☆DOZER☆ - 38 By Dingdi Pachuau

☆DOZER☆ - 38 By Dingdi Pachuau

Ka ka chhûng chu a lo kak deuh hlek a lo ni a, thî lah chu a reh har zêk zui a, ka inbuaipui rei phian mai. A hnuah min benna ka biang chu a rawn vûng țan a, hmai phih pawh nuam lo tak a ni. A tûkah phei chuan ka biang lehlam lehlam chu a lo duk deuh raih ve ve a, tawh hlek pawhin a na vawng vawng mai.

Min la kalh khum reng avàng chuan nilêng zànkhuain room-ah chuan ka awm tlawk tlawk a,  zànah ka muhìl thei lo va, ka ngaihtuahna vâk kualin khumah chuan ka țhu deuh tlawk tlawk reng a, țhut ka nin deuh hnuah room chhûngah chuan ka vei tawn leh chhên bawk a, zalèn lova room-a inkalh khum lo hrehawmzia ka hre chiang ta viau a ni. Ka harh lo lutuk chu ka harh deuh theih nân tiin ka inbual leh ringawt țhìn bawk a, tui vâwta ka inbual chuan ka harh phah ve kâwk a; mahse, ka rilru erawh a zàn phah chuang hauh lo.

Tih tùr ka neih loh êm avàng chuan a châng chuan thuamhnaw ka sam kual a, hâk ngai loh ka ngahzia hmu chiangin ka mamawh tâwk bâk aia tam ka neih inkhai dulte chu ka en tlawk tlawk a, a țhen hi chu ka pa min leisakte pawh a ni. Hlawh ka neih ve hnu khân ka inlei ve zauh zauh a, heti tak hian thuamhnaw ka lo ngah a ni tih ka hre chiang ve chauh. Chutah, inngaihtuah harhin Airbag pakhatah hâk nuam ka tih deuhte leh keima thawh chhuah ngeia ka leite chu tam vak lo ka khung khâwm a, ka lehkha pawimawhte nèn, hun remchâng ka hmuh veleha khai chhuah nawlh theih tùra insiam lâwk hi a țha a ni.

Kâr khat min khung tlin zàn chuan ka zanriah chaw tùr chu ka nuin min rawn pe ve teh tlat a; mahse, a hnungah ka pain a rawn en zui tho a nih chu! Chaw chu dahin min be lovin ka nu chu a chhuak leh mai a, ka en zui tawh lo, chaw chu ka ei a, a lum laia ka ei loh chuan a tui lo zo vek ang, thahrui ka neih theih nân chaw ka ei țhat a ngai si a.

Ka chaw ei kham ka ding chhuak chuan chhuata lehkha them ni àwm tak chu ka hmu a, ka tih tlâk a ni lo tih ka chian êm avàngin ka nu khân a thlauh lui ngei a nih ka ring nghâl a, chharin ka han en a, Henry-a kut ziak a nih ka ring, ka nu kha a lo thawn a ni chiang mai.

*U, zàn mut reh hnuah i room kalhna ka rawn hawng ang a, i chhuak ru dâwn nia, ka pa hian a rilru a sawhsawnin ka ring lo, hun țha i neih lai hian kal bo vang vang la, i duh tak chu pan ang che, chu chu i tâna ka tih theih chhun niin ka hria*   tih hi a lo inziak a. 

Ka en reng a, zaninah kawngkhàr kalhna min rawn hawnsak dâwn a... hei hi hun remchâng ka neih chu a ni mai lo'ng maw? Henry-a hian ka pa chu a hre chiang viau ngei ang, hei kâr khat zet min kalh khum tawh a, rilru nèm lam a la pan thei lo chu a nia. Ni e, Henry-a rawn ziah ang hian ka chhuak tawp ang a, ka lët leh tawh lo ang, ka chhuah tawh ber chuan kalna tùr chu ka ngaihtuah chawp tawh mai ang chu, ka scooty chahbi leh phone kha han nei thei lêt thei phei ila chuan a fel kuar nghâl thei ang maw le.

Airbag-ah chuan underwear pali panga vêl ka dah luh belh a, a rih belh viau lo ang chu maw, ka phùr viau rualin ka hlauthãwng ru tel bawk a, ka pa chu lo la harh reng ta se kan buai leh viau thei tlat si a ni. Henry-a'n kut a tawrh phah leh dáwn bâkah kei ngei pawhin ka tuar leh ngei bawk ang; mahse, ka tum chhin ve phawt chu a ngai alawm, hei aia hun țha ka hmu tawh lo ang. Henry-a pawhin a hlauthãwng ru tho ang a, chuti chung chung chuan min chhuahtîr a rawn tum dâwn tho a nia, ka hlawhchhamtîr thei lo ang.

Zàn dâr 11 rîk hma hretin kawngkhàr chu a rawn ri deuh rek rek a, lo la harh kar lo ila chuan a thãwm a zawih êm avàng chuan ka hre kher lo ang. Ka rin loh deuhin ka nu a rawn lût ta zâwk a, Henry-a hmêl hmuh ka lo inbeisei tehlul nèn.

"Le, i pa a muhìl nghet tawh a, i inpeih chuan chhuak tawh rawh le, hei i phone aw, Dozer-a ka phone lâwk diam a, pâwnah a lo nghâk ang che," tiin ka phone ngei chu min pe a, ka nu chu ka en a, a chunga ka la làwm ber țum a ni ngei ang. 

"Ka lãwm e, ka nu; mahse, ka pain a hriat chhuah hunah chuan a thin a rim ngawt ang," ka ti sap sap a, ani chuan," Ngaihtuah duh suh, kal tawh rawh, i hmanhmawh a ngai," a lo ti thung a, Airbag chu ka khai a, ka phone charger ban lehin," A nih leh ka kal ang e," ka ti a, hmanhmawh ru tak, thãwm dìm tak si chuan ka chhuak zui ta nghâl a.

Pâwn thim china Dozer-a truck lo ding ka hmuh chuan chulam pan chuan ka tlãn vat a, ani pawh rawn chhuak thuaiin kan inpawm chawt a, thlah leh ka duh tawh lo. Ka kuah leh theih avàng chuan ka lãwm a, ka mittuiin a rawn zui vat bawk.

"Dozer, ka pa min hmuh theih lohna tùr hmunah min tlànbopui rawh aw, min hmuh leh ka duh tawh lo, i ti ang tiraw? I lak ațanga hran ka duh tawh lo, min humhim ang tiraw?" ka ti mawlh mawlh a, ka pa hmuh leh ka duh lo bur a ni mai, tunah phei chuan a duh loh zâwng tak ka ti zui bawk si a, a thinrim dâwn lutuk, kan chungah thil țha lo tak a ti duh ngei ang.

"Aw le, a vâwt i ti palh hlauh ang e, kan kal nghâl mai dâwn em ni ang?" a ti sup a, min kuahna chu min thlah chuang lovin ka țhutna tùr lamah min kalpui a, min țhuttîr hnuah amah pawh chu rawn lût ve nghâlin a bul chêtah min kuah phei a, truck chu ti nungin kan tlãn chhuak zui ta nghâl a. A dàr nghèng chialin ka awm a, a bula ka awm thut hi ka mumang mai a ni ang tih ka hlau a, amah dek lova awm ka ngam lo a ni.

Zàn rei lam ve tawh a ni a, motor tlãn a tam lo bawk a, kan tlãn chak angreng khawp mai. Sèrchhîpah a țhiante hotel-ah kan riak a, kan mamawh tùr tiin toothbrush, tooth paste leh sahbawn tih vêl a lo inring thlap niin; mahse, ka ngaihtuahna a tãwi tuk a, zàn ka mut ngai loh vàng pawh a ni maithei, zanin zet chu ka mut a chhuak êm êm mai a nih chu. Ka ha ka nâwt zo leh hmai ka phih zo chu khumah ka let tawp a,min rawn kuah pawh chu ka mang hriat ruai ruai tawh!

Ka mu tui ngang a ni ang chu, a tûkah dâr 8 pelhah min rawn kài tho a, chu pawh chaw ei tùrin. Chaw ei khama truck-a oil a thun leh tê tê hnuah Phaizawl min panpui dâwn emaw ka tih laiin a nute khaw lam panin kan tlãn ta daih a, a chhan ka zawh chuan," Ka tlàn bopui dâwn che maw le," a lo ti mai a, ka duh dàn tak a ni. Phaizawlah zawng ka pain min rawn zawng hmu hma àwm êm mai, a nute khua hi chu a rawn hre kher lo tùrah ngai ang.

Kawnga kan tlàn lai chuan," Nizàn khân ka muhìl hma sia, hrehawm i ti em?" inthiam lo leh inthlahrung ru deuh tak chuan ka ti a, a hmêl chu a sîr zâwngin ka en pah reng bawk a. Ani chuan," I chau ang tih ka hria alawm, tui taka i muhìl thei kha a làwmawm," a lo ti daih thung a, min rawn en zawkin a nui pah suk a.

"I pateate pawh ka bia a," a rawn tih leh chuan," A ni maw?!" ka lo ti vat a, a ngaihtuah thui bîk ka ti, ka la be miah lo tih ka ngaihtuah chhuak a, min ngaihtuah àwm teh rêng nèn; mahse, Dozer-a'n a lo biak tawh chuan a zia deuh e, nakinah phone ka charge nung tê tê ang a, ka la be ve ang chu.

"Min ngaihtuah ngawt ang; mahse, i bulah ka awm tih an hriat chuan an ngaih a țha tawh ang chu," ka lo ti sap a, amah chu ka nghèng ar ar a. Ani pawh chuan," Ni e, an ngaihtuah che tih chu ka zêp lo ang, i patea phei chu a thinrim khawp mai a; mahse, ngaihtuah miah lo tùr che leh thinrim lo tùrin ka hrilh a, hlim thei ang bera siam che ka intiam bawk a," a lo ti ve leh a.

"Ka ring thlap che."

Ka pain min rawn ûm zui ka ring lo bawk a, ka ngaih a țha veng veng mai. Ka awm lo tih a hre tawh ngei àwm si a, a thin chu a rim ve khawp ang le. Engtin tak ka nu chungah țuan ang maw? Engtin nge ka pa bulah chuan a sawi màm ang? Kut a thlâk hial mai lo'ng maw? Henry-a a awm a, a lo chhan thei mai ang chu maw. Min ngaithei lo viau țhìn mah se tûn țumah kher hi chuan ka lamah a țang ve tlat a, ka ngainat phah ve tlat, min chhuahtîr lo se zawng tunah pawh hian Dozer-a bulah ka awm thei tawp nâng.

Kawng lakah kan ding mang lo va, kan tlän tluang viau bawk. Khua kan thlen dâwn hnaih chuan," Ka nute biakpawh ngaihna a awm si lo va, kan țhâwng thut dâwn a nih hi, a lo hlim teh ang chu!" a ti sup sup a, kei chuan," Mak a lo ti ngawt ang a! Min hmu tel ve thut dâwn sia," ka lo ti ve a, ani chuan," A hmu che ang a, a hlim zual sauh ang tih ka chiang," a lo ti ve thung a.

Khua chu kan thleng ta thuai a, boruak a dang leh zar tawh a, a vâwt leh var tawh mai a ni. A nu chuan pâwnah chawțhing emaw ni hi a lo seng dâwn mêk a, min hmuh hma chuan Dozer-a'n a han ko hmasa a, a rawn hawi vat a, a țê ve chûl mai. Ka hriat thiam loh hian eng emaw hi a sawi a; mahse, a rei lo, a fapa a kuah hma chuan min rawn kuah phawt a, min kuah laia ka hnung dìm têa min chùlsak chuan nuam ka ti veng veng nia!

Thingpuite ina kan hahchawlh hnuah a nu phal lo chung chungin a eirawng bâwl chu ka pui a, Dozer-a pawhin," I chau ang, lo mu hahdam mai mai rawh," a ti a; mahse, ka hah lo va, ka chau hek lo, nizàn khân ka mu tam ve tâwk tawh a, ka zia tawh lutuk tlat.

A nu chu a țawng sârh sârh reng a, thil awmzia min zâwt a, ka hrilh ve mai bawk a. Kan chanchin ațang chuan Dozer-a pa nèn an chanchin a sawi chhuak a, an intawn dàn leh an inneih chhoh dàn, chhûngkua an din dànte sawiin Dozer-a pain Dozer-a hnêna a thu chahte chu a sawi bawk a.

"Bawiha hi mi fel famkim a ni miah lo va, mi aia țhatna pawh a nei lo ang. A pa khân nulát tlangvàlna kawngah hian a zilhin a fuih nasa țhìn khawp a, kristian kan nih angin thianghlim taka ngaihzâwng neia thianghlim taka nupui nei tùrin a ti țhìn. A sawi awmzia ber chu inneih hmaa mipat hmeichhiatna hmang lo tùrin a chah a nih chu, nangni chu in inkâr a la thianghlim ngei ang tih ka ring a, ka rin loh vàng lam che ni lovin ka fapa hian a pa thuchah kha a bawhchhiat ka ring ngai lo, a dik ngei bawk ang tiraw?" tia min zawh chuan ka zak țêp a ni; mahse, ka lu ka lo bu nghat tho.

"A țha lutuk tlat, in ti țha lutuk a nia. In awm dàn tùr erawh han rèlpui ngaihna che u ka hre thiam lo khawp mai a, amahin a ti fel thiam mai tùrah ngai ang aw. Naupang chhe tak pawh a ni tawh lo bawk a," a tih chuan ka lo nui deuh a," Kum tam ve tawh tho mah se a châng chuan a che naupang chhia ve tho asin," ka lo ti a. Ani pawh chuan," A dik ang, a châng chuan ka bulah pawh hian a la pangchang ve zauh zauh, nupui a neih hunah a la reh ve mai ang ka ti rilru țhìn a," a lo ti ve leh a.

Zanriah tui takin kan ei a, Dozer-a chuan," In siam tui hlê mai," tiin min han fak luam a, kei chuan," Ka siam a awm ve lo tluk a ni, ka nuin a siam vek a, a hmingin ka lo pui ve mai mai," ka lo ti vat a, Tim-a chuan," Pute, in innei tawh tihna em ni?" a lo ti hâ a, a thil sawi vàng chuan amah chu ka en lo, Dozer-a zâwk chu ka en chiang khawp mai!

"Nei lo ve," a lo tih chuan Tim-a chuan," Tunah khân U Teruati khân Àpi kha 'Ka nu' a ti bawk sia," a lo ti ve thung a, ka hmui ka lo pet ka lo pet ringawt. Ni e, Dozer-a nu kha 'ka nu' ka lo ti ve ngawt a; mahse, khatia ka tih mai loh chuan, 'I nu' han tih kha chu a mawi lo ve dâwn êm a. Lo hre thiam lo tân chuan Tim-a thil sawi kha a àwm lo miah lo, zawhna àwm tak a ni, Angaihi nu leh pate kha chu 'Ka nu, ka pa' tiin ka ko ve mai țhìn a, hêng laiah hi chuan chutiang chuan an inko ngai lo a ni maithei; mahse, Dozer-a nèn hi chuan ințhian pawh kan ni lo, inngaizâwng kha kan ni zâwk miau a.

Zànah khum khatah kan mu dùn lo va; mahse, ka muthilh hma chu ka bulah a awm thung. Ka chanchin leh ka pain ka chunga a thil tihte a zawng a zain a hre ve lo va, min zawh avàng chuan ka hrilh sap sap a, ka hrilh chhûng chuan ka kut chu nghet takin min hùmsak tlat a, min ben thu ka hrilh phei chuan a lo țang ve nasa a ni tih min hùm ngheh dàn ațang chuan ka hria. Duat takin ka biang chu a chûl a, " Tunah chuan a na tawh lo tiraw?" a rawn tih sup chuan," Aw, na tawh lo, a dam vek tawh. I bulah ka awm tawh lehnghâl a, nâ ka nei tawh lo hrim hrim, ka hahdam vek tawh bawk," ka lo ti vat a. 

Tunah chuan rilru hahdam siaiin ka awm tawh a, hahdam siai han ti ila ka rilru pangkhing lehlamah chuan ka pa thinrim dàn tùr leh a chêt thawh dàn tùr chu a awm ve reng bawk a, ngaihtuah loh ka tum pawhin ka nute chu ka ngaihtuah ve lo thei lo a ni.

Hun remchângah ka patea chu ka bia a, ka hlim leh hlim loh min rawn zâwt hmasa ber a, ka hlim thu leh ka dam țhat thute, Dozer-a leh a nuin min duat dànte chu ka hrilh ve a, chumi hnuah kan awm dàn tùr chungchâng ka zâwt a, ani pawh chu a rilru a buai ve a ni ang, a ngawi ve rauh rauh a, a harsa ve bawk a ni. Dozer-a ngaih dànte chu ka hrilh ve a, ani chuan," A țha phian ang, mi ngaihah pawh inrù ang chu in ni ve tawh tho a, in in lama palai tirh ngaihna pawh a awm chuang bawk si lo. Dozer-a rèl ang kha țha ka ti mai e," a rawn ti a.

Dozer-a leh a nu chuan innei si lova hetia awm dun reng hi țha an ti lo va, thlèmna a hnaih bâkah kan induh tawn tho bawk nèn, thlèmna kan do zawh loh an hlau a ni. Chu vàng chuan, palai tirh theih loh ta rau rau, inneih thuai mai chu țha an ti a, hnial ngaihna pawh ka hre lo. Dozer-a tân heta awm reng pawh a fuh chiam lo, Phaizawl lamah a rilru a awm reng ngei ang, a kalsan rei tawh si a.

Phone signal awm lo ta chu, a nuam phian a, free takin hun ka hmang a, ka țhiante lahin ka awmna leh ka chunga thil thleng min rawn hriatpui ve hauh si lo va, hrilh pawh ka tum chuang lo. Duh leh nakînah ka la hrilh ve ang chu, chutih hunah chuan ka chanchin ka hrilh hlawm loh avàngin min dem viau maithei a ni.

Kan hun tawnin zir miau hek lo le, duh dàn leh dàn pângngai pawhin tih theih hek loh chu, a hma thei ang berin an khuaa kohhran upa hmingțha tak leh an nèl ber bulah, zîngkârah kan inkutsuih ta a, min hriatpuitute pawh an tam lo khawp mai; mahse, pawi ka ti chuang lo, Dozer-a bula ka awm theiha a nupui ka nih phawt chuan a tâwk tiu teu viau, duh leh hun kan neih hunah țhian țhate sáwm khâwmin kan inkutsuih țha leh mai ang a... a theih tho ang chu, tunah hi chuan ka pa pawhin min rawn zawng hmu mah se kan inneih tawh miau avàngin tih theih a nei tawh chuang lo ang. 

Zànah pawh khum khatah kan mu dùn ve ta, kan innei tawh miau a. Tunah chuan nupa chauhin an tih theih pawh kan ti ve thei tawh bawk, insùm a ngai tawh lo va, thlèmna do pawh a ngai tawh lo.

Nupa nun min chenpui chu min dimdâwih khawp a, min duatin min ngaihsak a, na tak ka tawrh a hlau ngawih ngawih tih a chêt dàn ațang chuan ka hria, he pa hi chu ka va han hmangaih hluah hluah tak êm!

"Dozer...?" ka ti sap a.

"Ka naute, ka hmangaih che, min hmangaih ve rawh!" tiin a rûm chhuak deuh hawk a, nawmna tinrêng min pêk tumin a che sauh sauh reng a, rawn kûn hniamin min fâwp a, ka lo chhâng lêt vat bawk. Ka rin phâk bãk a ni a, kei pawhin ka thiam ang angin a chê chu ka lo pui ve zêl bawk a.

"Dozer, ka hmangaih che!"

*I NI HMAN KHA NUAM VIAU LOVIN ȚHA VIAU LO MAH SE, I RILRU A ȚHA LO ZÂWNGIN HERTÎRTU ATÂN HMANG SUH, BEISEINA NÈN, A ÊNG ZÂWNGA RILRU PUIN I NÎ I KHÃR ȚHÌN ZÂWK DÂWN NIA*