☆DOZER☆ - 36 By Dingdi Pachuau

☆DOZER☆ - 36 By Dingdi Pachuau

Krismas thlen dâwn hma kârah Dozer-a chu a rawn zin ta ngei a, dàwra ka awm laiin min rawn bia a, a hmain kan in awmnate kha chu ka hrilh ve thuak thuak tawh kha a nia; mahse, kan ina kal ringawt chu a tihchi nâng, a rawn thlen veleh min rawn be hmasa a, dàwra rawn kal ve rih tùrin ka hrilh a, ani pawh chu a rawn kal ve mai bawk a.

Ka hmu a, ka mit lâk sawn har ka ti, ka ngai hman leh êm êm tawh a, ka hmuh theihah hian awm reng se ka ti, ka pa min zilhna, hmu tawh lo tùra min hrilhna thu kha chu a bo hneh lutuk ringawt, min dàwrtute nèn kan inbiak laklawh lai a ni tawh lo hlauh a, ka lo be nghâl vat thei rêng a ni. Henry-a chu ka nau a nih thu hrilhin an inchibai a, Henry-a mak ti meng phâwk chu ngaihsak duh lovin Dozer-a chu ka be leh nghâl daih a, a thlenna tùrte ka zâwt zui nghâl a, a țhutna tùrin chair pakhat chu ka pawt chhuak bawk a.

Dozer-a chu a hawi kual a," In dàwr chu a zauin bungrua pawh a muk țha khawp mai," a ti ve ngial a, ka nui sak a, Henry-a hi awm ve lo ta se a sawi kher ang em aw ka ti. Min ngaih thu a sawi maithei a ni, keiin ka sawi ngei bawk ang a; mahse, Henry-a hi, a lo awm ve kher a... Ani lah chuan Dozer-a chu a en duh khawp mai a, a en deuh ngawih ngawih ni maiin ka hria, a sam tih dàn leh inthuam dàn hrim hrim hi a hmuhnawm dangdai ve a, a àwm tihna chen chu ka nei ve tho. Bâkah, a hming ațangin ka bialpa a ni tih a hre nghâl ngei dâwn a, a vawi khat hmuhna a ni bawk a, a chîk ru ve tihna a ni mai.

Ei tùr a rawn thleng a, Henry-a'n min dàwrtute a buaipui hlànin ka ei tùr chu min chawh pawlhsak leh thlap a, min duatna tih lan hi chu a hreh ngai loh bâkah a zak ngai lo va, eng mahin a dang lo ka ti mai, nuam ka lo ti veng veng țhìn.

"Ka lâwm e," ka ti sap a, chutah," Ei țeuh rawh aw, i ril a țâm tawh viau ang, kan lam belh leh dâwn nia," ka ti zui leh sauh sauh a, ei tùr lah chu ni dang zawng aiin ka ei tui zui a, Dozer-a awm ve vàng leh min chawh pawlhsak vàng kha a ni ngei ang. 

"Ka hmanhmawh deuh hlek a, ka lu pawh ka rawn mêt hman lo, lu mehna dàwr a awm hnai em?" a tih chuan amah chu ka en vat a, a lu ka en leh a, a mêt a nih teh chuan aw... ka ui dâwn sa êm mai, tuna a sam tih dàn hi a inhmeh ka ti êm asin.

"I lu kha meh i tum maw?!! I inhmeh hlê si a," Henry-a chuan a rawn ti a, ka lo en vat a, a fork vuan reng chung hian Dozer-a chu khap miah lo hian a en a, a sawi kha a lo hre ve a ni ngei ang, teh tlat chuan, a thil rawn sawi nèn chuan amah chu inhmeh lo ka ti lutuk tlat. 

"Ka inhmeh i ti maw?" Dozer-a'n a tih chuan lo bu nghatin," Aw, mawi ka tih zâwng tak a nia, ka țhiante zîngah pawh ti an awm, ka pu ve châk țhìn asin aw; mahse, ka sam hian a zir ve loh bâkah, ka pain a phal dâwn lo sa a, engtin emaw tih kual vak hi a rem ti lo va," Henry-a chuan a lo ti leh a, kei chu ka ngawi reng a, nuam lo ti ru deuh takin ka hmaa ei tùr chu ka ei mawlh mawlh a.

"Nu leh pa thu âwih hi a țha a ni," Dozer-a'n a tih sup erawh chuan ner deuh nâng hian a hmêl chu ka en leh vat a, a thil sawi dàn kher kher chu min tih chhan deuh em maw ni, ka pa thu âwihin ani hi țhen ila min ti em ni? Teuh lo mai! Ka țhen dâwn lo chiang lutuk! A sawi vàng rêng rêng pawh hian ka țhen lo ang.

Ei tùr ei zawhah lu mêt tùrin kan chhuak a, kawnga kan kal lai chuan," I pa laka tlâktlum duh si chuan step khat-na atân lu meh hi a pawimawh ber a ni, pâwn lam lan dànah hian hma han sâwn chho ve phawt ila," a ti sup a, a bânah vuanin ka en chho a. A nin tawh vànga mêt tùr emaw ka tih laiin, nichîn pawh khân Henry-a khân ka pain a duh lo tih kha a sawi lang a, nuam lo ka lo ti rilru deuh hlek a nih nghe nghe kha; mahse, Henry-a sawi vàng ni lovin khami hma khân meh a duh tih a sawi tawh a ni.

"Engtin nge i hriat a? Khatiang kha ka pain a ngei zâwng tak a ni tih chu," ka ti hû a, ani chuan," Hriat a har hleinem," a lo ti mai a, ka nuih leh ringawt. Kan kal zêl a, mi kan pelh apiangin min en zui zêl mai, kei lah ka hawi lêt ve tho bawk sia. Lunglei hi chu mihring kan la tlêm deuh a, tlêma danglam deuh hleka inchei leh engtin emaw mi tih loh dàn hlek, style hrang hleka nung hi chu kan langsar ngawih ngawih bîk a, min en duh chhan pawh hi Dozer-a sam tih dàn vàng hi a ni tih ka hria a; mahse, engah vak ka ngai lo. Ka en chho a, ani hi chuan miin an en zui vawng vawng a ni tih a hriat ve hmêl loh khawp mai.

Ka pa emaw ka nu emaw kan hmuh ka ring lo va, ka thla pawh a muang. Lu a meh hma chuan thla ka lâksak leh rih a, a rûkin ui viau mah ila ka ui thu erawh ka sawi chhuak duh bîk lo a ni. Ni e, a sawi ang khân ka pa rilru hneh a tum dâwn a, a duh dàn hian kal phawt teh se, ka sawisêl lo ang.

A sam thar pawh a inhmeh leh ëm êm tho mai. A, he pa hi chuan engtin pawh mêt se a inhmeh vek tho ang, thur ber bur pawhin pu se a inhmeh tho tho dâwn.

"Eng nge ka an?" a tih chuan ka kutzungpui ka ti pir vá a, thlâ ka lâksak leh bawk. Dàwr lamah kan lêt leh vat a, Henry-a'n a lo hmuh chuan bu nghatin," I inhmeh tho mai; mahse, a hmaa i sam kha ka ui," a lo ti a, ani chuan," A ninawm ve deuh tawh a, tihian a zãng vah alawm," a lo ti thung a.

Dàwr ațangin kan haw har deuh a, chaw kan ei kham chiah tihah a rawn lêng ta a nih chu! A rawn lèn tùr thu min hrilh ngei a; mahse, ka lo hnial a, ka pa a thinrim tùr thu ka hrilh bawk a, khatia ka tih vàng khân a rawn lèn ngam ka ring lo hrim hrim a ni ber ang chu; mahse, a rawn lang miau mai.

Pângngai takin ka nuin a lo chhawn a, a țhu fel deuh chiah ang tihah ka pa a rawn lang a, a rawn hmuh veleh chuan," He inah hian rawn tih tùr i nei hauh lo, ka hrilh chiang viau tawh che a ni lo'm ni? Ka fanu hi i ngaihzàwn phâk a ni lo, tum tâwk hre rawh. Remruatkim, nang pawh room-ah kal nghâl rawh, ka thil sawi kha i pa hian ka sawi mai mai lo a ni tih hre reng ang che," a rawn ti khur khur mai a, a hmêl ațang chuan a lem sek a nih ka ring, a thin a rim a ni tih a hriat viau a, a meng sen rûm a, ni dangah min min vìn vak ngai lo nèn, ka phu nasa ngei mai!

Ka nu chuan," Paa, insûm teh, a mak êm mai," a lo ti vat a, ka zak lutuk a, hrehawm ka ti bawk nèn, Dozer-a pawh ka en ngam lo. Ka pa erawh chuan min rawn kâwkin," I room-ah kal rawh ka tih chu, ka dawhtheihna fiah tum suh," a ti leh a, ka zin ka haw hnu ațang khân zàn lamah zu rim a nam zeuh zeuh tih ka hre tawh a, a rùi erawh ka la hmuh ngai loh vàng chuan ka hlau ru khawp mai a, a thin a rim bawk nèn, mawi lo taka Dozer-a chunga a chét duh mai ka hlauh avàng chuan a thu âwihin ka tho ta thuai a, ka zak leh hrehawm ti chuan Dozer-a pawh ka melh ngam lo.

Che lovin khumah ka țhu reng a, ka pa chuan engtin nge a àn khum ang tih chu ka ngaihtuah a, Dozer-a chu a zakin hrehawm a ti ve ngawt ang, a thuhrimah kum 30 ka tling tawh a,  ka tâna țha hre lo rual ka ni tawh bîk lo, hmeichhe tleirãwl, mahni tâna țha pawh hre lo rual ang kha ka ni tawh lo va, ka lo thlang sual a nih pawhin ka tuar mai ang, pasalah ka nei nghâl dâwn tih pawh ni hlei lo, a over mah mah a ni. Tûnlaiah tu nu leh pa mahin an fate duh zâwng lakah an inrawlh ve sek tawh ngai lo, a hmãnlai mah mah tawh a ni. Țah ka tum hauh lo va, ka pa chêt dàn 'țhing' lutuk chuan ka thin a ti rim zâwk a ni.

Dozer-a tak chu, ka va khawngaih tak! Ka pa laka mark tih țhat tumin vawiin lamah pawh a lu a mêt a nia, ka ui tehlul nèn, hetiang hi a ni dâwn tih chu hria ila chuan mêt lo tùrin ka lo dang lui țàng țáng ngei ang. Khatiang khân ka pa kha a awm ngai si lo va, keimah vàngin zu hi a in phah em ni ang? A, a duh vàngin a in zâwk a ni, keiin in tùrin ka ti hauh lo, a duh thu ngeia in a ni.

Room kawngka rì-ah chuan ka harh zawk a, ka pain min rawn luhchilh dâwn a nih ringin hlauthãwng deuh takin ka lo en hrâ a; mahse, Henry-a a ni tih ka hmuh chuan ka thaw huai a, Dozer-a a haw tawh a ni thei mai ang em? Henry-a hi ka pain min vin lai khân a room-ah a awm a, ka pa țawng kha a hre ve kher lo maithei, tlangvâl a ni ve tawh tho a, ka pa hi zilh ve se a țha ang, kei hmeichhe âwmnêm ngawt ai chuan mipa chu a zah deuh zâwk ang, bâkah, kei chuan a lung ka ti awi lo tawh tlat a, ka thu sawi paeh a ngaithla duh lo ang.

Ka bulah a rawn țhu a, ka țhat leh țhat loh min rawn zâwt tê tê a, ka țha tih ka hrilh hnu chuan," A pawi ngawt mai, a zahthlâk bawk si a, zu a in vàng vek a ni," a ti sap sap a, ka pain Dozer-a a țawng khum dàn chu min hrilh luam bawk a.

"U, kei chu U Dozer-a ka hmuh khân mi sual a nih ka ring lo. A hmain ka pain a sawi lo hre ve tawh mah ila amah ka hmuh chiah khân ka lo rin dàn sa kha ka paih bo nghâl vek a ni, a fel ka tih tùr chi tak leh ka ngainat tùr chi tak a ni tlat. Zanin khân mipa dang chu ni se thinrim takin an haw nghâl a nih loh pawhin buaina a chhuak ngeiin ka ring a, a nih loh pawhin ka pa duh loh tùr leh runluih tùrin an che ngei ang; mahse, ka pa kha ngeiawm zâwngin a chhâng lo hrim hrim. A duh thu che a sawi mai a, thinrim hmêl pawh a pu chuang lo, a zaidam tak zet a ni," a ti malh malh a.

"Hmuhsitawm deuh deuhin a țawng khum ang tiraw?" ka tih chuan," Ka hrilh nual che kha. Ka pa hi hetiang hian a țawngkam a lo chhe thei a ni tih zanin ațang chiah khân ka hria, Felfelite inrûk lai khân thinrim viau mah se a insûm thei viau a, ka nu thinrim pawh bengdaitu zâwkah a țang hial a nia; mahse, zanin kha chu, ka hre thiam tawh lo, zu a in vàng vek hi a ni," a ti leh a, rilru hah hmel tak chu thâwk a la hap a.

Ka țap lo mai ni lovin ka mittui pawh a tla miah lo a nia; mahse, a hnua Dozer-a nèn phone-a kan inbiak erawh chuan ka insûm thei lo va, ka țap chhuak hauh lo nain ka mittui erawh ka dang zo lo a ni. Min rawn hriat chhuah ka hlauh êm avàng erawh chuan ka ngawi leh vang vang țhìn, ka mittui a tla a ni tih a hriat hlauh chuan min ngaihtuah vàngin a rilru a hrehawm belh ang tih ka hlau a, chu chu ka duh lo a ni. A beidawn dâwn loh thu chu min hrilh a, a vawi khatna chauh a la nia, vawi khatna ațanga bei tih dawn chu a tum lo viau mai, vawi tam tak ka pa chu biaka hmuh a la tum thu a sawi a, kei erawh chuan ka khawngaih ëm avàngin tûn atân chuan hmu tawh rih lo tùrin ka hrilh a. Rei tak kan inbia a, naktûk lama inhmuh leh intiamin kan inbe tàwp ta hrâm a, ka tih tàwp chhan pawh vawiin lama a motor rawn chuang a chauh viau ka rin vàng a ni.

Ka pa han over-zia chu, dàwrah a rawn kal ve zêl a nih chu! Hmeichhe naupangah min ngai em maw ni, ka thin a ti rim deuh hlek a, min zui chhan lah ka hre chiang nasa mai si a," Kha pa kha i hmu tawh tùr a ni lo, ka vêng reng mai ang che, Mizo dik tak pawh ni hlei lo, mi rethei, nula bum tùr zawnga vâk kual mai mai," a la ti bul bul zui a, han chhàn lêt ka châk viau nain chhâng mah ila awmzia a awm dâwn chuang lo va,  chu vàng chauh chuan ka insûm hrâm a ni, bâkah, mi hriat laia mahni pate chhàn pàwng páwng ka duh lo, amah ka tih hmingchhiat dâwn bâkah keimah ngei pawh eng mah loah ka inchhuah dâwn tihna a ni si a, heti taka a nungchang a danglam ta erawh mak ka ti viau a ni.

Dozer-a ka text rûk avàngin dàwrah chuan a hmêl a rawn lan ta lo va, châm rei thei a ni bîk si lo va, a tum dànin naktûk lama haw mai a tum a ni àwm e. A haw leh hma ngeia min hmuh leh hrâm chu a duh viau a; mahse, thil thleng thei ka ngaihtuah a, ka duh loh avàngin ti lui lo tùrin ka ngèn thung a. Chhùna ei tùr lei tùrin Henry-a kal a chuh tlat a, ni dangah chuan kan phone mai zêl a nia; mahse, kal ngei a duh tlat si a, eng mah ka sawi lo.

Ka pa chu nilêngin a awm ve a, a pawi lo, awm ve reng se, zàn lamah pawh zu a in lo thei ang chu. Haw hma a rawt a, kan haw rual thlap a, biak erawh kan inbe tam lo hlawm khawp mai. Inah, ka room-a ka awm laiin Henry-a a rawn lût a, polythene hian eng emaw khaiin ka khumah a dah a, eng mah sawi lovin a chhuak zui leh daih sia, eng tak chu ni ang maw ti rilruin ka en chhin ta nghâl a.

'Krismas present' tia thu ziak ka hmuh chuan ka nui sak a, Henry-a chu, a ngaihtuah thui ve reuh hle mai ka ti; mahse, Krismas ni takah min pëk ve mai àwm a nia ka ti leh a, ka han hawng chhin a, kawr leh kekawr in-suit thlap, deh nuam tak ka hmuh tâkah chuan engtik laia a lei nge ni ang aw ka ti rilru vang vang a. Thlasik lai a ni a, kan inah hi chuan vâwt ka ti lutuk ngai lo nain ka ke erawh a lum har țhìn alawm, min pêk nachâng a hria chu ka lãwm tak tak a ni.

Phone ka khawih a, Henry-a text-in làwm thu ka hrilh a, ani chuan min rawn chhâng vat a, ama min pêk a nih loh thu leh Dozer-a min pêk a nih thu a rawn sawi chuan mak ka ti kher mai, engtik laiin nge an inhmuh hmana an inpêk hman tih ka zawh chuan vawiina an dàwr bula Dozer-a a hmuh thu sawiin ei tùr lama a kal chhuah chhan pawh Dozer-a vàng a ni tih chu min rawn hrilh leh a.

Dozer-a tak chu, ka hmu ve châk asin le. Làwm thu sawia phone ka tum lai tak chuan ka pa a rawn lût a,  a inbual zo chiah a ni ang, zu rim pawh a rawn nam lo. Be lovin ka en ringawt a, dik tak chuan biak ka peih lo a ni. Inngainat lutuk loh sa nèn, kan inkâr hetiang hi a lo ni ta bawk si a, be dâwn pawh ni ila biak dàn tùr pawh ka hre lo.

"Bawihi, nizàna ka vin vàng che khân a pawi ka ti, zu ka lo lem hlek vàng kha a ni pakhat a, bâkah, kha pa kha ka hmu leh zui ta bawk nèn, ka insûm thei ta lo a nih kha," ka rin loh deuh chuan a rawn ti a, mak ka tih avàng chuan țawng lovin ka en reng a, amah vêk chuan," Ka thu hi âwihin țhen tum ve mai la, i chunga sual chhuah hi ka duh bïk lo a ni," a rawn ti leh a.

"Pa, Dozer-a kha mi sual leh mi rethei, sum duh tak a ni lo asin, engati nge i duh loh tlat?" Chu hun chu remchângah lain ka ti ve ta kalh a, ani chuan," I tân a țha tâwk lo a ni, mi sual tak chu a lo ni lo pawh a ni maithei; mahse, i tân hian ka duh thei lo a ni, mi sual awm țha duh lo ang maiin, a lu meh dàn te kha, mi pângngai tak tân khatiang kha lu meh dàn tùr a ni lo hrim hrim! Nizàn kha chuan a lo mêt ve ta zâwk a,  chu pawh chu ni se ka duh chuang lo, ka rilru ka sawh sawn lo ang, ka thu hi âwih teh, Mizo pure a nih loh bâkah i tân a upa tawh a, pathlawi a nih hial ka rin bâkah a chanchin tam zâwk hi i hriat loh ka ring tlat bawk. A duh lo ang che ka ti lo, a duh ang che, ani tân chuan i țha lutuk tlat a, a duh thu che a sawi pawh khân ka ringhlel rêng rêng lo, i taksa leh i sum hi a duh ang. Chu vàng chuan, i rualpui deuh leh i zàwlpui tâwk ngaihzâwng nei rawh, ka sawisêl lo ang che, chu chu i hre reng dâwn nia,," a lo ti leh a.

"A pu kha Mizo dik tak, Râlte hnam ngat a nih kha, chuan, pathlawi a ni lo," ka lo ti thung a," Sum îta min ngaizâwng tùr lahin sum eng zât mah neih ka nei lo, i sum neih hi ka sum a ni hleinem. Pa, amah khân kei aiin a ngah daih zâwk, i hre chiang lo mai mai a nih kha, ka chungah a felin min ngaihsak a, khatianga ngaihsakna dawn kha nuam ka ti a ni," zah pawh sawi lovin duhthawh takin ka ti leh a, a rilru fìm laia ka sawi duh chu sawi chhuah vek ka duh, amahin a sawi pawp hmasa bawk a.

"Chu, ka ngaihsak tâwk lo che i tihna a ni maw?" a rawn tih chuan," Ni lo, ka sawi awmzia chu--" ka tih lai chuan min rawn pawt chatin," Ka hre thiam e, i pa hian ka lo ngaihsak tâwk lo che a, ka ngaihsakna che i duh khawp lo va, mi dang ngaihsakna i duh a, i pan ta a. Khawnge i têt lai zawng zawnga ka ngaihsakna che kha a awm tâk? I theihnghilh zo ta em ni? Tu ma enkawl che pawh phal lovin ka enkawl chho che a, i nu-ah țangin i pa ka ni bawk a, i hrehawm bîk ang i tih hlauin kawng engkimah ka theihtàwp chhuahin ka enkawl che, khâng kha eng mah lo mai a lo ni maw? Hetiang hi ka ngaihsakna che min chhàn lêt dàn maw ni dâwn?" a ti leh ta tùn tún a, a inâng thinrim chho leh dâwn, ka thil sawi a bawplawkah a la leh tlat tawh.

Mutnaah Dozer-a ka text a, ka be bawk a. A thil min pêkah làwm thu ka hrilh a, ani chuan," Nichîn khân in in bulah ka rawn kal a, hmuh theiha i awm tâk mialin ka ti a; mahse, i vâng khawp mai," a rawn ti a, ta mai mai chuan aw, ka va khawngaih roh tak! Ka pa nèn kan inchhàn deuh vàng khân ka room-ah ka awm reng a, bâkah, a rawn kal ka ring miah lo bawk a.

"Pathlawi i ni lo tiraw?" tia ka zawh chuan a rawn nui hawk a," Eng titiha min zâwt nge maw i nih le?" a rawn tih chuan," Ka pain 'Pathlawi' a ti tlat che alawm," tiin ka chhâng a," I pa hi chuan min va ring mak țhìn tak! Ka lo ni zâwk em maw ni le," a rawn ti sup a, a thinrim phah lo tih ka hria a, za lo takin ka nui ve sak a.

"Ka pa mit hmuhah chuan pathlawi i ni tlat a ni," ka ti leh a, ani chuan," Ni teh mai ang, keimah vàngin kut i tuar hran lo va, a làwmawm. I tuar ang tih ka hlau ber a; mahse, a fanu dik tak kha i nia, kut a thlâk phal che kha chu ka ring lo sa hrim hrim. Min ring 'mak' viau mah se i pa a nihna angin zah la, a thinrim laiin chhâng lo la, zaidam thei ang berin i be zêl dâwn nia, kei pawh kum thar lamah ka dam chuan ka rawn kal leh ang," a rawn ti dap dap a.

*MIHRING HI ZAWNG FEL LEH ȚHA FAMKIM KAN AWM LO VA, TIH SUAL NEIIN KAN DAI PELH REM RUM FO A; MAHSE, KAN TIH SUAL ȚHENKHAT AȚANGIN ZIRLAI KAN ZIR CHHUAK A, CHU CHUAN KAN NUN KAWNGAH, MI ȚHA ZÂWKAH MIN CHHER CHHO ȚHÌN A NI*