☆DOZER☆ - 31 By Dingdi Pachuau

☆DOZER☆ - 31 By Dingdi Pachuau

Ruatpuia'n damdawi in ațanga ka chhuah lawm nân chaw ei khâwm a rawt a, ka lo hnial nain Zela'n a lo pui vat thung a, a lo phûr lehpek khawp mai. Ruatpuia'n," Sa man tùr ka lo tum ang," a tih chuan Zela'n," A theih bîk loh, kan intum sem vek ang chu," a lo ti thung a. Benson-a chuan," Ni e, pawisa thawh zât tùr sawi ila, inzât vekin kan thawh ang, thawh tam bîk awm chu a fuh lo," a lo ti ve a, Ruthi chuan," Dik chiah!" a lo ti ve vat a, kei erawh chuan," A ngai lo tak tak asin, in buaiin hun in nei lo êm êm tih ka hre ve tho bawk. Damdawi inah min rawn kan a, inah lehzêl pawh min rawn tlawh leh vek bawk a, ka chunga in țhatnaah leh min ngaihsaknaah ka lãwm a, thil min pëk zawng zawngah ka lâwm êm êm bawk a ni," ka lo ti ve thung a.

Mahse, an ti lui ta tho a, pawisa ka thawh ve dâwn lahin an phal bawk si lo," Nang chu eng mah i thawh ve a ngai lo, i damloh kha, in i thawh hi a tâwk viau. Lo țhu mai mai la, min lo awmpuiin min lo thlîr vêl mai mai rawh, hotunu ber i ni rih e," an ti a, an sawi dik chiah bawk a. Eng mah la ti thei hek lo le, ka lo țhu a, ka lo kâwk kual a, hotu ber ang chuan ka awm ta a ni ber.

Chaw ei kham lamah sitting room-ah kan țhu khâwm tal tal a, mipaho chuan thingpui hâng an in a, Ruthi leh kei chuan thei thûr kan ei thung a, tui hliam hliam tak a ni. Kan thil ei chu a hmuhin Ruatpuia chuan," Tui in ti mang tak e! In duh dànah khân eng emaw a hnãi a ni lo maw?" Nui țhû chung hian a rawn ti a, "Ngawi mai mai teh, i ei châk chuan rawn ei ve mai la, pehhêl kher a ngai lo," ka lo ti a, Zela chuan," Hmeichheho hi zawng, hetiang ei châk deuh hun hi an nei bîk a, an thin lah hi a'n chhe thei khawp a! Pathian hian a siam danglam ve êm a ni, an thinchhiat tak tak lai hi chuan tawrh an har thei asin," a lo ti ve leh a, Ruthi chuan," Inla hre chiang mai mai!" a lo ti zauh a, kan nui ta dar dar a.

"In bulah ka tãl rei tawh a, ka hre chiang tawh che u alawm le," dang duh miah lo hian Zela chuan a rawn ti leh a, Ruthi chuan," Mood swing kan nei ve tehchiam lo aw, keini lo deuh mi dang tute emaw ni tê tê i hriat chian zualte an ni zâwk ang," a lo ti leh a, an inchhâng tâwk thei si a, nuih an ti za thei viau a ni.

Ruatpuia'n card te reuh tê tê pali chiah hi a rawn keng lang a," Ai ka en thiam asin, in card ațangin in future, in love-life țhen țhen chu ka hre thei ang," a rawn ti pek a, kan lo en țhap a, kan nui êm lo. Amah vêk chuan," Min rin loh hmêl hlawm hlê mai ka ti, ka țhianpa Magician-in min zirtîr ve alawm le aw... Engah nge min rin loh ngawt hlawm a?" a rawn ti leh a, a insawi rinawm bawk si a, kan nui leh ta vek, a nuih loh theih loh. Hei tak hi ka patea leh ka nutei lawm zâwng tak a ni țhìn a, ngainat pawh an ngaina rêng a ni.

"Min rin loh aiah, Ruthi en hmasa ber ang aw," a ti a, Ruthi chu card a shuffle-tîr a, nuihza ru tak hian ka lo en reng a. Ruthi chuan," Țha deuh min hmuhsak ang che," a lo ti a, ani lah chuan," I card azir a ni ang chu," a lo ti mai thung a. Card chu lain a han hnìm kual vêl a, ka nuih a za si a, ka lo khêk rãih nghe nghe. Inti mitak deuh hian card chungah a kut chu a'n vai kual vêl leh a, fiamthu bâk a rawn sawi chhuah ka ring lo hrim hrim.

"Tuna i bialpa ni mêk lakah hian i thîkthu a chhe ve a, tunah pawh hian a chungah i titau mêk bawk. Hmeichhe pakhat sam sen thir ther lakah i thîk tlat a, a chhe lo phian lehnghâl! Mahse, a lérhsan miah lo che."  Mak tih hmèl zet, ring ngam chiah lo deuh hmêl pu hian Ruthi chuan Ruatpuia chu a en hau a, kei chuan," A dik em?" ka lo ti vat a, ani chuan min rawn enin," A sawi dik tak tak a nih chu! A va mak tak!" a ti a, Ruatpuia chu en leh nghâlin," A ni tak tak! Engtin nge i hriat theih?" a ti ta ruai a.

Zela chuan," I inpuang vek alawm le, i thîkthu ti chhe lutuk mah ta che, in thîkthu hi in ti chhe ve hlawm êm êm ringawt zêl a, thil hre chiang tak tak si lo hian," a lo ti érh a, Ruthi chuan," I ninawm ziap zuap ngawt mai! Inngaizâwng inkârah thîkthu a awm lohte'n, an induh tak tak lo tihna a ni dâwn asin," a ti ve thung a.

A hnuah Zela chu a ensak ve leh a," Hmêl thar rawn lang hnai a awm," a tih chuan," Yess," a lo ti vat a, Ruthi chuan," I va han lêrh tak! Tenawm lutuk mai! Pakhata lungawi tum miah lo, a thar ti reng mai!" a lo ti êrh a, kan nui zo leh ta vek a. A hnuah Benson-a leh kei pawh min ensak leh a, Benson-a chu," Tlêm lai deuha mi kha a rawn lang leh dâwn a nih hi, lo man char tawh rawh," a ti a, kei ve thung chu," Nang hi chu a happening vak tlat lo, làwmawm lo lam a lang tam tlat," a ti a, a hmuh dàn sawi tùra ka tih fê hnuah pawh a sawi duh chuang lo. 

A thil sawi chu âwih vek lo mah ila ka ngaih erawh a țhat loh zual phah hlauh a, Dozer-a'n min rawn be har tawh lutuk pawh hi Ruatpuia hmuh dàn kha a ni ngei ngei ang, a damlo ngei a nih ka ring ta ber mai. Damlo chung chung chuan tlânga làwn kha a harin a peihawm dâwn loh a, chuti chu ni lo se min rawn be daih tawh ngei ngei ang. A damlo a nih teh chuan tuin nge enkawl ang? Kei lah heti mai hi ka ni bawk si, khawi mah kal thei ka ni rih si lo va.

Signal a neih veleha a hmuh theih tùrin message ka thawn țeuh a, a dam țhat leh țhat loh thu zâwtin ka ngaihtuahzia ka hrilh a, kei chu ka țhat tawh thu leh ngaihtuahawm ka nih tawh loh thute ka ziak chuai a, a hmuh theih hun hunah hmu țeuh mai rawh se ka ti a ni. Ka țawngțai ve țhìn tho nain ka țawngțai tam lo khawp a; mahse, hemi zàn ațang hian ka ngawrh ta deuh a, Dozer-a tân ka dîl deuh ber. Ani hi thil dang aia pawimawh berah ka dah a, kei leh ka chhûngte tân hi chuan a hnu lamah ka dîl țhìn thung. Damna leh hrisèlna țha neihtîr tùrin ka dîlsak ziah a, kan pahnih inkâra thil thleng pawh ka thlen vek tho. Tunah rih hi chuan eng thil mah ka ti thei rih si lo va, a nunna A kutah ka hlansak tawp rih a ni, A kutah ka nghat tawp a nih ber chu, a tâna dìlsak tawp mai loh zawng tih theih a vâng êm mai.

Ka pa min kanin a rawn phei leh tawh a, min lo ngaihsakzia ka hre chiang telh telh a, a chunga ka rilru put lo dik tâwk lohzia ka hre chho zêl bawk a, inthlahrung ru deuh takin ka pa chungah chuan ka lãwm hlê a ni; mahse, a hmâ daih ațang tawhin kan inkârah innèlna thük tak leh inpawhna tak tak, mi dang pate leh a fanuin an neih ang kha a awm ve lo va; mi fanute chu an pate'n an pawm a, an pua a, an damlohin an awm a, an duh zâwng an tihsak ţhin; kei chu ka pa khân pawisa hmangin min enkawl sei lian ka ti mai. Pa leh fa inkâra inhmangaihna, innèlna, inpawhna leh induatna kha kei chuan a takin ka hmu ve ngai lo va, khâng thil aiah khân pawisa ka hmu țhin thung a ni. 

Zanriah ei laiin ka pa chuan," Naktûk lamah i in-check-up ang a, result a țhat chuan kan haw phei thei ang chu a," a ti a, kei erawh chu ka lo ngawi reng a. Ka patea chuan," A țha tùrah ngai ang, indim thiam leh fîmkhur a pawimawh ber dâwn a, i ke kha la hman rim rih loh tùr tihna a nih chu," a lo ti ve a, ka pa chuan," Ni e, hman rim a ngai dâwn lo, ina awm mai mai kha a ni mai a, a peih leh dàwrah a nau a lo țhutpui ve mai mai ang a," a lo ti ve leh a.

"I ngaihawm dâwn mang e! I lo zin phei ve zauh zauh tho ang chu tiraw? I awm loh chuan a reh tawh dâwn êm asin," ka nutei'n a rawn tih chuan," Pathian zâra dam chuan ka rawn phei fo ang," ka lo ti vat a, a ni chiah alawm, ka pain min ngaihsak viau mah se ka nute nèna chènho leh chu thil châkawm zawk zawk chu a ni lo ve alawm, dam țhat vêk vâwk loh nèn phei chuan inrem lo tak tùr a ni.

"Nute, Dozer-a hian a rawn be mial che em? Min la rawn be miah lo va," tiin ka nutei nèn kan pahniha kan awm lai chuan ka zâwt sap a, ani chuan," Be miah lo. Engtizia nge maw ni dâwn ni? Ani hi phone a ti bo te hi a ni lo'ng maw?" a lo ti thung a, kei chuan a dam țha lo a nih ka rin thu leh min rawn be har tawh lutuk chu ka ngaih a țhat loh thu ka hrilh zui nghâl a.

"Eng êm a ti lo tùrah ngai ang, a buai viau pawh a ni thei tho a; mahse, kei chuan damlohna lam aiin a phone a ti bo a nih ka ring zaw mah," a tih leh tâkah chuan a nih ka ring ve ta deuh a, tlêm chuan ka ngaihțhat lohna pawh chu a kiam ve ta deuh e, sawi chhuah hi a lo țha a nih dâwn hi, ka nutei phei chu kan pahniha chanchin engkim hretu a nia, a bulah lo chuan sawi ngamna pawh ka nei lo rêng a ni.

Ka ngai a ni, ka ngai tak zet. A bula awma kuah leh vawng vawng pawh kha ka châk, a rim pawh ka hnìm leh châk tawh bawk. Tunah tak te hian eng nge a tih ang? Min rawn ngaihtuah ve ang em? Min ngai ve tho chuan ka ring a, a lo damlo tak tak a nih  phei chuan min ngai ve vawng vawng ngei ang, enkawltu a nei dâwn si lo, enkawl theih ka châk ngawt mai. Kawng țhenkhatah chuan inanna lai kan nei ka tia, tu mah nghenchhan tak tak theih kan nei lo ve ve a; mahse, tunah zawng kei chuan ka nei ve ta, ani zawng amah têin a la awm rak rak chu a nia. Kan thlalâk chu ka thlîr ka thlîr a, ka be pah reng bawk a, amah tê chauha ka lâksak pawh chu ka en ning lo, ka hmangaihin ka duh êm a ni, a bula awm leh ka va châk tawh tak êm!

A tûkah doctor chuan min en dik leh ta ngei a, ka result pawh a țha e. A sawi dàn chuan thlalehah en dik ka ngai leh ang, ke lam a nih miau avàngin fîmkhur a ngai ve tlat a, a dam țhat loh chuan ka bãi kumkhua thei tlat si a, bài chu zahthlâkah ka la chuang lo; mahse, Dozer-a bulah chuan hna tam tak thawh a ngai a, ka pui thei lo ang tih ka hlau a ni, a tân hnemhnãng lo lutuk nih ka duh dâwn si lo va, chu vàng chuan ka inenkawl țhat a ngai a ni.

Ka pa nèn Lungleiah chuan kan haw phei ta ngei a, pafa ni ve si, innêl bawrh bawrh leh inpawh tak kan nih hran loh avàng chuan han titi tùr a vâng hlê a, ka ngawi reng mai a, amah a țawng zauh zauh zâwk a, chuti ni lo phei se chuan kei chu ka ngawi tluan theiin ka ring. Bâkah, Aizawl kan chhuahsan ta si a, Dozer-a'n ka chanchin a hre ve dâwn si lo va, a buai loh hunah, a dam hunah min rawn kan tùra Aizawla a rawn kal hlauh chuan min hmu dâwn ta si lo va, a hrilhhai àwm mang e tihte ka ngaihtuah a, hrehawm ka ti a, chanchin inhrilh hriat theih dàn awm se ka ti tak zet a ni; mahse, tunah hi chuan kawng a awm hlawl bawk si lo.

Kan inah phei chuan Dozer-a ka ngaihtuah nasa zual, a chhan chu kawm tùr, min kàwm tùr țhian ka nei si lo va, Ruatpuiatehoin min rawn biak loh phei chuan ngaihtuahnaa chèn ngut ngut chu ka hna a ni deuh mai. Ka pain dàwra ka kal a la phal bawk si lo va, kâr khat vêl chauh ka la awm tihah pawh chuan ina awm mai mai chu ka ning hluah hluah tawh a ni. 

Zîng ka thawhin Dozer-a message tùr ka type ziah a, ka thawn ziah bawk. A lo hmuh hun hunah hmu mai rawh se, a pawi lo. Ka ngaihtuahin a chanchin ka hre duh a ni tih hria se ka duh a, a lo damlo palh hlauh a nih pawhin a dam hunah, tlânga a làwn theih hunah a hmu leh mai dâwn a, a phone a lo ti bo ta a nih leh hek duaina tùr a awm chuang lo  bawk, a lo hmu leh hlauh a nih phei chuan ka message a hmuh hunah a hlim viau dâwn asin.

Ka va ngai tak! A bula awm leh ka châk a ni. Ka ngaihzia hi sawi dáwn ila țawngkam ka thiam si lo va, ka sawi chhuak thiam lo zâwk ang, ka ngai êm êm hi a ni tawp mai. Hun lah chu a ral ve zël a, a reh dàn êm êm hi tunah chuan a damlo a nih pawh ka ring tawh lo, a chungah eng emaw ni tak a thleng a ni zâwk ang. Kan inbiak lohna thla chuang fê a ni tawh a nia, thil dik tâwk lo chu a awm a ni, a ni êm êm tawh lo.

Ka ke chu dam thuai thuai se ka tih vàngin a rûkin exer ka lâkpui nasa a, ka dìm vak duh tawh lo. Zak-dawh- tiang pawh ka hmang țha peih vak tawh lo va, chu ai chuan ka ke chu ring ve țan tawh ila, ka ring tak tak hma thei zâwkin ka ring. Hetia awm reng ringawt zawng a dik thei tawh lo, eng emaw ka tih a ngai. Dozer-a chanchin hre tùra eng emaw ka tih a ngai a ni.

Aizawlah ka ke chu check tùrin kan kal leh a, chutah chuan ka nutei chu Dozer-a'n a biak leh biak loh ka zâwt leh a, ani pawh chuan a hmaa  min chhàn dàn ang tho khân min chhâng leh a. Min biak loh thu ka sawi chuan," A mak hlê mai! I patea hi a rawn bia a nih chuan ani hian min hrilh ve àwm tak chu a nia, a rawn be bîk lo a ni ang. Engtizia nge maw ni le?" a lo ti ve a, mak a ti ve viau a ni ang.

"A chanchin hre tùra chhuah mai ka duh tawh a ni," ka ti ringawt a, ani chuan," I ke kha ngaihtuah a la ngaih êm kha, i pain a hre hlauh ang e, a hriatah phei chuan sawi lan chi miah loh, a ngaihtuah êm che hi," a lo ti ve thung a; mahse, kei erawh chuan," Awm mai mai hi harsa ka ti tawh a ni, nute. Hetia a reh ta vang vang ringawt mai hi țawngthu chhe loah, thil țha lo tak a chungah te hian a thleng tawh pawh a lo ni thei asin, ka ngaihtuah ngut ngut zêl," ka ti leh a. Ngaihtuah ka duh loh thleng thleng ka ngaihtuah kài hlauh chuan thil țha a ni dáwn hauh lo.

Zànah ka țhiante an rawn lêng leh sap sap a, Ruthi erawh a rawn kal hman lo, inneihna lamah an buai a ni àwm e. Mipaho chu sitting room lamah an inkàwm khâwm tal tal a, kei pawh an rawn lèn chhan ka nihna angin an bul hnai deuhah an titi hre phâkin ka lo awm ve reng bawk a.

A tûk tûkțhuan ei laiin," Pa, vawiina ka result a țhat leh chuan zin chhuah lawk ka duh dâwn a nia," ka ti chhuak ta nge nge a, ka nutei'n min rawn melh zawk tih ka mitsîrin ka hmu reng a; mahse, Dozer-a hming ka lam ri chuang lo va, ka pa hi chuan a hre thiam chuang lo tùrah ngai ang.

"Khawiah maw?" a rawn tih chuan," Ka țhiannute khuaah maw le," tiin dâwt ka han sawi zauh a, ka inthiam lo deuh zat bawk. Ani chuan," I duh phawt chuan kan kal dâwn nia, ni hnih khat bâk a ngai chuang nâng, tiraw?" a lo ti awlsam thên a, chu erawh chhànna ka beisei loh lam tak a ni.

"Keimaha kal ka duh zâwk asin," ka tih leh chuan," Ni lo ve, i ke a la dam chiang lo va, mahni chuan ka chhuahtîr thei lo ang che," a ti leh ta tlat mai a, ka patea chuan," A dam chho ve zêl ang chu a," a lo ti ve a, kei chuan," Aw, a dam tawh lutuk, vawiin bâk hi chu doctor-a kal pawh a ngai tawhin ka ring lo," ka lo ti thuai thuai a, result țha tak ka neih ka beisei a ni.

Ka ke result chu țha mah se ka pa chuan keimaha ka zin chhuah chu a la phal tlat lo va, kan pahniha zin ka duh bîk si lo, Lungleiah kan phei leh ta a, kawnga kan tlàn lai chuan," I țhianpa Ruatpuia kha a fel reuh hmèl kha, a chezia ațang khân mi rethei chhûngkua ațanga chhuak a ni lo tih a hriat viau bawkin ka hria. Țhian i nei fel hlawm viau mai," a ti luam a.

"Ni e, an fel hlawm khawp mai," ka lo ti ve sap a, kan ngawi dùn vang vang a, a duh tâwk mai dâwn emaw ka tih laiin," Ngaihzâwng hi thlan thiam a ngai a nia, hmeichhia phei chu in thlan thiam chuan zàn khatah officer in ni thei nghâl a nia. Felfeli pawh ka rin aiin a thlang fuh a, rilru nuam vak lo chung khân ka thlah kha a nia; mahse, pasal a lo nei fuh êm mai, i dam chian deuh hunah kan la zin chho dâwn nia, i hmu châk lo'm ni? Bâkah, i pasal tùrte pawh kan zawng ve pah ang a," nui sûng chung hian a ti leh sárh sârh a.

"Pasal neih lam ka la ngaihtuah ngai miah lo," ka lo ti ve thung a, ani chuan," E khai! Kum 30 i tling tawh a, pasal lam i ngaihtuah a hun ve tawh a ni. Hmeichhe tân chuan in hmangaiha in duh ëm êm ai chuan nangmahni hmangaihtu in thlan thiam a ngai. Rethei taka nun hman chuan hlim a har, i ngaihtuah ngai em? Kan kawmthlang thlangleha nupa pakhat pawh khu an rethei a, hlim nî hmêl an hmu ngai hleinem. An inneih hlim kha chuan an hlim dùn ve lutuk; mahse, sum a awm loh miau chuan hlimnain rei a tlin thei lo a ni," a ti leh malh malh a.

Ka ke dam chian deuh hun chu ka nghâk ngat ngat a, hei vàng hian ka pain zin chhuah a phal lo va, chu vàng chuan a dam thuai a ngai, a dam veleh ka zin tak tak ang, ka pa ka dìl chuan a phal lo leh ang a, eng eng emaw chhuanlam a siam leh ang a, buaina zakhua a tam mai mai, dam veleha ar kawh chhuah ve tawp mai tùr a ni. 

Thil eng emaw a thleng tih chu ka ringhlel tawh lo va, chu thil thleng chu hriat ka châk tawh a ni, Dozer-a bul ka thlen hma chuan ka hriat chhuah pawh ka ring lo, chu vàng tak chuan a bula kal thuai thei tùra ka ke hi ka tih dam chiangkuan a ngai tawh a ni.

Ka nu nèn pawh kan inbe tam lo nain min huat hmêl deuh leh min ngaithei lo hmêl ang kha chuan min en tawh bîk lovin ka hria. Henry-a erawh a țawng tlêm lutuk a, kawm ngaihna pawh ka hre lo. 'Vawiin lam i inhralh țha thei maw?' tih chu ka biak dàn tlângpui a ni deuh mai.

"Dozer-a em ni kha, kha pa kha chu la hmu miah lo mah ila ka ngei ve ringawt. Amah vàng luau liauin accident i tawh phah si a," Henry-a'n a ti ve khiah a, a țawng hi hriat tùr a tam lo va, hetia a țawng ve mai hi mak ka ti.

"Amah vàng a ni hleinem, ka thiam loh zâwk alawm, a rem ti vak lo chungin a bike khalh chhuah kha ka dîl a, a thiam loh pakhat mah a awm lo," ka ti ve ta duah a, ka nui pah deuh a. Kan in leh a chhûnga chêng ngei, kei tih loh, kâ ațanga Dozer-a hming leh chanchin sawi rîk a ni hrim hrim chu ka lãwm a ni.

"A-pain ' Dozer-a thiam loh vek a ni, court-ah ka khing lo va, a vànnei  ngawt zâwk mai, dam chhûnga lung in tãng tlâk a ni' a ti bawk sia, ka va hre thiam lo!" Hriat thiam loh hmèl taka a tih chuan," Ka pain chutiang chuan a sawi maw?!!" ka lo ti vat a, a țawng duh lai hi chuh teh ang.

"Aw, ti e. I ngaihzâwng niin a sawi bawk a, a thin a rim zual khawp mai."

*HMASÂWN TUMA I BEIHNA

 KAWNGAH KHÂN MIIN I ȚHA TÂWK LO NIA AN SAWI VÀNG MAI CHE KHÂN CHAWLH PHAH DAIH CHUANG MIAH SUH, MI DANG NGAIH DÀN AVÀNGIN I HUN LEH NUN HLUTNA KHA A KIAM PHAH NGAI LO TIH HRE RENG ANG CHE*