☆DOZER☆ - 41 By Dingdi Pachuau

☆DOZER☆ - 41 By Dingdi Pachuau

Ni a sa țha a, thuamhnaw sük ka zâr chhuak a, ani'n workshop lamah naute lo pian huna a mutna tùr khum 'ka siam dâwn e' a ti a, engtin tak siam ang maw ti chungin ka inzàr zawh chuan no pakhat leh flask tê  khaiin ka pan phei ve a, a ruangâm chu a lo din ve tawh a, chuta țang chuan a nih dàn tùr chu ka hmu thiam ve ta ruak a.

"A va țha dâwn reuh ve!" tiin ka han fak hlak phawt a," Thingpui hâng i duh em? I duh ka ring deuh ngawt a?" tia ka zawh zui leh chuan," Ka kut lek dàn ațangin i hre thei chiang mai," a lo ti a, ka nui hak a," Thingpui hâng i in châk thu i ngaihtuah reng kha ka rawn hmu vuai vuai thei alawm," ka tih chuan ani pawh chu a lo nui ve a.

Thingpui ina a chawlh chuan a siam dàn tùrte chu min hrilh ve sup sup a, kei pawhin a mawi dàn tùrte chu ka lo sawi ve a, naute thil lam hlîr mai chu kan sawi dùn a, kan inlungrual viau mai, kei pawh ka thinchhiat a chhuak miah lo a ni chêk ang chu, han sawisèla han thinrima han àn khum châkna ang kha a awm miah lo.

Zànriah kan kîl laiin," Kârleh chu Aizawlah zin ang hmiang?" a rawn ti chhuak teh thut a, en hau pah hian," Eng maw?!!" ka ti hû a, a thu sawi chu a sawi sual emaw ka ti deuh a, a nih loh vêk pawhin ka hre sual emaw tal a ni ang ka ti a ni.

Min rawn enin," I hriat reng kha, Aizawlah zin ang ka ti," a rawn ti leh a, min fiam mai mai a nih ringin a hmël leh mitmeng chu ngun takin ka en reng a; mahse, fiamthùna a lang miah lo. Hmm, tunah chuan a chiang ta e; mahse, engtizia teh thut ngeni ang? Motor chuan a phal loh tehlul nèn, Aizawlah daih daih lehnghâl.

"Boss-in i tih tlatte chuan kei, i kid rinawm tak hian ka hnial phal tawp nâng!" 

Phûr tak ka ni. Hunte chu a kal muang ka ti a, Dozer-a'n a sawi ţhin 'Khuaa naupangte kawr thar neih ve theih hun chu Krismas hunpui hi a ni mai a, chu vàng chuan an nghâkhlel thei viau a ni' a tih kha ka hre chhuak zawk mai; mahse, Krismas lo thleng tùr an nghahhlelh aiin tunah tak hi chuan kârleh lo thleng tùr hi ka nghâkhlel zâwkin ka ring, a chhan erawh ka hre êm êm chuang lo.

Truck chu mamawha hman chhuah a ngaih ve reng avàngin Sèrchhîp lama a țhianpa biain ani'n taxi-in min rawn lam vang vang a, Dozer-a'n khalh chak rem ti hek lo le, kan tlãn dim viau a, kawng lakah chawhmeh leiin ka ding zauh zauh bawk nen, Aizawl kan thleng har deuh hlek; mahse, a pawimawh ber chu Aizawl thlen kha a ni mai a, hei kan thleng ve ta tho alawm.

Hotel-a thlen ngawt thu awm hek lo le, ka pateate kan pan leh ngawt a, kan kal dâwn tih kan hrilh sa miah lo va, min hmu thut chu mak an lo tiin ka nutei phei chu a lo țê chúl mai a, min lo làwm a ni tih chu a awm dàn ațangin a hriat ngawih ngawih, a nuam ve lutuk. Driver chuan kan bulah chaw a ei ve mai a; mahse, riah aia tlàn haw leh nghâl a duh avàngin rei pawh awm lo chuan a tlãn chhuak ta thuai a.

Ruatpuia a rawn thleng chawpchilh ve bawk a, a rawn ri lût hlut mai. Kawng laka kan tlàn lai khân kan chanchin kha ka hrilh ve a, Dozer-a rem tihna thlapin; lo lèn kha a tum nghãl rëng a, a tum a ti hlawhtling chiang bawk e.

"Ka rawn tlawh ang che u ka tih ve ngar ngar laiin nangni in rawn lang ta hlauh a, a tihzia e, in haw leh hma ngeiin chaw pawh kan eiho ang chu le tiraw, Miss R? Oh, ni leh lo, Miss i ni tawh lo tak e, Remruatkimi maw kha? Pi Remruatkimi i ni tawh tak ang chu maw le," a tih chuan ka lo ter at a," Pi tih telh kher suh. Chuan, pasal ka nei tawh bawk a, min u tawh rawh," ka lo ti vat a, ani chu a lo chek hlak a. 

"E khai, nupui pasal nei kan in-u zêl dâwn zawngin a buaithlâk deuh ang, mahni aia naupang lehnghâl, a teuh lo mai," a ti nang nang a, ka pateate chu an lo nui a, kei chuan," Nupui i neih ve a ngai tawh a nih kha, kawppui nei tawh leh kawppui la nei lo chu kan danglam tawh tlat a ni," ka lo ti leh a, min chhàn peih ve viau țhin nèn, tûn țum chu mak takin a ngawi ve tlat mai.

A lêng rei lutuk lo, kan chauh a ring ve a ni ang, kan la awm ve rih dáwn tho a, hun danga rawn lèn leh a tum zâwk a ni. A haw dáwnah erawh chuan kan chhuah huna an hotel-a tlawh ve ngei ngei tùrin min sâwm a, kei phei chu," I thawhna hlui a nia, tlawh leh i ba hrim hrim," min ti teh ngawt a, Dozer-a'n min lo chhàn khalhin," Remchâng kan neih phawt chuan le," a lo ti ve mai a, ka lu ka lo bu nghat ringawt.

Kan zin mai mai kha ka lo ring lo sa deuh rêng a, bâkah, kan zin dâwn khân ka lehkha pawimawhte keng tùr khân min hrilh sa kha a nia, eng atân chuan ti ni maw ti rilruin ka zâwt chiang duh lêm lo kha a nia, ka passport tùr kan buaipui dâwn a lo ni, ani chuan a lo nei daih tawh a, min zinpui a tum a ni chiang!

A hnuah chuan Philipines rama a pu leh a pa lo tualchaina hmun, an 'in- pui' ngei chu honeymoon hmanga min hmuhpui a tum thu min hrilh ta a, mak ka tiin min țhâwng teh asin! Mak tiin ka lãwm bawk si a, ka en hau ringawt mai a ni.

"Min hmangaih vàngin hrehawm tam tak i tuar tawh a, pasala min neih hnuah pawh khawiah mah zin chhuak lovin ka bulah lungawi takin hun i hmang a, chumi avànga làwm thu sawi nân inti thawveng paha zin chhuahpui che hi ka tih tùr liau liau a ni, i duh ang tiraw? Naute kan neih hunah chuan zin mai mai pawh a harsa deuh tawh dâwn si a, hun thâwl kan neih lai hian zin ila ka ti a, ka râwn hmasa lêm lo che a, țha i ti em?" tiin min zâwt a.

"Ka muah hlup dâwn che em maw ni le? Thil châkawm deuh ngaihtuah chhuak thiam lutuk mai!!" tiin ka nui a, ani chuan," Han ti chiah la?" nui suk chung hian a lo ti ve mai a, a biangah chuan ka va fawhsak tak tak a!! Țha ka ti, chuan, ka kal châk tak tak bawk, nuam ka ti dâwn sa tih ka chiang a, Philipino nèn chuan kan hmêl a inang sa deuh bawk nèn, ka mikhual bîk dâwn lo tih ka hria a ni.

"Ka nuin kal ve a châk ngawt ang a?" ngaihtuah chhuak thutin ka han ti leh a, ani chuan," Tûn țumah hi chuan ni lo ve, kan pahnih chauhin le," a lo ti thung a. A thil ruahman hi min hrilh lâwk vek thlip thlep lo mah se ka vui lo va, kan tân thil pawi leh țha lo tùr a ti lo ang tih ka ring nghet hmiah a ni.

Ka pasal neih dàn an hriat nual tawh avàngin min zâwt chîk zui zêl tawh lo va, a tìrah kha chuan an han vui ve hlawm viau a; mahse, an hriat chian hnuah erawh min khawngaih thu leh min lawmpui thu min hrilh nawn leh hnuhnawh hlawm a, Ruthi phei chuan," Ka dàwra thuamhnaw i duh apiang rawn thlang rawh, ka khawngaih êm mai che," a ti nghe nghe a; mahse, a ngaih loh thu ka hrilh a," Ka nei țeuh alawm, min pe tlukin ka lâwm lutuk," ka ti thung a; mahse, kawr leh chhehchhawla ven tùr puan min pe lui ta tho a, chu erawh chu lâksak loh mawi lova ka hriat avàngin ka lâksak ta a. Ka mamawh hi chu ka pasal hian min pe hneh a, duh hi chu ka nei ve nual tho; mahse, ka mamawh an nih loh avàngin neih kher ka tum bîk lo va, bâkah, a tel lovin ka awm thei tih ka hre chiang bawk a, a chuang liama neih a țùlna lah a awm hek lo, ka pasal min chàwmnaah hian ka lung hi a âwi ve tâwk a ni.

Kan awmho lai ngeia chaw ei khâwm an rawt miau mai si a, kan ei khâwm ta poh a, a hmun chu Ruatpuia thlan a ni a, ani thlan a nih chuan a nuam dâwn tih ka hre sa a, a nuam viau rêng a ni. Zela'n Benson-a rawn tur chhuak a, kan țhianah khân a rawn tel ve miau si a, nuam ti àwm tak ang chuan a lang na a, a rûk tak chuan a inthlahrung a ni tih ka hria a, nuam a tih nân kei chuan ka be lui bawrh bawrh thung. Kan inkâr kha hun kal tawha mi a ni a, theihnghilhin hma lam ka pan tawh a, ani pawhin hma lam pan se ka duh, hun kal tawh, thil țha lo lama chèn reng zawng a țha ngai lo ve.

Chaw ei khama kan țhut khâwm tal tal lai chuan Zêla chu ding hluaiin nupui a neih thuai tùr thu sawiin a nupui hming tùr pawh chu a sawi tel pah a, ka phu zawk mai. La naupang ve deuh kha em ni? Tu nge a hming kha? Ka han ngaihtuah lêt ngial a, ka hre chhuak thei ta mai lo. Kut an ben dar dar rîah chuan harh chhuak zawkin uar zet hian ka han bêng ve a. Ruthi bulah thle hnaiin," La naupang ve deuh kha em ni?" ka han ti sap a, ani chuan," A thar maw le, an inzui rei hran lo," a lo ti ve sap a.

A hnuah kei pawh chuan ka ruak loh thu chu ka han sawi ve leh a, Zêla pek chuan nui sûng chung hian," A chang țha tawh bawk a, a țiak nghâl thuai mai alawm," a rawn ti pek a, ka zak deuh hlek a, rum deuhin ka melh nghek ringawt. Dozer-a pawh chuan ka kut vuan rân chung hian," Neih țeuh kan duh dâwn si a, pài thuai thuai loh chuan kan tlai mai ang kan ti deuh a," fiamthu hian a rawn ti ve sup sup a, fiamthu hlîr mai chuan kan inchhâng kual ta hlawm a, Dozer-a pawh nui ve suk suk rengin beisei aiin a țawng ve duh a, ka țhiante bula a titi ve bul bul chu hriat nuam ka tih bâkah hmuh nuam ka ti a, hun nuam tak kan hmangho niin ka hria.

Kan hawa in kan thlen chuan ka pateate pahnih chu an lo la meng a, thingpui hâng inin kan titi leh rih a. Ka patea chuan min rawn enin," Zêp tùr a awm chuang lo va, zanin khân i pa nèn kan inbia a, in inneih tawh thu kha ka hrilh a, a pawi lo tiraw?" a ti a, ka lo bu nghat a, Dozer-a chuan ka kut a rawn vuan nghâl zat a.

"Dozer-a i pan luia i nei lui a nih chuan eng mah i pa hnên ațanga i chan loh tùr thu i hre sa tiraw? Chu chu i pa sawi dàn a nia, a dik em?" a tih leh chuan," A dik alawm," ka lo ti a, nuam lo ti ru deuhin Dozer-a chu ka melh a, ani chuan min lo en zâwk reng tawh nghe nghe a, ka kut pawh a la vuan reng.

"Chumi chungchãngah chuan kan thu a inhmu chiah lo deuh a, a thinrim a la kal tluang ve rih deuh a ni ang, a thu sawia a la din ngheh reng thu leh a din ngheh reng tùr thu a sawi a, keiin chutiang ringawta thil tih tùr a nih ngai loh thu ka hrilh ve thung a, zanin kha chu a rùi ni pawhin ka hre chiah lo," a ti leh dap dap a, ka nutei chuan," Hun a liam deuh ang a, a thinrimin reh hun a la nei ngei ang a, chuti mai chuan a kaltîr che beisei lo ang, a fanu i nia," a lo ti ve a, min hnem a tum a ni ang.

"Nupa in ni tawh a, eng mah zêp hnì hnè ka tum lo, thil hi chu a nihna ang rãwt hian sawi mai zêl ila. Ni e, ka u chu a thinrim a, a thu thu a ni bawk a, inrawlh chiam theih pawh a ni lo," a ti charh charh a," Dozer, tunah chuan Ruattei innghahna ber i ni ta, a lan dànah rih hi chuan a pa hnên ațang chuan eng mah a chang dâwn lo, a phal lo chung i hnêna kal lui a nih miau avàngin. Tunah hian a nihna takah chuan Ruattei hi neih nei lo, a pain an chhûngkua ațanga a paih bo ang a ni. Chu vàng tak chuan, a innghahna takmeuh tùr i ni a, nang lo chu neih a nei lo a nih chu, keini chu awm tho mah ila, a pasal i awm a, a mamawh ber, a engkima engkim i ni a, nangma chunga a innghah ang ëm êm chuan kan chungah a innghat thei ngai lo ang a, i ngaihsak angin kan rawn ngaihsak tâwk thei lo bawk ang. Ruattei tân hian ka ring tâwk che a, in inhmangaih tih pawh ka hria, kei chuan hlim taka awma hlim taka nun hmang dùn zêl tùrin ka duhsak che u a ni," a ti leh dap dap a.

Ka kut chu Dozer-a chuan a hmer nghet sauh a, ka mittui chu a rawn hnai leh kuar tawh, ka hriat sa tho mah ni se Dozer-a hriat laia sawi a ni chu nuam lo ka ti a, ka pa duh loh lutuk a ni chu hrehawm a ti zual ang tih ka hlau a ni.

"Ka pate, engkim min hrilh avàngin ka lãwm e. Ruattei hian engkim chàn huamin min hmangaih a, min nei a, ka tâna engkim chàn huam hi engtiklai mahin ka phatsan ngai lo ang a, ka kalsan ngai hek lo ang. Ka dam chhûngin a tân pasal, țhian, a innghahna tlâk leh a mamawh a hmuhna niin hlim ní leh lungngaih nîah a kiangah ka awm reng ang," ka kut vuan nghet salh salh pah chuan Dozer-a chuan a ti chhuak ve ta sup sup a, ka en a, min lo en ve bawk a, a thu sawi chu a sawi mai mai lo tih a mit meng leh awm dàn ațang chuan ka hria a, làwm avànga lungchhe lek lekin ka nuih sak a," Ka láwm e," hmui phun hian ka ti sap bawk a.

"Mi fate anga hausa tak, sum leh pai khãwl êm ûm ni ve lo mah ila a mamawh erawh a tlachham hauh lo ang, chu chu ka tiam a ni," a tih leh chuan ka patea chuan," A țha e, ka ring tâwk che ka tih tawh kha. A pa thil sawite pawh rilruah dah rùn lo ula, thil țha lo lam leh rilrua hlim lohna tùr ang chi kha chu eng mah ngaihtuah chhuah duh miah loh tùr a ni, chutiang tùr atân chuan hringnun hi a tãwi a, dam chhûng hi chuan hlim thei ang bera hun hman hi tum tlat tùr a ni," a ti leh a.

Kan mutnaah chuan duat tak si leh nghet tak si hian min kuah a, kei pawhin ka kuah lêt ve tho a, țawng lova rei angreng tak kan inkuah hnu chuan," Kei min nei hi i inchhîr em?" a rawn ti chhuak ta sup a, rang zet hian," Teuh lo mai! Ka la inchhîr chhin lo hrim hrim!" uar zet hian ka lo ti vat a.

"KA HMANGAIH CHE, Ka Lalnu, min nei hi inchhîr ngai lo tùrin ka siam ang che," a ti leh a, a hrawkbâwka fawh zauh pah hian," Kei pawhin ka hmangaih che, nang ka nei che hi ka inchhîr ngai lo ang tih ka hria a ni," ka lo ti ve a, rawn insiam remin," Chu chu kan fa lo piang tùr hmingin ka tiam che a ni," a ti leh sup a, rawn kûn hniam deuhin ka hmuiah chuan duat tak hian min rawn fâwp zui zat a.

Kawrfual min lei a, a puan chu hâk nuam tak tùr niin, te reuh tê têin a pâr a, a mawi reuh tawp, zinvahnaa ken tùr bag leh bun tùr pheikhawk pum min leisak bawk. "Nakin lawkah i mamawh dâwn si a," a ti a, ka hnial duh lo a ni. Ni e, a sawi ang hian ka la mamawh dâwn si a, nakin lawka lei leh chûk chûk ai chuan a țha zâwk.

Henry-a ka phone chhin a, in ațanga ka chhuah hnuah vawi khat mah ka la be si lo va, min ngaihtuah ve viau dâwn si a. Min rawn chhâng vat a, rei erawh kan inbe lo. Ka dam țha em tih leh ka hlim leh hlim loh min zâwt hmasa ber a, min ngaihtuah reng țhin thu a rawn sawi bawk. Dàwrah a awm a, a buai tih a hriat si a, zàna min rawn biak tùr thu sawiin kan inbe tàwp ta rih a ni.

Zàna kan inbiak leh chuan," U, i hlim tih hriat chu a nuam ka ti hlê mai, helam chu rawn ngaihtuah duh miah suh, hlim tak khân awm la, i rilrute kha i lo ti hrehawm ngawt ngawt ang e, patea hnên ațangin in innei tawh tih leh naute i pai tawh tihte kha ka lo hre ve a, ka lawmpui khawp mai che. I thuamhnawte hi ka rawn thawn dâwn che em ni ang? I keng chhuak tlêm si a," a rawn ti barh barh a, a ngaih loh thu leh ka mamawh tâwk ka neih thute ka hrilh chuan," Dozer-a chuan hlim taka a siam ngei che ka beisei a, i tân pasal țha tàwp a nih ngei pawh ka beisei tlat a ni," a rawn ti leh a.

Youtube channel ka siam ve kha ka la kalpui ve reng a, video thar pawh ka post leh nual tawh. Signal țhatna hmun ațanga ka post zung zung loh chuan Phaizawlah zawng ka pist thei dâwn awkawng si lo va. Ka channel hi  Phaizawl lam fakna ni deuh tho mah se Khuaa Chapchàr kût kan hmannate kha ka dah tel bawk a, ka rin aiin entu pawh an tam ve. Nuam ka ti ve hlê a, Dozer-a'n a chhûngte a hrilh kual ve zêl bawk a, an comment-naah erawh ' In hmêl rawn ti lang ve r'u, kan hmu châk che u' tih a tam ber.

Kan inneih hnu hian hna a thawk nasa viau tawh lo va, țûl bîk tê loah phei chuan min chhuahsan mai mai lo bawk. Pa Țhiangate'n mikhual lo thleng lo buaipui zawng zawngah an àwl thei tawh a, kawng lehlamah chuan ka rai thuai chu hrehawm ka ti deuh. A chhan pawh kan inneih chuan hna ka thawhpui ve ang a, a hahdam ve thei deuh sawt ang chu ka tih laiin ka rai leh ta daih sia, hna ka thawh lah a phal dèr mai si lo va, amah ti hek zâwng hlîrin ka khawsa ni maiin ka hria.

Philipines-a zin tùra thil tih țûl zawng zawng kan tih hnu chuan kan han zin ta ngei a, June thla laihàwl vêl a ni a, zin nân chuan hun țha ber leh duhthusàm chu a ni lo ngei mai a, Dozer-a pawhin a sawi; mahse, kan hun neih dànin zir ta mawlh hek lo le, duhthusàmah chuan Dec - Feb ni thei se a ti ve a; mahse, chûng hunahte chuan zin chi ka ni tawh dâwn lo hrim hrim. June thla ațang hian chuan thlipui thawk thut thut thei a nih tawh avàngin duhthu chu a sãm lutuk tawh lo a ni; mahse, a pawi lo tawh mai, kan awm chhûng chuan lo thaw lo hrâm mai rawh se.

A farnute chhûngkuain in-pui chu an lo nghâk a, Airport-ah min lo hmuak a, inbe ve țhìn tho mah se hmêl an inhmu khât tawh a, a farnu Jean-i phei chu hlim vàngin a mittui a tla pùr nghe nghe. A u lo thleng ta chu, a ngaih a ngamin a thla a muang tih a hriat a, hlim takin a nui sâng rêng a, an fate mipa pahnih chu hmun dangah lehkha zirin an awm a, an tlum ber hmeichhe naupang fel ve tawh tak erawh an lo awmpui thung a, min en duh khawp mai lehnghâl.

Min ngaihsak a, min duat a, min en hrang miah lo chu nuam ka ti. Kan awm chhûngin an pa Edmund-a chuan kan kal duhna hmunah min hruai kual char char a, hmun nuam leh khualzinin an tlawh duh deuh bîk laiahte min kalpui a, nuam ka ti viau mai. Dozer-a'n pheikhawk leh bag min leisak kha min lo lei lo ang tih hlauhawm tak a ni, ka bun chhuak a, ka ak chhuak bawk a, an tel lo chuan eng mah lo mai ka ni. Ka pateate'n 'Foreign thil min lo hawn ve ang chu' an tih avàngin an thil tùr chu kan leisak a, bazàr pah chuan a hmanhmawh theih bîk si loh a; mahse, Edmund-a chuan min sawisêl lo rêng rêng. Jean-ite nupa ka fak êm êmna chu an nupain ka hriat laiin anmahni țawnga an inbe duh bîk miah lo chu a ni, ka hriat thiam theih tùrin English hlîrin an inbia a, min rël lo tih ka hriat phah a, țha ka tih zâwng tak a ni.

Kâr hnih deuhthaw kan awm a nia; mahse, ka ning miah lo. Jean-i chuan tlereuh hlu tak tak eng eng emaw min pe nual a," Kan nuța neihchhun nupui i ni a, ka laizawn ang tho i ni," min ti a, ka tân ui a nei lovin an awmthei thawkhat bawk a, ka hnial duh lo a ni.  Ka mamawh hran lo nain min pe ve miau si a, kan inhmuh vawi khatna a ni bawk si a, lâksak loh chu ka duh lo a ni.

"In rawn kal hun hi duhthu a sãm vak lo va, chuti chu ni lo se chuan beach mawi tak takah leh island-ahte kan han kal tùr hi a nia; mahse, in rawn kal leh hunah a ni mai, chutih hunah chuan ka nu in rawn hruai tawh ang a, naute thar kan hmu thei tawh bawk ang a," nui chung hian a ti siam siam a, min nêl a, min pawh a, ka tân pawh ngainat loh theih a ni lo.

Kan haw a lo hun chuan kan thlâwk haw leh ta a, dârkâr 8 chuang zet kan thlawh leh hnuah kan ram kan thleng leh ta. Kolkatta-ah rei lo tê kan awm leh rih a, kawng engkimah Dozer-a ka ring vek a ni mai, rin loh theih pawh a ni lo, engkim a lo ruahman fel sa vek a ni zâwk, a ni tèlin Dozer-a rintlâkzia  ka hre chiang deuh deuh zêl chu a ni. Páwn lamah chuan thingtläng mi mãwl tak leh rethei taka ngaih leh hmuh ni mah se chhûngril lama a nih loh chianzia ka hre tawh a, hetiang mi rintlâk pasala ka lo nei hi vànnei ka inti tawlh tawlh lo thei lo.

"Hun kan neih leh hunah Mamite tlawhin kan zin leh dâwn nia, anni chu an awmna a hnai deuh a," a tih chuan Tim-a nu a sawina a ni tih ka hre mai a, a hmain min hrilh tawh tak a, Delhi-ah an chhûngin an awm a, Tim-a hi a nulât fa ang kha a ni ve a, a pasal hi Mizo a ni ve tlat thung.

Hun a ral ve zêl a, ka pum pawh a puar ve ãk tawh a, zan tin mai hian Dozer-a chuan biain," Ka naute, țha takin lo țhang zêl rawh aw, apa hian i lo chhuah hlàn a nghâkhlel tawh teh mai a nia, a hun takah țha takin lo chhuak ang che," a ti țhìn a, hun a lo ral leh deuha ka nawm loh deuh châng hi chuan," Anu hi ti hrehawm lutuk suh aw, ka pumah hian lo awm daih thei zâwk la," te a ti a, nuih a ti za țhìn a nia. Naute khum tùr leh thuamhnaw tùr engkim peih fel a ni tawh a, a puan tùr erawh Ruthi'n," Ka lo ngaihtuah vek ang," a tih avàngin kan insêng mang lo va; mahse, Dozer-a'n a hre thiam lo deuh tlat a," A lei zât tùr a hriat si loh a, mi leia innghah ngawt zawng," a ti deuh tlat a, a hnuah kan lei leh ta a, naute lo welcome tùr chuan kan inpeih thawkhat ta viau a ni; mahse, nei tùrin thla thum chuang kan nghah a la ngai thung!

*AN BULA I AWMA I NGAIH TI ȚHA VENG VENG THEI MIHRING AN AWM ȚHÌN, I RILRU TÂN DAMDAWI ȚHA TAK NIIN I THLARAU TÂN NI ÊNG MAWI TAK ANG AN NI THEI ȚHÌN*