☆Mr. BAD (ZAWLAIDI NEITUPA)☆ - 5 By Dingdi Pachuau

☆Mr. BAD (ZAWLAIDI NEITUPA)☆ - 5 By Dingdi Pachuau

Mampuiite nèn Lungleiah Krismas bazár tùrin kan kalho ang chu kan tih ve laiin U Puii a dam țha lo leh tlat mai a, tlawngãwl ber ta chuan ka va awmpui leh ta rih a. U Puii damlo buaipui ngai bawk, naute enkawl ngai bawk nèn, a buai theih viau a ni. Kan khuaah Krismas ka hmang thei lo mai ang tih te ka hlau rum rum hial a, a chhan pawh U Puii chu a dam chak lo ve êm a ni.

U Valpuia'n vawi khat chu min rawn text a, ka haw phei theih hun tùr min rawn zâwt pahin  *I ngaihawm reuh* tih hi a rawn thawn tel a, ka nui sak. A hriat leh tâk lohah chuan, kei pawh hian ka ngai khawp asin. Ka buai êm zâwk a, amah ngaihtuahna hun ka nei meuh lo ti ila a dik ang; a message ka hmuh hnuah erawh ngaihtuahna hun chu ka nei leh ta khawp mai zâwk a, zàn mut dâwn leh zîng ka harh veleh ka ngaihtuah chhuak a, phone ka khawih leh nau ka awih lai pawhin ka hre chhuak ta ziah, a hnên ațangin message dang erawh ka dawng zui ta miah lo thung.

Krismas ni thlen nân ni thum chauh a awm tawh tihah ka haw thei ve ta chauh a, bazârah pawh ka kal hman lo, mi zi hut hut kâra kal ka peih loh bâkah an tâwt tih ka hre reng bawk si a, inhnawh kha ka peih lo a ni, ka țhiante hawn tùr erawh kawngah ka lei phei ta hrãm, ka hawnsak hlawm loh chuan an titau nasa leh dâwn si a.

Lungleiah erawh ka bazâr ve ta tho a, Sunday pheikhawk pakhat ka lei ve a, mawi pawh ka ti, bun a nuam lutuk a, chu chu ka lei chhan a ni. Zàn khat ka riak a, a tûkah ka haw a, ka haw zànah țhiante an rawn lang nghâl a, an thil ka hawnsakah pawh an lãwm thiam viau e.

Higher leh College ka kal chhûng khân kan khuaah țum hnih chauh Krismas ka hmang a, ka ute bula ka hman loh leh hostel-ah ka hmang mai țhìn. Lehkha thiam thei over ka nih loh avàngin lehkha zir ngawrh ka duh țhìn a, ka haw chuan ka duh angin ka zir ngawrh thei dâwn lo tih ka hriat vàng a ni, ka nute pawhin an lo hre thiam ve mai zêl a, haw tùrin min nawr lui ngai lo.

Țhiante nèn hlim taka hun hman hi a lo nuam a nih hi. Chhûngkuaah damlohna a awm lo bawk nèn, dam takin kan hmang tlâng a, kan theih ang tâwkin kohhranahte kan lang tam bawk a, fak pawh kan hlawh ve viau; mahse, U Valpuiate erawh an hmingchhe ta hlauh mai a, ruai țheh zawh hnuah U Laltea nèn an insual a ni àwm a, U Vid-a pawh a tel ve nghe nghe a ni àwm e.

"A zahthlâk tak tak! Men pawh kan meng ngam dâwn hleinem. Au Vid-a hi chu ka ning tak tak a ni, anni ang nih tawha la rual insual uai uaih te chu a changkàn loh thlâk e," tiin Mampuii chu a âng hlaih hlaih a, a nu chuan," A buaithlâk teh zawng a nih hi, an insual buai hian 'chhûngte an lo zak ang' tih ngaihtuahna châng a hre bawk si lo va," a lo ti ve sap sap a, an inah kan awm a, kan inkawm ngeih êm avàng hian an chhûngkaw zînga mi ang maiah min ngai ve a, thil zêp êm êm pawh an nei ngai lo.

"Kum tin Krismas bâwr vêla insualnaah a la tel char char a nia, amah a zah loh tal pawhin keimahni kan zak thei a ni tih te tal hi hria se, ka pa hian a hau na tâwk lo a ni, hau hrep tawh rawh se, U Valpuia chu lo insual pawh ni se nu a nei tawh lo tal a, miin an hre thiam zêl tho a," Mampuii chuan a ti leh hlaih hlaih a, thingtlâng khua ngang kan ni a, eng emaw thil thleng hlek, chanchin țha lo lam hi chu zêp boa thup theih a ni lo, a darh nghãl zêl.

A nu pindan lama a kal sawn hnuah pawh chuan a la lungawi thei lo a ni ang," Nupuite hi nei daih se a zia thei deuh zâwkin ka ring; mahse, bialnu pawh hi a hmu zo ngút lo ang, rùia insual buai țhìn chu tuin nge maw duh ang ni? A hma lam hun ka ngaihtuah châng te hian hrehawm ka ti țhìn, zu hi chu ka haw tak zet a ni," a ti leh barh barh a.

"Sim hun a la nei ve mai ang, a hun lai hi a awm ve a, zilh pawh sáwt loh hun lai ang hi. A in reng duh bîk nâng," tiin ka lo hnèm ve a, thâwk huai pah hian," U Valpuia pa, Pa Mawia thu sawi min tihre chhuak zawk mai. Ani pawhin,' Ka zilh nasain thu țha ka hrilh ngun tawh a, simtîr ka tum hma deuh pawh a ni maithei, sim tumna rilru a la pu thei lo êm mai, puitling a ni tawh a, a tâna țha a hria. A hun lai a la ni ve rih a ni ang e, nakinah, a nin hunah chuan a la sim ve mai ang,' a ti țhìn; mahse, kei chuan a rilru ang hi ka pu ve thei lo, an sim har ka ti tawh lutuk a, ka beidawng lek lek tawh zâwk a ni," a lo ti ve leh a.

Ina ka haw hnu chuan thil ka lo chîk lêm lohzia ka hre chhuak. U Valpuia hi nu nei tawh lo a ni tih ka lo hre miah lo va, unau eng zât nge an nih tih pawh ka hre miah lo, a pa erawh Middle school zirtîrtu niin kohhran upa a ni bawk a, ka hre ve thung, chiang lutuk lo chuan. U Valpuia tak pawh hi kumin hian ka hre chiang ve deuh chauh niin ka hria, a hma khân pawh khân U Vid-ate nèn chuan an inkàwm țhìn tih chu ka hre ve ngei tho ang a; mahse, chîk lêm lo ta chu, ka lo phêk en vêl mai mai a ni ngêi ang.

Dec 31-ah kum hlui thlah nî siamin Y.M.A lamin hun an siam a, mualah țhalai inelna an buatsaih a, mipain football an khèl a, hmeichhe lamin volleyball kan bêng thung. Nuam ve reuh tak a ni, ka țang ve viau bawk. A hot zual deuhte'n pawisate an lo theh chhuak a, ei tùr leh in tùr lam lo thawh tâwk an awm bawk.

U Valpuia bãll pét chu, ka rin aiin a lo thiam daih mai! A chak roh bawk a, a pian hrim hrim pawh a infiam mi pian zaih mai a, a zu in țhinna leh a insualna khãn amahah nghawng a nei tehchiam lo em maw ni tih tùr a ni, a fit lutuk tlat. Chuan, a kotlâng lam ațangin lo țantu chhe lo deuh deuh pawh a nei nual tih ka hmu tel bawk, a hmingin an lo ko nasa mai. A pèt goal lai phei chuan an lo țê tuar tuar a, an au tuar tuar bawk, a rûkin lo țan ve tho mah ila tihlan ve ngam chi pawh va ni suh, kut pawh ka bêng ngam teuh lo mai.

Mahse, vànduaithlâk deuhin hun tàwp dâwn lamah chuan a ke a bilh palh ta hlauh mai a, a na viau a nih ka ring, lei a rap țha ngam miah lo mai a, mual ațangin a țhiante'n an kuah chhuak a ni. Kan pan hnai ve vat a; mahse, mualah pawh a awm rei lo, zût thiam kan neih Pi Hmingi an panpui nghâl daih a ni.

Kan haw kawngah chuan Mampuii chuan," U Valpuia chu ka khawngaih roh mang e, nuam a tih ve tehlul nèn," a han ti a, Rini ve chuan," A ke a na sia, zanin pawh a chhuak thei miah lo ang, ka khawngaih loh vàng ni lovin insual thãwm hriat tùr a awm loh phah maithei zâwk a ni," a lo ti ve thung a, an rilrua awm chu a inang lo ve khawp mai.

"Ni dâwn tak e!! Ka lo ngaihtuah chhuak miah lo nia. Ke na chung chunga a chhuah chu a rinawm loh a, a insual phal lovin Pathianin a ke kha a tihnatsak a ni ngei ngei ang," Mampuii pawh chuan bu nghat nghat chung chuan a lo ti ve leh a, Ruatpuii chuan," A chanchin kan sawi hi hria se a duh lo ngawt ang! Kan chhuah chhe nasa mai si a," nui deuh chung hian a lo ti a, Mampuii chuan a kutzungchal chuan a hmui sîktîrin," Shhh... țawng rin loh tùr," a lo ti vat a, keini țhianho hi chu kan pui thei a nia.

"U Valpuia hi, a sual em maw ni le, ka tihna chhan chu insual sawi rîk a awm tawh hi chuan a lo tel ve thei ziah a! A mak ngawt mai, Y.M.A leh khawtlâng thil tihna leh hnatlâng angahte hi chuan a tlàwmngai thei ber ber zîngah a tel leh bawk sia, mi tlàwmngai an sawi hian a hming an sawi hmasak ber loh vêk pawhin pahnihnaah an sawi tlângpui ang, chutih rual chuan insual zîngah a hming a lo lang tel thei ziah bawk a, mak ve deuh chu a ni," Zmi chu a lo ti ve chuar chuar a, kei chu ka ngawi reng tawp, a chanchin ka hre ve tehchiam si lo va, hetia an sawi hi ka hriat ve chhun chu a ni deuh mai. 

"Au Vid-a țhianpa a nih vàng hian ka u en deuh lo thei lo va, Au Vid-a ka hau rual hian ka hau tel ve deuh ziah nain, nau anga min en ve deuh vàng hian huatah pawh a chãng ngai chuang lo, a châng hi chuan haw ve deuh se, sim daih se ka ti țhìn," Mampuii chuan a ti leh a, Rini chuan," Mi sual tak chu a ni lëm lo, zû a in țhin vàng hi a ni ve mai a, mi dang zu rui ve bawk nèn hlîr alawm an insual. A luhlulin a ngêng ve êm mai a, a sim lawk lo maithei a ni," a lo ti ve leh a, vawiin tlai zet zawng an luang liam tlâng a ni ang e, thil dang a leng hlawl lo.

An sawi ang tak takin zànah chuan insual thãwm hriat tùr a awm miah lo va, U Laltea lah kum thar hmang tùrin hmun dangah a kal daih si a, kum hlui thlah zàn lungmuang takin kan hmang tlingtla thei e. U Vid-a'n an inah a riahpui tih Mampuii'n a tûkah min hrilh a, room-ah zu an in rûk loh hrâm ka beisei.

Inkhâwm bàn Mampuiite inah kan pêng leh a, a inthlâk fel a, chuta țang chuan Zmite inah kan kal leh a, mi dang chu an inthlâk vek tawh, kan ina kal chiah kan bâk tawh. Kawnga kan kal lai chuan U Vid-a'n rawn biain U Valpuite ina thil pe tùrin a rawn hrilh a lo ni a," Nichîn khán min rawn biak tùr a nia," a ti nang nang a. "In inahin lo nghâk mai r'u aw, ka va haw leh lawk ang e," tiin an in lamah chuan a va lêt leh ta a.

Kan inah Mampuii nghah pahin thingpui kan lo in a, a rawn thlen chuan," U Valpuia kan pahin min kalpui ve vek r'u aw," a ti sauh sauh a, ka chãk ru viau a; mahse, ka ti lang ngam lo, ka ngawi reng tawp; mahse, mi dang chuan," A pawi hlei nem, engtianga nâ nge tih pawh hriat a châkawm alawm," an lo ti sap sap a, thingpui in zawh hnu chuan Pu Mawiate in lam pan chuan kan kal ta dial a.

U Valpuia chu țhutthlèngseiah a lo mu duai a, a ke na lam chu a lo thluang zuah a, a lo vúng ùl mai niin, a nat hmèl viau a ni. " A na ngawt ang," kan ti sap sap hlawm a, kan zîngah Mampuii chu a bengvâr ber a," Nizànahte i mu țha thei em? Mut a har ngawt lo maw? Au Vid-a'n a hnàr khum chiam chein ka ring a," a han ti a, ani chu a lo nui suk a," Bei ring ve khawp mai," a ti phawt a, a ke chu enin," Nizàn chuan ka mu țha lutuk lo, a tur nasa a, ka chét hlek apiang lah khân a na zêl a," a ti leh a, a dik ngeiin ka ring, a vûng nasa êm mai.

A pa Pu Mawia a rawn lût a, min rawn hmuh chuan," E, in rawn lêng a ni maw? In va fel ve! In ti țha êm mai, thingpui tui takin ka'n lumsak ang che u," nèlawm tak chuan a ti a, Mampuii chuan," Pa Mawi, kan rawn in tawh a, a ngai lo ang," a lo ti vat a, ani erawh chuan," In tawh a awm thei hlei nem, in in ve rêng rêng tùr a ni," a ti thung a, thingpui chhuang tùr chuan a kal sawn zui leh nghâl a.

"U Valpui, khawnge Au Vid-a hi?" tiin Mampuii chuan a han zâwt a, ani chuan," Dàwrah kuhva lei tùrin a kal a nih kha, a lo lêt țêp ang," a lo ti a, kan mit a intawng zawr a, ka melh sawn rang lutuk ringawt, ka thin a rawn phu rang nghâl bawk. Chutih lai chuan keini aia naupang tih hriat tak tleirãwl ve țan tawh sia hi inah chuan a rawn lût a, keiniho lo țhu deuh țhap min hmuh chuan a lài deuh nge ni, a tàwi deuh hrat a, U Valpuia chuan," Baby, i pu thingpui lum kha lo va pui ta che aw," a han ti a, ani chuan," Aw..." ti sapin a pu awmna lam chu a pan zui nghâl a.

"Baby-i chuan Krismas leh Kum thar a lo hmang tihna a ni maw?" Rini'n a tih chuan," Aw...A pu khawhar a hlau a nih kha," U Valpuia chuan a lo ti a, Mampuii chuan," A fel reuh ngawt mai, khawpui lama hman a nawm zâwk dâwn tehlul nèn, a pu a rawn ngaihtuah a," a lo ti ve leh a. 

Kan lêng rei ta phian. Țhiante an țawng duh a, U Vid-a rawn lan hnuah phei chuan an infiam hlawm a, kan nui nasa; mahse, U Valpuia lam chu ka en ngam tawh lo thung. Mampuii chuan nimin tlai lama an titite kha a sawi chhuak a; mahse, mi dangin an sawi dàn chu sawi ve lovin," Pâwn chhuak thei lova in han awm meuh chuan insual buai thãwmva hriat tùr a awm lo va, a tihchi ti zâwk mai ang, thinlung a hahdam a," a ti ta khauh mai pek a, chhûngrilah ka lo îp zawr mai, mãwl ve thei bawk siah!!  Mahse, anni zawng an innêlin an inngam a, an inkârah thu zêp an nei lo a ni ang e ka ti ta ringawt.

"Ramdinpui, sawi àwm leh sawi àwm lote hi hre ve teh, mãwl leh lutuk mai!" U Vid-a chuan a lo ti vat a, Mampuii lah chuan," Eng nge, insual an awm chânga in hming lam rîk a nih hian hrehawm kan lo ti țhìn alawm, kan zilh che u lahin zawm in tum chuang bawk si lo, hetia harh kara in awm hian nuam kan ti a, in bula awm pawh kan thlahlel sawt țhìn a ni," a lo ti leh mai a, U Vid-a chuan melh rum nasa mah se engah vak a ngai lo a ni ang, a nui sûng tho.

"U Valpui, i ke hi nâ se ka tihna lam a ni lo a nia, ka khawngaih lutuk che, i ke pawh kha a na ngawt ang tih ka hria, dam thuai se ka tihpui bawk che. Tlangvâl țhalai leh tha chak vànglai in ni a, a châng chuan in chak leh lutuk a, brake han rah deuh zauh pawh hi a țûl ve țhìn, chuan, chawlh hahdam hun pawh insiam thiam a țha," a tih leh chuan U Valpuia chuan en vang vang pah hian," Mampuii hi a lo fing ber mai," a lo ti ve sup a, ani chuan huatah pawh a chãng lo tih a hriat mai.

Zànah min rawn text leh hlawl a, an ina kan va kal kha ka kanah a lo ngai a, chu vàng chuan làwm thu rawn sawiin *I hmêl ka hmuh chiah khân ka dam nghâl sawng sawng thei, ka tân damdawi dik tak i ni*  tih hi a rawn ziak tel a, U Vid-a thil tùr pêkpuiin Mampuii kan kalpui a ni reng si a, amah kan anga min lo ngai chu nuam lo ka ti rilru khawp mai; mahse, ka hrilh kher lo, chhàn pawh ka chhâng lo. Vawiin khân ka țhiante khân ka awm dàn kha an hre thiam ang tih ka hlau tak zet, ka inthup ve viau chuan ka hre nain U Valpuia erawhin a hre thiam ngawt ang, tlangvâl puitling a ni tawh si a.

Kum a han thar a, thingtlângah zawng hnațâu a rawn țet chho a, lo tùr an vât suau suau a, Krismas hma lawka lo vât lâwk pawh an awm tho nain a tam zâwkin an vât ve lo a ni. Ka pa pawhin hlawhfa lain thlai hmun tùr zau vak lo an vât a, kei pawh kal vein ni khatah chuan kan vât zo vek a, mau sah chhum tlu deng deng țhìn chu hmuhnawm ka ti leh tlat a nih chu.

Lo vah zawhah sawhthing kan cho zui leh nghâl a, ka pa nèn kan cho ve ni tin a, a tak ve reuh hlawm si a, nuam ka ti, hahthlâk pawh ka ti lo. Kan cho khâwl a, vàu daihlimah kan dah khâwl a, kan chawh zawhah a hlãwmin kan hralh ta vek a, hralh to ber țum a ni ve bawk nèn, thawh hah man tèl chu nuam ve tak a ni. Ka pain," I duh ber thil pakhat i lei dâwn nia," min ti a, ka nu pawhin," E, lei mawlh rawh se, a thawk nasa êm mai," a lo ti ve a, a rûkin rilru a hlim vawng vawng thei nia. Kan khuaa sawhthing hralh tam ber berte zîngah tel pha lo mah ila rilru hlimna a kiam chuang lo, kan chantâwkah kan lung a âwi ve êm!!

Hun a ral a, khaw khata awm reng ta chuan U Valpuia chu ka hmu ta fo va, hmu ve reng ta chuan ka rin phâk bâk aia nasain ka vei chho ta telh telh mai, mi dang tân chuan a mak kher lo maithei, keimah ber hian heti taka ka vei chho ta mai hi mak ka inti lo thei lo. Amah tak hi chuan țawngkamin min duh thu a la sawi chhuak miah lo va, chhangkhât zet zeta min rawn text hi a ni deuh mai; mahse, chuti chung chung chuan a hriat miah lohin ka vei bur tawh mai a ni. Ràlkhata ka hmuh pawhin ka thin a tiphu rang dawt dawt thei a, min rawn hmu ve azeng pawh ni si lo hian. Min lo chîktu awm ngat țhìn se zawng min man chhuak rang ngawt ang, Mampuii hi hrilh tùr àwm tak ka nih laiin ka hrilh ngam dèr lo, an inpawh nasa mai si a, ka inthup theih chhûng chu ka inthup char char ang ka ti tawp mai. Ka rilru a kal ding châng phei hi chuan ka nu lo chesual kher kher kha pawi ka ti vawng vawng a, kha vàng kha ni berin ka hre lo thei lo. Hmun dangah la awm ni ila chuan tûn ang rilru hi ka pu miah lo ang maw le, khaw khata awm na nâ nâ chu kan inhmu zauh zauh lo thei si lo va, hmuh loh chuan a ngaihtuah loh ve theih mai ang a; ani lah hian a khât tâwk, theihnghilh theih loh tâwk vêl chiah hian min rawn text zuk zuk bawk si, hetiang chuan vei loha duh loh tum pawh a harsa ve êm a ni.

Dik tak chuan vei hi ka duh lo. Ka nu leh pa duh loh zâwng takin zu a la in țhìn zui a, chu mai a la ni lo, insual a la hrât zui bawk nèn, tu nu leh pa mah hian an fanu tân insual hrât leh zu in mi chu an duh lo tawp ang le, kei pawh hian zu in mi chu ka duh bîk lo; mahse, hei ka duh loh dànin ka awm chho ta chu a ni si, duh lo teh mah ila ka thinlunga ka veina hian min thunun záwk chu a nih tâk hi. Min lo chhaih lo tawp se... amah ka en dàn pawh hi a la dang lo tawp ang maw le, min lo chhaih miah lo se aw...

Ni khat chu dàwra ka awm laiin a rawn lût ve a, ka hmu chiah chu ka thinphu a danglam leh nghâl. A sweatshirt hâk chu a va inhmeh mai mai tak! A tân liau liaua an țhui ni àwma mawi a ni. Tlêmin a la bài deuh, a rei ve tawh tehlul nèn, a va dam har reuh tak! A lo bilh na viau a ni ngei mai. Biak ve ka duh viau laiin ka zak deuh a, thil zawrh inkhai tuar lam chu ka thlêk deuh reng ringawt a. Thil ka lei zo ka chhuak tùr chu," Min lo nghâk lawk," a rawn ti a, a hma aiin ka thin chu a phu rang lehzual sauh a.

"Thil hrilh duh che ka nei a."

Ka thin a va phu nasa tak! A su dup dup mai a, a hre phâk thei hialin ka ring! A thil min hrilh tùr chu rin rûk nei deuh mah ila tunah tak hian min hrilh ang tih ka hlau; mahse, ka hre châk deuh tho bawk si, hre châk tho siin ka huphurh ru deuh tho bawk.

"Eng nge---" ka sawi zawh hma chuan," Zaninah inhmu ang aw, a rei lo ang," ti supin a ding deuh dat a, ka zah avàng leh ka zàm avàng chuan engtia awm ve tùr nge pawh ka hre thiam lo, ka ding ve deuh dat dâwn nge ka kal tlang zêl dâwn? Ka lài, min tilài zo vek! Lai normal hi 10 ni ta se, tuna ka laihna hi chu 20 vêl zet a ni ang chu!

 

*NGILNEIHNA I LANTÎR ȚHINNAAH KHÂN RESULT DUHAWM TAK I HMU LÊT NGHÂL KHER LO PAWH A NI THEI; MAHSE, KHATIANG KHÂN TLÊM TLÊMIN KHAWVÊL HI A ȚHA ZÂWNGIN A SIAM ȚHA HRET HRET A NI*