☆Mr. BAD(Zawlaidi Neitupa)☆ - 3 By Dingdi Pachuau

☆Mr. BAD( ZAWLAIDI NEITUPA)☆ - 3 By Dingdi Pachuau

Message a rawn thlen thar apiangin U Valpuia hnên ațangin a nih ka ring țhìn a; mahse, a lo ni lo hlauh zêl a, ka thaw leh huai țhìn. A châng hi chuan min rawn thawn leh se ka ti zâwk em ni le tiin ka inzâwt fo a, a dang min rawn thawn leh azeng pawh a ni lo va, a message pakhat tê khân min tibuai zo vek ni maiin ka hria. 

Mala pawhin Kèlba-an an hawn kha a nutei'n a ngeih țan viau dâwn nia a hriat thu min rawn hrilh ve a," A làwmawm hlê mai, lo ngeih zêl rawh se," tiin ka lo chhâng ve a, ani chuan làwm thu rawn sawi leh pahin," I nu leh pate kha an fel sia, in khua lah kha nuam ka tih riau chi a ni bawk a, hman remchàn hunah la rawn zin leh ila a țha ang," a rawn ti a, kei chuan," E, rawn zin leh rawh u, mikhual hian nuam an ti ve viau țhìn a nia," ka ti ve leh a.

"Mahse, ka rawn kal leh a nih chuan thil eng emaw tê tê hrilh che ka duh dâwn a, chuan, beidawnga haw loh hrâm ka duh bawk ang a," a rawn tih leh chuan," Rawn kal leh rawh u, kan lo mikhual ang che u," ti daihin ka chhâng a, a thil sawi dàn chu ka hre thiam deuh ruak si a, a kâ ațangin chutiang thu chu a la chhuak ngai si lo, chhàn dàn tùr ka hre lo va, ka hriat dàn berin ka chhâng ta a ni.

Mala hian min star ve țhìn tih chu ka hria a, ka bulah erawh eng mah a sawi chhuak ngai lo thung. Kan inkàwm a, a fel a, a hawihhâwm a, an inah pawh min kalpui tawh nghe nghe. A nu leh pa an fel hle a, a pa phei hi chu kan college- ah senior Lecturer a ni a, a pension țêp tawh nghe nghe. Dàwrpui pheiah stationery dàwr lian deuh an nei a, chu lo pawh chu Khatla lamah an nei bawk an ti, sum lamah chuan an buai vak lo ang. Kei aiin kum 1 lekin a upa a nia, a puitling bîk tawp, an unaua upa ber a nih vàng nge ni, a kum naupan ang ai chuan a rilru a puitling daih a ni.

*******

"En teh u, U Lianpuii pasal neih tùr kha, an sawi dàn kha tak tak a nih chuan a mak ka ti ngawt ang!" Rini chuan a ti sar sar a, Zmi chuan," A ni tak tak an tih kha," a lo ti ve vat a, Ruatpuii lah chuan," A tak a nih chuan a va țha lo ve!" a lo ti ve leh a, an thil sawi awmzia chu ka man ve si lo va, ka bo khawp mai.

"Eng thil nge ni? Ka hre ve si lo, min hrilh țha ve mai ula?" ka tih chuan," Ni dâwn tak! Hmun dangah i awm țhìn a ni tih hi kan lo theihnghilh leh țhìn a ni," tiin Rini chuan thil awmzia chu a han sawi thuak thuak a, ngun takin ka lo ngaithla a, ka lo pawt chat duh miah lo va.

A sawi zawh chuan Mampuii chuan," Tu mahin thu chiang tak tak an hre lo a ni lo'm ni?  'An ti' ti vekin kan hre zêl a, thu dik fak a ni ngei em? Mi chanchin hi a dik fak a ni tih hriat chian loh chuan huai deuh deuh sawi tùr a ni lo asin," a lo ti a, Rini chuan," A chiang thawkhat viau lo'm ni? Tuna a pasal tùr hi Aizawl lam mi niin Lungleiah hna vàngin an rawn awm a, a nupui fanaute nèn. U Lianpuii nèn hian inngaizâwngin a nupui nèn pawh an ințhen phah ta hial a, a nupui pawhin U Lianpuii hnênah a pasal chu a fate vàng tal pawhin lo ngaizâwng lo hrâm tùrin a ngèn an tia; mahse, U Lianpuii hian maw, in hre thiam mai em? Sum tamna lam hi chu a hnar thei bîk lo, Lungleia a awm chhan pawh sum vàng a nia. A nupui thil ngen chuan amahah awmzia a nei lo chu a ni a, tihian an innei dâwn ta chu a ni si a, a nupui țhen tâk leh a fate kha an khawngaihthlâk ka ti êm a ni," a lo ti leh barh barh a.

"A nih chu," ka lo ti ve ringawt a, sawi zui thui dàn tùr ka hre lo. Zmi chuan," An sawi nasat kha, tak tak a ni ngei ang, thil awm miah lo hi chu mi hian an sawi ngawt ngai bîk lo asin, eng emaw chu a awm a ni lo thei lo," a lo ti ve leh a.

U Lianpuii chu ka hre ve alawm, kan vêng nula chhuanawm tak ni khân ka hre țhìn a, kohhranah pawh heta a awm lai chuan a inhmang ve viau țhìn bawk. Kan kohhran țhalaiah pawh ex- committee member mai ni lovin OB ni pha hial kha a ni nghe nghe a, mi pa ngaizâwnga a nupui nèn ințhen phahtîr hial tùr êm chuan rin har chu ka ti, thu dik ni lo hrâm se ka lo ti ve ngawt.

Mahse, thil hi a lo mak thei viau a ni tih ka hre chiang ve tawh. Kohhrana inhmang tak takte pawh hian chak lohna lai, panna lai tak hi an lo nei ve fo tho a, chutah tak chuan sual hian a bei chat țhìn rêng bawk. Ka hriat chian êm êm nu pakhat pawh kohhrana inhmang tak, zài apianga lâm thei reng mai hi a ni a, nu fel tak leh Pathian țih tak a ni; mahse, kohhran upa pakhat lakah a lo uirê ve tho, an pain a la man chhuak zui a, chu pawh a vawi khatna mai a ni tawh lo lehnghâl a!!! A pasal khawngaihthlâkzia kha, ka mit ngeiin ka hmu ve a, mittui tla zawih zawih chunga Pathian hnêna sual thupha chãwia a țawngțai han hmuh phei kha chuan kei pawhin ka mittui ka dang zo lo a nih kha.

Ka pa thu min hrilh ka hre reng țhìn. 'Hmuh theih lamah țha viaua langin kohhranahte inhmang viau mah ila, hmuh theih loh chhûngril lam hi a dik si loh chuan awmzia a awm lo. Engkim hmua hre vektu Pathian hi hlauh ber tùr a ni a, kan hmangaih ang a, kan țih bawk tùr a ni. Mite'n kan thinlung leh ka rilru an rawn hre vek kher lo, bum pawh kan bum thei ngei mai; mahse, englai maha bum ve theih loh Pathian kan nei a, a duh loh zâwng lakah kan inthiarfihlîm zêl țhìn tùr a ni, sualin kan panna lai zâwnah zêl min bei tih hi hriat tùr a ni. I nu nèna kan hmuh phâk loha in awm hunah pawh ka thu sawi hi hre reng ula, Pathian duh loh zâwng chu in hriat vek tawh kha, kan hmuh phâk loh che u paw'n Pathianin a hmu phâk reng che u a ni," a ti țhìn. Dik ka ti a, ka vawng nghet a, eng emaw chânga țhiante'n,' A ho lutuk, hêngte hi chu sual a ni chuang hlei nêm,' an tih châng pawh hian ka pa rilru tùr ka dâwn a, lo ti ve ta ila ka pa a hlim ang em tih ka ngaihtuah a, chu chuan thil țha lo tam tak lakah pawh min vêng viau a ni.

IGNOU-a ka assignment tihah khân mark ka hmu țha ve hlawm khawp mai a, lãwm pawh ka lãwm viau a ni. Zir tùr a tam tham si a, question hluite enin zawhna lo chhuah dàn kalhmang chu ka en a, class kal lai kha a ngaihawm ka ti rum rum mai a ni. Tunah chuan class kal a awm ve tawh si lo va,  mahni takmeuha inhai kuak a ngai a, harsa ka ti zâwk daih a ni; mahse, exam hma hawta han beidawn mai erawh ka tum bîk teuh lo.

Zàn khat chu U Valpuia chuan min rawn text leh khut a, ka han chhiar chuan  *Ka star che*   tih tê chauh hi a lo ni a, eng nge a chhan pawh hriat si loh hian ka thin a rawn phu dup dup mai a nih chu! A thil min rawn hrilh chuan min tilãwm nge min tizãm zâwk ni, lehkha ka zir hnan pawh chuan ka rilruah a awm reng mai, ka zirlai pawh ka rilruah a lût thei lo.

U Vid-a țhian a ni miau a, kan inhmu zauh zauh lo thei lo. Pathianniah U Vid-ate inah kan pêng ziah sia, anni lah an lo awm ve ziah bawk si nèn; mahse, mak deuh mai chu, kan inhmuh pawhin min rawn ngaihven àwm leh min star ang deuh pawhin a awm ngai lo, a hmaa a awm dàn ang thovin a awm a, amahah thil danglam hmuh tùr a awm miah lo, a hmaa chîk ngai hlei lo khân ka chîk thar a, țhiante leh ama hriat hlau ru deuh chung sîin. Engtin mah a awm ve mang si lo va, keimah zâwk hi a ni danglam ta chu. Hmuh ka hreh êm êm rualin ka hmuh loh chuan hmuh tumin ka mit ka lo lèn kual leh  țhìn a, a chhan pawh ka hre lo, a thil min hrilh khân min tidanglam tlat a ni.

Tlai khat chu Mampuii chu an inah a chhang kang ka va pui a, chutih lai chuan U Vid-a leh U Valpuia chu an rawn lût a, hna thawh kawr an ha nghe nghe. Mampuii chuan a lo be vat a, U Vid-a chuan," Mampui, thingpui kha lo siam rawh aw, kan hah teh mai a nia," a rawn ti a, an chhuak zui leh a. Mampuii chuan," Awi, ka kut a berh lutuk. Nunu, nang lo siamsak mai teh, i duh chuan insiam kêp ve nghâl la," a ti a, chhang a hmet a, a kut chu a berh rih ve êm bawk a ni.

No hnih ka siam a, in chhûnga țhu lova veranda-a an țhut avàng chuan chhuakin ka han pe a, U Vid-a chuan nui chung hian," Ka nau-i chuan a lo tîr ve thung che a ni maw?" a lo ti a, kei chuan," A kut a berh deuh a," ka ti mai a, U Valpuia ka pêk chuan," A tui ngawt ang," a lo ti sap a, nui deuh pah hian ka melh zawk a, min lo en ve reng niin, ka lum nghâl pup mai, chhûngrilah zàmna ka nei zui nghâl bawk, chu vàng chu a ni ang, ka thin chu a rawn phu rang dawt dawt a.

Ka melh zawk chauh kha a ni a; mahse, ka lo hriat ngai loh leh chîk ngai loh mithmul dum sei angreng tak a nei tih chu ka hmu hman tho! A mitmeng pawh kha a mawi phian asin, chiang taka en leh theih dàn awm se, chiang mangkhèna en ka châk.

"I insiam ve nange? Siam rawh, min lo siam kêp la, chuan, chhang kan kha Au Vid-ate han chhawp bawk la," Mampuii'n a rawn tih chuan ka phu deuh zawk a, ngaihtuah loh tùr ka lo ngaihtuah a ni tih hriain ka tho thuai a, chhang kan chu thlèngah la chhuakin U Vid-ate chu ka han pe a.

Zàna lehkha zir hma chuan phone chu hmetin eng eng emaw ka en kual a, thil hre chhuak thutin U Valpuia number chu ka hmet chhuak a, dp-ah a thlalâk a dah ka rin vàng a ni, a hma khân ka lo en ngai miah si lo va.

A lo dah ngei. Ka han tilian deuh a, ka en vang vang a, rei ve fê chu ka en. Ka hriat chian tâk chu U Valpuia hi a lo hmêl chhe miah lo tih hi, a biang dinglamah khuavàng a lo la awm zui a! Chuan, mâwi ka tih deuh chîin khabe hmul pawh a lo nei reng a! Ka va lo chîk ngai lo tak, ka lo en liam vêl mai mai țhìn a lo ni. A chhe miah si lo va, engtin nge tunah ka hriat chhuah chauh theih zâwk le?

Hmaichhana a hmêl hmuh ka châk deuh tù tú a; mahse, hmu dáwn ni ta ila ka hreh ru ngawih ngawih tho sî ang. Châk deuh si, hreh ru tho sî ang khân. Min hmu ve lovin chiang taka a hmêl en theih tùrin awm se... Ka va ning tak! Engati nge ka rilruah a awm reng tâk ni. Hetiang tùr hi a ni lo, lehkha ka zir a ngai.

Message tone a rawn ri a, ka en vat a, amah a lo la ni zui! A mak tak tak a ni.

*Tlaia thingpui kha a tui*  tih chauh hi a lo ni leh a, thu tam lah hi a rawn ziak duh malëk a! Tãwi zet zet hi min rawn thawn a, kei lahin thu min rawn thawntu chu ka lo ngaihtuah zui zêl lehnghâl a... Amah vàng vék, message min rawn thawn miah lo se chuan hetiang hian ka awm miah lo ang maw le.

Chhùn lama tih tùr ka tih zawh hnuah Mampuii pui tùrin an inah ka phei leh a, atta a lo nuai mêk a, ka thlen veleh ka pui ve nghâl zat bawk a. An kawmthlangah lung an remtîr a, hlawhfàte ei tùr siamsak an ngai a, a nute an awm rih si lo, ka pain pui tùra min tih vàngin ka phei leh a ni.

A chana chhum chu a hmin deuh tawh a, atta ka nawr laiin Mampuii'n   a lo kang a, ni a sat țhat deuh vàng chuan fan kan on pah a, phone-ah zai play-in kan ngaithla pah bawk a.

Atta kan kan zawh hnuah tukverhah chuan dâkin thlanglam chu kan zu thlîr thlà a, U Vid-a tiamin mi panga laiin lung chu an lo rem a, U Valpuia pawh a lo tel ve leh niin.

"U Valpuia hian lung a rem thiam ve a ni maw?" tiin ka zâwt a, ani chuan nui chung hian," Thiam loh pawh hi a nei lo," a lo ti mai a, chutah, sawi zawm lehin," Tak tak chuan, ani hi chu a tlàwmngaiin a mawng a zãng a, Au Vid-a țhianpa a lo ni bawk nèn kan hnaah hi chuan a lo tel ve ziah. En teh, a taima tho bawk si a, zû hi in lo se chuan tlangvâl fel tak tùr hi a ni asin, ka ui țhìn," thutak zet hian a ti ta bawrh bawrh a.

"A ni maw?" ka lo ti mai a, zû a in țhìn tih ka lo hre miah lo, tunah a sawi a, ka hre chiah. Lo zawh nî khân a in ve ngêi àwm si a; mahse, rùi kha chu an awm miah lo a nih kha. Mampuii chu ka en a, U Valpuia chanchin min hrilh chu ka awm dàn a hriat thiam vàng em maw ni ka ti rilru deuh a, ka ngaih pawh a țha lo deuh nghe nghe, min man chhuak mai ang tih ka hlau a ni. Chu vàng tak chuan ngaihven deuh anga awm duh lovin ka hmm hmm hmm a, U Valpuia pawh en duh ta lo chuan hmun dang ka en zui ta daih bawk a.

"Aw, ni e, a tlàwmngai, fel pawh a fel; mahse, zû mawlh mai hi, in nasa tak chu ni hran lo mah se, zû an in hi chuan ka fak pumhlûm ve thei țhìn lo va, Au Vid-a pawh ka hauh phah țhìn nghe nghe a ni, an inkàwm a, an rawn nam leh țhìn a," a ti leh a. Chutah," Inkhâwm lah hi an la peih phian zui a, a châng chuan ka ngei țhìn. Zu țhat lohna an hre ve tho a, an in leh tho bawk si a," a ti zui leh zat a.

A hnuah hna thawk lam chu ka zu thlîr leh a, an thawk mawlh mawlh reng a, a bîkin U Valpuia chu ka en chîk deuh a, engtizia teh rêng nge ni ka hmu hmêl țha telh telh mai. A hna thawk hah leh thlan tla hmêl pawh chu ka hmu hmêl țha zo vek tawh, zàwlaidi min tât em maw ni le ka ti deuh hial tawh!

*TUI BAWLHHLAWH NIA I NGAIH PAWH KHA THLAI TÂN CHUAN A NUNNA ATÂN A PAWIMAWH, MI MIN SÈLNATE PAWH HI CHAK NÂN KAN HMAN THIAM A PAWIMAWH*