☆DOZER☆ - 37 By Dingdi Pachuau

☆DOZER☆ - 37 By Dingdi Pachuau

Krismas nuam lo ber chu a va ni tak êm! Nikum lama ka hun hman dàn kha ka ngaihtuah lêt vang vang a, tûn hun nèn hi chuan a inang lo tak zet a ni. Dozer-a ngaihtuah reng chungin hun ka hmang a, a hmingin ka inkhâwm ve a ni ber, țawngțai lam erawh hi chu ka thlahthlam ngam lo tawp, zan tin ka pa tân ka țawngțai bâkah Dozer-a nèn hma lam hun hlimawm kan neih theih nân ka dîl ziah a, min chhàn hun a awm ngei pawh ka beisei bawk a ni.

Ka țhiante chuan Krismas chibai bûkin min rawn be ve dan dan hlawm a, an fel ka ti, kei chuan ka ngaihtuah phâk tawh hlawm miah lo a nia. Ruatpuia phei chuan Kum thar rawn hman phei a tum thu a sawi nghe nghe a, a duh phawt chuan lo hmang se pawi lo tùrah ngai ang, ka pa pawhin zu a in loh phah deuh mahna!

Henry-a țhianteho kan inah an rawn kal khâwm țhìn a, an rîk nak nak fo avàngin kan in reh ruih tùr pawh chu a reh loh phah a, ka pa pawh a insûm ve deuh a ni ang, an awm lai chuan zu rim a nam ngai lovin ka hria, chu vàng tak chuan an awm khâwm lêt lêt țhìn chu ning ru deuh hlek mah ila kawng lehlam takah chuan zia ka ti ru phian a; mahse, min fiama min chhaih peih țhìn lutuk chu ka ning, an naupang ve hlawm bawk si a.  Nula awm ve ta chuan an in tùrte ka lo buaipui ve lo thei lo va, chutah tak chuan min fak chiamin Henry-a hnênah chuan kei anga u nula fel neih an châk ve thu chu ka hriat lai ngeiin an sawi ta chiam mai țhìn a, an zak lo ve har har hlawm bawk si a, fakna thu mah ni se kei nula senior lam tawh hi ka zah phah fo a ni. An thawvengin vei an nei lo hlawm a, an rilru leh ka rilru a inpâwl phâk thei lo, an boruak hap chin chu ka hap pha ve hlei thei lo a ni ber ang chu.

Dozer-a'n min rawn biak chuan tlêmin ka hlim ve deuh a, awka zãngkhai talin ka bia a, ka hlim lo awka a hriat hi ka duh lo hrim hrim a ni, kan inbe reng thei lo va, inbiak chhunah hi chuan hlim taka biak hi ka duh.

A nu nèn an inbiak thute min hrilh ve a, kei chuan," Ka nu Zomawii chu a lo dam țha maw? Ka ngai reuh mang e, min duat si a," ka lo ti vat a, ani chuan," Aw, a dam țha e," a ti phawt a, a chawlh deuh dat hnuah," Kei pawhin ka duat tho che kha, kei min ngai lovin ka nu i ngai daih a..." a ti zui leh sup sup a, a țawng dàn sup sup avàng chuan ka lo nui hak thung a.

"Nang chu sawi ngai lova chiang sa a nia, he khawvêlah hian ka ngai ber che alawm, i hriat reng kha," ka tih chuan," Ka hre miah lo, han sawi la," a lo ti dul ruih a. Ka sawi ngei hriat a duh ve rêng rêng a ni tih hriain," Ka ngai che, ka ngai lutuk che, Dozer," ka ti ta hnâp a, ani chuan," Tikhân ka hre ta chiah e. Kei pawhin ka naute hi ka ngai leh tawh hlê a ni, ni tin ka hmuh reng theih tùrin ka kiangah awm se ka ti," a rawn ti ve sup sup a, direct tawpa min hrilh ang ni lova third person anga min han sawi vêl chu nuam ka ti leh tlat pek a! Chutiang thu ngaihthlâk hrehawm lo tak mai, a ka ngei ațanga ka han hre phei chu ka ngaih a țha veng veng a, amah ka ngaihna erawh a zual phah hlê thung.

Kum hlui thlah zànah chuan in chungah ka awm a, thla a êng lo nain a thim lêm lo va, ràl hla deuh hleka êng a tam avàngin thla êng têl lo pawhin a êng tâwk viau ka ti. Dozer-a ka ngaihtuah leh reuh reuh tawh a, engtin tak hun hmang ve ang maw? Phaizâwlah kum thar hun hman tum an awm ang em? Nge amah tê chauhin a awm leh ruk ruk ang? Inbiak theih tal se chuan a zia deuh tùr. Ngai viau mah ila kan inbiak hi chuan lunglèn pawh a zia ve deuh a, a aw rî dam thlup mai khân min ti dam țhìn a ni. Kum thar rawn hman tum Ruatpuia lah chu a hman thei leh ta mang si lo va, ka mal leh rak rak viau mai, Henry-a leh a țhiante chu hmun dangah an kal daih a, chu vàng chuan kan in pawh a reh ruih mai.

Ka phone a rawn nghawr dar dar chuan phûr lo zet hian ka ipte ațang chuan ka la chhuak a, ka en chuan ka rin phâk loh Dozer-a a lo ni a, ka phûr nghâl zar mai.

"Dozer...! Ka rin phâk bâk a ni," aw  zãng veh vawh hian ka ti chhuak hliai a, ani chuan," A nih ka ring, i aw chu hriat a nuam hlê mai," a rawn ti ve thung a, ka hlim avàng chuan ka nui hak a," Min biak duh vàngin tlângah i lâwn tihna em ni? A vâwt àwm mang e," ka ti zui leh nghâl zat a.

"Ka nu bulah kum thar hmang tùrin ka kal a, kan pahniha kan kal dunna tlângah khân rawn biak che ka duh vàngin hei ka kal leh a, i tel ve tawh si lo va, a khawharthlâk viau a ni," a rawn ti zàwi ruih a, ka mitthlaah kan kalna hmun chu suangtuah lêtin ka hmu zawr zawr a, amah têin a țhu khur àwm si a, a vâwt ngawt ang chu.

"A va vâwt dáwn ve?! I inha lum țha maw?" ka tih chuan," Nang biak nân chuan vâwt pawh ka pawisa thei lo chu a nih hi, biak che ka duh si a," a rawn ti leh a. Ka khawngaih hnûp hnûp mang tak e, ka mitthlain ka hmu rauh rauh a, a țawng zâwng chuan a thaw khu luai luai ang chu.

"Ka lãwm lutuk aw; mahse, ka va khawngaih tak che! A vâwt dâwn nasa tih ka hria a, i inha lum tâwk lo ang tih ka hlau. I damloh phah hlauh chuan ka inthiam thei dâwn hauh lo a nia," ka ti leh zung zung a, ani chu a lo nui hawk ringawt a, a țawng loh avàng chuan," Ka ti tak tak aw, damloh phah miah suh. I aw ka hria a, ka hlim phah êm êm a; mahse, a vâwt dâwn si, ka khawngaih bawk si che a, ka inthiam lo ru viau bawk a ni," ka ti leh a.

"Engah nge i inthiam loh ngawt? I aw ka hre duh a, ka hriat duh vàngin ka rawn bia che alawm, inthiam lo tawh miah suh. Zaninah tu nge hun i hmanpui dâwn?" a rawn ti zui ta daih a, a thil sawi tàwp lam vàng chuan ka meng deuh ãwk a; mahse, min rawn fiam mai mai a nih ka ring leh ta zâwk a, nui chung hian," Ka suangtuahna mitthlaa nangmah hmu rauh rauh reng chungin ka mu mai ang, kum hlui thlah rual pawh ka nih tawh loh hi," tiin ka chhâng a.

Kan inbe deuh reng a, a țawng tam ve vak lo a, kei erawh chu ka țawng leh deuh char char a," Țawng ve tawh rawh," ka tih lahin," I țawng ngaihthlâk ka duh alawm, țawng zêl rawh," a ti zêl a. A awm dàn tùr ka mitthlaa hmu reng chungin rei tak erawh biak ka duh lo deuh a, amah lah chuan," Ţawng zêl rawh," a rawn ti zêl si a, rei ve tâwk tak ka biak hnuah chuan," A váwt si a, i khawng vek palh ang, duh tâwk tawh ang aw, ka nu Zomawii chu min lo biak la, kum thar chibai min lo büksak dâwn nia, chuan, Tim-a pawh aw, an ngaihawmin ka chungah an fel si a," ka ti leh duah a.

Kan inbiak zawh hnu chuan ka thaw huai a, ngai viau mah ila a aw ka hre leh a, ka hlim phah tho. Mal viau mah ila a hlimthlâin min chènchilh a, zanin chu tui takin ka mu ngei ang, naktûk lamah pawh min rawn biak a tum kha maw.

*******

Kum a thar a, kum a thar ațanga ni lìnaah Ruatpuia a rawn zin phei a, kan inah a rawn thleng ve a, a rawn thlen zànah ka pa chu a rui miah lo va, zu rim pawh a nam lo. An pahnih chuan an inkàwm a, zu rim a nam lo ringawt pawh chu ka lo lãwm tâwk viau a ni.

Ka pate mut hnuah rei vak lo chu kan țhu dùn a, Dozer-a nèna kan chanchin chu min zâwt a, kan la inbe țhìn em tihte min zâwt a, kei chuan," Engah nge kan inbiak țhin loh ngawt ang? Min rawn be tùrin tlângah khãn a làwn phah ziah a, zin pawh a rawn zin țêp tawh ang," tiin ka chhâng a.

"A țhat hlauh chu. Tih tak takah chuan peih lo chung chung pawha tlânga làwn țuih țuih phah hialna tùr khawpin i țha tâwk miau a, kei pawh ni ila e ni tin zan tin nang rawn be tùr che chuan ka lâwn peih ang chu," a rawn ti a, ka lo en vat a, a nui deuh tih ka hmuh chuan hmui tih pawrh khumin," Tenawm viau suh aw," ka lo ti vat a, ka melh rum bawk a.

"Ka tenawm lo bawk, ka inbual fai vek tawh a, ka ke ni se ka sil fai vek tawh bawk. Zanin chu ka mu tui ngawt ang chu, i mutpuan phahah ngei ka mu leh dâwn a nia, a nuam dâwn, Dozer-a chanpual mah ni la," a ti leh deuh kher chu ka ngei ru khawp mai a, ben tumin ka kut ka lek uaih a, a nui ta hawk hawk a.

"Min ben chuan... mu daih teh ang, mitthlaa nula ngaihtuah tùr ka nei țha khiau khiau si a, mang ramah lènpui ziai ziai teh ang," tiin a tho zui ta daih a, ngaihzâwng ena ka en loh lutuk vàng nge he pa hi chu ka hlau lo hrim hrim a, zui ve nghâlin a room tùr thlengin ka thlah nghe nghe.

A châm rei lo, ni khat chu a châm ve a nih chu, a haw tlaiah Dozer-a'n min rawn bia a," Lungleiah ka rawn zin leh a, zaninah ka rawn lêng dâwn," a rawn ti leh ta mai! A rawn haw tawh tih kha chu ka hre ngei a; mahse, heta a rawn kal chu ka lo ring pha miah lo asin.

Ka rem ti vak lo chung chu zànah chuan a rawn lêng ta ngei a, ka pa laka inthlahrun a na duh ngei mai. A rawn luh laiin ka nu leh pa chu sitting room-ah an awm a, ka nuin a lo be ve luam a, ka pa erawh chu țawng miah lovin room lamah a lût nghâl thuai a, a rawn lang leh tawh lo hrim hrim. Ka nu kal sawn hnuah rilru thlamuang lutuk lo chuan ka kàwm a, ka pa a rawn kal thut ang tih hlauhna ka nei tlat a, invêng rengin ka kàwm a nih deuh chu. A hmêl hmuh a hrehawm lo va, a dam țha tih a lang reng a, chu chuan min ti hlim ru viau mai.

A haw tum hun ka zawh chuan," Naktúk chawhnu lamah a ni ang. Nimin tlai khân ka rawn thleng tawh a, hrilh lâwk lo chea rawn surprise che ka tum a," a tih charh charh chuan," A ni maw?!! Engati nge chutiangte chu min hrilh loh?" ka lo ti vat a, ani chuan," Surprise che ka tum ka tih kha; mahse..." a ti sup a, a ngawi ta daih a. A hmêl chu ka en reng a, a kuta va dawmsak ka châk a, a âwma bei vang vang pawh ka châk; mahse, ka pa rawn lang thut se a thin ka tih rim belh ang tih ka hlau bawk si.

Ka hmui ka peh fan fan lai chuan," Mi dang tân ka phal ngai lo ang che, chu chu i hria tiraw? Min phatsan ka ring hek lo va, ka hre chiang tâwk tawh chein ka hre bawk, a dik tiraw?" a rawn ti leh charh charh a, kan inen dùn rân a," A dik alawm, Dozer, nang lo chu tu mah ka duh lo va, phatsan che ka tum chhin ngai hek lo, ka tum ngai lo bawk ang," ka ti ve leh a.

A lêng rei vak lo, Henry-a chhuak rawn haw hnu lawkah haw tumin a tho ve thuai a, veranda thleng ka thlah a, ka chhuah pahin light ka off bawk a, chutah chuan kan inkuah a, kan infâwp ngam ve ta bawk. Inngai leh inthlahlel takin kan inkuahin kan infâwp a, ka thlahlel tak zet a ni. Tunah tak hi chuan ka pain min rawn hmuin thinrimin min rawn àn khum ta ang se la chuan ka zui haw daih duh ang!

In chhûnga ka luh erawh chuan ka pa nèn kan inhmachhawn ta ràn a, min lo ngaithla ru reng a ni ngei ang chu.

"Kha pa kha kan inah hian ka hmu leh a nih chuan police ka ko tawh ang, i hria maw? Ka hmu duh tawh lo, ka ti mai mai lo a nia, i hmu zui zêl a nih chuan he inah hian chan pakhat mah i nei lo bawk ang, i chan tùra ka dah dàwr leh in hmun pawh i chân vek ang," a ti khur khur a, a meng sen rûm bawk si a, âng pah chuan a vei kual a, ding chutin min rawn en leh kur țhìn bawk a, a lang hlauhawm tak zet a ni.

"Kha pa kha i tân mi țha a ni lo ka tih tawh kha, upate'n 'Hmangaih berte nèna bahra khur laih' an tih ang kha i lo thlang ve te hi a ni ang e, bahra khur laih hrehawmzia i hre lo a ni, retheih chuan maw a hlim tak tak theih loh, sum a awm loh chuan inhmangaih tak tak pawh a har, damloh nikhuain engtin nge in awm ang? Thingtlâng kilkhãwrah engtin nge i inenkawl ang? Chutianga awm tùr chuan kei i pa hian ka phal thei ngai lo ang che, ka fanu i ni a, ka hmangaih che, kei i pa aia hmangaihtu che hi i hmu ngai lo ang. Ka thu i zawm loh chuan tluan pawh i tluang thei lo ang, ngun takin ngaihtuah rawh, kha pa hmêl kha ka hmu duh tawh lo, last warning a nih tawh chu, mu rawh," a ti leh hmuar hmuar a, min melh leh khui khui hnuah an room lam pan chuan a kal phei ta chhur chhur a.

Ka room-a ka luh hnu lawkah ka nu a rawn lût ve leh a," I pa thu sawi kha chu engah mah ngai duh suh, kei chu i lamah ka țang tlat a nia, a tàwp thlengin ka țang ang, i rilrute kha i lo ti hah ang e, i pa rilru hneh tumin țan ka lo lâkpui zêl ang che, tui takin mu rawh," a rawn ti a, kei pawh chuan làwm thu ka hrilh ve a, rei pawh awm lovin a chhuak zui ta thuai a.

Dozer-a nèn mut hmunah kan inbe leh a, ka pa min zilhna kha chu mênah ka thlâk leh tawh. Rei tak kan inbia a, kan inbiak fê hnuah chuan Ruatpuia a rawn zin a ni tih a hria tih ka hre chhuak a, kan ina a hmuh avàngin rawn lèn luh pawh a duh lo a ni tih ka dâwp chhuak leh a,  a chhan chu nimin lam daiha rawn thleng tawh a ni tlat a, Ruatpuia a rawn zin avàngin kei lah dàwrah ka kal lo bawk a. Ka dâwp chhuah hnu chuan ka hre thiam ta uar uar mai, zanina a thil sawi vêl pawh kha.

"Dozer, ka thâwk tàwp thlengin, ni leh lo, chatuan thleng pawhin ka hmangaih ang che, nang lo chu tu mah ka duh lo va, melh pawh ka tum ngai lo bawk ang, nang ka neih loh che chuan tu mah ka nei lo ang, ka hmangaih che, nangmah chauh hi a ni ka hmangaih, ka dam chhûng leh ka thih hnu piah lam thlengin ka hmangaih reng ang che," duhthawh tak chuan ka ti a, ka hmangaih tak zet a ni tih hi hre chiang viau se tih ka duh ngawih ngawih a ni ber. Mipa dang thîkin a rilru ti buai lo se, kei hian tu mah dang ka hawi lo bur a ni tih hi hria se ka duh.

"Ka hre dik tih ka hria asin, hlim taka ka la siam thei lo che erawh pawi ka ti; mahse, rei tak nghah ngai lo tùrah ngai ang, beiseinain ka thlîr reng a, kan hlimna ti zualtu a nih ngei pawh ka beisei a ni," a rawn ti ve sup sup a," Ruatpuia nèn khân ka ringhlel lo che u a; mahse, mipa dang nèna hmuh dun che hi ka duh lo," a rawn ti leh a.

A tûkah a haw hma chuan dàwrah min rawn tlawh a, ka sàwm vàng a ni nghe nghe a, Henry-a pawhin a lo hre tawh bawk a, an titi nghál bawrh bawrh mai. Ka nau nèn inpawh taka an titi chu ngaihthlâk nuam ka ti, ka nu nèn ka lamah an țang a, a nuam ve hrim hrim, ka pa pawh hi engtikah emaw chuan a rilru a la sawh sawn ngei pawh ka beisei a, ka lamah țangin Dozer-a min duhpui ngei ka ring tlat a ni.

"In lama lo lèn pawh duh tâwk lovin dàwr lamah leh zêl pawh maw?" tih ri ka hriat chuan ka ngaihtuahna ațanga harh chhuakin ka hawi chhuak vat a, ka pa thinrim hmêl rum ùl ka hmuh tâkah chuan ka ding zawt a, a chhùn ruih a ni chiang mai, a meng sen rûm a, zu rim a nam nghâl rum rum bawk.

"Pa...--" ka tih rual chuan Henry-a pawh chuan," Ka pa!!" a lo ti ve vat a, ani chuan," He pa hmêl hi hmuh ka duh tawh loh thu kha ka hrilh chiang viau che a," tiin min rawn en a, Dozer-a lam en lehin," Chutiang bawkin nang pawh ka hrilh che kha, hetah hian tih tùr i nei lo, haw rawh, police ka koh hma hian, ka fanu tân hian i tling lo, i tling ngai lo bawk ang, beisei pawh rawn beisei tawh suh," a ti leh ta pùng púng mai a, a țawng ring si a, a țawng hre pha kawng kama mite chuan min rawn thlêk hû hû hlawm a ni tih ka hmu reng a, ka zak leh hrehawm ka ti chu ka bîng mum mum maiin ka hria.

"Ka pa, duh tâwk teh, a zahthlâk êm mai," Henry-a chuan a ti a, ka pa chu va kuah betin," Haw ang, miin min en duh si, zahthlâk lutuk mai," a ti leh a, ani lah chuan," I u mah a zak hleinem, ka chàwm ka hrài in nih hi, ka thu zàwm mai rawh se, saw pa saw ka hmu duh tawh lo, ka mit hmuhah rawn inlan tawh suh se, ka fanu tân a tling lo," a ti leh pùng pûng a, zahthlâk ka va ti tak! 

Dozer-a chuan," Ka pu, i fanu hi ka hmangaih--" a la țawng lai chuan," I zak miah nange? Chutiang te i la sawi ngam a!! Chhuak rawh, ka dàwr ațang khân chhuak nghâl rawh. Remruatkim, nang pawh kha tunah hian inah haw nghâl rawh, i room-ah ka kalh hnan khawp ang che," a ti leh tùn tún a, ka zah êm avàng chuan hawi pawh ka hawi chhuak ngam tawh lo, Dozer-a tân a zahthlâk dâwn bawk si, keimah vàng liau liauin zahna a hmachhawn ta si a.

Chiangkuang tak pawhin thil awm dàn chu ka hre lo, thil thleng chu ka mumang ni maiin ka hria. Ina ka room-a ka awma ka ngaihtuah lêt pawh chuan ka tâwt mup mup a, ka thaw pawh chu a chham mai dâwnin ka hria. Tukverh hawngin Bathroom-ah ka lût a, ka hmai ka phih bawrh bawrh a, tlêm chuan ka zia deuh. Rei deuh tak chhûng chu bathroom-ah chuan ka awm a, ka thâwk pawh a zia chho ve zêl e.

Bathroom ațanga ka chhuah chuan ka room chhûngah ka pa chu a lo ding leh rùn tawh a, ka phone a lo hûm lang bawk,"I be leh tawh ngai lo ang, ka thu i âwih loh man chu i têl dâwn khawp e," a ti a, chhuakin kawngkhàr chu pâwn lamah a kalh zui nghâl bawk a.

Ka ding reng a, ka țap lo va, ka mittui pawh a tla hek lo, heti tak maia ka chunga a che duh hi mak ka ti zâwk a ni. A fanu dik tak ka lo ni lo zâwk em ni aw ka ti rilru vawng vawng a, engtin nge a fanu dik tak chungah hetiang thil hi a tih theih zâwk ni? Dozer-a kha eng nge ka tân a tlin lohna? Eng ang fakaua fanu hlû nge ka nih? Rangkachak hlang ka ni em ni? A duh loh záwng tak a nih ka ngaihzàwn vàng maia ka room-a min kalh khum kher hi ka hre thiam thei lo. 

Zàna ka rilțàmzia mai chu, ei tùr ka inchhawp ngai lo va, chaw min rawn pe bawk si lo. Ka pa thinrim țawng ri chu ka hre pha deuh vuai vuai a, chaw min rawn pêk a khap bur a ni ngei ang. Ka inngaihtuah lungpuam duh lo va, tunah hi chuan ka thinrim tawh zâwk a ni. Țawngțai pawh ka țawngțai ngam lo, ka pa hi huatna ka nei rilru tlat si a, huatna thinlung pu chunga țawngțai chu ka thei lo a ni. He room-ah hian rei tak chu min kalh khum hauh lo ang le, min kalh khum chatuan thei nâng, phone nei lo mah ila hun remchâng ka hmuh veleh ka tlãn chhuak ang a, ka lêt leh tawh lo ang.

A tûkah erawh amah ngeiin chaw chu min rawn pe a, zu țhing rim a nam thur thur mai, ka thin a tih rim ve tawh avàngin en pawh ka lo en duh lo va, țawng lovin a chhuak a, páwn lamah a kalh ri leh rak pawh chu ka hre reng. Duh leh kalh rawh se, chhuahna hun chu ka nei chêk ang. Chaw chu ka ei duh lo dâwn dâwn a; mahse, mahni inhrêk rilțàm ngawt chu thil dik a ni lo tih ngaihtuah chhuakin ka ei ta zâwk a, rilțâm viau e ti lo chuan tui taka ei erawh a har țalh mai.

Dozer-a ka ngaihtuah apiangin ka thinlung chu a na ngawih ngawih a, hrehawm tihnain ka khat nghâl zêl bawk. A zak ve dâwn êm asin, kan inbe thei ta si lo va, khatianga inhmuhsitna țawngkam kha zawng dawn a châkawm lo thlâwt a ni, ka pa hnên ațang ngeiin a la ni zui.

Zàn khat chu ka pa leh Henry-a inchhâng thãwm ni àwm tak hi ka hria a, kawngkhàr bulah kal hnaiin ka beng ka han dawh a, kawngkhàr chu ka bengin ka sîktîr ràn a, an lo inhau ngei a, Henry-a aw pawh chu a pàwr ve viau mai. Chutah, eng emaw hi a ri no chawk a, ka nu a țê țhawt a, thlèng tla ri bawl bawl ni àwm tak pawh ka hria, ka tirilah hlauhna neiin ka khùr nghâl zawih zawih a, ka pa zu ruiin Henry-a a khawih a ni ngei ang chu.

A hnu deuhah ka kawngkhàr chu pâwn lam ațangin a rawn rì a, khum kil sîrah țhuin hlauthãwng takin ka pa lo lût chhur chhur chu ka lo en a, ani chuan meng sen rûm hian," Nangmah vàng hian kan buai zo ta a nih hi, engah nge ka thu i âwih ve mai loh? I bialpa ve mai vàng chauh khân ka fapa pawh kut ka thlâk phah asin, i zak ve deuh tawh em? I nu ang chiah i nih hi, Nang pawh hi ben hrep tlâk i ni," tiin min rawn pan hnai a, ka hlauh avàngin ka lo tawlh sawn vat a, tlànchhiat ka tum chu ka samah a rawn man fuh ta tlat a, min phih ngheng a, a natzia mai chu, khumah ka tlu hnawk a.

"Hrem i ngai," tiin ka hmaiah chuan a rawn bêng thlawrh a, ka thle sawk mai, lehlamah a rawn bêng leh a, nâ ka tih chu thuhran, ka rilru a na tak zet a ni, țah loh hrâm erawh ka tum, ka hlau bawk si a.

"Ka pa, duh tâwk rawh!" tiin Henry-a a rawn tlän lût a, ka pa chu a rawn chelh a, ka pa chu rùi mah se thã a nei viau a; mahse, rùi ve lo Henry-a thâ chu a hneh lo deuh a, an innawr chhuak thei ta hrâm a. An chhuah hnua ka biang ka han dawm chuan a na vawng vawng a, a chhah nghâl tupin ka hria, thisen rim ni àwm tak ka hre zui a, bathroom-ah lütin ka chil ka chhâk a, a lo thî ngei e.

*HMANGAIHTE CHU AN NGAIHAWMIN AN HRINGNUNAH TEL RENG KAN CHÂK A, THÎKNA NÈN KAN THLÎR HMA BÎK BAWK*