a.

Zanriah ei kham hnu, hmun ka tih fel hnu lâwkah ka phone a rawn ri a, lo-lêng-tùra a nih ringin phûr zetin ka phone chu ka han chhâng a, a lo ni chiah bawk a, kan in awmna tak a hriat chian loh avànga rawn phone a lo ni a, ka patea hnênah," Hmun danga mi ka țhian a lo zin a, lo lèn a tum a; mahse, kan in awmna tak hi hre chiang lovin kawngpuiah a ding ringawt a, ka'n hruai lawk ang e aw," tiin ka hrilh a, ka chhuak zui ta nghâl a.

Kan in chhak deuh lawka kawngah chuan a lo ding niin, a àwm ve tho mai. Kan in chhak deuh chiaha in hi kan in awm dàn nèn a inang viau mai a, a àwm ve tho, a rawn kal thui thei viau zâwk alawm le.

Ina kan luh chuan ka patea chuan a lo welcome vat a, a tih dàn ve rêng a nia, țhutna lo kawhhmuhin," Lo țhu rawh khai. Teruat, i țhianpa hi khawi lam mi maw a nih a? Ka la hmu ngai lo niin ka hria," a ti nghâl vat a. Ka hrilh hnu chuan," A nih tak chu maw le, vawiina i rawn thlen chauh chuan i chàu àwm mang e. Teruat, thingpui hâng tui tâwkin han siam teh khai," a ti sauh sauh a, thingpui siam tùra ka kal chuan," I rawn zin vang vang si a, tih tùr pawimawh tak i nei a ni chêk ang a, i haw phei hmain chaw i rawn ei ve ngei ang chu tiraw?" tiin ka patea vêk chuan a be leh a.

"A làwmawm viau nain ka ti buai mai mai zâwk ang che u," Dozer-a chuan a lo ti ve khut a, ka lo nui sak ringawt. An țawng chu ka hre pha reng a, ngaihthlâk loh theih pawh a ni lo, ka beng lenna lam a ni tlat. Ka nutei pawh room ațangin a rawn chhuak ta a ni tih hriat tak hian," E, inlêng kan nei a ni maw? Teruati țhian maw i nih a? Khawi, ka lo chibai ang che," a ti làng lâng a. Dozer-a tiin a hming kha ka sawi mai a, a hming pum tak ka la hre bîk si lo va, a haw êm lo ang chu maw. 

Rei mawi ve tâwk tak ka patea'n min țhutpui hnuah ka nutei'n a ko va, an nupain TV an en zui ta daih a, ka patea awm loh hnu chuan läwm viau mah ila kan pahnih chauha han awm tâkah chuan ka lài thar leh riau mai.

"Nang ber i awm si lo va, tuin nge hmun lo nghâk a?" tiin ka țawng chhuak hmasa ta zâwk a, ani chuan," Pa Țhianga a awm," tiin min lo chhâng a, ka lu ka lo bu nghat a, ani kha chu ka hre ve alawm, a fel ve roh êm kha.

"Chuan, engtikah nge haw i tum?" ka tih leh chuan," Naktûkah," a lo ti ve leh a, phâwk zeta melhin," I ti âwihawm loh êm mai! I lo thleng chauh a, haw i tum leh nghâl mai te'n!" ka ti vat a,  ani chuan," Kan inhmu tawh a, min thlah hunah i thil duh kha kan ti leh ang a," a lo ti leh mai a, kei erawh chuan," Ni lo, i lo kal ta rau rau, zàn hnih tal chu i riak ang chu, i hna lam pawhin zàn khat chauh riah belh leh chu a tuar vak hman nâng," ka ti ve thung a.

"Mikhual an rawn thlen belh dâwn a," a lo tih leh tâkah chuan," A nih tak chu, ni e, i buai êm a ni. I rawn kal hrim hrim hi a làwmawm tawh hrim hrim, ka rin leh beisei phâk loh a ni a, i fel ka ti lutuk," ka ti ve leh ta a, ngai viauin a chàm duh viau mah ila a buai theihzia ka mit ngeiin ka hmu tawh a, mikhual a neih belh leh dâwn phei chuan... a hna a ni tlat a, a duty a ni, chàmtîr chi pawh a ni lo.

"I rilru ka en chhin châk a, ka han ti der lawk a nih kha. Naktûkah chuan ka haw lo ang," a rawn tih leh tâkah chuan," I va sual tak! Engah nge mi tih der kher a?" tiin a malah chuan ka va chumsak a, ka thinrim lohzia leh sual ka tih tak tak lohzia erawh a hre chiang viauin ka ring.

Kan titi chho zêl a, ka pateate chhûngkaw chanchinte chu min zâwt a, kan inkungkaih dàn chu chiang takin ka hrilh a," Ti ta daih ila, i hming kha Dozer-a ka ti mai kha a nia, i duh lo em? I hming pum min la hrilh mang si lo va," ka ti leh rih a, ani chuan," Ka pa min kohna a nia, ka hming a ni alawm," a lo ti ve mai a, ngaihtuah vak mang hlei lo hian," A naupan chhiatthlâk e, i têt laiin Bull-dozer i làwm viau țhìn a nih ka ring," ka han ti leh a.

"Chu, ka hming chuan i nuih a ti zâ a ni maw?" a lo tih khauh tâkah chuan ka en vat a, ka inthiam lo zui zat bawk. Khatiang kha sawi chhuak kher tùr ka ni lo asin, hming naupan chhiatthlâk han intihsak rêng rêng, ka va ngaihtuah thui lo țhìn tak!

"Ni lo, chutiang lamin ka sawi lo, ka tih awmzia chu... i hre thiam vek!" ka ti ta ringawt a, a hming hian ka nuih a ti zã ka ti lo, a naupang chhia chu ka ti alawm, hmuhsit vàng leh nuihzat vàng chuan ka sawi hauh lo.

"Ka hming i nuihzat vàngin phubâ ka la ang," zàwi supa a rawn tih leh chuan," Ka nuihzat lo, ka ti tak tak! Engah nge ka nuihzat ngawt ang? Pà ka tih nâklaia!" ka lo ti thuai thuai a, nuih pawh ka nui duh lo, ka nuihzat emaw a tih tak tak ka hlau a ni; mahse, amah zâwk chu rawn nui sukin," Phubâ chu ka lâk tho tho a ngai, min thlah hunah..." tiin, a han sawi chhunzawm duh lo vêl a, a haw tùr ka thlah hunah chuan engtin tak phubâ chu la ang maw?

"A nih, zàwi têin i lâk pawhin la ang che. Chuan, i hming pum min hrilh thei, ka la hre miah lo a nia," ka ti leh zat a, a thinrim lo tih ka hriat avàng chuan inthiam lohna pawh ka nei leh tawh lo. Ani pawh chuan min hrilh ve mai bawk a, an chhûngkaw chanchin chu ka zâwt chho zêl a, ka zawhna chu țha takin a chhâng ve zêl bawk a. Min chhànna chu ngun takin ka lo ngaithla a, a mitah tak ka en kar reng bawk. Ka rilrua thil lo awm thut chu zâwt lehin," A nih, i mitmu dum loh chhan hi? Kei chu a dum asin," ka ti leh daih a.

"Ka pi kha Philipino leh British thlah pawlh a nia, chu vàng chu a nih ka ring. Chutiangin, ka nu pawh Irish leh Phlipino thlah pawlh tho a nia," a tih chuan ka en hau a, hnam dang maw? Engtin nge a nih theih?!! Mizo ziding tak a lo nih loh vàng a lo nih chiah chu.

"Chu, Mizo i ni nange?" ka tih chuan a lo nui hawk a," Ni chiang e, ka pu kha Mizo dik tak a ni a, kei pawh Mizoramah ngei ka piang bawk," a lo ti a. Ringhlel deuh tak chuan ka en kar a," Chu, i pi leh i nu chu Mizo an nih loh tawp chu!" ka ti leh a, ani chuan," Anni Mizo an nih loh vàng ngawtin Mizo ka ni lo tihna a ni lo," a lo ti ve leh thung a.

Mit khap hauh lo chuan ka en a, a thil sawi chu a dik ve leh tho si. A pi leh a nu thlah pawlh an lo nih vàng chiahin a mitmeng hi a lo danglam a nih chiah hi, a mitah chauh pawh a ni chiah lo, a hnâr ngûl leh a vunah pawh hian a ni tho mai. Philipino-te nèn chuan kan hmêl leh pianphung a inang hlê a, kan vun pawh a inang reng mai.

"Râlte hnam ngat ka nih hi aw, ka pu kha Râlte a nia, Râlte bengchheng," a rawn tih leh tâkah chuan ka nui ve ta a, a thil sawi dàn chuan ka nuih a ti za êm a ni. Chutih rualin ka rilruah a chanchin hriat ka neih tlèmzia chu a lo lang nghâl a, a chanchin hriat belh zêl châknain ka khat a; mahse, tunah pawh hian ngaihtuah chhunzawm tùr ka ngah tawh rih viau mai, hun thâwl țha tak neih hunah ka la zâwt chhuak vek ang, tunah hi chuan duh tâwk rih ang.

"E khai! A va tlai tawh ve!" tiin kan banga sanapui intâr ka en chuan ka ti hluai a, zawhna chi hrang hrang ka zâwt a, hun lam rêng rêng ka lo ngaihtuah miah lo chu mãwl ka inti khawp mai, a chauh ve àwm tehlul nèn, zawhna zawh nân chuan zanin kher ni lo hun ka la ngah alawm.

"I chau ang, haw tawh rawh," ka ti leh a, ani chuan," Min ning tawh a ni maw?" a lo ti sup thung a," Teuh lo mai!! Nangmah kha ka ngaihtuah che alawm, i motor chuang i chau dâwn êm asin, naktûk zànah i rawn lêng leh dâwn tho a, hun kan la nei dâwn alawm," uar zet hian ka lo ti a, ani chuan," Nakzànah ti ve mai la," a lo ti sup thung a.

Lei ka chhuah khum ringawt. Kei aia Mizo țawng a han inti thiam vêl chu ka ngei roh mang e! 

A tlãi ve deuh tawh tak tak a! Ka lo ngaihtuah miah lo va, pateate pawh an lo mu tawh a, kan in chhûng chu a lo reh țhíap tawh niin. A hàwnna tùr a la hla reuh sia, kea a kal vang vang tùr chu khawngaihin," Scooty khalh haw rawh aw," ka han ti a," A ngai lo, ka fit alawm," a lo ti mai a. Ka han tih luih dâwn viau pawh chuan a duh chuang si lo va, tih vak ngaihna ka hre lo, a haw tùr chu ka thlah chhuak a.

"Kan tih tùr kha," ka kut chelh paha a rawn tih sup chuan," Thil hre rei lutuk mai!" ka ti sap a, ka zak leh deuh bawk nèn, a kutah chuan ka sik zauh a. Ani chuan ka pên leh chu min pawt lêtin kuah lo thei lo chuan min siam a, ka kuah zui nghâl zat bawk.

"I thil sawi hlentîr che a ngai alawm," tiin min kuah zui zat a, kan inkuah vawng vawng a, message ka lo thawn ta kha ka  inchhîr lo tak tak a ni. Min kuah vàng chuan ka thlâ a muang veng veng a, nuam ka ti a, a rim chu a tui ka ti bawk, men pawh ka meng phal lo.

"I muhìl elo?" ka beng bula a rawn tih sup chuan ka meng chhuak nghâl a, eng chena rei nge kan inkuah pawh ka hre lo, rei lo tê ni maiin ka hria, a nuam êm mai a, ka kaltîr phal rih lo a ni.

"Rei lo tê, leh lawkin," ka ti a, ka kuah nghet leh sauh sauh a, min lo hmu tùr an awm chuang lo va, pawi ka ti lo, min kuahtupa hi ka ngaiin ka thlahlel alawm. Ani pawh chuan ka tih ang chiahin min kuah nghet ve sauh a, tunah tak phei hi chuan ka dingdihlîp ãwk tawh, min kuah ngheh bâkah a lamah, a taksa nghèng thei tùrin min kuah bet miau a.

"Ka naute," ti leh supin min pawm kãng ta nawlh a, a nghâwngah ka kuah nghâl lo thei lo. Kan awm dàn vàng chuan ka tiril a khùr nghâl dar dar a, ka thin pawh a phu su leh dup dup tawh mai, engtin nge min tih zêl dâwn tih chu ka ngaichäng ràn a. Min fâwp dâwn a ni ang, a rawn kûn hniam deuh a, kan chal insìin kan hnâr a insì a, thâwk pawh ka thaw țha ngam ta lo.

Zàwi muanga chêin vei lamah a thle sawn deuh a, a hmui lum ham ham chuan ka hmui chu a rawn bawh thuahtîr ta zat a. Ka lo dawh deuh tawp phawt a; mahse, ka dawh mãwl tawp rei bîk teuh lo mai, min pawm reng chung chuan duat tak si, duhthawh tak chung siin min fâwp a, kei pawhin ka chhâng lêt ve mawlh mawlh a.

Leia min nghah thlâk hnuah pawh chuan min la fâwp zui reng a, nuam ka ti a, ka lu chu a hai chiai chiai thei hial ka hre nghe nghe a, ka thluak phei chu fan hneh tak a ni ringawt. "Ka lo rin ang chiah!" kan infawh kârlakah chuan a ti sup a, duhthawh takin kan infâwp leh tàwn tâwn a, chumi hnuah chuan kan tàwp ve ta chauh a. Thâwk ka la nghâl hawk hawk mai, infawh hi ka zei tehchiam lo va, ka thâwk hi a chham lo chauh zêl a ni.

"Ka kal tawh ang e," a tih sup chuan," Aw le," ka lo ti ve mai a, kan la inkuah reng tho a, inthlah pawh kan la tum chuang lo. A kuah hi a nuam êm mai a, thlah mai chu ka phal lo a ni ber. 

"Ka'n kal tawh tak tak ang e," a ti leh a, ka chalah chuan a fáwp zauh a," Mut tui aw, ka naute," a ti leh sup a, kei pawh chuan," Aw le, nang pawh mut tui le, Dozer," ka ti lêt ve a, ui takin kan inkuahna chu kan inthlah a, min en leh vang vang hnu chuan a kal zui ta nghâl a, ka thlîr zui reng a.

Ina ka luha dâr zât ka en leh chuan pâwna kan lo din reizia chu ka hre ve chauh! Kan rei vak pawhin ka hre lo asin le. Ka inti fai zung zung a, ka ha ka nawh dâwn chuan ka hmaa  dârthlalanga ka hmêl lang chu ka en reng a, ka hmui chu en lehin ka han khawih ringawt a, nichîna kan awm dàn kha ngaihtuah lêt lehin ka nui deuh sak a, ka lung a va'n âwi hliah hliah tak!

Mutnaah chuan ka pu Dozer-a'n an chhûngkaw chanchin min hrilh kha ka ngaihtuah lêt a, a pu kha Mizo a nih thu a sawi a, engtin nge a pi Philipino leh British thlah pawlh chu a neih daih theih ni? Engti tiha intawng nge an nih le? Philipines-ah a han kal ti dâwn ila hetah Dozer-a khân 'ka piang' a ti bawk si, zawh tùr ka va la ngah tak! Kha lam kha chu lo dah țha rih ila, zanina min fawh dàn mawlh kha, ka va duh tak! Ka tui ral lo chauh a ni. Thluak fan chiai chiai thei khawpin min han fâwp thiam a nia, zanin zet chu ka mu tui ngawt ang.

Tûkțhuan kan kîl lai chuan a rûk tak chuan ka inthlahrung deuh a, nizàn khân ka pu Dozer-a kha ka awm khawtlaipui rei angreng sia, pâwnah ka la dinpui reng zui bawk a; mahse, an hre lo nge, khati lam kha chu eng mah an sawi chhuak lo. Ka kham dâwn lamah ka patea chuan," I țhianpa Dozer-a chu kan ina zanriah ei tùrin sâwm rawh aw, a châm rei hman àwm si lo va, vawiin ngeia sàwm hi a țha, lo sâwm ngei ngei rawh aw, i nutei pawhin lo bàwl kêp se," a ti a, kei pawh chuan," Aw le, ka lo hrilh dâwn nia; mahse, a lo ei duh kher ang em maw le?" ka ti a, ani chuan," A, lo ei ngei ngei rawh se, a phû alawm, a lo kalna a hla êm mai," a ti leh a, nutei chuan," Tui deuhin rawng ka lo bâwl dâwn nia," a lo ti ve a, Pu Dozer-a an ngainat lohna emaw sawisèlna lam emaw an chhâk chhuak lo va, chu chuan min ti lâwm viau a, ka inthlahrung lo deuh sawt bawk.

Vawiin chu ni dang zawng aiin ka mood a fuh avàngin ka inchei uluk zual a, ka hmui pawh ni dang zawng aiin ka hnawih sen deuh bawk. Ka pu ka hmu leh ngei dâwn si a, a ngai tlat, a hmuha mawi taka lan ka duh, mawi lo tak tak pawhin min hmu tawh a, mawi tak pawhin min hmu ve tho rawh se ka ti a ni.

Mood a fuh bawk a, ni pawh chu rei ka ti hran lo. Ka pu zùnzâmin min chènchilh a, nilëngin ka hlim a ni ber. Kan buai viau hran lo bawk a, inthiarna pindana ka luhin message ka thawn a, kan ina zanriah ei tùrin ka sâwm a ni. Tlaiah kan inhmuh veleh ka sâwm lehnghâl ang a, a lo ei duh ve mai ang chu maw.

Ka sâwm leh ta ngei a, ka rin aiin ka sâwm tlu hma zui," Ti hian ka inpeih nghâl, kal nghâl mai ila," a lo ti thên a; mahse, ka phurh a duh miau loh avàng chuan two wheeler taxi, mipa khalhah a chuang a, ka inzuitîr ta ringawt a ni.

Kan in kan thlen chuan ka nutei'n rawng a lo bâwl mêk a, kan inzui lût min lo hmuh chuan," E, in lo insâwm thei maw? A țha e. In ril a țâm em? Teruat, lo insiam mai ula tiraw? Ka laklawh deuh sia," a lo ti vat a, ka indah fel sawk sawk a, in tùr ka siam lai chuan," Ka lo pui ang che," tiin ka pu Dozer-a chuan nutei chu a va hnaih a, ani chuan," A ngai lo, lo țhu chàwl rawh, kha thingpuite kha lo in la, puih ka ngai miah lo, Teruati nèn khân lo inkàwm rawh u," a lo ti a.

"Thingpui lo in phawt rawh," tiin kei pawh chuan ka pu Dozer-a chu ka ko a, hmeh tùr ka la chhuak bawk a, ani pawh chu a rawn kal ve mai a; mahse, thingpui chauh chu a in a, a hmeh lam chu a duh hauh lo," Ei rawh," ka tih pawh chuan a ei duh chuang lo. A in zo thuai a, nutei puih tum chuan a kal zui leh ta nghâl a, ka ko zui duh lo, a pui lui dâwn tho tih ka hriat vàngin țawng nân ka thâ ka sêng thlàwn duh ta lo a ni.

Ka patea lo haw chuan," E, kha, rawng i lo bâwl ve a ni maw? A ngai hleinem le aw... I hah phah viau dâwn a nih kha," a rawn ti lût hlut a, ani chuan," Hah lo," a lo ti thûm dût a. A hah hran lo ang tih chu ka hria a, eirawng bâwl thiam tak a nih vàngin a ei siam chu ka lo ei châk tawh viau zâwk a ni.

Chaw ei lai chuan," Chaw eiah kan sâwm che a, rawng i bâwl zui daih a, i hah hrep lo maw?" ka patea chuan a ti leh a," Hah lo ve," a lo ti mai a, inhmachhawn chiaha țhu kan ni a, ka en zauh zauh ngam țâwk a ni, ka pateate nupain kan boruak chu an hria ang tih ka hlau deuh a, min hauh chu ka ring pawh a ni chuang lo, ka zahpui lam pawh ni lovin a la hma deuh êm a, la hre rih lo mah se pawi ka ti lo a, nakinah ka la hrilh ang ka ti a ni.

Hun thãwl țha deuh kan nei leh thei ang chu tih laiin thlèng ka sil zo deuh chiah tihah Zela leh Benson-a an rawn lût ve ta khut mai. A va hun lo tak!! Zela chuan min rawn fiam hlut zui lehnghâl a," Zanin chu a siruk lain kan rawn thawk tawh a nia, kut bêngin kan haw thei tawh lo ang," engthâwl zet hian a rawn ti lût bawrh bawrh a, a țawng ring sia, Dozer-ate pawhin an lo hre ve vek ang tih ka chiang, Zela tak hi chuh!

*I SAWI HMAIN I THIL SAWI TÙR KHA I HNÊNA MITE SAWI ATÂN I DUH EM TIH INZÁWT HMASA ȚHÌN RAWH*