☆DOZER☆ - 43 By Dingdi Pachuau

☆DOZER☆- 43 By Dingdi Pachuau

Ka pasal hian sum a lo khâwl viau a ni ngei ang, kan car thar ngeiin kan haw a ni. Sum lam hi sawi nuam ka tih lêm loh avàngin ka sawipui ngai lo tluk a ni a, ani lah țawng bawrh bawrha thil min hrilh siam siam chi a nih loh vàngin a nupui mah ni ila sum kan neih zât hi ka hre lo a ni, zâwt ila chuan min hrilh tho chuan ka ring. Car thar lâk ve mai țha a tih thu a sawi khân a fiamthu emaw te kha ka ti vêl a, ka duh zâwng min zawh pawh khân," A țha ber chi ngat le, a rawng lamah chuan a vâr a nih loh chuanin silver lam rawng tal ni thei se... chuan, kan chhûngkaw lêng tâwk kha a ni leh mai," tiin ka chhâng a, duhthusàm fiamthuin ka chhâng mai mai a nia; mahse, a lo fiamthu miah lo.

Kan fanu Lalhlimpuii chuan a hming a pu zo tak zet. Kan nupa chuan kan hlimpui takmeuh a, Dozer-a'n chêt la phal lo mah se nu ka ni ve tawh a, che lova awm reng bîk thu a awm lo. Kan fanu zun leh êk vêl tih fai kawngah min àwl hneh viauin ei tùr siam leh in chhûng chêt kawngah pawh min àwl hneh viau mah se hmeichhe tân zawng chétna tùr hi a awm ve zêl a, indìm tak chungin ka che chho ve hlek hlek a, keimahah harsatna min siam phah êm êm pawhin ka ring lo. 

Hnute tui ka nei țha a, a kham viau bawkin ka hria, naute țha tak a ni ve bawk e, mut a duh chiah chiah hlê mai a, a pa hian," A meng lai hmuh a va khât tak!" a ti leh sup țhìn a, a ti dik ve tho, bual lai pawhin a châng chuan a muhìl thei a nia! A pa hian thil țûl tia a kalsan a nih loh chuan a bulah hian a vil reng a, kan pahnihin chaw pawh kan ei dùn ngai lo, ka ei hlànin a fanu bulah chuan a lo awm a, chaw a ei ve pawh hian a puar hmanin ka ring țhìn lo. 

Ni a ral a, kâr a ral a, a nunphung leh hmêl lan dàn hrim hrim chu a ni tèlin a danglam ve zêl a,  hnute ka pêk lai hian chiang deuhin ka en țhìn a, a pa nèn an inang takzetin ka hre țhìn, a pa têt lai nèn an inang ngawtin ka ring! Ka nu awm hnai se ka zâwt chãk ngawt mai.

Zànah muhìl lova men kar reng a rawn chîng chho ve țan a; mahse, vila vêngtu nei reng ta chu, viltupa chuan a menpui țhìn a," Nang chu muhìl rawh, a țah chuan loh hi," a ti țhìn a; mahse, a mut tak tak theih bîk loh, kut lum a hriat leh lutuk kan hlauh vàngin kan pawm tam ngam lo va; mahse, a pa hian a khawngaih țhìn a," Ho mai mai! Pawmtu tùr ka awm reng a," a ti țhìn a, a men tawh phawt hi chuan a ban ngê ngê zêl. A han pawm a, a pa âwmah zawng a lang tê reuh lo thei lo a, kg 4 laia rita ka hrin chhuah kha a ni ta lo a ni ang a tih awl tak a ni.

Zanriah ei dâwn hnaiha kan kawngkaa ka nu leh Tim-a lo inzui lût ka hmuh chuan mak tiin ka lo en hû phawt a, chutah," Ka nu leh Tim-a!!  Dozer, ka nute an lo kal a nia!" tiin room-a a fanu pawm ka pasal chu ka ko vak a, ka nu chuan nui sâng hian min rawn panin min rawn kuah a, ka lo kuah ve vat a.

"Engin nge in rawn kal a, ka nu? Engati nge min rawn hrilh loh? I rui em? I chau ngawt lo maw?" tiin ka nu chu ka be mawlh mawlh a, ani erawh chuan," Chau lo, ka chau lo ve. Dam țha taka ka hmu che hi ka lãwm hle mai, ka fanu. Chuan, ka tunu chu ka hmu chãk tawh khawp mai," a ti ve thung a, kan inthlah lai chuan Dozer-a pawh room ațangin a rawn chhuak ve tawh a, ka nu chuan lo pan vatin," Kawngtluanin ka tunu hmuh hun tùr ka rawn ngaihtuah char char a," a ti a.

An pîtu inlawm chhûng chuan Tim-a chu be vein," I chau em? I ril a țâm tawh ngawt lo maw?" tiin ka be ve nghál a, ani chuan," Kawngah ei tùr kan rawn ei a, a țâm hran lo," a lo ti ve mai a, ka nuin kawnga an ei tùr siamin an rawn pai leh a ni ngei ang.

Ka nu chuan a insil fai hma chuan naute chu a pawm duh lo va, a insil hnuah erawh a chang ta chawt mai. Dozer-a pawhin a chang thei ta rih lo, țawngkain an han inchuh fiam a, ka nuin," Nang chuan i lo pawm char char tawh a, ka awm chhûng chuan ka pawm ve tawh ang," a ti a, a pa lah chuan," Ka pawm char char bîk lo, a nuin pawm a phal hleinem," a lo ti ve a, ka nu chuan," Kut lum a hriat riau kha a hlauhawm ve tho bawk si a ni, nu tân a hahthlâk duh bîk a. I sèn lai pawh khân kut lum kha i hria a, a buaithlâk ve asin aw..." a ti vang vang a. Kei chuan," A pa a chhùn ang tih a va hlauhawm ve le!" ka lo ti vat a.

Ka rin ang chiahin ka nu chuan," A la chhùnin ka ring, a hmêlah leh a mitmengahte hian a chhùn takzet a ni," a ti ve a, kei chuan," Ka rin dàn chiah! Chu vàng tak a lo nih chiah chu a duat êm êm ni," ka lo ti vat a, Dozer-a erawh chuan," Min chhun chuan ka hmêl țha tihna a nih chu," a lo ti daih thung a.

Ka nute chu ka rin aiin an awm rei ve daih mai. Nuam ka ti khawp a, nu awpna hnuai ngeia fa enkawl chu a nawm dàn a nuam duangdai bîk êm a lo ni, ka sawi thiam chiah lo, ka thlá a muang êm êm a ni tih hian a sawi fiah berin ka ring. Min awmpui reng thei se ka ti khawp mai a, chu erawh a theih dáwn loh tih ka hria, nu thlazàr hnuai lo nawm bîkzia chu a takin ka tawng leh a ni, a hma kha chuan fa ka la nei lo va, tunah chuan fa nei ve tawhin eng emawah lo țap ve deuh se ka buaiin ka rilru a mangang hma a, a pum a nâ a ni ang ka tih loh leh nâ a nei a ni ngei ngei ang ka ti a, Dozer-a awm ve rengin buaipui dùn țhìn mah ila ani pawh tawn hriat la nei bîk lo a ni a, nu mawhphurhna a ni deuh bawk si nèn; ka nu erawh tawn hriat lo nei hrep tawh a ni a, a awm chinah chuan naute a țah pawhin ka mangang phîlî buai vak ngai tawh lo.

Ka nu hi chu nu zaidam tak a ni va ni chiang tak! A fate pawhin an nu a ni chu an chhuangin nuam an ti hlawm ngawtin ka ring. Dam deuh deuhin a țawng a, naute enkawl dàn tùr leh ka tih tùr hrang hrangte chu min hrilh hre zêl a, ka pasala nu hetiang nungchang nei mi a lo ni hi ka lãwm a, vànnei pawh ka inti a ni. Dozer-a bulah pawh ka sawi chhuak nghe nghe," Ka nu ang nu in nei thei bîk leh a enkawlna hnuaia in sei lian thei bîk hi vànnei in inti țhìn ngawt lo maw? Ka pasal i ni hi vànnei ka inti a, ka nu hi i nu a lo ni leh zêl a, ka làwmna leh vànnei ka intihna hi a inthuah hnih thuah thum tak zet a ni," uar zet hian ka ti a, ani erawh chuan min chhâng lovin a lamah min kuah hnai a, ka samah a fâwp ringawt.

Hun a ral a, thlà a ral a, Lalhlimpuii pawh a changkãng chho tawh viau a, 'Bawihte' hi chu ka ti ve ţhìn tak nain ka nu hming saksak hi mawi ka tih êm avàngin 'Lalhlimpui' tiin ka ko zing zâwk, a pa rilru a lo na țhìn a, ka hre thiam lawk lo va, ka koh apiang hian min lo melh rum vak țhìn a, keiin lei ka chhuah khum țhìn thung. A hnuah erawh," Kan fanu neihchhun a nia, ko lawl lawl țhìn suh, a rilru a nâ ang," a ti ta pek a, chutah chiah chuan ka hre thiam ta a ni; mahse, han chhaih kawlh ve hrim hrim hi ka châk a," A hmingin ka ko a ni mai a," ka ti ve thung a, 'a huat rëng rêng atân' tiin a hming pum chuan ka ko lui leh sak țhìn a, a hnu deuhah erawh ka chhaih kawlh ta a ni ta chêk ang chu, meng sawr sawr chungin a rawn tho a, ka tlànchhiat hman hma chuan ka bân tawn tawnah min rawn manin bangah min nawr bet a, a thinrim tak tak lo tih hre reng tho mah ila ka theih ang angin ka lo täl a, min fawh a tum tih hriain ka lu ka thlëk sawnna lamah ka tukkhum ka tauh ta dawt mai.

"A naaahhh..!!" ka ti a, a na lah tak a, a ri bawp kha a nia. Min vawnna thlahin a rawn chûl ta vat a," Ka tih palh lutuk!" a ti sup a, keiin," Tih palh a nih loh tawp kha," ka lo ti thung a, kan thãwm chu a lo hria a ni ngei ang, ka nuin lehlam ațangin," Engtizia nge ni?" a rawn ti a.

"A intauh palh hlauh a," Dozer-a'n a tih chuan," Amah vàngin ka intauh," ka lo ti vat thung a, ka nu chuan," A mak thei țhìn, fîmkhur ta che u, a nâ em, ka fanu?" a rawn ti leh làng láng a. 'Ka fanu' tia min koh leh tâk avàng chuan nuam ka ti a, Dozer-a chunga lungawi loh ka tumna pawh ka theihnghilh zui nghâl.

"Na lo ve, ka nu. Dozer-a erawh hi chu zilh teh, a fanu chauh duat hlur ringawt mai! Ka intauh pawh pawi a ti lo a ni."

Dozer-a nui hawk chu ka hria a, rum zet hian ka melh chho a, nui sûnga rawn kûn hniamin min rawn fâwp zauh a," I fanu kher chu thîk lo teh!" a ti zui sup a.

Ka nu hi chuan Mizo inkoh dàn lo ang takin min koh nân 'Ka fanu' tiin min ko țhìn a, chutianga min kotu chu ka tawng ngai si lo va, min koh hian nuam ka ti thlâwt, ka zêp lo, min duatin kan inhnaih zual bîk nite hian ka hria a, nu ka awh êm êm ţhin kha nei ve tawha inngaiin ka ngainatna a zual bâkah mak tak maiin a lakah pawh hian ka pangchang ngam tlat a ni.

Ka dam țha tawh a, dam pângngai ang ka ni tawh. Ka nute pawhin min hawsan tawh nghe nghe a, ka ngai thei khawp mai, a bula awm kha ka ning lo va, kan chhûngkua hi min uap se ka ti, Dozer-a kiangah ka awm hian ka thla a muang lo ka tihna a ni lo va, tlâkchham pawh ka nei chuang lo; mahse, ka nu a awm kha chuan kan phuisui khup ka ti mai, kan kim thlap ni berin ka hria, a bulah kan fanu hi sei lian thei se ka ti.

Phaizawlah awm mah ila khaw hnai berah naute vaccine chu kan la ve mai zêl a, kan hmaih bîk teuh lo mai. A pain min chhuahpui mai zêl a, phone signal awmnaah kal ve thei tawh hek lo i, kan chhuah nî hi chuan ka phone hi a rak thei khawp a, mi ka be kual nasa thei viau rêng a ni.

"Vawiinah patea nèn kan inbia a, Henry-a damloh thu leh damdawi ina an luh thu min hrilh a," a tih chuan ka en vat a, vawiinah mamawh lamin amah chauhin a chhuak ve teh tlat a, keini nufa erawh inah kan lo awm a, kal ve tùrin min ti viau nain khua a lum sia, naute ka ngaihtuah deuh vàngin kan kal ve ta lo a ni. 

"I ngaihtuah ang tih ka hria alawm, kan tùra kal i duh em?" a rawn tih leh pawh chuan chhâng lovin amah chu ka en reng a. Henry-a ber kher chu, engati nge? Eng vàng nge ni ang? Engtik ațangin? A na viau ang em? Mahse, damdawi ina luh ngai hial chu, a na deuh a ni lo thei lo.

"A sawi dàn chuan kâr hmasa lam khân damlo ser ser ang hian a awm tawh a; mahse, engah vak ngai lovin damdawi a ei a, dàwra kal pawh a țhulh duh chuang lo ni àwm tak a ni; mahse, nimin piah khân a pum lam a sawi leh a, amah a chàu deuh bawk nèn, Sèrkàwnah tlãn chho nghâlin doctor-in an han check chian chuan internal bleeding a lo ni àwm a, ngaihtuahawm deuh a nih loh thu erawh a sawi thung a," tiin ka duh dàn ang thlapa chipchiar  chuan Dozer-a chuan min hrilh a.

"Internal bleeding!! Mahse, zû leh ruih theih lam chi a ti ngai hauh si lo va," ka lo ti sap a, ka hre chiang ve viauin ka hria asin, nge ka awm loh hnuah a rûkin a lo ti ve zâwk ni ang? A nasat loh hrâm ka beisei, ka khawngaih reuh mang e, ka nute chu an buai ve ngawt ang le.

"Ruih theih thil ti kher lo pawhin an tuar ve thei tho alawm," Dozer-a chuan a lo ti a, ni ve tho mai; mahse, dik tak chuan zû in țhìnah hian an tam duh bîk a, vànduai pawh an awm tho nain. Henry-a chu, Lalhlimpuii hmu tùra la rawn zin a tum thu pawh kha min hrilh ngun ve tehlul nèn chuan... ani hi na deuh hian a awm ang a, ka patea'n kan hlauhthàwn lutuk a hlau ang a, a ngaihtuahawm loh thu a sawi mai a ni lo'ng maw?

Ka ngaih a țhat theih hlawl loh avàng chuan 'Naute a leikãng ve tawh tho a' tiin, a túklehah Henry-a kan tùr chuan kan inkhalh chhuak ve leh ta rãwih a, dik tak chuan a thi mai ang tih ka hlau a, zànah pawh ka mu țha thei lo a ni. Ka nuța neihchhun a ni a, ani pawhin min ngaihtuah êm êm reng a, ngaih pawh min ngaiin min hmuh pawh a lo inring ngeiin ka ring, ka hmuh leh hriat lohin a liam thut mai ang tih ka hlau a ni.

Hotel-ah kan innghat tawp, kan in pan chí ni hek lo le. Ka patea ka be chhin a, vànneihthlâk takin ani pawh Henry-a kan tùrin nimin tlaiah a rawn phei ve chiah a lo ni. Kan chanchin ka hrilh chuan," Vawiin chhùn lam khân ka han hmu a, ka rin aiin ka han hmu zia daih a, a lo tlangvâl khawp mai," tiin chanchin min rawn hrilh ve nghâl a, ka thaw a veng deuh huai mai.

Tuin nge awmpui tih ka zawh chuan ka nuin a awmpui thu sawiin," I pa pawh Henry-a damdawi in awm vàng ni maw, a lo harhfîm ve kur a, zaninah kan pahnihin kan riak ang chu, nizànah erawh kha chuan ka țhianpa Zâmate inah zanriah eiin ka riak nghâl a. Khawi hotel-ah nge in thlen? Ka rawn kal ang," a rawn ti zui a.

A rawn thlen chuan Bawihtei a la muhìl lo bawk a, a pawm deuh reng a, Henry-a chanchin kan sawi pah a, ka nutei kan video-call bawk a, damlo kan tùra kal e ti lo chuan kan hlim leh dar dar viau; Ka patea thil min hrilh khân ka hlauhthàwnna a kiang deuh tlat a, Henry-a chu dam țha taka a chhuah leh theih rinna ka nei nghâl bawk a ni.

A tûkah ka pateaho chuan kan han kan a, naute erawh luhpui kan duh lo va, car-ah a pain a lo awmpui a. Henry-a'n min lo hmuh chuan a lo meng phar ãk a, ka rin aiin a lo țha daih mai, a làwmawmin a vànneihthlâk e. Ka nu pawhin min lo hmuh chuan mak a lo ti ve a ni tih a hriat a, Dozer-a leh naute tel lovin ka ni bawk sia, mak a ti ang.

"Hlimhlimi i rawn hruai ngei àwm si a, ka va hmu châk tak!! A pain a lo awmpui tihna a ni ang maw?" tia min zawh chuan ka bu nghat a," Min rawn kan vang vang chu a ni si a, in buai àwm tehlul nèn," a ti a, kei chuan," Ka ngaihtuah che alawm, zàn pawh ka mu țha thei lo va," ka lo ti a, ani chuan," A va zia lo tak! Hei min hmuh ang hian ka țha lutuk, ka ngaihtuahawm loh, doctor-te an thiam a, damdawiin min enkawl chho ang a, ka chhuak vat thei mai ang," a lo ti leh a, kei pawh chuan," Ni e, i dam thuai a ngai, dam thuai ang che, damlo tawh miah suh," ka lo ti ve leh vat a.

Ei tùr kan kensak ve nual a; mahse, a ei thei kher ang em ka hre lo, a doctor-in ei a phal rih lo maithei a, a ei theih rih loh leh ka nuin a ei ve tawh mai ang chu. Ka nu chu a awm ve tho nain phone-ah mi a be deuh reng a, a kal sawn chhên sia, kan inbe hman lo tluk a ni, ni dangah hetiang tho hian em ni mi a biak țhin ang le? Hetiang a nih chuan Henry-a a khawngaihthlâk àwm mang e! A, a pawimawh viau a ni ang.

"Haw nghâl s'u aw, naktûkah pawh min rawn kan leh rawh, Dozer-a pawh ka hmu chãk," a tih tlat avàng chuan kan haw nghâl vut lo va, dik tak chuan a nat hran loh chuan haw deuh vut pawh kha pawi lo tùrah kan ngai kha a nia; mahse, min ngen ang chuan kan haw ta lo va, Dozer-a pawh a lût ve ta nghe nghe a, video-in min rawn call a, Henry-a'n Hlimhlimi a hmuh duh vàng a lo ni a. A duhawmin a lawmawm chho ve tawh êm mai a, a hmu châk viau pawh hi a àwm viau a ni.

Ka nu chuan," Inah chuan awm ila chuan min rawn tlawh ula ka ti ngei ang; mahse, i pa chauh a awm sia, tlawh tùrin ti che pawh ni ila i tlawh duh pawhin ka ring chuang lo va," a ti a, kei pawh chuan," Nia..." ka lo ti ve mai bawk a, tlawh ka tum lo hrim hrim a ni. Inchhîr ngawih ngawiha a awma ngaihdam min dîl a nih loh chuan kan ina luh leh mai mai kha chu ka tum tawh lo, thlamuang tak leh hlim taka awmna tùr in thar leh chhûngkaw thar ka nei tawh, bâkah, tunah chuan ka pa nèn inzawmna pawh kan nei tawh lo, ka chhuaha Dozer-a ka pan ațang khân kan inlaichìnna a chhu chat vek tawh a ni.

Lalhlimpuii pawh a bawkkhup thei tawh a, kan hlimpui a, kan hahpui bawk. A changkãng chho ve zêl a, buaipui a ngai chho zêl bawk a, naute tak tak a nih laia pawm ang mai mai te kha a duh tawh bîk lo va, kan hlimpui a, kan hahpui châng a tam bawk, a pa hian min àwl hneh êm zâwk a, a chang deuh chawt a ni ber. Thil țûl eng emawa ka chêt laia an pafa inchhaih nui ar ar rî ka hriat hi chuan nuam ka ti a, kei pawh hi ka lo nui ve hial țhìn a ni.

Henry-a dam taka a chhuak chuan min rawn tlawh ve ta ngei a, kan awmna chu nuam a ti khawp mai. Rûna a awm phal lovon Dozer-a'n kan inah a awmtîr a, kár khat chuang lai a awm nghe nghe a ni. Hlimhlimi chu a pawm deuh reng mai a, a khalh tùr tiin toys chi hrang hrang a rawn kensak țeuh bawk a, a khalh theih tak tak hun a nghahhlelhawm. 'Ka awm rei thei dáwn si lo' tiin Hlimhlimi chu a chang deuh tlat a, ani lah chuan a putea tih a hre ve a ni ang tih tùrin a lo duh êm êm a, a nuihtîr rawi rawi mai țhìn a ni, Dozer-a pawhin a chuh ngam chiah lo deuh niin ka hria.

"Video-in thla ka'n lâksak țeuh ang e, ka pain a hmu ve duh dâwn tih ka hre reng. Sawi lo mah se a hmu châk tih hi ka hre chiang ve êm!" Henry-a chuan a ti țhìn a, chhuatah pher phahin puan fai a phah leh a, tah chuan Hlimhlimi chu muttîrin ani'n puan a'n vai lauh lauh a, a chhaih pah țhìn a, Hlimhlimi hlim chu nuiin a rãk ve rawi rawi țhìn a ni.

Zànah kan mutpui ngai lo va, a pain a siamsak khumah ngei khân kan khum bulah a mu ve țhìn. Henry-a chuan," In tikhawngaihthlâk mai mai êm mai," a ti a, amah chauha a mu chu a lo khawngaih viau ni tùr a ni.

"Tikhân, a têt lai ațangin a lo inzir lâwk ve dâwn alawm, kan room-ah tho a mu a, a thãwm kan hre pha vek tho bawk a," ka tih chuan," A khawngaihthlãk tho tho, in bulah mu pawh ni se a mu rei duh chuang nâng, chhang a nei ve leh thuai ang a. In tih dàn hi in duat lo ka ti tlat," a ti nang nang a, la duh tâwk lo chuan," A nu leh pa bula mut chu a châk ve dâwn asin, nu leh pa nei lo pawh a ni lo va, fahrah ang maia mut hrantîr te zawng," a ti leh a, a thil sawi chu ka ngaihtuah vang vang a, dik ka ti ve reng; mahse, a pain hetia a hranga mut hi țha a ti tlat a, an lo tih dàn a ni tho bawk a, ka sawisêl lo kha a nia, ka sawipui chhin ang.

Henry-a haw chu chawhmeh han hawntîr țeuh tùrin scooty maiin a rawn kal si a, tihngaihna a awm lo. Ani chuan," A ngai teuh lo mai, kan ei a tlêm êm si, ka nuin a lo lei khâwl leh țeuh tawh ang," a ti a, chutin ti mah se tlêm azâwng chu kan hawntîr ta tho a, Dozer-a'n," Lo ei ve rêng rêng rawh u," a ti ve tlat a, Henry-a chuan," Pa ber tui tih kha a nia, a ei chuan a rilru pawh a ti danglam thei mahna!" nui deuh chung hian a ti a," Ni e, mâkpa sakâwl meivial thar chhuah thlai chuan a thinlung kahpathîr pawh lapua ang maiin a hmet zawi thei mahna!" ka lo ti ve a, kan nui ta vek a.

Dozer-a hian kan nufa hian min chhuahpui zauh zauh a," Ina tawm reng zawng, boruak dang han hìp ve pawh hi a țha ngai e," a ti mai zêl a, min chhuahpui ta rau rau tiin ka nu hnêna zin ka rawt pek a, ani erawh chuan," Pathian zâra dam chuan Krismas hmangin kan zin zâwk dâwn nia," a lo ti daih thung a, kan chhuah hi chuan ka nu nèn kan inbe ve ziah a, kan invideo-call deuh ber zâwk, Lalhlimpuii hmuh a duh țhìn a, a hming saksak a ni bawk a, a ngaina viau pawh hi a àwm tho.

Kan chhuah chânga lo hmutute hian," A, sâp naute a ang reuh lutuk! A hmêl țha hlê mai," an ti ve țhìn a, chutia kan fanu an han fak ve țhìn chu nuam ve thei deuh mai a nia, kan hmël hriat pawh an ni ngai lo, a pa lah hian an hriat phâk loh hian," A pa min chhùn a," a lo ti ve ziah bawk a, dik tho mah se ka run tâwk a tling a, ka ner khum vak țhìn.

Zelate pawh thlalehah nau an nei tawh dâwn a, kan naute nèn an inrual dâwn khawp mai, kan naute erawh chu an naute chuan an rawn ngam dâwn lo sa tihna. Kan inbiaka ka sawi pawh chuan a rawn nui hawk hawk a," In țuah tawhin in chî a chang țha tawh êm a," a rawn ti pah kher chu ka ngei khawp a, ka bulah awm na se chuan ka chùm khawp ang.

Ka patea'n," I pa ka ngei khawp a! In leh lo, ram leh dàwr kha Henry-a hming vekin a dah thar a, dah thar ti ila a rei ve leh ta deuh, fa pathum bâk a nei lo va, a sem vek che u ka rin tehlul nèn!" a rawn tih chuan mak ka ti lo, kei chuan ka cho chhuak a, chan ka inrin loh bâkah pawi tihna pawh ka nei lo hrim hrim.

"Ka rin dàn sa alawm, pate. In ka chhuahsan ațang khân chan ka inring ngai lo hrim hrim, a țûl bawk lo va, ka pasal bulah hlim takin ka awm tawh a, Lungleia ram va neih daih kha a țûlna pawh a awm lo," ka ti duah a, ka rilru pawh a na chuang lo, ka pain a sawi sa vek alawm, hre sa lo ka ni lo.

"Dozer-a nèn in ințhen ang ka tihna lam ni lovin hmeichhia chu eng pawh tâwk thei in nia, security in neih ve a ngai alawm. In hmun zau lutuk lo chu bazâr vêngah leh Lunglàwnah in nei a, a khawi emaw záwk zâwk tal chu i tân a dah ve tùrah ka lo ngai a, tuna an awmna leh dàwr saw chu i chan tùrah pawh ka ngai lo, i nau chan tùr a ni, a dik chiah; mahse, a tih dàn leh lutuk hi chu a dik lo deuh a ni, ka la sawipui ang, a fuh tlat lo," a rawn ti leh a.

"A, pate, sawipui a ngai lo, Pathian zârah eng êm kan ti bîk nâng, a duh dàn chuan ti rawh se, ka vui hauh lo a nia, ani tân chuan mi hrang daih ang ka ni tawh a, thisenah inzawm tho mah ila a duh loh zâwngin ka awm miau a," ka lo ti ve thung a.

*THIL ȚHA TLËM TE TEA I TIH VE KHA HMU HNIAM MAI SUH, KHÂNG I THIL ȚHA TIH TLÊM TÊ TÉ KHÂN I HRIAT PHÂK LOHIN THIL ROPUI TAK A THLEN THEI A NI*