☆DOZER☆ - 32 By Dingdi Pachuau

☆DOZER☆ - 32 By Dingdi Pachuau

Zanriah ei laiin," Pa, chaw ei khamah ka room-ah ka be lawk thei che ang em?" ka han ti a, ani chuan," A va pawimawh àwm ve! Eng thil nge ni ta a?" a lo ti ve mai a, kei erawh chuan," Chaw ei khamah le," ka ti thung a, ka nu chuan," Paa, chaw ei khamah kalna tùr kan neih kha aw," a lo ti nêm duai a, ka pa chuan," Ni dâwn tak e. Ka lo hre leh tawh hleinem le, a va peihawm loh si e, ka chau ru riau asin," a ti leh a, ka nu chuan," Chauh thu sawi chi a ni nâng, kan tum tawh kha," a lo ti leh a, ni e, ka pa chuan chauh thu sawi mah se a kal lo dâwn lo tih ka hre chiang viau a ni.

Chaw ei khamah thlèng ka sil a, ka ke a dam chho ve zêl a, hmun tih fel leh thlèng sil mai maite chu ka tih theih ve êm avàngin ka ãwl duh bîk lo va, Henry-a erawhin hmun phiah lamah min pui ve ţhìn thung. 

Ka room-a ka luh hnu rei vak loah ka pa a rawn lût a, hun a neih ka lo ring lo asin, a inthuamna ațang chuan an chhuak tawh dâwn tih ka hre nghâl a, biak reina hun a awm dâwn lo.

"Pa, Dozer-a vànga accident ka ni lo asin, naupang sut ka duh loh vàng chauha accident ka ni. Dozer-a'n thiam lohna pakhat mah a nei lo," ka ti nghâl a, a thin a rim ang nge rim lo ang tih pawh ka ngaihtuah duh lo, sawipui ni lovin hrilh ka duh ve hrim hrim, ka accident chhan kha Dozer-a vàng a ni lo tih hria se ka duh ber a ni mai.

Ani chuan min rawn enin," Kha thil kha sawi chhuah ka duh lo, a hming phei kha chu ka hriatah lam ri tawh miah suh, amah vàngin ka chân țêp che a, i bul hnaia a awm pawh ka rem ti tawh lo, ka duh miah lo," a ti ta hmak hmak a, a meng rum lutuk lo nain a thin erawh a rim tih a hriat theih tho.

"Pa, ka thiam loh zâwk vàng a ni ka tih chu, amah vàng a ni lo. Ani phei chuan bike ka khalh chhin pawh kha a phal lo nghe nghe asin, ka tih luih tlat vàng a nia, thiam lohna a nei lo," ka tih leh pawh chuan," Duh tâwk teh ang, kalna tùr ka nei a. Kha pa chungchâng lam rêng rêng kha chu sawi chhuak tawh miah lo la, a țha ang, a chanchin hriat leh a hmêl hmuh leh pawh ka duh tawh lo. I tân pawh a țha lo, i dinhmun hre sa vekin a thlêm lunglêng che tih a hriat reng a, tlangvâl senior rilru fîm ker kawr chin a ni a, i sum vàng leh i hmêl vàng maiin a hnaih che a ni, a tân chuan hlêp hlang niin i țha lutuk si a, nangin a thil tum hre hauh lovin thianghlim takin i hnaih thung a, a thil tum kha ka duh lo. A bulah pawh ka hrilh chian viau kha, a rawn beisei ngam tawh lo ang che. Nang pawhin theihnghilh hmak tum rawh, mi dang țha tak tak, i kum rualpui deuhte pawh an tam ëm hi. Ka kal dâwn," a ti leh hmawk hmawk a, room ațanga chhuah pah chuan," Khatiang mi mai mai tân ka enkawl sei lian lo che a nia, hre reng ang che," a ti zui leh a, che lovin ka dinna ngaiah ka ding reng ringawt, mak ka ti lutuk!

A hnu daihah khum bula chair-ah chuan ka țhu hnawk a, ka pa thil sawi kha ka ngaihtuah lêt leh a, mak ka ti tak zet a ni. Ka pa, ka accident lai ațanga tûn hun thleng pawha min ngaihtuah êm êmtu țawngkam chu a ni si a, min ngaihtuah ëm ëm vàng leh ka thih mai a hlauhthàwn vàng a ni ang, a ni dâwn sa, bãkah, nichin a thil sawi kha rilru fîm tak pu lovin a sawi mai mai a ni ang, a rilru tak tak a ni thei lo, min ngaihtuah vàng chauha sawi mai mai a ni. Keimah vàngin a thin a rim a, Dozer-a chungah ni lovin, a fanu hi min ngaihtuah êm vàngin a rilru a fîm lo va, ka accident thuin a dêng dawt si a, min ngaihtuah lutuk leh hlauthãwng rilru fìm loh lai takin Dozer-a kha a hmu ang a, a țawng khum ta a ni ngei ang. Dozer-a tak chu aw, ka va lainat tak! Damdawi inah min tlànpui dàwr dáwr a, a rilru a hrehawm a, a hna zawng zawng kalsanin min awmpui reng a, min ngaihtuah lutukna lamah mutmu pawh tuah thei lovin a awm bawk a,  làwm thu hrilh mawlh mawlh tùr zâwk asin kan nih, hrehawm a tih dâwn tehlul nèn, ka pain ka accident chhanah a la puh zui ta a nia, a rilru a lo va hrehawm zual dâwn tak êm!

Mahse, a hmêlah khân chutiang lam chu pakhat mahin a lantîr si lo chu a nih kha, ka hriat miah loh kha. A rilru chhûngril a lo va hrehawm dâwn êm! Ka bulah a lo inthup hrâm hrâm tihna a ni si a. Kha vàng kha a ni ngei ang, ka pa awm laia ani kha ka hmuh khàt êm êm ni, Dozer-a ka hmuhin ka pa ka hmu ngai lo thung bawk a. A lo nih chiah dâwn kha, kei lahin pakhat tê mahin ka lo hre hauh si lo, hriat chu khawi lamah, ngaihtuah pawh ka ngaihtuah chhin lo hrim hrim!

Ka accident hlima Dozer-a hmêla inthiam lohna, hlauhthàwnna leh pawi ti inchhîr hmël kha ka mitthlà lêt zawr zawr a, mahni inthiam lohna vànga rilru hliama awm tawh sa ka pain a rilru hliamah chì a'n phul belh leh nghek tihna a ni a, a tâna a hrehawm dàn tùrzia chu ka ngaihtuah thiam phãk lo zâwk.

Ka thaw hawk hawk a, mahni inthiam lohnain ka khat a, Dozer-a chan ka ngaihtuah a, ka khawngaih êm êm bawk. Ka thiam lohnaah thil awmzia hre hauh lovin a chhia zawng zawng ka pain a chungah a bûrbun vek si a, a tân a na dâwn êm asin, a nat bâkah a zahthlâk tel bawk ang. Ka ngaihtuah lêt leh a, haw tùra ka tih laia min hnial miah lote kha, a haw dâwna a thil min hrilhte kha... Aw...lo hre ngat ila chuan haw tùr khân ka ti hauh lo ang a, ka chelh tlat zâwk ang maw le.

Ka mittui a tlâk khàt tawh nèn, hemi zàn zet hi chuan ka insûm thei ngang lo a ni. Ka mittui a tla zawih zawih a, Dozer-a ka khawngaih êm vàng leh ka ngaih êm vàngin, mittui tlâk a phû ngawih ngawih êm asin. A bula awma ngaihdam dìl mawlh mawlh ka duh tak zet a ni. Ka ngai zual vawng vawng a, a hmêl hmuh leh pawh ka châk; mahse, ka hmu ngam tawh kher ang em? Țawng khum a nih hnuah ani pawhin min hmu duh tawh kher lo maithei asin.

Ka ni tin hun hman dàn chu ka ning tak zet. Ka pa lakah ka inthlahrung ru zual tawh a, biak pawh ka be khât ta, ka nu nèna kan inkâr lah țha tak a ni lo sa hrim hrim a, tunah phei chuan ka ngaihbel nge ni, min en dàn a dik lo zualin ka hre tlat a, inbiak tlèm tawh nãklaiin, kan inbe tlêm zual. Henry-a erawhin ka rin loh deuhin min be hmasa zâwk ta zauh zauh a, dàwr ațanga a rawn haw pawh hian ka ei châk zâwng nia a rin hi min rawn hawnsak ve deuh ziah bawk.

Ka ke chu dam chiang lehzual thei tùrin exer ka lãkpui reng a, a dam chian veleh zin ka tum a ni. Ka pa ka dîl leh ang a, a phal emaw phal lo emaw ka zin tho ang. Dozer-a hmuh ngei ka tum ruh hlê a, min lo hmuh duh leh duh loh chu thu hran, ka hmu ang a, ngaihdam ka dîl ang. Khatia ka pain a sawi vàng mai khân hmuh tawh loh ka tum rêng rêng lo, ka hmu ngei ang, ka hmuh ngei ngei a ngai.

Ruatpuia min rawn kan tùrin a rawn zin phei a, ka pain țha deuha a lo biak sawt sawt avàngin ka ngei ru deuh ngawt a, ka nu ni se ka pain a hrilh tawh a ni ngei ang, a lo be țha êm ëm bawk a, ka nuih pawh an ti za lo, ka lo zak zâwk a ni. Ka bialpa bàwlin an bâwl ka ti mai, a ni dèr si lo va, chu vàng tak chuan ka pate chu ka ngeiin ka lo zak bawk a ni. Ruatpuia pawh fel ti viau mah ila min rawn kan kher a ngai pawh ka ti lo, ka pate'n țha deuha an bia chu nuam a tih hmèl ropui bawk si a, zêp lohah chuan ka ngei ru deuh hlek a ni, ka thaw hawk a, Dozer-a chunga thil thleng vàng hian ka rilru a dik hlei thei tlat tawh lo.

Hun a liam a, ina awm reng chuan Dozer-a ka ngaihtuah reng a, mahni inthiam lohna leh hrehawm tihnaa ka khah tlat avàngin ina awm reng chu ka duh tawh bîk lo va, Henry-a dàwr kal ka zui ve ta ta. Scooty ka khalh ngam a, ni tin ka chhuak ve ta a, ka pa erawhin a la phal lo khawp mai, ka nat belh a hlau a ni; mahse, ina ka inkhung reng zawngin ka hlim thei chuang si lo va, rilru hrisêl lovin ka awm reng a, hrehawm ka ti a ni.

Hmêl thar ka hmu ni tin ta a, ka rilru kal ding thei deuh pawh chu ni tina ka buai ve deuh tâkah chuan a zia ve ta deuh, min dàwrtu awm loh kârah Henry-a'n min be zauh zauh bawk a, ka ngaihtuahna ka kàwm reng thei lo va, Dozer-a ka ngaihtuah ngut ngut thei ta bîk lo. Ni tina inzuia awm tlâng ve ta reng chu, Henry-a mizia pawh ka hre chho ve zêl a, nu leh pa thu âwih thei tak niin a nungchang a lo sual hran miah lo, ka nu fapa a nih vàngin min en hrang deuhin ka ring ru țhìn kha a nia, a awm dàn ka chîk reuh reuh hian chutiang chu a nih ka ring ta lo. Kei hian ka lo ring chhe ve deuh ngawt a, keimah hi ka lo dik lo zâwk a lo nih dâwn hi.

November thla tàwp kan chuang kai a, ka ke pawh ka hmang ngam viau tawh nain tlêm chuan ka la kal bãi deuh hlek a; mahse, ka pawisa tawh lêm lo. Dozer-a hmu tùra ka chhuah a ngai tawh ka ti a, dam ver vawr tùr chuan nakkum lam daih nghah a ngaih dâwn avàngin Krismas hma ngei hian ka kal chhuah a ngai a ni.

Mi dang hriat lohin ka pa chu zin chhuah ka dîl ta ngei a; mahse, a phal lo bur. "I la dam chiang lo, i la bài tlat kha. Zin i duh țâlh erawh chuan ka hruai mai ang che," a ti tlat a, keimaha ka chhuah chu a rem ti tlat lo; mahse, țhulh ka tum lo bur thung a, a chhan pawh Dozer-a ka hmu lo rei tawh a, ka hmuh ngei a ngai a ni.

"Pa, dam ang tluk a ni tawh alawm, ka duh duhin ka hmang kual thei tawh bawk a, chu vàng chuan zin ngei chu ka duh a ni, rei ka awm lo ang," ka ti leh a, ani chuan chîk zeta min rawn en chung hian," Khawiah maw zin i tum? A va pawimawh àwm ve a?" a ti a, dâwt deuh reuh ka sawi dâwn avàng chuan ka hawi sawn phawt a," Pawimawh ve tho, zin harh ka duh a ni, ka rei lo ang," ti chauhin ka chhâng a, a dik lo êm êm chuang lo, zin harh ka ngai miau a, Dozer-a hmu tùrin.

"Kha pa hmu tùr khân zin i tum tih min hrilh miah suh," a rawn ti ta hmuk a, ka lo ngawi reng a, amah vêk chuan," Ka fanu i ni a, i tâna țha tùr ka duh ber a, nu leh pa duhpui ngei ngaihzâwng neiha nupui pasal neih hi kawng engkimah an tluang țhìn. Nang phei chu i sual lo a, i fel a, i rilru pawh a tluang êm êm, i pa duh loh zâwng hi i kawp chhunzawm lo ang tih pawh ka beisei tlat a ni," a tih chhunzawm leh a.

"Mahse, ka accident chhana i puh kha chu a dik lo asin, amah vànga accident ka ni lo ka tih tawh kha," ka  lo ti a, ani chuan," Engah nge a nih loh ang? Kha hmunah khãn va kal lovin a bike-ah khân chuang lo ta la, accident i tâwk miah lo ang. Engah nge a bike chhe țãwng zetah chuan a lo chuantîr rêng rêng che? Engtin pawhin sawi mah la, amah vàng a ni ka ti tho tho," duhthawh taka a tih leh chuan sawi ngaihna pawh ka hre tawh lo zâwk! Sawi sawi mah ila a ngaih dàn hi ka sawh sawntîr theih ka ring lo.

"I têt tê ațanga ka enkawl sei len i ni a, mi aia i hniam hlau rêng rêngin hun ka hmang a, i tân tiin ka thawh chhuah zawng zawngin ka chãwm che a, ka theihtâwp chhuahin Mizoramah pawh i zir duh lovin Vai ramah, school țhaah ka dah che, ka thu i zàwm lo ngai lo a nih kha," a ti a, a chàwl det a, chu lai tak chu remchângah lain," Pa, khatih lai khân hmun danga awm lova i bula awm kha ka duh ber a ni asin," tiin ka lo inrawlh vat a, ka pa erawh chuan," Zirna țha ûma mi phêt suau suau laia chutiangte lo sawi, sum an neih loh vàng chauhin alawm hêng lai school-ah mite hian an fate an kaltîr hlawm mai mai ni. Ka fanu i ni a, i tân zirna țha ka duh, nu leh pa bula awm reng chu puitlin theih lohna a ni a, puitling taka i awm ka duh a, hei i lo puitling ta viau bawk; mahse, ka sawi leh ang, kha pa kha i tân ka duh lo tih ka hrilh tawh che a, chu chu i zawm ngei ka duh a ni. I tân mipa țha a ni thei lo, a upat bâkah khatiang mî tlahlang lutuk kha chu belhbul loh a him ber. I accident chhan a ni a, kha, tûn thleng pawhin i la dam chian theih miah loh kha, ka rilru hi a la dam thei hleinem, lo harh chhuak thei lo ta la, kha pa kha ka sawisa hlum thei hial ang chu," a ti leh bawrh bawrh a, tunah chuan ka ngawi kar tawh. A thin ka tih rim belh niin ka hria a, Dozer-a chanchin chu sawi loh, zin chhuah lam dìl pawh hi a fuh chiah tawh lo niin ka hria.

Mahse, zin ngei chu ka duh si a, a phal lo chung hian ka kal lui tho ang em? Lo kal lui ta ila Dozer-a chungah eng thil emaw tak a ti duh mai lo'ng maw? Chu tak chu thleng tùrin ka duh hauh si lo, engtin nge ka tih tâk ang? Ruatpuia puihna ka dîl mai dâwn em ni ang? Ani khân min hre thiam viau a, kan chanchin ni se a hre vek bawk a; mahse... ka duh leh lo, mi puihna dìl ka duh lo, ka harsatna a nia, keimah ngeiin ka chinfel a ngai a ni.

Ka ngawi chhunzawm ta rih a, zin dìl remtihna chu ka tân chuan vàna rah ang a ni ta rih si a, rilru hlim loh nâklaiin ka hlim lo zual a, dik tak chuan dàwra kal pawh ka phûr tawh lo, ina awm ka peih bawk si lo. Ka nuin ka pa leh Henry-a awm loh laiin eng emaw hlekah min țawng khum leh fek țhìn bawk a, huat deuh theih ni bawk si lo, vih ni lovin ka thinlung hi a na vawng vawng țhìn. 

Vànneihthlâk takin ka ti dâwn nge, ka nutei'n zin tùrin min rawn sâwm ta hlauh mai a, ka pa a rawn phone zâwk hlauh lehnghâl a," I nutei'n zin tùrin a sâwm che a, zin kha i duh bawk a, va zin ta che," min tih laia ka làwmzia mai chu a! Ka pa thil min hrilh tawh zawng zawnga ka la làwm ber țum leh ka la hlim ber țum a ni ngei ang chu.

Scooty ken a rem ti si lova, sumo-in ka phei ta a, ka pateate in chu ka va thleng ve ngei alawm, zan khat ka riak a, zanriah kîl laiin thil awm dàn ka hrilh vek a, Dozer-a hmu tùra zin chhuah ka duh thu pawh ka hrilh zui nghâl a. Ka patea chuan," Hmu ta la engtin nge i tih chuan ang?" a lo ti zauh a, kei chuan," Ka pa aiawhin ngaihdam ka dîl ang, chuan, làwm thu pawh ka hrilh duh pah bawk a, min enkawlna, ka accident ațanga damdawi in min hruaina leh min awmpuina zawng zawngah pawh mumal takin làwm thu ka hrilh hleinem," ka ti duah a.

"I pain hre chhuak ta se? I hlau lo em ni?" a ti leh a, kei chuan," Ka hlau ve tho, Dozer-a chungah a țuan ang tih ka hlauh vàngin a thu pawh ka hnial ngam lo rêng a; mahse, tûn hun bâka hun remchãng hi ka hmu kher tawh lo maithei a, hmuh ngei ka duh a ni," ka lo ti ve leh a.

A tûkah Dozer-a hmu tùrin ka patea scooty chuan ka inkhalh chhuak zui ta nghâl a, motor hman mai ka tum kha a nia; mahse, ka patea'n," A awlsam zâwk ang, i thleng hma thei zâwk bawk ang a," a tih tlat avàngin remchâng dâwn riauin ka hria a, ka hnial phal ta lo a ni. 

Ka hrilh sa si lo va, ka țhâwng thut mai ang ka ti tawp. Reservation siam tùr chuan kâr khat deuhthaw ka nghah leh a ngai dâwn a, hun ka nei lo, hun a awm tawh lo. Ka phúr a, ka helhhawlh a, chutih rualin min lo hmu duh lo palh mai ang a tih ka ngaihtuahna kil khatah chuan a awm ve tho. Eng pawh ni se, thleng tawp phawt ila a țha vek mai ang, min lo hmuh duh loh tâk leh, ka la ngaihtuah țha leh mai ang chu.

Tluang angreng takin ka thleng a, gate bulah dingin gate chu ka thlîr vang vang a. 'Min hre thiam hrâm mai rawh aw, Dozer'  ka ti sap a, harsa ti takin gate-ah chuan ka láwn ta a; mahse, ka tum ve ngar ngar bawk a, ka lãwn liam thei hrâm. Ka țum thlâkna lamah ka ke lah chu ka tih nat belh deuh zui a;l, ka bäi auh auh mai; mahse, a pawi lo, Dozer-a ka hmuh hunah gate-a rûkhmang ang maia ka làwn liam avàng chuan ngaihdam ka dîl ngei ang. Phone a hman ve theih si loh a, gate pâwna din reng ringawt zawng, a fuh ber tlat lo a ni.

A chènna lam ka pan zui nghâl a, kein ka kal khât zual deuh a, ka ke pawh a kham khawp mai. Khaw vawh lai a ni bawk nèn, a na kham ngut ngut zui a; mahse, pawi ka ti lo, ka tuar thei lutuk, Dozer-a ka hmu ang a, a dam vek mai ang.

A in bul ka thlen chuan ka ding ta rih a, ka áwm ka dawm a, ka hah avàng chuan ka thaw rang hlê a, ka thlan pawh a tla thei hial a ni. Ka tháwk a zia deuh hnuah chuan a hmingin ka ko ta a, chumi pah chuan a in panin ka kal pah bawk a.

"Dozer, Dozer, ka lo kal a nia, inah khân i awm tiraw?" ti lauh lauhin a in hulhliap chin ka thleng a, kawng ka kik hma chuan kawngkapui chu a rawn inhawng a, Dozer-a hmuh inringin ka nui a; mahse, Pa Țhianga hmêl ka hmu zui ta zâwk a, ka nui hmêl chu mak tihnain a thlâk chiang ngawt ang chu!

"Pa Țhianga maw?!!" Ka tih rual chiahin," Teruat, teh thut che chuan!" a rawn ti ve nghâl a, kan  inhmu thut chu mak kan inti tawn ve ve a nih chiah hi.

"Khawnge Dozer-a?" ka ti leh a, ani chuan," A nute tlawhin a zin a, a lo la haw thei lo a nih hi," tia min chhângin," Engtin nge i lo luh theih a? Gate a inkalh si a," a tih zawm leh a, kei chuan," Ka rawn lâwn liam tawp mai," mahni inthiam lo ru tak chung chuan ka ti sap a, chutah," Dozer-a chu hmuh ngei ka duh asin le, a nute khaw hming chu i hria em, Pa Țhiang?" ka ti leh a. A hma khân min hrilh tawh ngei mai a; mahse, ka hre chhuak thei tawh lo, khaw hming hi chhinchhiah har ka tih ber pâwl a nia, tunah pawh ka hre reng thei ta lo rêng a nih hi.

Inah min luhpuiin thingpuite a lum a," Zanin chu hetah riak phawt la, i la ngaihtuah țha dâwn nia," a ti a, kei chuan tûn là láa kal nghâl mai ka lo duh asin! Chu chu ka sawi chuan a lo chek tlak tlak a," A hlâ asin, tuna kal chi a ni tawh lo, khua a thim thuai tawh dáwn a, naktûkah hma deuh hlekah i chhuak záwk dâwn nia," a ti a, puitling zâwk a ni a, a ngaih dàn pawh chu a dik lo ka ti lo; mahse, zàn han riah ngawt chuh! Ka rilru puthmang nèn a inmil hlawl lo.

Scooty dah țha tùrin kan lêt leh a, ka riahna tùr Rûn no. 3 chahbi pawh min pe nghâl thlap a, chu ina ka han lût leh chu ka lung a chhe lek lek a ni, ka hmuh lohna a rei tawh a, ka lung pawh a ti lêng reuh viau mai. Dozer-a awm se chuan aw...a nuam dâwn asin.

Pa Țhianga'n Mizoram map nèn ngat Dozer-a nute khaw kal dàn chu min hrilh fiah ta thlap a, lehkhaah pawh min ziahsak nghe nghe. A fel roh a nia, Dozer-a pawhin a rin êm êm chhan hi a fel êm vàng hi a ni ngei ang.

A tûk zîngah scooty chuan ka chhuak leh a, Pa Țhianga'n gate pâwn thlengin min thlah a, tluang taka kal tùr leh kan inhmuh huna hlim taka hun hmang tùrin min chah a, nui var varin," Aw le, ka lãwm e, amah pawh ka lo biak dâwn che nia," ka ti lêt ve a.

Remchângah petrol ka la a, ka nutei ka phone zui bawk a, Dozer-a hmu tùra a nute khua ka pan thu ka hrilh chuan," Teruat, i ke kha, a nat phah ang tih ka va hlau êm! Dìm viau rawh aw. I chanchin chu i patea bulah chuan ka lo sawi dâwn nia, lungngai suh, a thin pawh a rim lo ang," a rawn ti dam diai a, ka nutei felzia tak hi chu aw!! Lungawi vak lova min zilh deuh ka ring mai mai a nia, ka nui var var thei ta.

Mizoram chhûngah hi chuan kawng bo ka tum lo ve hrim hrim a, khuaa mite ka zâwt pah zêl bawk a, ka la tlãn dik zêl bawk. Scooty-a tlãn reng ka ni bawk a, a váwt angreng khawp mai. Lunglei leh Phaizawl lam aiin hêng lai chu a lo vâwt daih lehnghâl a, ka thuamhnaw ken a tlêm si, ka inha lum zo pawhin ka ring lo, tunah pawh hian tlãn thaw ka ni bawk a, vâwt ka ti er er.

Kawng hnai bera kal ka ni a, ka tlãn chak lutuk lo nain Dozer-a nute khua nia Pa Țhianga sawi chu ka thleng țêp tawh. Kawng zau deuh laiah dingin ka phone ka phawrh a, Dozer-a numbet chu ka hmet chhuak a; mahse, a ring lo hrim hrim, signal a nei lo a ni ang. Ni e, signal awmnaah a kal lo tawp ang, hna a thawk lehin ka ring.

Dozer-a nute khua chu ka inkhalh thleng ve hlawl mai a, tlài pawh a tlãi tawh viau mai. Dâr 3 a ri țêp tawh a, thlasik lai a nih vàngin ni a rei lo lehnghâl a; mahse, ka thleng tawh a, khua a la thim lo va, a tihzia khawp mai. Thingtlâng khua niin a lan dànah chuan a fai viau a, a lang  changkãng angreng viau nain in erawh a tam hmèl lêm loh viau. Dozer-a nu hming ka hria a, Dozer-a ka hre bawk a, mi ka zâwt ang a, an in awmna chu ka hre chhuak thei tùrah ka ngai.

Mi ka zâwt ta zêl a, an țawng tlêmin a ãwn deuh em maw ni chu aw ka ti. Tlâng lam deuh min kawh hmuh avàng chuan ka inkhalh chho zêl a, kawng a țha a, zîm angreng viau mah se han tlàn vél chu nuam ka ti, Dozer-a awmna a nih vàng nge a khaw awm dàn chu ka ngaina nghâl deuh ringawt bawkin ka hria.

Tlâng zâwl deuh lai ka thlen chuan thing lian ve tak lo ding luah ka hmu a, chumi hnuaiah chuan ka ding ta rih a, ka hawi kual a, ka piah hla deuh mual tê ni àwm taka naupang infiam ri nak nak chu ka thlîr deuh reng a, nuam an tih hmel viauin ka hria.

Ka hawi kual zêl a, inhlat lutuk lova in panga ding zïngah chuan Dozer-a nute in chu a awm ve ngei tawh ang, in tinah chuan ka lût ang a, ka zâwt den den mai dâwn em ni ang ka ti rilru a, chutianga ka tih loh chuan khawi ber nge an in tih ka hre dáwn si lo, han zah thar thut pawh ka tum chuang lo, Dozer-a ka hmu thei teuh tawh si a, zâwt tawp mai ang.

Scooty ațanga chhukin in lo hnai ber lam pan chuan ka kal ta a, gate ka thleng țêp tihah chuan in piah pangpâr bula tu emaw, min hnungchhawn zâwnga țhu hi ka hmu a; chu chu ka záwt tawp mai dáwn em ni ang ka ti rilru a, ka ding deuh rèn ráwn bawk. Chutih lai tak chuan 'tu emaw' chu a rawn chê a, rawn dingin ka lam hawiin a rawn inher a, a hmêl ka hmuh veleh chuan," Dozer...!!" ka ti ta sap a.

*INRINTAWNNA A KEH CHHIAT TAWH CHUAN THINLUNG LUAH ȚHÌN THO MAH SE HLIMPUI TAK TAK THEIH A NI TAWH LO*