☆DOZER☆ - 25 By Dingdi Pachuau

☆DOZER☆ - 25 By Dingdi Pachuau

Dozer-a chu a zin ta ngei a, a zin tih ka hriat vàng chu ni maw, ka ngai thar riau lehnghâl a, duh duh hunah inbiak theih hek loh le, ka lung pawh a lêng ru veng veng a ni. Ka patea lah chuan chaw ei laiin min fiam leh zuk țhìn a, haw tak tak lo mah ila ka zak ve deuh tho a, min fiam min fiam mah se min duhpui lo hran lo tih erawh ka hre chiang tawh a, chu chuan ka rilru a ti nuam țhìn.

Ka rin lêm loh tehlul nèn, Ruatpuia chu a rawn haw tak tak a!!!  Kan hotel-ah ngei mai rawn innghat lehin ka buaipui chu a phût leh ta bîk a, a nungchang ka hriat thiam ve deuh tawh vàngin eng mah sawisêl lovin ka buaipui a. Clutch mawi zet, a hmêl en rêng rêng pawha man to tih hriat tak hi min rawn hawn tak tak roh a, ka làwm viau rualin min rawn zawh khân min rawn hawn ka rin loh luatah ka rilrua rawn lang hmasa ber ka sawi chhuak ve tawp kha a nia, min rawn hawn ta tak tak sia, nuam lo ka ti angreng viau a ni. Ani lah chuan," Ka lo hawn manah che ka thil duh min tihpui ang," a ti leh mauh mai a, tih puitlinsak leh ngei a duh leh dâwn si a, ka duh ka lo sawi ta kher kher kha ka inchhîr tak tak a ni.

A rawn haw chhoh dàn ka zawh chuan," Hetah ka awm tawh dáwn, ka kal dâwn tawh lo," a ti mai a, a thil duh tihpui ngai lovin kal leh daih se ka ti asin le. Ka rilru hre ngat se chuan sual min va ti dâwn tak! Kan pu ber fapa chu ni ngat lo se chuan a duh ang hi chuan ka tàltîr lo tawp ang maw le!

June thla a ni ve tawh a, ruah pawh a súr ve leh duh deuh a. Ka patea'n," Thla de tìr a lei êm mai a, kumin chu fùr ruah tui a tam dâwn a ni ang," a tih chuan ka lo huphurh ru angreng viau mai. Ka pateate in hi hmun rem deuh laiah awm lo phei se chuan ruah a sùr tam deuh châng hian ka lung a muang lo țhìn ngawt ang. A sawi ang taka ruah tui a tam dâwn phei chuan a va huphurhawm leh dâwn tak! Chanchin tharah 'kawng chhia, lei min, lei tawlh, chènna in a min tih' leh 'kawng a min a, lìrthei eng chî mah a kal tlang thei lo' tih kan hre leh chàmchî dâwn a nih hi.

Ruatpuia thawven vezia hi chu aw... zànah min rawn phone a, kan inah a rawn lêng a nih chu! Pawi ka ti êm êm lo nain a nungchang har har hi ka pateate'n an hre thiam lo ang tih ka hlau deuh a, a lèn chhûng zawng chuan a rûkin ka lo îp char char a ni. Ka rin ang ngeiin tûkțhuan ei laiin ka patea chuan," Nizàna i inlêngpa chu a la țhalai ve hlê mai," a ti ringawt a, chu bâk chuan a sawi zawm lo. Ka nutei erawh chuan," A la naupang ve êm a nih kha, mihring hi zawng thil siam zînga enkawl har ber kan ni rêng a," a lo ti ve thung a. Pu Lalfinga fapa tlum ber a ni tih nizàn khân ka hrilh tawh a, anni pawh chuan a nungchang ațang chuan mi eng emaw tak a ni tih chu an hre thei nghâl a ni.

Zela'n," Lêng tùrin ka rawn sâwm dâwn che a, Ruthi nèn lo inring ang che u," a tih vàngin Pathianni chawhnuah chuan lêng chhuak tùrin ka lo insiam peih at a, ka hnial ngam tawh lo a ni. Bâkah, a bialnu kan lènpui dâwnin ka ring a, han biaka han chhawnchhaih vêl pawh a châkawm ve ka tia, Ruthi ka biak pawhin ani pawh a phûr ve viau.

Vànneihthlâk lutukin ruah a sûr lo va, Benson-a car a rawn keng chhuak a, chutiangin Zela pawhin. Zela car front seat-a rawn țhu vàng chu hrilh ngai lovin a bialnu a ni tih ka hre thei nghâl a, a chhiat loh hmèl reuh viau bawk. Benson-a car-ah Ruthi nèn kan chuang a, Zela'n an car-a chuang ve mai tùr chuan min han sâwm der ve ngial a, a rilru tak takin ka chuan ve a hlau àwm hlê si a, ka nuih pawh a ti za pha lo e a.

Aizâwl khawpui mi ni lo ta chu kei hi chuan lènna tùr ka hre lo khawp a, ka lêng chhuak ngai bawk si lo va. A khaw neitu tak takte erawh chuan an lo hre nameuh mai, min hruaina hmun chu Aizâwl khaw páwn lam daihah a ni a, Lunglei lam road-ah tlãnin kawngpui ațang chuan kan pëng daih thung. Kawng a tê nain a țha viau a, Hah damna Rûn ațanga khaw hnai ber kan panna kawng kha ka hre chhuak zawk a, tehkhin chi ni miah lo mah se a kawng awm dàn chuan kha kawng kha min ti hre chhuak tlat pek a, Dozer-a pawh ka hre chhuak vang vang mai. A zin hnu khân vawi khat chauh min la rawn bia a, a buai viau a ni maithei, a nih loh tal pawhin signal awmnaa kal a buaithlâk a ni thei bawk ang, ruah a sûr ve duh tawh bawk si a.

Kan awm khâwm deuh chuan Zela bialnu Katie chu a zak ve deuh a, mi dang kan țawng bawrh bawrh pawh chuan a ngawi reng a, a nui ve sak sak ngam chauh a; mahse, kan titi rei deuh hnuah erawh chuan a rawn țawng ve ta zauh zauh thung, a aw a dam reuh a, kei ang lo takin a nù reuh bawk a, Zela pawhin a duh hmèl viauin ka hria, a en leh vung vung țhìn.

Ka phone a rawn ri teh tlat a, ka han en chuan Ruatpuia a lo ni a," In inah ka rawn kal a, i lo awm lo," a rawn ti làwng láwng a, kei chuan," Awm thei nâng, ka lêng chhuak daih alawm," ka ti lêt ve a. "Nula ve si, lèn peih reuh lutuk! Lêng chhuak dâw dâw mah ta che," min rawn tih chuan," Ka lêng ve châk a ni mai alawm, nang pawh i lèn chhuah reng chu," ka ti lêt leh a, tlàwm mai ka tum bîk lo.

"In ina rawn lèn ka tum vàng chauhin ka lêng chhuak a nih hi," a rawn tih leh chuan," Chu, i lêng chhuak tho alawm, kei pawh ka lëng chhuak ve a ni mai," ka ti leh tlat a, ka dang duh bîk si lo va, sawi mai tùr a hre ta lo a ni ang," A nih tak chu, lëng reng rawh, mi sualnu," a ti hmak a, phone a off zui daih bawk, a chêt dàn chu naupang chhia ka ti roh khawp a, ka nuih pawh a ti za viau. A, lo thinrim ve rih mai mai teh se, a thinrim rei dâwn lo tih ka hre chiang ve êm mai. 

A hnu deuhah ka phone chu a rawn ri leh a, amah bawk a ni leh ang chu, kha maw, a thinrim rei lo ang ka tih kha. Ner deuh núng hian ka phone chu ka han en a; mahse, Dozer-a hming ka hmuh tâkah chuan tho vatin mi dang hlat chuan ka kal sawn hla deuh a, ka țawng an hriat phâk ka duh lo a ni.

"Hello?" ka ti sap a, ani chuan," I aw han hriat theih leh tâk chu, ka dam sawng sawngin ka hria!" a rawn ti cool ruih a, a aw chhuak chuan ka rilruah ngaih țhat lohna rawn tuh nghâlin," I țha em, Dozer?" ka ti leh vat a, a țhat thu min hrilh hnu chuan tlêmin ka ngaih a țha ta deuh a," I nu chu eng nge a lo an a? A lo țha em?" ka ti leh a, ani chuan a nu chu a lo dam chian loh deuh thu leh a haw tum hun ang pawha rawn haw theih a inrin loh thu chu a sawi nuap nuap a, ka khawngaih roh mang tak e, hnûp hnûp mai a! A bul hnaia awm theih ka châk hle mai. 

"A zia lo hle mai; mahse, eng êm a ti lo ang a, dam leh vat tùrah ngai ang. Dozer, i nu kha ngaihtuah viau rawh aw, helam te chu lo enkawl tùr mi dang i dah tho a, ngaihtuah lo la, i nu hrisèlna kha a pawimawh ber tih i hre dâwn nia, a ngaiin a thlahlel dâwn si che a," ka ti duah a, ngai viau mah ila chu lam chu ka sawipui duh lo. A nu a pawimawh ber rih tlat, a dam țhat loh phei chuan a fapa chu a ngai viau dâwn tih pawh hriat sa a ni a, ani pawhin rawn haw thuai tum lo se a țha, a tlawh zut thei bîk si lo va, a tlawh chhunah chuan châm rei ve deuh teh se.

"Aw le; mahse, ka ngai tawh khawp mai che," a rawn tih chuan ka rilru chuan," Kei deuh hian a nia ngai che ni," ka ti vawng vawng a; mahse, a hriatah erawh chuan," Pathian zârah i nu a dam thuai ang a, i rawn haw vat thei mai ang," ka ti ve thung a.

Kan inbe rei lutuk lo, an awmna lamah chuan ruah a sûr a nih duh hmèl, ruah tla ri ang deuh ka hre thei tlat a, a țawng pawh a fiah kâk thei lo. Helam chu chhûm tam ve tho mah se sùr tum hnaiin a lang rih lo, zàn lamah chuan a sûrin ka ring.

Țhiante bula ka lêt chuan Ruthi chuan," I kal sawn deuh kher a! Tu emaw a ni ang maw? A changtupa em ni?" a lo ti vat a, min fiam a ni tih hriain," Loh theih nãng!" ka lo ti ve a, Zela chu lo inrawlhin," Sam zuah maksak deuh kha a ni ang chu, a senior tawh kha, tih huk a hnai thei tawh ang chu," a lo ti ve a, ka chhâng hran lo. Benson-a chuan," Hmui mawmna tùr a hnai deuh tihna zuk nia," a lo ti ve a, a nui zui bawk a; mahse, a nuih chu a za tak tak em tih zawng amahin a hria ang chu.

Thla ka lâk kual zawr zawr hnuah kan haw ta chauh a, hmun nuam ka tih deuh leh mawi ka tihnaah hi chuan thla lâk hi nuam ka ti a, ka peih êm êm bawk, hei hi ka puitlin theih lohna lam tak a ni bawkin ka hria, thlalãk pawh hi ka ngah a nia, ka delete tam tawh bawk.

A thinrim rei loh ka rin nèn, a ti lui deuh ngar ngar nge ni zâwk pawh ka hre lo, Ruatpuia chuan ka chungah chimawm a chhuah a, polite tak hian a duhnaah min tîr kual a, sawisèl hleih theih pawh a ni lo, a hmêl han en ila a nui sûng zêl bawk si a, a ngeiawm roh tak tak a ni. Pu ber fapa chu ni lo se chuan aw... a lu-ah ka chhu lawlh tawh ang maw le.

Tlai khat ka haw hnua min rawn biakin," Zin chhuak tùrin lo inring sa deuh rawh aw," a rawn ti teh ngawt a, min rawn biak hian in ka thleng tawh nghe nghe.

"Leh ngawt a! Engah nge ka lo inrin ngawt ang a?" ka ti ve thung a, ani chuan," Thil min tihpui tùrin ka tih tawh che kha, i hnial thei lo ang," a rawn ti leh tlat a. A hma khân a sawi tawh tak e!  Clutch ka lo chah ta kher kher kha ka inchhîr ngawt mai, pêk lêt leh chi lah a ni mang si lo.

"Hna ka thawk a, zin chhuahna hun ka nei hleinem," ka tih leh pawh chuan," Ka pa ka dîl vek tawh, i hlawh a kiam dãwn lo," a rawn ti leh thung a, he pa hi chuh! A duhnaah hi chuan a thâ a chak ve ngawt mai, pu ber chuan a fapa thil duh leh ngen chu a tih hlawhtlinsak leh ngei ka ring a, hetianga thil a tih zêla a thu anga ka awm zêl dâwn chuan ka hna hi bànsan mai a țha zâwkin ka ring ta thut thut hial a.

"Huphurh duh suh, hmun nuam deuh, a hmaa i kal tawhnaah khãn ni hnih thum châma zin khawthawn mai mai a châkawm ka tia, ka sawi tawh kha, tûn chiah hi ka ti buai tawh ang che, lo hre sa tawh leh kal tawh i ni a, min hruai la ka duh a ni," a rawn ti leh a. A sawi chu Phaizáwl a ni tih ka hriat chuan ka thaw deuh huai a, pawi vak hleinem, ka kal châk leh teh asin. Dozer-a erawh a rawn haw hman a rinawm loh a, a awm loh pawhin a nuam tho ang, bâkah, pawisa a hmuh chhuah phah dâwn asin, ka puih theih dàn a nih hi.

Pu ber chuan hriat thiam min rawn dîl leh ta ngei a, a inthiam loh thu leh hrehawm a tih thu a sawi chuan nuam lo ka ti tak zet a ni. Tûn țum chauh a fapa chu hre thiam leh hrâm tùra min ngènin," I hre vek tho a kan chhûngkaw awm dàn chu. A zin haw hnuah in lamah a rawn haw ve tawh dâwn a, he hotel hi enkawl zuitîr ka duh bawk si a, chu vàng chuan tûn țum chauh chu rem ti leh la tiin i puihna ka dîl tak meuh che a ni," a tih phei chuan pu berin ka puihna min dîl ngawih ngawih zâwk ta chu ka tih hlawhtlin ngei a ngai a ni tih ka hre chiang kher mai.

Nilainiah zin tùr chuan kan chhuak a, amahin engkim a ti fel vek a, a chhan chu ka youtube channel kha a lo hmu fuh ve a, khata țang khân reservation siam dàn a lo hre ve a, ka buaipui ngai miah lovin a lo ti ve vek a, kawng lehlam takah chuan a ti țha khawp mai, a chimawm deuh e tih mai lohah chuan a duhnaah hi chuan a che fel thei viauin ka ring.

Pa Țhianga'n Rûn chu a lo nghâk niin, min hmuh chuan a phûl hlut nghe nghe a, mi dang daihin an lo nghâk lo chu ka lãwm khawp mai. Dozer-a truck-ah chuan min phur lût a, Ruatpuia chuan," A pà țek țek hle mai," nui sûng chung hian a ti a, kei ve thung chuan Dozer-a ka hre chhuak vawng vawng a, ka ngaih pawh a zual hlê a ni. Awm se chuan amah ngeiin min phur tùr hi a nia, a nawm dáwn tehlul nèn; mahse, chu lam chu ngaihtuah thui duh lovin a hriat tùr pawimawh deuh deuh tùr, dàn zawm tùrte chu Ruatpuia chu ka hrilh ta zâwk a, ani pawh chuan a lo ngaithla ve kur mai.

Chawlh hmang an lo awm ve nual a lo ni a, Ruatpuia nèna kan awmna tùr phei chu Rûn no, tàwp ber ber pahnih a lo ni a, a hmaa ka thlennaa thlen leh chu chãk viau mah ila ka kalpuipa tih lunghnùr ka duh bîk lo va, Dozer-a khân ka tân liau liau a voh bîk tawh avàngin tu mahin an luah lo ang tih erawh ka hria a, nakinah a bulah kalin ka va fang leh ang chu.

Rûn hi inhnaih tak takin a ding lo va, nupa leh inngaizâwngte chu an inthlen țâwm mai ang a, Ruatpuia nèn erawh inngaizâwng kan ni lo va, kalpui ve mai ka ni bawk a, a hran ve vein a reserve a, eng emaw ni kawng zâwng tak hi chuan a che gentleman ve leh tlat.

Chawhma lama ruah a sùr tawh avàngin chawhnu leh tlai lam chu a sûr lo va, Ruatpuia chuan nuam hi a ti khawp a, a thuamhnaw dahin a awmna tùr Rûnah chuan a lût zawk chauhin ka ring, a rawn lawr rang khawp a, min rawn kovin," Ka lêng kual dâwn, i lo kal ve duh em?" tiin min rawn sâwm a; mahse, ka lo hnial a, min ti lui lo chuan lêng tùr chuan a kal zui ta nghâl a. Kei chu ka chhuak peih rih lo, Dozer-a a awm si lo va, kawm tùr an awm dâwn lo, tih tùr lah a vâng dáwn si.

Ruatpuia eirawng ka bàwl kêp a, chuti lo zawng a ngei ringawt palh ang, a ei tùr a bàwl peih hi ka ring lo hrim hrim! Ka ring dik chiah bawk a, thim thet thetah rawn lêtin," Eirawng min lo bàwl këp tùrah ka ngai deuh ngawt a," a rawn ti a, ka bàwl kêp thu ka hrilh chuan," Hawh, i hman tawh chuan ei nghâl ang, ka ril a țâm tawh êm mai," a ti nghâl a, hnial lo chuan chaw ei chu ka siam zui nghâl a.

A la naupang chhia ve bawk a, a tih tùrah a ngai lo hrim hrim nge, tih nachâng a hre lo ni, chaw ei kham chuan min chêtpui lam chu khawi lamah, a țhu a, cigarette a pak hlat hlat a, zial a lo zu ve țhìn tih ka hre chauh nghe nghe. Ka phût lo bawk a, ka ti fel zung zung a, Dozer-a kha chu ni se chuan min pui leh ngei àwm si a, ka phal lo chung chungin hmun a ti fel ang a, ka thlèng sil sa a lo rem fel vek bawk ang, tung chhoa kal, ke pahnih leh kut pahnih nei mihringte  hi a lo inan loh theih mang e!

Motor kan chuang thui deuh bawk a, zàna ka mu chu ka mu tui teh asin. Ka harh meuh chuan dâr 7 a lo pèl tawh a, ka inperh tho rang khawp, eirawng ka bâwl nghâl vat vat a, Ruatpuia khân a bâwl lo leh ngei ang a, chaw ei a rawn rawt leh thâwr chuan ka che buai dâwn asin; mahse, ka inpeih fel hnu dâr 8:30 vêlah pawh chuan a la rawn lang lo hrim hrim, ani pawh hi a lo chau ve viau a ni maithei a ni, a rawn kal hun hunah rawn kalin rawn ei mai teh se, kei chu Dozer-a chènna lamah ka kal daih dâwn.

Ka va fang leh thuak thuak a, min lo chhàwntupa ber awm si lo chu a reh ruih maiin ka hria a, a hmun hi nuam êm lo se chuan ka ning ngawt ang; mahse, a hmun mawina leh nawmna hian min hneh êm a, ka ning thei lo mai a ni.

Dár 11 vëlah tûkțhuan ei tùrin Ruatpuia chu a rawn phei ve chharh chharh a, a thawhna pawh a la rei fahran lo tih a mit ațang chuan a lang thei nghe nghe. Chaw ka lo la eisan lo chu mak a ti khawp a, a inthiam lo viau nghe nghe a, amah ang lo takin. Kei erawh chuan a inthlahruna hrehawm a tih zual loh nân zînga thingpui ka in avànga ka ril a țâm vak loh thu chu ka hrilh ve thung a, a ãwih kher ang em chu ka hre lo.

Nizàn lama ruah sùr cherh cherhna hnuhma chu ni lang ut leh sa ter tawr tak chuan a khuh bo hneh viau a, khua a thiangin ni a sa țha vel vawl viau a ni. Phone hmang tùra tlânga han kal a tum thu min hrilh chuan," Han kal tawh, fîmkhur la, kawng kha a nãl maithei a nia," tiin ka chah a, min sàwmna chu ka hnial leh. Mi biak tùr ka nei ve lêm lo bawk a, ka kal ve peih lo a ni. Dozer-a ni se zawng phûr takin ka kal ngei ang.

Tlai lam eirawng bàwl hma si chuan kan kal kual ta thung a, a bula awm peih lo viau anga min sàwmna hnial reng chu ka duh tawh bîk lo va, han kal kual ve hrim hrim pawh ka duh ve rêng rêng a ni. A hmaa ka lo luah tawh Rûn no 3 pawh chu kan pal tlang a, ding deuh datin ka thlîr deuh reng nghe nghe, Dozer-a nèn zàna hlim taka hun kan hmanna tuallai chu ka en kual bawk a, tunah zawng sùlhnu hmuh tùr a awm lo, ruahin a tlèng fai vek tawh a, a them ka hmuh chhun chu Rûn hnuaia thing thuah tùr inrem âm chauh chu a ni tawh.

Kan kal zêl a, pangpár mawi tak tak pâr vul pawh chu ruahin a nan nasat avàngin chuai lam an pan țan tawh a, hmuh an la nuam tho nain chutia an chul mai tùr chu ka ui rilru viau a, ruah chuan nan kher lo se zawng an la vul viau ngei ang le.

"Ngaihtuah ril ang chu!" tia Ruatpuia aw ka hriat tãkah ka suangtuahna ram ațang chuan ka harh chhuak nghâl a," Hêng pangpâr chuai mai tùr hi ka ui a," ka ti ta ringawt a, ani chuan," A dang an rawn vul leh mai dâwn alawm, chuai hun an neih lohte zawngin a dangin vul hun an nei thei bîk nâng," a lo ti thung a, a thil sawi chu a dik fuk fuk riau mai.

"Țawngkam i thiam hlê mai, i lo insûm țhìn a ni maw?" ka tih chuan a lo țhen sak a," Țawngkam thiam leh thiam loh a nih loh chu maw le, thil dik awm sa ka sawi a nih chu," a ti a, kei chuan," Thu dik awm sa hriaa sawi chhuak tùr pawh hian mi eng emaw nih a ngai alawm, mi ril chu i lo nih ngei hi," ka lo ti leh a, a run deuh nge ni, min rawn khawih tumin min rawn hnaih a, ka lo tlãn sawn vat a.

"Ka man hunah che i châk lo ang," a ti a, kei chuan," Mi ril ëm êm pa," ka lo ti leh a, min rawn ûm a, min man theih loh tùrin ka lo tlãn sawn bawk a, chutiang chuan kan inüm kual a, min man teuh deuh lai chuan naupang chhe țè takin ka țê chiam a, min man loh phah, chu chu ka nuih a.

"Chiam chiam a che! Mi dangin i țê thãwm an hria ang a, pâwngsual che ka tumah an lo ngai rêu rêu ang e," a tih phei chuan ka nuih a za zual a, ka nui char char a. Hma lam en pawha kal lo chuan a back zâwngin ka kal a, Ruatpuia min man chu ka duh lo a ni.

Ka inhera a dik zâwnga ka kal chiah tihah min rawn manin ka zakah min rawn kheuh ta zauh a, inher zawkin ka țê țhat mai! Ka tàl nasatzia chu, dèk hi ka ti thei bau lo, ka che thei lo nghâl a ni mai.

"Harh suh, khati záwng phei kha chuan ninhlei hlek suh," tiin ka vau khar khar a, ani erawh a lo nui sûng thung a, a kutzungpir chu min dèk leh tum tih hriat tak hian a rawn ti che valh valh a," Ti miah suh, ti miah suh ang che," ti mawlh mawlhin hma lamah tlàn sawn ka tuma ka inher chiah chu mi ka su bur mai!

"Tih palh lutuk! Ka tih palh tak zet!" tiin ka sutpa chu inthiam lo zet hian ka melh chho a, a hmêl ka hmu zet chu ka ding khawng zui ta reng mai. Dozer-a. Ka rin loh lutuka a hmêl ka hmu chu mak ka ti a ni. Engtik laiin nge a rawn haw? A la châm deuh reng tùrah ka lo ngai asin, a lo haw dâwn a nih chuan min hrilh ve àwm, ka ngai hlê si a. A nu chu a dam tawh tihna a ni ngei ang a; mahse, a hmêl hi a lang chêr deuhin ka hria.

"Dozer..?!!" ka ti sap a, hlim tak hian ka en reng a; mahse, a mit meng rum zeta min rawn en chhuk tih ka hmuh chuan ka hlimna thinlung chu a tawmim nghâl chäih a, nui hauh lo leh khap hauh lova min melh chhuk rùn mai chu thil hmuh nuam a va ni lo chiang tak!

"Ţhianpa, 'Ka tih palh' a tih mawlh mawlh chu maw le! A su lui che a nih loh kha," Ruatpuia chuan rawn kal hnai pah chuan a rawn ti a, hmun dang en lova min melh chhuk rûn avàng chuan kei pawhin ka la melh chho be reng tho. Chutah, Ruatpuia chuan min rawn pawt sawnin Dozer-a áwmah chuan a nam sawk a," Tih palh tih tih tawh pawha khatia kutthlâk châk tak anga i en reng le? Hmeichhia a nih hi, eichhe âwm nêm. Mipa ka awm, i duh chuan ka chungah hian kut thawh rawh, hmeichhia melh rum lovin," a ti chhuak pàwr chhak a.

A ri sawk a, Ruatpuia chu leiah a thal nghâl țhuai mai. "Min cho hauh suh!" thinrim aw sehchilh naka Dozer-a țawng sup chuan min ti harh deuh hlek, ka en reng ringawt a; mahse, ka harh fìm tak tak hmain chak zet hian a pên sawn nghâl pâwk pâwk a, a kal chak kher asin. Thil chu a thleng thut a, a thleng rang teh thut lutuk a, inrin hmanna hun pawh a awm lo. A thlen thut ang chiahin a tàwp leh thut bawk a, a zo nghâl dèr, a reh vawng vawng mai.

*NGILNEIHNA HIAN MAN A NEI LO, SEM CHHUAK CHAR CHAR RAWH*