☆DOZER☆ - 40 By Dingdi Pachuau

☆DOZER☆ - 40 By Dingdi Pachuau

Towel chu pâwn ni saah ka pho a, a kawr bàl pawh chu ka su zui nghâl a, lo haw teh se, ka ngawih bopui mai mai lo tawp ang.

Zanriah tùr ka buaipui malh malh a, chumi pah chuan Nimbu tui ka in a, chì alin hmarcha hmui ka telh leh hlak bawk a, tui vawr vawr tak a ni; mahse, ka pum a tih nawm loh phah leh ngei ang chu. Dozer-a pawhin hmarcha telh kher lo tùrin min hrilh tawh a; mahse, a ti tui êm mai a, ka telh lo phal lo.

A rawn haw har zêk mai lehnghâl a, khua a thim țêp tawh tihah bàl zetin a rawn haw ve ta țâwk a, a kawr hnung chu a bàl paw thûr mai a, a tlu a nih loh vêk pawhin leiah a mu a ni ngei ang chu.

Thil awmzia ka lo zâwt vat a, truck chhia a siam thu min hrilh chuan truck hnuaiah a mu tih ka hre thiam zui nghâl a," I ril a lo țâm tawh em? Ka han intleuh zawk ang a, kan ei nghâl mai dâwn nia," a ti a, han àn deuh bawrh bawrhna hun pawh a awm thei rih lo, a awm mai mai pawh ni lo a hna thawk haw lo àn khum chiam chu a fuh ber rih lo tlat, chaw ei laiin ka âng mai ang.

A chaw ei lai chu ka en reng a, tui a tih hmèl kher asin, a ei tui anga tui sâwn ei ve thei ila... ka châk hlawl si lo, ka pum na deuh riai riai reng chu ka han khawih a, tunah tak hi chuan àn pawh ka châk lo, chaw ei laia àn khum kha ka tum ve kha chu a nia; mahse, a ei tui nasa mai si a, hna a thawh chhan ber chaw a ei laia han àn khum chu, ka khawngaih leh deuh si a, ka ngawi ta reng ringawt. Ani chuan chaw ei mawlh mawlh pah chuan," Min en reng hian nuam ka ti," a lo ti sup a, ka en chhan lah chu a hre miah si lo va, min rawn en ve tâkah chuan chaw khawih miah lovin ka lo en reng a ni tih ka hre chhuak ta vat a.

"Tui i tih hmèl hluam hluam êm alawm," ka ti ta ringawt a, ani chu a lo nui hawk a," I han sawi dàn chuh, ei ka theih hmèl riau mai; mahse, a pawi lo, ka nupui ei siam hi a tui êm a ni, tui ka ti êm!" a lo ti mai a, a ti tak tak nge min han fak der záwk tih pawh ka hre lo; mahse, hriat a nuam lo chuang miah lo.

Ka pum chu ka han dawm a, Dozer-a'n a hria ang tih erawh ka hlau ru viau, a nâ tih ka sawi lan hlauh chuan hmarcha chungchâng kha sawi lan ngei a ngai ang a, a thinrim ka hlau ve tho si a, tui kan inchhawp chu tlêm tlêmin ka in leh ringawt țhìn a, awmzia erawh a nei tam viau lo.

Mahse, min hre chiangtu a nia, ka awm dàn chu a hai hauh lo," I pum a nuam meuh lo a nih kha, lo va mu mai mai rawh," a ti a, na vâwt vâwt a nih hran loh avàng chuan ka mu duh bîk chuang lo, bâkah, hmarcha vàng mai a nia, tui ka in ka in chuan a reh ve mai ang chu; mahse, chaw a ei kham hnu chuan min rawn pawm nawlhin," Thu i âwih lo sâwt riau mai," a ti sup a, țhutthlèngseiah dìm têa min nghatin min nem mu zui nghál a. Amah chu tho lehin noah bâwnghnute a thli chhuak a, min rawn pein," In zo vek rawh, a dam vat mai ang," a ti leh a, a thil tih dàn ațang chuan hmarcha ka ei leh tih a hria tih ka hre nghâl a, țawng lovin noa bâwnghnute chu ka in zo ta vek a.

Ka àn khum ta lo. Ka chêtna tùrah a che ta vek si a, chutah, ka pum nuam lo min ngaihven zui leh zêl bawk nèn, àn khum ngam chî pawh ni ta lo chuan! Thinrimin min hau lo zâwk a, ka vànnei phian zâwk a nih hi. Mut hmunah erawh hmarcha telh tlêm deuh tawh tùrin min hrilh ta thung a," Na i tuar lai hmuh ka duh lo, bâkah, i pumin a țhat loh phah ang tih ka hlau a ni," a ti sup sup a, kei erawh chuan," Ka telh tam pawh a ni lo," ka lo la ti țâlh a, ka telh tam êm ëm pawh a ni lo tak tak, thak lam hi ka ei tam loh vàngin ka ngam viau lo a ni, bâkah, ka pum hian ka ei ve hlek chuan a hre viau țhìn bawk.

"I tawrh phah bâkah kan naute hian a tawrh phah ang tih ka hlau bawk a," tiin ka dul chu a chûl a, a la puar lo nain ka rai tih kan hriat ațang khân zan tin a chûl ta ziah a nih hi. Nuam ve mai mai tak a ni, ka la tawn ngai loh a nia, min duatna leh min ngaihsakna dawn hi nuam ka ti êm a ni.

"I pum a nawm loh hi chuan hmangaihna chenpui che ka ngam lo va, chaw bêl bulah ka țàmchhàwl lek lek zêl a ni," a rawn tih leh erawh chuan a kutah ka sihsak váwt a," Vêl a che!" ka ti hlak zui a, a thil han sawi dàn vêl chuan ka nuih a ti za ru phian bawk, 'chaw bêl' a tih pawh chu ka hre thiam ve reng si a.

Rûnah mikhual nei ve reng mah ila Pa Țhiangate a chhawr tawh avàng chuan buai ber leh che berah a țang tawh lo va, țûl fêah lo chuan a kal chhuak mai mai bawk. Ka bulah a awm a, a nih loh pawhin in bul hnaiah hna a thawk a, min hlatsan ngai lo a ni mai. Hna harsa tùrah ka chét a phal ngai lo va, chhuat nawh pawh amahin a ti țhìn! Ka tih theih thu ka hrilh pawh a phal lo bur mai a, tih luih theih pawh a ni lo, Nimbu tui thakah erawh hi chuan ka la nêk lui zêl chu a nih hi.

Tlai khat a inbual zo chuan a towel hman hun chu khumah a lo dah leh a, ka va hmuh chuan," Towel huh hi khumah dah ziah suh, a țawp!" ka va ti ta nge nge a, ka duh aiin ka țawng vîn! Amah chu ka en duh miah lo nain min rawn en deuh hú a ni tih ka mirsîrin ka hmu! Tlêm chuan nuam lo ka ti det a; mahse, kan inneih hma pawhin a che fel êm êm a, kan innei ta chêng a, han chêt fel loh tâk ngawt chu thil ni thei a ni lo a ni.

"Aw le, ka Lalnu," a hnu deuhah dam thlap hian a ti sup a, a țawng rîk dàn ațang chuan ka khawngaih leh deuh si a, han vìn chiam lova sawi dàn kha a awm ve reng si a; mahse, a towel huh khuma ka han hmuh leh chiah khân ka insûm hman lo a ni.

Zanriah kîl lai chuan ka melh zauh zauh a, thinrim hmël a puin ka hre lo. Keimah chuan nuam ka ti lo a, ka inthlahrung ru dûk mai, nuam lo ka tih avàngin a sa duh lai ber âr rîl phiar chu a thlêngah ka va suahsak a, min rawn en zauhin," Ka lãwm e," a ti sup a, a ei lai chu en rengin," Vin vak che kha ka tum lo asin le," ka ti ta ringawt a, ani chuan min rawn en lehin," Min vìn em ni?" a rawn ti ve thung a.

A hre lo der tih ka chiang, a hre reng dâwn chiang lutuk," Tûnlai tak hian ka thin a chhe deuh a nih ka ring," ka ti leh ringawt a, a ni deuh tak tak a, àn ka châk bâkah ka thin hi a rim tet tet țhìn tlat a ni, a chhan ka hre bîk lo.

"I thin a chhia tih pawh ka lo hre hleinem," a lo tih leh chuan," I hriat reng kha, i hre lo der mai mai," ka lo ti ve thung a, a țawng dam thlap reng bîk chu ka va awt tak! Chutih rualin a hai der tlat chuan ka thin a ti rim deuh a, min ngai pawimawh tâwk lo ni tlata hriatna ka nei tel a, chu chuan ka hnuk ti noin ka țah a ti chhuak tlat pek a nih chu.

"Min vin àwm ka hre lo tak tak," a rawn tih leh chuan țah chhuak insûm tak hian," Ka vin reng che kha, towel huh khuma i dah avàngin ka thin a rim nghe nghe kha, engah nge i hai der tlat? Ka vin vàng che khân i thinte a rim ve lo em ni? Nge i tân hian thinrim khum tlâk loh, eng mah lo mai ka lo ni zâwk?" ka ti ta nge nge a, ka mittui chu a rawn tling kul kul a, hmun dang leh hnuai lam pawh ka melh ngam tawh lo, amah chu ka en reng ringawt a, ka mit pawh ka khap ngam tawh lo.

"Nâ i nei chu a ni lo tiraw? Nge i nei zâwk?" a rawn tih chuan," Kha, i hai der tlat a, i ngai pawimawh lo a nih chiah kha," ka lo ti leh a, țap lo tùrin ka hmui chu ka pet fan fan nain ka mit lamin a tui chu a lo khuap sêng ta lo va, a rawn dïr ta zãwih mai, ka hru lo, a rawn tla zêl dâwn tho si a.

"Ka Lalnu..!!" ti supin min rawn pan nghál ruak a, duat tak leh nghet taka min rawn kuah tâkah chuan țap lo tùra  ka insùmna chu eng mah lo mai a ni ta, ka țap chhuak ta nge nge a, ka mittui ni se a tla zawih zawih bawk a, insùm ka tum tawh lo, ani lah chuan duat taka min kuah pah chuan a kut bàl lo lamin ka sam chu a chûl a chûl bawk a.

Rei fê chu ka țap a, eng ber chu nge ka țah chhan ber tih pawh ka hre lo, han țah tâkah chuan min kuah tlat bawk nèn, a nuam hlep hlep êm mai a, ka bâng duh lawk lo a ni.

"Min ngai dam rawh aw," a tih chuan mahni inthiam lohnain ka khat a," I thiam loh a awm hleinem, a chhan pawh ka hre lo. A, ka awm dàn hi ka hre thiam hlawl lo a ni," ka lo ti sap sap a, ani chuan ka pum rawn chùl pah chuan," Hei tê vàng hi maw le, ka hre reng alawm," a ti sup a.

Ka awm dàna ka inthiam loh avàng chuan vìn loh leh thinrim loh ka tum ve ta khawp mai a, ka thin a rim dáwna ka hriat chuan thâwk ka la hawk hawk a, chutianga minute hnih thum vêl thâwk ka lâk hnuah chuan ka zia huai țhìn, towel huh pawh khumah ka hmu ngai tawh bîk lo; mahse, mipa hi zawng, mipa an nihna hi a lo lang leh nge nge țhìn a, a awm lai chuan insûmin a awm loh veleh àn ka duh chuan ka âng thâwl ta zâwk țhìn a, a zia phian, a hriat ve loh miau chuan a pawi lo.

*******

"Chapchàr kût hmangin khuaah i kal ve châk em?" tia min zawh chuan," A âwihawm loh e, a pèl daih tawh alawm le," ka lo ti a, ani chuan nui suk chung hian," Hetah chuan an sawn hmiah mai zêl alawm, mipui nâwlpui hman tlàn hunah an hmang mai țhìn," a lo ti ve thung a.

Mahse, a hnuah chuan kal a rem ti leh ta tlat lo mai a, min sawihmuh tê tê a, a va ngeiawm roh tak!

"Motor-a chuan i phal loh vàng a nih chuan kein kan kal thei reng alawm, Chapchàr kût ka la hmang ve ngai lo va, ka kal châk asin, min kalpui mai la?" tiin ka thlêm a, dâwt tlêm ka sawi, vawi khat chu ka kal ve tawh ngei a, lâm leh zai hlîr maiin hun a khat a, ka rin aiin ka ning daih nghe nghe a ni; mahse, thingtlâng lama an hman dàn ka hre ve châk a, ka kal châk a ni.

Ka dìl tlut tlut avàng chuan kein min kalpui ta nge nge a, ka châk vàng chu ni maw, ka hah lutuk hran miah lo. Khua kan thleng a, kan mi hmuhte rêng rêng chuan zo thuam inbelin an phùr hmèl viau hlawmin ka hria, Pa Țhiangate inah kan innghat a, anni pawh an lo inpeih at at tawh viau mai, an mawi hlawm ka ti, Mizo thuam hi a lo nalh viau a ni tih ka hre chiang ve chiah, bih tùr nei ve ila ka tih rilrûk rauh rauh lai chuan Dozer-a'n Ngotekherh hi min rawn pe a, a lo keng ru reng a ni chiang, lãwm tak chuan ka han bih ve a, ka inhmeh ve reng, kawr lam erawh kawr vâr ka hâk tho vàng chuan thlâk a ngai lo tùrah ka ngai. Dozer-a pawhin Ngotekherh ve tho a veng a, a puan hnuaiah kekawrbùl a ha a, ka mitah chuan a inhmeh êm êm, mi mitah pawh a ni ve thoin ka ring. Ni sâah kan awm dâwn sia tiin sunscreen ka inchulh leh a, Dozer-a hmaiah pawh chuan ka hnawihsak ve a.

Ka chãk ang ngeiin nuam ka ti. Nulaho inkàwibah lai phei chuan ka lo tel ve châk khâwp mai a, ka tih ve châk zâwng tak a ni. Video-in ka lo la char char a, ka tel ve chákzia chu Dozer-a bulah pawh ka sawi nghe nghe a, ani chuan," Nu tân a tih chi tawh nâng," a lo ti mai a, kei chuan," A tih chi lohna a awm lo, naupang pawhin an ti ve țhìn tho a," ka lo ti ve thung a," Kàwi saw ka neih phawt chuan ka ti ve thei ang," ka ti leh a.

Paho inbuante, mipa naupangho sairawkherh inperhsiakte leh kalchheta inkal chaksiakte chu ka la hmuh ngai loh avàngin hmuhnawm ka ti hlê a, ka tân chuan thil thar vek a ni si a, ka mit a tla lo chauh a ni. Chhùnah thingpui sen thlum deuh leh zochhangban chhum an rawn sem a, chu pawh chu tui ka ti leh pek viau, ka kham lo deuh nghe nghe a, Dozer-a'n a chhang chu a chanveah phelin lehlam min pe ve leh a, chu zet chuan min ti puar ta viau mai.

Insuknawr leh insaihruipawha tel tùrin Dozer-a hming chu an rawn lam chhuak ve ta nawlh mai, mak ti zetin ka en hâ a," I tel ve dâwn maw?" ka ti vat a, ani chu a lo nui suk a," Ka hming an lam ve miau si a," a lo ti mai a, a chhuak zui ve ta mai a. Hmuh chian loh hlau takin ka țhutna ațangin ka ding chhuak a, ka phone camera pawh chu ka hmet chhuak zui leh zat a.

A pa tê lêm lo bawk a, chak pawh a lo chak viau, ka rin aiin a lo chak daih mai. Ka lo țang khawp mai a, ka lo awm hlè hlé thei lo, ka lo au tuar tuar lo chauh a ni. Insuknawrah chuan a chak ber a; mahse, insaihruipawhah erawh chuan pahnihna a ni thung. A tumpuipa chu pa tâwrchhah zet hi a ni a, sàn chu a sâng lêm lo, bâwngpa chak deuh hi ka tehkhin deuh tlat.

Tlaiah khawtlângin ruai an țheh avàngin keini pawhin kan țheh ve a, vawksa leh ârsa leh thlai hnah awm ang ang chawhmehah an siam a, an siam tui ka ti phian a ni. Fatute lah chuan min rawn duhsak khawp a, kan hluiah chuan sa neih tlèm deuh lai pawh kan nei lo. Kan kham hnua haw nghâl kan tum chuan fatute chuan min ko dingin Pa Țhiangate ei ve atân tiin vawksa leh arsa chu fùn pawlhin min hawntîr a, mak ka ti tak tak a ni, an inhmangaih tlâng tel tel viauin ka hria.

Khaw ro hun lai a ni a, kawng pawh a phutin lungte rah hrual tùr a tam a, ka tlûk hlauin Dozer-a'n ka kutah min kai tlat. Tlûk ka hrât tih a hre chiang tawh a, tunah phei chuan nau ka lo pai ve tawh bawk nèn, min fîmkhurpui chu àwm ka ti viau tho e. Vawi khat chu ka tlu leh țêp tak tak a! Min kai lo se chuan ka tlu tak tak ang chu.

Motor chuan phal lo viau mah se in-checkup a ngaih miau avàngin Sèrchhîp lam panin hun remchâng hmasa berah kan kal ta nge nge a, kawnga kan tlàn lai chuan ka nu ka bia a, Sèrchhîpah in-checkup tùra kan kal thu ka hrilh chuan fîmkhur tùrin min rawn chah ve lawm lawm a," Naute kan hmu châk tawh si a, indìm viau rawh aw, hna hahthlâkte kha i lo thawk ngawt ang e," a rawn ti ve ngial a, ka inentîr zawha  be leh tùrin min chah a, kei pawh chuan biak leh chu ka tiam a. 

Kan inbiak zawh hnu chuan," Ka nu chu ka ngai reuh ngawt mai, kan bulah rawh zin ve thei se, a bulah ka mu châk," ka han ti a, Dozer-a chuan ka kut chu a rawn hmer salh a," Mu lo ang, mahniin ka mu duh lo, zin pawh lo zin suh se," a lo ti nghut a, a thil sawi dàn leh hmêl lan dàn avàng chuan ka nuih chiam nghe nghe. 

Sèrchhîp kan thlen chuan pawisa han hman mai tùr ka neih tawh mang loh avàngin ATM booth hnai ber pan phawt ka rawt a, ani chuan," Eng atân maw?" a lo ti mai a," A, pawisa pawh tlêm azâwng kan la chhuak ve ang chu maw le," ka tih chuan," I pasal ka awm a, min ring hmiah rawh," a lo ti duh chauh a. 

Doctor chuan min lo en pah chuan ka fîmkhurna tùr leh ka tih loh tùrte chu min hrilh ngun viau a, Dozer-a a awm ve kur bawk si a, kei aiin a lo ngaithla ngunin ka hre nghe nghe. Kan chhuah dâwn chuan doctor hnênah eng emaw hi a zâwt sup nghe nghe a; mahse, ka va hre pha tawh chuang lo.

Kan chhuah hnuah chuan ka nu ka phone leh a, engkim a țhat thu sawia kan inbiak zawh hnuah data ka on chhin ve ta rêng rêng a, message a lo lût tam duh khawp mai. Țhiante missed calls pawh a lo awm nual a, pasal ka neih tâk thu pawh ka la hrilh hlawm loh avàng chuan WhatsApp message-in ka va hrilh ta hlawm nghe nghe a, Ruatpuia'n lo hmu nghâlin min rawn call zui nghâl zat bawk.

A hnuah Zela leh Ruthi'n min rawn call ve leh a, remchâng hmasa berah Phaizawla rawn kal an intiam a, Benson-a erawh chuan call lovin WhatsApp message vêkin min lawmpui thu min rawn hrilh thung, ka thinlung ațanga a reh hmak dàn êm êm hi chu a mak ve ngawt mai, ka ngaihzâwng hmasa ber kha a ni ve si a.

Mamawh kan lei țeuh a, kawr min leisak a tum ve ngei bawk a; mahse, ka mamawh loh thu ka hrilh a, ani erawh chuan," Leisak che ka duh alawm," a lo ti tlat a, chuti na nâ nâ tiin nakin lawka ka la mamawh tùr kawr lian tak, ka rai len hnu pawha ka hâk theih tùr chu ka inleitîr ta a, pawisa ka neih ve chhun chuan a hmuh loh laiin a tàwnzau tùr leh a kekawrte tùr ka leisak ve bawk a.

Kawnga kan tlàn laiin ka nuteite ka be ve leh a, loudspeaker ka on a, chanchin eng eng emaw kan inhrilh tawn hnu chuan," I patea Lungleia a zin phei lai tak a nia, a tum dàn chuan naktûk hian a rawn phei ang, i pa zu rui nasa thei lutuk vàngin Henry-a mangangin a rawn phone ringawt a, engtin tak chuan va inti ang maw?" a rawn ti siam siam a.

"A pawi ngawt mai, a chhan chu keimah vàng a ni si a," ka ti sap a, nutei chuan," Ni ber chuang lo ve, a in duh vàng a ni mai, inthiam lo suh, i rilrute kha i lo ti hrehawm ngawt ang e, sualin hna a thawk ve tluang rih a nih ber hi," a rawn ti leh a.

"Dozer-a nèn nupa in ni tawh a, nau hial i pai tawh bawk. Chu vàngin hlim takin awm dùn ula, Dozer-a tân hmeichhe țha tak nih tum reng ang che, i pa chu rawn ngaihtuah miah lo la, sim hun zawng a la nei ve mai ang. Rawn kala rawn hmuh che u pawh a châkawm, hun a la awm ve chêk ang chu maw," a rawn ti leh siam siam a.

In kan thlen hnua kan thil leite kan inphawrh darh hnuah ani pawhin underwear min lo leisak nual a ni tih ka hre ve chiah. Min pêk hnuah ka leisak chu ka pe ve a, a lãwm thiam viau zui.

"Kan mamawh dùn viau lo nain a țha hrim hrim e," a ti sup a, lei sei fêa chhuah khumin a bân bulah ka va chumsak a, a thil sawi awmzia ka hre thiam ve tho a, min ti zak deuh leh tlat atin a ni.

"Inbual ang, doctor khân thil țha deuh min hrilh a, zanin ațang chuan chaw bêl bula țàmchhàwl ka tum tawh miah lo a nia," a rawn ti zui leh a, nui suk hian a kal kiang zui a, ka en zui reng a. Kan chhuah dâwna doctor a va bekbàwr khân eng tak va zâwt ang maw tih laiin a thil va zawh chu a hriat ta reng mai, a țawng ka hre pha lo kha ka va lãwm tak! Hre pha ngat ila chuan ka zak dâwn êm asin.

*I NUNA THIL ȚHA LO LO THLENG ȚHÌN VÀNG KHÂN HREHAWM TIIN PAWI TIIN INDAWM KUN NGAWT SUH, HRINGNUN A NI MIAU A, A LO THLENG VE A NI MAI, KHAMI AȚANG KHÂN LO INZIR FING ZÊL LA, HMA LAM PAN I TUM ZÊL ZÂWK DÂWN NIA*