☆DOZER☆ - 44 By Dingdi Pachuau
Dozer-a bula zêp neih ka duh loh avàngin ka patea thil min hrilh engkim ka hrilh ve sep sep a, ngawi rengin a lo ngaithla a, ka sawi tàwp dâwn chuan," Ka pa chu ka dem lêm lo, hre sa lo pawh ka ni lo va, ani tân phei chuan ka cho chhuah ti te pawhin a sawi theih ang chu; mahse, ka pan vàng che hian ka la inchhîr ngai lo a nia, nang leh ka fanu chiah hi ka neihchhun in ni a, ka innghahna awmchhun i ni. Min duh loha mâkchhiat ka tawh hlauh phei chuan--" ka sawi zawh hma chuan," Chutiang sawi suh, a thleng ngai lo ang," ti supin min rawn kuah nghet sauh a.
"Ka ringhlel che tihna ni lovin kan hma hun tu mahin kan hre lo va," ka tih leh pawh chuan," Kei chuan ka hria, kan ințhen ngai lo ang, a thleng ngai dâwn lo, chu chu ka hre chiang a ni," a lo ti leh a," Mâkchhiat tâwk leh mai mai tùrin thu ka tiam lo che, Pathian hmaah ka nu hriatpuina nèn ngei a ni ka tiam che ni, ka thâwk tàwp thleng leh a hnu lam thlengin ka țhen ngai lo ang che," a ti zui sup sup a.
A thil sawi chuan ka rilru a ti nuam sawng sawng, ka lo rin sa tho chu a ni a; mahse, a țawngkam ngei han hriat chu a nuam zual, kei pawh hian ka țhen ngai lo ang tih ka hria a, engkim tawrh huama ka pan kha a ni a, ka kalsan ngai lo ang. Fanu hmêl țha tak min pe a, an pahnih hian ka hmangaih êm êm a ni, ka sawi hmaih hauh loh tùr, nu pawh min pe tak e. Hmân ațanga ka lo awh êm êm țhin nu hmangaihna, ngaihsakna leh duatna pawh ka nu hnên ațang hian ka dawngin ka hmu tawh bawk a ni.
"Chhang zing deuha fa pawm hi i hreh em?" tia min rawn zawh chuan ka en hâ a, ani erawh chuan min rawn en lovin chawhmeh tùr a chan mawlh mawlh a, keiin nau hnute ka pe a, chutiang zawhna min zâwt chu mak ka ti deuh hlek a ni.
"Fa neih leh nghâl i duh tihna em ni?" tia mak ti taka ka zawh chuan ani chuan," Neih theih te chuan..." a lo ti a nih chu! Ka chek tlak tlak a," Kum ëm pawh a la tlin loh hi, i sawi râpthlãk êm mai a!" ka ti a, kan thil sawi chu naute chuan a lo hre thiam ang tih ka hlau zâwk, min rawn en chho kiau zui lehnghâl a.
"Râpthlâk pawh ka ti lo, Pathian malsàwmna kan dawngah kan ngai zâwk ang," a rawn ti leh a, tunah hi chuan min rawn en tawh a, nui hmêl pawh a pu chuang lo, a ti tak tak a ni ngei ang, a ti râpthlâk tak tak a ni.
Rai leh nghâl vat tùrin min duh tihna a nia, tunah ka dam chho ve țan a, rai leh nghâl vat zawng, a ti ve deuh mah mah chu a ni.
Chhàn dàn tùr ka hriat loh deuh avàng chuan," Rai leh rai lohte chu kan thu pawh va ni suh, Pathian thu thu a ni ang chu," ka tih chuan," Yes...!!" kut hûm ruh chung hian a lo ti a, a la nui vur vur zui, a hlim hmêl ver vur chu, a awm dàn hi ka hre thiam lo ve a!!
Dik tak chuan nau ka neih ațang khân zànah hian min beisei ngai lo tluk a nia, min beisei ngam lo zâwk ka ti dâwn nge ni; mahse, he thil kan sawi zàn ațang chiah hian a awm dàn a dang ta daih mai, min beiseina a ti lang chho țan ta chiah , hei vàng hi a lo nih dâwn hi, a lo hlim sûrh sûrh êm êm ni.
Sèrchhîpah bazârin kan kal a, kan district khawpui a ni bawk a, thil a chikim ber kan tia, mamawh hai khâwm zung zung a awlsam bîk a ni, kan hnaih deuh khuaa kan mamawhte a awm em tia zawn kual hrep ai chuan tiin hmunpui ber hi kan pan chawt mai țhìn rêng a ni.
Ka nu ka bia a, Krismas hmanga an bula zin ka châk tawh thute chu ka hrilh luam a. Ka rilru tak tak a ni ka sawi ni, a bula awm kha ka châk leh tawh a ni. Min hringtu ka nu ka hriat miau loh avàngin ka nu tak tak ang chiah tùrin ka en a, Dozer-a nu aiin ka nu a ni zâwk mahin ka hre nghe nghe!
Ka ngaih thu ka hrilh lai chuan," I uar mah mah!" ka bula ding ve reng chung chuan a lo ti sup a, rum fêa melhin," Min lo ti buai suh, ka nu ka bia a nia," ka ti a, ani lah chuan," Ka nu a ni hmasa zâwk," a rawn ti leh a, ka nu chuan a lo hre phãk a ni chêk ang chu," A lo chimawm leh tawh a ni maw?" nui hak hak chung hian a rawn ti a, kei pawh chuan," Niang chu maw le, a rawn biak hunah che lo zilh hrep teh aw. Min melh rum nasa mai a nia, kan nufain kan rawn zinsan daih zâwk dâwn em maw ni, chimawm, ngeiawm, duhawm bawk si-a hi," ner nûng chung hian ka ti a, ka fiamthu tho nain nui hmêl erawh ka pu duh hauh lo thung.
"A nui vur vurin ka ring," ka nuin a rawn tih chuan amah hringtunu chuan a lo hre chiang viau a ni tih ka hre nghâl, a lo nui vur vur tak tak a!!
"A dik chiah, lawm lohin a nui vur vur mai."
Phone-a signal ka neih ve theih hun a nih miau avàngin mi ka be kual dûm lo thei lo, țhiante ka be kual leh a, chutiangin ka chhûngte pawh. Henry-a pawh ka be leh a, ka pain a hmingin engkim dah vek mah se ka ngei lo va, ka huat phah lo, huatna chhan tùr a awm lo bawk. Ka nau dik tak a ni a, ka fanu putea dik tak leh a neihchhun a ni, ani lahin min haw lo tih ka hre chiang bawk.
"U, Hlimhlimi video hrang hrang kha ka en țhìn a, ka nu pawh ka hmuh ve nghe nghe. Chu chu nimin piah zàn, ni leh lo, Thawhțanni zàn zâwk khân kan en leh a, ka nu nèn kan en lai chuan,' Khawi maw, ka lo en ve teh ang,' a rawn ti ve khauh a. Khuma ka muttîra ka chhaih lai tak video kha a ni nghe nghe a, a hmël țhain a lang duhawm zual êm lah tak a, a kawr hâk a inhmeh êm kha. En vung vung pah chuan," A duhawm reuh hle mai a!" a rawn ti ve a nih chu, mak ka tih êm avàng chuan a thil sawi chu ka hre sual emaw ka ti hial a; mahse, nizàn khân,' Naute video kha min lo thawn ve teh,' a ti leh a, tah chuan a thil sawi kha ka hre sual lo a nih ka ring ngam ta chiah a ni," a rawn ti duah a.
Henry-a thil sawi chu mak ka ti ve deuh tho nain," A ni maw?" ti chauhin ka chhâng a, ani chuan," Ni e, ka pa rilru sak lutuk hi Hlimhlimi hian a tih nêmsak dâwn a nih ka ring ta deuh, ngaihtuah ve mah teh, a video hial min dîl a nia, mak ve deuh mai asin," a rawn ti leh a, kei pawh chuan," I rinna chu thleng dik mawlh teh se," ka ti ve a; mahse, ka ring hran lêm lo, Henry-a hriata sawi kher erawh țûl ka ti lêm lo thung.
Ka pa nèna inmihran hi ka duh hauh lo, keima lam ațang chuan mi hrang hlak ang pawhin ka en thei hek lo ang, chutia ka tih vàng erawh chuan kan inkár țhain a ro țhenkhat ka tân dah lêt ve se ka tihna lam a ni lo va, a ro ka tân dah ve se ka tihna lah a ni hek lo, a ro a nia, a duh duh tân a dah thei, chan ka tum lo va, chang thei pawh ka inti hek lo; ka duh ber chu Dozer-a hi a fanu hmangaih êm êm leh a pasal, a mâkpa dik tak a ni tih hi pawm ve se, ka hmangaihin pasal atân ka nei a, a retheihna zawng zawng leh thingtlâng mí a nihna zawng zawng nèn ka pasal atân ka pawm thlap ang hian min pawmsak ve thlap se, kan inkâr țha lo hi a țha thei te a nih ngai chuan țha se chu ka ti khawp. Chumi ka duh vàng erawh chuan va pan hmasaka, va tlawna ngaihdam va dìl erawh ka tum hauh lo thung, ka chunga thil thleng kha ka la theihnghilh thei bîk lo, ani pawhin a theihnghilh bîk lo tawp ang. Sum hi ka duh lo a ni lo va, retheih hi ka va duh ta chiam tihna pawh a ni lo. Chuan, ka pa leh ka chhûngte dang nèna inmihran hi ka duh zâwng lah a ni hek lo; mahse, ka pa khân loh theih lohnain, Dozer-a pan lo thei lovin min nawr ka ti mai, khatih lai khân ani lo kha pan mai tùr remchâng ka hmu lo bawk nèn, engkim chàn huamin ka chhuak a, hmangaih ber pan ka ni bawk a, hlim takin hun ka la hmang zêl a, ka la inchhîr chhin miah lo chu a nih hi, Dozer-a ațang hian mi hi an lan dàn ang ngawta teh hi a chi loh tih leh an lan dàna rilru lo siam ve ngawt fuh lohzia ka hre chiang tawh viau a ni.
Hrisèla dam țhat chuan hun hi a lo kal chak khawp mai, a kal duak duak a ni ber, Krismas pawh rin loh chhûngin a rawn thleng thuai a, ka nute bulah kan han hmang ta nghe nghe. Nuam ka tiin ka va hlim tak! Kan dam tlângin kan hlim tlâng a, kan hmangaih leh min hmangaihtute bula awm tluka nuam hi a lo awm lo tih ka hre chiang thar zual. Ka nu bula awm hi ka kham thei mawlh lo, a nuam ka tiin ka thla a ti muang ngawih ngawih a, min duatin min duhsakna lantîr a hreh ngai lo. Lalhlimpuii ni se kan nupa hian kan chang hman meuh lo chu a ni, a duat dàn êm êm hi, a tu hmuh hmasak ber chu ni se ka la hre thiam thei deuh ang a; mahse, chu chu a ni bawk si lo va, heti taka a duat leh a hlimpui mai hi mak ka ti zâwk hial a ni.
Krismas tûkah kan inkhâwm vek a, mi tin mai chu thawmhnaw thar nèn an inthuam vekin ka ring, naupangho pawh mawi an inti hlawm khawpin ka hria, hmuhnawm ka ti, kawr thar an ha an hlim hmêl mawlh chuan nun a lo ti hlim ve ka ti a ni. Inkhâwm bànah thingpui sen thlum țha vêt vâwt tak leh zochhangban chhum tui zet kan ei a, kan chhang ei chu kan nautein a lo ît ve ngang a ni ang, a hmêl nuihzatthlâk deuh chu a pain a video-in a lo cover char char a, hmuhnawm ka tih êm avàng chuan a hmuh theih ngei tùr chuan ka ei lui zêl a, ka nuin," A khawngaihthlâk êm mai a! A hmuhah ei tawh lo teh, ka khawngaih a nia," a lo tih chuan," A hmuhnawm reuh êm alawm," ka lo ti mai a; mahse, ka ti lui rei ta bîk lo.
Chawhnu lamah ka pa thlànah kan kal dial a, ka nu chuan," Naute, i puin a hmu châk che a, i pu hmu ve rawh aw," a ti sauh sauh a, ka pa thlàn chu kan din kual țhap a, ka nu chu eng emaw sawi hian a phun sap sap phawt a, chumi hnuah chuan Pathian hnênah làwm thu sawiin a țawngțai a, kan chhûngkua zawng zawng, hmun danga awmte nèn Pathian malsàwmna dîlin kan ni tin hun hmana Amah hre reng thei tùr leh kan hun lo la kal lehzêl tùr pawh Pathian hnêna hlàn chungin Min vènna leh damna kan chanah làwm thu a sawi a, a dîl kim thlap thlap khawp mai. A țawngțai zawh hnu rei lo têah mi dang thäwm a rawn awm a, an hmêl rawn langa keini lam min rawn biak tâkah phei chuan khùnkhàn takin hun a hman theih tawh bîk loh. Kan inbia a, a țhenin naute an rawn làwm pah ve bawk a, a țhen an phûl hlut a, an kalna tùr lah chu ka pa thlàn bul mai a lo ni bawk nèn, a hnuah phei chuan kan haw tlãng ta dial nghe nghe a.
Hlim taka hun hman hi chuan ni khat hun hi a lo rei lo duh khawp a, Phaizawl lama kan haw a lo hun leh dáwn ta mai, ka nute chu hawsan ka hreh khawp mai a, lo zin ve tùr chuan sàwm pawh ka sâwm nasa, sàwm tak têin ka sâwm a; mahse, vawk a lo vulh ve tawh a, zinsan chi a ni tawh si lo. Nikum lamah rei ve tâwk tak min rawn chènchilh tawh a, Dozer-a'n," Pathian zârah kan dam ang a, kan la zin leh zâwk dâwn nia," a tih tâkah chuan ka lung a dam ta deuh. Ni e, zin leh chu a ngai ngei ang, ka nu hi kan bulah awm duhin awm thei se ka ti ngawt mai.
Kawnga kan tlàn laiin Henry-a'n min rawn be teh tlat a! Mak ka ti a, mak ka tih ai mahin amah zâwk chuan mak a tih hmèl.
"Teh tlat chuan! A tlang ve hlauh mai! Phaizâwlah in awm lo em ni?" a rawn ti a, kei chuan," Aw, kan zin a, haw mêkin kawngah kan tlãn mêk a ni," ka ti ve a, ani chuan," A va țha ve! Rawn kual zui hlauh teh u, damdawi inah ka pa ka awmpui a, Hlimhlimi hmuh a châk viau a ni ang, a video kha kan thlîr kan thlîr mai," a rawn ti leh a.
Engtizia nge maw ni le? A hmain Henry-a a awm a, tunah ka pa, engati nge an hrisèl loh viau ni ang aw? Ka pa chu a zu in effect a ni thei mai ang em?
Henry-a chu ka zâwt chiang a, ani chuan a natna chu a serious lêm loh thu sawiin," A, kan inentîr khân min lo admit ta mai sia, kan awm ta a nih hi, naktûk lamah khian chhuah kan dîl ve tawh ang chu," a rawn ti a, kan inbiakna chu a ringa ka dah avàngin Dozer-a pawhin a lo hre ve vek a," A va zia lo ve!" a lo ti ve sup nghe nghe.
Thu tàwp sawi lovin kan inbe tàwp a, ka pa vànga Lunglei kal tumna chu ka nei lêm lo, hmuh a châk chuan a duh leh rawn kal rawh se, bâkah, ka number pawh a nei reng a, Hlimhlimi a hmu châk ngang a nih chuan min rawn bia ang hmiang, a rawn vedio-call thei reng bawk. Ka lo pick up duh loh a hlau a nih chuan thu dang daih a ni tawh, ka chunga a thil tih dànin zir miau hek lo le, ka lo chhâng duh lo ve thei tho; mahse, a chungah thil țha lo thleng tùr chuan ka duh bîk lo, hrisêl se, dam se; Henry-a nèn, ka nu nèn hlim takin hun hmang se ka duh.
Phaizâwl thlen hma deuh, signal la awm ve dêt dêt lai chuan ka phone chu a rawn ri leh a, naute muhìl a harh phah nghe nghe, ka han insiam rem a, phone ka en chuan ka rin loh lutukin ka pa a lo ni!
"Ka pa..!!" ka ti chhuak hluai nghe nghe a, Dozer-a ka va melh chuan ani pawh chuan a mitko a lo sàn ve äk a, naute tãl chu hnute ka pe phawt a, chumi hnu chuan ka pa chu ka chhâng ta chauh a.
"Hello?" tlêm chuan koh chu ka tîm deuh, ka awah pawh chuan a hriat hialin ka ring.
"Lalhlimpuii chu rawn zinpui teh u, ka hmu ve châk alawm," a rawn ti teh ngawt a, a aw chu ka pa aw viak țha ve deuh țhìn kha a ang pawh ka ti lo, a awki pawh chu a hniam tawh a, a chau ve deuh a ni ngei ang.
Ka ngawi deuh reng a, ani pawh chuti tho; mahse, amah chu țawng chhuak hmasaah rawn țang lehin," A takah ka hmu châk ringawt mai a nia, thil dang a awm lo," a rawn ti leh a, a ngaihna hre lovin Dozer-a lam ka va hawi a, ani erawh chuan hmui phun hian," Nangmah i pawimawh," a lo ti sup a.
"Kan zin ka haw chiah a, kan thleng țêp chauh a ni," ka ti ringawt a, ani chuan," Tunah rawn zinpui rawh u ka ti lo; mahse, rawn zinpui ngei ngei ang che u, ka thih hmain a hmêl ka hmu duh," a rawn ti leh a, chutia thih thu a rawn sawi teh ngawt chu, kan inkâr țha lovin ka chungah khati tak khân duh chhiain min ti hrehawm mah se thih thu êm sawi tùr chuan ka duh teuh lo mai. Ani hi a lo na viau em maw ni le, naktûk lama chhuak mai thei tùr khân Henry-a lah khân a sawi bawk sia.
Rilru nuam takin hun ka hmang hlei thei lo chu a ni, pâwn lamah hlim tak angin lang mah ila ka pa chu ka ngaihtuah chhuak leh țhìn lo thei lo. Chîk taka a chanchin han zawh lah kha, amah ngaihsak deuh anga lan kha ka hreh a ni, a lakah tlãwm ta riau angin ka lang thei a, ani tân lah ngaihsak vût anga ka lan chuan pasal ka nei hi ka inchhîr ta ang leh a ro ît angah min lo ngai thei bawk a, khatiang kha ka duh lo. A ro ka ît lo va, Dozer-a pasal atâna ka nei lah inchhìrna pakhat mah ka nei lo bawk.
Dozer-a pawhin ka awm dàn chu a lo hmu a lo hre ru reng a ni chëk ang chu, nupa zawng pum khat kan ni miau mai a, hai theih bîk a ni lo a ni ang chu," I pa i ngaihtuah viau a nih chuan a chanchin hre chiang tùrin khuaah kal ila, i be chiang ang a," a ti a, naute chu a mal chungah pawmin keiin thuamhnaw ka thlep fel mêk thung a.
"Ka ngaihtuah êm êm hran lo," kei chuan ka lo ti țâlh thung a, ka thil tih lai chàwl meuhin ka pa chu ka lo ngaihtuah leh tawh a lo ni a, ka inthiam lo ru angreng viau. A bulah pawh eng mah ka sawi si lo va, ani lahin min man chiang ropui mai si. Ka va melh a, min lo melh reng tih ka hmuh chuan hawi sawnin," Ih, englo... kan hriat loh hian a thi thut mai ang tih ka hlauthãwng deuh a," ka ti leh ta a.
"Zaninah insiam ila, naktûkah kan kal dâwn nia, nu leh pate hi chu an hlû a nia," dam thlapa a rawn tih chuan," A, chutiang chu... ngai pawh ka ti chuang lo," ka lo ti leh ringawt a, kan zin kan haw deuh chauh a, zin chhuah leh nghãl zawng hna a khâwl tam tawh dâwn asin.
Mahse, a sawi tawh miau a, zànah chuan ka insiam ta tho. Ani pawh chuan min rawn pui ve a," Kal i duh tak tak maw?" ka ti țha leh a, ka pa nèn an inkâr ka hre ve tho a, a rilru a na thar leh ang tih ka hlau a ni.
"Nakina inchhìr taka hun kan hman loh nân hun remchâng kan neih hi bawh zui a țha ngai," tiin min lo chhâng mai a, ka en deuh reng nghe nghe. Ani erawh chuan," Insiam zo thuai ila, mu thuai zâwk teh ang, naktûka i chauh loh nân," a lo ti leh a, a thu chu zàwmin kan insiam zui leh a, kan châm reiin ka ring lo va, zàn hnih khat hâk tùr bâk thuamhnaw pawh ka khung duh lo.
Dozer-a muthilh hnu pawh chuan ka la harh kar a, men erawh ka meng duh bík lo, naktûkah dam chuan Lunglei kan kal dâwn ta chu a ni a, ka pa nèn chuan kan inhmu ngei dâwn, a lo dam țha ang em? Nge a lo chhe viau ang? Min lo thinrim khum ang em? Min rawn biak khân a thih hmaa Lalhlimpuii hmuh a duh thu kha a sawi a nih kha, min tur mai mai em ni ang? A hmuh ngèi ngéi theih nân min sawi țhaihte hi a ni mai lo'ng maw? Mahse, Bawihtei chu a hmuh chãk chu ka ring ve tho bawk a, Bawihtei remchângah hmangin kan inkâr siam țhat a tum nge ni ang? A... ka ngaihtuah peih tawh lo, ka lu a ti na zo dâwn.
Ka pa chu ka hmuh tum ang a lo ni miah lo, a damloh vàng khân a chèr chu ka ring sa a; mahse, ka rin aiin a lo chêr!! A hmain a chêr vak ngai si lo va, mak ka ti hial zâwk. Hetiang khawpa a lo chêr thei hi mak tih loh rual pawh a ni lo, cancer a nih te ka ring rum rum mai.
Zanriah ei hma hretin kan haw a, hmun danga lêng chhuak leh tùrin hun pawh a awm tawh lo. Zanriah kan ei a, lêng chhuak lovin TV kan en mai mai a, Henry-a a rawn lêng a, hlim takin hun kan hmang tlâng a, Bawihtei pawh a hlim khawp mai; mahse, Bawihtei chu a muhìl thuai a, chutia naute ber a muthilh tâkah chuan awm rei vak tawh bîk lovin Dâr 9 : 35-ah Henry-a chu a haw a, keini pawh kan mu deuh nghâl mai.
"Kan inneih hma, ka pain a vau lai vêl che ti mai teh ang, khâng hun lai khân ka pa kha i ngei țhìn ngawt lo maw?" tiin tàwnzau a hâk mawlh mawlh lai chuan ka zâwt a, a mut dâwn hian a kawr hâk lai thlâkin tàwnzau a ha ziah. Mipa hi chu ruak hian an mu mai zêl ni tùrah ka lo ngai țhìn a; mahse, ani hi chu a ni miah lo, chu vàng tak chuan kan zin chhuah rëng rêng hian mutnaa a hâk tùr tàwnzau ka kensak ziah rêng a ni.
"Mipa inngei te chu a!" ka rin loh deuh hian a lo ti a, kei chuan," Eng nge, mi ngei chu in nei ve țhìn tho lo'm ni?" ka ti leh a, ani chuan," Hmeichhe tih àwm táwkah chauh ka ngai," a lo ti leh a, a mutna tùrah chuan a rawn inthawlh zui nghâl a.
"Tlêm chuan i ngei ve tho ang. A, mipa pawhin ngei chu in nei ve lo thei lo, hmêl huat zâwng tak ang chite pawh hi," ka ti leh țâlh thung a, min rawn kuahin," Keimah vànga i tawrh phahna khân min ti thinrim a, ka thinlung a nâ a, tih theih ka nei si lo tak kha keimah hi ka inhaw zâwk a ni, i pa kha chu ka ngei ngai miah lo tak tak," a ti ta a, chu mai duh tâwk lo chuan," Mipa dang rilru chu ka va hre ve lêm lo nain kei hi chuan ngei ka nei ngai lo," a ti leh a.
A tûkah ka pa bulah chuan kan va lêng leh a, tûn țum chu mumal takin min lo be ve ta, a awm dànte chu ka zâwt chiang ve a, dam țha tak ang chuan insawi mah se chiang zâwka a dinhmun a hriat nân inentîr tùra hmunpui lam pan tùr chuan ka hrilh ve a, ani pawh chuan hnial lêm lo chuan 'aw' min pawh ve mai bawk a. Ka nu pawh kan bulah awm vein Dozer-a mai ni lovin kei pawh min be bawrh bawrh a, Henry-a erawh a lo awm tawh bîk lo va, dàwr lamah an buai ve si a, ani ber ni hnih lai awm loh chu a fuh tawh meuh si lo va. A awm lo pawh a hriat vak loh, ka nu hlim takin a nui sâng reng a, Henry-a ai a awh zo viauin ka hria.
Tlaiah loh theih lohin chaw ei tùrin min sâwm tlat a, hnial theih pawh a ni tawh lo. Henry-a lahin min rawn biain a lo haw thlenga lo awm reng tùrin min rawn chah bawk nèn, ka duh vak lo nain Henry-a thu hnial chu ka hreh ve tak zet a, kan awm tlang ta hrãm a ni.
Mahse, ka pa nèn kan inkâr dik ta deuh anga a awm pawh chu țha ka ti ve hrim hrim tawh, kan inbe ve tawh a, min hua ang leh Dozer-a haw tlat ang pawh khân a awm hran lo; an inbe tui tam lo ve hrim hrim bawk a; mahse, kan zin hi ka hlâwk ka inti tawh tho tho, ka rin aiin ka hlâwk daih mai a! Inhmêlma leh inmihran ta hlauh anga kan awm lo hi a țha ka ti êm êm a ni, ani bâk pa ka nei hauh si lo va.
*******
Tunah chuan Bawihtei pawhin kum 4 a hmang chho ve ta, a fel reuh tawh khawp a, naute anga awm pawh a duh tawh lo. A pa kalna apianga zui a tum leh a pain hruai ziah a tum erawh țha ka ti lo khawp thung, ka han sawisêl ve deuh a, awmzia erawh a nei lo viau thung. An inhre thiam pafa nasa bawk si a, pakhat lahin a tlawn thiam over a, pakhat lahin a hmuh loh hlekin a zawng nghâl ruai a, a fanuin a duh a sawi tawh phawt hi chu 'âwlzâw' a ni mai. Keiin Bawihtei chhang tùr ka pai leh mêk tawh a, ka puar țha leh tawh khawp mai a, inchhûngkhura han chêt kual vêl pawh ka harsat chho viau tawh rêng a ni; mahse, ka pasal hi a fel êm mai a, min ngaihtuah êm êm reng a, harsatna lian tham ka nei hran lo.
Nikum khân ka pain min boralsan tawh a, a boral hma erawh khân kan inkâr a fel vek hman a, chu chuan min tihahdam hlê rêng a ni; mahse, ka ngaihtuah lêt hi chuan ka rilru erawh a na ve țhìn. A natna a lo serious viau mai kha a chhanah ka inpuh deuh tlat a, a duh loh zâwng tak khân awm lo ila khatiang khân a natna kha a tuar kher ang em tih ka ngaihtuah chhuak leh țhìn a ni.
Ka pa boral hnuah engkim chu ka nu kutah a awm ta vek a, ka pa boral hnu lawkah ro thil zawng zawng Henry-a hminga a awm chhan kha ka nu vàng a ni tih kan hre chho ta a, Dozer-a ka pan a duh êm êm chhan leh min puih chhan pawh kha Ro zawng zawng Henry-a kuta awmtîr a duh vàng a lo ni nghe nghe. Ka hriat țantirh phei chuan ka âwih ngam lo hial a, ka chunga rilru a put chhiat lutuk ka ring thei lo a ni ber. Ka pa kut ațangin zalènna min pe a, hlimna tam tak ka neih phah a, ka hmangaih ber Dozer-a ka neih theih phah bawk a ni. Hei vàng tak hian ka nuin ka chunga a rilru puthmang nia an sawi chu âwih har ka ti a, ka âwih phal lo rêng a ni, a duhàm vànga in ațanga min chhuah rûktîr nia an sawi pawhin ka huat phah tawh chuang lo, a fapa tân thil țha a duhsakah ka ngai mai.
Henry-a erawhin hêng thil hi a hre ve lo a ni ngei ang, ka chunga a rilru puthmang a ngai reng a, kei pawh a chungah ka rilru a ngai reng bawk. Ani phei chuan," U, lungngai miah suh aw, i nuțâ ka dam chhûng hi chuan mal tak leh eng mah nei lovin i awm lo ang tih hria ang che. U Felfeli nèn in tân in hmun ka dahsak ve ve dâwn che u a, rei lo têah ka tifel vek ang, in tã a nih hunah in duh duhin kut in thlâk dâwn nia, in duh leh in in sa ang a, in duh leh in hralh ang a, ka pa boral tawh mah se ka farnute ensan che u hi ka tum miah lo a ni," tiin min hrilh ve keuh keuh a, la naupang ve deuh mah se a rilru hi a puitling roh a, amah vàng hian ka pa pawh kha rilru dam taka a kal ka ring hial a ni.
Mihring hi kan dam chuan buaina hian kan lo khat tak tak a! Țhiante nèn pawh kan inhmu hlei thei tawh lo, Ruthi pasal neiha Aizawla kan kal khân kan inhmu khâwm hlawm a, khami ațang khân kan inhmu khâwm leh tawh rih lo. Ruatpuia pawhin bialnu deuh reuh chu a nei a nei ve tawh a; mahse, nupui neih zái hi chu a rêl peih meuh lo a ni ang, a la reh tlat. Kawp hi chu a nei ve zut alawm, an chhe lo thei êm êm zui; mahse, a pawimawh ber inneih lam thãwm erawh hriat tùr a la awm thei rih lo chu a ni.
"Dozer, mipa kan neih chuan a hmingah tu nge kan sak ang?" tiin ka han zâwt a, Bawihtei kut tin ka hlehsak malh malh a, ani'n eirawng a bâwl thung a. Bawihtei chuan fiah lo zet hian," Bawihtea," a lo ti ve reuh a, ka nui hawk mai. A pa pawh chu a rawn nui ve a," Ni e, Bawihtea tih ni mai rawh se," a rawn ti ve a, a hnu deuhah erawh," Pateate nupain sa ve tawh se a țha lo'ng maw? Engkima min buaipuitute an ni a," a rawn tih leh chuan ngaihtuah kim hi ka ti khawp mai a, kei chuan ka lo ngaihtuah pha miah lo a nia.
Zàna Bawihtei a tih mut hnu chuan khumah a rawn lâwn nghâl zat a, ka dul puar zet mai chu a rawn chûl zui nghâl bawk. A zan tin tih dàn a nia, mipa kan neih a ring a, kei chuan ka beisei tho nain ka sawi ngam chiah lo, a rin ang hi lo chhuak lo palh ta se, a rilru a down lutuk ang tih te ka hlau ngawt mai; mahse, hetiang lama thu neitu kan ni lo va, lo piang chhuak ang ang hi kan hlimpui leh kan lawm tùr chu ni maiin ka hria.
"Rawn chhuak vat vat se a țha ang, ka hmu châk tawh, ka duat leh nasa dâwn si a," a ti sup sup a, kei chuan," A u zâwk ai pawh hian maw? Hei aia duat lehchuan dàn dang a awm em ni?" ka lo ti a, a lo nui hawk a.
"Duat êm êm sawm hnih dang ka la khâwl alawm."
Fiamthu hi a han thawh ve ngei țhìn a, a inhmeh lo ka ti țhìn nain inhmeh ka ti leh tho bawk a, ani hi chuan inhmeh loh tak tak pawh hi a nei thei lo chu a nih ber hi maw.
"Dozer, i hlim ve em?"
Ka dul a chùl hoh hohna chu ti tàwpin a han țhu a, min rawn enin thutak zet hian," Ka hlimna hi teh theih chhin ka châk!! Ka thinlung rutu nula thianghlim nupui atâna ka nei che hi chu ka lãwm tak zet a ni, a tìr ațanga tûn thleng hian ka la lãwm telh telh chu a nih hi, hlimna tam tak min pe twh a, min la pêk belh zêl bawk a. I bula awm hi engtikah mah ka hné thei ngai lo ang, ka nihna ang anga min hmutu leh min pawmtu, engkim chàn huama min neitu hi ka hmangaih che a, hmangaihna tih thumal a awm chhûng hi chuan ka hmangaih zêl bawk ang che. A lo awm lo ta a nih pawhin hmangaihna awmzia ti lang fiahtu nang hi ka bula i awm chhûng chuan eng mah ka ngai lo ang a, mamawh ka nei ngai lo bawk ang," a ti ta duah a, chutah, rawn bawk hniamin ka hnâr hmâwrah chuan a rawn fâwp zauh a," Ka thinlung Lalnu, ka hmangaih che," a rawn ti leh sup a.
A Tàwp Ta
*MI Ã CHUAN A ȚHATNA DUHA AMAH ZILH ZILHTU CHU A HUAT PHAH ȚHÌN A, MI FING ERAWHIN ZILHNA THU CHU A VAWNG RENG A, HMASÂWN NÂN A HMAN PHAH HLAUH ȚHÌN*
Comments
Post a Comment