☆Mr. BAD (ZAWLAIDI NEITUPA)☆ - 7 By Dingdi Pachuau

☆Mr. BAD (ZAWLAIDI NEITUPA)☆ - 7 By Dingdi Pachuau

"Eng thil ---" țawng ring ngam lova ka tih lai chuan," Kan awmna hmun theihnghilhin ka fâwp mai dâwn che asin!" min rawn hnaih zual pah hian a ti sup a, a ti duh tak tak mai ang, kan hmai ni se a insi lo chauh tak tak a! Melh kâwkin ka thle sawn vat a," Tihchi dâwn loh lutuk!" ka ti sap a, ka sawi zo chiah tihah room ațangin Mampuii a rawn chhuak zui nghâl a, tlêma tlêmah min rawn phâwk lo chauh a ni!

"In va inngeih hmèl rial rial ve?! In inhnaih êm êm zui a, inngaizâwng pawh in ang ve mai dâwn alawm," nui chunga a rawn tih phei chuan ka lài bawk si chuan chhàn mai dàn tùr ka hre lo lutuk a, za lo zetin ka nui ringawt. U Valpuia chuan," Kan ni alawm, kan inhmeh ngawt lo maw?" a ti ve thung a, ka en hau ringawt! Mampuii pawh ka melh ngam tawh lo. Chuti teh thuta kan inkawp thu a sawi chhuah chu ka ring pha miah lo va, Mampuii ber lah hi ka la hrilh bawk si lo nèn, a... min dem dáwn lutuk, a thin pawh a rim ang.

"Ah... ni tak tak teh u, in inhmeh tak tak! A nuam ngawt ang," awlsam zet hian ani chuan a lo ti ve leh mai a, U Valpuia thil sawi chu fiamthu-ah ngaiin a ring tak tak lo tih ka hre ta nghâl a, ka thaw deuh huai nghe nghe. Chutah, thingpui hmeh leite an rawn lût zui nghâl a, nui awr awr chung hian an pawisa tlêm tê inkìr chungchânga an chhût dik loh dàn chu an sawi a, an nuih chu a za khawp mai lehnghâl a, kan boruak pawh a rawn tidanglam nghâl vek a, a rûk tak chuan ka lãwm kher mai.

Zàn inkhâwm bànah Mampuiite inah ka pêng haw a, U Valpuia chu U Vid-a nèn an lo awm a, inkhèl an lo en niin, min lo nghâk ru deuh a nih ka ring! Rei awm lovin ka haw thuai a, min zui haw ve nghâl daih, Mampuiite'n min rinhlelh dun loh hrâm ka beisei, nakin deuhah ka hrilh tak tak tawh ang. 

A hmun ngaiah kan inhmu fâl leh rih a, min kuah hlù hlú reng mai, a chângin ka nghâwng a fáwp zauh zauh bawk a, chutia a tih châng chuan ka lo îp leh chãwih țhìn, titi lêm lo mah ila a nuam veng veng tho. Chuan, zu rim a nam leh miah lo lehnghâl, a châng chuan ka hre thiam lo lek lek fo, zu in țhìn niin an sawi si a, a bul hnaia ka awm ve hian zu rim ka hre ngai si lo, 'in țhìn' ni lovin 'in zauh zauh' a nih ka ring ta zâwk.

"Ka chungah lungàwi loh deuhna i nei em?" ngawi renga kan awm hnu chuan ka ti chhuak sap a," I kianga ka awm dànah te?" ka ti zui leh zat a, ani chuan," Teuh lo mai! Ka lung i tiâwi veng veng," a lo ti sup a," Ka Nunui bîk liau liau kha i ni tlat a," a ti zui leh a.

"A țhat chu," ka tih chuan," Engati nge chu chu min zawh a?" a rawn ti ve thung a, kei chuan," Ka chunga lungàwi lohna i neih chuan min hrilh rawh aw, mi dang chunga hrithla lovin. U Laltea nèn in intihbuai chhan kha keimah vàngte hi a lo ni ang tih ka hlau a," ka ti leh a. Ani chuan," Ani chanchin lam kha chu sawi lo teh ang, kan hun hlu tak hi a chanchin sawi nân ka ui thláwt," a lo ti ve thung a.

Kan ngawi dùn vang vang a, a hnu deuhah chuan," Làwm thu pawh kha ka la hrilh miah lo che a, nang i lo awm hlauh a, ka lãwm tak tak a ni," ka ti leh sap sap a, muangchânga min kuai herin kan inhmachhawn a, thlà êngin min chhun ve ruai vàngin chiang vak lo chuan kan inhmu ve thei a ni.

"Ka ngaihtuah lêt cháng apiangin ka thin a la rim ziah, khatiang kha chu thleng tawh miah suh se," a ti nghut nghut a, min dawm nghet viau bawk a, a na deuh mah mah hialin ka hria. A chil lem khalhin," Ka kianga i awm chhûng chuan a thleng tawh ngai lo bawk ang," a ti leh sup a," I bulah chuan ka him ngéi ang tih ka hria asin," ka lo ti lêt ve a, a rûm deuh nghat a, chutah, ka kâwnga kuaha rawn kûn hniamin min fâwp zui ta nghâl a.

Mampuii'n message-in min rawn ûm zui a, mut dâwnah chauh ka hmu.  *U Valpuia nèn hian in inkârah eng emaw a awm em? I haw veleh a haw ve nghâl daih a*   a rawn ti a, hrilh ve nghâl àwm tak ka nih laiin  *Âwihawm loh e*   tiin ka'n chhâng hrãm a, ka hrilh rih loh chhan pawh message aia hmaichhan ngeia hrilh ka tum vàng zâwk a ni.

Hmaichhanah ka hrilh ta ngei a, a la titàu deuh zui. "Min hrilh ve vat àwm che a nia, inzëp thei lutuk mai, țhian țhaah pawh min ngai lo a nih kha," a ti a, chutiang lam a nih loh thu chuan ka han hrilh fiah ve ngial a, rei ngial hnuah chuan," A nih, in infâwp tawh em? Nge i virgin tawh lo hial zâwk?" a rawn ti chhuak ta pek a nih chu!

"Țawng ring lutuk! Mãwl lutuk mah ta che," țawng ring ngam lo, țawng sehchilh nak chuan ka ti a, a hmui hupsakin ka melh nghek bawk. A lo tãl a, ka thlah hnuah a nui ta nghek nghek a," I ninawm aw," ka ti hlak a, nuih pawh ka nui ve duh lo, ka hmui ka pet a. Ani pawh a hnu deuhah chuan insûm ve tain," I inhmeh lo e, ani nèn ber kher lehnghâl! In nih duh loh hmèl ka ti. Awi, ka nuih in tiza tlat a nih chu; mahse, in inhmeh chu ka ti viau lawi a," a ti zui ve leh a.

"Mi dang hi chu ka la hrilh rih lo ang, an thin a rim lo tùrah ngai ila, kan țhianho rau rauah pawh nang hi chu ka kàwm bîk che a, hun hi kal leh hret se ka hrilh ve hlawm ang," ka tih chuan a lo bu nghat a," A pawi lo,  an thin pawh a rim hran lo ang," a lo ti ve a, chutiang țawngkam a lo neih ve tâkah phei chian ka ngaih a țha deuh sawt mai.

Mi dang hriat lêm loh chuan kan inkawp chho ve ta zêl a, Mampuii'n kan chanchin a hria tih a hriat hnuah phei chuan chance kan nei thei ta zual a, min duat thiam a, ei tùr tui deuh deuh leh eng eng emaw ka duh tùr nia a rin hi chu Lunglei a kal châng apiangin min rawn hawn ve ziah. Ka phût miah lo nain nuam ka ti, ngaihzâwng neih hi a lo nuam a nih hi ka tih phah hial a ni. Nuam ve deuh mai asin, ka chhûngte leh ka țhiante chu thuhran, mi dang min ngaihsak êm êmtu ka neih belh ta si a.

U Valpuia nèn kan inkawp ațang hian a hmêl hi chhe lo ka ti telh telh a, ka duh telh telh bawk. Tlangvâl hmêl chhia a ni lo hrim hrim, hmêl țha tak a ni ti zâwk ang, chutah, khawsak pângngai ve tâwk tak niin sport a la thei viau zui bawk a, a pian a fit zui nèn, bialnu a neih nual tawh hi chu ka ring sa hrim hrim a, a lo dik chiah bawk. Kan khuaah mai ni lovin khaw dang dangah pawh a lo hûng ve nual tawh tih Mampuii'n min hrilh a, nikum hmasa mai pawh khân Lunglei Vênglaiah bialnu chhe lo zet a nei a, ni tawh lo mah se tûn hnai thleng pawh hian a la rawn be reng a ni tih a sawi phei chuan ka dinhmun a derthãwng ru riauin ka hre rum rum mai, thîk erawh ka duh miah lo va; mahse, eng emaw an inkârah a la awm a ni ang tih chu ka ngaihtuah lo thei lo.

"A luck ve a, a zei viau bawk a nih ka ring ta, a ex-te rêng rêng hian an rawn ûm zui duh êm mai. Ani lah hi inla pà ve chi, a țhen tawhte lamah rêng rêng a hawi leh tawh ngai si lo va, an beidawng hian Au Vid-a hi an rawn țahawh hial țhìn a ni, rawn pan hial pawh an awm asin," tiin a lu chu a han thing pah nak nak a," Au Vid-a pawh hi a buai phah țhìn viau a ni, U Valpuia'n a biak duh tawh lohho kha a lo chhàwn ta țhìn a nia, a chángin a lo hnèm ve bawk a, buaithlâk țhìn lutuk!" a ti leh malh malh a.

A ngawih vang vang hnuah," Kan khuaah hian tu nge a bialnu hlui ni rêng rêng? Ka hre ve ang em?" tiin ka hriat châk tak chu ka han zâwt ta a, ani chuan," Hre lutuk! U Lynn-i, U Michael-a u saw i hria a ni lo'm ni? Saw saw kan khuaah chuan a ex tharlâm ber a nih saw, nikum khân an inkawp ve zuai a," tiin a han nui a," U Zualtei khu a ni leh a, ani khu chu a rei ve deuh tawh, pasal pawh a neihsan țêp tawh khu," tiin a nui leh hak hak a," Chuan, a bialnu ka hriat hmasak ber chu U Vanlalzari, Haulawnga pasal nei daih tawh kha," a ti leh zat zat a, a lo hre zuah zuah khawp mai, engtin nge ka lo hriat ve loh ni? Hre rual chu ka ni ve tawh chiang si a.

"A va ngah tawh ve!!" ka lo ti sap a, ani chuan," A luck ve alawm, a zei hrat hrat bawk a, ni lo'm ni? Nang pawh a zùnah i uai ta duai duai mai a nia," a rawn ti ve thung a, ka lo nui sak ringawt, thu dik a ni ve bawk si a, han hnial pawh ka tum chuang lo.

"U Lynn-i saw chuan a la duh viau tih ka hria, khatih lai khân U Lynn-i khân bialpa kawp lai kha a nei reng a nia, U Valpuia khân a bêm thlu hmak thei a nia, mak chu a mak ve a ni! Mahse, an inkawp rei lo lulai khawp a, U Lynn-i sawn a duh huam huam leh lutuk a, U Valpuia khân a hnĕ a nih ka ring, tunah pawh hian hawi ïk se chuan a la kawp thei chiang ngawt ang," inti hre fê hian a ti leh a.

"I va hre zet zut tak!" ner nûnga ka tih chuan," Hre zet zut ang chu, Au Vid-a țhianpa a ni miau a, an titi ka lo ngaithla ru țhìn alawm, hrilh miah suh ang che. I hrilh vaih, ka lung i tihàwi loh vaih zawngin U  Lynn-i ka fuihpawrh ang a, i lâng lap mai ang," a lo ti leh zut zut a, a nui sûng bawk si a, ka va ngei tak!

Ka zâwt lo ang ka ti ve ngar ngar a; mahse, hun remchâng ka hmuh veleh chuan a bialnu hlui chanchin chu ka zâwt ta chhin a, ani pawh chuan zêp lêm lovin min hrilh ve mai bawk a, Mampuii sawi Lunglei Vênglaia mi kha a ni min hrilh ve chu, U Lynn-i hming erawh a sawi lang lo hrim hrim.

"Engati nge in ințhen a?" tiin ka han dîlchhût zui deuh a, ka bân chûl hoh hoh pah chuan ani chuan," Kan induh tawh lo a ni ang chu," nui suk chung hian a ti a, a mitah tak chuan ka en reng a; mahse, a thu sawi chu thu dik a ni nge ni lo ka hre thei lo.

"A nih leh kan khuaah hian ex i nei em?" tiin ka zâwt leh a, a lo thaw hawk a,, ka kut a chùl pawh chu tàwp nghâlin," Nei ve bawk e," tiin, ka rin loh deuh chuan min chhâng a," Nei lo," tia min chhàn ka ring deuh a nia, dâwt chu min hrilh bîk lo ve.

"Kei chu bialpa ka la nei ngai lo va," ka ti ve ta ringawt a, ka zah leh deuh si avàng chuan hnuai lam ka bih daih a, ani chuan ka kut rawn vuanin nghet zet hian a hmer a," I bialpa hmasa ber ka ni chu ka lãwm e," a ti sup a, min rawn hnaih sauh pah hian," Ka Nunui hi ka tâna mi hlu ber a ni," a ti leh a, ka samah a fâwp zui zauh a, a thil sawi chuan min tihlim tak zet a ni.

Zàn khat chu zannriah kîl laiin ka nuin," Heta awm tawp lo hian Aizawl lamah hostel-ah awm la, Coaching class kal la a țha ang, tuna i zirlai hi chu i zir zawm zêl thei tho ang a," a rawn ti chhuak a, kei chuan nui chungin," In bula awm ka la kham lo alawm, tuna mi hi han zir zo tê tê phawt ila, a rei tawh dâwn chuang hlei nêm," ka lo ti thung a.

"Heta i awm reng chuan, nula ve ta chuan hmêl duhte i nei ang a, hna nei hman miah lo hian thingtlâng mi pasalah i nei chawt ang tih ka hlau a ni, thingtlânga hna thawka awm zawng a râpthlâk, kâwla ni chhuak chhiara hna thawh a ngai a, i tlin ve dâwn lo. Chu vàng chuan heta awm lovin Aizawlah phei la, exam theih ang ang i exam ang, heti chen hi lehkha i zir tawh a, hlawhtlin ngei tum ang che. Ka chêtsual vàngin pângngaia class kal thei lovin tûn dinhmunah hian ka dah che a, a pawi pawh ka ti; mahse, tunah chuan ka dam chiang ta bawk a, a hma thei ang berin Aizawlah chuan phei thuai ang che," a ti leh mawlh mawlh a. Ka chaw ei chu ka chàwl rih a, ka nu chu melh zauhin ka pa ka melh leh a, ani pawhin ka nu chu a lo en ve tho a.

"Engati teh thut nge ni a?" ka pain a tih chuan ani chuan," A teh thut hlei nêm, vawiin lamah Puii nèn pawh kan inbia a, ani pawhin, 'Rawn phei rawh se, hostel-a awm kher ngai lovin kan bulah pawh a awm thei reng,' a rawn ti nghe nghe a, a ute bula awm erawh țha ka ti lêm lo. Inngaiin awmho chu nuam ti viau mah ila heta a awm rei chuan a rilru a chàwl vek palh ang, chawlh zeuh hi chuan thluak pawh hi a lo chàwl ve țhìn si a, a hnuah a hahthlâk țhìn,"  a lo ti leh a, a sawi dàn ațang chuan Aizawla min pheitîr thuai chu a tum ngheh hmèl riau, hnial dàn tùr pawh ka hre lo. U Valpuia nèn kan inkawp tih hi a lo hre ru ang a, chu chu duh lovin, min hrilh dawt si lovin min tirh bo dàn a ngaihtuah a ni thei mai lo'ng maw? Mahse, a hriat êm chu ka ring chiah lo deuh, hria se chuan min zawh mai àwm, a duh loh thu pawh min hrilh nghâl mai ang a...

"A dik reng mai. Ni e, kum khat chàwl ang chu i ni a, pângngai taka class i kal loh avàngin; mahse, kan chhûngkuain hlim takin hun kan hmang bawk a, hun khawhral mai maiah inngai miah suh ang che, dam tak leh hlim taka hun hman tlàn theih hi a hlû a nia. I nu sawi ang khân Aizawlah chuan i phei ang a, i thluak kha i va sâwizawi zui leh dâwn nia, ka fanu fel leh hmêl țha hian sawrkâr hna țha tâwk ta a thawk ngei ang tih hi ka hre chiang a ni," ka pa chuan a rawn ti ve a, ka va en chuan min lo en vein a nui pah a.

"Teh rêng mai, hna ka neih hunah chuan hah tak taka sawhthîng hmun i thlawh a ngai tawh lo ang a, ka nu nèn in pahnihin in duhna hmun apiangah in zin kual mai mai tawh ang," ka lo ti ve a, ka nu pawh chuan," Ni e, pawisa i hlawh chhuah ngei hmangin kan han zin kual ang a... a va nghahhlelhawm tawh tak êm!" a lo ti ve bawk a, fiamthu sawi chhovin kan nui leh dar dar a.

A rûk tak chuan Aizawla phei chu ka phûr lêm lo viau a ni, U Valpuia ka ngai dâwn êm mai. Kan inkawp tluang chho ve mêk a ni a, han kalsan daih chu ka huphurh a ni, ka ngai dâwn nasa mai si a, ani zawng mipa a ni a, min ngai ve vak lo ang. 

Mampuii chuan," Teh thut chuan! I va ngaihawm leh dâwn ve! I lo haw har tawh àwm bawk si a," a ti a, Zmi pawh chuan," Ka ning e, hetia awm khâwm dial dial hi a nuam asin le, i awm loh chuan kan kim leh dâwn lo tihna a ni a," a lo ti ve charh charh a. Inkhâwm bàn a ni a, Mampuiite inah kan awm khâwm leh mêk a, ka kal leh tawh tùr thu ka țhiante ka hrilh a ni.

"Khawvèl tàwp a hnai tawh, lehkha zir zir tawh loh tùr," thawveng zet hian Rini chuan a lo ti a, kan han nui leh rih a, Mampuii chuan," Kan țhian zînga sawrkâr hna thawk tùr ber a nia, ani tal hi chuan a zir zêl a ngai, nakinah pasal kan neih hunah thil min leisaktu tùr a ngai tlat alawm," a lo ti ve thung a, chutia a tih tâkah chuan Rini a rawn phûr thar leh a," Ni leh dâwn tak e! Lo inzir țàng țáng  teh khai, sawrkâr hna sâng tak thawk bawk la. Kei chu pasal ka neih hunah chuan Car thar ngat a nia chhawm ka duh dâwn nia," a tih chuan a bula țhu Ruatpuii chuan a han chùm awk a," Nasa suh, inneih zàna phah tùr mutphah pâr chhiai mai a tâwk chiah!" a lo ti ve leh a, chutiang mai mai sawi chuan kan nui bãwk bãwk hlawm a.

U Valpuia lo lût chu a biang ding lamah band-aid a inbel tih ka hmu nghâl a, tlëmin a mit pawh a vûng deuh bawk! Nizànah ka hmu miah lo va, khawiah emaw tu emaw nèn an lo insual leh tawh a ni ngei ang chu, buaithlâk thei țhìn teh e.

"U Valpuia chu i che pà leh tawh a ni maw?" tiin Rini chuan a lo fiam a, ani chuan nui suk chung hian min rawn en a, chhàn tum àwm pawhin a lang lo, U Vid-a zâwk chuan," Ramhuai nèn an insual a nih kha," a lo ti mai a, Rini chuan," A ni maw? Tu chu nge chak zâwk? Nang nge ramhuai? Ramhuai mipa a ni ngei tùrah ka ngai a?" a lo ti leh a, ani chuan," Ka tawtawlîk hrep kha," a lo ti ve mai a, Rini chu a lo nui hak hak a, a sualpui chu ramhuai ke pahnih nei a ni ngei ang le. Hetiang hi a ni bawk si a, ka awm leh tawh rih loh tùr thu hrilh pawh a huphurhawm riauin ka hria.

Hun remchâng kan neih dun veleh ka hrilh ve ta a, ka rin ang deuhin țawng lovin mit khap hauh lovin min en reng ringawt a, hre thiam lovin a thinrim ringawt ang tih ka hlau ber. A hriat thiam theih dàn tùr ang ber chuan ka hrilh fiah ve a, a țawng ve miau loh avàng erawh chuan eng nge a rilru hriat thiam a harsa ka ti.

"Ka lo haw ve leh thuai tùrah ngai ila---" ka tih lai chuan," Kum tàwpah daih a ni tawh ngei ang," a lo ti vat a, a sawi dik êm avàngin kei pawh chuan," Nia..." ka lo ti fân ve raih a, thu dik a ni dâwn si a, hnem nân dâwt hrilh ngawt ka duh bîk lo a ni. Ka ngai viau ang tih erawh ka hrilh ngam rih lo va, a chhan pawh kal lo tùrin min hrilh ang a, a thin ka tirim palh ang tih ka hlau a ni.

"I awm loh hlànin mi dang ka lo neihsan daih che i hlau lo em ni?" kan ngawih dun vang vang hnuah chuan a rawn ti a, a mitah tak ka en nghâl hrá a, fiamthu hmêl a lang miah lo!! Hlauthãwng ru tak hian," Chutin min sawi țhaih miah suh aw," ka ti țhat a, ani lah chuan," Thil awm thei lo a ni hlei nêm," a lo ti leh sup a, min chhàn dàn chuan ka awm a tinuam lo takzet a ni, dâwt a sawi miah bawk si lo. Mak ti tak leh rilru na ru tak chuan a mitah tak chuan ka en reng a, bialnu a neih tam tawhzia ka hriat ațangin a thil sawi chu ka ringhlel chhin eih lo.

"Kan awm hran rih vàng maiin min rinawm lohsan ang maw?!!" ka ti phawt a, chutah," Nia, i duh phawt chuan kan awm hran hma pawh hian i ti thei reng alawm," rilru na ru tak chuan ka ti leh a, fiamthu pawhin ka sawi bîk lo, ka awm loh hlana lo rinawm thei lo tùr chu engtin nge ka tih vak bîk ang? A thinlung ka thununsak thei lo va, ka tâna rinawm lo tùr chu chelh dàn ka hre lo, tih ngaihna a awm lo.

Thãwm a awm lo va, a reh vawng vawng mai. Hetiang mai mai tùra bialpa lo neih chu, ka thinlung a na vawng vawng lo thei lo. Keimah ka indem a, ka lo 'yes' kher kher kha pawi ka ti a ni, hetiang mai mai tùr a ni tih hi lo hria ila chuan aw...

"Khawi maw, min en teh," a rawn ti sup a; mahse, ka en duh lo. Ka zak zo tawh, keimah ka indem a, min en dàn tùr leh min ngaih dàn tùr ka ngaihtuah a, a fâla ka han awmpui duh ringawt maite hi, nula sihhnip takah min ngai tawh ngei ang. Ka kal bo veleh nula dang a nei zui leh mai ang a, rilru hrehawm taka ka awm laiin fiamthu thawh nân min han hmang zui ang a...

"Nunu..??" a rawn tih leh chuan," U Valpui, mi dang min neihsan dâwn rau rau chuan tun hunah hian ințhen---" ka sawi zawh hma chuan," Ințhen thu sawi suh! Engtiziaa chu chu rawn sawi chhuak nge i nih?" tiin ka bek tawn tawna vuan chung chuan a rawn ti a, a țawng chu a sehchilh deuh hlek a, a thin a rim a nih duh hmèl. Engah nge a thin a rim ngawt? Sawi chhuak hmasatu a nia, sawi chhuak hmasa lo se ka sawi lo tawp ang.

"I hria maw? Ka țhen dâwn lo che, nang pawhin min țhen tum chhin suh, khatiang lam kha chu sawi chhuak tawh miah suh ang che," a ti leh ngul ngul a, ka hmui chu pet fan fanin a hrawk bâwk che ralh ralh chu ka en tlat a, ka rilru a nâ tih a hriat loh nân a mitah erawh ka en duh lo.

Thaw hawk paha," Nunu, min en teh,   ka tihlau che a ni tiraw? Ka Nunui bîk liau liau hi mi dang ka neihsan ang che maw?! TEUH LO MAI!!! Thil âwihawm loh ber a ni," a tih tâkah chuan melh chhovin a mitah tak chuan ka en lêt ta sak a, ani pawhin duh tih hriat tak hian min lo en lêt ve reng tawh a, rawn kûn hniamin ka hmui a rawn tawk zui ta zauh. Lo ner khum sakin," Mi sualpa," ka ti ve sap a, a nghâwngah kuah zuiin ani pawh chuan ka kâwngah a rawn kuah ve vat a.

"Mi dang min neihsan lam kha sawi tawh miah suh, ka thinlung a nâ a nia," ka tih chuan ka hnungah a chûl a," Hmuh pawh ka hmu zo nâng, ka luck lêm lo a nia," a lo ti a. Âwih lo tih hriat zet hian ka kuahna thlahin a hmêl chu ka en vat a," U Lynn-i pawh a awm reng aw. Chuan, U Zualtei pawh; mahse, ani khu chuan pasal a nei țêp tawh a, ka hlauthãwng chiah tawh lo va," ka tih chuan a nui suk mai.

"Lawmawm reuh lutuk!" tiin ka biangah chuan a rawn piai ta vak a, ka lo țê țhat a," A na lutuk! Min thlah teh, a duk ngei ngei ang," ka ti chùl a, min thlah hnu chuan min piaina chu ka tuai vat vat a, ani lah chu a lo nui sûng a, a ngeiawm tak tak a ni.

"Aizawlah tlangvâl dang i melh vaih chuan..." tiin min han vau zui a, kei pawh chuan," U Lynn-i i lo melh taih vaih," ka ti ve bawk a, a hnâra ka hnâr rawn tawktîr nã nãin," Ka duh daih zâwk che," a ti sup a. Âwih lo fê hian," U Lynn-i a chhe lo fê zâwk!! A puitling tawh bawk a, chuan, a zei zâwk bawk ang," ka lo ti ve thung a.

Min en vang vang chuan ka zak ru khawp a, ka duhna lantîrin U Lynn-i ka tluk lohna leh ka thîkna ka lantîr pah chu a ni si a; mahse, kei ai chuan ani chu a thlannahawm fê zâwk tlat a, a hmêl țhat bâkah an awmthei bawk a, kan khuaah mi ai zirtîrtu hna thawkin a awm zui bawk a.

"Nula duhawm zet, tuna ka bula awm mêk, hmuhnawm deuh hi en nin a har ka ti a, ka tâ liau liau leh ka tân liau liaua rawn piang, ka Nunui bîk hliah hliah hi ka duh ber mai."

*******

Ka nuin dàwrah min tirh avàngin ka kal lawk a, ka nu thawhpui Pu Aia fapa U Malsàwma a lo awm ve a, min lo be hlut a, ka chhuak tùr chu," Ka'n kal ve nghâl teh ang," tiin a rawn ding a," Pu Duhawmate inah kal lawk ka ngai a," a rawn ti a, kan kawng a inan avàng chuan kan kal dùn nghe nghe a, Pu Duhawmate hi kan in piah lama awm an ni. 

Zàna lehkha ka zir laiin Mampuii'n min rawn bia a," Lo kal vat teh," a rawn ti teh ngawt a, a aw chhuak ațang chuan thil dik lo eng emaw a awm tih ka hre nghâl mai, min be chhunzawm lo chuan phone chu a dah zui nghâl daih a. Room ațang chuan chhuak vatin ka pa hnênah chuan," Pa, Mampuiite inah ka kal lawk dâwn aw, ka rei lo ang," tia hrilhin ka dîl pah a, ka nu zâwk chuan," Zàna nula mahni chauha chhuah chu a va țha lo êm!! Eng nge i tih dâwn a?" a lo ti a, kei chuan," Thil lam lawk a ngai a," tiin chhuanlam ka ngaihtuah chhuah hmasak ber chu ka sawi ta ringawt a.

Ka va thlen chuan Mampuii chuan U Vid-a room-ah min kai lût nghâl vat a, zu rim a lo nam rum rum mai a, chu aia mak chu ka mit chuan a hmu ta, min va barakhaih tak!! Khuma lo țhu U Valpuia mit chu a lo bui deuh chûr a, a mit hnuai lam a duk deuh rui bawk, a biang a kak a, a thî erawh an lo tifai tawh a ni ngei ang, band-aid a lo inbel tawh a.

*I HRINGNUN ZIN KAWNGAH HARSATNA TAM TAK HMACHHAWNIN BEIDAWN RUM RUM CHÂNG I NEI DÂWN TIH HRIA LA; MAHSE, HUAISEN TAKA HMACHHAWNIN CHÛNG CHU INHNEHTÎR NGAI SUH*