☆DOZER☆ - 29 By Dingdi Pachuau

☆DOZER☆ - 29 By Dingdi Pachuau

Dàn zam bawhchhiat ka duh bîk loh avàngin gate chhûng lama awm in têah chuan scooty chu kan nawr lût a, kan nawr lût ti ila ka dek ve a ni chauh zâwk. A truck-ah chuan kan chuang phei a, ka hlim vàngin ka țawng loh kârah chuan ka nui hak hak reng a, amah pawhin min lo ngai ve viau a ni ang, steering wheel a vawn lohna lam chuan ka kut chu vuanin a khât tâwkin a fâwp zauh zauh a, țawng erawh a țawng lëm hlei lo va.

Ka kal hmasak ber țuma ka thlenna Rûn no. 3-ah bawk ka thleng leh a, hei hi chu mi dang luah pawh a phal tawh lo va, ka tân liau liau a reserve tawh a ni. Thleng hming pu mah ila a chènna lama ka kal leh deuh reng ka ring mah zâwk, amah pawhin a chènnaa fin ve mai tùrin min sâwm nghe nghe a; mahse, ka duh bîk lo, ka thlahlel lo tihna a ni lo va, ka ngai lo tihna pawh a ni lo, khual dang an awm ve a, bâkah, nupa kan la ni lo va, khawsak dun ngawt zawng a tihchi loh, a rûka inhmuh dun hi a nuam ve zâwk alawm.

Ka inbual zawhah zanriah ei tùr siam tùrin a chènna lam ka pan leh ta tho a, ka bàwl a phal leh dâwn chuang lo tih hre mah ila a che vêl lo en kha a nuam ka ti tho tho a ni. Ka va thlen chuan ei tùr chu a lo siam țan tawh tak tak a, puih ka tum chuan," I chau ang, ka àwl ang che," a lo ti a, kei chuan," A, i bulah ka awm tawh a, ka hahdam vek tawh," ka lo ti thung a.

Ka puih phal hek lo, a bulah chuan ka lo ding a, a hnu deuhah chuan a hnung lam ațangin a kâwngah ka kuah a, a hnungah chuan ka bei tlán a, a che reng tho nain nuam ka ti êm êm tho.

"Ka damloh chângin min paw țhìn rawh aw, i hnung a pharh țha a, bei a nuam êm mai," tiin ka han fiam a, ani chuan," E, ei tùr ka siam zawhah pawh i duh phawt chuan ka paw dâwn che nia," a lo ti sup a, hlim takin ka nui sak a, a nuam dâwn lutuk! Ka têt lai, thil ka hriat phâk chin tawhah a ni ang chu, khâng hun lai ațang tawh khân puak ka ni ngai lo va, ina ka awm ve lai pawh khân ka pa khân min paw ngai lo. Ka rualpuite an pate'n an pua kha ka hmu ve fo sia, puak hi eng anga nuam nge a nih tih ka ngaihtuah fo țhìn a ni, hostel-a ka damloh châng lah khân tu puak mah beisei chi a ni lo va,  khuma mut chawrh chawrh kha a ni mai. 

"Hla ka'n play teh ang," tiin a woofer lian lo tê, kuttum tiat deuh chauha lian chu ka on a, ka phone ațang chuan ' Awm lo ta la' tih hla ngei chu ka play a, a hnungah chuan ka bei leh tlán a, hla chu zàwmin nghet deuh hian ka kuah a, nuam ka va ti tak! Hetiang hian awm reng thei ila ka ti.

Zanriah ei khamah sitting room chhuatah innghèng riala țhuin zàwi tê têin zai kan ngaithla a, kan ngaithla ti ila kan ngaithla meuh lo zâwkin ka hria, kan inngaihna leh kan inthlâkhlelhna kan lantîr malh malh a, a chângin kan nui a, kan inhaw lo tak zet a ni.

"Ih, thil ka zâwt che ang a, thu dik tak chauhin min chhâng rawh aw," ka ti a, a khabe hnuaiah chuan ka dâk chho hau a. Ani chuan," Min han zâwt la?" a lo ti a, ka chalah chuan a rawn fâwp zauh a.

"Bialnu i nei țeuh tawhin ka ring, a dik tiraw?" ka tih chuan," Nei țeuh lo, pathum chauh," a lo ti a, ka mitko sàn äkin," Tlangvâl luck!" ka ti sap a, a mita en ràn pah chuan," Chuan, i virgin tawh lo bawk ang, a dik em?" ka ti leh a, ani chuan," Aw," a lo ti leh mai a, min chhàn ran dàn chu a, a lo ring sa deuh em maw ni zâwk ka ti hial, min chhànna lah dâwt a nih ka ring miah lo bawk.

"Ka zâwt 'raw' deuh mah mah che i ti ang aaa... mahse, kan inkârahte chuan zêp tùr a awm chuang lo va, a ho e tiraw? Ka lo rin dàn che a ni tho tho bawk a," ka ti a, ani chuan," A pawi lo, min zâwt zêl rawh," a lo ti mai a, ka hnârah chuan a rawn fâwp leh zauh a. 

Kan chanchin chu kan inzâwt zêl a, ani pawhin ho tê tê chu min zâwt ve tho a; mahse, ex ka neih leh neih loh lam min zâwt ve lo rêng rêng! A hre châk ve lo em maw ni, mak ka tih avàngin a hnu deuhah phei chuan min zawh ve miah loh chhan chu ka zâwt ta hial a, min chhàn dàn hi ka duh teh a nia, duh takin a hmuiah ka fawhsak vawng vawng rêng a ni, a phû êm asin.

"Kan intawn hmaa i mi tawnte, inzawmna i lo neihpui tawhte chanchin hriatin awmzia a nei hleinem, nulât tlangvàl kawnga i hun kal tawh ai chuan kan tûn dinhmun hi a pawimawh zâwk a ni. I tân thil ropui ber ber ka tihsak thei lo che a nih pawhin i tâna awm reng mipa ka ni ang, chutiang mi chu nih ka duh bawk. I tâna mipa țha ber ka ni lo a nih vêk pawhin pahnihna chu ka ni bîk chuang hauh lo ang a, ka tâna i pawimawh êm êm ang chiah hian i tân mi pawimawh êm êm nih ka tum reng bawk ang," tiin.

A bula riah chu chãk viau mah ila thil țha ber a ni lo tih ka hria a, min sâwmna pawh ui tak chungin, ka thinlung duhna chu țawngkamin ka hnial ta a, ani pawhin hre thiamin min sâwm nawn lo. Min thlah haw a, inkai rialin muangchângin kan kal a, inpuaktîr leh châk viau mah ila a hah ka hlau a, ka khawngaih dáwn sia, ka ti ta êm lo a ni, eirawng a bàwl zawh khân min paw tak tak a!

Kan thlen chuan lêt leh nghãl mai lovin pâwnah chuan dingin kan inkuah vang vang a, inthlah chu har kan ti ve ve niin a lang. Vàn lamah arsi a pe tuar a, thla erawh ka hmu lo, boruak a vâwt deuh sûk a, min kuah tlat vàng erawh chuan vâwt ka ti miah lo thung.

"Haw tawh la, zàn i men rei chuan zîngah i tho thei lo ang, hna i thawh leh a ngai àwm si a," ka ti sap a, thlah erawh ka tum chuang lo, a lum nuam sia, heti hian muhìl thei ila ka ti hial zâwk a ni. Ani pawhin min thlah a tum chuang lo a ni ang, min la kuah nghet sauh sauh tlat.

"Naktûkah chuan thil eng emaw siam ang hmiang," a rawn ti sup a, phûr zet hian," Thil țha deuh a ni ang maw? Awi, ka châk tawh!" ka lo ti vat a, ani chuan," Țha dâwn e maw le, naktûk lo thleng phawt se i hre mai ang," a ti leh a, min hrilh nghâl duh lo chu engah mah ka ngai chuang lo, a bulah ka awm dâwn tho a, chu chu a tâwk viau a ni.

A tûk chaw ei khamah phûr zetin a chènna lam chu ka pan a, kal pahin ka zai rât rât a, a hnuah erawh thil ka ngaihtuah kual a, he hmun nuam zet hi ka hmu chhuak lo ang tih ka hlau hnuhnawh ta viau a ni. Dozer-a ka tawn phah a, hlimna tam tak min pe a, nuam takin hun ka hman phah thei bawk a, engtikah mah Dozer-a hi thlah ka duh lo ang, amahin min thlaha min kalsan a nih ngawt loh chuan. Chu lam chu ngaihtuah thui duh tawh lovin ka zai leh ta zâwk a.

Khâwl ri vung vung awmna lamah chuan a awm ringin chu lam pan chuan ka kal nghâl a, a lo awm chiah a. Workshop a lo ni a, thingzai leh thingphel ka hmu nual mai, amah tak chuan min hnungchhawn zâwng hian thingzai chu khâwlin a lo thliar vêl mêk a, a bengchheng ve viau mai. 

A hnung lam ațang chuan a kâwngah ka kuah chat a, min hre nghâl tih hriat takin a khâwl chu a ti tàwp a, rawn inherin ka hawi chhoh lai tak chuan ka hmui a rawn fâwp zauh a," Stool siamsak che ka duh a," a ti sup a, kei chuan," A va țha dâwn ve! Keima tâ tùr chauh ni lovin nangma tâ tùr inang chiahin siam ila," ka lo ti a, ani chuan," Aw le, kan tum dâwn nia," a ti ve leh a.

A thil siam lai chu video-in ka lo capture zauh zauh a, puih pawh ka pui tam lo ve khawp mai, a thil mamawh tùr ka lo pe țhìn a, pêk pahin chimawm ka han chhuah pah zauh zêl bawk a, nuam ka ti ve êm êm tho mai a ni. Mipa dang bula ka tih ngai loh tùr a bulah hi chuan ka ti fo rêng asin, Benson-a bula ka tih ngai miah lohte a bulah hi chuan ka ti a, ka zak hran chuang lo, a bulah hi chuan ka thla hi a ngam sârh a, ka nêl a, ka hlim êm êm hi a ni tawp mai.

Ka tân stool sâng ve er awr tak siamin a tân erawh a siam hniam deuh a, a design erawh a inang vek thung. A siam mawi reuh mai mai asin, thiam loh pawh hi a nei lo a ni ang, mi namai lo tak chu a ni. Ka bèl chiang telh telh a, a hmêl ena zuam ngawt chi a ni miah lo tih hre chiang zêlin ka duhna a pung telh telh a, ka hmangaihna pawh a ni têlin a zual tulh tulh a ni.

Tlaiah vawk leh âr chaw ka pêkpui a, vawk chu pakhat chauh a lo vulh tawh a. A chhan ka zawh chuan vawk pùl hrî vàng a nih thuin min chhâng a, âr erawh a lo la ngah viau a, âr pakhat chu manin a talh zui a, a tui lai niin a sawi nghe nghe. 

"A uiawm êm mai a!" ka tih chuan," A tam alawm, bâkah, i lo kal huna talh atân alawm ka vulh," a lo ti mai a," Hetah inbual nghâl mai rawh, i mamawh tùr a awm vek tho a," a tih zawm leh a, kei pawhin ka hnial lo.

Zanriah tui takin kan ei dùn a, stool thar chu țhut châk tawh viau mah ila rawng hnawih a la nih loh avàngin a la phal tlat lo va, ka titau lui lek lek a; mahse, hun rei lo tê kan neih laia lo tihtauh ve khanglàn chu, hun a uiawm ka ti a, ka duh leh ta lo a ni.

Zanriah ei kham lamah a hmaa kan țhutnaah khân kan țhu leh a, a tho leh thut a, 'eng tak chu ti dâwn ni maw' ka tih lai chuan bottle leh no pahnih a rawn keng phei tih ka hmu zui ta nghâl a, ruih theih a nih hlau ru deuh chuan," Ka rùi leh ang a..?'" ka lo ti a, ani chuan," Rùi lo ang, a hmaa mi ai khân a tak lo zâwk a," a ti a, ka ngaih a țha deuh sawt a.

In tùr in pah chuan thu ho mai mai kan sawi a, kan boruak a nuamin ka hlim bawk a, ka nui deuh reng mai nghe nghe a. A hnu deuhah chuan Phaizawl chungchâng ka zâwt chho a, a neitute vànnei ka tihzia sawiin hetiang ram zau leh hmun nuam, remchâng bawk si an nei chu mi vànnei leh rem hre tak an ni tih sawi telin, an rawn tlawh ve țhìn em tiin ka zâwt zui a, a nui suk a," Tlawh țhìn mai ni lovin a awmchilh alawm," tiin min chhâng a. Hre thiam lo taka en chung chuan," A awmchilh maw!! Ka va hmu ve ngai lo ve? Tar hausa deuh a ni ang tiraw?" tiin ka zâwt zui leh a.

"Amah i hmu reng a, tar i tih leh tih loh a ni mai."

"Engtikin nge ka hmuh ka va'n hre lo?!" La hre thiam lo tak chuan ka ti leh a, ka ngaihtuah kual a, chutiang mi ka hmuh àwm ka hre tlat lo a ni. Min hrilh ringin amah chu ka en leh a, a noa in tùr tlêm la bãng chu a in zo vek tê tê phawt a, chumi hnu chuan," Tunah pawh i hmuh reng hi," a ti leh ringawt a.

Mit khap hauh lo chuan ka en reng a, chutah, ka âwm dawmin mak ti zet hian," Nangmah hi maw?!!! He hmun neitu hi i ni maw?!! A ni tak tak em?" ka ti ta mawlh mawlh a, ani chuan," Ni e, ka pu pa ram ni țhìn a nia, ka rochun ta a nih hi," a lo ti a. Ka kut chu bêngin nui sâng hian," Ka lawmpui lutuk che, i tâ a ni tih hre chauh mah ila lawmpui che hi ka tih tùr dik tak a niin ka hria, khawi maw no khat chu a lawm nân in leh teh ang," ka ti a, bottle chu lain kan no-ah chuan ka thli khat ve ve a, ka no chu châwi kãngin," Ka lawmpui tak zet che, tlangvâl hausa tak la ni mai tùr," ka ti a, a no rawn chawi kàn chu ka no chuan ka han tauh zauh a, no chanve dâwn lai chu ka in nghâl a.

Ka mut hmunah a thil min hrilh chu ka ngaihtuah chhunzawm a, ka rilru a hlim takmeuh a ni. Tlangvâl harsa ve deuh leh he hmun a enkawlna hlawh ring deuh ngawr ngawr tùra ka lo ngaih kha a ni si a, a lo ni hauh si lo, amah lahin a hmain a sawi chhuak hran si lo va, lo hre chhuak ve tùr àwm tak ka nih tehlul nèn, ka lo chîk lo ve deuh bawk a ni. Tuna ka thlenna Rûn pawh hi mi dang luah ve phal tawh miah lovin ka tân a dah thlap thei a nia, mi chêkngèi deuh tân chuan hriat thiam ruak ve theih tùr a ni asin le, ka lo ngaihtuah thui lo ve deuh hlek chu a ni. Tunah chuan a khawsak harsat loh tùrzia chu ka hre chhuak thiam uar uar tawh a, ka lo ngai rethei deuh mah mah chu zahthlâk ka ti ta riau mai.

A tûkah bike a siamna bulah ka lo tâp ve leh a, a duh phawt chuan a thar hlak pawh lei nghâl var var thei a ni si a, bike țãwng ve tawh lam a han kawl reng duh tlat mai chu ka ngaisâng thar leh tlat a.

"A thar i mamawh niin i inhria em?" tiin ka zâwt a, ani chuan," Mamawh hran lo, hei nèn hian ka inhmeh," a lo ti thung a, a sawi chu a dik ka ti reng tho mai. Hnehsawh zeta tlâng lama a khalh chho dut dut maite kha amah nèn khân a inhmeh viau rêng a ni, a pà hliah hliah, a sam leh a inthuam dàn zawng zawng nèn.

"Ti ta daih ila, i sam tih dàn hi, nangma duhthlanna rêng em ni? Enkawl a harsa ngawt lo maw?" tiin ka zâwt leh a, ka pa duh loh zâwng tak kha a nia, kei chuan a inhmeh ka ti a, ka bialpa mah ni se a samah thu neih ka tum lo hrim hrim bawk a; mahse, ka zâwt châk ve rêng rêng a ni.

"I lo duh vak nange?" tiin min zâwt lêt thung a, ka lu thing nak nakin," Ni lo, chutiang lam a ni lo. I inhmeh lutuk ka tih vàng zâwk a nia, tuin nge mehsak țhìn che? A buaithlâkin a harsa reuh ngawt ang chu," ka lo ti leh a, ani erawh chuan min rawn en chuang lo hian," Keimahin ka inmeh mai, a harsa lo," a lo ti mai thung a.

"Nang hi chu aw... thiam loh pawh hi i nei lo a nih àwm hi!  Tlangvâl ngaihsànawm tak i ni, ka lo tawng lo ang che tih hi ka hlau ta hial, i ex-te kha hmu ta ngat ila làwm thu hrilh mawlh mawlh ka duh hial ang," uar zet hian ka ti a, ani erawh chu a lo nui hawk a, rawn thovin ka chala min ben zauh pah chuan," Over mah mah lo maw?" a ti a.

"Over lo chiang, thil nihna tak tak ka sawi a ni zâwk. Nang ka tawn vàng che hian nula vànnei tak ka ni tih hi ka pawm thlap, làwm pawh ka lãwm hlê rêng a ni. Bialpa chhe lo leh ngaihsànawm, thiam loh pawh nei lo, a rûk taka tlangvâl hausa tak lo la ni zui lehnghâl----" ka sawi zawh hma chuan min rawn fâwp chat a, ka inring lo mai mai asin, min dawm nghet sa lo phei se chuan ka țhutna ațangin hnung lamah ka tlu ngei ngei ang.

"I țawng hi ngaihthlâk a nuam ve hrim hrim, lo titi char char rawh," tiin, min thlah hnu chuan a bike chu a siam chhunzawm leh nghâl a, kei pawh a tìrah chuan ka ngawi ve deuh na a, ka insûm rei leh thei chuang lo. Țawng pah chuan a oil tih buakte chu ka lo khawih a, ka lo hnìm bawk a, rim tui ka ti lehpek tlat a nih chu.

A siam zawh chuan khuaa kalpuiah min sâwm nghâl zat a, ka lo 'aw' rang mah mah a ni. Nuam leh dâwn chiang, ka hmuh lohna a rei tawh a, hmuh leh ka châk a ni. A bulah hi chuan khawi hmunah pawh ka kal peihin ka ring, hmun hrehawm lai berah pawh ka kianga a awm tlat chuan hmun nuam berah a chang thei ngei ang.

Bike-in kan kal a, kawng chhoa kan tlàn lai chuan," Hlauh pawh hi i nei lo ang a? Nangmahin he laiah pawh hian i awm reng mai a nia," ka han ti a, a kâwngah kuahin a kokiah ka han dâk deuh a, bike rî a rin avàng chuan țawng deuh làwng láwng a ngai a, ka țawng ring ve rêng a ni. Ani pawh chuan sîr zâwng deuha rawn hawiin," Pakhat chu nei ve e," a rawn ti a, hre châk ru deuh chuan," Eng tak chu ni ang maw? Ramhuai a ni em? Nge, ei zawhsan?" ka lo ti a, ka nui pah bawk a.

"Ka hmuh theih loh tùra i awm leh chàn che hi ka hlau."

Min chhàn dàn hi ka va duh thei tak! A tâna ka hlu ve viau leh min duh ve viau hi ka lãwm tak zet a, dâwt min hrilh lah ka ring hek lo, min chhànna chuan min ti hlim veng veng mai. 

Pa Țhiangate inah kan lût phawt a, chumi hnuah dàwrah kan kal leh bawk a, naupangho ei tùr leisak leh ka duh a ni, kal lama kawng sîra lo infiam, min lo vai lauh lauhtute kha ka pe ang.

"Dozer, bike hi ka khalh ve chhin châk e," tiin khalhsak dîl dawt ngam meuh lo, khalh châk bawk si chuan ka ti a, ani chuan," Bike dang a ang lo asin, bâkah, he laiah chuan khalh chhin lo la ka duh, kan haw hunah khalh chhin zâwk la," a lo ti a, kei chuan," Haw hunah te chuan, khalh phal a nih loh kha, dàn bawhchhiat ka duh hleinem. Min phalsak mai teh, khawngaihin? Muangchângin ka khalh ang a, naupang awm lohnaah ka khalh bawk ang," ka ti leh a.

Ka dìl ve miau avàng chuan rem ti vak lo chuan a rem ti ve ta a, tih dàn tùr min hrilh zung zung a, ka hriat sa tho a ni a; mahse, ka ngaithla tho a, a rûk tak erawh chuan ka phúr tawh lutuk a, a thil min hrilh chu ka hre chiang hlei thei lo zâwk.

"Helmet kha?" a tih chuan," A ngai lo ang. Sáw laiah sâwn ka va tlãn ang a, ka rawn lêt leh nghâl ang," ka ti a, muangchâng chuan ka khalh phei ta a, a nghet charh mai a, ka rin ai daihin khalh a nuam lehnghâl a, ka nui vur vur lo chauh a ni.

Ka lêt phei leh chuan a hma ai chuan ka khalh chak ve ta deuh a, nuam ka ti, hmun zâwl nuam leh kawng zau deng dawngah hei aia chak leh deuh hlek hian khalh ila a nuam lehzual ngei ang le. Dozer-a pawh ka hmu pha tawh a, ka va en lai chuan min rawn thlîr reng tih pawh ka va hmu nghe nghe, ka nui sak a. Chutih lai tak chuan naupang ui kai, kawng tan tlang zâwnga rawn tlãnte chu ka hmu ta phut a, an rawn lang deuh phut si chu sut ka hlau lutuk a, ka kãwi zawk mai a, ka tlàn chak ve deuh lai a lo ni bawk si nèn, ka au țhawt a, ka tlu ngei dâwn tih leh ka hmaa thing tian kháwm chu ka su ngei dáwn tih hriain ka maimichhîng zui nghâl a, a ri bur a, chumi rual chiah chuan ka lu tauh dawtin a na zui nghal vawng vawng bawk. Ka thi ang em? Tunah hi chuan ka thi lo niin ka hria, ka lu a na êm mai a, ka la thi lo a ni ngei ang.

"Ka naute..!" tia min ko tuar tuar ri ka hria a, Dozer-a aw ngei a ni, ka han meng a, ka hmu phê deuh ruai a, mit chu ka khap deuh sak sak a, Dozer-a hlauthãwng hmêl ka hmuh tâkah chuan nuiin," Dozer, ka thi lo a nia," ka han ti sap a, ka lu nat thu erawh ka hrilh duh lo, a hlauthãwng hmêl chu hmuhnawm ka ti lo va, hnem ka duh, ka țha reng si a.

Min delhtu bike chu dah sawnin min rawn pawm a," Ka naute, harh rawh aw, i harh tùr a ni, i mit kha chhîng miah suh, khawi lai nge na ber? A pawi ka ti êm mai! Ka thiam loh a ni," a ti mawlh mawlh a, a aw chhuak chu hlauthãwng aw a ni, engah nge a hlauhthàwn viau? Ka țha reng alawm, ka lu a na deuh tih mai loh chu. Ka bianga thil lum deuh rawn luang thla ni àwm tak chu ka hre thei deuh a, ka lu ka tauhna lamah khân a thî ve deuh a ni maithei, lu chu tauh hlekin a thî duh si a.

A bianga dawmin," Dozer, ka țha ka tih chu," tiin ka han hnèm a, ka kut a rawn dawm chuan a kutah thisen a kai tih ka hmu nghâl a, ka thisen ngei a ni ang tih ka hre nghâl. Ka ke chét ka tum erawh chuan ka chêt thei ta miah lo mai.

Mi țawng deuh nuai nuai ka hria a, Dozer-a bula rawn țawng chu Pa Țhianga ngei a ni," A va pawi tehlul êm! Engtin nge ni ang? Thisen kha kan tih tàwp vat a ngai a ni," a rawn ti nghâl vat vat a, Dozer-a chu ka en reng a, ka hmu chiang lo telh telh a," Ka naute, i muhìl thei lo ang, harh rawh," a rawn tih avàng chuan ka meng chiang leh deuh a, ka lu na tak vàng erawh chuan men har ka ti țan ta tlat. A thu chu ka âwih hrâm hrâm a, min ko reng a, harha meng tùrin min ti bawk si nèn; mahse, har ka va ti tehlul êm!

*I DIK A NIH PHAWT CHUAN I DIKZIA MI DANG LAKA FINFIAH NÂN HUN KHAWH RAL DUH SUH*