☆DOZER☆ - 23 By Dingdi Pachuau

☆DOZER☆ - 23 By Dingdi Pachuau

Chawhnu lamah Zela'n lèn chhuah a sawimawi viau nain ka peih lo va, ka hnial tlat a, ka pateate lèn chhuah an tum thu chhuanlamah ka hmang a, thil eng emaw tih ka tum rûk vàng deuh a ni pakhat a, bâkah, lèn ka phûr lêm lo a ni, dik taka sawi chuan. Benson-a a lo tel ve leh emaw kha a niang a, engah vak ka ngai lo nain Zela'n min demin min han sawipui leh ang a, khatiang boruak kha ka ning, renew-tîr leh hi min tum ni berin ka hria a ni, ka duh tawh hauh si lo. Chuan, kan lènnaah chuan ka Dozer-a a lo tel ve dâwn tih a awm mang bawk si lo nèn, mipa dang min hnaih kha a phal lo êm a, a phal loh thil tih ka duh bîk lo, min hmuh loh lai pawhin ni se. 

Zela chuan min en vang vang pah hian," I hmêl en ang hi i ni miah lo," a ti ringawt a, ka lo nui hak a," Nuih pawh nui suh, kan lèn khàt tawh nèn, ka dam chhûng nghawng thei thil pawh a lo ni maithei asin," a ti leh a, en hû pah hian," Eng thil nge sawi la?" ka lo ti a. Ruthi pawh chuan," Dik chiah, han sawi tawp mai la, Teruati pawhin i thil sawi azirin a lo peih leh thut maithei asin," a lo ti ve a. A lungawi lo laklawh ve tawh a ni ang," Ka sawi lo ang, a pawi vaih chuan in pahnih hian ka ti buai ang che u," a ti leh nghut nghut a, Ruthi chuan," Engah nge kei min telh ve ngawt a?" a lo ti a, inmelh ralhin kan nui a.

"Nui rawh u, a pawi lo, lèn chhuahpuiah ka sâwm tawh miah lo ang che u," tiin a tho a, filter-a tui chu a va in nghek a, lo lêt lehin Ruthi hnênah," Thingpui tui tâwkin min han siam teh, a tui dàn azirin nang chu ka ngaidam maithei che a ni," a ti leh a, rang zet hian Ruthi chuan," Yes, Boss," a lo ti vat a, a tho zui nghâl a.

Rei ve tâwk tak Ruthi-te ina ka lèn hnu chuan ka haw ve ta a, ka haw hi chuan Zela phei chu a hàwnna a rei tawh mai, lènna tùr țha deuh a hriatnaah khânn amaha lèn a la tum țâlh a ni. Ni e, mipa a nia, lêng rawh se.

Psthianni tlai a ni a, sa țhing inchuh tlai a ni bawk a, chawhmeh siam vak a ngai lo va, a tihzia khawp mai. Eirawng bâwl pah chuan ka phone chu ka khawih a, youtube lamah channel ka siam thar a, Phaizawl lama ka chêt tlatna video ka edit fel diam tawh chu ka upload a, a link chu status leh story lamah ka tãr lang bawk. A va țha dâwn tak! Miin an lo en ve ngei ang a, kal an châk ve ngei bawk ang, hei hi Dozer-a ka puihna zêl tùr a ni.

Pateate lêng chhuak tùr kha chhuanlamah ka hmang nain an lêng chhuak tak tak a, rawng ka bâwl zo tihah an rawn haw ve chiah a. Ka nutei chuan," I lo buai em?" a rawn ti nghâl vat a, ka buai loh thuin ka lo chhâng a, an rin aia an rei tâk thu chu sawi mawlh mawlhin ka lo buai loh avànga a làwm thute chu a sawi pah bawk a. Ka nutei hi chu a fel ve thlâwt a ni, a châng chuan ka nu tak tak ni se ka ti ţhìn a, a fate'n pangchang taka 'Nuuu...' tia an koh angte hian ka ko ve châk țhìn, tún thleng, nula puitling ve pângngai ka nih hnu thleng pawh hian ka la châk reng țhìn; mahse, ka dam chhûng hian pangchanna tùr leh pangchang taka 'Nuuu...' tia koh tùr ka nei ve ngai dâwn lo a nih hi.

Phone rîiin ka suangtuahna ram ațang chuan min ko kîr a, ka phone rî a ni nghe nghe. Ka han en chuan ka rin loh lutukin Dozer-a a lo ni a, ka nuteite hriata biak ka duh loh avàngin ka room lam pan vatin ka chhâng ta nghâl a.

"Ka rin phâk lohin min rawn bia a!!" ka ti hliai a, a mak ve êm bawk a ni, Pathianniah kan inbe ngai si lo va. Ani erawh chuan," Ka khua a har a," a rawn ti zàwi thûm dût thung a, a thu sawi chuan min va hneh sî tak! Ka ringhlel hauh lo. Ka mitthlain a awm dàn tùr ka hmu zui a, thing kungah lâwnin a zárah a țhu kun khul ngei ang.

"Ka va khawngaih tak che!" ka ti sap ringawt a, han hnem dàn pawh ka hre lo. Ani chuan," Tunah hi chuan khawhar tih awmzia hi ka hre fiah ta viau a ni," a rawn ti leh a, a aw zàwi tak leh nghet charh mai chuan ka beng a ti za chiai chiaiin ka hria. A thu sawi chu dât a nih ka ring lo va, min lèm nân dâwt phuahchawp mai mai a sawi ka ring hek lo.

"Kei pawhin ka ngaihtuah reng che a," ka ti ve leh sap a, ani chuan," Chu vàng a lo nih chiah chu ka ngaih êm êm che ni," a rawn ti leh a, signal a țha viau lo a ni ang, a thu sawi chu a tàwp deuh chut chut a. Theih ni se video call ngeia biak ka châk, a hmël ka hmuh châk chu thuhran, chutiang thu a sawi lai ngei chu ka hmu châk tak zet a ni.

"Signal hi țha deuh hlek se, in video call a châkawm!" ka ti leh ringawt a; mahse, chutiang ka sawi chu nuam lo ka ti zui leh zat, tunah pawh min ngaih vàng liau liauin signal awmna panin tlângah a kal hial a nia, min biak duh vàng liau liauin, chuta kâra duhthusàm ram lo sawi ve leh chu a inthlahrunawm ka ti viau a ni.

"Tak tak chuan, hetia kan inbe thei hi ka lãwm tâwk êm êm a ni, video call kher a ngai lo, ka ti tak tak!" min rawn chhàn hma chuan ka ti leh vat a, ka thil sawi khân a ti hrehawm ang tih ka hlau leh hnuhnawh a ni, ka duh dàn leh châk zâwng lo sawi ve chiam chiam zawng a fuh ber lo, tlânga a han kal ve țâwk țâwk laia...

"Inthiam lo mah ta che, i duh duh i sawi thei alawm, ka lo ngaithla ang," a rawn ti ve thung a, signal lam sawi duh tawh lovin eng eng emaw thu holam mai mai ka sawi ta zâwk a, ani erawh chu a țawng ve vak lo," Țawng ve la?" ka tih pawh chuan," I țawng ka ngaithla alawm," a ti mai a, kei a bula țawng duh viau țhìn ta chu ka duh duh ka sawi leh ta bawrh bawrh rêng a, kan inbe rei khawp a, dârkâr khat deuhthaw hial kan inbe nghe nghe a ni. Inbia han ti ila ka țawng a, ani'n ka țawng a lo ngaithla ti ila a dik zâwk ang chu.

Ruthi leh Zela pawhin ka status chu an lo hmu ve ni ngei tùr a ni, Ruthi chuan min rawn biain," Engtin nge i lo zêp reng theih zâwk?! A nawm hmél ropui mai si a, hun ãwl awm veleh kal ang u," a rawn ti sauh sauh a, kei pawh chuan," Ni e, kan la kal dâwn nia," ka lo ti ve a. Zela chuan min rawn be lovin min rawn text ve thung a.

*Bialnute nèna hun hman dunna atân a va îtawm ve!*  a rawn ti a, ka ner deuh nak a, bialnu nei ang ziazânga! He pa hian bialnu a neih ka hre miah lo, a sawi ngai lo va, bâkah, a neih chuan min hrilh hriat ve ngei chu ka ring deuh ngawt pek a; mahse, kei pawhin bialpa chu ka nei ve tho a, ka hrilh chuang miah lo chu a nia...

*Bialnu i neih loh kha*  tiin ka va chhâng hrâm a, ani lah chu a rawn pàwr khawp mai.

*I hre lo. Ka lo nei ta a nih pawhin kei chuan ka hrilh chuang lo ang che, lèn chhuah pawh duh hlei lo*  tia min rawn chhàn chuan a la lungawi chiah lo a ni tih ka hre mai a, ka nui ringawt a.

*Ka dâwp chhuak tho tho ang che*  ka han ti leh kher a, a lungawi lo rei lo ang tih ka hria a, a nei tak tak a nih chuan min hrilh hreh pawh ka ring chuang lo bawk. Hriat ka châk êm êm pawh a ni hran lo; mahse, hetia han tih vêl hi a nuam ve tlat.

*Hrilh che ka tum vei nèn; mahse, lèn chhuah kha i duh tlat lo va, chu vàng chuan ka hrilh lo ang che*   a rawn tih leh chuan  *Sawi tlang ve nghâl mai tùr alawm, thu i pehhêl kual vêl a, sawi chat la chuan kan lêng chhuak hrim hrim ang*  ka ti ve thung a; mahse, min hrilh chuang lo, a zêp ve thei tlat.

A hnuah Ruthi hnên ațangin ka hre ve ta chiah a, a hnên ațang chuan ka hre ta lo rêng a ni. Lêng chhuak tùra min sàwm khân a bialnu min hmuhtîr leh min hmel hriattîr a tum a lo ni a, kei lahin ka hre dèr si lo. A tân zawng a lungawi loh thlâk ve êm mai a, min hrilh duh miah lo pawh kha a lo àwm a nih hi.

Signal a neih huna a hmuh atân tiin Dozer-a chu message ka thawn fo a, min rawn chhâng lêt ve chuang lovin a biakin min rawn be zâwk țhìn. Min bia ti ila," I duh duh sawi rawh, ka lo ngaithla ang," a ti ve ziah a, a țawng ngai mang lo, a țawng a nih pawhin a sawi ve chhun chu," Ka ngai che a ni tawp mai," tih hi a ni mai, chu tê pawh chuan min ti hlim veng veng thei tho. Ka ngai a, ani'n min ngai ve bawk a, min ngaih vàngin min rawn be fo bawk, chu vàng pawh chuan ka lãwm a, ka hlim veng veng țhìn. Ka ngaih zual châng deuh hian kan pahniha thlalák kha ka thlîr reng țhìn a, amah chauha ka lâksakte pawh ka thlîr reng fo, tlêm chuan amah ka ngaihna chu min hnèm ve deuhin ka hre țhìn a ni.

Tlai khat chu zanriah kan kîl laiin ka patea chuan," Teruat, bialpate hi i nei ve tawh em?" tiin min zâwt thut mai a, a thil min zawh mak ka tih deuh avàng chuan amah chu ka en vat a, chhàn mai nachâng pawh ka hre lo nghe nghe a. Ani lah chuan," Eng nge, nula i ni a, han duh dertu pawh i neih ngei ka ring a, hawi deuhte hi i nei em?" a lo ti leh a, kei chuan," Min duhtu pawh an awm lo a niang," nui chung hian ka lo ti a, ka nutei chuan," Nula fel tak i ni a, i hmêl pawh a chhe lo, duhtu chu i nei ngei ang, nangmah hian i hawi lo mai mai a ni lo maw?" a lo ti ve thung a. Ka patea pawh chuan," A dik ang, hna thawh i nei a, hêltu che chu i nei ngei ang, duh zâwng i neih chuan neih a pawi lo a nia, zirlai i ni tawh lo va, nei lo rual lah i ni tawh hek lo," a lo ti ve leh a, Dozer-a nèn kan inngaizâwng tih han sawi tawp chu ka hreh ve deuh sia, bâkah, ka zak pah deuh bawk a, chhànnloh aiah ka nui tawp ringawt.

"Zela țhianpa Benson-a hian a duh hmél riau chein ka lo hria a, a dik ngei pawh ka ring, an lo lêng ngun viau lo nain a mit meng leh cheziaah hian mi ã nilêng lo tân chuan a hriat theih ve ruak a ni, mi sual tak a nih loh hmèl nghe nghe a," ka patea'n a tih leh chuan," Mi sual tak chu ni lo e," ka lo ti ve a.

"Hmeichhe tân chuan ngaihzâwng thlan uluk hi a pawimawh êm êm a ni, hmêlah hian zawn ngawt tùr a ni lo va, a hmei apain nulat tlangvàl lai hi chuan kan miziate hi kan lo thup ve a, inhriat chian erawh a har hlê tho a ni, inhriat chian han sawi tâkah chuan inhriat chian leh lutuk pawh hi a lo țha ber chuang lo va, chutiang chiah chuan fîmkhur tluk a awm lo ve kan tih rualin fîmkhur leh lutuk pawh hi thil awm thei a ni a, a țha ber chuang lo. Fîmkhur luatah nupui pasal nei lovin a awm reng theih ve leh tlat a ni," ka patea chuan a ti leh barh barh a, fanu zilh takin min zilh niin ka hria.

Zàn ka mut hma hret chuan ka phone a rawn ri a, ka han en a,  chu number chu ka hmêl hriat lo khawp mai! A hma lamah lah chuan +49 a la awm kulh zui a, India code a ni dèr mai si lo, foreign ațanga min rawn be tùr àwm ka han ngaihtuah zung zung a, ka hre mai hauh lo.

Mut a hun țêp tawh vàng chuan chhàn mai pawh ka tîm deuh a, line kal sual te hi a ni mai mai ang tiin tîm ru deuh chuan ka han chhâng a, lehlam ațanga mipa awin," Miss Remruatkim, i dam maw?" tia thawveng taka Mizo țawng ngei maia min rawn biak tâkah chuan ka thaw huai mai, Ruatpuia lek lo niin, ka hlauhthàwn rûk rûk nèn! A engtin tak chuan nge ka number te hi a lo neih ni? 

"Dam e, i dam zâwk maw?" tiin țha tak chuan ka be zui ta a, ani lah chuan," Dam lo ila ka rawn be dâwn che em ni?" a la rawn ti zui êrh a, mipa dang chu ni se zawng ka ngei teh ang chu; mahse, Ruatpuia hi zawng ka hriat thiam a ngai tlat, a tìrah khân ngei viau mah ila a mizia kha ka hre chho ve țan chiah a, mi sual leh ngeiawm ni lovin a che chimawm mai mai zâwk a ni tih ka hre ve tlat, a sual vànga chimawm ni lovin mi attention lâk a duh vànga chimawm chhuah mai a ni.

Kan inbe ta reng a, min rawn biakna a hla vang vang si a, ti tàwptu nih ka duh lo ve a ni; mahse, chhûngte lakah ka inthlahrung deuh a, a tlai tawh thu ka sawi lah chuan," Ka hriat loh ring miah suh, dârkâr thum leh a chanve bâkin kan inthlau lo aw, tunah tak hian zàn dâr 11 vêl chiah chiah a ni ang, mut nân a la hma lutuk," a rawn ti leh tlat a, a hre dik bawk si nèn, sawi mai tùr min ti hre lo ve tlat mai; mahse, amah zâwk chuan thil dang a rawn sawi chhilh leh a, a țawng duh ve bawk si a, kei țawng duh ve deuh pawhin ka ngaithla kur reng mai a ni.

Kan inbiak tàwp nân," Ka lo haw hunah eng nge ka rawn hawn ang che? Eng nge i duh?" a rawn ti leh a," Clutch mawi deuh," ka ti ve mai a,  ka sawi ve mai mai a ni. A rawn haw har dâwn sia, bâkah, min rawn hawn tak tak pawh ka ring chuang lo, a theihnghilh leh hman daih tawh ang.

Min nêl ve chêk nge ni, min rawn be ta zauh zauh a, zàn lamah hlîr a ni a, Dozer-a nèn kan inbiakna a dãl lêm lo. Zan khat chu kan inbe ring deuh nge ni, a tûk zîngah ka patea'n min chhaih a," Nizàn mut tawh hnu khân tu emaw ni chuan tlangvâl a biain ka hria," a ti ve ngei a, ka zêp duh bîk lêm lo.

"Ruatpuia a nih kha, kan hotel neitu Pu Lalfinga fapa maw le, min nêl ve a," ka ti a, ka patea chuan," Foreign-a awm, sual ve deuh an tih kha a ni em?" a lo ti vat a, a nih thu ka hrilh chuan," A nih tak chu. Eng titiha inhre ve daih nge in nih a?" a ti leh a, mipa lam a nia, min zâwt chîk ve-ah  ka ngai mai. Zêp pawh nei chuang lo chuan kan inhriat dàn chu a tlângpui ka sawi ve a, ka nutei chuan," A lo nih tak chu a, i hna lam i sawi ngai si lo va, kan zâwt ngai bawk lo che nèn, hriat pawh kan lo hre hleinem," a lo ti ve a, ka patea erawh chuan," Mi hausa, sum ngah deuh deuh pawh hi ka awt lo fo țhìn rêng a ni, mahni in leh lo pawh ngai miah lovin leh chhûngte aia sum thlahlel zâwkin an fate'n hun an han hmang ta a nia, nu leh pa tân chuan a hrehawm dâwn êm asin. An fate tân sum tam tak an thawk chhuak a, an hmangaih vàng leh an nawmsak loh an hlauh vàng a nia, chu chu an fate'n an hre thiam țhìn si lo," a lo ti vang vang a.

Youtube-a ka channel siam kha ka rin aiin entu an lo tam ve a, comments pawh a awm ve nual. Mizo kher lo pawhin an lo comment ve a, chu chuan min ti phûr zual. Ka chhiar chhuak zêl a, nuam ka ti, feedback dawn hrim hrim hi nuam ka ti a ni. Subscriber pawh an rawn pung ve zêl a, Zela pekin," Ka vawrh làrsak ang che," a ti a, a lo ti tak tak a ni ang, kâr khat hnuah sãng chuang subscribers ka nei ta rêng a ni. Comments-a tam ber chu *A va nawm hmel tak!*  tih leh * Ka kal ve châk lutuk*  tih a ni tlângpui. Dozer-a pawhin a lo en ve ngei a niang, kan inbiaknaah," I lang tlêm lutuk a, nangmah chiah kha ka en che," a rawn ti ve zauh a, chu chauh chu a sawi, ka zawh chian dâwn lahin  a sawi chhunzawm duh dér tawh lo zui a.

Ka nu pawh a țha chho ve zêl tih ka pain min hrilh a, Henry-a pawh July thlaah a rawn haw chho dâwn a ni àwm e. An lakah tlatlum viau lo mah ila ka chhûngte an nihna a bo lo va, an chanchin hriat loh lutuk pawh a dik lo. Felfeli pawhin ka text ngai lovin min rawn text hmasa ve tawh a, biak tak erawh hi chu a buai ve țhìn a, min rawn be mang lo. Kan inkârin hma a sâwn ve zêl chu a làwmawm ka ti a, ka nu nèna kan inkâr tak hi chuan hun a la duh viau maithei a, dam chhûng pawh a daih thei tho bawk, hunin a la hril ve zêl ang chu.

Dozer-a nèn hian ni tin kan inbe bîk lo va, kâr khatah vawi thum kan inbe țhìn, Pathiannia min rawn biak zauh châng a nei a, Thawhțanni, Nilaini leh Zirtàwpni hi kan inbiak dàn chu a ni deuh. Hei aia zing hi chu duh mahin amahin min rawn biak loh chuan ka tân tihngaihna a awm lo va, bâkah, ka sawi chhuak duh lo bawk. Hna kalsanin, buai pawh sawi lovin min rawn bia a, chuta kâra lo pangchana ka duh dàn lo sawi ve chu a naupan chhiatthlâk ka tia, ka duh lo a ni. Tlânga làwn kher ngai lovin a awmnaah signal awm thei na se chuan min biak hmasak ngai miah lovin hun ãwl ka neih veleh ka be ziah tùr hi a nia!

*******

"I piancham ka lawmpui che."

Vawiin hi ka piancham a ni tih pawh ka lo hre lo! Ka hmaa ding Dozer-a chu ka melh chho ràn a, ka rilruah thil tam tak a rawn lût nghâl zut zut mai. Engtin nge a lo hriat zâwk ni? Ka Birthday hi ka làwm ngai lo va, Angaihi khân college kan kal dun lai khân vawi hnih chu min lawmsak ngei mai, dik tak chuan ka birthday lo thleng kha kan awm dun loh lai a ni deuh ziah a; mahse, kan awm dun loh pawhin min rawn wish tal țhìn thung. Benson-a khân thil pêk min pe ve țhìn bawk a, man to ve tãwk tak, zahpuiawm lo min pe țhìn, ka pa hnên ațangin emaw ka chhûngte hnên ațangin emaw piancham lawmpuina țawngkam emaw phone call emaw tal pawh ka dawng ngai lo thung.

"Ka naute..!?" tia Dozer-a'n min koh paha ka kut a rawn chelh chuan ka ngaihtuahna ațanga harh chhuakin ka mit ka khap sak sak a, ka thil ngaihtuah chhuah chu duh lovin nuih sak pah hian," Ka lãwm e, ka lãwm lutuk! Dozer, hmuh che hi ka inring miah lo asin, engtikin nge i lo kal? Eng nge i rawn tih dâwn?" tiin ka chhâng ta sawk sawk a, ka zâwt bawk a, ka hlim avànga ka mittui parawl țêp erawh chu a hmuh hlauvin ka hawi sawn deuh a, ka mit ka khap sak sak reng bawk a.

"I birthday lawmpui che ka duh a," tiin ka kut chu a hmer nghet sauh a, dam tê hian a kutzungpuiin ka kut chu a tuai nauh nauh bawk a, chu tê mai pawh chuan ka taksaah engtin emaw tak hna a thawk thei nia. Min duatna a tih lanna kawng khat niin ka hria a, a nuam ka ti, a bula awm hi a va hahdamthlâk ngai tak!

"Ka birthday a ni tih pawh ka lo hre miah lo va. Ka lãwm e aw, ka lãwm tak zet, làwm thu sawi dàn pawh ka thiam lo zâwk, ka lãwm hi a ni tawp mai," tiin nui chung hian ka en chho a, min rawn en chhuk ve ràn a, ka lãwm a ni tih ka mit meng ațang chuan a hre thei ngeiin ka ring.

"Kan inah lo thleng tawh rawh aw," ka ti leh a, ani chuan," Riah pawh ka tum lêm lo," a lo ti ve thung a. Mak ti tak hian ka en a," Vawiinah i lo kal a, i haw leh nghâl ang maw?!!" ka ti vat a, ani chuan," Ni mai e," a lo ti leh mai a. Ka lu chu ka thing nak nak a.

"Ni lo, i chau lutuk ang. Zanin i riak ang a, naktûk zîngah i haw zâwk dâwn nia, haw leh nghâl chu a tihchi miah loh," ka ti ve thung a, ani chuan," I birthday lawm nân zanriah eia chhuahpui che ka tum a, chumi hnuah chuan ka haw mai ang," a lo ti leh a. A bânah chuan kàiin," Hawh, kal sawn rih phawt ang, kan sawi țha leh dâwn nia," ka ti a, a hmaa kan chawlhnaah bawk khân chàwl tùrin ka luhpui leh ta a.

*HMANGAIHNA HMASA BER HI A PAWIMAWH VIAU A; MAHSE, HMANGAIHNA HNUHNUNG BER HI A PAWIMAWH ÊM ÊM ZÂWK A NI, A CHHAN CHU NUN ZAWNG ZAWNG TI DANGLAM THEITU A NIH VÀNG A NI*

Dik i ti em aw???