☆DOZER☆ - 42 By Dingdi Pachuau

☆DOZER☆ - 42 By Dingdi Pachuau

Hna eng emaw hahthlâk deuh nia a hriat rêng rêng chu ka thawh a phal lo nain exer tùr táwk erawh chuan ni tinin ka tih ve theih tâwk tiin ka tei kual a, ka țhu mai mai duh bîk lo, nau ka har ang tih ka hlau ve ve a. Zîngah min thawhpuiin min tei kualpui a, hla tak tak erawh min kalpui ngai lo thung. Tunah hi chuan zîng thawh hi ka hre ve viau tawh a, zîng taka thawh pawh ka huphurh hran tawh bîk hek lo.

Zelate pawhin an thu tiam hlenin min rawn tlawh ve a, nuam pawh an ti ve viau. An awm chhûng chuan kan inah chawhlui kan kîlho deuh reng mai a, Ruthi phei chu amaha riah a ngam loh avàngin an awm chhûng chuan kan inah a riak ve mai a, Dozer-a mitmei erawh a vêng viau thung; mahse, Dozer-a felzia ka hmu chiang zêl a, Ruthi inthlahrun lohna tùrin amah ang lo takin be hmasa zâwktu-ah țangin Ruthi chu a be bawrh bawrh reng a, mak ka lo ti ve hial zâwk a ni.

Ka in-checkup țha a, tunah zawng ka thil ei a tui huam huam tawh a, ka ei duak duak reng bawk si a, ka rih belh nasa tawh viau nghe nghe. Ka thau a, a hmaa kâwng fêk ve rât țhìn kha tunah chuan a bo vek tawh, ka pum a puar luah tawh a, ka rai vawi khatna a ni bawk si a, hahthlâk ka ti thei tawp, hma lama pum kawh luah mai chu hrehawm ve deuh mai asin, chêt zung zung a harsa ve tawh bawk si.

Mahse, Dozer-a mawlh hi fel ka va ti țhìn tak êm! Ka harsatna min hriat thiampuiin ka bula a awm hi chuan ka chêt ve a phal lo va, ka mamawh chu min rawn pe nghâl zël a ni ber. Raipuar hi nuam lêm lo mah se min duat hliau hliau mai si a, a nuam ka tia, hetiang hi chuan vawi sàwm vël zet pawh ka rai peih maithei a ni!

"Nau i neih hunah khawiah nge neih i duh ang?" duat zeta ka dul chûl hliau hliau pah chuan a ti a, kan mut tawh hi chuan ka kawr hi hlîmin ka dul hi a chûl ziah, ngaiah a nei tawh a, mut hi chuan ngei ngei tùrah a ngai tawp.

"Ka hre lo le, khawiah nge ni ang? A buaithlâk lohna tùr ber hmunah ni se, nang, lo ngaihtuah deuhte i nei tawh em?" tiin ka chhâng a, ka zâwt zui nghâl bawk, ka duhna tùr hmun han sawi fak tùr ka hre lo miau a ni. 

"Mi han tih buai leh inthlahrunawm viau mah se Aizawl lamah nei thei ngei la chu ka ti, ka awmpui thei tho che ang a, chinchâng lo hre tawh nutei a awm thei bawk ang a," a tih chuan," Ni dâwn tak e! A țha ngawt ang. Annite chu mi hrang pawh an ni lo va, inthlahrunna tùr a awm lo. Ka nu lah phût ngam chi a ni mang si lo va, ani'n min awmpui thei hlauh se chuan duhthusàm chu a ni ngei mai a," ka ti vang vang a.

"Ni e tiraw? A upa ve deuh tawh êm a ni. Ka nutei kan tih buai leh mai a ngai dâwn niin a lang lo thei si lo va, lo biak lâwk vek pawh a țha ka ti," a tih sup sup lai chuan ka dul chu a rawn che leh dat dat a, dawmin a nui hawk hawk a," A rawn pêt leh nasa maw? Mipa a nih ka ring lo thei lo, football khelh a thiam viau dâwn niin a lang zui a," a tih zawm zat a, a mitah chuan phùrna, hlimna leh naute lo piang tùr nghahhlelhna hlîr chu a lang thei vekin ka hria.

Zela nupui neihnaa kal ngei kan ngaih avàngin Aizawl kal tùr chuan kan inbuatsaih leh ta a, Zela'n kal ngèi ngéi tùrin min ti kha a nia, tûn hnai hian, ti mai ang, ka duh aiin kan chhuak tam deuh mah mahin ka hria a, a farnu tlawhin Delhi-ah kan kal bawk a, chhuah chu kan chhuak tam deuh chu a ni; mahse, amah Dozer-a zâwkin," E, kal ngêi tùr a ni ngai, i țhianpa nupui neihna tùr a nia, a pawimawh a ni," a ti tlat a, ka kal loh a rem ti lo, min thlahthlam a tum bawk si lo, kan zin chhuak zing mah mah a, helamah an lo buai viau ang tih chu ka hlau tawh zâwk a ni, keimaha zin chhuah a rem ti bawk si lo.

Taxi kan hmang leh a, truck kha zawng in lamah an lo hmang duh leh zâwk ang kan ti a, kan hmang ta lo mai, bâkah, long run-a hman atân chuan a upa ve mah mah tawh. Kan dàn ngaiin chak fahran lovin kan tlãn leh a, ka zun a chhuah sek avàngin kawng lakah pawh kan ding deuh zut a, thlen pawh kan thlen har phah rêng a ni. Inneih thilpêk tùr lei kan la ngai a, in-dang tùr an nih dâwn loh avàngin lei tùr erawh pawh ka hual fel vek tawh a ni.

Ka motor chuang ka nawm loh êm avàngin a tûkah pawh chuan thil lei tùrin ka chhuak peih lo va, Dozer-a chu chhuak zawkin lei tùra ka hrilh chu rawng ka duh ber thlang tùrin min rawn video-call a, a rawn haw thuai nghe nghe. Ka hnungzângte chu min zùtsak a, ka nawm loh chhan chu kawnga kan tlàn chak mah mah vàng niin a sawi a, kei erawh chuan chutiang a nih loh thu leh ka taksa a in-fit tâwk loh vàng niin ka sawi ve thung a.

Zelate inneih nî chu boruak a nuamin khua a thiang viau a, ka thuam hâk nèn pawh khaw awm dàn chu a inchawih viau a ni. Ka puar tawh ëm avàngin puan bih duh viau mah ila ka inhmeh dâwn lo tih ka hria a, kawrfual ka ha zâwk a, ka kawr hâk rawng leh Dozer-a kamis hâk chu a rawng a inhnaih viau. Ka mitah chuan inneihnaa mipa rawn kal zawng zawng zîngah Dozer-a aia țha leh thuam inhmeh an awm lo, ka pasal mah ni se chhe lo hi ka ti ve ngawih ngawih êm!

Zela nupui pawh a chhe vak lo, Zela aiin a upa deuh zâwk ang aw ka ti deuh, a hmai a bawl deuh vàng nge ni dâwn ni; mahse, an induh tawn phawt chuan kum inthlau deuh tih mai mai, a ho êm mai, kum hnih khat bâkin an inthlau chuang nâng, Zela pawh a duat thei zâwk ang chu. 

Thla pawh kan lâkpui ve zawr zawr a, Benson-a pawh best-ah chuan a țang chuang lo nain best ang tluk tho chu a ni. Kei aiin Dozer-a'n a lo hmu hmasa zâwk nghe nghe a, a la thîk reng nge ni, a nupui ka nihzia a lantîr ka ti zâwk dâwn ni, min chelh deuh tlat loh leh min si deuh chêtin a awm a, thla kan lâkho lai pawhin Benson-a hlat lamah min dinpui daih a, ka kâwngah a kuah tlat bawk. Kei lahin nuam ka lo ti daih zâwk si a, inneih lawmpuia lo kal zawng zawngte hian Dozer-a hi ka pasal duh tak a ni tih hre vek se ka ti, nulate pawh hian melh ngam lo se... mahse, chutia ka tih lai mêk chuan ka pasalin duh taka min en leh min kuahte thîk hmêl tak leh awt hmêl taka min thlîr zui țhìn chu nuam ka ti ru veng veng tho.

Zàn lam programme hmannaah erawh kan tel ve ta lo, puar luah lo ila chuan kal pawh a châkawm ve deuh mahna! Bâkah, mipui tam tak kâra inneihnaah nilênga hun kan hman avàng khân ka lu a na bûr mai a, ka chau nghulh mai bawk, khaw lum lai ni phei se chuan ka chàu zual ngawtin ka ring, ka nêp tawh tak zet a ni.

Dozer-a'n ka lu leh ka chàwn min hmehsak malh malh a, a nuam khawp mai, ngai lo ka ti lui ve țàng țâng nain min hmehsak ta tho a," A hahthlâk hleinem," a ti mai a, a hmet thiam bawk sia, nuam ka ti dar dar viau nain rei tak inhmehtîr chu amah ka khawngaih ve tho bawk si a, rei ve tâwk tak hnuah ka tàwptîr ve ta țâwk a.

Henry-a ka be leh a, ani leh ka nu vànga hlim taka awm thei ka ni a, an chungah ka lãwm a, ka nau ka thisen zawmpui a ni tho bawk a, ka en hrang lo. Bâkah, a hnên ațanga ka pa chanchin dik tak hriat pawh hi a țha ka ti, ka pateate hnên ațanga hriat leh țhin ngawt ai chuan ani hian chiang takin min hrilh zâwk ang.

Ka pa chungchâng ka zawh chuan," A, hun a kal ang a, a la reh ve mai ang. Naute han nei vat vat la maw, a tu a hmuh hunah chuan a thinrimna a reh vek ang, țan han la sauh sauh rawh khai," nui chung hian a rawn ti a, kei pawh chuan," Ni dâwn tak e, hmêl țha táwk leh duhawm lutuk tak mai, ka pa rilru ti danglam hlawk thei khawpa duhawmnain a thuam fa hrin ngei ka lo tum ang," ka ti ve a. Kan nui dùn hawk hawk a, inbe zui zëlin hun hman dànte kan i zâwt leh a, mipa mah ni se ani hi chu inla eng emaw chi a ni ve lo va, a u mah ni ila min titipui peih ve reng tlat mai a ni, ka lo hre chiang har hi ka tia!

"Rawn ngaihtuah chiam duh suh, zu pawh a in tlêm ve viau tawh a nia," a rawn tih leh chuan," A làwmawm a nih chu, keimah vàngin hrehawm in tuar lo thei si lo va, pawi ka ti. Chutih rual chuan ka nu nèna in chungah khân ka lãwm viau bawk si, nangmahni vàng chauh zalèn thei ka ni si a " ka ti ve leh a.

"Ka chungah engah nge i làwm ve viau? Tihsak che eng mah ka nei ve hleinem," a lo ti thung a, kei chuan," Chutin ti vêl lo mai teh, lehkha thema i thil ziah ka hmuh laia ka làwmzia kha!" ka ti ve leh a, ani chuan," Eng lehkha them maw?!" a rawn ti a, miin an rawn bia a ni ngei ang, a chhâng rî chu ka hre zui nghâl zat bawk. Ka awm ta si lo va, a buai dâwn lutuk, dàwr ațangin a la haw lo tih lah a hriat reng bawk a, la biak duh viau mah ila," I buai êm mai, hun dangah inbe leh mai ang aw," ka ti a, ka ti tàwp ta thuai a.

Mutnaah Heny-a'n ka pa chungchâng min hrilh chu ka hrilh ve a, kan inbiakna dangte pawh chu hrilhin ka nui pah hak hak a, fel ka tih thute ka sawi chuan ani pawh chuan," Ni e, Henry-a kha ka ngaina ve roh khawp mai, min ngainatu an tam loh teh rêng nèn, min ngaina ve tlat mai a, min ngaina tak taktute hi chu ngainat loh theih an ni bîk lo," a lo ti ve duah a.

"Ka nu pawhin mak tak maiin a ngainat ve tho che kha aw," ka lo ti vat a, ani chuan," Ni ve tho mah se Henry-a angin ka ngaina ve lo," a lo ti thung a, kuah pah hian," Ka zalèn theih nâna kawng min hawnsaktu a nih kha theihnghilh miah suh aw, rem pawh a ruat vek a, nang pawh a rawn be pawp che a," ka ti leh a, ani chuan," A ni maithei; mahse, ka sual vàng nge, hun kal tawha i chunga a awm dàn vàng khân ngainat a har ka ti," a ti ve leh a.

Ka chanchin zawng zawng kha ka hrilh fai kîlh kêlh lo nain ka hrilh nual a, hetia ka nu chungchâng a sawi pawh hi min khawngaih vàng a ni tih ka hria a, ka thiam lo viau lo; mahse, ka lo hrilh ta kha zia lo chu ka ti ta deuh, ka nu a ngainat loh phah tlat, ka nu vàng chauhin tunah pawh amah nèn awm dùnin kan inneih theih phah ta hial a nia.

Krismas a hnai a, khua a vâwt vîn leh tûk tawh a; mahse, kei chu ka zia viau, in chhûngah phei chuan kawr lum ha mang lo pawhin ka la awm mai mai. Kum thar lam maia naute nei mai tawh tùr ka nih vàngin kan zin chhuak tawh lo va, mamawh lei tùrin Dozer-a a chhuak zauh a, Krismas laia thil kan ei ve tùr pawh kan inlei fel vek tawh. 

Krismas hma hretin patea fate pahnih Mamawii leh Remtea pawhin min rawn tlawh ve a, kan inhmu khât a, an rawn haw chhoh laiin kei ka awm lo țhìn si a, Remtea chu a lo lian tawh lutuk a, ka hai lo chauh a ni. Dozer-a chuan a naute ang chiaha ngaiin a lo làwm thiam a, kan inah chetla lo mah se chaw an rawn ei reng a, a sâwm reng a, anni pawhin an ngaina nghâl khawp mai. Remtea phei chu lian thuang e ti lo chuan a la ä ve a, Dozer-a chu a ngainain a kalna apiangah a zui zêl mai, Mamawii'n a rûkin a'n zilh ve a; mahse, awmzia erawh a awm lo khawp mai thung. Ka unaute heti taka a ngaina hlawm leh an chunga a țha hi ka lãwm tak zet a ni, mâkpa nih a tlin hliah hliah hi ka tia, ka chhuang viau a ni. An haw dâwnah Rûn luah man pawh a pe kïr leh vek a, ka chunga ka pateate țhatzia a takin a hria a, a hmu a, pawisa a pe kîr pawh chu àwm ka tihpui reng mai, nakin lawkah kan ti buai leh dâwn bawk si a.

Krismas leh kum thar tluang takin kan hmang a, Krismas present atâna Zelate inneiha kan kal țuma a rûka ka leisak ve Kamis țhui mawi zet ka pêk chuan a lãwm thiam kher asin. A inhmeh dáwn tih ka hmu lâwk sa a, a inhmeh rêng bawk a, a tân liau liaua țhui ni àwm tak a ni nghe nghe. Ani pawhin T-shirt hãk nuam tak tùr hi min pe ve a, a puan deh a nuam a, nau ka pawm hunah pawh ka ha duh ngawtin ka ring.

Khël lovin kum thar a liam a, nau nei tùrin ka inbuatsaih țan ta. Ka inzo lo lutuk tawh a, ka ke pawh a vûng nasain ka ke mai ni lovin keimah hrim hrim pawh hi ka vúng tel ni maiin ka hria, ka dul lah chu puar theihtàwpin a puar ni maiin ka hria, hahpui tham zet chu a ni chiang alawm. Dozer-a'n ka neih hun dâwn teptèr zeta kal lovin chumi hma deuha kal chu a tih tlat avàngin ka neih ka inrin aia kár khat zeta hmaah Aizawl panin kan chhuak leh a, nau puan tùr chu ka pateate inah Ruthi min pêk kha kan dah sa tawh a, sûk fai vek a ni tawh a, mamawh tùr pawh kan ti fel tawh viauin ka hria.

Nau neih nâ an tih theih êm avàng chuan a rûk tak chuan ka huphurh khawp mai a, ka ngaihtuah duh lo lui țhìn hial zâwk; mahse, a châng chuan mite pawhin an nei a, engah nge ka lo huphurh chiam, ka rilru ka ti hrehawm mai mai te ka ti a, mite pawhin an theih chuan ka tuar thei ve ang, Pathian zârah tluang takin ka nei thei tùrah beisei ila, ka tawrh theih bâk aia nâ chu ka tuar bîk lo ang tiin ka inti huaisen lui a, neih hma hauh ațanga lo zàm lâwk zet zawng a buaithlãk hret chu a ni.

Dozer-a zawng thil a lo ngaihtuah lâwk nasa a ni. Nau ka awl theih nân tiin sakuh sa leh a pumpui lei tùr a lo zawng kual ngat ngat niin, ka nu leh Tim-a'n an lo ngaihvenpui bawk a, an rawn hmu mai rêng a. Damdawi ina ka luh dâwn chuan a sa chu min chhumsak a, a tui min intîrin a sa chu ei zo vek tùrin min ti bawk a, a pumpui pawh chu damdawi ina ka luh huna chhum atân a dah țha bawk a, sârzûk zung leh a pil ni se a kawl țha thlap tawh bawk!

Ka fa pakhatna tùr mah ni se sakuh sa leh a pumpui ka ei vàng ni maw ka rin aiin ka nei awlsam daih mai a! Zàn dâr 9 vêl ațangin ka vei țan a, na lutuk tùra ka ngaih avàngin ka rin aiin a na lo ka ti a; mahse, a rei telh telh a, a lo na tehmeuh mai, a na tak zet a ni, nâ tih hian a sawi fiah phâk lo. A tûk chhùn dâr 12: 45-ah chiah țha takin fuke kim dik thlapin fanu lian zet mai leh ngo zet, kg 4 zeta rit chu ka hring chhuak ta a, ka hring chhuak chiah chu nâ zawng zawng hi a reh nghâl vek ni maiin ka hria! Mahse, a lianin a rit țha bawk a, ka inhliam nasa viau thung.

Ka fanu hmêl ka hmuh chuan ka lung a âwi hliah hliah a, hrehawm ka lo tuar ve zawng zawng pawh kha eng mah lo mai niin ka hre hial a ni. A kuttin lah chu a sei reuh khawp a, a mawi reuh phian zui a! Ka en ning lo, a sam chu a tam lo nain a dum țha ve reng a, a ngo reuh bawk a, nurse-te pawhin," Naute piang ka hmuh tawhah chuan a la ngo ber ang, a hmêl a țhain a duhawm bawk si," an ti ve sap sap a, amah hringtu a nu tân chuan chutiang thu hriat chu nuam ve duh tak a ni.

Damdawi inah kâr khat kan awm a, Mamawii'n min awmpui thei hlauh a, a fel khawp mai. Naute hming chu a pi( Dozer-a nu) sak atân kan dah a, ràlkhat ațanga hming sak ngai miau hek le, ka nu chuan," Kan chhûngkaw tân hlimna tam tak min rawn thlentu ni mawlh rawh se," tiin, naute hmingah Lalhlimpuii kan sa ta a, kan hlimpui ngeiin ka beisei. 

Kan chhuah zànah ka patea inah kan awm khâwm lai lai a, țhiante an rawn kal khâwm bawk a, kan ri lai lai mai. Naute chu a fel khawp mai a, a nu ka inhliam nasa tih a hre ve em maw ni ka ti hial, a mu țha duh khawp mai a, a rilțàm pawhin a țap duh miah lo. A țap duh miah lo leh a mu duh lutuk chu a pa ngaih a țha lo hial mai a," Dik lo a awm a ni ang," a ti a," Doctor ka be mai dâwn," a tih loh leh," A mu duh lutuk hi ka ngaih a țha lo, a dik lo," a ti thùl a, awm ngaihna a hre hlawl lo, naute bulah a awm reng a, a kalsan ve deuh pawhin rei a kalsan thei lo, nau awmtu rinawm tak a ni thei dâwn e. 

Ka patea chu làwm thu sawiin a țawngțai a, naute pawh chu Pathian hnênah a hlàn pah bawk a. Chumi hnuah thingpuite lumin damdawi in ațanga kan chhuak chu lawmna an nei ti ila a dik ang, kei erawh chu an bulah ka la awm tam thei lo va, ka la mu deuh reng rih mai a ni.

Henry-a leh Felfeli pawh naute thlalâk chu ka thawn ve ve a, ka nu leh pate'n an lo hmu ve ngeiin ka ring a, hmêl țha an tih ve ngei pawh ka ring. Kei ngei pawh hian a pa ang hian ka en ning bîk lo, a biang thau tem leh a khabe te reuh tê chu hmuhnawm ka ti zual a, a hnárah min chhùn ka ti a, a mitah erawh a pa a chhùn khawp, a pa mitmeng chiah chiah a ni.

*KAN HLIMNA LEH KAN HLAWHTLINNA KAN CHANTE HI MI ȚHENKHAT TÂN CHUAN LUNGNGAIHNA LEH THINRIMNA A NI VE THEI ȚHÌN*