☆DOZER☆ - 22 By Dingdi Pachuau

☆DOZER☆ - 22 By Dingdi Pachuau

Lo lêng timing lo tiin ngeiawm viau mah se lo chhawn loh theih ni hek lo," Lo lêng r'u," ka lo ti vat a, ka nutei chuan," Zela mai mai chuh, tu nge maw ni dâwn? Palai hmêl kan hmu dâwn ta a ni maw tih rilrûk lai laiin nangni lo ni che u a," nui sâng chung hian a lo ti a, Zela chuan," Ni maithei asin, keimahni hi kan rawn inpalai lo ang tih a sawi theih miah loh," nui chung vêk hian a ti lêt ve a, patea chuan lo kovin," He lamah lo țhu phei ru," tiin a lo be ve nghâl bawk a.

Zela leh patea an țawng bawrh bawrh laiin Dozer-a chu a ngawi reng a, Benson-a erawh a țawng zauh zauh thung. Thingpui hâng ka pe vek a, an bula țhutna ãwl a awm tawh loh avàng chuan a hran deuh hlekin ka țhu a, an titi chu ngaithlain a chângin ka lo țawng ve zauh zauh bawk. Zela chuan vawiin lama a thil tawn nuihzatthlâk deuh a sawi a, kan nui leh dar dar țhìn, țawng ve zauh zauh pah chuan a rûkin ka inlêngte chu ka melh kual leh ralh ralh țhìn a, Dozer-a chuan vawi khat mah min rawn melh lo hrim hrim, a hma chhuat chu a melh rùn mai a, a awm dànah chuan ka inlêngte titi chu a ngaihtuah loh hmel ka ti, a lung a àwi loh ringawt chu ka ring lo nain tlangvâl dang inlêng ka nei chu a hlim vak lo a ni maithei, hun thâwl kan neih theih loh hmèl sia, kei tak hi a nia a rûka lungawi lo chu, Zela ka ngei ber țum a ni hial ang.

Patea kal kian hnu lawkah chuan Dozer-a chu haw a tum ta mai a, ka la phal lo viau nain chutiang han sawi chiamna hun pawh a ni chiah si lo va," A la hma alawm," te chu ka ti ve ngial a; mahse, a haw ta tho a, kawngkapui thleng chiah ka thlah, inlêng dang an la awm ve bawk si a, pâwn thleng thlah chu a tihchi bîk loh a ni.

Zela chuan," I patea țhianpa emaw a inlêng emaw ka lo tia, a upat hmél tawh si a, a rawn rîm ve tho che tihna em ni?" a lo ti a, ka țhutna ngaia țhut leh pah chuan," A upa hran lo, tlangvâl a nia, engah nge, min rawn rìm thei alawm," ka ti phawt a, Zela lo nui țhu ka hmuh chuan," Ka țhianpa hmun dang ațangin a lo zin a nih kha, kan inah chaw a lo ei a," ka ti leh a, ani chuan," A nih tak chu, ka lo hre lo alawm. A hair ngat mai kha, a pà rem rem hlê a ni," a lo ti leh a. A tih dàn kher kher chu ka ngei deuh hlek a,  fiamthu ti tak deuh hian," A inhmeh ka lo ti viau asin, han ti ve chhin ta la, ka hmu châk ngawt mai che, i inhmeh loh tùrzia ka mitthlaah ka hmu thei a ni," nui chung hian ka ti a. Ani chuan uar fê hian," Dáwn sa! Sawi pawh sawi suh, ka sual hmél dâwn lutuk! Pà viau mah se ka tih atân chuan duh pawh ka duh lo," a ti leh a. Benson-a ve thung chuan," I țhianpa kha a țawng mawh hmél khawpin ka hria, a thinrim ta emaw tih mai tùr alawm," a lo ti ve zauh a. Kei pawh chuan," A nih ve dàn rêng a nia, a țawng tam lo ve khawp a," ka lo ti ve mai a.

A hnuah thil dang kan sawi ta zâwk a, ka rilruah erawh Dozer-a ka hre rauh rauh reng a, a lung a awi lo ang a, a haw tlang daih mai ang em tih mawlh chu ka ngaihtuah a, inlêngte kawm pawh chu ka tui fahran lo. Zela lah chuan ka boruak hre ve hauh lo hian min fiam a, hriat thiam theih deuh tùr hian Benson-a chu min dem pah deuh bawk a, ka ning tak tak a ni, ka nin ber țum a ni ang chu, nakinah chuan ka hrilh hrãwk tawh ang, ka țhian a nia, ka nêl tho bawk a.

An haw veleh Dozer-a chu ka phone chhin ta vat a, vawi khat chauh a ring tihah min rawn chhâng nghâl a, a awmna ka zawh chuan kan in chhak kawnga a la awm thu min rawn hrilh ta rêng a, ka va khawngaih hnûp hnûp roh tak! A lo la awm reng dànah a thin chu a rim lo a ni ang.

Kan inhmuh veleh a bânah chelhin," I lung a awi lo em?" tiin ka han zâwt nghâl a, ani chuan," I chungah chuan lungawi lo lo ve," a lo ti dût a, a sawi vël dàn chu lungawi lohna tlêm a nei tih ka hre thiam mai, Zelate țhian dùn chungah khân a ni ngei ang, kei pawh an chungah ka lung a awi zân bîk lo, rawn lèn hun an hre lo lutuk a! Bâkah, Zela phei kha chuan upat hmél a ti zui, a upat hmél hlawl lo. A thuhrimah, a duh leh a upa ang a... A, theihnghilh daih teh ang.

Ka chhîpah a rawn fâwp zauh a, ka lungawi lohna lam chu ka theihnghilh titih nghâl, a chêt dàn mawlh hi, nuam ka ti sawng sawng leh tawh! Ka chungah ber a lungawi loh loh te chuan... A țha vek. A kâwngah ka kuah hnâp a, inhmatawna dingin kan inen ràn a, a kutphah lian deuh tak, chang ru deuh si chuan ka nghâwng a rawn tuai nâ nâ phawt a, chuta țangin ka biangah a chho leh a, ka bek tawn tawna vuan chung chuan min kuai dâk deuh a, a kutzungpui chuan ka hmui a tuai zui bawk a, ka lung phû a dik lo leh nasa tawh mai!

"Dozer..."

"Ka hming i lam rïk dàn hi ka duh!" a ti sup a, rawn kûn hniamin dìm têin min rawn fâwp phawt a, ka lo fâwp lêt vat a, chu veleh duhãm takin min fâwp zui ta tàwn táwn a, a kut dah sawnin ka kâwngah dam takin min kuah a, keiin a nghâwngah ka kuah ve ta thung a, inthlahlel takin kan induhna chu kan lantîr mawlh mawlh a, naktûk maiah a haw tawh dáwn a, ãm taka ka fawh a ngai tih chiah ka rilruah a awm a, ka duhãm viau bawk a ni.

"Tu mipa tân mah ka phal lo che, mipa dang rêng rêng!" kan infawh kârlakah chuan a ti sup a, kei pawh chuan," Nangmah chauh alawm ka duh che," ka ti lêt ve sap a, zàn a tlai tawh tih hre reng mah ila ka thlah phal lo a ni, ka ngai leh dáwn êm mai a, kan inhmuh leh hun tùr lah kum tàwp lamah daih a nih leh tawh hmèl si. Ka pateate zahawm ti viau mah ila ka kaltîr phal rih lo, ka la thlahlel êm êm si a.

"Engtikah nge i lo kal leh ang? Min hmu tùrin lo kal leh la?" ka tih chuan ka khabe tuai neuh neuhin," I khabe hi i inhmeh ngawt mai!" a ti daih a, ka zawhna chhànna chu khawi lam hi a ni ringawt! " A zum mawi reuh sia, i inhmeh hlê zui a," a ti zui leh sup a, a tuai neuh neuh reng a. Ka khabe hi a zum mah mah ka ti țhìn a, zum ni lo, phîr deuh țhãih hi ka awt țhìn a nih kha; mahse, chutia mawi leh inhmeh min tih tâkah chuan ka awt ta miah lo, ani berin mawi a tih chuan a țha vek a ni mai.

"Ka lãwm e. Nang pawh i sam hi i inhmeh ka ti tak zet,"  ka ti ve sap a, a lo nui hawk a," Ka tih thîk suh aw," a ti thûm leh dût a, țawng ring ngam si lo, uar zet si hian," Ka ti tak tak! I pà alawm, i pà ngawih ngawih!" ka ti leh tàn tán a, ka sawi zo chiah chu rawn kûn hniam leh thutin min rawn fâwp vawng vawng a, kei pawhin ka theihtàwpa duhthawh hian ka lo chhâng lêt leh tàwn táwn a.

"Lût tawh rawh le, i pateate ngaih a lo țha lo palh ang. Rawn hmuh leh thuai che ka lo tum dâwn nia," a ti sup sup a, kei pawh chuan," Aw le, hmuh leh thuai che ka lo beisei reng ang," ka ti lêt ve a, kan inkuah leh vawng vawng hnuah kan inthlah ta chauh a.

"Lût rawh, i luh hnuah ka kal chauh ang," a tih chuan," Kal rawh, ka lo en liam zâwk ang che," ka ti ve thung a, ani erawh chuan," Lût mai rawh, en liam che ka duh zâwk," a lo ti leh a, ka hnial duh ta lo," Mut tui le, Dozer," ka ti sep a, ka bân vai zohin thãwm dîm tak chungin in chhûngah ka lût ta nghâl a.

Message-in ka ûm zui nghâl a, min rawn chhàn loh dànah phone a en lo a nih ka ring, kal thuai thuai a duh zâwk a ni ang, a thlen veleh min rawn chhâng mai ang chu maw, kein a kal char char dáwn si a, hah lutuk lova him taka a thlen ka beisei.

A thlen hnuah min rawn chhâng lét ta ngei a, min rawn chhâng hma hlê a, a kal chak viau tihna a ni. A hah ngawt ang chu. Kan in-text leh deuh reng a, a haw hun dârkâr tùrte ka zâwt leh rih a, a rûka ruahmanna țha tak ka siam hnuah keimah zâwkin tàwpna ka siam a, chuti lo zawng kan in-text reng ang a, a muhìl hman lo palh ang, naktûkah motor-ah a chuang thui leh dâwn si a, ka khawngaih, a chau lutuk dâwn asin.

A tûk Inrinni zîngah chuan ni danga bazâr ngai hlei lo chuan bazàr ka chuh ta that a, ka nutei'n mak ti hmêla min en chu ka mitsîrin ka hmu ru reng a; mahse, ka ngaihven lo lui tlat. Thil lei tùr ka neih pah thu chhuanlamah ka hmang ringawt a, a âwih kher ang em chu ka hre lo; mahse, min kaltîr ta tho a, chu chu ka duh ber a ni rêng a ni.

Dozer-a'n min bazàrpui a, chawhmeh lei tùr melha min zui ruk ruk chu nuam ka ti, a rûkin ka nui ka nui a, a țawng lêm lo va, ngawi reng chuan ka chawhmeh lei tùr hming ka ziah tlar chu a zawng a, 'a têl a țha' tia lâk ka tum ve deuh țhìn chu lain a hnìm chhin phawt zêl a," Hei chu a țha lo," ti supin a dang kan zawng leh țhìn," Hei hi a țha," a tih chin chauh ka lei a, ka lei apiang chu bàzar bag-ah chuan a lo khung nghauh nghauh a, bag chu ka khai pawh a phal lo, hnehsawh zetin a khai nul nul mai a, a va han inhmeh tak! Hmuhnawm ti takin ka en leh reng țhìn. Hmêl hriat ka hmu lo chu ka lãwm hlé a ni, hmêl hriat hmuh chuan buaina a tam mai mai, hmêl hriat neih tam loh țhatna tak niin ka hre nghe nghe.

Chawhmeh lei zawh hnuah 'A haw tawh dâwn si a' tiin restaurant-ah ka chawlhpui a," Ei țeuh ang aw, i duh duh lam rawh, i lo kal vang vang a, min bazàrpui leh bawk sia, i hah dâwn êm mai," ka ti sauh sauh a, a truck kha a rawn keng tih ka hre tawh a, ei tùr siam awlsam hawntîr țeuh ka tum, a duh kher lo maithei a; mahse, ka tum tho.

"Engah nge ka hah ngawt ang?" a tih chuan," Bag rit deuh i khai reng a, engah nge i hah loh ang? Kawngah i ril a țàm palh tâkin, i ei tùr pack-tîr nghe nghe ila a țha ang," ka ti leh malh malh a, tih lum kher ngai lova tui taka ei mai theih tùr menu-ah chuan ka melh kual a, a vâng phian lehnghâl a; mahse, a tàwp berah pakhat chu ka hmu ta hrãm.

"Ka ril a țâm hman lo ang," a lo ti ve thung a, kan ei tùr chah a rawn thlen chuan ka chow plate bawk chu min lâksak lehin pawlh tùr zawng zawng a chawh pawlhsak hmasa leh tê tê a, min pe leh ta chauh. A chêt dàn hi tê amah en lovin a 'cute' hi ka tia, a 'sweet' ti pawhin a sawi theih ang chu, nuam ka ti veng veng.

Thil ei lai chuan dawhkàn hnuaia ka ke chu a rawn tawk deuh kher a, ka melh vat a, min lo en ve rengin a nui deuh suk a, kei pawhin nuih lêt sakin a keah chuan ka tlawhsak ve leh salh a, ani pawhin min rawn tlawh lêt leh a, dawhkàn chunga ka kut dah pawh chu a kutin a rawn bawh thuahtîr leh chat bawk, kan chêt dàn tê chu nuam ka ti leh tlat pek a, min lo hmu rutu awm se chuan mak min ti ngawt ang, mak min tih kher loh pawhin min 'ngei' tal ang.

A truck dahna a hla lo va, scooty-a a chuan ve duh loh miau avàngin kein min rawn zui a, a rawn thlen hmain a thil tùr ka lo lei sawk sawk a, a truck hnungah chuan ka lo dah fel diam a, kawng laka a ei tùr erawh ka la khai reng thung a. A rawn thlena truck kawngkhàr a hawn veleh ei tùr ka khai lai chu dah lût vatin," I ril a țâm hunah i ei dâwn nia," ka ti a, min hnial zâwngin a rawn țawng bîk miah lo; mahse," Truck hnunga mi hi?" a rawn ti ve thung a, nuih pahin," Min ngaihtuah rauh rauh pahin i lo ei țhìn dâwn nia," ka ti a, min en vang vang pah chuan," A ngai miah lo asin le," a ti sup sup a, meng zîm deuhin," Mipa dang lo inhnaihtîr miah suh aw, ka phal lo ka tih kha," a ti leh a, ka kut chu a rawn chelh pah a, a thutak êm avàng chuan ka nuih ngam lo va, ngaihawm zeta en lêtin," Aw le, nang pawh aw. Chuan, i lo lan leh hun ka lo châng reng ang. Tluang takin i tlãn dâwn nia, khalh chak lo la, fîmkhur la, signal awm tàwpna ațang talin min rawn biak erawh i tum dâwn nia, ka lo ngaichãng reng ang che," ka ti duah a. Chutah," Tlãn hmasa ve tawh rawh, ka lo thlîr liam ve tawh ang che," ka ti leh a,  ka kut la chelh renga min en leh vang vang hnuah chuan min thlahin truck-ah chuan a lût ta a," Inenkawl țha la, hna kha thawk nasa lutuk lo la aw," tiin ka au zui leh hrâm a. Min rawn en a, a kut vai zauhin a tlän chhuak zui ta nghâl a. Ka thlîr zui reng a, ka hmuh theih tâk lohah chuan ruak huaiin ka inhria a, ka ngaiin ka ngaihtuahna pawh a tlànpui ve nghâl daih niin ka hre bawk.

Ka thil hrilh kha a lo hre ve reng a ni ang, dâr 11 vêlah ka insûk laiin ka phone a rawn rì a, amah a lo ni ngei a, a thlen chin a rawn sawi a, a tlàn leh chuan signal a awm tawh dâwn lo tih a rawn sawi bawk a," I va fel tak! I tlân tluang chu a làwmawm e, i chau viau lo maw?" ka ti a, ani chuan," Ka ngai veng veng che," a rawn ti thung a, rang zet hian," Kei deuh!" ka lo ti vat a, ka nutei'n ka țawng a lo hriat phâk loh hrâm ka beisei.

Zàn lamah Zelate an rawn lêng lo bawk a, tih tùr a awm loh avàng chuan room-ah ka awm a, Dozer-a ka ngai vawng vawng mai, nizàn tûn ang hunah kha chuan sitting room-ah kan la țhu țhap a nih kha le, tunah lah kan inhlat leh tawh si. Khuma bawk pah chuan phone chu ka hmet kual ka hmet kual a, Dozer-a nèna nimin leh nimin piah lama thla kan lâk dunte chu ka en mai mai a, hna thawh thuam inbel lo leh inchei faia awm a ni bawk a, a lang faiin a hmêl pawh a țha tak zet a ni. Ka thlîr reng a, mi bulah nui ngai lo leh nèlawm loh viau angin lang mah se ka bulah hi chuan a nui suk suk fo a, ka nêl êm êm bawk, kan lâk dunnaah pawh hei a nui alawm.

A va ngaihawm tak! Ka hriat chhuah ang hian min rawn hre chhuakin min ngaihtuah ve reng ang em le? Biak theih tal se... Zànah kha chuan tih tùr kha a nei vak bîk lo va, a àwl ve theih hun lai kha a nia, a inah khân țhu dar darin min rawn ngaihtuah ve ngeiin ka ring a, ei tùr ka leisak pawh kha a ei pah maithei, a grape um tui pawh kha a in pah maithei a ni.

A tûka inkhâwmnaah Zela chuan min fiamin," I lung a lêng àwm! I țhianpain a hawsan daih che sia," a rawn ti làr lár a," Lêng ve bawk ang chu," ka lo ti mai a, thu dik tak pawh a ni rêng a ni.

"Eng vàngin nge i lung a lèn a?" tiin Ruthi chuan min rawn zâwt vat a, ka țawng a rawn hre pha a ni ngei ang," Aw.. ngaih pawh ka nei ve bawk ang chu maw le," ka ti leh mai a, Zela chu lo inrawlh vatin," Bialpa chhe lo deuh a nei a, a hawsan tawh sia, a ngai a nih hi," a lo ti a.

"Uai!! Khawi lam bialpa nge ni ngai? Min hrilh chiang vat teh u, ka hre châk over a nia," Ruthi chuan a rawn ti nghâl vat a, min rawn țhut hnaih nghâl bawk a. Zela chuan," Amah hi zâwt chiang rawh, hriat loh hlànin a lo hûng reng a! Vawiin chu lêng tawh ang u aw, lènna tùr ka hre țha teh a nia, Teruati lunglêng vah harhpui nân a țha dâwn lutuk," a ti leh daih a, tho vutin tui in tùr awmna lam chu a pan zui ta nghâl a. En zuiin," A duh duh hi a sawi mai a," ka ti zui nang nang a, Ruthi nuih a lo za nasa mai niin, a nui khiah khiah a," A duh sawi nân ka a nei ve tlat a," a lo ti a, a nui chhunzawm leh nghâl zat a.

*MAHNI TÊ CHAUHA I AWM LAIIN I NGAIHTUAHNA VÊNG ȚHA LA, I NGAIHTUAHNA, A ȚHA LO LAM KHA CHU PUITLINTÎR HAUH SUH ANG CHE*