☆DOZER☆ - 39 By Dingdi Pachuau

☆DOZER☆ - 39 By Dingdi Pachuau

Dozer-a pa (ka pa a ni ve ta) thlàn kan tlawh a, a fai viau nain hnahthel a lo awm nual a, kan phiat fai pah a, pangpâr kan kensakte pawh chu kan khawi a, kan ti mawi ve viau. Thlànlunga Dozer-a pa hmêl leh Dozer-a hmêl inang lutuk chu mak ka ti hial zâwk, a pa a lo chhùn tak zet a ni tih ka hre chiang zual a, ka nu bulah pawh ka sawi nghe nghe a, ani pawh chu a lo nui ve mai a, Dozer-a hmêl a hmuh apiangin a pasal a ngaihtuah chhuah nghâl zêl ka ring tlat.

Ka ni tin hun hman dàn chu nuam ka va ti tak! Dozer-a bul ai mahin a nu bulah chuan ka tâp tam zâwk a, a chhan pawh kan kalsan thuai ang a, a bulah ka awm theih laia awm tam ka duh vàng a ni. Ei siam dàn chi hrang hrang min zirtîr a, an ram lama an ei siam dàn a ni tlângpui a, tui tih ka nei tam viau nain thlum deuh duak awm țhìn erawh chu tui ka ti thei vak lo, bâkah, an artui ei uar êm êm Balut chu ka ei thei țhak lo bawk, ka en zâwng ringawt pawhin ka luak lo chauh a, ka chil a haw zawih zawih thei hial a ni.

'Ka nu' tia koh hi nuam ka ti tlat pek a, ka ko chhên mai a ni. Lungleia ka nu kha ka ko tam lo ve khawp mai a, ni khat chhûnga Dozer-a nu ka koh ang zât hi kum khat chhûng pawh khân ka ko lo tawp ang ka ti hial. Ei siam min zirtîr lam phei chu khawi lamah, kan inah ka awm tam lo bawk a, ka hre thiam tho, kan inmelh țáwk chauh kha a ni mai a, an bula ka hun tàwp dâwnah erawh rin loh takin boruak a inthlâk hlawk ta thung kha a nia, hun remchângah làwmthu pawh ka la hrilh leh ang chu.

Phaizawl lama kan lêt hmain Dozer-a leh Tim-a chuan an in chu thawm țhat ngai laite an thawm țha a, kei leh ka nuin kan theih ang angin kan lo pui ve a, an ei tùrte kan lo siam a, buai ve nek nek mah ila nuam ka ti tho tho. Ka nu chuan chawhmeh pho ro hi a uar khawp mai a, chûng a chawhmeh pho ro a dah țhatte chu kan siam a, țhenawmte kan va suah ve zauh zauh bawk a, anni pawhin min rawn suah ve zauh tho,  chawhmeh siam an thiam hlawm ka ti a, chaw pawh ka ei tui thei viau zêl a ni, awm rei deuh phei ila chuan ka chum ngawt ang!

Phaizawl lama lêt kan tum zàn chuan kan thuamhnawte ka siam fel a, ka nu pawh chuan min lo pui ve a, puan pakhat hi min pe ve ngei a, a la mawi phian zui, țhî min pe bawk a, ka hnar ve ngial nain," Ka fanu i nia, hmân ațang tawhin Bawiha nupui tùr tân ka lo dah țha ngar ngar a, i tâ ngei tùr a ni e," a ti ve tlat a, ka lâksak duh ta chauh a ni, a man pawh a to ngawt ang, a hrawlin a rit țha êm mai.

Rei lo tê hun chhûng mah ni se kan inawmchilh rãwt bawk a, ka nu chu ka ngaina hman viau, min duatin a fanu ang takin min en niin ka hre bawk a, kei pawhin ka nu tak tak angin ka en a, ka ngaina a, a bulah ka pangchang ru viau bawk. Chumi zànah pawh chuan a bula riah ve ka tum nghe nghe a, Dozer-a bula ka sawi chuan engtin mah min lo hnial lo va, a rem ti-ah ka ngai mai.

Kan han mu dùn rèn ráwn a, tuilum ip pawh a tlawh ve ràn mai. Kan titi a, ka ngaih tùrziate chu ka hrilh sep sep a, ani pawh chuan," In rawn zin leh thuai ang chu, țhalai zâwk in nia, kei zawng, i pa lu nghahna hmun hi kalsan thei ka ni si lo va, in hmêl hmuh hun ka lo nghâk reng ang," a lo ti ve a.

Kan muhìl țêp tawh tihah chuan Dozer-a aw hian ka nu chu a rawn ko dût dût a, ka nu chuan," Bawiha a ni maw?" ti sapin a tho a, light chu a on-in," Lo lût la?" a han ti a, room kawngkhàr awm lova puan zàr mai a nih avàng chuan Dozer- chu a rawn lût a, ka lo en reng a, min rawn enin," Riah i tum tak tak em ni?" a rawn ti a nih chu! Muthilh țêp tawh lai laia chutiangte rawn sawi.

"Tum e, ka muhìl țêp tawh nghe nghe asin, eng nge ni ta?" ka lo ti a, ani chuan," Riak lo mai la," a rawn ti sup a, a hmêl leh a aw chhuak chu a inhmeh ngawih ngawih lutuk.

"Ka riak duh alawm, va mu rawh, váwt i ti em ni?" dam thlap hian ka ti a, ani chu che sawn lovin a din ngaiin a ding ngur a, kal sawn tum hmêl pawh pu lo chuan min rawn en rùn a. Ka nu chuan," A, Bawihi, ka bulah chuan riak lo mai rawh, i mu rèn ráwn tawh tho bawk a, i riak angah ngai mai ang, i pasal hi i tel lo chuan a muhìl thei pawhin ka ring lo ve," a lo ti a, ka nu chu ka en vat a, a lo nui deuh sâng a.

Dozer-a chu enin," A mak e, ka nu bulah ka riak ve duh asin le," ka ti nang nang a, ani chuan," Ka ngai che alawm, ka kianga i mut loh chuan--" a lo ti thûm dût a, a sawi zawm tawh lo, ka nu a lo nui hak a, ka zah deuh avàng chuan Dozer-a chu ka melh vak a, a lo kiai suk duh chauh. A hnuah erawh a room ni țhìn, kan nupa room ni taah chuan kan inzui phei ta a.

"Ka ti tak tak alawm, khum a ruak vek a," a tih chuan," Naupang chhia nghâl lo! A hma pawhin nangmahin i mu fo alawm," ka lo ti ve thung a, ka thin a rim pawh a ni chuang lo, ka nu bula riah ve hrim hrim kha ka châk a, nu bula ka mut vawi khatna tùr a ni bawk a, eng anga nuam leh hahdam nge a ni tih ka hre châk a, ka hriat theih tirh ațangin nu bulah vawi khat tê mah ka la riak ngai lo miau si a.

"A hma kha chuan nupa kan la ni tlat lo alawm, tunah chuan nupa kan ni tawh a, nupa chu khum khata mut tùr, ka nupui chu zan tin ka bula mu ziah tùrin ka duh, a tel lo chuan khum mai bâkah keimah pawh ka ruak vek si a," a lo ti ve thung a. Kei pawh chuan," Aw le, ka hria e, chuti a nih chuan kan mu tawh mai dâwn em ni ang?" ka ti a, chu veleh chuan khumah lâwn kaiin ka mut theih nân rizai chu a hlîm nghâl sawt sawt a, ka nui ringawt.

Ka mu chu min lo kuah nghâl vat a, min kuah nghet hle nghe nghe, ka chalah fâwpin," Tunah chuan a ruak tawh lo ve," a ti sup a, a mal khauh zet chuan min kherh nghâl bawk a, ka lum nghâl ham ham mai.

A hnu deuhah chuan ka nu bula riah ka tumna chhan chu ka hrilh fiah a, ngun takin a lo ngaithla ve kur a, a chângin ka biang chu chûlin a fâwp pah bawk a, ka hrilh fiah tàwp lamah chuan," Chu vàng chu a nia a bula riah ka tum ni, bâkah, khua a vâwt a, naktûkah kan kalsan daih dâwn bawk sia, a bulah ka mu khât leh tawh dâwn êm asin," ka ti dap dap a, ani chuan," A dik tho mai; mahse, i tel lo chuan mut a har êm a ni, riah luih tlat chu tum la chuan ka rawn riak ve ang ka ti rilru a," a lo ti a. 

Naktûkah motor-a thui tak tlãn tùr kan nih avàngin kan titi rei ta lo va, nupa nun erawh hlimawm takin kan chèn dùn leh a, a hnuah inkuah chial chungin kan muhìl dùn ta a. 

A tûka ka nu leh Tim-a kan kalsan tùr chu ka hreh ve reuh khawp mai a, a chhan chu ka lung a lêng reuh dâwn tlat tih ka hre sa a ni, helai hmun hi ka ngaina ve tawh lutuk a, ka pasala nu leh a tupa awmna a ni a, pasal neia nupa kan nihna hmun a ni bawk, ka thinlungah hmun pawimawh tak a chang chiang tawh viau a ni.

Kawngah kan tlãn muang hran lo bawk a, Phaizawl kan thlen chuan a la tlai chhe fahran lo. Pa Țhianga'n gate min lo hawn vat a, min hmuh chuan a lo nui sûng mai. Țawng duh ta chu, nuih lêtin ka be zui nghâl luam a, ka hmêl hriat sa leh ka nèl sa tawh a ni bawk a, kan inchhâng țha viau.

Ka kal loh chhûngin in a lo sak belh a ni chiang, kan tlàn lai chuan ka hmu a, ka zâwt zui zat bawk. Ani chuan Pa Țhiangate leh a mi chhawrte hrim hrim awm nâna a sak belh thu chu a sawi ve mai bawk a, Pa Țhianga tih loh mi chhawr pawh pathum lai a lo nei tawh nghe nghe.

A in luah țhina ka luh dâwn chuan," Ngawi lawk," tiin amah chu a lût hmasa a, kawngkhàr chu hawng zauin," He inah hian chhûngpuinu ni tùrin lawm luh i ni, lo lût rawh le," a ti sup a, kei chuan," Ka lãwm e," nui chung hian ka lo ti a, ka pên lût zui ta nghâl a. A in ni ţhìn kha tunah chuan 'kan in' ka ti thei ta, a hma kha chuan mikhual angin ka lút a, chumi hnuah a bialnu angin ka lût leh a, tunah chuan a nupui angin.

A phal lo chungin a ei siam ka pui a, ka nuin chawhmeh eng eng emaw rêp min hawntîr nual a, chûngte chu a siam a, ka nu ka hre chhuakin ka ngai veng veng mai, ani pawhin min ngaihtuaha min ngaih ve tho ka ring, Tim-a nèn chauh an awm leh tawh ang a, kei țawng duh ber leh in chhûng ti reh lotu ber ka awm tawh si lo va, a reh ngawt ang chu.

Zànah Pa Țhianga a rawn kal zawk a, report a rawn pe a ni ber mai. Kan inneih tawh thu chu Dozer-a chuan a hrilh ve a, min lawmpui thu sawiin Pa Țhianga chu a phûl hlut nghe nghe. Awm rei lovin a chhuak thuai a, keini pawh motor chuang chàu kan ni bawk a, kan meng rei lo, a khum zau nuam takah chuan kan mu dùn ral a, nupa nun erawh min chenpui lo. " Zanin chu i chau àwm si a," a ti deuh tlat a, ni e, ka chuang dik chiah lo a ni maithei, ka chau ve tak tak a ni ang, rei pawh ka meng lo ta rêng a.

Ka nupa tê chuan kan awm dùn ta rak rak a; mahse, nuam ka ti, boruak ni hut hut a awm ve si lo, ka duh ber kiangah ka awm a, nupa kan ni tawh zui a, mi dang ka mamawh lo. Ka nute erawh ka ngai ve reuh viau a, be tùrin tlângah pawh vawi hnih kan kal tawh nghe nghe, ngaih tak têin ka ngai a ni.

Thuamhnaw ka keng tam chiam si lo va, ngai leh ngai ka ha deuh tlut tlut lo thei lo. A chángin Dozer-a kawr ka hâksak ve zauh bawk a, ka fual thei khawp mai thung; mahse, nuam ka ti a, nuam ka tih bâkah sexy ka inti leh tlat pek a, Dozer-a erawh chuan," Hmeichhe naupang i ang," min ti ve ziah thung, a mitah chuan ka lang sexy lo ve ngang a ni ang.

Hun remchângah khuaah kan han kal a, dàwrah kalin thil pawimawh ka lei a, ka lek kãng vu vu tih a hmuh chuan dàwr neitunu chuan," Keng lang tawl tawl suh, a zahthlâk," a ti sap a, ka kut ata chu lain chanchinphêk hlui tawh lam hian min tuamsak leh thlap a nih chu.

Kan haw dâwnah Pa Țhiangate inah pêng leh lawkin Pa Țhianga thil tùr a nupui chuan min thawn a, kan tlãn chhuak deuh nghâl mai. Kawnga kan tlàn lai chuan," I period dâwn hnai em ni?" a ti sup a, kei chuan ka thil lei chu enin," Ka ring deuh tawh a, ka rai te a nih ngawt loh chuan," ka lo ti ve mai a.

"Rai nghâl i duh em ni?" tiin min zâwt ta khut a, kei chuan," I duh lo em ni?" ka lo ti lêt a, a ngawi deuh vang vang phawt a, chutah," Thû kan nei lo êm mai a, i rài nghâl leh a làwmawm ang a, i rài loh leh kan honeymoon hman chhûng a rei deuh dâwn tihna a ni leh mai a," a ti leh a, a nui suk bawk a.

"Kei pawh ka duh ve ve mai. Naute mipa nei ila nangmah chhùn êm êm kha ni bawk se, Pathian zâra kan neih hunah kawng engkima chhùn che ni se ka ti ngawt ang," ka ti a, rai thuai tak tak ila ka ti, kum 30 ka tling tawh a, fa pahnih pathum vêl chauh neih ka duh dâwn lo, a tlêm berah panga vêl lai ka duh dâwn si a.

Phaizawla thla khat deuhthaw kan awm hnuah Ruatpuia hmêl kan hmu hlawl mai! Hmuh ka lo inring lêm lo va, bâkah, ka boruak tawnin a zir ta deuh nge, ka lo mangnghilh hlawm deuh pah a, a hmêl ka hmuh chiah chuan ka inthiam lo ru deuh ngawt a.

"I nuin i chanchin min hrilh a," a tih chuan ka lo bu nghat a, engkim a hrilh vek erawh beisei lo ang. Rawn țawng zawm lehin," Tunah hian in inru nge in chêng dùn tawp zâwk?" tiin min zâwt a, kei chuan Dozer-a nèn kan inneih tawh thuin ka lo chhâng a, a thil ei lai chu a hâk deuh bawrh bawrh mai.

"Min sàwm ve ka phût asin le, ka hriat miah lohin in lo innei daih a," a ti nung nung a, kei chuan," Kan hun tawnin a zir lo ve êm mai a, min hre thiam mai teh," ka lo ti thung a, Dozer-a sangha chaw pein a kal rih a, kan pahnih chauhin kan awm a ni. 

"A duat thiam ve che maw?"

Ka nui hak a," Engah nge maw a thiam loh ang le? Min duat mah mah zâwk a ni," ka lo ti a, ani chuan," A țhat hlauh chu, hrehawm tiin hun i hmang ang tih ka hlau deuh a, min hrilh hreh miah suh, nuțâ angin min en tho kha," a lo ti ve a.

"Aw le, ka hre reng e."

*******

Mi tih dàn a ni nge ni lo chu kan hre lo va, ka patea'n ka man a dawng ta rih kha a nia, ka pa chuan a dawng duh dâwn chuang si lo va, bâkah, tlãn bo kha ka ni ve bawk si a, ka man a dawn duh hunah ka patea'n a la dawntîr ve mai ang chu maw.

Ka pateate pawh rawn kal chu an duh viau nain in kalsan an huphurh a, kan awmnna rawn hmuh ve hrim hrim erawh an châk viau. Ka pa chanchin an hriat hnuhnung ber chu in ka chhuahsan hnuah ka pa chuan zu a in nasa sauh tih chu a ni a, tûn thlengin a la in tluang zêl a, zan tin a rùi ziah a, ka nu nèn pawh an inhau ta fo ni àwm tak a ni.

Ka khawngaih mang e! Ka nu leh Henry-a vàng chauha tûn dinhmuna awm thei ta kha ka ni ve a, ka pa kut an tuar zauh zauhin ka ring tlat a, ka nu chu thuhran lo ni se, Henry-a hrehawm ti tùr chu khawngaihthlâk ka ti, lo zinsan ve daih se...

Nupa kan nih ațanga thla hnih leh a chanve a ral hnuah ka rai a ni tih ka hre chhuak ta a, kan hlim dùn nupa viau asin. Min duat zual khawp a, ei tùr tui țha țha min siamsakin motor ka chuan a khap zui nghâl hmak a, ina ka awm pawhin chhuat nâwt lo tùrin min hrilh a, che tlêm tùrin min hrilh ziah bawk.

Thil ka ei thei lo khawp a, hmeichhe chér ka ni hran miah lo a nia, rai chu ka hua ka ti dâwn nge ni, thil ei hlei thei lo ta chu, ka chèr phah ka ti lo thei lo, thei ni lo ei tùr hrim hrim chu ka ngei vek ni maiin ka hria.

Nupa nia inchènchilh ve ta chu Dozer-a fel famkim bîk lohzia chu ka hmu chhuak ve ta zauh zauh a, che tùr leh dah fel tùr ka awm tawh tih a hria nge ni, a thuamhnaw a dah darh nuai chho ta zeuh zeuh a, ka sawisêl lo nain inthlahdah lo se chu ka ti khawp mai. 

Ni khat chu hna thawk lovin a awm ve teh tlat a, chawhnu hma deuh lamah a inbual a, a inbual zo deuh chiah tihah Pa Țhianga'n a rawn ko a, a chhuak zui ta thuai a, eng atân chuan rawn ko chu ni maw ka ti rilru nep nep a.

Room-a ka va lût chu khumah a towel hman chu a lo dah tawp a, a thuamhnaw hâk balh ni se thosilèn zàrnaah a lo bâng bawk a, chumi ka hmu chu ka insehruh nasa mai. Ka thin chu a rim tut tut mai a, patling kum 40 pèl tawh a ni a, naupang ang maia a che phawsawlh chu ka thin a rim a ni, hre pha lo mah se a thla chu ka àn khum zui a, ka insûm thei tawh hlawl lo, mutnaa towel huh dah ka huatzia hi chu e, haw tak ka ni. Lo haw teh se, ka âng dâwn chiang lutuk.

*KAN HMANGAIHTE KAN KIANGA AN AWM CHUAN LUNGNGAIHNA THEIHNGHILH A AWLSAM A, HLIMNA A HNAI BÎK ȚHÌN*