☆DOZER☆ - 26 By Dingdi Pachuau

☆DOZER☆ - 26 By Dingdi Pachuau

Ruatpuia'n," Min han hnek tlûk chu le! A hnek lah chu a na phian zui a," a rawn tih chuan harh chhuakin a lam ka hawi vat a, a kiua lo indawm dingin a kut lehlamin a khabe chu a lo tuai vut vut a, pan vatin ka pui ta vat a," A na viau ang tiraw? I ding thei em?" ka ti khùr dar dar a, thil a thlen hnu hian a hlauhawmzia ka hre fiah thar chiah a, Dozer-a'n mi kut a thlâk ka hmuh vawi khatna a ni bawk a, chhûngrilah ka țim sung sung ka ti mai, a thin a rim viau a ni ngei mai, a chhan lah ka hre chiang ngang bawk a.

Thisen a chhuak lo va, ha bal a nei lo hlauh bawk, a khabe lawk laia hnek a nih ka ring, nâ a ti viau a ni ang, a tuai a tuai mai a, nakin lawkah phei chuan a dukin ka ring. A pawi ngawt mai, boruak a dik lo ta vek si a, ka thiam loh vek a ni. Dozer-a kha a lo haw dâwn tih ka hre lo hrim hrim a, a la rawn haw hman ka ring lo a ni; mahse, a rawn haw chu a ni si a, a nu chu a zia tawh a ni ngei ang.

Lèn a nawm tawh loh avàng chuan kan lêt ta daih a, Ruatpuia laka ka inthiam loh chu thuhran, Dozer-a lakakah chuan insawi fiah ka ba nasa hlë a ni. Ani tân zawng ka rinhlelhawm nasa dâwn tih ka hre chiang a, a thinrim viau loh pawhin min be duh tawh lo maithei a ni.

"Helaia chawlh rawn hmang ve hi a ni ngei ang chu, a che polite lo tak zet a ni. Hmeichhe chunga kut thlâk mai duh hmêl a pu kha ka ngaithei bau lo, tu nge a nih ka hre chhuak khawp ang!" a ti ngal ngal a, ka bialpa a nih thu han hrilh ka duh viau laiin," Ruatpui, duh tâwk teh! Ka thiam loh a nih kha, a bul ber chu keimah hi ka ni," ka ti ta zâwk a.

"Thiam lohna i nei lo, i su palh a nih kha. Patling pui tawh si, a chêt dàn kha a dik lo hrim hrim, vawi khat tal chu ka hnek ve khawp ang," a lo ti leh khar khar a, tlàwm mai chu a tum hmèl loh khawp mai. Tlangvâl chho mêk, tha za zek zawk lai a ni bawk a, a thil sawi hi àwm lo ka tihpui miah lo, mipa tân chuan a tlàwmthlâk ve dâwn êm asin.

Eirawng ka bâwl nghâl daih a, Ruatpuia pawh ka bulah awm ve rengin a țawng luam reng a. A theih ang angin a khabe chu kan buaipui a, tui vâwtin kan dep a, a țawng duhna erawh a hnek natsak lo tih a hriat, a țawng luam reng tho. A țawng lai chuan ka va en țhìn a, min rawn en ve lêm lo va, a țhen leh sak sak țhìn. Dozer-a hnekna kha a na viau a ni ngei ang, a kut bâwr a lian țha a, a chak tho bawk si a, a na ve thawkhat ang.

Dozer-a hnëna kal chu duh viau mah ila Ruatpuia a awm ve kur sia, bâkah, eirawng bàwl a ngai bawk nèn, ka kal ta ëm lo va, nakinah chaw ei kham lamah ruah a sùr loh chuan ka kal ang, ngaihdam dîl tùr leh thil awm dàn sawi fiah tùrin.

Zanriah kan ei nghâl deuh mai a, Ruatpuia chuan a ei muang khawp mai a, ka thlîthlài ru deuh reng a, a âng zau hlei thei lo niin ka hria. Nâ nei lo ang mai chuan a la țawng peih reng tho a; mahse,  chaw a ei tlêm tih ka hria. Chu vàng tak chuan, chaw ei khama a riahna lama a kal dâwn chuan," Chaw kan ei hma sia, zàn lama i ril a țàm hlauh chuan i bag -ah khân ei tùr a awm țeuh kha aw," ka ti a, ani pawh chu a bu ve nghut a, a kal ta chu ka en zui reng a, a khawngaihthlâk hnù hnù reuh ka ti, keimah vàng vek a ni si a.

Khua a rawn dur leh viau tawh a, a sûr a nih chuan a sûr nasa ngawt ang, arsi pakhat mah a lang tlat lo, thlî pawh a thaw deuh vûk vûk a, thing hnah pawh a chhêm ri sung sung mai. Pâwna ding vang vang pah chuan Dozer-a chènna lam chu ka hawi a, chaw a ei ve tawh ngeiin ka ring a, va kal ila ka va ti buai êm lo'ng chu maw.

Kawngka chu kalh țhain Dozer-a chènna lam pan chuan ka kal ta hlawk hlawk a, ka phone êng chu ka ring mai a, a thim viau nain ka hlau chuang lo. Ruahin min nan hman erawh ka hlau rilru viau thung a, a chhan chu ka riahna Rûn ațangin Dozer-a chènna hi a hla deuh tlat mai a ni. A hmaa ka thlenna nèn kha chuan inang lo tak a ni a, kha Rûn kha chu Rûn awm zawng zawngah Dozer-a chènna nèn a inhnaih ber tlat a ni.

Ruah mal a rawn tla ta seng seng a, ka tlän titih ta ringawt. A hnuah phei chuan ka tlãn ta thlawk thlawk a, ka slipper bun chuan a zir lêm lo bawk nèn, tlàn chak erawh a har kher mai, a hnuah phei chuan ka slipper chu a chat ta țhawt a, ka chhar lawk a, ka tlãn leh ta char char a.

Dozer-a veranda ka thlen chuan ka hah lutuk avàng chuan ka thaw vak vak phawt a, ruah mal a lianin tunah phei chuan a tla tam tawh a, ka lu leh ka thuamhnaw hâk pawh a huh chup mai, êngah chuan slipper chat ka khai lai chu ka en vang vang a, a chah dàn hi a siam țhat leh theih pawhin ka ring lo e a, a hnuaia a bâwk a tla daih alawm.

Ruah a rawn tla tam ta deuh a, ka hah pawh a zia tawh avàngin kawng chu ka kik ta karh karh a, a rûk tak chuan ka inthlahrung ve lutuk, min hawnsak duh loh phei chuan...

"Dozer, kawng min lo hawn teh!" tiin ka ko ta nge nge a, ruah a tlâk tam tawh avàngin kawngka kik rî ringawt chu a hre thei lo ang ka tih vàng a nia; mahse, a beng kha a vâr riau a, a lo hre tho maithei bawk.

Thãwm a awm loh vàng leh kawng min rawn hawnsak loh avàng chuan ka kik uar leh ta deuh a, ka ko pah bawk. Ruah a sùr tam zual tâk avàngin ruah pawhin min rawn theh seng seng phâk tawh a, a nuam lo tak zet a ni.

"Dozer..!! Dozer.... khawngaihin, kawng min ---" kawngkhàr a rawn inhawn tâk avàng chuan ka țawng tàwp chat a, inhmachhawnin kan inmelh ta ràn mai. A nu tlawha a kal chu a hahin a meng rim deuh a ni maithei, a mit hnuai a val dum deuh a, a vun pawh a lang thu deuh tlat, a hmui hmul leh khabe hmul pawh a hma aiin a lo sei leh ta deuh. A nu a enkawlna lamah amah a inngaihtuah thei lo a nih chiah hi. A țawng miah lo va, min melh rum chu ka ti miah lo nain min melh no lo tih erawh ka hmu chiang viau, sawi mai tùr ka hriat loh avàng chuan ka ngawi reng a, chutah, che sawn deuh hlekin ka luh theihna tùrin a che sawn ka ti mai, ke lâwng chuan ka pên lût ta vat a, ka slipper berh vàng leh a chhiat vàng chuan a in chhûnga bun luh te zawng ka inthlahrung ve lutuk.

Inthlahrung ru tak chuan ka ding reng a, ka thuamhnaw a huh hnâwng chup si a, țhutnaah pawh ka țhu ngam lo. Ani chu kal sawnin room-ah a lût zui nghâl a, a rawn chhuah leh chuan towel ni àwm tak hi a rawn keng chhuak a, ka lama a rawn theh avàng chuan ka lo man chat a, ka inhrûkna tùra min pêk a nih ringin ka lu chu ka hru zui nghâl a, ka la hahchhiau chhawk zui, a towel rim vàng chu a ni ang ka ti ringawt. Ka kawr pawh ka hru thuak thuak a, ka kekawr lam erawh ka hru ngam lo, ka tih balhsak vek ang tih ka hlau a ni. Ka inhrûk mawlh mawlh lai chuan ka bulah heater a rawn chhawp a, a on zui nghâl bawk a, ka inhem lum nân a ti a ni ang.

Ruah sûr chuan in chhûngah pawh thãwm a siam bengchheng viau mai a, chu vàng chuan a hriat theih ngei tùra ring hian," Dozer, i ngaih dàn ang khân thil a thleng miah lo a nia, Ruatpuia kha ka bialpa a ni lo, ka sawi fiah vek thei ang," ka ti a, ani erawh chu ka thu sawi hria ang pawhin a awm lo, min rawn en lo va, thuamhnaw ni àwm tak hi a thlep mawlh mawlh reng tho a.

Ka thil sawi chu a hriat tho ka ring; mahse, min ngaihsak duh lo a nih ka ring zâwk. A bulah chuan kal hnaiin," Dozer, i nu chu eng nge a an tawh a? I rawn hawsan daih sia, a țha tawh a ni ang maw? I rawn haw ang tih ngaihna ka lo hre miah lo," ka ti leh mawlh mawlh a. Chuti chung pawh chuan ka țawng hre lo ang hmak leh a bulah ka awm ve a ni tih pawh hre lo ang hmakin a thil tih lai chu a ti mawlh mawlh a.

"Dozer, Ruatpuia kha ka bialpa a ni lo tak zet, Pathian hming chhâl meuhin ka sawi a ni, ka bialpa a ni lo tak tak! Nang nèna kan inkawp reng laiin engtin nge ani kha ka kawpsan theih ang che? A àwm lo lutuk!! Ka hmangaih che alawm," ka  thu sawi ring tùra duh zet hian ka ti leh malh malh a, min âwihsak hma chu ka hrilh reng ang a, zànkhuaa hrilh ngai pawh ni se ka hrilh reng mai ang tih rilru ka pu a ni. A thinrim tih ka hre chiang tawh a, kei chu thinrim ve tùr ka ni lo, dawhthei taka nghâktu leh tlâwm taka dàwrtu tùr ka ni.

Rawn ding chhuakin," Inhru hul la, heater saw âi rawh," a ti nghut a, a thuamhnaw thleh chu lain a room lam a panpui ta daih a, a rûk tak chuan ka hrilh a hai ve reng; mahse, a țawng ve tawh tal a, a zia, a thu pawh chu ka âwih ngei ang.

Heater âi pah chuan ruah sûr thãwm bengchheng zet chu ka ngaithla a, hetia ruah a sùr reng chuan ka haw thei ngút pawhin ka ring lo; mahse, nichînah pawh khân ka innantîr mai a, ka thu sawi ka âwihtîr zet ang a, ruah tlèm deuh hunah ka tlän haw mai a ni ang chu. Ka inâi ro tê të ang a, ka huh leh tâk leh, thuamhnaw ro hâk tùr zawng ka ken ve nual kha.

"Hei hi ha rawh." Engtik laiin nge ka bulah a rawn kal hnaih ka hre miah lo a nih chu. Ka en vat a, a T-shirt ni àwm tak hi ka lamah chuan a rawn theh a; mahse, hâk tumna ka nei lo, huh far dîr tluah tluah pawh ka ni lo va, a ro thuai mai dãwn a ni.

"Dozer, a pawi ka ti tak tak a ni, ka thiam loh vek a nia, min ngaidam hrâm rawh. Ka sawi nawn leh ang, Ruatpuia kha ka bialpa a ni lo, Pu ber fapa niin fapa duat sual a nihna laiah ka rawn kalpui mai a ni. Kan inkârah eng mah a awm lo, kei phei chuan nau ang hialin asin ka en ni," ka ti leh a, ruah súr a bengchheng bawk nèn, ka țawng ring khawp mai, hriat pawh a hre chiang viau ang.

"Ha rawh," a rawn ti ve thung a, a kawr rawn theh kha a kâwk bawk a; mahse, kei chuan," A ngai lo, ka lêt thuai dâwn tho a, hei ka kawr pawh a ro titih tawh tho," ka ti ve tlat a, a lum nuam bawk a, ka ke lam pawh a ro țan tawh.

"Ha rawh, ka thu hnial suh," a ti leh a, a țawng ring ve tho si a, tlêmin ka hlau deuh lek lek. Min vìn chu ka ti ngam chiah lo va; mahse, a la lungawi loh hmèl êm a, a lang hlauhawm thei lek lek, amah ang lo takin a țawng ring ve bawk si a.

"Dozer, khawngaihin.. i țawng ring si a, ka hlau lek lek che a ni. I hmêl leh awm dàn ațangin i chauin i hah tih ka hria a, i rawn thleng chauh a, khatiang thil a thleng kha pawi ka ti tak zet zet a ni, i thinrim tih pawh ka hria, ka dem miah lo che, keima thiam loh vek a nia, ka pawm thlap aw. I thinrim chunga hawsan che ka duh lo, chu vàng chuan, ka sawi nawn leh ang, kha pa nèn khân kan inkârah eng mah a awm lo aw, ka rawn kalpui mai chauh a ni, helai hi ni lo phei se chuan ka rawn kalpui miah lo ang, țanpui che ka duh pah vàng a nia, rawn tlawhtu an tam poh leh i tân a țha tih ka hre thiam ve tho a," ka ti leh a, kei pawh ka țawng ring tho a; mahse, kei chu ka țawngkam a dam a, ani angin a hlauhawm ve loh a ni.

A lan dànah a chau tih a hriat a, mut a hmu tam lo tih pawh a lang reng, mut hma pawh a duh ngei ang. Ni e, zanin khera âwihtîr pawh a ngai chuang lo, naktûk lamah pawh hun ka neih chuan ka hrilh nawn leh mai ang, mu rawh se, mu hmâ se, mut a kham hnêp hnâwp hnuah chuan biak pawh a har lo deuh maithei asin.

"Ka haw ang e, mu hmâ rawh, i chau dâwn si a, naktûkah ka rawn be leh ang che," ka ti leh a, ka tho nghâl a, towel chu dawhkàn chungah ka dah a," Mang țha mut tui, thil thleng kha theihnghilh tum la, tui takin i muhìl thei ang, ka kal ang e," ka ti a, kawngka lam ka pan zui nghâl a; mahse, kawngkapui ka thleng chiah tihah hnung lam ațang chuan min rawn pawt lêt nghâl dâwrh a, min kuah zui nghâl bawk a.

"I duh chauh sawiin min hawsan tum suh."  Ka beng bul maia țawng a nih vàngin țawng ring chiam lo mah se ka hre chiang ngang mai, ka din ngai chuan dingin min kuah ang chuan ka awm tawp a; mahse," I țawng ve duh si lo va, hawsan mai che kha a țhain ka hria a ni," ka ti thung a; ani chuan," Min hmangaih tih thu kha sawi leh rawh," a ti ve leh a.

"Ka hmangaih che, Dozer," ka ti leh mai a, ka sawi zak lo, zah hun pawh a ni hek lo, a hretu tùr tak hian hria se a țha ber alawm, tlangvâl dang hmangaih ka nei lo, amah chauh hi ka hmangaih chu a ni.

"Zanin chu ka kiangah riak ang che," tiin min pawm kãng nawlh a, mei lum lam chu min panpui leh nghâl a,   a mal chunga min țhuttîrin," I kawr hi thlâk rawh le," a ti leh a, a T-shirt chu min pe a, hnial ka tum lo; mahse, a hmuh laia inphelh erawh ka tum bík lo thung.

"Ka bula i awmin engtin nge ka inthlâk theih ang? Kal sawn rih rawh," ka ti a, thinrim ngút ang kha a nih tawh loh avàng chuan ka rilru a nuam leh deuh tawh a, ka thil sawi kha a ring ve țan tawh a ni ngei ang.

A kal sawn zui ve mai a, ka inphelh nghâl sawk sawk a, a kawr ka thàwl reuh sizia chu, ka khûp chung deuh thlenga fual nijn a bân pawh a lian țha khawp mai; mahse, hâk a nuam viau thung, ka kekawr pawh ka hlîp nghâl daih a, hnung lam phei chu berh deuh hlek hlek a lo kai a, ka zial hlãwm tawp tawp ringawt.

Ka bula a rawn kal leh chuan," Dozer, min hre thiamin ka thu sawi kha i âwih tawh tiraw?" ka lo ti leh a, ani chuan," Mutnaah min hrilh fiah leh chu a la ngai hlek ang," a ti ve mai a, kei hi ka riak tak tak dâwn tihna em ni? Ka thei lo ang. Ani nèna han riah dun ngawt chu, châk viau mah ila a fuh ber lo ang, thil țha pawh a ni lo, kan che dik lo mai mai ang e...

Ruah a sùr duh ëm avàng chuan haw pawh a theih loh, a bun tlãwrh tläwrh mai a. Haw tum tak tak ta ang ni ila a huphurhawm ngawt ang, ka huh hneh dâwn lutuk a, chhûng chhûngin kan huh vek ngei ang.

Kawngka a kalh țha a, Heater chu a off leh sauh sauh a, êng a tih thim țhen hnuah min rawn pawm nawlh a, a nghâwngah ka lo kuah ve vat bawk a, a room lam min panpui ta. Ani hi, khuma min nghah teh hlauh chuan aw... ka ke a la bàl a, bâkah, ka ha ka la nâwt fai lo va, ka hmai pawh ka la phih fai hek lo, inti fai lova mut ngawt ka thei hleinem.

"Dozer, ka ke a bàl a nia, intih fai phawt ka duh," ka ti a, ani pawh chuan a room chhuatah min nghat ve ta mai bawk a. Bathroom-ah min luhpuiin toothbrush thar hlak min pe a, chapal lian zet mai hi ka bun atân min pe bawk a, a lian țha mai mai asin, ka thâwl khawp mai. Ha a nawh zawhah a chhuak ta vat a, kei ka inti fai ve thung a.

Khumah a lo mu tawh a, ka mut nân a thol sin chu a lo keu kau a, zak duh lovin ka inthawlh ve vat a, min lo kuah zui zat a," Helam hawiin mu rawh," a ti zui leh sup a, a thu âwih takin ka inlet ve nghâl a, a hma ang chiahin min kuah leh a," Țawng tawh lovin mut tùr," a ti leh nghut a, a thu âwih chu duh viau mah ila țawng hrâm erawh ka la duh asin.

"Dozer---"

"Țawng lo ang, ka chau a nia," a tih tâkah chuan ka ngawi ta hmak a, ka chalah a fâwp vang vang a, ka hlim ta siah mai. Ka chal a hmuia dek reng chuan kan awm reng a, a hnu deuha min kuahna bân thâ a dul deuh tâkah chuan a muhìl a nih ka ring, a chau tawngkhawng tak zet a nih chiah hi, muhìl bawrh bawrh teh se. Ruah a súr reng bawk si a, ka mut hun ni miah lo mah se Dozer-a lumna chuan min uap a, mut chhuak a rawn kal ve chawpchilh mai bawk nèn, tui tak chuan ka muhìl ve ta thuai a.

Ka hmaia mi zartu a awm avàng chuan chiang lo ruai hian ka han meng a, ka kut chuan ka dap zui nghâl bawk a, kut ka tawh fuh tâkah chuan men chian tumin ka khsp fak fak a, Dozer-a'n a kiu lehlama inbeng kãng chunga min lo en reng ka hmuh chuan ka hre thiam lawk lo va, ka mit chu ka han nuai a, ka mumang emaw ka ti pah bawk a; mahse," Good Morning," tia a rawn țawng chhuah tâkah chuan ka mumang ni lovin a tak ngei a ni tih ka hre thiam ta chiah.

"Morning; mahse, ka la tho peih rih lo a nia, a nuam êm mai," tiin ka invúr țha sauh sauh a, ka mit ka chhîng zui leh zat bawk. A nui deuh hawk ri chu ka hria a, kei pawh ka nui ve sak tho. A thinrim tawh lo a ni ngei ang, chu chuan min ti hah dam seng seng thei hialin ka hria. 

Ka lo muhìl leh chu niin, ka harh leh chuan Dozer-a a awm tawh lo va, ka nui deuh sak a; mahse, nimin lama thil thleng leh Ruatpuia hre chhuakin ka inperh tho zawk mai, khum bul dawhkàna no tung ét útah chuan coffee tui hmèl zet hi a lo awm reng tawh a, Dozer-a'n ka in atân a dah a ni ngei ang chu.

Ka kawr hâk ka inen chuan ka nuih a za ru viau a, Dozer-a'n a ha ve țhìn awm si a tih ka ngaihtuah a, a rim chu ka han hnìm a; mahse, ka rim a lo nam tawh thung. A mutna lamah chuan mu thlain a rim chu ka han hnìm chhin a, Dozer-a rim a lo nam tak tak a! Ka hnìm vang vang mai.

"Eng nge i tih?" ti ri ka hriat chuan ka en chuang lo," I rim ka lo hnìm a," tiin ka chhâng a, thawh ka tum lai tak chuan min rawn bawh thluin a rizai chuan min tuam  a, min lumtîr bawk a, chutah, min chawi kãng ta lawp a, rizaia roll ka nih vàng chuan ka che thei lo va, nuih erawh ka nui hak hak thung a.

Coffee ka in zawha ka inphih fai hnuah ka awmna lamah phei ka tum a, Dozer-a ka hrilh chuan," Min hmangaih thu min hrilh vàng chauh tak takin min bengdài thei a nih kha, mipa dang rêng rêng hnaih che ka phal lo va, an bula hlim taka nui tùr pawhin ka phal lo che, i hria tiraw?" tiin chiang kêk kâwk hian min hrilh a, ka lu ka lo bu nghat nghat a.

"Aw le, ka hria e; mahse, tuna mi hi chu ka rawn kalpui a ni sia, nang nèn pawh in la inhmu leh ngei dáwn si a, insûm hrâm hrâm rawh aw, kan awm rei lo ang. I fel êm kha, ka ring tlat che a nia. Chuan, buaina awm tawh suh se aw," ka ti a. Min chhâng lêm lo. Ka kawr kha a lo hem ro vek a, ka kekawr pawh a bàl lai brush-a khuih faiin a lo ti ro bawk a, ka slipper ni se lo sil faiin a chhe lam chu a lo siam țha hman vek bawk a,  thiam loh pawh hi a nei lo a ni ang, mi rin tlâk hi chu a va ni chiang êm!

*HLIMNA TAK TAK HI CHU CHHÛNGRIL LAMAH A AWM A, CHUTA ȚANGA RAWN CHHUAK CHUAN RAH ȚHA A RAWN CHHUAH ȚHÌN*