☆DOZER☆ - 33 By Dingdi Pachuau

☆DOZER☆ - 33 By Dingdi Pachuau

Ani pawhin rawn hmuin min rawn hre nghâl vat a," Ka naute?!!" hmui phun hian a ti a, a lam pana tlãnin ka ke nâ pawh ka hrechang tawh lo, ka kuah chawt a, ka mumang mai a nih hlauin nghet lutukin ka kuah a, a âwmah ka hmai ka phûm tlat bawk. Ani pawhin min kuah lêt ve tawh a, a rim chu ka hnìm vang vang a, a rim ngai reng kha a la nâm, ka mipa ngainat êm êm rim ngei mai kha, he rim hi ka ngai asin, a rim ka hriat lohna chin rei tawhzia  kha...

"Ka naute, engtin nge..?! I hmêl ka hmu hlawl a, ka la âwih thei lo!" a ti ve nawk nawk a, he lai hmuna min hmu hlawl hi mak a ti ve ngang a ni. Kei chu țawng ka tum rih lo, ka hmuh loh tùr leh ka biak phâk loh tùrin a awm leh ang tih ka hlau a, nghet taka kuah reng ka la duh rih. Ka kuah reng tâkah chuan a taksa lum ham ham chuan min ur lum ham ham ta hial a, nuam ka ti, váwt ka ti a ni tih pawh ka lo theihnghilh hman țêp a ni.

"Thlasik khaw vawh hun lai a nia, lum taka inthuam tùr i ni asin," a tih chuan," Min kuah lum rawh," ka lo ti a, chutia ka tih tâkah chuan insiam țhain a jacket hâk chuan a theih ang anga min tuam vein min kuah zui leh ta a, a va lum nuam mai mai tak!

"Ka ngaihzia che hi," duat leh nghet zeta min kuah reng chung chuan a ti sup a, ka chhîp chu a fáwp zauh zauh a, min thlah thei bîk lo, a thil sawi hi ka ring thlap bawk. Ka ngaih tluk zetin min ngai ve ang tih hi ka ringhlel chhin lo hrim hrim,  ka thinlung hian a hre tlat a ni. Tunah chuan a bul ka thleng tawh a, ka kuah leh thei tawh a, ka thlâ pawh a muang huai huai tawh a ni.

"Engati nge lum taka i inthuam loh rêng rêng a?" a ti leh a, a insûm thei ngang lo a ni chêk ang, țawng tlêm țhìn zâwk kha tunah chuan țawng hmasa zâwkah țangin zawhna min zâwt a, min be hmasatu-ah a țang ta zâwk a nih hi.

"I nute khuaah ka rawn kal dâwn tih ka hre lâwk hleinem, a lo vâwt nasa mai si a," ka lo ti a, a T-shirt hâk chhana a taksa lum nuam tak nghen chu nuam ka ti tak zet! Ka muhìl thei maiin ka ring hial a ni.

"Engtin maw?!!" a tih leh chuan," Phaizawlah ka rawn kal a, i lo awm si lo va, ka rawn tlang ringawt," tiin ka lo chhâng leh a. Ani chu a țawng chhunzawm ta lo, nghet lehzualin min kuah leh a, tunah tak hi chuan lei paradis-ah kan awm dùn veng veng ni maiin ka inhria.

Scooty chu gate chhûngah nawr lûtin in chhûngah kan lût a, a chhûngte hmuh ka tîm ve deuh hlek a; mahse, a kut lum thar tharin min vawn tlat avàng erawh chuan ka zãm viau hran lo. A nu ni ngêi tùr chuan eirawng a lo bâwl a, a sam pawh a vâr ve nasa tawh. Dozer-a chuan kovin min inhmêlhriattîr a, a nu hmêl ngainatawmzia chu, a hmêl chhe lo bawk si, a mitmeng mawlh chu. Kan inchibai mai dâwn emaw ka tih laiin a nu chuan a kut sil fai tê têin a hru hul leh thlap phawt a, nui sângin min chibai ta chauh a, chu mai duh tâwk lo chuan min kuah ta hial a, a chêt dàn chu mak ka ti ru kher asin.

Min kuah chung chuan eng emaw sawi hian a phun sap sap a, min thlah zui thuai a, eng nge a sawi chu ka hre thiam hauh lo mai. Dozer-a chuan," Nu, i țawng kha a hre thiam dâwn si lo va, a ti hrilhhai viau ang e," a lo ti a, ani erawh chuan Mizo țawng pai deuh tak hian," Ka hmuh theih che avàngin Pathian hnênah làwm thu ka sawi a nih kha," nui sâng hian a lo ti a, chutah, a fapa chu enin," Bawiha, vâwt a ti a nih kha, meilum chhèmsak thuai la," English nalh fê hian a ti leh a, chu erawh chu ka lo hre thiam ve tawh a, mak ti ru zet hian an nufa chu ka thlêk tawn a. English-in an inbe fo a ni ngei ang, nufa inang tak ni hran lo mah se nufa ta na nâ nâ chu inanna an nei ve tho. Dozer-a chuan min rawn enin," Hre thiam rawh aw, ka nu hian Mizo țawng hi a pai êm avàngin hman hrehawm a ti țhìn a, a zak deuh țhìn a," a ti sup a, kei chu ka lo nui ringawt a.

Choka ațanga bathlàr ni àwm tak lamah kan chhuak phei a, room ni chiah lo, a bang lunga rem chhuah deuh vek, a chung ràngva ni si hi a lo ni a, kawngkhàr hran pawh a nei tawh lo, hmun hnihah kal tlang theih tùrin a inhawng a, mei an chhèmna hmun a nih dâwn hi ka ti rilru a, a kil sîr lamah chuan thing eh phel leh eh phel loh, thing tum tawi tê tê hi a lo intiang ûm bawk. 

Dozer-a chuan mei chu a chhêm zui ta nghâl a, vâwt pawh ka ti êm êm tawh lo asin, min kuah leh se lum ka ti reng ang chu maw le. Țhutna min pein ani pawh chu a țhu zui ve nghâl a, ka kut chu a rawn vuan leh a, kei pawh a lam hawiin ka țhu rem a, a hmêl chu chiang takin ka en chho a. A lang chêr a ni tih ka hria, a dark circles pawh a lang chiang viau mai a, a hmui pawh tlêm chuan a lang duk deuhin ka hre bawk.

"Dozer, ka hmuh loh hlàn chein i lo damlo a ni maw? I hmêl hi a va chér ve! Hei, dark circles pawh i nei a nia, i hmai pawh a lang thãwp deuh tlat," tiin a hmaiah chuan ka han chûl a, a hmul a ziahna a rei ve deuh tawh a ni ang, a rawn țo leh țan deuh tawh a, chu chu ka chùlsak a. Ka hmu lo rei tawh a, en tlawk tlawk mai ka duh; mahse, a hma aia ka hmu chér leh lang thu deuh tlat chuan amah ka khawngaihna a ti zual a, ka țah pawh a ti chhuak deuh tlat.

"Ka dam tawh alawm," a lo ti mai thung a, kei chuan," Dozer, i hmêl ka en hian ka rilru a nâ, keimah vànga i tawrhna ka hmu tlat si a, min ngaidam rawh aw, eng mah ka lo hre si lo, a pawi ka ti lutuk aw," ka ti a, duh lo teh mah ila ka mittui a rawn hnai tlat a, a hmêl ka en chian cheuh cheuh hian ka khawngaihna a zual a, ka lung a ti chhe tlat a ni.

"Ka naute, khatiang kha sawi suh, ngaihdam min dìlna chhan tùr a awm hauh lo," a rawn ti ve thung a, kei chuan," Aih, thil thleng engkimah khân ngaihdam ka ngai. I rawn lan leh thuai chu ka beisei lo nain min rawn biak ka ring țhìn thung a, ka ngai êm êm che a, ni tin i phone call ka lo chãng țhìn; mahse..." tiin ka ngawi a, a hun lai kha ngaihtuah lêtin ka insût ta hraih a," I chunga thil thleng eng mah ka lo hre hauh si lo, min ngaidam rawh aw," ka ti țuau a, ka mittui chu dan rual loh hian a rawn far ta zawih zawih a.

A âwma min kuah bei nghâlin," Ka naute, thiam lohna i nei hauh lo va, ngaihdam lah i ngai hek lo, tunah chuan hei kan inhmu tawh a, hlim takin awm tum zâwk ang aw," a ti a, ka sam chu chûlin a fâwp pah bawk a, kei erawh chu insùm ahnêkin ka lungchhiat a zual sauh a, a âwm nghèng chuan ka țap zui ta hlap hlap a, duat takin min kuah a, ka sam chûlin ka hnung a chûl bawk a, țap e ti lo chuan ka thla a muangin nuam ka ti viau lawi a.

"Ka ngai lutuk che a, min rawn be thei si lo, i damlo a nih ka ring hial a, rawn kal tùrin ka dam chiang bîk si lo, chuta kârah ka pain ka chhuah a phal si lo va, ni tin dârkâr tinin ka ngaihtuahnaah i awm reng țhìn a ni," țah aw țuau hian ka ti leh a, a bo leh mai hlau chuan nghet takin ka kuah lêt a, ka mumang mai a nih ka la hlau deuh bawk a ni. Ka zia deuh hnuah," Dozer, zêp nei hauh lovin i haw ațang khân i chanchin zawng zawng min hrilh vek teh," ka ti leh a.

"Kei pawhin ka ngai tak zet che a, ka ngai lutuk che kha ã thei mai dâwnin ka inhre hial a ni, ka ngaih êm che avàng khân a chhâwk theih beiseiin hna thawh nasatah ka ramțang ta a, ka thawh nasat êm avàngin ka taksain a tawrh phah ta hial rêng a, Pa Țhianga kha min țanpui tùrin ka țahawh ta ringawt nghe nghe a ni. Ka dam chho ve dâwn țan tihah ka chanchin hria ni àwm takin ka nuin zin tùrin min rawn sâwm ta hlauh a, a hrisèlna ka ngaihtuah ve tho a, hna ka thawk thei rih chuang si lo va tiin ka zin chho ta a, a lo dam țha vak lo nghe nghe a; mahse, kan inhmu a, a zia chho ve leh ta mai a, chutiangin kei pawh a bula ka awm hnuah ka zia chho ve ta zêl a nih hi," a ti ve ta sup sup a, ka khawngaih êm êm sa reng tho kha a nia; mahse, amah ngeiin a chanchin a han sawi chuan ka khawngaih zual lo thei lo va, ka mittui bawk chu a rawn hnai leh a, insùm tum lovin a tlâk theih chhûng chu tla rih mai teh se, ka mittui hi ani hian a phû êm mai.

A hnuah erawh chuan ka insûm ve thei ta deuh a, ka mittuite chu min tuai hulsak a," Ka țahbelh i ti em?" tia ka zawh chuan a lu a lo thing mai a," Min khawngaih vànga țap i ni tih ka hria alawm," a ti zui bawk a, ni e, ka khawngaih a, a hmêl lo tla deuh kuam bawk si hian ka lung a ti chhe zual ve bawk a ni.

A nuin in tùr min rawn pe a, làwm thu ka lo sawi sap a, a luh hnuah chuan," Nichina i țah lai khân a rawn chhuak tawh a, ka hnar kîr rih a," Dozer-a chuan a ti a," A ni maw?!! Chu, ka țap a ni tih a lo hriain min lo hmu vek tihna a ni maw? A va zia lo tak!" ka lo ti vat a, ani chuan," Ka vèl che emaw a tih loh hrâm ka beisei," a lo ti ve thung a, ka nuih ringawt.

Thingpui sen hâng in pah chuan làwm thu ka hrilh malh malh a," Ka chunga i thil tih zawng zawngah khân ka lãwm tak zet zet a, làwm thu ka hrilh mawlh mawlh che a ni, ka chêtsualna ațangin damdawi in thlengin min hruai a, i chunga làwm tâk aruangin ka pain thil engkimah thiam loh a lo chantîr che a, thiam lohna pakhat mah i nei hauh si lo, keimah vàng tal pawhin ka pa kha hre thiam hrâm la, a thil sawi kha a dik lo tih hriain theihnghilh daih tùrin ka duh che a ni," ka ti malh malh a.

"Làwm thu sawi a ngai hleinem, nang leh keia inkârah hlauh phei chuan. Ngaihdam dìlna chhan tùr lah a awm hek lo, i pa khân a sawi dik lo miah lo, a ngaihtuah êm vàng che a ni tih ka hria asin, a fanu i nia, a fanu tân chuan thil țha a duhsak lo thei lo a ni, demna tùr a awm lo," a lo tih chuan," Ka tân thil țha min duhsak a; mahse, ka tâna thil țha ber chu a hre si lo a ni," ka ti ve leh a, kan ngawi zui ta vang vang a.

Zanriah kan kîl dâwnin mipa tleirãwl kum 15 vêl tùr tawh hi room pakhat ațangin a rawn chhuak a, Dozer-a chuan a farnu, a chhang chiah fapa a ni tih min hrilh a, kan inchibai leh a, ani chuan Mizo țawng a pai hran miah lo. Dozer-a farnu fa a ni a, a putea anna lai pawh a nei ve reng mai, a sâng uaih bawk si a, tlangvâl pangngai tak tiat zet a ni tawh, a țhang chho zêl ang a, a putea pawh a tiat chho thei maiin ka ring.

Kan zanriah ei chu a tui kher mai, ka la ei ngai loh a awm nual a; mahse, tui ka ti, Dozer-a chuan eng nge ang ka tih tih min zawh chuan tui ka tih thuin ka lo chhâng vat a, ka bul chiahah a țhu bawk a, ka zah a hlau deuh nge, duhsak takin chawhmeh chu min suahsak zauh zauh a, melh zauhin ka nuih leh sak țhìn. Dozer-a hian a nu a lo chhùn a ni chiang, a ei siam a tui êm mai. 

Chaw ei khamah chuan," I lo thlen hlim khân inbual tùr khân ka lo ti lo che a aw... nakinah chuan a vâwt zual dâwn si a, i peih tawh lo ang a?" Dozer-a chuan a ti a, kei erawh chuan," Ka bàl hleinem, mut dâwnah ka insil ringawt ang, ka thuamhnawte ka thlâk bawk ang a," ka lo ti ve thung a. Khua a vawh vàng deuh chu nge ni, ka ke chu a na deuh veng veng a, sawi erawh ka sawi chhuak lo.

Dozer-a nu chuan Mizo țawng pai tak hian," Min hre thiam dâwn nia, ka duh tâwka titipui bawrh bawrh theih che ka châk viau laiin Mizo țawng hi ka pai lutuk a, pianpui țawng a ni lo bawk nèn," a ti siam siam a, kei chuan," A har ngawt ang, i thiam viau ka lo ti zâwk asin," ka lo ti ve a, Dozer-a chuan," Nu, English-in inbe mai rawh u, hrehawm i ti lo mai ang," a lo ti zauh a, chuta chin chu English-in min be ta char char a,  țawng pawh a lo țawng duh khawp mai.

Dozer-a'n ka insilna tùr tui min lumsak thlap a, min siamsak thlap bawk. Kei pawh muangchâng lovin ka insil ta thuai a, ka room tùra an tihah lûtin ka bag-a ka thuamhnaw inthlâkna tùr chu ka phawrh a, ka inthlâk fel hnuah Dozer-a rawn lütin," A vâwt i ti em?" a rawn ti a, kei chuan zàwi deuh hlek hian," Ti ta ila min kuah lum dâwn tihna em ni?" ka lo ti zauh a, meng zîm deuh sawr sawr chunga min rawn enin," Dâwn chiang e," a rawn ti a, han chhaiha han chimawm deuh hlak ka duh viau laiin a nute an mu tawh a, kan thãwm an hria ang tih ka hlau ve tho sia, ner nângin ka nuih ringawt.

"I rawn tlãn hah àwm si a, i chauin mut hma i duh ang," tiin ka mutna tùra rizai awm chu sin theih tùrin min pawh parhsak a, khum chu zût mâm lehin," A vâwt i ti êm lo ang chu maw? Sawi hreh suh aw, rizai dang pawh a la awm țeuh a nia, min kai tho hreh lo la, inthlahrunna tùr a awm lo," a ti leh a. Ani hi ka mutna piah chiahah a mu dâwn a, a room a ni bawk a, tuna ka mutna hi Tim-a (a farnu fa) room kha a nia; mahse, kei ka awm tâkah chuan a pi room lamah a mu ve dâwn a ni àwm e. Dozer-a nèna kan mutna indaidanna hi a ho hle a, kawngkhàr pawh awm lovin puan a inzâr tawp a ni.

Thlasik a nih miau avàngin zàn a rei hma bîk a, ka mut la chhuak lêm lo mah se ka duh dàn ngawtin a awm theih bîk loh a. Ka han mu ve rèn ráwn a; mahse, ka muhìl mai thei teuh lo mai. Ka ke lah chu a rawn na nget nget a, ka ke hmâwr a lum thei bawk si lo, ka tho ta hluai ringawt a, hetiang chuan ka muhìl thei miah lo ang, Dozer-a ka ko tawp mai dâwn em maw ni te ka ti hial a ni. 

Ka țhut vang vang hnuah chuan ka puan sin laia intuam hlûn chung chuan ka tho ta țhem țhem a, êng tih thim vek a nih loh vàngin ka kal duhnaah ka kal thei vek a, ka hmu thei vek a, a harsa lo. Lei chhuat a ni lehzêl a, mi dang tân ka kal rî hriat a har dâwn a, ka vànnei hlauh a ni. 

Dozer-a khum bul ka thlen chuan ka ding deuh a, zàwi tê hian ka han ko a, a lo la muhìl lo nge, ka thãwmin a ti harh zâwk, light a on vat a, rawn țhu chhuakin," Engtizia nge ni? Vâwt i ti em ni?" a ti a, kei pawh chuan zëp lovin," Ka muhìl thei lo, a vâwt ka ti a, ka kè hi a na ngut ngut bawk a," ka ti ve mai a, chutah," I bulah ka lo mu ve mai ang, ka ngai bawk si che a," ka ti leh a.

Ka kea ka delh tùrin tuilum ip current-ah a charge a," Engati nge ngaihtuah chhuah nachâng ka lo hriat loh le?" inthiam loh hmèl taka a tih chuan," Khatiang khân sawi suh, i bulah ka mu ang a, a reh nghâl vek mai ang," ka lo ti vat a, min en vung vung a," Ka rin aiin a dam chiang har daih mai," a ti sup a.

Gate ațanga ka zuanthlâkna lama ka tih nat belh a nih thu ka hrilh chuan," Dim viau tùr asin, gate i zuanthlâkna chu a sâng rêng rêng em?" tiin min zâwt a, "Sâng ve tho e," tiin Phaizawl gate-a ka läwn liam thu chu ka hrilh ta a, mak ti zetin min en reng a, chutah, a lu a thing nawk a," Hmeichhe nunnêm zet si, a rûka luhlul tak i ni," min ti ta ringawt a.

A bulah chuan ka mu ve ta a, rizai hran sin pawh ka duh lo, tuilum ip chuan ka ke chu ka dehtîr a; mahse, ngai ka ti lo thuai, min kuahin a ke lum thur thurin ka ke a kuan rei deuh hnu chuan a lum ve thuai mai a, ka ke nâ deuh ngut ngut pawh kha a reh chhawm ve mai bawk. Ka lum ve tãk hnuah chuan ka mut a chhuak selh selh a, Dozer-a'n ka chala fawh zauh paha," Muttui aw, ka naute," a tih pawh chu ka mang hriat deuh ruai tawh. Vawiin lamah ka tlän thui ve bawk nèn, Dozer-a âwm nghèng chuan tui takin ka muhìl ta a.

A tûkah chuan ka tho hma vak lo, khua a vâwt bawk si a, mut reng ka châk; mahse, Dozer-a a tho tawh si a, ka thawh ve vat a ngai tih ka hria a ni. Ka va thawh chhuah ve chuan mi dang chu an lo tho vek tawh a; mahse, Dozer-a hmêl chauh ka hmu thung.  "Good morning, i mu tui thei maw?" a lo ti dût a, nuih sakin," Morning, tui teh rêng mai, mumang pawh ka nei lo, i tho hma àwm hlê mai, khawiah nge mi dang hi?" ka ti lêt a, ani chuan," An chhuak lawk a nih kha, lo țhu rawh, in tùr ka lo thlit ang che," a ti a, noah tui lum min rawn thlit nghâl zat a.

"In in tê hi a nuam reuh e, a zau viau lo nain a nuam reuh ka ti," tiin ka hawi kual a, ani chuan," Ka awm vàng a ni ang," a lo ti zauh a," Ni ang, in in a nih vàng a ni ngei ang," nui chungin ka lo ti ve leh a. A hnu deuhah thutak zâwk hian," A rei ve deuh tawh a, sak țhat ka sawiin ka nuin a rem ti tlat lo va, ka pa sùlhnu a nih miau avàngin, tih riral a phal lo a ni," a rawn ti a, ka lo bu nghat nghat a. Ni e, a nu chuan a pasal kutchhuak, a sùlhnu țhiah chu a phal lo ngei ang, khua pawh hi a pasal lu nghahna hmun a nih vànga chhuahsan pawh duh lo rêng kha a nia.

Tui lum ka in zawh chuan," Thing ek ila?" a ti a, phûr zet hian ka lo aw a, ka zui chhuak nghâl a. Nimin tlaia mei kan chhèmna kil sîr lama thing tum chu pâwnah a theh chhuak ta dawp dawp a, hreipui la chhuak lehin keiin ka lo zui ve dat dat a.

Thing a han chêk tak tak mai chuh, vawi khat bâk cheh a ngai lo, a phel phawk phawk mai a, a nawm hmèl êm avàng chuan thing eh ve chhin chu ka han dîl a, hreipui chu min pe ve mai bawk a, ka rin aiin a lo la rit phian zui a, a ken dàn ațang ringawt kha chuan a zàn hmèl teh rêng nèn.

Ka han chêk ve chhin chu, thing fuh lovin lei ka chêk thawih mai a, mak ka ti nasa mai! Engtin nge thing kha ka cheh fuh loh theih ni ka ti rilru a, ka han chêk țha leh a, tunah chuan ka fuh ve ta; mahse, tlêm tê pawhin a khi lo, ka chêk fuh ringawt a ni mai. Ka cheh nawn leh pawhin fuh chu ka fuh ve leh tho a; mahse, keh tumin a lang miah lo.

"I hah lutuk palh ang, ka lo chhâwk tawh ang che," Dozer-a'n a rawn tih chuan," Engtin nge i tih phel theih bîk a? En la, hei a  khi ve lo rêng rêng," ka lo ti a, ka kawhhmuh zui a, ani chuan," Nula hmêl țha lakah hi chuan a țang ve tlat zêl a," a lo ti ve ngei a, a thil sawi chuan ka nuih a ti za ru khawp mai, fiamthu a thawh ve ngei si a. 

Thing a han eh leh chuan a phel leh nghâl phawk phawk a, a kutthlâk a nâ tih chu hre tho mah ila tih dàn tê thiam a ngai a ni ang ka ti ta tawp mai. A eh phel sa chu ka lo la khâwm a, mei chhèmna bul sîra an dah khâwmnaah chuan ka dah lût ve zêl bawk a, a ek țeuh mai.

Chaw ei khamah tih tùr dang awm hek lo le, phone signal awmna tlâng lamah kan kal a, mi kan hmuh, kan kal pelhte chuan min lo en duh thei khawp mai. An la thingtlângin mi chêng an tam vak lo va, mi an inhre pawh tawn vek àwm si a, hmêl thar deuh hlek chu an hmu duh ve riau ni tùrah ka ngai mai.

"Pa Țhianga bulah 'Ka lo biak ang che' ka tia," ka tih chuan," A buai ve ngawt ang chu," a lo ti sup a," Eng tikah nge haw thlâk i tum ang?" tia ka zawh chuan," Ka hre mai lo le, haw thlák thuai erawh chu a ngai tawh, ka awm lo rei tawh a, ka ngaihtuah ve riau tawh a ni," a lo ti ve leh a. Chu chu remchângah lain," Haw rual ila?" tiin ka sâwm zui zat a.

An khua hi a tlâng sâng ve reng a, kan simcard hman ang hi hmang an awm ve loh vàng zâwkin signal kan nei ve lo mai mai a lo nia, Dozer-a pawh a ni ve tho. Signal nei thei tùr chuan Phaizawl ang khân khawi maw lai têah kal a ngai a, kan kal mêk rêng a ni.

Ka nuteite ka bia a, Dozer-a pawhin a be ve nghe nghe a. Khua a vâwt ver vawr bawk a, kan thaw khu hlat hlat reng a, eng emaw ti zâwng takin a romantic ka ti leh tlat pek a, kan inbiak zawh hnuah Dozer-a thla pawh ka hmehsak chiam nghe nghe a, kan pahnih pawhin kan la dùn a, kan infawh laiin a ni nghe nghe, ka en vang vang a, mawi ka ti ru viau nain miin an hmu ve ang tih chu a hlauhawm ka ti angreng, mi khawlo tak ka nih duh hmèl êm a.

*KAN KA AȚANGA CHHUAK 'THU' HIAN MI NUNAH THU SAWIA NGHAWNG NASA TAK A NEIH THEIH AVÀNGIN KAN SAWI CHHUAH HMAIN NGUN TAKA KAN NGAIHTUAH HMASAK A NGAI*