☆Mr. BAD (ZAWLAIDI NEITUPA)☆ - 4 By Dingdi Pachuau

☆Mr. BAD(ZAWLAIDI NEITUPA)☆ - 4 By Dingdi Pachuau

'Min rawn hmu ve lo bawk a' tiin chumi nî chuan a chetlâ chu ka thlîr ru reng a, heti tak hian a chanchin ngaihvenin a chetlâ ka thlîr peih ang tih hi ka ngaihtuahnaah a awm ngai hauh lo. Mampuii nèn thingpui leh a hmeh tùr kan zuk pêkchilh a, nula ve ta chu, min lo fiam luam hlawm a; mahse, ani chuan min lo fiam leh biak chu sawi loh, min lo ngaihven àwm pawhin a awm lo, an lung rem chu a lo thlêk a lo thlêk a, ka mitsîr zauh zauh vànga chu chu hre thei ka ni, bâkah, vawi khat chu ka thlêk zauh bawk; mahse, chutah pawh chuan ka lam a rawn hawi lo hrim hrim. Chutia min lo en miah lo leh min ngaihsakna pakhat maha a lantîr lo chu ka lunghnûr ru deuh ngawt mai pek a!

"Min star lo tawp! Min fiam mai mai a, hre lovin ka lo ngai thutak ve êm êm a! Mi ã tak chu ka lo nih hi, min fiamna mai mai, thu tak hla taka ngai tùr rual pawh ka ni tawh lo! Chu achhapah, a fiamthu mai mai lehnghâl chu keimaha danglamna thlentîrtu-ah ka la hmang zui! Ka va mãwl chhah tak! Mãwl min ti ngawt ang chu," ka ti rilru nep nep a, ka inhau ru mawlh mawlh a, ka màwl êm avàng chuan hrehawm ka ti țûn lo thei lo a ni.

*******

U Lianpuii man hlan nî chuan fatu tùra min sàwm ve avàngin ka kal ve a, Mampuiite nèn kan ni hlauh a, a tihzia, anni tel lo se chuan ka kal kher lo maithei a ni. Khawtlâng ruai ei tùr buatsaih a ni a, Vawk lian tak pahnih bâkah Âr sàwm chuang talh a ni bawk a, an insêng nasa viau a ni. Ka rin aiin an bei ropui daih a! U Lianpuiite chhûngkuaah hian sawrkâr hna nei an awm lo va, amah ni se Lungleia inhlawh kual ve mai kha a ni bawk sia, an lo inkhâwl nasa viau tih a hriat reng mai, man hlanna mai maiah pawh khawtlâng huapin ruai an buatsaih thei a nia, chutah, unau hmeichhia an awm ve diah a, U Lianpuii tak phei chu pasal a neih vawi khatna mai a ni tawh lo lehnghâl a, an thei hi ka ti lutuk tlat.

A pasal tùr hmêl ka hmuh chuan ka phu deuh zawk! Sawmtei patea, Pa Lianmawia kha lo ni rengin!! 1st leh 2nd Sem ka kal chhûng zawnga ka țhutpui Sawmtei. A patea chu tuna moneitu tùr hi! A va'n mak êm êm!! Pa Lianmawiate inah pawh hian kan kal dùn tawh nghe nghe a nih kha, khatih lai kha chuan a nupui leh fanaute nèn pawh khân an la hlim viau asin, an chhûngkuaah ințhenna a awm ang tih kha tu mahin an ngaihtuah phâk hauh lo ang le, a nupui phei kha chu U Lianpuii ai hian hmêl țha ka ti daih zâwk asin, nu fel tak leh zaidam tak a nih kha; mahse le, thil hi chu a lan dàn ang ngawt pawh hi a lo ni lo ve thei tho a, hriat chian fak a nih loh chuan rin thu mai mai hi zawng, thu tak a tling lo êm mai. Sawmtei pawhin an thu leh hla a hre ve vek ngei àwm si a, a patea nupui neih leh tùr thlengin, U Lianpuii hi kan khaw mi a ni tih a hria ang em? Lungleia inneihnaah a lo kal ve ang em? Ka ngaihtuah leh țhìn a, Pa Lianmawia nupui leh fate ka mitthlà a, a hmaa an thil sawi zawng zawng kha tak tak a nih ngai chuan an tân zawng hringnun hi a fair hlawl lo ka ti ngei ang.

Mipui lamin ruai an țheh zawh hnuah keini fatu lam chuan kan ei ve ta chauh a, rùi fê fê an rawn awm ta. Fatu zîngah U Laltea a tel ve a, a lo lem hman leh tawh a ni ang chu, a au lùng lúng a, zu rùi ka hlau sia, a au ri hlau chuan ka lo îp chãwih chãwih a, ka chaw ei pawh a tui thei tawh lo.

Hlauh nâklaiin, ka chaw eina bulah chuan rawn kalin min rawn fiam a, ka nuih thei teuh lo mai! Mampuii leh mi dang pawh an awm ve reng a, an lo fiam deuh nghe nghe; mahse, chûng chu ngaihtuah lovin keimah kher chu min rawn fiamin min rawn kuah ta thuak thuak mai a nih chu, ka hlau lutuk chuan," Ka duh lo, min thlah teh!" tiin ka țê vak a, ka ding thut bawk, ka din thut vàng chuan kan intauh a, a pai chan chan nghe nghe a.

Mampuii chuan," U Laltea chu, i rui deuh hlek a nih kha, chaw puar deuhin va ei rawh khai," a lo ti a, chu erawh chu ani chuan a bengkhawn lo viau a ni tih hriat tak hian min rawn pan lehin," Ka fiam ve che a nih kha, i va inla reuh ve a!!" a rawn ti leh bul bul a, ka hlau bawk si, ka ngei bawk si, mawi lo taka a chêt ka hlauh vàng chuan thlèng chu lain ka kal sawn deuh a, min la rawn zuiin ka bânah a la rawn man hman zui, min pawh deuh thut avàng chuan ka thlèng pawh ka thlauh ta țhuai nghe nghe a.

"Lalte, duh tâwk la, thlah rawh! I che mawi lo lam hret chu a ni."

U Valpuia aw ka hriat chuan tlêmin ka thlâ a muang deuh a; mahse, ka en lo va, U Laltea pawhin min la thlah chuang lo. Mipa dang pawh chuan," Lo kal rawh," tiin an rawn pan a, ani chuan," Ka duh dàn dánin ka awm ang," a la ti chher chher mai a, chutah, min thlahin a che thut a, U Valpuia chu a hnek țhelh thuak mai.

"I rui â a nih kha, duh tâwk rawh ka tih tawh kha," U Valpuia chuan a ti leh a; mahse, ani chuan a la duh tâwk lo, a bân chu a vai leh thuak a, chutah zawng, inhnek rî sawk sawk thãwmin a zui ta. A rùi hlauh tawh nâklaiin, inhnek ri ka hre zui leh chu ka mangang lutuk! Ka hlau lutuk chu inthunun thei lovin ka khùr zawih zawih mai a, Mampuii'n min rawn kai hrang a, ka khurh nasatzia hria chuan min kuah zui nghâl a, ka hlau leh hrehawm ti lutuk chu ka țap lo chauh a ni.

Zànah Mampuii chuan min awmpui a, rawn lêng ve pângngai ang maiin a awm thung. Ka nu leh pa bulah thil thleng kha kan sawi lang lo hrim hrim a, țhian dangte pawh kan hrilh chuang lo; mahse, naktûk lamahte chuan tlângkam titi ațangin an hre ngeiin ka ring, thil eng emaw hlek thleng se, kan hre nghâl zung zung a, thingtlâng khua kan nihna hi a lo lang leh țhìn.

"Khatiang khân a che duh ang tih kha ka lo ngaihtuah pha miah lo va, a chhan pawh rùi viau țhìn mah se khatiang khân a la che ngai bîk tlat si lo va. Miin an lo pawt hrang ta hlauh a, thil pawi thui zâwk a thleng ang tih ka hlauhzia mai chu a!! Au Vid-a pawhin min hau nghe nghe a," inthiam lo tih hriat tak chuan a ti sap sap a, chutah," Engati nge khati khân a chêt ngawt le?" a ti leh a, kei chuan," Kei pawhin khatia a chêt kha chu ka lo ring bîk miah lo, zû a ruih êm vàng khân ka hlau ve hrim hrim bawk a, amah ka hlauh êm vàng khân a thinrim zual sauh pawh a ni maithei a ni," ka lo ti ve a.

 "A pawi ka ti tak tak a ni, a zahthlâk bawk si. Au Vid-a ni se a thinrim a phun bul bul reng a, 'Ka awm ve lo chu aw, awm ve na ila chuan...' a ti ngul ngul reng a. Tunah pawh hian U Valpuiate nèn an awmho ngeiin ka ring, zû an in leh ngei ang chu, U Laltea an va cho ang tihte hi ka hlau a nia, zu hi an in peih si. Zû hi zawng khawvêla ata hi bo vang vang se ka ti ngawih ngawih tawh lutuk!" a ti sap sap a.

"A bo thei lo ang ti ka va hlauhpui che êm!" ka lo ti a, kan inen a, kan nui ve ve a," Bo dâwn lo ve, amah hian in loh tum se a bo chu a ni mai ang kan chhûngkaw tân chuan. Heti taka in peih ta chu, a tui viau em maw ni rêng rêng le?" a ti leh a, kei chuan," Tui lo tawp ang, in pahin an ner nâwng nâwng alawm, in tùr tui tak i inin i ner nâwng nâwng ngai em ni?" ka lo ti leh a. "Ni bawk si," a ti ve leh mai bawk a.

Kan tâna țangkai tùr ni lo thil sawi hi kan peih ve a, hetiang lamah hian kan beng hi a vârin mi hrilh hriat hi kan châk zek zek țhìn bawk a lo ni, ka nu leh pate pawh tuin nge lo hrilh ni, an lo hre ve ta ngei a, zanriah kîl laiin a thuphungin ka nuin min zâwt a, thu zêp deuh tak chuan ka hrilh a.

"A fiam theih tùrin mitmei i hmuhte hi a ni lo maw?" ka nuin a tih chuan," Teuh lo mai! Ka hlauh nâklaiin! A in tam mah mah vàng a ni ang," ka lo ti vat a, ani chuan," Ka han fiam deuh che a nih kha. Hmm, ni e, zu an ina an han ruih deuh tawh hi chuan mi zawng zawng chunga lêng ta emaw an inti țhìn a, chapona tlângah an chêng tawh țhìn a ni, mawi lo taka khawih che a tum leh a nih chuan i theihtâwpa nâin i lo pêt vak tawh dâwn nia, a pawi rêng rêng lo," a ti ve leh a.

Ka pa chuan," Khaih, khaih, insûm teh khai, fanute bula sawi chî pawh a nih loh chu a," a lo ti a, ani chuan," A chî lohna a awm lo, nula chhaih chin tâwk hre lo hi chu dim miah loh tùr," a lo ti ve thung a. Ka pa chu ka en a, ani pawh chuan min rawn ena nui chung hian," I nu hi khaw khat nula sual huai a ni țhìn a, tlangvâl naràn phei chuan chhaih pawh an chhaih ngam miah hlei nem; mahse, kei erawh hi chu min ngam lo thung a, a chhan erawh ka hre bîk hauh lo, ka chhaih ve tawh hi chuan a lài êm êm ziah a, keimah chiahin ka chhaih ngam a nih chu," nui sûng chung hian a ti a, ka nu chu ka han en leh a, a lo nui duh miah lo lehnghâl. Ka pa thu sawi chu dáwt a nih ka ring hran lo nain ka nu hi nu sual tak leh huaisàr tak a nih ka ring lo; mahse, a duh lohnaah chuan a kawlh viau chu ka ring tho. A pasal leh fate chungah hi chuan nu zaidam theihtàwp a ni a, ka hriat theih tirh ata âwka vîna min țawng khum ka la hre miah lo bawk. Ka pa sawi ang hian khaw khat nula sual huai pawh chu lo ni ta se, nungchang chu a sim theihin a siam țhat theih a, a lo siam țha tawh pawh a ni thei tho mai.

U Valpuia khân khami zàn khân message min rawn thawn a *I țha em?*  tiin, ka țhat thu ka hrilh ve nghâl a, a lo inrawlh avànga làwm thu hrilh ka duh viau nain amah chu ka ngaihtuah a ni tih a hria ang tih ka hlau a, a thil min zawh ka țhat thu bâk chu ka hrilh ngam lo a ni. Ani pawhin message dang min rawn thawn zui ta chuang lo va, ka nghâkin ka ngaichâng deuh rèn ráwn a nia; mahse, a offline zui tâk daih avàng chuan ka nghâk duh ta lo va.

A reh leh ta vang vang a, kei lahin ka vei chho ve laklawh tawh bawk si a, duh lovin tum lo teh mah ila a reh zui lutuk chuan ka thin a tirim deuh țûng thei hial a ni. Min lo duh tak tak lo tih rinna kha chu ka nei daih tawh tho nain a chêt dàn leh min ngaihtuah anga message min han thawn leh vêlte chuan min lo la duh reng a nih rinna min neihtîr thar leh a; mahse, a reh zui leh ta tho si, amah vei tâwk leka min siam thiam chu ka haw ru lo thei lo, nula dang nèn an lêng ka hmu dùn pawh a ni chuang lo; mahse, min ngaihven zui lo leh a reh zui leh ta vang vang chuan min tithinur tlat a ni, keiin amah ka lo ngaihtuah laklawh ve tawh bawk si.

U Laltea pawh ka hmu leh tawh a, nuam lo ka tih rualin amah pawhin min hmu chu nuam lo a ti ve tho a nih ka ring, biak pawh kan inbe lo. Min ngei hmêl chu a pu lo chuan ka hria a, chu erawh chuan ka awm a tinuam deuh, ka be țhìn azeng pawh a ni lo va, ka tân biak hmasak kha a nuam ka ti lo va, bâkah, a lakah ka inthlahrung deuh tlat pek a nih chu, a pawi sawi zâwk ang deuh hialah ka inchan a ni.

Inrinniah Y.M.A-in Pu Bâwlate huan sãmin kan inhlawh a, chaw kan fûn vek a, kan senior adviser pahnih leh nula senior ve lam deuh pathumin chawhmeh tùr an siam a, member thawk chhuak kan tam a, chawhma pawh chuan kan sãm zau viau mai. A hnim a nêm deuh nain ka hah viau tho; ka bula mite aia nêp bîk nih ka hlau a, ka hma a fual bîk chuan a zahthlâk dâwn si a, chu vàng tak chuan ka țang mar pât reng a, ka hah phah zual a ni, an titi pawh ka zàwm ve hman meuh lo, ka thlan lah chu a tla zawih zawih mai a, a hnuai zâwka ka kawr hâk pawh a huh zawr hneh viau a ni.

Chhùnchaw fâka kan chawlh dâwn chuan," I hah em?" tiin President Pu Faktea chuan min zâwt a," Hah lo ve," te chu ka'n ti mawi ve a; mahse, ka hah tih chu a hriat tho ka ring, ka thlan a tla nasa bawk si.

Chawhnu lama bung tùra kan kal dâwn chuan U Valpuia leh U Vid-a chu kan bulah an rawn kal a, U Vid-a chuan," Nunui bulah bung ve tawh teh ang, a chak nasa mai dâwn si a, a bula bun a chãkawm êm mai," a rawn ti deuh kher a, Zmi chuan," A chak lutuk! A vai êng duak duak mai asin, a rilru a insâwrbing nasa bawk a," a lo ti ve zat a, mi dang chu an lo nui hak hak hlawm a; kei erawh chu U Valpuia a awm ve avàng chuan ka làiin ka zak deuh a, țawng lovin ka lo nui ringawt a.

Kan han bung leh a, 'hmeichhia leh mipa inkârthlâkin' an tih avàngin U Valpuia leh U Vid-a inkârah ka bung a, an chak dùn mai si a, U Valpuia chuan ka hmaa ka sàm tùr chu min rawn sàm kêp ta zêl mai a, ka sãm ve hman mang lo. Kan tawlh dual dual bawk si nèn, chawhnu zet chu sàm a sâwt tak zet a ni. Hah pawh ka hah tawh lo, U Valpuia leh U Vid-a'n min sàmsak vek ka ti mai.

"In va'n chak êm êm!!" ka han ti chhuak hluai a, U Vid-a chuan," Nula chak bula han bun meuh chuan hma a kaw duak duak mai alawm le!! Kan zo thuai dâwn e," a lo ti ve thung a, U Valpuia erawh a țawng ve chuang lo, a sãm mawlh mawlh reng a.

Nimbu hmun sãm kan ni a, nimbu hlîng a zum nasa mai si a, fîmkhur reng sèn pawh a ni lo. Vawi khat phei chu ka inchumchilh deuh zui a, ka insùm hmain," A naaahh!!" ka ti țhat a, U Valpuia chuan," Khawi maw," tiin min rawn ensak vat bawk. Ka kutzunglai a châng bâwk deuh laiah min chhun a lo ni, a hlîng erawh a tâng lo va, a na reuh phian zui. Chumi hnu lamah chuan nimbu bulah tak chuan amah chu a țang ta zêl a, kei chu a kûng awm lohna lai hnim chu min sàmtîr ta zêl a, a rúk tak chuan a inthlahrunawm ka ti; mahse, chutia min ngaihsak leh min ngaihtuah nia a lang chu nuam ka ti ru viau lawi a. Kan sàm zo chiah tiha," I thawk ngai si lo va, i hah ngawt lo maw?" tia min zawh chuan," Hah lo ve, ka sàm ve tùr awm lovin i sãm zo nghâl zêl a, hah viauna chhan tùr ka nei ve hleinem, nangmah zâwk kha i hah ngawt ang," tiin ka chhâng duah a, a nui ve suk nghe nghe.

Ka rin aiin ka chau daih mai, Nimbu hlîngin min chhunna ka kut lah chu a na reuh khawp lehnghâl a, a vûng deuh hialin ka hria! Inkhâwm lova zanriah ei khama mut nghâl daih ka tum rilru a; mahse, ka zak leh deuh a, mi dangte pawh an thawk ve tho a, inkhâwm an țhulh phah ka ring bîk si lo. Ka inkhâwm ta nge nge a, mikhual kan lo la nei zui; mahse, a inchhìrawm hran lo ve.

Ka mut dâwna phone ka en chuan U Valpuia message a lo awm leh reng tawh niin,  *I chau dâwn si a, artui hîpin nachhâwkna ei tel la, mu hma rawh*   tih tê hi a lo ni a, ka nui deuh sak a, min ngaihtuah ve a ni tih hriat hi chu a nuam ve chiang alawm. Message min rawn thawn hun chu ka en leh vat a, dâr 7-ah daih tawh khân a lo nia!! Ka inkhâwm daih avàngin ka lo hmu har zâwk a lo ni.

*Ka mu dâwn chiah*  tih chu ka han type ve a; mahse, ka thawn ngam leh lo. Ka eng emaw ti zo vek tawh a, duh loh tum teh mah ila a lakah hian ka dik lo tlat tawh, biak te hi duh viau mah ila min biak hmasak loh chuan ka be hmasa ngam teuh lo! Ka awm dàn leh rilru puthmang hi ka țhiante leh U Vid-a hian an hre chhuak ang tih ka hlau ru viau a ni, amah tak hi chuan a hre ru khiau tawh maithei a, chu vànga hetia message min rawn thawn ngam pawh hi a niin ka ring; mahse, min en țha duh lo êm mai a, a hre kher lo thei tho bawk.

Krismas a rawn hnai chho ve zél a, rilruin Bethlehem lam a hawi țan rualin inthlan kum a ni a, hmun tinah politics boruakin mi a chiah hneh a ni ang, patling pahnih thum awm tawhnaah chuan 'Chumi party chu' tih emaw 'Kan party chu' tih emaw chutiang lam hawi ri hriat tùr a awm ve zêl a, a rûk tak chuan ka ning thei viau a ni. Chutih rual chuan inthlan dâwn chuan sawi a ngai ve bawk a ni tih chu ka hre ve tho bawk a; mahse, ka ning tho tho, ka ngaihtuah ve peih loh bâkah fiamthu pawhin ka sawi ve ngai lo va, sawi tùr pawh ka hre lo, a... ka tui lo ve hrim hrim a ni tawp mai. Party ruihchilhho ka ti mai, a țang zual deuhho phei chu an han inthliar nasa khawp a, biak in chhûng boruak thlengin an tihchhiat phah thei deuh hial nia. Keini member satliah mai mai pawhin kan lo hre thei a, țha ka ti lo tak tak a ni; mahse, tih theih erawh kan nei chuang lêm hlei lo va.

Kan inthlang ta ngei a, kei pawh vote nei ka ni a, vote thlâk chu ka tih tùr a nih angin ka thlâk ve. Party anga țan ka nei lo va, a mihringa ka en a, ka duh berah ka thlâk ve tawp a ni. Kan in chhûngah hian politics hi kan sawi ngai lo hrim hrim a, țha bera ka rinah ka thlâk ve hmiah.

Zàna lehkha ka zir mawlh mawlh lai chuan Mampuii'n min rawn bia a," Kal ve nghâl ila?" a rawn ti thâwr a, teh ngawt chuan!! Hre thiam lo fê hian," Khawiah maw?!!" ka lo ti hû a, ani chuan," I hre lehpek nange? Ni dáwn tak e, Pu Fala thing ațangin a tla a, a na viau a ni àwm e, an inah kan kal ve ang chu ka ti. U Vid-ate pawh zànriah ei hma khân zãwn tùrin an kal daih tawh a," a rawn ti leh a, ka äwm chu ka dawm vat a, a thil sawi chuan min țhãwng êm a ni.

Ka nute pawhin an lo hre bîk miah lo niin, insiam pahin ka hrilh ve a, ka pa chuan," A va zia lo ve aw.." a lo ti vang vang a, ka hman ta thuai a. Pu Falate in thlen hmain kan țhianho pawh kan kim dèr tawh, kan va thlen chuan mi dang pawh an lo awm țeuh tawh niin, Pu Fala nupui a lo țap hawm hawm a, Pu Fala chu a thi tawh a nih ka'n ring deuh ngawt a.

A lo dik chiah. Kan thlen hnu rei vak lovah chuan tlangvâlhovin an rawn zãwn haw a, U Valpuia leh U Vid-a an rawn hmasa ber nghe nghe. An rawn thleng ta chu a nupui a țap nasa sauh a, a fate pawh an țap nghâl tliar tliar a, an khawngaihthlâk khawp mai. Krismas a hnai ve tawh bawk si a, an nghahhlelh ve dâwn tehlul nèn, chhûngkaw kim lovin an hman a ngai dâwn ta si, nu ber rilru chu a hrehawm ngawt ang le.

A thih dàn râpthlâk ka tih êm avàng chuan ka hlau rilru deuh ngawt a, a fâl deuh pawhin ka awm ngam lo. A ruang ina an zãwn lût a hmêl kha ka hmu chiang palh hlauh bawk si a, chu chuan min tihlau zual a ni; mahse, ka sawi chhuak duh lo va, chumi zàn chuan ka hawi chhuak mang lo rêng a ni, an muttîrna leh kan țhutna lam a indawn bawk si a, a hmêl ka hmu leh ang tih mawlh ka hlau tawh a ni.

Dâr 2 vêlah mut a rawn chhuak selh selh a, intiharh tùra páwna chhuah ka duh kher mai, ka zun a chhuak ve pah tho bawk nèn, Mampuii chu ka kheuh zeuh a, ani pawh a lo meng ve lup lup tho niin, kan inrâwn tlâng a, kan chhuak ta dial a. Zun chhuak hi ka insûm thei ve viau țhìn a nia, zanin erawh ka mut chhuak lutuk tih reh nân chhuah ka duh ve hrim hrim a ni.

Ka ham bài bái lai chuan, "I mut a va chhuak àwm ve a?" tia ka bul lawka țawng ri ka hriat tâkah chuan ka phu zawk mai; mahse, U Valpuia a ni tih ka hre chawpchilh zui a," Aw, chhuak lutuk," ka ti sap a, dâwt pawh ka hrilh duh lêm lo, chutih lai tak chuan current a rawn thim ta thut a, hlauh sa nâklaiin kan chhak lam hnim buk chu a ri rak zui ta dah a, ka țê chhuak vak lo chauh tak tak!  U Valpuia lamah tawlh vatin ka nghèng nghâl rawk rawk a!

"Rannung mai mai a nih kha, a hlauhawm loh," a lo ti sup a, kei chuan," I hria em ni?" ka ti ve thung a, chutah," Pu Fala hmêl kha ka hmu fuh palh a, ka râp tlat a," mi dang hriat hlau ru tak chuan ka ti leh sap a, zah lam pawh ka ngaihtuah thei tawh lo, a thim bawk si a, tunah tak hi chuan ka bula a awm leh min lo bia kha ka lãwm viau tawh zâwk a ni.

Current thim ta bawk si chu pâwnah kan awm ta rih a, inverter a awm si lo va, theih ang angin mombati an chhî a, zai pawh an chàwl rih, nu ber a țap leh râih râih țhìn a, a aw pawh a chhãng țuau tawh nghe nghe. U Valpuia chu ka la nghèng reng a, mi dang chuan an hlau ve lêm lo a ni ang, an țawng sap sap reng hlawm a. Thu sawi duhte'n current awm lo chu remchângah lain thu an sawi a, rei lo té téin an sawi thung. Kan awmna ațang chuan a hriat phâk a, Ruatpuii chuan," U Zaa a ding ve țêp tawh ang," a han ti a, a sawi ang ngei ngei chuan Pu Fela a țhu chiah tihah mi zawng zawng U Zaa chu a rawn ding zui ve ta zat a. Ani hi mi pângngai ang pha zân lo deuh ni mah se mi tlàwmngai tak a ni roh a, chènpui chhûngte a nei lo va, khaw chhak lam ațanga lo kal niin kan khuaah hian kum 15 chuang zet a awm tawh a ni.

Rei tak awm lovin kan lût leh ta a, kan luh hnu lawkah current pawh a rawn êng leh ta, U Vid-ate pawh an rawn lût ve tawh a, kan piah deuh lawkah an țhu nghe nghe. Ka va en phei lai takin U Valpuia a rawn hawi ve chiah a, ka nuih sak a, ka melh sawn zui nghâl daih bawk. Ka thin phu rang dat dat chu ka dawm a, a phut ran chhan ka hre chiang viau a ni. Ka nuiha khân ka melh sawn daih chhan kha hre tak ang maw? Ka nuihna chhan kha chu nichîna ka bula a awm vànga ka làwm thu sawina a nia, lo awm lo se chuan ka hlau zual dâwn êm asin.

Nula kan indaih deuh bawk a, ka haw veleh ka mu a, chaw ei khamah ka nuin min rawn kai thovin mitthi in lamah ka kal leh a, thingpui lumin tlai lamah eirawng kan bàwlpui leh a, zànah erawh hun kan hmang rei tawh lo. 

A tûkah kan tih dàn ngai têin khawhar chhûngte chu Y.M.A-in hna kan thawhpui a, kan tam tham ve deuh avàngin hmun hnihah kan ințhen a, thing tuah tùr phur pâwl leh huan sãm pâwl kan awm a, thing phur pâwlah awmin ka hah leh hluam hluam viau a ni; mahse, a huhova hna thawk kan ni a, hna hahthlâk thawh pawh a zia thei viau zêl e.

Heng kan hna thawhnaa ațang hian U Valpuia tlàwmngaihzia an sawi ţhin chu ka mit ngeiin ka hmu ve ta a, hna thawh a chakin a tlàwmngai si a, a hah ve thei lo em maw ni tih hial tùr a ni, chu bâkah, hna thawh chu nuam a ti zaw mah niin a lang. Țawng tam vak si lo hian a hma ber pâwlah a kal thei zêl a, hna a thawh lah hian a zeiin a hna chu a sâwt bîk riauin ka hre nghe nghe. Zu a in țhìn a ni tih pawh hi âwih har ka ti hial tawh, ka hmuh lai hi chuan rùi leh zu in ang hian a awm ngai si lo va, a rim pawh ka hre ngai lo; mahse, kan inhnìm hnai khât ve bawk a, ka lo hre ngai lo pawh a ni mahna.

Pu Fala thlâ chu a hràn hi ka'n ring khawp a, hlau ru viau chung si hian miin an sawi em tih ka ngaihven ru reng a, keimah ngei pawhin ka tawn ka ring thei khawp mai. Ka hlau si a, min hràn khum ka ring deuh a ni; mahse, thlahrâng thãwm rîva an sawi àwm rêng rêng ka hre miah lo va, a hrâng lo a ni ang e ka tih phah ta ringawt; mahse, zàn eng emaw zât chu êng tithimin ka mu ngam lo.

*HARSATNA HIAN MI PUITLINGAH MIN CHHER ȚHÌN*