☆DOZER☆ - 24 By Dingdi Pachuau

☆DOZER☆ - 24 By Dingdi Pachuau

"Haw tum țâlh suh aw, i haw chuan ka ngaihtuah lutuk dâwn che a, ka muhìl thei lo ang," ei tùr kan oder hnu chuan ka ti mawlh mawlh a, haw a tum țâlh ang tih ka hlau tak zet. Kawng a thui mai si a, a chau ang a, a muthilh a chhuah hlauh chuan a chesual ang tih ka hlau a ni.

"Nui rawh le, nuih hi i inhmeh ber, i piancham a ni bawk a," a rawn ti daih thung a. Ka thutak êm avàngin nui hmêl ka pu thei lo va, a hmêl ka hmu chu lãwmin hlim viau mah ila a haw țâlh ka hlau êm a ni.

"Zaninah i haw nghâl lo ang tih sawi phawt la?" ka ti ve thung a, a kutah vuanin a mitah tak chuan ka en tlat bawk a, ani chuan," Nui phawt la?" a lo ti ve thung a," Kan inhmu chauh a, ka ngaih tehlul che nèn, haw leh vat i tum sia, ka lungngai lâwk alawm, ka hlauthãwng bawk a," ka ti leh a. 

"Tûn hun chauh hi ngaihtuah tum teh, hun rei lo tê kan neih hi hlim taka hman tum zâwk ang," min thlêm titih deuha a rawn tih leh dût chuan a sawi dik ka ti viau mai. Ni e, ka piancham min lawmpui tùr liau liauin hmun hla tak ațangin a rawn kal vang vang a, hlim taka lo làwma hlim taka lo kàwm mai tùr ka nih tehlul nèn, min hawsan hun tùr ka lo ngaihtuah lâwk a, ka huphurh lâwk a, a lakah lo pangchang mah mahin awm dàn tâwk ka lo thiam lo a ni.

"Aw le," tiin ka han nui lui sak a," I rawn kal thui vang vang bawk a, ei țeuh rawh aw, i rawn kal hi ka lãwm tak zet, ka tân chuan thilpêk hlu ber i ni," ka ti leh a, a kut chu ka tuaisak neuh neuh reng a, ani pawh chuan," Ka rilruah i awm reng a, i piancham lawmpuia rawn biak che chu theih tho mah se hmaichhanah, a hring a hrãn ngeia hmuh chea i piancham lawmpui che ka duh a, dam taka ka hmu leh thei che hi ka hlim a ni," a ti ve duah a, a țawng lai chu ka lo en reng a, a sawi thui ve lutuk chuan ka nuih a ti za zâwk, a inhmeh lo roh sia.

A sawi angin thil dang ngaihtuah duh ta lovin nui sáng leh hlim takin, ei tùr ei pah chuan ka titi barh barh reng a, kan ei zawh hnuah chhuakin kan in kan pan a, ka patea office kai pawh a lo bâng tawh a, kan sawi lâwk tawh angin Dozer-a chuan ka pateate bulah chuan ka birthday lawm nân zanriah ei tùra min hruai chhuah chu a han dîl nghâl a.

Ka patea pek chuan," Teruati hi i eng nge a nih? In inkârah thil awm a awm em?" tiin a zâwt ta chawt mai a, a thu zawh chu ka lo hre ve reng si a, nuam lo ka lo tihzia mai chuh! Engtin nge Dozer-a'n a chhàn ang tih erawh ka hre châk viau a, ka awm hmunah ka lo ngaichãng ru reng a, tháwk pawh ka thaw țha ngam lo. Ka nutei pawhin a thil zawh chu a hre ang, a ngaih dàn hre tùr erawh chuan a hmêl ka en ngam lo thung.

"Kan induh tawn a," Dozer-a'n nghet cherh chawrh, awki hniam ruih a tih chuan a rûk têin ka lo thaw huai huai a, zêp nei lova a hrilh tlang mai chu ka lãwm a ni. Ka patea chhànna erawh ka hre châk leh viau a, eng angin a ngaih ang tih chu ka hre châk a ni.

Zawhna leh chhànna a awm tawh lo. Min chhuahpui chu a rem ti a, tlai vak lova min hawpui leh tùr erawh chuan a chah ta thung a, hlim ru zet chuan room-ah lûtin ka insiam sawk sawk a, khua a vawh lêm loh avàngin ka inthuam chiam lo. Min hruai chhuah tum mah se a pawisa sèntîr vak chu ka duh loh avàngin pawisa eng emaw zât chu ka ak ve a, hmun hla tak ațangin a rawn kal vang vang a, a pawisa hman raltîr leh chiam kha chu a fuh ber lo ang.

Ka inpeih hnua ka va chhuah chuan ka patea chuan," In chhuak ang a, hlim takin hun chu in va hmang dùn dâwn nia. Dozer-a erawh hetah zàn chu riak ngei la ka duh tih thu ka han sawi leh hrâm ang e, zàna tlàn zawng inngaihtuah a na duh êm mai," a lo ti charh charh a. A thil sawiin min tih hlim êm avàng chuan ka patea chu ka va kuah chûk chûk lo chauh a ni, riak tùrin a lo thlêm ve tih hriat reng, Dozer-a pawhin ka patea thu sawi chu zàwm hrâm se...

Ka scooty-in kan chhuak a, pâwn boruak lah chu a nuam mai si a, ka rilru a va hlim tak! A hnungah chuan ka bei chial a, a kâwngah nghet takin ka kut pahnihin ka kuah bawk a, ka hlimna hian vàn a tawng hial lo'ng maw ka ti, tunah tak hi chuan eng thil dang mah ka mamawh lo va, ka duh hek lo, ka duh ber ka kuah chial a, ani tluka birthday gift țha hi a awm thei tawh lo ang.

Min hruainaah chuan îhê lovin ka zui tawp a, kei Aizawla awm zâwk hian min hruaina hotel lah chu ka lo la kal ngai miah lo lehnghâl! Kan hotel-te angin changkãng tak ni ve lêm lo mah se a nuam reuh tawp a, len pawh a lian lêm lo; mahse, a tâwk reuhin a romantic reuh tawp ka ti thung.

Chaw eia min hruai chhuak chu ka hlim tawh teh réng nèn, rangkachak bengbeh mawi zet hi min pe tel bawk a, keima inbehtîr pawh phal lo chuan amah ngei chuan min behtîr zui zat a, a lan dàn ațang chuan a man to dàn tùr chu ka chhût thiam ve tho si a, ka hlim viau laiin ka inthlahrung ru tho bawk a," A ngai lo asin, a mawiin a to dâwn si. Ka piancham min lawmpui tùr hrim hrimin i rawn kal vang vang a, chutah, chaw eiin min hruai chhuak leh zui a. Eng thil dang mah ka phût lo asin, i hmêl ka hmu thei ngawt pawh hi ka lãwm tâwk êm êm a ni, ka piancham thilpêk țha ber leh hlu ber i ni tawh tho tho a," ka ti sap sap a, ka thutakzia hre tùra ka duh avàngin kuah chialin ka melh chho kiau bawk a, ani pawhin min rawn melh chhuk ve rûn mai. Hotel chung záwlah kan ding a, light awm hran lo mah se a thim lo va, kan inhmu thei vek tho. Mi dang an awm ve lêm lo bawk a, thlahlel taka kuahin ka nghèng chial a.

Rawn kûn hniama ka benga fawh zoh pah chuan," Ka pi min pêk a nia, a boral hma, a damloh laiin amah ka hriat reng nân min pe a, ka tâna mi hlu tak hnêna pe tùrin min hrilh a ni," a ti sup sup a, a sawi dàn hmang ațang chuan a tâna mi hlu tak ka ni tihna a ni, a va làwmawm leh zêl êm! 

"Thil hlu tak a nih dâwn chu! Aw le, ka lãwm e, ka ti bo miah lo ang," ka ti a, làwm thu sawi nân dingdihlîpin ka han fâwp a, ani pawhin duat taka min kuahin min fâwp zui nghâl a, kan duhthawh chho leh a, ãm takin kan infáwp zui ta vawng vawng a, hei hi ka thlahlel a ni, zanin hi ral thei lo se, tihian awm dùn reng thei ila ka va ti tak êm! 

" Ka patea'n kan inkâr a zawh che khân engtin nge i chhàn ang aw ka lo ti a," ka hnunga a âwm nghèng ar ar chung chuan ka ti a, ani chuan," Thu dik ka sawi mai loh chuan," a lo ti sup a, min kuahna a bân chùlsak hliau hliau pah chuan," A nih, khatih lai khân i zak ve deuh tho em?" tiin ka zâwt leh a.

"Zak lo, zak rual ka ni tawh lo," tia min chhàn chuan," Tlêm tê chuan i zah deuh ka ring tho tho, i zëp a ni ang," ka ti leh a, ka nui pah a. Ani lah chuan," Thu dik sawi a zahthlâk loh," a lo ti thûm dût a, a țawng zâwnga a hrawk bâwk che leh ralh țhìn chu ka hre thei reng, hmu lo mah ila ka hre chiang viau a ni.

Ka patea zahawm a tih êm avànga a riah dâwn tâkah chuan tiin pâwn lamah rei tak pawh awm dun lovin min hawpui thuai a, ka la kham lo viau nain a riah dâwn avàng chuan ka sawi buai lo. A hnunga bei leh tlãnin kan tlàn chhûng chuan a rim chu ka hnìm vang vang reng a, mipa rim dik tak a nam a ni. Thlan rim a ni lo va, a rim tui ka ti tlat pek a nih chu. 

"I rim hi a tui ka ti," ka ti chhuak nghe nghe a, a dàr pharh a hlai țha si a, min hliah hneh viau a ni. Ka ngaihtuahnaah eng emaw a rawn lût thut a, ka nui sak nghe nghe. Țha dâwn riauin ka hria. A kâwnga ka kuahna phelhin a mal lamah chuan zàwi muang hian ka chûl thla țan ta a, a malah chuan ka kut chu ka nghat vang vang phawt a, ka chêt dàn a ngaih dàn tùr ka ngaichãng pah a ni; mahse, eng mah a rawn sawi chhuak lo.

Chimawm chhuah lehin a malah chuan ka han țhàmsak deuh salh a, a la ngawih reng avàng leh a scooty khalh dàn a la ngai reng avàng chuan a mal chhûng lamah chuan ka kut chu ka'n chêttîr leh a, chutah zet chuan," Kan accident i duh loh chuan i kut kha dah sawn vat rawh," a rawn ti ta sup mai, a aw a sehchilh deuh rap avàng chuan țawng lo tùrin a lo insûm țàng țáng a nih ka ring zui nghâl bawk a.

Ka nui hak hak a, a kawr chhana a hnung seh zauh pah chuan," I rawn țawng chhuak țha duh lo êm vei a nih kha, han fiam ve rêng rêng che ka châk bawk a," ka ti a, a kâwngah ka kuah zui leh vat a, ani chuan," A hun takah i tàwp a, i ti țha e," a rawn ti duh chauh a, a hnungah ka sehsak leh zauh phah.

In kan thlen chuan ka pateate pawh sitting room-ah an lo la țhu khar a, ka làiin tlêm chuan ka zak ve deuh a; mahse, ka nutei chuan," In lo haw hma hlê mai! A nuam bawk emaw chu?" tiin min lo be nghâl siam siam a, ka zak ang tih a hlau ve a ni ang, ka nutei hi chu a fel ve chiang a ni.

Mu nghâl mai bîk lo chuan kan titiho leh rih a, Dozer-a a riak dáwn tih chu an lo ring lâwk thlap a ni ang, ka room piah chiah Tea room-ah chuan mu tùrin an inhrilh fel zui a. Kan inkawm fàl duh an ring ve pah a ni ang, rei pawh titi lo chuan mu tùrin room lam an pan ta thuai a. Hemi hnua kan titi hian alawm a chanchin hriat loh tam tak ka la neih chu ka zawh chhuah leh tâk ni. A kum zât pawh ka zâwt a, min hrilh ve mai bawk a, kei aiin kum 13 zetin a lo upa a nih chu! Mahse, pawi tih chu khawi lam, upa deuh se ka duh daih zâwk. Naupang té ngaihzàwn chu a fuh lo, ințhenna a tam duh.

Vàrtianah a tho a, a haw dâwn tih ka hriat ve kar avàngin ka harh hma ve bawk a, thingpui ka lumsak ve a, ka pateate lo thawh hmain a haw tùr thlah tùr chuan ka chhuak zui a. A truck dahna thleng kan inphur a, mi dang hmuh tùr an awm lo bawk a, inthlah nân kan inkuah leh vawng vawng a, thlah ngai lovin tihian kuah reng theih se.

Tûkțhuan kan kîl laiin ka rin ang ngeiin ka patea chuan min fiam ta zuk a," Bialpa nei lo ang deuh khân i awm vél a," tiin, za lo têin ka nui tãwi tak ringawt a. Ka nutei erawh chuan," Sawi chhuah dawt te chu a nuam lovin a zahthlâk ve dâwn asin, 'Bialpa ka nei asin' tia sawi chiam thu va awm suh, a rûk thei ang berin alawm kan neih țhin, kan hun laite kha ngaihtuah ve mai la," a lo ti ve thung a, min țan zâwnga thu a lo sawi chu ka lãwm teh asin, ka zah viau a lo hlau ve a ni ang.

"Tlangvâl naupang zawk zawk tawh lo a ni bawk a, a titi pawh a puitlin viau kha; mahse, thu chu a thiam vak lo a nih hmél," patea chuan a ti leh a, a nui pah sûng a. Kei pawh chuan," Thiam vak lo; mahse, a lawmawm zâwk alawm," ka lo ti ve a, ka nutei chuan," Sawi mâm thiam hlê mai," a lo ti zauh a, kan nui ta țhâ hlawm a.

Ka awm a va nuam tak êm! Dozer-a ngaihtuahin ngai viau mah ila tluang taka a thlen ka ring a, ka pianchama a hmêl ka hmu thei chu ka hlim veng veng lo thei lo. Angaihi ka chàn hnu hian Dozer-a vàng hian ka va hlim leh tawh sî êm! Ani hi tawng lo ila tûn dinhmun hi ka la thleng miah lo ang le, Pathianin ka tân a ruat a ni ngei ngei ang, a nih loh tal pawhin min ti hlim tùra Angaihi thlarauin a rawn tirh a ni tal ang.

Benson-a'n min rawn be ve teh mial a," Nimin kha i birthday a ni reng sia, ka phone chhiat thut vàngin ka rawn wish thei lo che a, tlai deuh tawh mah ila ni khat êm lawh a la ral chuang lo va, hlim deuha i hman ka beisei," a rawn ti a, kei pawh chuan," Ka lãwm e. Inlawmpuinaah tlai a awm thei tak tak hleinem, i phone chu engtin nge a chhiat a?" ka ti lét ve a, ka birthday a lo la theihnghilh lo chu mak pawh ka ti hran lo, kum tam a la liam bîk lo va, chu bâkah, tuna hetia kan han inkawm leh tâk deuhah hian a hre chhuak ve leh pawh a ni thei tho bawk a.

"Zela leh Ruthi ka rawn sâwm ang a, zanin chu in inah làwm teh ang u, birthday lawm pawh a khât ta alawm," a rawn ti leh a, kei chuan," A, a ngai hleinem, in duh leh rawn lêng tho ula," ka ti ve thung a. Lawm hluai tumin sum sêng țeuh záwngin an rawn chê ang tih ka hlau a, nizàn lamah nuam takin hun kan hman tawh bâkah a nî tak pawh a ni tawh chuang si lo va, țûl ka ti tehchiam lo a ni.

Mahse, zànah chuan an pathum chuan an rawn kal ta tho a, thilpêk leh ei tùr nèn an rawn thawk chhuak a. Zela pek chuan," I birthday tih te chu sawi ve tùr a nia, i kamtam lo leh lutuk țhìn a, birthday lawm a khàt tehlul nèn! Tihian, kum 18 i tlinna chiah tiraw?" a ti a, a thil sawi hre phaho chu an lo nui vek a, Ruthi chuan," Kum 16 zâwk, super sweet sixteen," a lo ti ve a, kei pawh chu ka nui ve lo thei ta lo va.

Zela chuan," Kan pian nî inhrilh hre vek teh ang u, kan in-wish-in kan làwm tlâng thei bawk ang a," a ti a, a birthday chu a sawi pah nghâl a, mi dang pawh chuan an pian ni chu an lo sawi ve liam liam a, Benson-a birthday pawh ka la theihnghilh bîk lo; mahse, ani zawng Dec 25 kha a ni ve hrim hrim a, a hranpaa lawm kher pawh ngai lovin Kristian zawng zawngin kan lawmsak vek tho tho.

Dozer-a'n min rawn biain a nute tlawha a zin lawk tùr thu min hrilh chuan," A dam țha lo em ni?" ka lo ti vat a, ka ngaih a țha lo deuh hman a; mahse," Dam țha e, ka tlawh khât tawh a," a rawn tih tâkah chuan ka ngaih chu a țha ve leh mai a," I awm rei ang em? Engtikah nge i lo haw leh ang?" ka tih chuan a awm rei a rin loh thuin min chhâng a. Ni e, tunah pawh hian inhmu thei lovin kan inhlat mah mah tawh a nia, chutih laia tuna a awmna aia hmun hla zâwka zin leh tùr chuan ka ngaih a zual lutuk ang, tunah pawh hian kan inhlat tâwk tawh a, ka ngai leh mah mah tawh a nia.

"Engtikah emaw kan la zin dùn dâwn nia, ka nu pawh i hmu ve ang chu," a tih chuan ka phúr lehpek kher mai. " Aw, la zin ngei ngei ang aw, ka châk tawh lutuk!" ka lo ti vat a, ka ngaihtuah zâwng ringawt pawhin ka phûr over mah mah! A nu ka hmuh bâkah an in leh an khua tak tak ka hmu thei dâwn tihna a nia, a nuam ngawt ang chu!

Hna ațanga ka bâng deuh chiah tihah Ruatpuia phone call ka dawng a, kal pah chuan ka chhâng a," Ka rawn haw dâwn a, i thil min chah pawh kha ka lei diam tawh aw, i duh zâwng tak a nih ka beisei," a rawn tih chuan," I rawn haw dâwn maw?!! Tih tùr i nei tawh lo tihna em ni?" ka ti ve thung a, a kalna kha a la rei tehchiam si lo va, eng a zu ti hman lo tawp ang ka ti a ni.

"Min va ngai lo tak!! Ka rawn haw i huphurh tihna a ni maw?" a rawn tih chuan," Chutiang lam a ni lo, i kalna kha a la rei lo êm alawm," ka ti ve thung a, ani lah chuan thawveng zet hian," Kum thum chuang ni tawh maiin ka hria asin kei chuan. Ka rawn thlen dâwnah ka rawn bia che ang a, min lo hmuak dâwn nia aw," a rawn ti leh phawr phawr a. A țawng dàn hi a ngei duhtu tân chuan a va ngeiawm duh dâwn tak! Chapo ti zâwng pawhin an sawi thei ngei ang; mahse, chutiang chuan kei chuan ka ngai ve lo, a tih dàn ve rêng, a nihphung ve tawpah ka ngai. Hetia en ai hian a sual pawh ka ring hek lo, a langa sual leh khirh ang taka lan hi a tum ni zâwkin ka hria. Lo haw rawh se, a pain a ngaihtuah theihziate hi hre chhuak se, tih tak taka ngaihtuahtu Pa a neih hlutzia te hi hre chiang chho ve tawh teh se.

*HMANGAIHTE KIANGAH CHUAN LUNGNGAIHNA THEIHNGHILH A AWLSAM A, HLIMNAIN MIN TUAM VENG VENG ȚHÌN*