☆Mr. BAD (Zawlaidi Neitupa)☆ - 1 By Dingdi Pachuau

☆MR. BAD (ZAWLAIDI NEITUPA)☆ - 1 By Dingdi Pachuau

Kan khaw luh dâwna 'KAN LO LÀWM A CHE' tih ziak mawi zet mai ka hmuh tâkah chuan ka rilru a hlim zual sauh mai. Ni e, kan khua hi thingtlâng mah ni se ka ngai țhìn alawm; hmun dang, khawpui zâwkah leh khaw nuam zâwkahte han awm chhuak ve zawk zawk țhìn mah ila mahni khua hi zawngin zùn hi a lo nei nasa deuh a ni ang e, haw ka châk êm êm reng mai țhìn a ni.

Kan kawtah sumo chu a ding dat a, a din hma khân ka nu leh pate kan kawta an lo ding dùn chu ka hmu daih tawh! Ka haw dâwn tih ka hrilh lâwk sa a, anni pawh an lo phûr ve viau. Fa tlum ber tih takah min duatin ka unau dangte ai hian min ngaihtuah bîk nì te hian ka hre țhìn, a àwm ve tho mai, ngaihtuah hi ka ngai ve êm țhìn bawk a.

Kan exam zo ka haw ve chu a ni a, thaw pawh a veng ve viau. Ka haw nghâl vat thei lo zâwk a, kan upa ber U Puii nau nei ka awmpui leh rih a ni, tûn țum a nau nei chu a fuh vak lo a, damdawi inah pawh a awm rei khawp, ka exam zawh nî tûk takah nau nei tùrin damdawi inah a lût a, ka riah luhpui nghâl a, a chhuah leh hnuah pawh an inah ka awmpui leh char char a, thla khat chuang zet ka awmpui a nih chu. Kan unau hi pathum kan ni a, hmeichhia vek kan la ni zui. Ka u chiah pawh hian nikum lawk khân pasal a nei a, ani hi chuan Lunglei mi a nei thung a, nau pawh a la pai rih lo, a hrisêl lo deuh hlek a, pai a la inzuam chiah lo a ni àwm e.

Zanriah ei hmain ka inbual a, khua a lum a, a nuam kher mai. Ka pain ka haw lawm nân âr thau tâwk tak a lo talh niin, zobuhfai nèn cooker-ah a lo chhùm hluah mai a, Anthûr hnah a thlâk tel kher bawk nèn, a hmui hiang mai a, a rim tuiin chaw pawh ka ei tam kher asin; hetiang hian hostel-ah chuan kan ei ngai ve si lo va, duh aiin ka puar mah mah chu a ni.

Zànah țhiante an rawn lêng ve sap sap hlawm a, khua a țha a, thlang lam bathlàrah țhuin kawng lam kan thlîr a, a țhenin phone an khawih a, a țhen an zâi a, a țhenin ei tùr an siam bawk a, kan indaih teh asin. Nimbu rah mâm țha zet zet kan lo nei hlauh a, chu chu thak zetin kan bâwl a, a tui si, a thak bawk si, kan ei zo chu kan sî hluam hluam hlawm a.

A hnuah Wai Wai an rawn ken chu kan siam leh a, ei hi chu kan thei ve hlawm a ni. Ei pah chuan kan titi a, kan nui pah bawk a, chutih lai chuan kan thlang lam kawngah chuan tlangvâl rualkhat ni ngei tùr hi an rawn țawng chho nawk nawk a, rui aw pàwr zet ri kan hriat tâkah chuan kan titi lai chu khuavàng kal lai ang maiin kan ngawi ta țhap a, chu pa lah chu a han inhrosa nasa khawp a; mahse, a țawng hriat chian fak theih erawh a vâng thung. 

Zàwi tê hian," U Laltea a nih chu, a rui hi a nawi ve thei chiang e," Rini chuan a ti sap a, a piah chiaha țhu Ruatpuii chuan," Chu chiah chu! A ruih tawh hi chuan ngam loh pawh hi a nei lo, zu rui hi zawng, an hahthlâk a ni, an au vak vak loh leh mi cho tùr hi an zawng em maw ni tih tùr an ni," a lo ti ve leh a, ka thin a phut nasat avàngin kei chu ka țawng chhuak ve ngam teuh lo mai! Ka âwm ka dawm ngar ngar a, ka thin phu nasa lutuk chu ka dawm bet a ni deuh ber mai. An kal liam hnuah chauh thâwk pawh ka thaw chhuak ngam a ni, min haua min àn khum pawh ni si lo hian zu rùi hi chu ka hlau êm êm ziah; ka sim thei lo a ni ber mai. An liam hnuah erawh kan thla a muang zui nghâl a ni ang, kan ri mam mam nghâl a, țhiante bulah hi chuan sawi tùr hi a lo tam deuh a ni ang e.

"Nunui a lo haw tawh bawk a, kumin chu lo kan zawh nîah in lo kal vek dâwn nia, talh tùr broiler âr pawh pathum lai ka vulh mêk," Mampuii chuan a rawn ti a, Rini chuan," A ni maw? Awi, a châkawm tawh tawp! Engtik vêlah nge lo zawhna chu in siam theih ang?" a lo ti vat a, ani chuan wai wai hmawm zauh pah chuan," Hnuhhrâm kan thlo zo țêp a ni tawh a, a thual tàwp lamah hian a ni ang chu, a nî tak tùr ka la hre chiang lo, kan la inhrilh leh dâwn nia," a lo ti a, Rini chuan," A va la rei dâwn ve!" a lo ti a, kei pawh chuan," Ni ngawt tak mai! Chutih hunahte chuan ka awm leh tawh tawp nâng! Ka awm lai hian siam mai ula," ka lo ti ve a, Mampuii chuan," Chutiangin duh hun hunah a siam theih ngawt hleih nem. A, kumin chu zir zawm lo mai rawh, i zir sâng tawh tho, kan țhianhoah chuan i zir sâng ber tawh a nia, lo zawh nî chu a nuam thei si a, i lo tel loh chuan lèn lai chân i ni mai," a lo ti leh a.

Țawng muang ber Hruaii chuan," Hawh u, kumin kher hi chu lo zawhna hi siam sup sup ang u, a nuam ve chiang si a, chhûngte dangin siam an rawt loh pawhin kan țhianho tal hi chuan siam tum ang u," a lo ti ve chuar chuar a, mi dang dang pawh chuan," Ni e, ti ngei ngei ang u. A nuam ve alawm. Awi! Ka châk tawh! Hun ral vat vat se," an lo ti ve sap sap hlawm a. Kei hi lo zawhnaah vawi khat mah ka la kal ngai lo va, an chãk thu an sawi sap sap avàng chuan ka lo châk ve viau ringawt, result chhuah hnuah a nih hmèl si a, ka tel hman kher chuan ka ring lo. Thingtlâng mi niin lo nei kum tin ve țhìn mah ila kei hi chu hmun dangah lehkha zira ka chhuah daih țhin avàngin fehna hun ka nei ve ngai lo va, Vaimîm leh Fanghma, thlai tih vêl phur erawh chuan ka kal ve zauh zauh tawh thung.

Kan khua hi Lunglei ațanga 30 km vëla hlâa awm a ni a, thingtlâng khua tih takah in pawh kan tam lo, 200 deuhthaw chu kan ni ve a; mahse, thingtlâng khua a nih angin chhûngkaw tam zâwk hian kum tina lo neih hi kan la bànsan thei lo, huan nghet nei chu kan awm nual tho nain lo neih hi kan thisenin a lo țhan hnan tawh a ni ang, kum tin hian ram kan la vât ruih ruih ziah. A țhenin buh leh thlai an chîng a, thlai bâkah sawhthing chìn hi kan uar hlê bawk. Keini pawhin kuminah kan chîng leh a, chîng tam ngai lo ta chu, kan ngah ngai lêm lo va; mahse, ka pa hian a bànsan hlei thei lo, thawhpui tùr mi dang kan awm ve bawk si lo va, sawhthîng ni se a hralh țhat theih loh țhìn bawk nèn, chîng tawh lo tùrin kan hrilh ve nasa țhìn; mahse, nuam a ti tlat a, a chîng ziah tho. Kumin erawh inthlan kum a nia, to ve taka hralh theih chu kan inring ve chu a nia, eng tak ang ang maw. Mi dang pawhin kum dang ai chuan an chîng äm a, ka pa pawhin kum danga a chìn zât lêt zet chu a chîng ve ngei, hlawhfa nèn a țang a, 'A thual' a thlo zo leh tawh!! Nakinah vawi hnih khat emaw chu a thlo leh ang chu. "Sawhthîng chu hnimin zàr lo se a țha bîk," a ti ve ziah a, hnuh pawh a kuai hma a, miin a hrâm an la thlawh zawh loh laiin ani hi chuan a thual a thlo zo leh diam tawh a ni. Lo hi a dah hnim hman ngai lo, a thlo reng hi a ni mai.

B.Com chu First-ah ka pass ve hlauh mai a, kan lãwm khawp mai, ka lo inrin dàn chu ni deuh tho mah se a tak a han nih chiah chuan a làwmawm zual bîkin ka hria. Ka marksheet ka hmuh phei chuan ka lo Distinction teuh khawp mai a lo ni a, mark tlêm tê chauhin ka lo phâk lo va, a uiawm duh khawp mai.

Mampuii khân min țawngchhiat ka ti dâwn nge ni, zirna chhunzawm leh tuma ka inbuatsaih ve lai takin vànduaithlâk takin kan in bul step-ah ka nu a che sual ta hlauh mai a, a insawh na deuh a, school pawh kai thei lovin a bawksawp ta ringawt mai, ka kalsan daih chuan ka pa nèn ringawt an ni dâwn si a, chu chu ka ngai ngam lo va, ka kalsan thei ta lo a ni. Ka nu erawh chuan ka chawlh chu a remti miah lo va, kan inhnial bap bap nghe nghe. A hnuah erawh chàwl lova IGNOU-a zir zawm ka sawi avàng chuan min hnial chhunzawm ta lo va; mahse, a rilru erawh a hmin zân lo tih chu ka hre tho.

Ka nu school kai thei rih hek lo le, a ai chu ka kai ta a, nuam erawh ka ti hlawl lo. Primary naupang an ni bawk si a, an bengchhen deuh châng phei hi chuan ka thaw a ipik hluah hluah. Lo zir chhuak pawh ni ila zirtîrtu nih hi chu ka tum lo hulhual a ni tawp mai, a hna erawh a zahawm ka ti a, an mawhphurhna pawh a sâng ka ti a, an dawhtheiin an ngaihsànawm ka ti bawk; mahse, kei hi chuan ka tlin loh tùr chî hna a ni tih ka hre chiang a, nih pawh ka tum hek lo.

Kumin chu fùrin a awh rei ngang mai, 'Ber' thlaah pawh July thla ang maiin ruah a la sûr tluk tluk mai a, zîngah nî han chhuak țha ve viau mah se chawhnu lamah hi chuan a rawn sûr leh țeuh țhìn. In bul pawh tih fai a ngai ngun viau mai, fùr a rei deuh hi chuan thingtlângah zawng in leh a vêl a hnim chak si a, hmuh a nuam lo țhìn ka ti.

Kan khuaa awm ve ta reng chu, lo zawhna an siamah pawh chuan ka kal ve thei ta a; mahse, school chàwl meuha kal ka hreh ve sî avàngin Mampuii chuan an lo zawh hun tùr chu sawnin Inrinniah an tih phah ta nghe nghe a ni, min dah pawimawh thiam ka ti a, min ngai pawimawh der chu hlû ka ti hlê a, ka làwm hlê laiin lehlam takah chuan inthlahrunawm erawh ka ti viau thung.

Khua a țha a, zia ka ti tak tak a ni, nizànah tlêm chu a tla ve a; mahse, tukinah ni chhuak a țha a, vawiin chu sûr lo tùrah ngai ang. Kan phûr hlawm khawp a, kan țhianho bâkah Mampuii u U Vid-ate țhianho nèn kan ni a, mi sàwm chuang lai kan nih chu. Talh tùr broiler âr lian leh thau tak pahnih kan keng a, thil dang mamawh tùr chu mipahoin an keng vek a, a țhen an kal hmasa nghe nghe a, min àwl hneh khawp mai.

Mampuiite lo chu kawngpui ațangin a hla lutuk lo va; mahse, kawng thlang lama awm a nih vàngin haw lamah chhoh ve deuh ngar ngar chu a ngai dâwn thung a ni; mahse, a huho hi chuan a nuam a, hah pawh ka hre bîk lo tùrah ngai ang. Kawng tluanin kan titi barh barh reng a, kan bula kal ve U Mawitea leh U Valpuia chuan țawngna hun pawh an nei lo, kan tlàwm hneh viau a ni.

An lo chu a lo zau khawp mai a, buh hmun niin a țha hlê a, a hring dup bawk si a, hmuhnawm ti takin ka thlîr kual a, a mawiin a lunglènthlâk ka ti ve tawp. Thliin a han chhèm deuh phei chuan hmuhnawm ka ti zual, buh hmun kan nei ve ngai lo va, hetiang tak hian a lo mawi tih ka lo hre lo a ni.

Thlâm lian țha tak kawt leh a chhehvêlah chuan pangpâr a lo pâr chuai a, Zàmzo, Derhken, Chuailo leh Sâp-pangpâr kan tihho kha a lo inpàr pawlh chuai a, mit a tlai a, a mawiin hmuh a nuam tak zet a ni. Thlâm an sakna hmun lah chu a remin a thengthaw nuam khawp mai lehnghâl, ni sa hnuaiah pawh chuan thlifîm a thaw heuh heuh reng a, a chhûnga han luh chuan namthlâk an lo hawng dar vek tawh bawk si a, a nuam reuh tak zet a ni.

U Vid-a chuan," Hmeichheho kha chuan hlo thlawh ve pawh a ngai lo ang, thlâmah lo awm mai mai ula, lo awm hahdam mai mai rawh u, zîm tê bâk thlawh tùr a awm tawh chuang lo va," a ti a, Mampuii erawh chuan," Tihchi nâng, Nunui kan fehpui ve êm êm a, a thlawh ve loh te chuan, lo zo a ni thei nâng, kan thlo ve hlek ang," a lo ti thung a, kei pawh chuan," Ni e, lo zo tùrin kan kal ve êm êm a, kan thlo ve bawk ang chu," ka lo ti ve a.

Chutia kan tih tlat avàng chuan mipahovin thingpui sen hâng an in zawh hnuah chuan hlo thlo tùr chuan kan inzui chhuak ta thliai thliai a, thlâm piah deuh hlekah chuan thlawh zawh loh zîm tê hi an lo dah ve hlek a, mipa an chak hlawm bawk a, rei lo têah chuan kan zo ta thuai rêng a. Rini'n a phone lek chhuakin thlâ a la kual a, video-in a la tel bawk a, fiamthu thawhin a zai pah bawk nèn, a zai nalh fahran si lo va, kan nui khêk rawi rawi mai.

Mipain eirawng an bàwl laiin a țhen an lo zai a, tui chawi pâwl kan awm bawk. Vawiin chu kan indaih tak zet a ni, kei tui chawi pâwlah ka tel a, tui khawh thla teu teu chu plastic bûrah kan dawh a, tui chu a fîmin a vâwt raih mai si a, in a châkawmin a tui hmèl bîk hliah hliahin ka hria.

U Vida'n," Nunu, in hah tawh ngawt ang. A tâwk tawh kha, kal tawh suh u," a rawn tih chuan U Valpuia pawh chuan," Ni e, duh tâwk tawh rawh u, chhùnna tùr pawh a awm tawh loh kha. A țùl tâkleh, mipahovin kan châwi ve tawh dâwn nia," a lo ti ve a. A ni lah tak a, tui chu chhùnna tùr a awm tawh lo va, Feli nèn chuan kan plastic búr chu hûng țhain thlâm hlìma țhute bulah țhu zui ve nghâlin hmarcha ràwt tùr chu kan thenpui ve nghâl zat a. Anni chuan," In hah àwm tehlul nèn, lo țhu mai mai tawh rawh u," an lo ti a; mahse, kan tihpui lui tho a.

A hot zualpuiin woofer an ken chu an play dum dum a, eirawng bâwl pah chuan an lâm tak ang dâwrh dâwrh a, an lâm uang vêl chuan ka nuih a tizã a, awmhmunah ka lo nui ka lo nui mai. Chhùn thingpui hmeh atân Mampuii nu Nu Zotei'n zochhang kan a lo kentîr diam bawk niin, thingpui sen thlum țha tak mai nèn chuan kan hmeh a, mipaho chuan an ei țha duh vak lo," Chaw ka ei tam thei lo ang," an ti deuh tlat a, kei erawh chuan ka ei țeuh thung.

U Vid-a remti lo chung chung chu Mampuii nèn chawhmeh hawn tùr kan zawng kual ve a, U Vid-a remtih loh chhan pawh," In hah mai mai ang, nakinah mipa ngal chak zâwkin kan zawng dâwn nia," a ti a; mahse, kan kal lui tho. A châkawm ve a, a nuam ve hrim hrim ka ti a ni.

Thlai lawh tùr pawh ka rin aiin a lo la tam daih! Mahse, thlai kûng a tam hrim hrim a, a kûng a tam na nâ nâ chuan a rah pawh a tam lo thei lo, ka iptepui ah chhuah pawh chu a khat thuai ta rêng a, nuam ka ti, a țhen phei hi chu chaw ei huna hmeh atân pawh an duh ngeiin ka ring. Ka țhiani pawh chuan a ipte ah chu a lo lo khat ve tawh bawk a, dahna tùr awm tawh hek, duh tâwkin thlâm lam kan pan zui ta a.

Thlâm thlen hma deuh ațang chuan woofer an play dup dup rî leh an râk leh teng tung rî chu kan hre phâk a," An lâm leh tawh a nih chiah chu!" Mampuii chuan a han ti a, Rini aw pawh a hriat chian theih hlê a, a lâm leh nasa a ni ang, an thãwm ațang chuan a nawm hmèl dup dup viau. Thlâm bul kan thleng chu Rini'n min lo hmu pek a," Awi, in iptepui puar tâwk nèn khân in inhmeh tawp, thlâ ka lo lâksak teh ang che u," a lo ti a, kei chuan," Ho mai mai!" ka lo ti ve thung a; mahse, ka thil sawi ve chu eng mah lo mai a ni, min la nuih kur kur zui. Mampuii chuan," Nunui feh lai thla lâksak a khât êm mai tiraw? Thingtlâng nula ve tho alawm a nih, hmehsak țeuh rawh," a lo la ti ve zui a, U Vid-ate țhianho pawh chuan thlâm chhûng ațang chuan lâm pahin min lo fiam ve zuk zuk bawk a, ka sen ap apin ka ring.

Chaw ei hmain mipa țhenkhatin chawhmeh hawn tùr chu an han vài khâwm ve leh a, an rawn ak haw leh țeuh tho. Kan bun khâwm a, hmun sàwm pahnihah inang tlâng taka chhep hrang diat diatin tu mah chang lo bîk leh chang tam bîk kan awm lo, an tih dàn chu țha ka ti reuh tak tak a ni!

Mipain chaw ei an han siam a, an bâwl tui ngang mai, sawhchiar ngei mai chu tui ka ti lutuk, a hmui tui si a, a hnuah phei chuan chaw leh chawhmeh dang pawh ka ei ta lo, sawhchiar ka ei tawhah chuan a la tui ber hialin ka hria.

Lem sek tùr an lo keng a ni chêk ang chu, chaw ei khamah woofer an han play leh a, an hot hlawm khawp mai. U Vid-a takngial pawh a lâm ve zak zak a, Mampuii lah chuan a nuih nghek nghek zui a, hmeichheho chu tu mah kan lâm ve lo, kei phei chu pâwnah chhuakin pangpâr thlâ ka lâksak daih a, rùi deuh chu an awm hran lo nain an bula awm nuam ka ti lëm lo, ka nèl deuh pawh zu rim an nama an rùi nia ka hriat chuan an bula awm hi ka țih deuh tlat zêl.

Ka puar deuh bawk a, haw kawngah ka duh aiin ka hah!! Kawng chho chu thui lo mah se ka hah tâwk êm êm tho a, ka hnârah ka thaw a lêng lo, titi ve phei chu khawi lamah, ka kain ka thaw hlu hluam a; mi dang erawh chu an titi chho char char thei a nih chu. Kawng zâwl chin kan thleng chu ka thaw nghâl huai huai mai, kan din deuh dat lai chuan ka kea Vangvat sei țial khâp kual vêl chu ka hmu thut a, inthunun hman lo lêkin ka țê chhuak nghâl vak a, ka  che sawn ngam tawh lo! Ka mit ka chhîng zui nghâl daih bawk.

"Ka la tawh e," ti ri ka hriat chuan ka meng chhuak ve chauh a, ka hlauhna rilru erawh a la reh lo. U Valpuia lo niin, a kut chu lek kängin a mitko a sãn zauh a, thingah a kut chu tâtin a chem kawm chuan a sât thi zui ta nghâl a, ka ke ka en chuan a lo awm tawh lo tak tak! Mahse, ka thin chu a la phu rang reng tho.

A hnuah chuan min fiam zui ta a, Rini pekin," I țè dàn," tiin ka tih dàn chu a han zir a, ngei deuhin ka melh ka melh ringawt. Huat theih a ni bawk si lo, zahthlâk ka ti ve tho asin le, ka hmuh thut vàng vek a ni.

A tûk inkhâwm bànah pawh chuan țhiante chuan min la fiam zêl a, eng tin tin emaw thu dang an phuah belh a, àwm ang zet zetin an phuah bawk si a, ka nuih a za kher asin; mahse, nuihza ber bera țan ka duh loh vàng chauhin nuih ka insûm a ni.

"Chhanchhuaktu ropui U Valpuia," Mampuii chuan a han ti a, rang zet hian Rini chuan," Pasalțha U Valpuia zâwk alawm," a lo ti vat a, chutah," U Valpuia chêt dàn," tiin a han uang kual leh a, kan nui dar dar a. Muang cherh chawrhin Hruaii pawh chuan," Superman U Valpuia a lo che rang hlê a ni," a lo ti ve bawk a, an chimawm thiam bawk si a, nuih hi an ti za thei a nia, an bulah hi chuan inhmuam ûp hi a har ve thlâwt.

"Hmanlai hian thingtlâng khaw pakhatah hian a changtupa leh a changtunu hi an awm a, lo zawhnaa an haw kawngah a changtupa chuan a changtunu Vangvat kài chu a lâksak a, chuta țang chiah chuan an inkârah hmangaihna a lo piang chhuak ta a... Vangvat chuan mi pahnih inkârah hmun pawimawh tak a chang ta a, a hnuah phei chuan Pathian biakin an be dùn ta nghe nghe a," tiin dak-lar tih takah  Rini chuan a han ti zat zat a, kei tih loh chu an nui leh ta vak vak a," A va han romantic tak! Vangvat hi thah tawh miah loh tùr, a lo pawimawh êm mai," an ti a, pum dawm meuhin an nui thei nia!

"Over hlawm siah! Ka hlauh tehlul nèn," ka tih ve pawh chuan an nuih a za laklawh tawh a ni ang, an nui tlãwrh tlãwrh reng a, thu tak deuh tak pawhin a sawi theih loh, ka thil sawi apiangah chuan an nuih a za êm êm mai a ni.

*I LAKA BÙKNA KHAI RÊNGTU CHUAN A HRE THIAM NGAI LO ANG CHE, HRE THIAMTU CHE CHUAN I LAKAH BÙKNA A KHAI VE NGAI LO ANG*