☆DOZER☆ - 30 By Dingdi Pachuau

☆DOZER☆ - 30 By Dingdi Pachuau

Mi an rawn pung khâwm țeuh tawh tih an thãwm ațang chuan ka hre thei a, an ri nuai nuai a, tu emawin ka lua puan ni àwm tak a rawn hmeh bel chuan ka meng chiang leh deuh a, Dozer-a hmêla chîàina, inthiam lohna, inchhìrna, pawi ti hmêl leh hlauhthàwnna inpawlh nawk ka hmuh chuan hnem ka duh tak zet a, ka lu na ngut ngut pawh chu ngaihtuah lo luiin ka nuih hrâm a," Dozer, inthiam lo mah ta che, i thiam loh a awm lo a nia, ka țha," ka ti sap sap a, ani chuan," Țawng suh, țawng tam suh, ka naute, damdawi in hnai berah kan tlän nghâl dâwn e, meng tlat rawh aw," aw khùr deuh lek lek hian a rawn ti a. "Bike kha a chhe nasa em? A pawi---" ka tih mêk lai chuan ani chuan," Ngaihtuah duh suh; nangmah ber zâwk hi, i khawi lai nge na ber?" a ti ve thung a, kei chuan," Ka lu hi a na ve deuh a," ka lo ti a, na deuh ang chuan ka sawi duh lo, a hlauthãwng zual palh ang.

Min kuah reng a, ka lu na tluk tluk vàng chuan men har ka ti tak zet tawh a ni, min koh leh țhin avàngin ka meng lui hrâm hrâm, hmuh pawh ka hmu fiah tawh lo. Mak tak maiin ka taksa chu a chau ngawih ngawih mai bawk a, ka kut chêt tùr takngial pawhin thâ ka nei lo ni berin ka hria, meng tùr pawh chuan thâ sèn fê a ngai tawh hial a ni. Dozer-a'n," Men tum hrâm rawh aw, i muthilh chuan ka---" a țawng tàwp lam phei chu ka hre chhunzawm tawh lo, men hrâm hrâm pawh chu a tih theih tawh loh, a tàwp vek ti mai ang.

Ràlkhata țawng deuh niai niai ni àwm tak hi ka hria a, ka han meng a, khumah ka mu a ni tih ka hre nghâl a, thawh mai ka han tum a; mahse, ka che thei miah lo. Thãwm chu ka ngaithla ta ringawt a, rei tak hnuah pawh chuan an rawn hnai thei miah lo a nih chu! Thãwm ti ila țawng ri nuai nuai a ni ber ang chu, chu chu awm reng mah se an sawi ber ka hre thei lo. Ka mangang chu ka au vak dâwn a, au tùrin ka aw a chhuak thei hauh lo niin, ka hahin ka mang a va ang tak! Ka inngaihtuah lai chuan ka bulah hian puan veng, chem kenga leh silai pu zân mai putar pakhat hi a rawn lang thut a, ka țhat leh țhat loh min rawn zâwt a, ka hmuh ngai a nih loh vàng leh chem leh silai vàng chuan ka hlau deuh a, chhàn pawh chhâng lovin ka en reng ringawt, ka en reng avàng leh ka chhàn loh vàng chuan a nui deuh a, chutia a hmêl ka en reng tâkah chuan an tih deuh ka nei ta, a hmai pianzia leh nui hmêlah chuan Dozer-a nèn an inang lutuk, putar hmêl țha tak a ni bawk.

"Min hlau mah ta che, hlauhawm ka ni lo a nia, kan ram Mizoram tâna ke pên chhuak, zalènna sualtu zînga mi ka ni," a rawn tih chuan," A nih tak chu. Ka pu, khawnge mi dang hi, ka va hmu lo ve!" ka lo ti vat a, ka aw ri chhuak ka hriat chuan ka va lãwm tak!

"Ràlkhat ațangin ka rawn hmu che a, ka rawn pan vang vang che a ni, mi dang chu ramhnuaiah an la awm vek. Hlau miah suh aw, engtin mah i awm ka phal dáwn lo a nia, vai sipai ngal riâho hi kan tlàwm vek ang," ka pu chuan a ti leh a, a tar ve tawh roh sia, chutia huaisen hmêl tak leh hlau miah lova a țawng chuan ka thla a va ti muang tak! Amah pawh chu ka hlau tawh lo hrim hrim.

"A theih hrâm chuan muhìl leh rawh, sipai an hnai an ti si a, a hlauhawm loh nain thisen chhuak hmu lo la ka duh a ni, ka lo vêng ang che, muhìl leh rawh le," putar chuan a ti leh a, a sawi zo chiah tihah chuan ka mut a rawn chhuak nghâl êm êm mai a, ka meng lui thei lo rêng rêng.

A hnuah chuan ka pa nèn Lungleia kan inah, sitting room-ah kan lo țhu dùn a, a hmêl chu hmuh a nuamin a nui sûng a, duat takin ka samah min chùlsak bawk. Nuam ka va ti tehlul êm! Hetiang hian hmânah khân lo awm tawh ila kan in hi ka thlahlel ngawt ang, ka pateate hnênah pawh ka awm miah lo ang maw le. 

Chutia ka sam a chùl hliau hliau lai chuan a awm dàn chu a rawn inthlâk ta tial tial a, a hmêlah chuan  thinrimna nasa tak a lang a, ka sam chu țhãmin min melh khui mai nghe nghe a; mahse, ka lo hlau êm êm hran miah lo a nih chu.

"Engtin nge mipa ûma min kalsan theih?! I têt tê ațangin ka enkawl chho che a, mi i an loh leh i phâk loh hlau rêng rêngin hun ka hmang a, nang lahin tlangvâl ûmin sâwn hial i rawn pai lehnghâl a, i awm ang hian a fanu awm se, tu pa nge thinrim lo awm ang?!! I nu siar, i nu siar i lo nih hi," a lo ti tùn tún a, ka chhâng lo, ka pum puar deuh tawh chu ka lo chûl ka lo chûl a, hetah hian naute a awm a, nakin lawkah ka nei thuai dâwn a ni tiin ka ngaihtuah a.

"Mi hurnu! Min en rawh, hetiang tùr hian ka enkawl sei lian lo che, zah nachâng hre ve teh, i pa hi ka zak asin, i zak lo a nih pawhin zah tum ve rawh, i tlangvãlpa lah mi rethei lutuk! I nei dâwn lo, i neih dâwn ai chuan ka vaw hlum mai ang," tia âng leh tùm tûnin ka bula dawhkàn chu a rawn bêng ri dawp a, ka phu zawk mai nghe nghe. 

Chutih lai chuan," Te..?" tia min ko ri ka hria a, chu lam chu hawi vatin Angaihi ka hmu ta, min rawn nuih a," Angaih?!! I lo la dam reng a ni maw? Ka va ngai țhìn tak che, lo kal teh, kal bo tawh miah suh aw," ka lo ti vat a, ani chuan min rawn pan hnaia ka kut chu rawn chelhin," Teruat?" a rawn ti a, ka ngaih êm avàng chuan a mitmengah chiang zet hian ka lo en a, ka nutei anna riau a neiin ka hria ka ti! Angaihi ngei ni khân ka hre si a; mahse, a hmêl chu ka nutei hmêlah a rawn inthlâk ta daih mai!

"I pa thu sawi kha hre reng la, a thu âwihin zàwm ang che, i lei pathian a nih hi; i nuin duh lovin a kalsan che a, i pain puitling takin a enkawl chhuak che a, a duh zâwng chauhin awm tawh rawh," thinrim tak, aw chang khel khawlin a rawn ti a, ka kut chu nghet zeta a hmer tlat avàngin nâ ka ti a, chumi belhchhah tùr chuan ka pain ka biangah thle sawk khawpa nâin min rawn bêng zui lehnghâl a, nâ ka tih êm avàng chuan ka rûm hawk nghe nghe.

"Teruat...?? Teruat, i harh em?" tia țawng rî ni àwm tak ka hriat chuan ka nutei aw leh tho a ni tih hriain ka meng duh tlat lo va, engati nge ka chunga a thinrim ve êm êm ringawt ni? Ka pa kha chu thinrim rawh se, a fanuin sâwn ka pai miau a, a thinrim kha a àwm ngawih ngawih.

"Teruat?" Chu aw chu a dang leh ta, mipa aw niin ka pa aw a ni lo, ka patea aw ve thung a ni, a dik ngeiin ka hria. Ani hi ka pa lamțang leh tho a ni ang em? Ka meng duh tawh mai ang em? Ani tal hi chuan min khawngaihin min țan maithei asin.

"I harh tiraw? Ka naute, min hre thei em?" Chu aw thûm deuh sup, zàwi angreng tak chu Dozer-a aw a ni chiang lutuk! Min koh dàn dik takin 'Ka naute' a ti tlat, ka thla a muang nghâl huai huai thei nia! Ka bulah a lo awm reng sia, ka lo hre miah lo, ka pa min vin laite khân a lo awm ve reng a ni ngei ang. Muangchângin ka han meng a, ka hmu vâr ruau mai, hmuh fiah tumin ka han khap sak sak a, ka hmai bul chêta Dozer-a hmêl ka hmuh chuan nuih ka han tum a; mahse, ka thei mang miah lo a nih chu! Eng emaw hi ka kaah a inrawlh lût tlat a, ka hnârah nèn, ka hmui erawh tlêm têin ka chêt hret hret thei thung.

"Ka naute, i harh chiang tawh tiraw? Min hria em? Min hria a nih chuan i mit kha vawi hnih han khap teh," Dozer-a chuan a rawn ti leh a, ka mit vawi hnih ka khap hnu chuan," Lalpa, ka lãwm e, i harh chiang tawh e. Țawng erawh la tum rih suh aw, țawng chu a ngai rih lo a nia, doctor pawh a rawn thleng țêp ang,"  Dozer-a'n a rawn tih leh chuan a hmêl chu ka en reng a, tunah chuan ka hmu fiah thei ta bawk a, a hmél pawh chu ka hmu chiang ta khawp mai.

Dozer-a hmêl chu a lang pawr hlê mai a, a hmuihmul leh khabe hmul pawh a sei tawh khawp mai. Chu zawng ai chuan a mit pahnih hnuaia dum val phei raih awm ve ve chuan a meng rimin a thawk hah a ni ang tih a lantîr a, chu vàng tak chuan ka khawngaih a ni, a hmai chu chùlsak ka châk a, thawk nasa lo tùra hrilh ka duh bawk; mahse, ka țawng chhuak thei lo va, ka kut ni se ka phar chhuak thei miah lo bawk.

Khawiah nge ka pa leh ka nutei kha an awm ni? Ka hmuh loh bâkah an thãwm pawh ka hre ta miah lo nia! Dozer-a a rawn lang thut a, ani lah hi a lang pawr nasa mai bawk si. Chuan, kei hi engati nge ka mut? Engati nge ka chêt theih miah loh? Ka chungah eng nge thleng? Ka mumang mai a ni em? Nge thihna hmunah ka awm tawh zâwk? Nge ka la nung? Ka buai nuai mai.

A hnuah erawh ka rilru a fîm tial tial a, thil thleng pawh chu tu hrilh mah ngai lovin ka awm dàn ațang chuan ka ngaihtuah chhuak thiam ta. Ka rin aiin bike-a ka tlu kha ka lo tlu na daih a lo ni, Aizâwl lamah daih ka lo awm tawh zui bawk a! Ka harh ațanga ka zia chhoh tâk zêl hnu chuan ka kâ leh ka hnâra pipe an vuah pawh an phawi a, ka zia ta huai mai. Ka pa leh ka pateate nupa ka hmu zing hlê a, anni awm loh kârah Dozer-a pawh ka hmu ve fo a, ka nutei nèn an pahnihin zànah pawh min riahpui țhìn nghe nghe. Nula harh ve zek zawk țhìn natna khuma ka han mu ta reng mai chu hrehawm ka ti ve hlê a, Dozer-a ka bulah awm lo phei se chuan hrehawm ka ti zual ngawt ang.

Ka țhianteho pawhin ka chanchin an lo hre ve lo thei lo va, min rawn kan a, ka lo chhàwn hlei thei si lo va, hrehawm duh tak a ni. Ruatpuia'n a hun ãwlah min rawn kan reng reng a, chutiangin Benson-a pawh. Zela leh Ruthi pawh buai tak chungin an rawn lang zauh zauh a, an rawn lang tam thei lo chu an inthiam lo va, kei erawh ka lãwm lutuk. An buai theihzia ka hre chiang a, duh hun hunah an chàwl ve thei ringawt lo va, an dinhmun hriain min rawn kan chu ka lâwm tâwk êm êm a ni. Min riahpuite an han tum ve deuh bawk a; mahse, ka nutei leh Dozer-a an awm a, an inrawlh duh ta lo a ni.

Kâr khat deuhthaw min awmpui hnuah Dozer-a chu haw la phal lo viau mah ila haw tùrin ka ti a, a rûk tak chuan min lo hnial se ka ti lutuk! Mahse, in lam a ngaihtuahawm ka ti a, ani pawhin a ngaihtuah dâwn tih pawh ka hria a ni. Chu vàng chuan, ka zia chho zêl tawh bawk nèn, haw tawh mai se tia ka hrilh chuan ani pawh chuan," Aw le," a lo ti ve mai bawk a, min hnial lova a lo 'aw' vat chu ka vui lek lek záwk lehlawi a ni.

A haw dâwn zàn chuan ka bulah țhuin ka kut a vuan reng a, vawn mai duh tâwk lovin a châng chuan a fâwp leh țhìn bawk a, ka nutei leh nurse rawn lût țhìn pawh chu a zah lêm lo. Ka ngai dâwn a, chutiang bawk chuan min ngai ve dâwn tih ka hria a, ka khawngaih lâwk a, haw lo leh mai tùra sàwm leh tak chu ka nâp hial a ni; mahse, chu zawng mahni hma a sialthlâk ka ti deuh a, pangchang lutuk anga min hmuh pawh ka duh lo bawk a ni.

"Nurse leh doctor țha ber ber enkawlna  hnuaiah i awm a, i dam chho zêl ang, ka ring mai ni lovin ka hria a ni. Thil țha lo lam ngaihtuah vak vak lo la, damloh chak loh lai chuan rilru hman vak vak hi a țha ngai lo. Ei tùr an pêk che chu ei tum zêl la, a tui vak lo a nih pawhin i taksa chak chhoh nân a țha tih i hre reng dâwn nia. Ei châk loh vànga ei loh tihte kha tih tawh miah loh tùr, i chak thuai theih nân i ei hrâm hrâm dâwn nia," tiin min hrilh ve nuap nuap a, ka lo 'aw' ve zêl tawp. Ka bulah a awm thei tawh dâwn si lo va, min ngaihtuahin ka chak chhuak har ang tih a hlau tih ka hre ve khiau a ni.

A tûka a haw tùr chu thlah duh teh mah ila ka thei dêr si lo va, mu reng chungin a che vêl chu ka en kual a, ka room ațanga a chhuak tùr chu a lo lêt leh a, ka nutei pawh zah zo lo chuan ka kut chu rawn vuanin ka hmuiah dam tê hian a rawn fâwp a, ka ngaih dâwn êm avàng leh amah chauha a haw tùr ka khawngaih êm avàng chuan ka mittui a tling pam nghe nghe; mahse, hmuhtîr erawh ka duh lo va, ka nuih sak a," Tluang takin i thleng dâwn nia," ka ti sap a, ani pawh chuan," Aw le, ka sawi kha hre reng la aw," a ti ve sup a, min en leh vang vang hnuah a chhuak zui ta nghâl a.

Ka ruak nghâl huai mai. A awm lo țan chauh a, ka ngai nghâl vawng vawng chu a nia, engtikah nge a rawn kal leh theih ang? A awm lo rei tawh si a, a lo kal thei har tawh viau maithei a ni, lo kal leh tùrin duh viau mah ila phût ngam chi pawh a ni tawh lo, ka ti buai rei tawh si a, in a thlen hunah pawh a buai dâwn lutuk tih ka hre tlang sa vek. A thu kha âwihin bike kha khalh chhin kher lo ta ila chuan...

Ka pain min ngaihtuah viau a, ka bulah țhu reng lêm lo mah se a lo lang leh vat țhìn, Dozer-a ve thung kha chu ka nutei awm lai tih loh chuan a awm ngai meuh lo thung. Ka harh hma ațangin, ka chanchin a hriat ațangin a ni zâwk ang chu, ka pa chu a lo phei vat a, tûn thleng hian Lungleiah pawh a haw phei ta lo rêng rêng a ni àwm e. Nikhaw hre lo khân ka awm rei deuh a, ka pa phei chu awm ngaihna a hre lo titih hial niin ka nutei chuan a sawi a, a sawi lai phei chuan mak ka ti tawp maw le. Ka harh har êm avàngin anni pawh an ngaih chu a țha tawh bîk chiah lo va, doctor an zâwt deuh chhên reng ni àwm a ni; mahse, Pathian zârah ka harh chhuak leh ta a, rin ai daihin ka țha chak lehnghâl a, a rûk takin inthlahrungin inthiam lo viau mah ila tih theih nei chuang hek lo i, dam țhat chhoh thuai thuai ka tum deuh bur a ni mai.

Ka pa pawh a haw phei ve rih a, lo phei leh thuai erawh a tum a. Tunah chuan zak-do-tiang nèn chuan ka kal sawn ve thei tawh a; mahse, doctor-in ka room chhuahsana kal a la phal lo. Ka lu tuamna an phelh tawh bawk a, ka lu hliam vàngin a hliamna bul ka sam sei țha lai pawh chu a bul rétah an lo chep thla deuh hlawk a, ui thu sawiin awmzia a awm tawh lo va, a țo sei leh hun nghah tawp a ni tawh mai.

Dozer-a awm lo chu khawhar viau mah ila Ruatpuia leh Benson-a an lo lang zing a, chhùn lamah chuan khawhar pawh an hnèm ve viau. Zàn lamah erawh a reh ngawih ngawih thei khawp mai, Dozer-a message tùr hi ka type dul mai țhìn a, signal a neih hun huna a hmuh tùrin ka thawn ziah. A haw hnuah vawi khat mah min la rawn be lo va, a buai viau a nih ka ring. Ni e, min rawn be tùr chuan tlânga chhoh ziah kha a ngai a, a kalna ber bike ka tih chhiatsak bawk si, min rawn be lo pawh hi ka hre thiam viau a ni. 

Damdawi in ka luh ațangin kâr thum chuang a ral leh ta. Tunah chuan a hma aiin ka changkãng leh tawh a, chhuah pawh ka cho tawh viau a, doctor kan ràwn pawhin ani pawh chuan naktûk emaw a tûkleh lam emawa ka chhuah theih tùr thu min hrilh a, ka lãwm viau a ni. Ruatpuia pekin ka chhuak dâwn tih hriain min rawn riahpui a tum tlat a, hnial hleih theih pawh a ni lo. Ani hi zawng Dozer-a ang lo takin a țawng duh a, a țawng bawrh bawrh peih reng a, a bulah hi chuan 'reh' a awm thei lo, nuihna pawh a ti tam, khawhar hman lovin min siam ka ti mai.

Lunglei lama phei nghâl lovin ka pateate inah ka awm leh phawt a, a chhan chu in-check deuh reng a ngai rih dâwn a, Lunglei ațang chuan a buaithlâk ve deuh hlek ka ti a ni. Ka chhuah zànah țhiante an rawn lêng a, Ruatpuia pawh a bãng lo. Ei tùr chi hrang hrang min rawn kensak liam liam hlawm a, chûngte chu kan ei a, kan titi a, a chângin kan nuiho leh dar dar bawk a. Hlimin nui ve hawk hawk țhìn mah ila ka rilru kil khatah Dozer-a a awm reng a, kâr hnih vêl zet kan inbe ta lo a nia, biak ka duh êm ëm laiin amah zâwkin min rawn biak hmasak miau loh chuan tihngaihna a awm dèr si lo va, a buai viau a nih pawhin rei lo tê tal min rawn biaka ka chanchin a rawn ngaihven chu ka ring ve a; mahse, a reh vung vung mai si a, a phone a chhia em maw ni ka ti hial, a nih loh pawhin a dam țha lo a ni hial lo'ng maw tihte ka ngaihtuah kual a, ka ngaih a țha lo lek lek tawh a ni.

*THIL TUM NEIIN NUNG LA, MI DANG NÈN INKHAIKHINA ANNI AIA ȚHA NIH TUM LOVIN I LO NIH TAWH ȚHIN AIA ȚHA ZÂWK ZÊL NIH TUM ZÂWK ANG CHE*