☆Mr. BAD (ZAWLAIDI NEITUPA)☆ - 6 By Dingdi Pachuau

☆Mr. BAD (ZAWLAIDI NEITUPA)☆ - 6 By Dingdi Pachuau

Ka ngaihtuah zui nasatzia mai chu, "Inhmu ang aw," kha a ti teh ngawt a, "Lo kal rawh," a tihna hmunah ka pan dâwn tihna em ni? Min kohna hmunah ka pan ngawt ang maw? A duha min kohna hmuna kal ngawt tùr em ni ka nih? Ka bialpa pawh a la ni êm lo va. A thuhrimah, a thu âwihin kal ngawt ila ani pawhin eng angin nge min ngaih ang? "Ka thu thuin ka dah thei, ka duhna hmunah pawh ka ko kal thei," te min lo ti rêu rêu ang e, ka duh teuh lo mai! Kan inah min rawn lènchilh emaw, ni leh lo, hei chu a tihchi hauh loh! Khawi emawa ka lèn lai entîr nân Mampuii nèna kan awm dun laitea min rawn pan záwk a nih ngawt loh chuan amah hmu tùr hrim hrima chhuah chu ka ngam lo.

Thlèng ka sil laiin ka phone-a message rawn thleng thãwm chu ka hre reng a, ka en châk khawp mai a; mahse, ka sil zawhah pawh chuan ka en chuang lo. Inhmuhna hmun tùr a rawn sawi ang a *Ka lo nghâk tawh che* a tih ka hlau a; en lo ila, ka en loh miau chuan a thil sawi ka hre dâwn lo va, țha ka ti zâwk a ni; mahse, thiam erawh ka inthiam chiah lo deuh, min lo nghâk reng tak tak a nih phei chuan... Mahse, chhuanlam tùr hrimin, a rem loh zàn ti mai ang, zàn dang maha rawn lêng ngai hlei lo kan țhenawm Pa Chhuanate nupa an rawn lêng ve tlat pek a, chhuah hreh bawk nèn, tihzia ka ti dâwn zâwk em maw ni, ka chhuak thei ta lo hrim hrim a ni.

Mut dâwnah ka phone chu ka khawih ve ta chauh a, a message ka han chhiar chuan  *In kawmchhak Saron hnuaiah ka lo nghâk ang che*  tih hi a lo ni a, a message ka chhiar phei chuan ka inthiam lohna chu a zual ta sauh a, nuam lo ka ti ta riau mai. Ani ke na chung chungin, min hmuh ngei tumin, ka kal ringin min lo nghâk chu a ni àwm si a. 

*In lêng kan nei a*  tiin ka chhâng lét ta ringawt a, a hmu nghâl vat a, min rawn chhãng lêt nghâl a. *Ka thil tihah step khatin hma ka sâwn tawh tho*  a rawn ti teh daih a! Ka hre thiam lo khawp a, eng a sawina tak chu ni ang maw ka tih lai chuan message dang rawn thleng lehin *Ka message i rawn chhâng lêt ve tawh a*  a rawn ti leh a. Ni e, a message hi ka chhâng ngai lo rêng a ni; zanin erawh a lakah ka inthiam lo ve deuh tlat a, chu vànga chhâng lêt ka ni.

Ka thinlungin biak zui zêl a châk viau laiin amah beisei deuh leh amah duh deuh anga lan chu ka hreh ve deuh a, min ngaihnêp ka hlau a ni. Amah zâwk chuan min rawn text lehin  *Hun remchâng a awm leh mai ang, hmaichhan ngeia hrilh che ka duh si a*  a rawn ti leh a, *A nih chu*  tiin ka chhâng lêt ta ringawt.

Mampuii Birthday kan lawm zànah inhmuhna hun chu kan nei ta. Kan buai laih laih laiin U Vid-a nèn an rawn lût a, U Vid-a chuan," Happy Piancham le," tiin Mampuii chu lehkha mawia tuam báwm te reuh tê hi a rawn pe a, ani lah chuan âwih loh hmèl deuh hian," I'n tuam mawi ve a, sahbawn bâk a ni leh lo ang," a lo ti a, kan lo nui hak hlawm nghe nghe, chutiang chu an inpêk ngun tawh hmèl viau a ni.

"Mai mai chuan! I duh loh leh," tia U Vid-a'n chhuh leh a tum chuan," Ka duh lo tih ka sawi loh kha, ka duh... alawm!!" tiin Mampuii chu a țë vak a, an inchhuhsak thei ta lo a ni. U Valpuia pawh chuan," Piancham chibai le," tiin a kut chu lâksakin a chibai lâwp lâwp a, chutah," Pëk tùr che ka hre lo va, i duh záwng a nih erawh ka beisei," tiin U Vid-a bâwm pêk aia tê zâwk chu a pe ve ngei a, ani chuan," Ka lãwm lutuk ringawt! Ka duh sa," a lo ti a, hlim tih hriat tak hian a nuih sâng a.

U Vid-ate pahnih chu an awm ve ta reng a, kan in tùr lei lah chu kan inkim chiah chiahin kan lo lei si a, kan inrâwn sar sar a, 'pahnih chu lei belh leh mai ni se, artui pum 10 lei  tel leh bawk ila' tiin thu kan titlu a, ina pèn pah lawk ka duh avàngin Ruatpuii nèn kal kan rël a. Kan chhuak tùr chu," Khawiah nge in kal dâwn?" U Vid-a'n a rawn ti a, kan hrilh chuan," Zàna mipa tel lova hmeichhe chhuah chhuah a mawi lo," a ti a, U Valpuia chuan," Thil lei ve lawk ka duh a, ka lo kalpui dáwn che u em ni?" a lo ti ve thung a, Ruatpuii chuan," Chuti, Nunui nèn kal mai ta che u, an ina pèn lawk a duh tho sia," a rawn ti ta chat a, hnial dàn tùr ka hre mai lo, ka hnial chuan min hre thiam ang tih ka hlau bawk nèn, huphurh ru deuh tho si, châk ru deuh tho si chuan kan kal dùn ta a.

Biak dàn tùr ka hre lo va, bâkah, amah ka hmuh leh a bula ka awm apiang ka dik lohna țhin kha a rawn chhuak leh tawh a, ka lài leh hû tawh a ni. Ani lah țawng tam viau chi a ni lo bawk nèn, kan in ka pèn dâwna," Ngawi lawk aw," tia ka biak bâk chu kan țawng lo. Dàwrah kan mamawh kan la a, kan haw lam pawh kal lam ang bawkin kan kal chak a; mahse," Ding lawk ang," a tih sup tâkah erawh chuan ka ding deuh chut a, ka rin lâwk ang deuha thil a kal vàng chuan ka thin a phu rang nghâl dawt dawt a.

Kan dinna lai hi hmun reh deuh lai leh êngin a rawn chhun phâk loh thing hnuai a ni a, a thim ruai nghe nghe a, a phone êng a tithim daih bawk si a, ka hlauthãwng, a fâlin mipa zànah ka la awmpui ngai bawk si lo. Khua a vawh fahran loh  nèn, ka kut hmâwr thlan dup dupin a vâwt vek ang lawi a.

Ka kut a rawn dek ta, ka zàmzia chu a rawn hre ngei ang le. Ka lo dah sawn daih dâwn em ni ang tih ka ngaihtuah rauh rauh a; mahse, a kut lum nuam takin min dek chu nuam ka ti ru riau bawk si, ka dah sawn phal lo ta lo, bâkah, ka che sawn ngam tawh lo hrim hrim, ka ding zum zút a, ka thin phu ri ring lutuk chu a hria ang tih ka hlau ngawih ngawih a ni.

"Ka Nunui ni rawh."

Thim china kan ding chu ka lãwm tak tak a ni, ka mak ti hmël min hmu thei dâwn si lo va. A thil sawi dàn hi mak ka ti alawm, a danglam ka ti riau bawk. 'Ka bialnu ni rawh' a tihna a ni ngeiin ka ring a, 'Ka duh che' ti mai lova 'Ka Nunui ni rawh' han tih chu, a mak danglamin a dangdai ka ti ve tlat.

"Ka Nunui bîk liau liau ni tùrin ka duh che a ni," a tih leh pawh chuan chhàn ngaihna ka hre lo, sawi tùr vâng deuh mai asin, amah ka duh leh duh loh min zâwt mang bawk si lo, "Aw le," tia lo chhàn ngawt chi niin ka hre mang meuh bawk si lo va, ka ngawi reng ringawt mai a ni.

"Chhàn ka ngai lo, hunin a la rawn hril mai ang," a ti leh a, ka zãm viau nain engtin mah min tih loh avàng erawh chuan mi nawr chiam chi a ni lo tih ka hria a, tlêmin ka thaw a veng ta deuh. Nula leh tlangvâl ding dùn, pawi engmah khawih lo kan ni, kan kut intawk lai erawh a che ve neuh neuh a, kan thianghlim dùn khawp chuan ka hria.

"In va rei ve?" Mampuiite ina kan luh veh chuan Rini chuan a lo ti vat a, zah ve nâklaiin, chutia min lo ti phei chu ka zah a zual a; mahse, zak lo ang taka awm luiin Rini erawh ka en duh lo tlat a," Ãwihawm loh," ka ti mai a. U Valpuia'n," Nula leh tlangvâl chhuak dùn kan ni ve a, kan ãm ve bawk ang chu maw le," a lo tih chuan Ruatpuii leh Rini an lo țê vak a," U Valpuia hi, ve ngei chuan," an ti a, an nui dùn vak vak a.

Chumi zàn ațang chuan min duh a ni tih ka ringhlel tawh lo va, ka rilru pawh a zãng deuh haih tawh, chutih rual chuan a hma ang bawkin kan inhmu zing ngai lêm lo va, Pathianni inkhâwm bànah erawh hi chuan Mampuiite inah kan inhmu ve deuh ziah thung. 'Hunin a la hril ang' a tih kha, a inring tâwk ve roh hi ka tia, amah ka duh ve tho tih hi khami a sawi hma khân a hre daih tawh tho chuan ka ring a, chu vàng chuan a inrin tâwk phah pawh a ni ve thei tho. Țawngkain thil sawi dùn ngai lëm lo mah ila ka awm dàn ațang hian ka haw lo tih hi chu a hre hneh dâwn lutuk, min man chian dâwn êm avàngin a mitah tak pawh hian ka en ngam loh phah fo rêng a ni.

Hun a liam ve zêl a, exam nei tùr ka nih avàngin lehkha ka zir ngawrh a, U Valpuia pawh ngaihtuah loh ka tum ve hrâm hrâm țhìn a, harsa erawh ka ti. Message hmangin min rawn be zauh zauh a, ani pawhin lehkha ka zir țhìn tih leh kan hma lawkah exam tùr ka nei tih a hre ve tho, min rawn fuih ve ngial a, țha taka zir tùrin min rawn hrilh ve a ni. A inhmeh lo ka ti, a pa hi zirtîrtu a ni a, a fapa chuan a pa hnung chu zui ve àwm tak a nih vei nèn, matric a zir laiin zirna a chawlhsan daih a, an sir pakhatin a hrem vàngin. Chumi nî ațang chuan school a kal ta lo, a pain a thlèm ngial chung pawhin a zir zawm duh tawh lo, chuta țang chuan ram hna a thawk chho ta a, a taima a, eng eng emaw chu a thiam chho ve zêl a, tûn hi a thleng ta a ni. Țawngkain sawi chhuak lo mah ila ka haw lo tih a hria a, țhiante nèna kan awmho chângin țhiante hmuh loh leh hriat thiam loh tùra mi dêt ralh hi a thiam a, ka en duh loh luih chãng hian ka kea min rawn tlawh zauh loh leh a kutin min rawn tawk zauh a, en lo thei lo hian min siam țhìn.

Kan infawh hmasak ber zàn chu Lungleia exam tùra ka kal dâwn zànah a ni, ka pate'n hun teptèr lutuka kal an phal loh vàngin exam hma ni hnih la awmah chuan kal tùrin min ti a, sumo tlàn ni a ni ve bawk a, seat pawh ka hauh fel vek tawh bawk.

A hma daiha inhmuh a rawt bâk kha a fàla inhmuh a rawt ta hauh lo kha a nia; mahse, zanin chu a rawn rawt tlat. Ka exam chhûng chu Lungleia ka awm dâwn vàngin kan inhmu lo rei dâwn a ti a ni ang chu, min rawn message a, kan kawmchhak Saron buk hnuaiah bawk chuan inhmuh a rawn rawt leh a, tûn țumah hi chuan kei pawhin chhuanlam siam ka tum tawh lo, ka hmu lo rei ve dâwn êm a, bâkah, thil tihchian law law țha ka ti tawh bawk a ni.

Ka pate hnênah dàwra kal ka duh thu chhuanlama siamin ka chhuak a, ka han thlen chuan a lo awm ràn tawh. Țawng lovin duat takin min lo kuah nghâl a, duat taka kuah nihte zawng, a thlâkhlelhawm asin. Zak duh bîk lovin ka kuah ve dà dá a, zu rim a nam miah lo, a rim tui khawp mai lehnghâl a, a rimtui hman man chu a to ngawt ang.

"Ka Nunui bîk liau liau i ni," ti supin ka nghâwng chu a hmui chuan a rawn nawr châk châk a, ka lo mûr er er mai. Hetianga mipa tawh hi ka tawn vawi khatna a ni a, lo dawnsawn dàn tùr pawh ka hre lo, lo dawh tawp mai loh chu. Chutah, a awm dàn chu insiam remin a kut pahnih chuan ka bek tawn tawnah a rawn vuan ta, min kuai dâk zêl a, thil thleng tùr chu ka hre thiam ve chuan ka hria, a chhan chu movie lamah leh lehkhabu lamah ka hmuin ka lo chhiar ve fo tawh tlat.

Ka maimichhîng a, a hmuiin ka hmui chîp tlat a rawn tawh tâkah chuan ka meng zawk a, dìm taka ka hmui chu fâwpin a hnuah ka hmui chîp tlat chu a rawn nawr kau a, a lei a rawn hmang thiam țan ta, ka thâwk a rang chho ta phat mai. Min tih ang anga awm lovin ka lo che ve zêl a, ka lo chhâng lêt ve zêl a nih chu. Bâkah, a fawh chu nuam ka ti a, ka lo dawh ringawt thei teuh lo, mak takin a chêt rual chuan ka lo che ve zêl a ni.

Ka mut hmunah chuan ka hmui chu ka khawih leh ringawt țhìn a, nichîn khân U Valpuia khân hei hi a fâwp ngei a nih kha, chuan, kei pawhin ka fâwp lêt ve bawk a... Ka thaw deuh halh a, a fawh nawmzia kha, tiang tak khân infawh hi a lo nuam ang tih ka lo ngaihtuah phâk ngai lo. Mipa ka duh tak leh vei ëm êmin min fâwp a nia, mipa ka fawh vawi khatna a ni a, ka danglam hneh hlê bawk a ni, ka âwm a rawn khawih thuak phei kha chuan... Hostel-a kan awm lai khân țhianteho khân fiamthuin an sawi țhìn a," Bialpate lakah chuan kawm lutuk loh tùr, kâwng achin chung lam hi chu khawihtîr ve mai mai tùr, kâwng achin chung lamah rài theihna a awm lo," an ti țhìn a nih kha; mahse, ka pawmpui ve miah lo mai, zanin ațang chiah khân ka pawm lo zual.

*******

Ka rin aiin ka thiam a! Question hlui ka lo en kha ka chhawr ta viau a ni, kâr khatah paper khat ka nei deuh zêl a, zirna hun pawh a tam. A tàwp dâwnah erawh kâr khatah paper hnih ka nei dâwn thung; mahse, ka huphurh hran lo, a tàwp bera ka exam tùr phei chu ka huphurh lo ber  a, Pathian zârah ka tih țhat ber pawh ka ring.

A tìr lamah U Valpuia'n min rawn message zauh zauh a, thu chhiar tùr min rawn thawn lëm lo hian hla ngaihthlâk tùr hi min rawn thawn zâwk țhìn a, a châng chuan ka nuih a za thei viau a ni. A châng lahin voice message a ti thùl, a țawng hriat tùr awm miah si lo hian âr khuang rî leh khâwl ri ni àwm takte hi a rawn thawn a, a tisual ve hrim hrim nge chimawm a chhuah zâwk pawh ka hre thiam lo.

Thawhlehniah exam ka nei a, ka chhâng pângngai viau. Zirtàwpniah ka nei leh ang a, ka zo vang vang tawh dâwn a ni. Lungawi tak chuan ka innghahna ka ute in lam panin kein ka kal hnak hnak a, ka kal chak lêm lo viau, kawng chho ka kal a, ka hah ve a ni. Hmêl hriat hmuh tùr an awm lêm lo chu nuam ka ti, hmêl hriat hmuh hi ka hreh tlat țhìn si a.

Gov't College-a exam ka ni a, Tlabung pêng ka thlen chhoh chuan ka ding vang vang phawt a, ka kal leh hnuah ka hminga min ko ni àwm tak ka hriat chuan ka ding leh a, min kotu melh chuan ka hawi kual deuh a, chutah, kawng chhak lam dàwra U Valpuia lo ding chu ka hmu zui ta nghâl a.

"Eng nge i lo tih a?" tiin ka nuih nghâl a, hmuh ka inring lo nasa mai si a, chutia a hmêl ka hmu thut chu ka ngai tawh bawk a, ka hlim viau a ni.

Chawhnu hun zawng chu kan hmang dùn a, kan inngai tawh bawk a, nuam pawh kan ti viauin ka hria, kei phei chu ka nui reng mai nghe nghe. Restaurant-ah kan chàwl hmasa phawt a, a hnuah Zotlâng lamah Petrol lain kan lëng kual zui nghâl bawk a, min hmu tùr hrim hrima rawn kal a ni bawk nèn, a mai maiin hun kan khawh ral lo viau, kan awm dùn char char mai a ni.

Zirtàwpniah exam ka zo a, ka thaw pawh a veng huai huai mai. A tûkah ka haw a, ka u pasalin min thlah a, zànah pawh ka inkhâwm hman zán a nih chu. Inkhâwm bànah țhiante an rawn lêng a, kan bengchheng leh viau mai, an râwl hi a ring ve hlawm a, han awm khâwm laih laih hi chuan thãwm a ring lo thei lo.

"En teh u, star thar ka nei a," Zmi'n a tih chuan mak ti zet hian ka en hau a, mi dang erawh chuan," Ti ve ziah! Mikhual an rawn kal hi chuan i lo nei ve hman ziah," an lo ti thung a, ani lah chuan," Eng nge pawi? Ka duh hun hunah a thar ka nei thei alawm," a lo ti ve thung a, a nui duh miah lo zui.

"I star kha a hma chuan a che țãwng ve thei lutuk! An vêngah pawh 'insual peih ber' an ti nghe nghe, a pianthar hma kha chuan a sual ve thlâwt ni tùr a ni," Rini'n a tih chuan," A dik ang, a hmaite kha a ser nasa asin, an insualna ser a ni ngei ang," Zmi pawh chuan a lo ti ve leh mai a.

"In sawi tâkah chuan nizàn khân U Valpuia leh U Laltea pawh kuttum an inhmuh leh deuh a ni àwm e, ka lo hre ve chiah lo va, ka uin a sawi a," Ruatpuii chuan a ti a, Mampuii chuan," A ni maw?! Engtizia nge a? Au Vid-a a tel lo teh tlat a ni maw?" a lo ti vat a.

"Ka hre chiang bîk lo, ka inbual hlànin a nia, an inngeih lo ve hrim hrim a ni ang, U Laltea hi a ruih hi chuan a che țhing ve thei êm mai a, a chapo pah ve deuh bawk nèn, U Valpuia'n a ngaithei lo a ni ang," Ruatpuii chuan a ti leh mai a, Zmi chuan," A buaithlâk thei teh e!" a lo ti hap a, Rini chuan," A, rui insual duh hi chu han insual deuh rap rap se, tu mah hian țhelhin chelh lo se, an ințhațhen thei maiin ka ring, thu a tàwp thei zâwk ang," a lo ti ve leh a.

Țawng lovin ka ngawi reng a, U Valpuia tak chu aw... mahse, hei hi chu ka hriat sa vek a nia, hre sa lo ka ni lo, hre saa pawm ka ni. Ka rilru  tihrehawm tùr ka ni lo, zu a in țhìn a, insual a hrât bawk tih ka hria, chuti chung chung chuan ka hnar thei lo va, tuna rilru tihhrehawm nâna hman leh luklak vêl kha a țûl lo. Ka cho a, ka cho thlù a ni mai.

A tûk inkhâwm bàna a hmêl ka hmuh erawh chuan nizàn lama ka rilru kha chu paih bo hmak ang a ni. He pa hi ka duh hluah hluah a ni tih ka hre chiang sauh a, zu a in vàng leh insual a chìn vàng maiin amah ka duhna a kiam phah dâwn lo tih pawh ka hre chiang. A lamah ka thinlung ka hawng tlat tawh a, ka khãr mai mai thei tawh lo ang.

"U Valpui, i biang kha tlêmin a inrîn deuh riakin ka hria, engtizia nge ni?" Rini chuan a han ti chhuak chhak a, kei pawhin a hmêl ka hmuh tirh khân ka lo hmu nghâl rêng a ni, U Laltea nèn chuan an lo inkhawih fuh a ni ngei mai.

"Zawhte ngiau bengchheng deuhin min ham a," a lo ti mai a, min rawn en phei nghâl bawk. Ka lo en ve reng a; mahse, a mitmeng ațang chuan a thil ngaihtuah ka chhiar ve thiam lo.

"Zawhte rùi deuh a ni hial lo maw?" Ruatpuii'n nui paha a tih chuan mi dang chu an lo nui hak hlawm a, za vak lo chuan kei pawh ka lo țhen ve a, ani pawh chuan," Ni maithei," tiin nui chungin a lo chhâng lêt ve leh mai a, huat enah pawh a en lêm lo a ni ngei ang. An inngam ve hlawm a, kei pawhin huat chî-ah pawh ka lo ngai lêm lo.

"Zawhte rùi țenghneng zet hi chu man lawka bang thlang lam den nâna hman a tâwk chiah," U Vid-a chuan a lo ti ve leh a, Mampuii pek chuan," I tirâpthlâk e a! I inkhâwm bâng deuh chiah a, chutiang sawi te chu mawi pawh a mawi lo, inkhâwm bâng sawi chi pawh va ni suh," a lo ti vei hmak a, U Valpuia chuan," Dik chiah!" tiin Mampuii lamah chuan a kutzungpui a tipir vah a.

Thingpui hmeh tùr leia an kal hlàn chuan U Valpuia chu ka bulah rawn țhu hnaiin tukverhah chuan a rawn dâk ve a, Mampuii room lama a luh hlàn chuan ka kut a rawn vuan chat a, kei chuan," A nâ em?" ti sapin a biang chu ka melh zauh a.

"Umm..."

Kan inmelh chiang dùn viau mai; mahse, ka lài leh dèr tawh a, melh sawnin," Eng nge i hnawih?" tiin ka zâwt leh a, ka hmui ka pet pah zauh bawk a. Ani chu a lo thaw hawk a," Min thlĕm miah suh!!" a lo ti daih thung a, chiang zetin ka en leh phah.

*KAN TÛN HUN ZÊL HI ȚHA TAKIN HMANG ANG AW, HUN HMAN ȚHAT HIAN INCHHÌRNA LEH LUNGNGAIHNA A THLEN NGAI LO*