☆DOZER☆ - 28 By Dingdi Pachuau

☆DOZER☆ - 28 By Dingdi Pachuau

Eng nge maw a rawn tih dâwn ni? Min rawn hmu tùrin leh min rawn kan ve tùr hrim hrimin a rawn kal ve a ni mial maithei a ni, a ni ngei ang, ni ve mawlh teh se.

"E, Dozer-a chu, i lo kal a ni maw? Vawiinah em ni? I dam țha maw? Inhmuh a va khât ve!" ka patea'n Dozer-a a hmuh chuan a lo ti vat a, kan boruak awm dàn tùr chu a lo man thiam a ni ang, kan inkai kha a lo hmu ve tho si a.

"Aw, vawiinah ni e, ka dam țha e, in lo dam țha zâwk maw?" Dozer-a chuan a ti lêt ve a, ka patea chuan," Dam țha e, i rawn kal deuh mai mai em ni? Lo thleng hlim hlawt mah ni ula, Teruat, thingpui i siam mai loh chuan Dozer-a pawh a rilțâm ang. I pa nèn pawh kan lo duh ve leh ang e," a ti leh a, kei chuan ka pa chu enin," Eng nge i lo tih dâwn a, ka pa?" ka ti ve leh a, ka rin loh deuhin ka hmu thut sia, han biak mai dàn tùr ka haihchham deuh a ni.

"Office lamah hna pawimawh tih tùr ka nei a," a lo ti a, ka lo ngaihtuah nèn chuan a inpèrsan hlê mai maw; mahse, a țha vek tho e! Thingpui siam tùr chuan ka kal nghâl a, ka patea'n Dozer-a a be zui luam chu ka hre zui a, an thil sawi lam erawh ngaihtuah lêm lo chuan ka pa rilru tùr àwm chu ka ngaihtuah daih a, kan inkài kha a hmu chiang si a,  Dozer-a chu ka bialpa a ni tih a ringin a hre ngei ang le; mahse, hria pawh ni se a pawi chuang hleinem. Ngaihzáwng nei rual mai pawh sawi loh, pasal nei rual pawh ka ni tawh hial zâwk alawm le, ka la ngaihtuah ngai lo mai pawh a.

Ka pa bulah chuan 'ka bialpa' tiin ka hrilh lo, min zâwt lêm lo bawk a. Chaw ei kham ațangin ka patea nèn chuan eng eng emaw an sawi a, ka nutei leh Dozer-a nèn kan pathumin kan titi ve thung a, kan titi ti ila ka nutei chu a țawng deuh char char ti ila a dik ang, ka lo inrawlh ve zauh zauh, Dozer-a chu a țawng ve mang lo.

Duh angin inkàwm fâl thei lo mah ila a hmêl ka hmu a, ka ngaih vàngin min hmu tùrin a rawn kal vang vang a, ka lãwm táwk êm êm a ni. Min ngaihsaktu leh min dah pawimawhtu, min duh ve êm êmtu leh amah ka thlâkhlelh ang thoa min thlahleltu bialpa ka nei hi ka lãwm a, a kum lo upa deuhin kan kum inthlau deuh mah se chu chuan pakhat tê mahin min duh lohtîr phah chuang lo, tleirâwl tê tê leh ka kum rualpuite aiin ka mit a la daih zâwk bawk!

A hnua ka patea'n min hrilh leh dànin," I pa khân Dozer-a kha kan hmêl hriat, nupui fanau nei tawh, hmun dang ațanga lo zin ve mai mai emaw a ti a, chîk deuh zâwka min zawh khân zëp nei lovin i bialpa a nih thu ka hrilh a, mak a ti viau asin. Nang hi chuan i hrilh lo tawp ang tih ka rin vànga hrilh ta tawp ka ni, bâkah, a hriat kha a sual lo va, hre tùr tak zâwk a ni nghe nghe. A duhpui che leh a duhpui loh che thu pawh a sawi chuang lo, mak chu a ti ve viau chuan ka hre thung. A sawi awmchhun chu 'A lu meh duh dàn saw ka ngaina lo' tih chauh a ni, kei erawh chuan a lan dàn ațang ringawta teh lo tùrin ka hrilh ve thung a," tiin. Ka patea hi chu aw, fel hi ka va ti țhìn tak! Engati nge heti êm êma ka pa nèn hian an inan loh theih le ka ti rilru vawng vawng a ni. Ka pain Dozer-a lu tih dàn a ngaina lo chu ka hre thiam viau a, mi tam zâwk pawhin an ngaina hran lo ang, pâwn lam lan dànah Mizote phei hi chu kan la buai nasa mai si a. Páwn lam lan dàna kan buai ang hian a pawimawh zâwk chhûngril lamte hi buaipui ta zâwk ila... Ni e, amah hre chiang lo tân zawng, hetia en ngawt ațang hi chuan an teh dik thei ngai lo ang. A páwn lam lan dàn ațang zawngin mi awm țha duh lo leh sual ru tak, mahni induh ve leh inla ve ngalh, chapo ve tâwk tâk hmuhin an hmu thei ang a; mahse, chu chu a dik dâwn hauh si lo.

Dozer-a zàn khat chauh a riak a, a haw leh nghâl a, ka pa erawh office a dàwr avàngin a tûklehah a haw ta kha a nia. Ka pa ai chuan Dozer-a ka ngai daih zãwk, a haw hma zâwk kha pawi ka ti lo va, a buai dáwn bâkah zàn dang a riah ve leh hlauh chuan ka nutei'n ka pa emaw Dozer-a emaw kha haw a phal rih dâwn lo tlat. 'Ni khat thil thuah in khat ațangin chhim leh hmàr zâwngin ințhen a țha ngai lo' tiin a ngaih a țha lo leh tlat dâwn a ni. Puithùna lam hi ka ngai serious ve lo khawp mai a, Kristian niha Krista ringtu nih chuan ngaihțhat lohna tùr ka hre ve lo a ni ber ang chu.

Thawhpuite min sawina hre zauh zauh chungin eng mah hre lo ang maiin ka ni tin hun chu ka hmang chho ve zêl a, hun a rei ang a, min rinhlelhna ang hi a thleng ngai lo ang tiin ka ngaihtuah a ni; mahse, a châng chuan hrehawm chu ka ti ve tho, min ngaithei vak loin min sawi reng a ni tih hre chunga boruak țha tak awm anga hna thawh chu a rûk tak chuan har tih châng ka ngah ve alawm, a langah erawh hlim hmêl ka pu lui hrâm hrâm thung a. Ngaih hoh deuh châng ka nei a, 'Ho mai mai, thu dik pawh ni hlei lo, hetiang vànga rilru hrehawmtîr mai mai' tiin ka ngaihtuah a, ka han insang mar a, phûr tak leh rilrua min sawina lam rêng rêng ngaihtuah duh miah lovin ka awm a; phùr miah loh châng ka neih erawh chuan chawlh lâk maite ka ngaihtuah thleng rum rum mai thung a; mahse, chu êm zawng a la thleng rih lo chu a nia, ka rilru hi ropui lo deuh hian a insual nasa ve țhìn hlê a ni.

Zirtàwpnîah chuan ka bâng hma deuh a, Ruatpuia'n min biak duh thu a sawi vàngin a ni pakhat a, phone-ah min biain min hrilh mai se ka tih laiin ani erawh chuan," Phone-a sawi mai mai chi a ni lo, hlauthãwng duh suh, hna lam chungchâng a ni e," a ti deuh thlap bawk si a, pawimawh ve riaua ka hriat vàngin ka hnial duh ta lo a ni.

Thawhpuite'n min hmuh palha min sawi zui leh ka duh loh vàngin kan hotel ațanga hla ve deuh hlek, hmun nuam leh changkãng ve tâwk takah inhmuh ka rawt a, thil ei paha thil min sawipui a duh vàng a nia. Ani aiin ka thleng hmasa zâwk nghe nghe a; mahse, a rawn thleng har chuang lo.

Ei tùr kan order phawt a, chumi hnuah hna chungchâng chu a rawn sawi ta chauh a, a sawi dàn chuan manager-ah țang tùrin min duh a, tuna ka hna thawh lai ai hian ka ãwl deuhin ka hahdam deuhin a ring ve a ni. 

"I hahdam deuh zâwk ngei ka ring a, bâkah, tuna thawk lai mêk hian bàn a tum deuh a, a nupuite khaw lamah dàwr lian ve tâwk tâk an sa a ni àwm a, chu chu enkawl a tum a ni. A bàn dâwn rau rau chuan mi thar hlak lâk aiin nangmah hian hnawh khat mai la ka ti a; nang aia he hna tlin tùr chuang hi ka hre bîk lo a ni. Ka rin ngam, rin tlâk ve tâwk tak ka duh tel bawk si a," a tih chuan ka ngawi vang vang reng phawt a, chu vàng chuan a ngaih a țha chiah lo deuh nge ni," A chhànna tunah ka hre duh nghâl ka ti pawh a ni lo a nia, lo inngaihtuah rih la, nawr che ka duh loh viau laiin min pawmsak ngei la chu ka ti a ni," a ti leh a.

"I sawi ang deuhin nia, ka lo inngaihtuah dâwn nia," ka lo ti ve a, ani chuan nui chung hian," I inngaihtuah laiin pawm loh tumna rilru kha chu paih bo daih la aw," a rawn ti leh a, kei pawh chu ka nui ve ringawt a.

Ei tùr a rawn thleng a, kan ei mawlh mawlh a, Ruatpuia chuan," In pa nèn in la inbe tluang zël em? In ințhen tâk hlauhin ka sawi kha hre reng la aw," fiamthu hian a rawn ti chhuak a, ka nui ringawt a, chhàn pawh ka chhâng buai peih lo. Min fiam peih a, ka bialpa chungchâng erawh hi chu mi hriat lai chuan a sawi lang ngai chuang lo thung, mi hriatah a chanchin sawi telin min fiam ngai lo tihna a nih chu.

"A nui leh ta ringawt. Min hrilh ve mai la, inngaizâwng ve si-ah chuan in inhmu khât àwm hi ka tia, he lamah a hriat loh hlànin a rûk têin țan lo la char char ila a fuh hial bawk ang," a tih leh chuan," Ngawi mai mai teh," ka lo ti thung a, kan pahniha kan awm hi chuan hotu anga en har ka ti a, kan innèl ve tawh bawk si nèn, han 'pu' thar leh vêl ngai hi thiam pawh ka thiam hlawl lo.

Kan ei mawlh mawlh lai chuan," Teruati teh tlat chu!" ti ri ka hria a, ka hawi chhuak vat a, Zela leh Benson-a'n mak ti hmêla min en dùn ka hmuh chuan," Nangni pawh, in lo chàwl ve dâwn a ni maw?" ka lo ti ve vat a, min hnaih zâwka rawn ding Zela chuan," Aw, nih ve hi, min chawlhpui ve duh mang si lo va, keimahnia kan chawlh ve ruk ruk mai loh chuan," a rawn ti deuh kher a, nui hmêl pu mah se ka melh rum viau tho.

Zànah ka pain min rawn be teh tlat a," He lamahte hian dàwr siam ila, in unauin in enkawl ve tawh mai dâwn em ni ang?" a rawn ti teh ringawt a, chhàn mai ngaihna ka hre lo khawp mai a, ka ngawi deuh reng nghe nghe. Amah vêk chuan," In ațangin i awm bo rei tawh a, i lo haw hi a țha tawh a ni," a rawn ti leh a.

"Teh thut chuan! Pa, chhàn mai dàn tùr che pawh ka hre lo," ka ti ringawt a, ani chuan," Kum kha leh chen kha kan bulah i awm tawh lo va, i pa ka nihna ang pawhin ka enkawl lo che tih ka hria. I pateate bula awm reng ringawt pawh kha thil dik ber a ni lo, nakinah pasal a chhia a țha pawh i la duh ve ang a, i chanchin hriatpui lo lutuk chea ka awm zêl zawngin dem ka hlawh lutuk ang e. I pa ka ni a, thil țha ber ber ka duhpui che a ni," a rawn ti leh a, chutiang thu lam min sawipui vàng chuan sawi tùr ka hre lo zual a ni, min sawipui ngai si lo va, tún ataka min sawipui ta hi ka hre thiam lo a ni.

A tûk tûkțhian ei laia ka patea bula ka pa min rawn biak dàn ka sawi chuan ani chuan," A sawi deuh thuak tawh tak asin! A tih tak tak ka lo ring hran lo va; mahse, a lo ti tak tak a nih dâwn chu. A țha alawm, i pa a ni a, a ngaihtuah che tihna a ni a, hna dang zawn buai ngai lova in dàwr i nghah theih dâwn chuan țha ka tihpui reng mai che," a lo ti a, ka nutei chuan," I phei daih chuan kan lung a lêng àwm mang e," a lo ti ve bawk a.

Dik tak chuan Lungleia phei chu ka hreh alawm. Dozer-a ka hmu khât zual sawtin ka ring a, Lunglei lama rawn kal a tân a har dâwn bâkah Aizawl lamah hian bazàrna tùr thil a tam a, Lunglei hi chu a laklawh rih deuh tlat si a, chu vàng tak chuan ka peih lo a ni. 

Dozer-a'n min rawn biak chuan ka hrilh ve chhin a, ani pawh chuan," E, i thu thu a ni, nu leh pa thu âwih hi a țha a, min hmangaihtute an ni bawk a, kan tâna țha duha hretute an ni bawk," a rawn ti ve duah a, kei chuan," Mahse, kan inhmu khât zual dâwn êm asin, Lunglei lamah i rawn kal khàt hmèl si," ka lo ti ve thung a. Ani chuan," Ka rawn tlawh ang che," a rawn ti leh mai a. A hna lamah a buai ang a, kei ka buai ve bawk ang a, buai leh buai tân chuan inhmuh a khât tawh dâwn êm asin, ka pate bula ka awm phei chuan Dozer-a ka tlawh ve theih hun Krismas pawh hman chhuah a rem tawh lo ang.

Ka pa thu chu hnial ka hreh ve deuh bawk si a, thu tlûkna siam thiam a har ka ti ngang mai, thil tam tak ka ngaihtuah lo thei bîk lo va, chûng zîngah chuan Dozer-a ka dah sâng ber a, tûn aia kan inhmuh khàt zual mawlh ka hlau a, ani rawn kal thei lo se, kei zin chhuah a rem tawh bawk si lo ang a, hei vàng tak hian thu tlûkna siam harsa ka ti, bâkah, Lungleiah chuan rawn kal ve ta pawh ni se ka patea leh ka nutei a nèl ang chuan ka nu leh pate a nêl thei lo phawt ang, anni lahin an lo be bawrh bawrh dâwn lo tih a hriat sa a, Dozer-a lah mi țawng tam lo lutuk a ni bawk si a, chutiang chu ka ngaihtuah kual a, ka rilru a insual nasa hlê a ni.

Ka pa lah chuan min ngaihsak ta ber emaw tih tùrin min rawn be ta zauh zauh a," Dàwr chu luah mai tùr ka hmu tawh a, lei chhàwn pawh an phal nghe nghe, an nu ber a damlo va, enkawlna nân sum an mamawh tam deuh a," a rawn ti a," I nau pawh a phûr viau asin, i lo phei hlàn kan nghâkhlel khawp mai," a rawn ti bawk a, ka pate hian min lo ngaiin min lo thlahlel ve tawh tak tak tihna em ni ang? Châk chu ka châk vak lo nain ka pa thu hnial chu ka hreh êm êm lawi a, inpawh takin titi siam siam ngai lo mah ila ka têt tê ațanga min enkawl chho ve ngar ngartu a ni a, ka pa a ni bawk a, a duh tih puitlinsak loh chu ka hreh ve a ni.

Ruatpuia hnênah pawh ka awm dàn tùr ka hrilh lo thei bîk lo va, ka hrilh chuan pawi a tiin ka awm lo thuai tùr chu min ui ve hlê mai a, min ui tak tak pawh ka ring bawk. Min fiam zui nghâl a," Lungngai suh, zin nân hun thâwl ka pe che ang a, Bull-Dozer-a nèn in inhmu dâwn nia, i phei hmain, i phei hunah chuan i chhuak zawk zawk hman tawh bîk dâwn lo a nia," a ti a, a dik viau ang, hun thãwl min pêk theih chuan ka lãwm tak tak ngawt ang. 

Hna ka bànsan tùr chu kawng țhenkhatah thâwk huaina tùr a ni a, kawng lehlamah erawh ka lung a lêng viau thung ang. Țhenkhat tân thâwk huaina tùr a lo ni bawk ang a, ka awm loh chuan min rèlna leh min sawinate a reh ve deuh bawk ang a, an rilru pawh a chàwl ve thei deuh tawh ang chu.

Ruthi, Zela leh Benson-a pawhin an hre lo thei lo va, min thlahna hun hman an rawt nghe nghe. Țûl ka ti lovin peih pawh ka peih lo viau na a, min thlah an duh ve a ni mai a, lo peih loh viau ringawt chu thil dik ber a niin ka hre bîk lo va, anmahniin an duh hun ruat mai rawh se.

Lungleia ka phei hma, hna ka la bànsan chiah lo tihah Ruatpuia'n inbuatsaih nân kâr khat chawlh min pe tak tak a! Ka duh lo dâwn dâwn a; mahse, Dozer-a ka hmuh theihna hun țha a ni tih ka ngaihtuah leh ta vat a, ka tân reservation siam kher a ngai lo bawk a, ka patea hrilh hre thlapin ka zin chhuak zui ta nghâl a.

Hun nei rei thei dâwn lo mah ila ka phûr tak zet a, Dozer-a surprise duh viau mah ila a rûkin a kal theih tlat si lo va, ka kal hma tlaia min rawn biakin ka hrilh ta nghe nghe a, ani pawh a aw chhuak ațang chuan a hlim ve hmèl viauin ka hria.

September thla tàwp lam niin ruah erawh a la sûr zauh zauh a, ka scooty-in ka khalh chhuak leh a, kalkawnga ka tlàn lai chuan Dozer-a ka hmuh hun tùr hlîr mai ka ngaihtuah a, ka rilru a hlimin ka nui leh sak sak țhìn a, min lo hmutu awm se chuan 'Eng tak ngaihtuah ang maw? A mak vur vur e' an ti ngei ngei ang.

Tlãn ve reng ta na nâ nâ chu ka tlãn thleng ve leh mai a, min lo nghâk reng tawh nghe nghe a, gate a hawn rualin a nghâwngah ka uai nawlh a, ani pawhin min kuahin zo takin min pawm kãng nawlh bawk a, kan boruak chu nuam ka va ti tak! Nghet zetin ka kuah tlat a, a rimte chu ka hnìm pah a. Hna a thawk lo nge, a bâng tawh zâwk, a lang fai viau a, a sahbawn hman rim a nam vang vang bawk. Tunah tak hi chuan eng thil dang mah ngaihtuah ka duh lo, amah chauh hi tih loh chu.

"Hetia kuah che hi kawng tluana ka châk tawh a nia," ka tih chuan," Kuah ringawt loh deuhte pawh," a lo ti sup a, ka nui hak a, ka kuahna la thlah duh chuang lo chuan," I rim a tui," ka ti leh a, ani lah chuan," Ka inbual fai ve tlat tawh a," a lo ti leh a, ka rûm nghat a. Vawiin tlai chu a chimawm thiam ve tlat mai nia!

*I THINLUNG KHA TIH KEH SAWM A LO NI TAWH A NI MAITHEI; MAHSE, PENCIL RAWNG KAN TIHTE PAWH HI KEH SAWM ȚHÌN MAH SE AN RAWNG DIK TAK KHA AN LA CHHUAH THEI THO ȚHÌN A NI*