☆Mr. BAD (Zawlaidi Neitupa)☆ - 2 By Dingdi Pachuau

☆MR. BAD (ZAWLAIDI NEITUPA)☆ - 2 By Dingdi Pachuau

Kan țhianho hi paruk lai kan ni ve a, miin nula hmuh chuan min hmu ve tawh ngei mai a; mahse, ho ve huat huat tak kan la ni. Ka țhiante hian zirna an chawlhsan hma hlawm viau mai a, chhûngkaw harsatna vànga chawlhsan niin an insawi vek nain a dik vek bîk lo tih erawh ka hria. Mampuii hi a ni lo phawt mai a, a chhan pawh zirna chhunzawm thei lo tùr khawp chuan an khawsak a harsa tlat lo a ni. Hruaii hi a pi leh pu bula khawsa a ni a, a pi leh pute hi an upa ve tawh a, a zir zawm thei lo hi chu a àwm viau, Rini pawh a nuin a nau nèn a hmeithaipui a, ani tân pawh hian zir zawm chu a harsa ve ang. Ruatpuii leh Zmi erawh hi chu an hrisêl lo thei lutuk a, matric kan exam lai pawh khân an damlo ve ve kha a nia, an exam lo rêng a, result pawh an nei ve thei ta lo a ni. A kumleha an kal leh pawhin class pawh an kal țha thei meuh lo, an innat chhâwk ti ila a dik ber ang, zir chhunzawm lovin an bâng ta ngawt nghe nghe a; tunah erawh an zia ta viau, lo lamah pawh hna an thawk bawrh bawrh thei tawh. Chutih rual chuan Zmi hian a lung lamah natna a nei a, tunah pawh hian damdawi a ei reng a, zai chuan a dam thei niin doctor-in a sawi a; mahse, zai dâwn chuan sum a ngai tam dâwn si a, an zaitîr thei bîk rih lo a ni.

Tunah chuan ka nu pawh in chhûng dungah chuan a duh tâwkin a kal kual thei tawh a, step leh kawng chhuk chho deuhah erawh zak dawh tiang nèn lo chuan a la kal thei lo thung, indìm tùrin kan ti nasa a, inkhâwm pawh a la thei meuh lo, kan biak in kawng step a ni miau si  a ni.

*******

"Bawihi, zanin chu mual vénga Pi Zaii damlo kha i va menpui ve dâwn em ni ang? Naktûk sikul kai nî a ni lo bawk a," zanriah kîl laia ka pain a tih chuan," Pa, kan chhûngte an ni em ni?" ka lo ti ve thung a. Ka nu chu a lo tlak karh a," Nang tak hi chu aw... Damlo menpui tùrin kan chhûngte an nih kher a ngai hlei nem, tlàwmngaiin an menpui țhìn a ni ngai," a lo ti charh charh a, ka pa chuan," Zanriah ei kham hian kei ka va lang ang a, ka lo haw hunah i kal ve thung ang a," a ti leh a, kei pawh chuan," A țha alawm, țhiante pawh ka han hrilh ve chhin ang e," ka lo ti ve ta a.

Mampuii ka phone hmasa ber a, ani chuan," A țha alawm, ka sâwm hreh deuh che a, nizàn pawh khân U Vid-ate chu an tlaivâr deuhthaw tawh a; mi dang i hrilh tawh em? I hrilh loh chuan Ruatpuii ka'n hrilh ve nghâl ang e," a lo ti ve zung zung a, ka han be kual zêl a, tlaivàr chu țha an lo ti vek a, ka thaw a veng huai mai.

Kan inah kan innghâk khâwm a, Dâr 9 : 45-ah ka pa a rawn haw a, lêng pawh an la awm țeuh thu a sawi nghe nghe. Kan kal ve ta thuai a, nu leh pa lam chu khawvàr lam arsi zât ang pharh an lo ni tawh a; mahse, țhalai lam erawh chu ka rin aiin an lo tam daih mai thung!

Damlo na ve tawh tak a ni ang tih chu a hriat  nghâl mai a, thãwm pawh an dìm viau hlawm mai. In chu kan khat hneh viau a, fiamthu sawia nui vak vak țhìn kan țhianho pawh chu kan reh ve țhap a, ka han en kual a, kan thutak hmêl hlawm viau chu kan inhmeh lo hi ka tia, kan nih duh loh hmèl viauin ka hria!

Zàn hi ka meng thei lo țhìn khawp mai a, dâr 11 a rawn rîk chuan ka mut a chhuak ru tawh kher mai. Ka khap fak fak tawh mai a, ka țhiante erawh chu mutchhuak hmêl pu an awm pawhin ka hre lo. Chutia ka mut a chhuah rûk viau lai chuan pindan lamah chuan thãwm a rawn awm deuh hluai a, damlo fate leh chhûngkhat hnai deuhte ni àwm tak chu an che nghâl suau a, 'a zual deuh a ni ang a' tia kan inbiak rûk ser ser lai chuan țap thãwm a rawn awm ta, Pi Zaii chu a kal ta a ni tih rinhlelh rual a ni ta lo.

Kan che ta sung sung a, tlangvâlin an pindan bang an țhiat a, nulahoin an bungrua kan lo dah fel bawk a, hmun pawh phiat pâwl an lo awm bawk, a țhut theih tawh loh. Tlangvâl țhenkhatin YMA țhutthlèng an rawn put luh belh a, buai kârah țap rî hriat tùr a awm reng a, rei vak loah mitthi dâr a rawn ri zui bawk. Damlo menpui tùra kal khân mitthi kan lumen dâwn ta zâwk a ni.

Tunah chuan ka mut pawh a chhuak tawh lo, ka harh hrâ tawh mai a, ina haw kan ngai tawh lo bawk nèn, tui kan in hnuah in chhûngah chuan lût lehin kan țhu a, kohhran upa pakhat a țawngțai a, chumi hnuah chuan kan zai țan ta nghâl a. Zài kârlakah YMA hruaitu leh mitthi chhûngte lam ațangin thu sawi tâwi tê tê kan ngaithla a, mut pawh a tichhuak lo deuh.

Zîng dâr 3 rîk hma hretin ei tùr an rawn sem a, rawn semtute zîngah chuan U Vid-a leh U Mawitea pawh an rawn tel ve nghe nghe. U Vid-a hi chu a tlàwmngai viau țhìn tih ka hre chiang a, nam sek châng nei mah se YMA hnatlâng leh thil tihnaah hian tlàwmngai ber pâwlah a țang ziah tho, tlangvâl țha leh ruihtheih thila fihlîm tam tak hian an tluk teuh lo tih ka hria a ni, a mawng hi a zãng ve tlat.

A hnu deuhah ei siam leh thingpui lum tlangvâlte an rawn lût ta vek a, in pawh kan khat ta hial a. Kan hmaah tak U Vid-ate țhianho chu an rawn țhu a, zài pàwng pàwng chu a nuam duh bîk miah lo, kei phei chu kan vêng mitthî-ah ka tlaivàr vawi khatna a ni lehnghâl a, mi chezia chu ka ngaichãng leh ràn rán țhìn. Lehkha zira ka awm chhuah daih țhin avàngin mitthi ina nula chêt dàn tùr chu ka la hre chiah lo va, ka țhiante tih ang chuan ka che ve mai a ni.

Dâr 5: 30 vêlah nu leh pa lam an rawn kal tam deuh tawh avàngin țhalai chu kan chhuak ta thliah thliah a, keini țhianho chu haw tùr pâwlah awmin chaw ei kham lama che tùrin kan kal leh dâwn a ni.

In ka thlen veleh ka khumah bawk thlawpin ka muhìl zui thuai a, phone rîin min tihharh chuan dâr 9 a lo pèl tawh a, thoin ka inphih harh a, ka nu leh pate chuan chaw an ei tawh a lo ni, ka han ei ve sawk sawk a, chumi hnuah inbualin ka insiam a, mitthi ina thingpui lum tùr chuan țhiante nèn kan chhuak leh ta a.

YMA hun tàwp zàn thleng chu kan kal ve țhap țhap a, hla ka hriat phah bâkah nula tlangvâl chêt dàn leh thil nihphung ka mit ngeia hmuin ka hre thar țeuh bawk. Ka nu leh pain chaw ei laiin mitthi ina nula awm dàn tùr leh chêt dàn tùr min hrilh nasa bawk a; țawngthu chhe lovah, mitthi dang kan neih leh hunah chuan chét dàn tùr ka bangbo viau tawh bík lo ang.

Thingtlâng khua mah ni ila țhalai kan tam ve a, la tuai ve deuh ațanga senior ve tak tak thleng kan awm ve țeuh mai. YMA hun chhûngah na nâ nâ chuan khawhar inah pawh kan khat țhap reng a, tlangvâl in riak ni se mutna tùr leng lo khawp riah luh tum kha an ni a; mahse, hruaitute'n riak tùr zât an bituk tawp a, hotute thu pawh kan la áwih țha viau ka ti. U Vid-ate țhianho pawh riak zîngah chuan an tel ve a, kan țhianhoa kan haw țhìn chu tlangvâl dang lakah min ngaihtuah deuh nge ni, min thlah haw ziah, vêngtu kan nei țha khawp mai.

"U Vid, engati nge min thlah haw ziah a?" Zmi'n a tih chuan," In mãwl hlawm si a, tlangvâlin an hruai pèn daih che u kan hlau alawm," tiin a lo chhâng a, Rini chuan," Âwihawm loh lutuk! Engah nge min hruai pèn ngawt ang? Kan kêk hrep mai dâwn alawm, a nih loh pawhin kan au vak ang a... Min vêng leh lutuk a, chhe lo deuh hlek pawh kan kalpui thei lo chu a nih hi," rang zet hian a lo ti vat a, kan lo nui hawk hlawm a. U Vid-a chuan," Mipa rilru in la hre chiang lo êm mai, vèn in ngaih hun lai tak a nih hi," a lo ti leh mai a, a bula kal ve U Valpuia chuan," Dik chiah," a lo ti ve a.

Ka nu pawh tunah chuan sikul pawh a kai ve thei ta, kei chu in lamah awmin lehkha ka zir țhìn a, ka zir zawhah in ka ti fel chhunzawm leh mai țhìn, ka pa erawh chuan a hna ngai a zawm leh tawh a, sawhthíng hmun a thlo fai leh vek tawh a ni. 

Kan khuaah hian High School thleng zirna a awm ve a, thingtlâng khua a nih angin sawrkâr hna nei chu awmthei pâwl kan ni mai a, keini pawh hi ka nu zârah awmthei pâwlah kan awm a nih ve chu; kut hnathawh lamah a mimir hian an taima a, kut themthiam an lo tam ve tho bawk nèn, thingtlâng khaw dang ngaihtuah chuan in leh lo kan nei țha hlawm viau, lehkha zir sàn lamah erawh duh aiin kan hnufual deuh, zirna kan la ngaisâng tâwk lo deuh ka ti țhìn.

Zàn khat chu lehkha ka zir laiin ka pain," Bawihi, lo chhuak lawk teh," a rawn ti a, ka indah fel sawk sawk a, ka pindan ațanga ka va chhuah chuan college-a ka zirpuite pahnih, Mala leh Ruatsaka chu ka va hmu zui ta nghâl a, ka nuin țhutkhâwmna pindanah a lo țhutpui a.

"E, teh tlat che u chuan! Eng nge in rawn tih ve teh tlat a?!! Engtikin nge in rawn kal?" ka va ti nghâl bawrh bawrh a, anni chuan Lungleia an chhûngte tlawha an rawn kal thu sawiin," A remchâng êm a, kan rawn tlawh ve nghâl che maw le," an ti ve a.

Ka nu leh pate chu hmêl hriattîrin an hmingte chu ka sawi nghâl bawk a, thingpuite ka lumsak a, kan titi zui ta reng a. An felin an țawng duh a, an hawihhâwm a, ka nu leh pate pawhin an be ve reng mai. Hre chhuak thutin an awm chin tùr ka zâwt a, zàn riak lova haw leh nghâl mai an tum tih ka han hriat chuan," A va mak tak! In hmanhmawh viau tihna em ni? Zàn khat tal chu riak ve ula, in rawn kalna a hlat tehlul nèn, hetah in riak ang a," ka han ti a, ka pa pawh chuan," Ni e, riak ve mai teh u, zanina in haw leh chuan in ngaihtuahawm dâwn êm mai," a lo ti ve a.

"Riah pawh chu a țhat viau rualin naktûk lamah thil zawn tùr kan la nei a, hnim chi khat a nia, hêng laiah hian a awm ve mial ang em le?" Mala'n a tih chuan," Eng chu maw?" ka lo ti vat a, Ruatsaka zâwk chuan," Englo... ih... Kèl-an an ti em maw ni ta kha le? Hnim a nia, Kèl tih chu a tel," a lo ti a, a ngaihna hre lo tak chuan ka en a, Mala pawh chuan," Nia, a hmingah Kèl tih chu a tel chiang a, ka theihnghilh kha ka hlau rêng a ni. Kèl-bâl nge ni, Kèl-an an ti zâwk ni kha aw?" a lo ti ve leh a. Ka nu chuan," Kèlba-an a ni lo maw?" a lo ti a, anni pahnih chuan," Aw, chu chu," an lo ti rual țhawt a, an inen a, za tak hian an nui a.

Zàn chu an riak ta a, a tûkah ka pa nèn kan paliin kan huanah kan kal a, Kèlba-an chu kan va zawng a, kan hmu țeuh mai a, an làwm hmèl kher mai. Làwm thu an sawi mawlh mawlh reng a, hàwnah kan sil fai leh vek a, Rambo polythene-ah kan khung a, an inbual faia thingpuite an in leh tê tê hnuah kan khua chu an chhuahsan ta chauh a.

Ina ka luh hnua phone ka han en chuan Ruatpuii message a lo awm a, ka han chhiar a.

*Mikhual tlangvâl chhe lo deuh deuh pahnihin an rawn rîm che a ni maw? I lo va inzêp thei tak!*  tih hi a lo ni a, kan țhianzaho group-ah a ni nghe nghe. Ka nui sak a, min dem leh peih viau dâwn tih ka hre nghâl mai a, insawi fiah erawh ka tum rih lo, min dem bel leh dâwn tho tho a.

Zàna phone ka han en chuan kan țhianho group chu a lo lùn kher mai, message 300 chuang zet a lo awm niin! An râpthlâk hlawm a nia, min lo rêl leh char char hlawm ang chu.

Ka chhiar chhuak dap a, ka nui ka nui ringawt. Ka rin ang chiahin min lo rël, min lo rël phâr lo chauh tak tak a ni! Ka lang har bawk nèn, ka lan meuh chuan text message mai duh tâwk lo chuan voice message nèn lam an rawn chê a, Malate nèna huan ațanga kan haw lam chu thlâ min lo lâksak hman an lo awm pek a, Ruatpuii bâk a nih ka ring lo, a lo dik chiah bawk.

*College-a ka țhiante, Ruatsaka leh Mala an nih kha, in va ho tak! Ka bialpate chu ni se in hre daih tawh ang chu*    tiin ka han insawi fiah a, Ruatpuii message a rawn thleng nghâl zat a.

*Vawiin khân huanah i kalpui a, in pathum chauhin. A tu zâwk kha nge? Lu buk zâwk kha em ni? I hnung chiahah a kal kha*   a rawn ti țha leh a, mi dang message pawh a rawn lang leh nghâl zut zut a.

Ka type peih tawh lo va, ka voice ta zâwk a.

"Ka bialpa an ni lo ve ve. Vawiin khân ka pate nèn kan paliin kan huanah kan kal, thlalâkah khân ka pa a lang tel lo mai mai a nih kha, mi ina a pèn lawk hlàn a nia. A chiang tâwk em?"  tiin. 

Pathianni inkhâwm bànah chuan ka rethei ngawt ang, ka thu sawi min âwihsak dâwn bawk si lo, min dem rawn leh ang a, chhàn ngaihna hre lovin ka nui leh ringawt mai a ni ang chu.

Ka ngaihtuahna hi chu a va thleng dik țhìn tak. Pathianni nkhâwm bàna Mampuiite ina kan han lût khâwm chu min han dem țan nghâl a, a hma chuan an sawi chhuak duh miah lo, a them pawhin. An lo inthurual leh vek tawh a ni chiang mai.

U Vid-ate țhianho an rawn luh ve pawh chuan an thil sawi chu an tàwp duh chuang lo. U Vid-a chuan rawn hre vein," Tute'n maw Nunui chu rawn lènchilh a?" a rawn ti ta. Anni lah chuan nuamti zet hian an lo chhâng rual dial dial hlawm tak a, an ngeiawm a nia.

"An va ngeiawm hlawm dial dual tak!" ka lo ti a, an nui sûng hlawm lehnghâl a, U Vid-a chuan," Eu, chu Aizawl lamah pasal min la neihsan daih dâwn a ni maw?" nui chung vêk hian a lo ti ve leh a, ka zak bawk si a, chhàn ngaihna hre vak lo hian," Teuh lo mai!" ka lo ti ringawt a.

"Kan phal teuh lo mai!" kan piah deuha țhu U Valpuia chuan a lo ti fiamthu ve a, Rini chuan," U Valpui, chutia i phal loh rau rau chuan ih, nangmah hian bêm daih la, chuan, in innei ang a, kan khua ațangin pasal a nei chhuak lo tihna a ni mai ang a," nui duh miah lo hian a lo ti vat a, ani pawh chuan," Ni mai e," a lo ti ve leh a, lo inrawlh ve lêm lovin an thil sawi ngaithla chuan ka lo nui mai mai a. 

Chumi zànah chiah chuan U Valpuia hnên ațangin message ka dawng zui ta chiah mai, mak ka ti nasa! 

*Nunu, Valpui ka nia, i hmêl țha ka ti aw*  tih tê chauh hi a lo ni a, mak tiin ka chhiar leh a, ka nui ringawt. A number ka nei sa miah lo; mahse, a hming a rawn sawi lan ațangin mi dang a nih ka ring lo ve ringawt, U Vid-a țhianpa U Valpuia ngei kha. Chhàn pawh tum lo chuan mak ti takin a message chu ka en reng leh ringawt a, mak ka tihna chhan pawh kan inbe țhìn pawh a ni lo va, U Vid-ate nèn an inkàwm țhìn a, kan inhmu fo azeng pawh a ni lo. Bâkah,   a tih tak tak pawh ka ring chuang lo, hmêl țha min ti tùr pawhin min thlêk ngun ngai lo va, min en liam ve mai mai, a țhianpa nau țhiannu ka nih angin, fiamthu tal pawhin U Vid-ate bulah min rawn message chungchâng chu a lo sawi ang tih ka hlau, min fiam leh ang a...

Ngaihtuah zui duh lo chuan lehkha ka zirsan a, ngaihtuah zui lêm lo ta chu ka theihnghilh zui thuai rêng a; mahse, Pathianni inkhâwm bàna Mampuiite ina a hmêl ka hmuh leh chuan message kha ka hre chhuak zawk a, zah deuh tlatna leh hmuh hrehna, nuam tih lohna riau ka nei zui ta nghâl bawk; mahse, ani erawh chu kan lam a rawn hawi lo hlauh a, ka awm chhûng chuan rawn hawi lo se ka ti viau bawk.

Chutia hmuh ka hreh ta deuh tlat chu hrehawm ka ti, eng nge, hmêl țha min lo ti ve a ni mai a, eng nge pawi viau? A làwmawm daih zâwk alawm le, hmêl chhia min ti ngawih ngawih ang tih a hlauhawm záwk daih sia...

Mahse, nuam ka tih phah chuang hauh lo, rilru nuam takin ka awm thei chuang miah lo va, min rawn en hlauin ka awm reng a, chhûngrilah ka țang țùng a ni zâwk ang chu, a va'n nuam lo tak! Message kha min lo thawn kher lo se țha tùr hi a nia.

*HRINGNUN HI CHU LEHKHABU BUNG HRANG HRANG, INDAWT CHHO ZÊL ANG HI A NI A, BUNG ȚHENKHAT A HLIMAWM VIAU LAIIN ȚHENKHAT ERAWH A LUNGCHHIATTHLÂK VIAU THUNG A, A TÀWP KAN CHHIAR THLEN HMA CHUAN HMA LAMAH ENGIN NGE MIN LO HMUAK DÂWN KAN HRE HAUH LO*