☆DOZER☆ - 34 By Dingdi Pachuau

☆DOZER☆ - 34 By Dingdi Pachuau

Haw nghâl lovin kan awm deuh rih a, eng eng emaw sawiin zawhna ka zâwt a, hêng laia chéngte eizawnna, an khawsak phung leh eng zât nge chêng tih thlengin ka zâwt kual a, ho deuh deuh thlengin ka zâwt vek, ani erawh chuan țha takin min lo chhãng zêl a, chimawm a chhuah miah lo.

"Ti ta daih ila, Tim-a kha school a kal lo tihna em ni?" ka tih chuan," Aw," a lo ti mai a, en deuh hâ hian," Ka hriat ve a pawi loh chuan, engtizia nge a?" tiin ka dîlchhût leh a, ani chuan," A têt lai ațang tawhin a hrisêl lo reuh lutuk a, school kai thei dinhmunah a ding lo a ni. An chènna hmun a ngeih lo a nih ringin ka nuin hetah hian a hruai ta ngawt a,' Boruak a hrisêl a, a dam theiin ka ring,' a ti ve tlat a, a sawi ang tak tak chuan zàwi záwiin a pângngai chho ve ta zêl a, school-a kal kher lovin in lamah a piin a theihtâwpa nasaa țan lain a zirtîr țhìn a, a hrisèl loh vàng erawh chuan a rilru pawh a chak loh phah niin ka hria; mahse, nakkum khian Pathian zâra a dam chuan Matric a exam ve ang chu, a hrisèl loh vàngin mi khawngaih a hlawh thei viau mai a, zirtîrtute'n khawngaihin a exam ve theih dàn tùr an zawnpui a," a ti ta duah a.

"A lo nih tak chu a. A khawngaihthlâk reuh mang e! A hrisêl lo tih a hmêlah kha chuan a hriat miah loh a nia," ka lo ti a, ani chuan," Tunah chuan a zia tawh alawm, a pângngai vek tawh," a rawn ti a. Ni e, a dik ang, a lian zuah lehnghâl a, a hrisèl loh hmèl miah loh. A hmêl ni se tûnlai tleirãwl duh chi niin a chhe hran lo bawk a, a putea a rawn chhun chhoh zêl phei chuan nula tu emaw chu a zùnah a uai nghet khawp ang le.

"A chhun hlauh che chuan tu emaw chuan a la rawn pan ve ruak ruak ngei ang le," ka ti ta zauh a, ka nui pah bawk a, ani pawh chu a lo nui hawk a. Sîr zâwnga min rawn kuaha a lama min pawtin," Hetiang pawh hi an ti ngei ang," ti supin min rawn fâwp zui nghâl a, a chêt dàn thut chu mak ka tih deuh vàngin ka lo dawh ringawt a; mahse, a hnuah erawh ka lo chhâng lêt ve tàwn táwn thung, chhùn lai mah ni se a nawm loh phah chuang hauh lo asin. Kan inhmuh hnuah tih tak takin kan la infâwp miah lo, eng nge maw ni le, a hun leh a hmun a remchâng țha bawk a, uar mah mah pawh a pawi lo ang chu.

Ina kan haw hmain dàwrah kan pêng lawk a, Phaizawl bula khua ai kha chuan dàwr pawh a lo muk daih zâwk a, an zuar chikim ve viau bawk; mahse, a àwm ve tho mai. Hetah chuan motor a lüt thei tlat a, dàwr bungrua zawng zawng motor hmangin a phurh luh vek theih tlat a ni. Dozer-a nu ei tùr duh zâwng kan lei hnu chuan kan haw a, a nu chu a lo awm ngei a, Tim-a erawh hmuh tùr a awm lo; mahse, pêk chu ka zak deuh tlat a nih chu. 

Buh a lo thlei a," Ka lo thleipui ve ang che," ka ti vat a, ani erawh chuan a ngaih loh thu leh lo awm mai mai tùrin min lo chhâng a; mahse, ka pui ta tho, ka thlei thiam chuang miah lo nain puih ka duh ve hrim hrim a ni.

A buh thlei chu Zobuh a lo ni a, an her dip lutuk lo a ni ang, a vâi pawh a awm nual mai a, a hùm pawh ka hmu nual bawk. A tih vêl dàn chu ka en ru deuh reng a, chutiang chuan ti vein țhàp chu a awl a, ka thiam mai a, sâwī erawh chu ka rin aiin a lo har reuh, ka han sâwī chu ka ti baw ta chhuai mai nghe nghe a, ka inthiam lo ngang mai.

"Ti ngai lo tân chuan a har ve reuh asin, rût duh suh, âr chaw atân a ni leh mai, in thlei zawhah kan rût mai dâwn nia," Dozer-a'n a lo ti a, a nu pawh chuan inthiam lo lo tùr chuan min lo ti ve a; mahse, nuih a za duh vak lo, Dozer-a chu ka zah deuh tho nain a nu chu ka hmaizah daih zâwk, a fapa bialnu atân nêp min ti dâwn êm asin, buh thlei takngial pawh ka thiam lo chu a ni sia, a zia lo ve êm a ni, za lo zetin ka nui tãwi tak tak mai.

Mahse, a nu chuan min zirtîr ta zêl a, kan thlei zawh meuh chuan tlêm chuan hma chu ka sâwn ve deuh a; mahse, buhhum chu a awm kháwm ve thei chuang lo, a la darh nuai a, ka sâwī ri erawh a mawi ve deuh tawh thung. Ka buhfai tih buak ka han rût chu bowl lian ve deuh khat țân hi a ni a, a tam viau a ni, Dozer-a nu ve thung chuan a ti baw ve mang lo rêng rêng," Hma i sâwn chak lutuk a nia, i thlei leh hunah chuan i thiam tawh viau ang, i thlei dang thei tawh ngei bawk ang," min ti ve ngei a, ka rilru hnual tùr lamin a sawi duh lo rêng rêng.

Chhùn ei tùr atân tiin Dozer-a nuin buhban a chhùm a, chu chu hlãwm lehin artuiah a thlâk a, a kang leh a, ka pui ve zêl a, ani pawhin tih dàn min zirtîr zêl bawk. Hetiang tak hian tu mahin thil tih dàn min la zirtîr ngai lo va, nin lamah pawh a kal lo, nuam ka ti daih zâwk. Thingpui ka lum a, a sen thlumin ka siam a, kan thil kan nèn kan ei chuan tui ka ti ve reuh lutuk, siam a harsa vak bawk si lo va. Dozer-a pawh chuan min fak luam a," I siam thiam hlê mai," a tih chuan," Ka siam a awm ve mang mang lo, i nu siam deuh vek," ka lo ti vat a.

Chawhnu lamah pawh chuan a nu rem ti lo chung chu in ka tih faipui ve a, an in chu a țhen lei chhuat a ni a, lei chhuat lo chin chu kan nâwt fai hmasa phawt a, veranda pawh thingphel chhuat chin chu kan nâwt fai vek, a hnuah lei chhuat chin chu kan nâwt leh a, an lo nâwt țhang tawh bawk a, a tliang hliau rêng a ni. An in chhúng chu a bàl hran lo va; mahse, ni tina a tih țhin tawh a nih vàng leh tih fai chu ngaia a neih tawh avàngin a ti țhìn hrim hrim a ni àwm e. Chutia ka che vêl chu ka ke chuan a lo duh vak lo a ni chêk ang chu, ka dah kàwisàwi deuh châng phei chuan an hmuh hlau takin ka ner leh sak țhìn, thil tih lai bànsan hnì hnè ka duh loh avàngin ka ti lui hrâm hrâm zêl a, kan tih zawh hnuah erawh ka țhu ta hlè hlé a, tûn hnaiah dìm lovin ka hmang nasa deuh hlek a, a nâ pawh chu àwm ka ti viau mai.

Dozer-a'n," Lo dang tùr che ka nih nèn, i duh anga awmtîr che ka duh bawk si a, ka thiam loh a ni," tia ka kal bäi deuh chu min rawn pawm nawlhin țhutthlèngseiah min nghat a," Che tawh lovin țhu hlè hlê tawh ang che," a ti leh sup a, ka hnial theih miah lovin amah chu a che nghâl zung zung a," Chutiangin a na vak lo," ka tih pawh chuan," Ka thu âwih mai rawh," a rawn ti leh a, eng mah ka sawi ta lo.

Zànah erawh chhùn lam aiin khua a vâwt zual ta nèn, a nâ chuan min tur ut ut reng a, ngaihtuah loh ka tum ngial pawhin ka thei lo. Dozer-a nuin min hmehsak nep nep a, tuilum ipin kan dep reng bawk a, a hnu deuhah chuan a zia ta deuh, damdawi ka ei kha a rawn thawk țan a ni ngei ang.

"A zia lo êm mai, ka ti buai hrep che a," ka tih chuan ani chuan," I ke a nâ a ni tih lam rêng rêng kha ngaihtuah nachâng ka lo hre lo va, ka chhawr hrep si che a, ka ngaihtuah tlêm êm mai, Bawiha pawhin i ke nat thu kha min hrilh rêng si a," inthiam loh hmêl tak chuan a lo ti ve thung a.

Dozer-a, ka mutna pindana rawn lût  chuan," Nu, mu tawh rawh, a zia chhoh tawh tho chuan ka lo buaipui tawh ang e," a rawn ti a, kei pawh chuan," Ni e, a zia tawh, va mu tawh rawh khai," ka lo ti ve leh vat a, ani pawh chuan," Aw le, a reh țhat theih loh emaw a nat leh emaw chuan min kai tho hreh lo ula," a lo ti a, a kal dâwn chuan," Mut tui le," tiin an nufa chuan an inthlah thlap a. 

Dozer-a hnênah chuan," Nang pawh va mu tawh la," ka han tih zawm a, ani erawh chuan," I bulah mut ka lo tum asin, i phal meuh nange?" a lo ti ve thung a, a kutah mansak vatin," I țawng ring lutuk! Kan riak dùn tih an hriat ka duh miah lo a nia," țawng rin hlau tak hian ka ti sar sar a, ani erawh chuan," Hre mah se eng nge pawi? Thil pawi kan tih loh phawt ahnu," awlsam zet hian a ti leh mai a.

Inkuah chiala kan mut hnu chuan," I nu hi a fel e, a ngainatawm bawk si, vawiina a thil min zirtîrte kha ka dam chhûngin ka theihnghilh theih tawh pawh ka ring lo, ka tân chuan a hlu êm êm si a," ka ti sap sap a, ani chuan," I ngainain fel i tih viau si chuan, i ko pawhin ka la hre lo, ka hre sual lo tiraw?" a lo ti thung a.

"Ka ko zak alawm, a lo hriat loh hlauh phei chuan ka zak dâwn e," a âwma ka hmai phûm chung hian ka ti a, ani chuan," Innêl tùrin ka duh che u a, chu vàng chuan vawiin lam pawh khân i thil tih kha ka khap duh lo che a nih kha, i ke a nat phah ta si a, ka thiam loh a ni," a ti sup sup a.

Dâk chhoa a hmai chùlsak pahin," I thiam loh a ni lo, tu thiam loh mah a ni lo, i hria tiraw? Tu thiam loh mah a ni lo," ka ti a, ani chuan ka bâna lo vuanin," Naktûk lamah chuan i chêt ka phal tawh lo ang," a lo ti sup a, ka chalah a fáwp zoh a, rawn kûn hniam zui lehin ka hmuiah a rawn fâwp leh a, ka lo chhâng lêt vat a, inthlahlel leh induhtawn tak chuan kan infâwp ta mial mial a. Ka thâwk dàn a danglam țan a, ka lung a phu rang a, ka ke nat vànga min mutpui a ni tih lam ka hrechang tawh lo va, ka ke a nâ tih pawh ka hre tawh hek lo, ka kut chu awm hlè hlé thei lovin a kawr hâk chhûngah ka kut zen lût a, a taksa lâwng chu ka chùlsak riak riak a, a lo thaw hawk mai.

Chutah, ka kut chu manin ka lu chung lamah a nam bet ta daih a, infâwp tawh lovin kan inen ta kar a, a mitmeng nalh ser sawra min rawn melh chhuk rùn mai chu ka lo nuih sak a," Dozer..." ti sapin ka taksa chu ka'n chéttîr zui a, tunah tak hi chuan kan inkâra thil thleng thei hi thleng mah se pawi tihna ka nei hauh lo, a tân hmeichhia nih ka duh a, ka tlangvâlpa ni se, chatuana tih danglam theih tawh ngai loh tùrin a hmeichhiaah min siam se ka ti, chu chauh chu ka ngaihtuah. 

"Ka naute...!" a ti sup a, chutah, nghet zet hian min kuah bet ta thut a, a malpuiin min kherh bet zui tlat bawk a, rang zetin kei pawhin ka kuah ve a, min kuah nghet lutuk a, thâwk lâk pawh a har deuhthaw hial a ni.

"Ka naute, che tawh suh, thil sual ka tihpui che i duh loh chuan, min pui hrâm teh, i pa bulah sual kai lova ka hruai lêt theih nân che," harsa tih hmèl fê hian a ti chhuak sup a, a thil sawi avàng chuan chêt ka tum lai pawh chu ka tàwp nghâl chawt mai. Ka pa bulah ka ruala rawn kal ve a tum tihna em ni? Ka pain a huatzia leh a duh lohzia a hre vek tawh ngei si a, a hlau ve miah lo tihna em ni?

Ka thâwk a pângngai chho a, ka lung phu rang pawh a zia ta, ani hi chu a insûm thei a, keimah ang tak kha chuan a awm ve pawh ka ring lo. Ngaihsànawm ka tih rualin min duh ve tak tak lo em maw ni chu aw ka ti deuh a, chumi rual chuan ka taksa hian a hîp hlawl lo a nih te ka ring pah deuh bawk a, ka zâwt tawp mai dâwn em ni ang ka ti rilru rauh rauh mai.

"I insùm theihzia hi!" ka ti chhuak ta sap a, ani chu a lo rûm nghut a," Ka insùm a ngai a ni, remchânga lâk che ka duh lo," a tih chuan," Min duh tak tak lo niin ka hria, nge hîpna che ka nei hlawl lo zâwk?" ka ti leh sap a, tlêm chuan ka rilru a na deuh hlek a, ka duh êm avàngin Benson-a bula ka awm dàn ngai ni miah lovin ka awm a, ka taksa hlan mai ka tum laiin ani chuan min insûmsan daih a.

Ka chalah a fâwp vang vang phawt a, chumi hnuah," Ka naute, ka duhna che hi teh dâwn ni ngat ila Romeo-a'n Juliet-i a duhna ai khân a nêp bîk hauh lo ang. Nangmah hringtu che i pa ka zah êm êm a, chutiangin i patea leh i nutei, an zahawmin min rinzia ka hria asin, min rinna hi ka duhna che avàngin ka ti chhe thei lo a ni, remchângah ka la thei lo che tihna a nih chu," a ti ta duah a, ka lo ngaithla kar a. Sawi zawm lehin," Tunah hian ka duhna ti puitlingin hmangaihna chenpui ta chiah che ila i patea leh i nutei lakah ka dam chhûngin ka inthiam thei tawh ngai lo ang, chu vàng chuan ka insûm hrâm hrâm a ni," a ti leh dap dap a.

*******

Kâr khat chhûng ka awm a, Dozer-a nu pawh ka nêl hman viau mai, thil tih dàn leh eng eng emaw min hrilh neuh neuh peih a, min zirtîr peih bawk. 'Bawihi' tiin min ko mai a, kei erawh chuan ka ko hreh reng a, ka zak pah deuh bawk a; mahse, ka inrin loh lai taka ko thutin ' Ka nu' ka ti ve ta tawp a, min lo nuih miah lo va, hre lo awmin a awm chuang lo bawk. Chuta țang chuan ka ko ta deuh reng mai a, han koh vêl chu nuam ka ti tlat mai a nih chu. He thu mal 'ka nu' tih hi ka ka ațangin ri chhuak khât viau mah se Dozer-a nu bulah erawh ka koh tâk thut ațang khân ka hmang zing ta khawp a, ni hnih thum chhûng lek pawha ka koh zât hi kum thum chhûnga ka pa nupui, ka nu ka kohna zât ai pawhin a tam daih zâwk ngei ang.

Ka haw dâwn zànah chuan," I rawn zin leh thuai dâwn nia tiraw? A theih chuan Krismas hmang tùrte pawhin rawn kal ta la, a nuam zual ngei ang maw le! Kan khua a har thei si a, i lo awm hian kan phuisui a, kan inah pawh hlim nui rî hriat tùr a awm ve a," a ti siam siam a, kei pawh chuan ka hma lama harsatna lo thleng tùr ngaihtuah duh miah lo hian," Hun remchâng a awm veleh ka rawn zin leh ang, nuam ka ti teh a nia, rawn zin ka zawngchhang viau ang tih pawh a hlauhawm," ka ti ve a, Tim-a chuan," I rawn zin leh veleh lehkhabu chhiar tùr min rawn hawn rawh aw," a lo ti ve bawk a, ka lo bu nghat a, kan innêl tlâng tawh a, ani pawhin min zah tawh bîk lo.

Dozer-a hian a nute hi Phaizawl lama hruai ve a tum fo tawh a; mahse, a nu hian a pasal lu nghahna hmun kalsan a ngaingam ngang lo thung a, Mizoram an luh tirha an lo khawsakna hmun hmasa zâwk a ni bawk si a, Dozer-a pawhin tih luih chi-ah a ngai tawh lo a ni.  A hman chângin a zin chho zauh zauh a, a nu ngaihtuahpuitu tùr a naute lah chu hmun dangah an awm daih si a, an rawn ngaihtuah ve viau tho a, an rawn be ve zauh zauh tho, hmeichhia an nih ve ve avàng leh pasal an neih ve ve tawh avàngin an nuțapa kutah an nghat deuh tawp lo thei lo a ni.

Ka pain Dozer-a hmu tùrin ka zin a ni tih ka nutei ka ațangin vawiin khân ka hre tawh a, in ka thlen hun a nghahhlelhawm viau hran loh a ni. Dozer-a erawh chuan," Lungngai miah suh, nangmah hlat zâwnga awm hi ka tum leh chhin tawh hauh lo a nia," tiin min hnèm ve thung a, kei chuan," Ka pa i hlau lo em ni?" tiin ka lo zâwt lêt khauh a.

"Ka hlauh ber chu chàn che a ni ka tih tawh kha," a lo ti a, kei erawh chuan," I hlauh tak tak loh kha, min hlatsanin a nih kha i awm, rawn kal lo ila chuan tunah pawh hian kan la inhmu tawp nâng!" vui deuh chung hian ka ti ve thung a, ka sawi dik chiah bawk a, ka pa thu sawi vàngin min hlatsan a tum a ni reng sia.

"A dik reng mai. Nangmah enkawl seiliantu che a nia, ka zah êm a ni, bâkah, nangmah hian i tawrh phah ka duh lo bawk a; mahse, tunah hi chuan engtiang pawhin min țhen hran tum mah se hlatsan che ka tum tawh lo," a ti ta kalh kalh a, a mitah ka lo en reng a, tumruhna ka hmuin ka inhria. 

"A awlâi dâwn hauh lo a nia," ka lo ti leh a, ani chuan," I luhlulna khân ka rilru luhlulna a chawk tho tawh. Ka tlâwm lo ang," a ti leh a, ka nuih sak a," A țhat chu, engkim tuar tùra kan inpeih a ngai dâwn a ni, ka pa hian a rilru a sawh sawn mai mai dâwn lo va, an hmuh phâk lohah min ru bote a nih ngawt loh chuan. Hawh, tlãn bo daih mai ang hmiang," tiin ka han sâwm leh rih a.

"Rûk bo che ka duh lo, tlàn bopui che chu thil harsa a ni miah lo ang; mahse, thil țha a ni lo, ka pa hmingin chhia ka chham e, i pa lakah ka tlâwm lo ang. Bâkah, kum heti chen hi ka ni ve tawh a, tlãn bo rual pawh ka ni tawh lo hrim hrim," a ti leh a, ka nuih za deuh mah se a sawi tak ropui mai si a, ka nuih duh lo a ni.

A tûkah chuan zîngah, hma takah kan chhuak ta a, ka ngai reuh ngawt ang chu. Dozer-a'n a khalh a, kawng laka ei tùr Dozer-a nuin min pàitîr țeuh bawk a, rilțàm chu a hlauhawm lêm loh.  A kâwngah ka kuah a, kan la hlim dùn rih khawp mai. Kan hma lam hun ngaihtuah duh miah lo chuan hlim takin ka țawng barh barh reng a, ani pawhin min rawn chhàwn zauh zauh a, a hnuah erawh ka phone-a hla 'Awm lo ta la' tih chu 

earphone-in, kan beng pakhatah ve ve kan ngaithla dùn a, duh lo teh mah ila chu hla chuan ka mittui a rawn ti hnai lek lek a ni.  

"Dozer, engtin pawhin ka pain min pawh țhen tum mah se min hlatsan tawh lo tak tak ang tiraw?" tiin ka zâwt a, ka rinhlelh vàng pawh a ni chuang lo, ka rilruah a rawn awm.a, ka zâwt a ni mai.

"Ka hrilh tawh che kha, eng mahin min țhen lo ang, i kiangah erawh ka awm reng thei lo tih i hria a; mahse, ka thinlung hi i ta a ni a, a hlatsan dâwn lo che a, a phatsan ngai lo bawk ang che, chu chu ka tiam nawn leh ang che," a lo ti a,  ka lo bu nghat nghat a, nghet takin a kâwngah chuan ka kuah a, tihian, ințhen ngai lovin awm dùn reng thei ila...

*KAN HMANGAIH LEH KAN RIN ÊM ÊMTE'N AN CHUNGA KAN RINNA AN TIH CHHIAT TAWH CHUAN AN KIANGAH AWM VE RENG MAH ILA MIN TI HLIMTU AN NI THEI TAWH LO VA, DUHNA THINLUNG ERAWH PAIH BO NGHÂL THEIH A NI LO, CHUTIH RUALIN ANMAHNI KAN THLÂKHLELHNA ERAWH A BO TELH TELH THUNG*