☆DOZER☆ - 35 By Dingdi Pachuau

☆DOZER☆ - 35 By Dingdi Pachuau

Ka pain min hre chhuak tawh tho a, chu vàng chuan ka hmanhmawh duh ta lo law law kha a nia; mahse, scooty erawh ka hman rei deuh tawh avàngin ka inthlahrung ru ve reng tawh a, Dozer-a rawtna angin Aizawlah kan tlang a, zan khat kan riak a. Zànah ka nuteite nupain thu țha hrilhin min zilh malh malh a, anni hi zawng mi fel nupa an nia, ka bialpa Dozer-a an hria a, a hausa lo tih pawh an hre vek; mahse, kan induhtawn tih hriain min sawisèlsak lo va, thu țha min hrilh mai a ni. Ka pa angin min țhen hran an tum ve lo va, thianghlim taka inkawp tùrin min hrilh a, min fuih a, anni hi chu ka tân hian an va hlu ngawih ngawih tak! 

Dozer-a nèn chuan kan muhìl lo tluk a ni. Kan mu dùn thei tawh lo va, mu lovin sitting room-ah kan țhu reng a, dârkâr rei lo tê chiah awm dun nân hun kan nei tawh a, kan muhìl phal lo a ni ber ang chu. Engtikah nge kan inhmuh leh dâwn hriat a ni lo va, chutiang chiah chuan kan hma lam hun tùr lah kan hre hek lo, a theih anga ranga rawn kal chu a tum ve tho dâwn a; mahse, chu pawh chu lo ni ta se ka pain kan ina a rawn lèn a phal kher lo maithei, hmu tùra ka chhuah pawh a rem ti kher lo bawk ang, chu vàng chuan kan inhmuh theih leh kan inbiak theih hun lai hian ãm taka awm dun kan duh.

"Dozer, a rang thei ang berin rawn kal tum tak tak rawh aw, i chanchin ka hriat loh rei chuan hrehawm ka ti leh dâwn lutuk sia," ka ti sap sap a, a biang hmul rawn țo țan suar suar tawh chu duat tak hian ka chùlsak pah bawk a. Ani chuan," Ka rawn tum dâwn alawm, ka rawn kal ngei ang, a hun erawh ka sawi mai thei lo va, a hma thei ang ber erawh chuan ka rawn tum ang. I chungah i pa a lungawi loh pawhin chhâng lêt miah suh aw, a fanu i nia, a duh loh anga i awm chuan a hau che ang a, a zilh bawk ang che, i chunga a duh chhiat vàng ni lovin i tâna țha záwk a duh vàng a ni tih i hre reng dâwn nia, nu leh pate hian min hmangaih a, kan tih sual an hlauh vàngin a nia an duh dàn anga kaltîr min tum țhin, anni chu keini aia hringnun kawng chhuk chho lo dai tam tawh leh he lama experience lo nei tawh zâwk an ni a, an thu sawi tam zâwk hi chu a fingin zawm tlâk a ni tlángpui asin," a ti leh malh malh a.

"Mahse, nang nèn min pawh țhen a tum miau alawm," ka lo ti sap a, ani chuan," Kan induhna a hriat thiam loh vàng mai a ni. I tân a țha ber a duh miau a, tu pain nge a fanu tân țha ber chu duh lo tehlul ang? I nu tel miah lovin a enkawl che a, nu tel lova enkawl sei len i ni tih hriat miah loh khawpin a enkawl țha che a nia, eng emaw laiah chuan duh khawp lohna chu i nei ngei ang, mipa a nia, nute ang êm êm chuan a duatna, a hmangaihna che leh a ngaihsakna che a ti lang thiam lo ang; mahse, chu vàng erawh chuan a ngaihsak lovin a hmangaih lo che tihna a ni chuang lo a nia," a lo ti leh a. Ka pa sualzia a hre reng sia, chutia min vuipui lo leh a sawi chhe duh miah lo te leh a țha lam zâwng chauha a sawi chu ka ngei ru deuh hlek a, vui hmêl puin," A, i pa a ni lo va, i hre chiang lo mai mai a nih kha, ka hmai i zah vàng pawhin i sawichhe duh lo a ni ang, a ho e. Zêp a ngai chuang lo, i chunga a thil tih pawh kan hre vek a, 'a sual e' ti ve mai rawh, a sual tho tho bawk a," ka ti nang nang thung a.

Zàwi têa nui hawk hian a kut lum ham ham chuan ka biang a rawn dawm a, amah en thei tùra min dawm dâkin," Mi fel ka ni lo va, i pa sawichhiaa sawisêl tùr hlauh phei chuan ka tla vawng vawng chiang viau a ni. A chhan chu amah angin keimah chauhin fanu ka la enkawl ve ngai lo va, harsatna a tawn ang zawng zawng kha ka la tawng ve tlat lo a ni. A dinhmunah indah ve chhin loh hi chuan tuna a rilru tùr hi hriat thiam har deuh mai a nia, han indah chhin teh mah, i hre thiam ve kuar mai ang, tûn atân chuan tih theih vak kan nei rih lo va, chu vàng chuan a rilru hneh theih nân țan kan lâka rilrua hriat thiamna thui tak kan neih a ngai a ni, fanu fel leh hmêl țha tak a lo nei kher kher bawk si che a," a ti leh ta duah a, a hmuiin ka hmui a rawn tawk zauh a. Tûn hnai tê hian a țawng thui ve thei ta duah duah viau mai; mahse, nuam ka lo ti a, inhmeh viau lo mah se a inhmeh ka ti ru tho bawk, a țawng tam lohzia hre chiangtu ka ni a, a țawng duah chhan hi chu a țuah ve viau tihna a ni mai.

"Ka pa i țan zâwk a nih chu!" ka lo ti nghat a," Kan inah pawh haw nghe nghe la a țha ang, kei ka haw lo thung ang a," ka tih zawm leh nghat a, ka țawng naupan chhiatzia chu ka hre tho a; mahse, ka pa țan deuh zâwnga a țawng chu ka ngei deuh a ni, min țan zâwngin țawng ve tùr a nia," I pain min hmuh a phal loh pawhin ka rawn lût lui ang a, hruai chhuak chein ka ru daih ang che," ti zâwng tea min hnem ve ka ring ru a nia, a thil min hrilh hi chu tawrh peih a ngaih dâwn bâkah a phùrawm loh ve êm a ni.

"Min en lawk teh," a ti sup a, en duh lova hnuai lam melh chhuk daih kha ka nia, chutia min tih pawh chuan ka en duh lo va; mahse," Lawk, min en lawk rawh aw, ka naute," a rawn tih nawn leh tâkah chuan ka melh chho ve leh ta a, zaidam mitmeng leh duhnaa khat tih hriat takin min lo en chhuk reng tawh a," Ka țan daih zâwk che, ka naute," a ti sup a, chutah," Hmêl leh nungchang ka duh kawpnu, heti taka duhawm hian engtin nge i rawn pian chhuah theih bîk ni? Ka pa hnênah thu tiam lo nei lo ila chuan aw... " a ti vang vang a, ka chala rawn fâwpin," Tihtauh der hi i inhmeh ve miah lo a nia, hlim nui sâng chunga țawng barh barh hi i inhmeh ber, i hlim nui hmêl hi ka mitthlaah a châm reng țhìn bawk, han nui leh teh le," a rawn ti leh sup sup a. Han tihtauha han lungawi loh ngam pawh a ni tawh lo, kan ințhen țêp tawh si a, awm dun hun chhûng kan nei rei tawh lo va, lungawi loh leh tihtauh nân chuan hun a uiawm viau bawk.

Khawvàr hmain kan chhíng ve sek a, Dozer-a thu ka âwih vàng liau liauin ka mu ve hrãm a ni. Chaw ei khamah sumo hran ve veah kan haw ta a, anni aiin keini kan tlãn chhuak hmasa a, kawng tluanin ka ngaihtuah phei a ni mai. Phone-ah kan inbia a, phone signal a nei lo thuai dâwn tih ka hria a, chu vàng chuan ka biak theih chhûng chu ka bia a, in ka thlen tâk hnuah erawh ka be ngam tawh bîk lo.

Ka pa a lo awm lo hlauh a, ka thaw huai mai. Ka nuin," E, i lo haw tawh maw?" min lo ti ve mial a, min lo be ve mial chu mak ka ti zâwk tak tak a ni! Ka room-ah indah felin ka inbual thuak thuak a, room ațanga chhuah ka tum lai mêkin ka kawngka a rawn rì a, ka pa a nih ka ring nghâl a, a lo ni chiah bawk a.

"Rawn biak che ka tum a, i phone i off tlat a, eng eng emaw thu-ah pawh pain a fanu chu biak a duh ang chu; mahse, nang chuan ka rawn biak buai che leh ka man chhuah che hlauin i phone i off tlat thung a nia, eng ang fanu nge i nih a? Hetiang tùr hian ka enkawl lo che asin," a ti nghâl a, a aw chu a ring hran lo; mahse, thinrim insûm tak a ni tih erawh ka hre thei tho.

"Pa, signal a awm loh vàng a nih kha, ka off lo," tiin dam takin ka lo chhâng a, thu dik tak a nia, thu dik chu ka sawi ve ang chu.

"Signal awm lohna, dâwt min hrilh suh, tûnlaiah chuan khawi hmunah pawh signal awm lohna a awm tawh lo, signal awm theih loh tùrin khawi lai hmun êmah nge in awm bo a? Biak buai in va hlau àwm ve?" a ti leh charh charh a, chutah," Kha pa kha ka duh lo tih ka hrilh mawlh mawlh che a, ka thu zàwm lovin i hmu lui leh ngat a. I tân mi țha a ni lo. A, a țha lo vêl vek, ka hmuh vawi khatna ațang khân mi țha pângngai tak a ni lo tih ka hria a ni, mi țha ka duhpui che a, a pâwn lam lan dàn ațang khân a dik lo sa hrim hrim! Mi pângngai tak, mi fel leh țha tak nei rawh, i hmu zo lutuk! 'Ngaihzâwng' mai mai alawm i lo ti a ni maithei, ngaihzâwng i thlan uluk loh chuan nupui pasal țha tak neih hi a har a nia," a ti leh charh charh a, lo inrawlh vena tùr leh zawhna han chhàn tùr a awm lêm loh avàng chuan ka ngawi reng a, Dozer-a'n ngawi tùra min tih kha ka hre chhuak pakhat ve bawk a.

"Krismas a hnai tawh a, i nau taima tak leh țhahnemngai takin a thawk a, u zâwk i nêp tlat, hmeichhia zâwk lehnghâl. Tuna i zin boruak hi chu tûn atân chuan hun kal tawh, sawi sawi pawha awmze awm tawh lo a nih vàngin ka sawi chhuak tawh lo ang; mahse, kha pa kha theihnghilh hmak ang che, a hmêl pawh i hmu tawh tùr a ni lo. Rawn hmuh che te hi a tum mai mai ang e, ka duh loh dàn deuha chêt ngai lo tùrin awm ang che," a ti a, a ding vut a, ka room ațang chuan a chhuak zui ta nghâl a.

Zanriah ei chu tui lo duh tak a ni. Ka thin chu a rim vak ngam lo va, ka pa erawh ka ngei ru viau. Tu mah kan țawng mang lo va, ka nuin ka pa a be zauh a, Henry-a a lo la haw si lo nèn, ka chawthlèng ka melh deuh ngar reng mai.

Ka awm loh rei avàngin room-a kal daih nghâl chu ka inthlahrung a, hmun ka tih fel vek hnuah pawh chuan choka lamah awmin Henry-a lo haw hun ka nghâk pah a, chaw ei lo siamsak ka duh a ni. Ka nuin min be lo va, ka pain min be bawk si lo va, ka rilru hrehawm leh nizàn lam mut kham bawk si lo chu ka nguai khawp a ni.

Henry-a chu a rawn haw har deuh a, a rawn thlen veleh ," Chaw ei ka lo siam ang che aw," ka lo ti vat a, ani chuan," A ngai hleinem, keimahin ka lo insiam mai ang," a lo ti thung a, ka pa chuan," E, lo siam rawh, a ril a țâm tawh viau ang, hna thawktu hi chu ngaihtuah viau tùr, ani hi chu hna thawktu dik tak a nia, a zin bo ve mai mai hek lo," a lo ti deuh kher a, mahni lo maha hrehawm tih rûk ve nèn, chutia a han țawng kher chu ka va ngei tak! 

Ngawi rengin Henry-a chaw ei tùr chu ka siamsak a, ani pawh chuan kut silin a bâr zui ve nghâl a, ka kal dâwn chuan," I zinna chu a nuam bawk em?" tiin min zâwt sap a, ka pa a kal sawn tawh a; mahse, a la țawng zàwi viau tho.

"Um, nuam reng mai. I lo hah àwm mang e, i lo haw har bawk si," ka ti lêt ve a, thil dang sawipui daih ang. Ani chuan," Hahna chhan tùr a awm hran hleinem, ka han äm ve deuh mai a nia," a lo ti ve leh a, chutah," Father-a kha a thinrim ve khawp a, a chhan pawh rawn biak che a tuma i chhâng thei lo kha a nia, patea a rawn be ta ringawt a, i awm loh thu leh i zin thu a rawn hrilh chiah kha chu e, țêk tak hi a ni țêk tak! A hau hrep lo che maw?" a ti leh sar sar a.

"Hau êm êm lo, a thin chu a rim tho," ka lo ti a, ani chuan," Rim tak hi a ni, bowl pakhat a vawm keh phah a, a kut pawh a ât lo chauh a ni," a ti leh a, Henry-a chu ka en reng a. Ani tê hi chu a sual lêm lo ka tih tawh kha, Felfeli a awm tawh bawk si lo va, u ang tak takin min en niin ka hria, ka nu fapa a ni hi mak ka ti hial zâwk tawh a ni.

Thlèng ka sil laiin a eina hmun chu a lo hru fai a, min chêtpui thlap țhìn rêng a ni. Ka nu hian a rawn khap zauh țhìn zâwk a, "Mipain hmun an phiatin an ti fai dûk dûk ngai lo," a rawn tih hian ani erawh hi chuan," A harsa lo êm mai," a ti mai zêl a, a tih loh phah ngai chuang lo, ka nu pawh hian tihngaihna tak pawh hi a hre lo leh țhìn.

Room lama ka kal tawh hnuah Ruatpuia'n min rawn bia a," A rawn tlang ve ta tlat mai! I va inla reh ve? Rawn biak che ka tum fo a, a theih ngai miah loh," a rawn ti nghâl bawrh bawrh a, ka zin thu ka hrilh chuan," Min sàwm ve tùr che a nia, ka hnuaiah lah i thawk duh ta mang si lo va.  Rawn thawk leh hrâm la, Lunglei aiin Aizawl chu a nuam daih zâwk alawm, chawlh ka pe zing viau ang che, hriat thiamna tam tâwk i lakah chuan ka nei ang," a rawn ti leh a, sawi tùr hi chu a hre ve thei viau țhìn a ni.

Mut hmunah Dozer-a nèna kan thlalâkte chu ka en kual a, ka ngai thar leh vawng vawng a, thla kan lâk laite chu mitthlaah a rawn lang zut zut a, ama min hmehsak pawh a awm nual a, mawi pawh a mawi hlawm viau. Chau viau e ti lo chuan thlalâk chu ka en kual zêl a, tunah tak hian a mu ve tawh ang em? A thlen hlimah khân a buai dâwn si a, a chau ngawt ang, motor a chuang chau bawk nèn, a muhìl tawh ngei ang, a muthilh hma khân min ngaihtuah ve ngeiin ka ring a, min ngaihtuah rauh rauh chungin a muhìl ngei ang chu.

Henry-a zuiin ni tin dàwr nghâk tùr chuan ka chhuak ve leh ta a, tunah zet zawng Krismas a hnaih tawh vàng nge, dàwr pawh a lùn tawh a, Henry-a lo hah roh tùrzia kha ka hre thiam ta chiah a ni. Ka zin hma kha chuan tûn ang êm hi chuan kan buai lo asin le, ke nâ pawh a sawi theih tawh loh, bâkah, ka sawi ngam tawh lo hrim hrim bawk.

Chhùnah dàwrah ka kal a, in lamah chhûngkuaa chawhlui kan kîl laiin ka pain min zilh ziah a, chaw ei a tui duh viau lo. Dozer-a hming sawi ri ngai lo mah se țhena theihnghilh hmak tùrin min hrilh chàmchî a ni mai. " Pain 'a țha lo' ka tih chuan a țha lo a ni mai, min nèk luih tum lo la, a țha ang. I pa ka nia, ka thu i zawm ngei hi ka duh a ni, i tâna țha lo tùr ka ngaihtuah lo va, i nawm theihna tùr ka ngaihtuah s ni zâwk. Hmanlai pi leh pute lo sawi țhin 'Duh lohte nèna khuangchawi nge duhberte nèna bahra khur laih' an tih hi tûnlaiah chuan a dik thei tak tak tawh lo; Rethei taka awmin a hlim theih tak tak loh, ni tin kâwla ni chhuak chhiara ni tla van vuaia hna thawh chuan hlim reng hi har ve țak mai a nia aw, inhmangaih reng pawh a har. 'Inhmangaih phawt chuan' te hi tih mai mai loh tùr, i hmangaihna khân ei tùr a pe thei lo che a, inchàwm nân ni se a hman theih hek loh, chu chu hre reng rawh," tiin min zilh ziah a ni. 

Dozer-a'n min rawn be leh tawh a, min rawn be hmasa a, ka pa thu zàwma lo biak loh chu thil tih chi-ah ka ngai lo, tlângah hah takin a han chho tihna a ni a, lo chhànsak loh zawng a hawihhàwm loh thlâk dâwn êm asin. Ka chanchin min zâwt a, ka hrilh bawk a, ka pa thil sawi pawh a țhen a zâr ka hrilh ve tho. A lo zin theih hun tùr ka zâwt nghâl bawk a, ani chuan Krismas kár ngeia lo zin a  tum thu chu min hrilh a, ka rilru a hlim sawt thei, chutih rual erawh chuan huphurhna leh hlauhthàwnna ka nei nghâl tho bawk.

Ruatpuia'n," Kâr tàwpah ka rawn zin phei dâwn," a tih avàngin a room tùr chu ka tih faisak a, a fai vek tho a, a mutpuan tùr leh sin tùr lo dah felsak kha a ni deuh mai. Ka pain be țhain min duhpui viau mah se, ka țhianpa a ni a, chutiangin ka en ve thei lo, kan inkârah ințhiannna bâk a awm lo va, ka chanchin a hre vek a, min hre thiam a, ka chunga a fel êm avàngin ka duat ve tho a ngai a ni; mahse, ka pain a biak țhat deuh hi chuan nuam a ti thei si a, ka lo ngei leh deuh țhìn.

A rawn phei ta ngei a, ka pa pawhin a lo be țha leh viau mai. A dàn ngai têin ka nu pawh a lo be țha a, a lo zin laia ka nuin a lo be țha țhìn hi ka lãwm viau a ni, Ruatpuia tân pawh a lo biak țhat hian a nuam dâwn a, a awm dàn dik tak anga a awm hi ka lo hlau ngawih ngawih zâwk, a nun dàn hi a hriat chhuah loh hrâm ka beisei; mahse, mi ã tak a ni bîk lo va, a hre ru ker tawh maithei.

"Krismas chu Aizawl lamah rawn hmang phei la, a nuam viau ang," a tih chuan," A châkawm khawp mai; mahse, ka theih ka ring lo," tiin ka chhâng a. Ani chuan chek tlak tlak pah hian," Châk chu i châk loh tawp kha, dâwt sawi miah suh, ka hriat tawh khawp che hi maw," a lo ti a, ka nui ta ringawt. Ni e, ka châk lo ang tih a hria a, ka châk loh chhan pawh a hria ang, ani pawh hian min sâwm der ve mai mai a ni.

Chaw ei laiin a sawi chhuak pek a, ka pa lah chuan," Hunpui hi kan hmang khâwm khât khawp a, kumin chu hmangho ve ngei tawh ila ka lo ti rilru a, a nau Champhaia pasal nei pawh, an chhúngkua têa rawn zin thlâk an tum a," a lo ti thuai a, Felfelite an rawn zin thla dâwn tih ka lo hre miah lo. Ka pa hian a lo hre kar sia, chaw ei laia min zilh min zilh lovin chûng thute chu sawi zâwk tùr a nia, ka rilru pawh a zãng hawk ngei ang le. Ruatpuia min duhpui viau tih ka hria a, a kianga Aizawla Krismas hman a phal loh tlat dàn erawh Dozer-a hmua ka kal leh daih a hlau a ni ngei ang chu.

Felfelite rawn zin tùr aiin Dozer-a rawn kal tum chu ka lo phûr daih zâwk a, hria se chuan ka nu chu a thinrim teh ang chu! Kan rilru leh ngaihtuahna kan chala a inziak kulh ngai lo hi chu a làwmawm ngawt mai, chuti lo chu kan inman chhuak nasa àwm hlawm êm mai.

Felfelite rawn chhuk dâwn hma chiah zànah ka nu room-ah a rawn lût ve teh khiah a! Mak ka ti khawp a, lo biak lawk nachâng pawh ka hre lo hial a ni.

"I bialpa kha ka la hmu ve chuang lo nain kei chuan i pa ang ëm hian ka duh lo hran lo a nia, in induhtawn phawt chuan ka support tlat che u a ni, i pa bulah pawh ka lo țan ziah che a ni," a rawn ti a nih chu! Ka hre sual emaw ka ti, ka thil hriat tawh zawng zawngah chuan mak ka la ti berin ka ring, ka mumang chu a ni êm si lo maw.

*I CHUNGA THIL THLENG RÊNG RÊNG, A LÀWMAWM LAM EMAW A LÀWMAWM LO LAM PAWH NI SE,  CHUMI-AH CHUAN A ȚHA LAMA HMASÂWNNA TÙR ENG EMAW TAL LO ZAWNG ZÉL ANG CHE