☆DOZER☆ - 27 By Dingdi Pachuau

☆DOZER☆ - 27 By Dingdi Pachuau

Ka thlenna Rûn ka thlen hma hret chuan kawta Ruatpuia lo ding chu ka hmu nghâl a. He pa hi, tunah dâr dár sarih chauh a la nia, hetiang hunah hian a la tho chhuak ngai lo asin!! Hotel-a a lo thlen țhin lai pawh khân zîng dâr sàwm kha a thawh dàn tlângpui a ni sia, tukin kher hi, engtizia nge maw ni?!!

"Khawnge i awm daih a? I walk a ni maw?" min rawn hmuh veleh chuan a rawn ti a, pângngai thei ang ber tùra aw thununin," Aw... I va tho hma ve! Eng nge ni ta?" ka ti ve thung a, tûkțhuan ei nán a la hma viau si a, tûn ang huna hmuh hi ka inbeisei lo êm a ni.

"Zankhuain muhìl thei lovin thil thleng kha ka ngaihtuah a, kha pa kha zawn chhuah ka duh a ni, vawi khat tal hnek ve ka duh hrim hrim! A polite loh vàng tal pawh khân,"  a rawn ti ta daih a, kei chuan," I muhìl thei lo chu a zia lo hlê mai!! I khabe chu a la na viau em? Hawh, lo lût la," tiin in Rûn chhûnga lût tùr chuan ka sâwm zui nghâl a.

Ruatpuia hi mipa angin ka en lo va, nau mipa angin ka en záwk a ni. Kei aiin sâng fê mah se a naupang zâwk miau a, ka nau en lo thei lo. Bâkah, a nungchang hi ti deuh phawr phawr mah se ka chungah phei chuan a sual miah lo tih ka hre chiang tawh a, ka nél viau tawh rêng a ni.

Eirawng ka bàwl laiin țhutthlèngah a lo muhìl daih a, a ke a tlâwn zuar si a, a lan dàn chu a nuihzatthlâk ru tawp. Ka kài tho duh lo va, a duh tâwka reiin muhìl se, a khabe nâ pawh a zia deuh thei ang chu. Ka han nghâk ve rèn ráwn a; mahse, a mut tui hmèl êm avàng chuan kai tho lovin chaw chu ka eisan ta daih a.

A harh har si a, youtube lama dah tùr video ka duh si avàngin lehkha themah thil ka ziak a, a lo harh huna a hmuh ngei tùr laiah ka dah a, ka chhuahsan zui ta nghâl a, Dozer-a va tlawh duh viau mah ila lui lamah ka kal ta rih a, ani zawng nakinah ka la hmu leh ang chu.

He hmun tlawh ve tho mi dangte pawh ka hmu ve a, kan inbe lêm lo. Lui ka thleng a, ka duh tâwka video-a ka lâk hnuah khua a rawn dur leh deuh avàng chuan ka lêt ta daih a, haw kawng chu video-in ka la kual a, pangpâr pawh a pâr nalh zual chu ka capture zuai zuai bawk a.

Kawtah Ruatpuia a lo ding leh vàng tawh a, min lo hmuh veleh," I chahbi dahna mai tùr ka hre lo va," a lo ti vat a, a harhna a rei tawh leh tawh loh leh chaw a ei em tihte chu ka zâwt nghâl a, ani chuan a lo ei ve tawh a, a harhna pawh a rei ve deuh a, a harh hawk tawh tih thute min hrilh chuan ka nui sak a.

"A làwmawm hlê mai, inbual la, i harh lehzual ngeiin ka ring," ka ti a, ani chuan," Ni e; mahse, ka inbual hmain kha pa kha ka zawng phawt dâwn, i chunga hawihhàwmna a lantîr lo lutuk kha ka thin a la rim tàwp thei lo," a lo ti thung a.

"A, theihnghilh daih tum rawh, a ho êm mai, phuba lâk tum zawng a țha ngai lo ve," ka lo ti vat a, ani erawh chuan," Min hnek kha chu nâ ti tho mah ila ka tuar thei; mahse, a polite lo lutuk ber kha, hmeichhia i nia, kei chu engtin pawn min lo ti rawh se, a zah loh lutukna che a thinlung chapo tak kha hnek sawk ka duh a ni," a ti nghat nghat a, inhrosain a han inhûm sek vêl a, ka hmui ka lo pet fan fan a, nuam lo chu ka ti ve reng.

A hnu deuhah erawh chuan," Ruatpui, a chapo vàng ni lovin thîkthu vàng a nih kha, hre thiam hrâm rawh, heta kan awm chhûng hi chuan buaina ka duh tawh miah lo a nia, insûm hrâm hrâm la aw, i fel kha," ka ti chhuak ta nge nge a, ani lah chuan hre thiam lo zet hian," Engah nge thîkthu vàngin min hnek ngawt a?!! Kha pa kha i hriat zâwng em ni?" a ti ta hû a, inthiam lo ru angreng tak leh muangchâng hian," Hria e, ka bialpa a nih kha," ka ti chhuak ta nge nge a.

*******

"Min zinsan daih a, i sawi bawk si lo," vui awka taka Zela'n a tih chuan," Ni ngawt mai, ka thiam loh a ni," ka ti ve a, ani chuan," I zin dâwnte chuan sawi ve tùr hi a nia, kan rawn lêng a, i nutei kan rawn rîm a ni ringawt alawm, i patea a zahawm duh khawp mai," nui hmël pu deuh chung chuan a ti leh a. 

"A lo nih tak chu a, a hlimawm dáwn chu! Ngawi teh, ka zâwt chhin teh ang che, nang pawh hian i zin dâwnah zin i tum thu min hrilh ve tawh em?" ka han ti a, ka nui duh miah lo. Ani chuan," Chimawm thiam ve zêk reuh lehnghâl a! Hrilh mai mai lo, chutiang zêl hrilh i ngai em ni?" a lo ti a, kei chuan," Kan in-draw tihna," ti fuh inti zet hian ka lo ti vat a, ka nuih zui bawk a, a dang deuh dèr thei 

Ka youtube video pawhin en a hlawh chho zêl a, a entuteah hna thawh chu a lo nei ve ngei a ni ang chu, Dozer-a nèn kan inbiakin mikhual a ngah thu, Rûn zawng zawng a full thu leh September thla phei chu hauh vek a nih tawh thu a rawn sawi a, a aw chhuak chu a zãngkhai ve viau bawk a, ka lawmpui khawp mai; mahse, dik tak chuan a buai a zual dâwn tihna a nia, ka khawngaih bâkah kan inhmu lawk thei dâwn lo tihna. Mikhual a neih vak loh chuan a tân rawn zin thut pawh a harsa lo deuh thei a; mahse, mikhual an tam chuan rawn zin ngaihna a awm lo a ni. Mikhual nei țeuh tùra ka duhsak rualin nei țeuh lo se ka ti deuh tho bawk a, ka rilru hi hria se min ngei àwm mang e!

Ruatpuia pawh hotel ațangin an in lamah a haw tawh a; mahse, ni tin a rawn lang ve tawh tho. A pain a ai enkawltîr a tum vàng a ni, min hrilh dànin. Nakin lawka kan pu ni mai tùr anga ka ngaihtuah chuan ka nuih a zâ a, mahni aia naupang han 'pù' tlat chu a nuam vak lo maithei; mahse, 'Pu' a duh kher pawhin ka ring lo.

Phaizâwla Ruatpuia ka kalpui ațang khân ka thawhpuite mi en dàn hi a dang ta vekin ka hria! A hma kha chuan kan inbe bawrh bawrh a, kan nuiho a, thil kan eiho dial dial a; mahse, kan zin haw hnu ațang kha chuan min be tho nain min en dàn a dik lo ka ti mai, an mit meng ațangin min 'eng emawtute' hi chu mi ä nilêng lo tân chuan a hriat theih ve tho hi, kei pawhin ka hriain ka hmu thiam ve vek tho a, nuam lo ka ti ru angreng khawp mai; mahse, ka biak dàn ngai rengin kei chuan ka be vek tho a, min hlat ta deuh riau hlawm erawh hai der luih a har ka ti. 

Ka hriatna chhan pawh toilet ațanga ka chhuah dâwnin hmeichhe pahnih ni ngei tùr țawng làng lâng rî ka hria a, ka hming ni àwm tak lam rîkte ka hriat avàngin ka chhuak tùr pawh chu ka tàwi ta rih a, an țawng lo ngaihthlâk rûk chu mawi lo ti viau mah ila an thil sawi ka hre châk tlat miau si a, thaw țha ngam lova ka ngaihthlâk lai chuan pakhat chuan," ------ lo teh, a hriat theih vek alawm, a lo hetih vàng chiah hi a nia Ruatpuia pawh kha a lo tlawn êm êm, hotu ber a ni dâwn tih a hriat vàng chiah chiah a ni! Min en dàn vêl pawh hi min hnuai en țan tlat tawh hi maw," a ti a, tui herh haw riin a zui nghâl a, a aw ațangin Debbie a ni tih ka hria.

Pakhat ve thung chuan," An han zin dùn ngei bawk a! Amah zâwk hian a thlêm a nih ka ring, an mu dùn tawh ngei ngei bawk ang, zin dùn hial tawh chu an mu dùn dáwn tih hriat sa. En teh, an sawi dàn chuan nu leh pa bulah pawh awm lovin hmun dangah a têt tê ațangin a awm a, nu leh pa hmuh phâkah awm hek lo, a che ngap viauin ka ring nghe nghe asin," a ti ve leh a, a aw ațang chuan tu nge tih ka man thei mai lo thung.

"Loh theih loh! Tunah hi chuan a la inthup deuh mai mai a nih ka ring, Ruatpuia hi a zùna a uaitîr hnêp hnâwp hnuah chuan a nungchang dik tak chu a lang chhuak tawh ngei ang, nui hmêl lah hi a pu sâwng reng a, chan țha chang inti fahranin," Debbie chuan a ti leh a, ka hmui chu ka lo pet fan fan a. An thil sawi chu mak ka ti tak zet a ni, hetiang hi min hmuh dàn chu a lo ni si a, mak ka ti a, râpthlâk ka ti bawk.

Ruatpuia ni tin deuhthaw kan hmu țhìn bawk nèn, thawhpuite thil sawi ka hriat hnu ațang phei chuan hmuh ka'n hreh deuh ta ringawt a, ka hêl rûk phah hial nghe nghe a ni. Ani lah chuan boruak awm dàn hre ve hek lo le, ka hël ru hrâm hrâm a ni tih hre hauh lo chuan eng emaw hlekah min rawn ko kher zêl bawk si nèn, thawhpuite lakah inthlahrun a va na duh tak! Kan awm dun hnuah mi dang hriat loh tùr chuan min ko ve ziah tawh lo tùr chuan ka'n ngèn teh ngawt a! Ani lah chuan," Hna ka thawh tak tak huna ka rin pui ber tùr  i nia, thil kal dàn hi lo hre lâwk dîm diam la ka duh alawm," a lo ti mai thung a. Ani bula thawhpuite min sawi dàn lah chu sawi chi a ni mang bawk si lo, hëk ka ni ringawt dâwn si a, ka ngawi leh nge nge țhìn.

Dozer-a ka ngaih a zual a, a buai lai a nih bâkah ruah a sûr duh a, kan inbe khât deuh bawk nèn, ka ngai tak zet a ni. Rilru nuam lo leh tâwt taka hna thawh ai chuan chawlh lain zin daih ila tihte ka ngaihtuah a, ani a rawn zin hman tawh si lo va, kei hian ka va țháwng thut záwk mai dáwn em ni ang ka ti deuh thut thut a; mahse, thawhpuite min sawi dàn leh en dàn vàng ringawta chutia han awm pawh chu, a rilru puitlin lohthlâk ka ti ve bawk si, naupang chhia ka ni tawh lo va, min sawina mai mai leh min en dàn chuan min ti nâ thei lo va, hai der lui zâwk tlat tùr leh țha taka a hma anga thawk chho zêl tùr chuan ka infuih leh sauh sauh țhìn bawk.

Henry-a a rawn haw chho tawh a, a rawn riah ka ring deuh kha a nia, a țhianpate inah riakin a tûkah a phei leh nghâl daih si a, kan inhmu ta lo a ni. Chawlh chu nei ve ila va haw phei lawk pawh a châkawm ve reng, Henry-a ka hmuh lohna pawh a rei ve tawh a. Ka pa pawhin min rawn biakin," Hman la chuan rawn haw ve lawk la țha tùr a nia, i nau a rawn haw chho ve bawk nèn," a rawn ti nghe nghe a. Ni e, chawlh neih chu a châkawm, chawlh tam tâwk nei ila, Phaizawl lamah liam leh daih ila ka ti asin.

Chhùn lamah thawhpuite melh deuh hrek hrek leh min sawina hre zauh zauh mah ila tlaia Dozer-a nèn kan inbiak hi chuan chhùn lama thil thlengte chu ka hrechang leh tawh țhìn lo. Tlai khat erawh kan inbia chu ka ngaih thu ka hrilh malh malh lai chuan ka mittui hi a rawn far ta zung zung mai a, ka tum rêng vàng pawh a ni miah lo. Ka ngai êm mai a, chu vàng chu a nih ka ring.

"Ka naute, thil dik lo a awm em?" a rawn ti ta chiah a, ka hnâr a ping deuh sia, phat mar dàn ka hre lo viau mai a," Ka ngai êm mai che," ka ti ringawt a, țawng pawh ka țawng thui duh lo, ka aw ațangin a rawn hre chiang zual ang tih ka hlau a ni.

"Ka rawn tlawh zawk dâwn che em ni ang?" a rawn tih chuan," A ngai lo, i buai êm kha," ka lo ti thung a, ka rilru takah erawh chuan rawn kal se inhmu ila engkim theihnghilha a áwm nghènga thlamuang taka awm ka châk. A bulah chuan thil dang ka mamawh lo va, ka hlim țhin bâkah ka himin ka thla a muang țhìn a nih kha. 

Zànah Benson-a amah chauhin a lo lêng ve nawlh a, ka hmuh lohna a rei ve deuh a, a lang chêr deuh hlek em aw ka ti hial mai. Ka patea'n a lo chiauau hmasa phawt a, ka va fin ve meuh chuan an lo titi tui hman tawh viau. Ka fin ve tâkah chuan ka patea pawh chu a inthiarfihlîm ta thuai a.

"I dam țha em? I lang chêr deuh tlata ka hriat chu," tia ka zawh chuan ani chuan," Aw, tunah chuan ka zia tawh, ka damlo ve deuh reng a," a rawn ti a, inthiam lo ru deuh tak chuan," A va zia lo ve aw!! Ka lo hre miah lo lehnghâl a, i dam tawh chu a làwmawm e," ka lo ti vat a. Ani chuan," A, kan inhlat êm a, chanchin inhriat pawh tawn a har ve êm a ni," a ti ve thung a, chutiang chuan sawi mah se ka bengvâr lo lutuk chu a rûkin ka zak a ni.

Mi dang an awm lêm lo bawk a, amah zâwk chuan kan nunhluite a rawn sawi chhuak a, ka ngaihdam avànga a làwm thu sawiin bialpa ka nei leh ta chu min lawmpui thute min hrilh a, mak ka ti ru kher asin. Zela hi chuan min fiam peih a, min fem zuk zuk fo, chiang takin ka hrilh chuang lo va. Ani Zela pawh ka hrilh loh laia Benson-a'n a lo hre daih chu mak ka ti lo thei lo. Rei tak a lêng hran lo va, kan inkârah eng mah a awm tawh lo bawk a, a lèn chhûng pawhin inpawh takin kan titi ve thei tawh a ni.

Ka hna hi thawh mawp mawpa zo duak thei ang chi ni se ka ti țhìn, lo ni se chuan ka thawk mawp mawp ang a, rilruah thil dang ngaihtuah lovin ka thawk zo thuai ang; mahse, chutianga thawh theih chu a ni bawk si lo va, chu tak chu buaithlâk ka ti a ni. Rilru a kal ding duh si a, hna thawh chiam theih ni bawk si lo chu ngaihtuah loh tùr ka ngaihtuah leh țhìn a, thawhpuite mitmei ka lo hmu ve tho bawk nèn, hlim taka nui sânga mi chiauau pawh har ka ti ru ve tawh viau a ni.

Mahse, bàn hnua pâwna Dozer-a ka hmuh chuan pan vatin ka rilru a hlim leh nghâl sar mai. Dozer-a hmêl hian ka rilru hrehawmna zawng zawng min len bosak vek a, tunah chuan ka hna thawhnaa ka rilru nawm lohna pawh ka hrechang tawh lo rêng a ni.

"I lo kal tak tak maw?!!" tiin min hmutu an lo awm leh awm loh pawh ngaihtuah chang lo chuan ka kuah a, a âwmah ka hmai ka phûm a, a rim pawh ka hre nghâl vang vang mai. He rim hi ka ngai, a rim tui ka ti a, engtiklai pawhin hre thei ila ka ti.

"Min ngai si a," a rawn tih sup chuan," A dik chiah, ka ngaihzia che hi, ka ngaih a țha lo lek lek hial asin," tiin ka chhâng a, a âwmah ka hmai ka la phûm reng tho. Heti hian ka dam a, ka rilru a nuam a, eng mah ka mamawh lo a ni.

A hnua chawlhpui ka sawi chuan," A ngai lo, in inah ka rawn thleng dâwn a, haw nghâl ang," a ti ve thung a, en hauin," A ni maw?!! A va nuam dâwn tak! Chuti, haw thuai ang," ka ti vat vat a, ka scooty-a phurh duh hek lo, two- wheeler taxi a la a, in lam pan chuan kan tlãn ta vang vang a.

Hlim taka in chhûng kan luh chuan ka patea leh ka pa chuan min lo en reng niin, ka pa ka hmu thut chu mak ka ti a, ka ding deuh chawt nghe nghe! A chhan chu Dozer-a kutah chuan ka kai a, nui sûngin ka lût bawk si a, ka pain min lo en reng avàng chuan Dozer-a kut pawh ka thlah riai riai phah a ni. Ka zah vàng a ni lo va, ka pa lakah ka zahpui vàng tihna pawh a ni hek lo, ka pa mitin Dozer-a kuta ka kai min rawn hmuh chian êm vàng a ni.

*I NUNA HARSATNA I TAWH, I PAL TLANGTE TAWHTE KHÂN TÛNA I NIHNAAH KHÂN AN CHHER CHHUAKIN AN CHHER HRIAM CHE ASIN, ÀNCHHIA LAWH MAI LOVIN LÀWM THU SAWI NÂN HMANG ZÂWK RAWH, TI CHAKTU CHE AN NIH KHA*