☆Mr. BAD(ZAWLAIDI NEITUPA)☆ - 10 By Dingdi Pachuau

☆Mr. BAD(ZAWLAIDI NEITUPA)☆ - 10 By Dingdi Pachuau

Lungleiah Tĕțanite inah ka chàwl deuh reng a, chumi hnuah thil eng eng emaw ka lei leh zet hnuah ka scooty chuan kan khaw lam panin ka inkhalh chhuak ve leh ta a, ka chau ru angreng khawp mai. Sumo service emaw motor remchâng emawa ka lo zawng lo kha ka inchhîr lek lek a ni, ka rawl dâwn chiang mai si, tunah pawh hian ka bân pahnih hnihin a na kham ngut ngut tawh, bâkah, khaw lum lutuk hian min hmet chàu ve bawk a.

Kawngah U Vid-a'n min rawn tlàn pèl a, satel helmet a khum vàngin a hmêl ka hmu thei a, amah ngei a ni tih ka hriat hma chuan ka thin a phu rang deuh dat dat thei. Han auh vak ka duh viau laiin min hriat loh hmèl êm avàng chuan ka ko duh ta lo va, nakinah an ina ka lèn hunah ka la sawi chhuak ang chu.

Ka nu leh pa min lo lawm dànah chuan ka lung a va âwi tak! Min ngaihzia ka hre thei a, kei ngei pawhin hmaichhan ngeia an hmêl ka han hmuh leh tâkah chuan an ngaihawmzia ka hre chiang zual sauh, anni hi ka ngai lo a ni lo, ka ngai dùn țhìn lutuk; mahse, thih hreha U Valpuia hmêl hmuh ka hreh êm avàng leh kan khaw mi, kan inkawp a ni tih hretute hmuh ka hreh vàng liau liaua haw ngai lo kha ka ni a, bâkah, kan nunhlui min hriat chhuahtîrtu a tam dâwn bawk a, ka ngaingam ţhìn lo a ni; mahse, tunah hi chuan hun a lo liam tam ve deuh ta bawk a, huphurh tho mah ila ngaihzam tumna rilru ka pu thiam  ve viau tawh a ni.

Zanriah ei khamah fai ser sawrin Mampuiite inah chuan ka va lêng phei a, ka thleng tawh tih ka hrilh duh miah lo kha a nia, min hmu thut chu mak a lo ti nasa. A lo au chùl a, min rawn kuah chûk chûk bawk. 

"Kum khati chen inhmuh loh hnuah i hmêl ka han hmu thei ta a, tunah zet chuan i lo nula tak tak tawh a nih hi, nula puitling, mahni kea ding thei ngat i ni hi ka chhuang che a ni," a ti chùl a, ka beng bulah," Hma lam pana huaisen taka i awm ka hmu hi ka lãwm bawk," a ti zui sar sar a. Kei chuan eng mah sawi lovin nghet deuhin ka kuah lêt ve ringawt thung a.

A hnuah an chhûngkua chu ka chibai kual ta vek a, U Vid-a nupui Latei pawh a takah chuan a lo hmêl țha daih zâwk ka ti a, a dul kawh nasa tawh lutuk erawh chuan nuih a tiza tlat pek thung! An inneih țantirh lamah khân nau a chhiat a, an inrûk avàngin inneih pângngai pawha innei thei lovin an intlãn koh mai mai a, Haulawnga mi daih a ni ve nghe nghe a, engtin nge an inchhar tihte pawh nakin lamah ka la zâwt ve ang chu.

Man inhlan naktûk mai a ni tawh bawk a, in pawh an singsa nasa tawh a, naktûk chawhma lamah banner an târ ang a, pangpâr erawh khàwi sa vek a nih avàngin buaina tùr a awm lo. 

Țhian dangte an rawn thleng zêl a, kan bengchheng chèl chùl viau a ni; mahse, a nuam ve tlat. Țhiante bula awm hi chu a lo nuam a ni, rilru helhkam nei lovin kan țĕ chèl chúl thei a, mitmei vèn a ngai bawk si lo, rilru engtháwl takin kan duh duh kan sawi a, kan ințan thâm bawk si a, hei tak hi ka mamawh chu a lo nih hi. Ka dam sawng sawngin ka inhre hial a ni, tunah chuan nula puitling tak tak ni ve tawh hlawmin pakhatin pasal a nei ve dâwn ta rêng a, Rini'n a tih hmasak ber ka rin tehlul nèn. Ka han sawi chhuak phei chu amah ber chuan min rawn chùm awk awk a," Ka nei lawk dâwn teuh lo! Nulât hi a nuam, bâkah, ka 'h' viau lo aw, 'h' deuh ber chuan pasal a neih dâwn mai hi," a ti pek a, Mampuii rawn hawi nghâl hrâin," Ka 'h' i tihna maw? Ka 'h' awkawng lo, ka la virgin reng bawk," a rawn ti a, kan nui lo thei lo, za êm êmin kan nui tlãwrh tlãwrh a, Nu Zotei rawn kalin," A va mak tlãwrh tlãwrh ve! In hlim viau a ni maw? Mahse, tlêmin insûm deuh ula, saw lamah patling an titi si a, duh aiin in thãwm a ring deuh mah mah a," a rawn ti nghe nghe a ni.

Zàn riakah min sâwm viau nain nakzàn lama riah khâwm kan rawt tâk avàng chuan ka riak ta lo va, a nulât hun, kan inkawm khâwm lât lât theih hun a tàwp tak tak tawh dâwn avàngin nakzàn lama an ina riakho ngei tùr chuan kan inthlah hlawm a. Mampuii chuan min thlah haw a, a titi pah a, ka ngaithla pah tho nain ka rilru lehlamah erawh chuan zanina U Valpuia hmêl rawn lang miah lo chu ka ngaihtuah a, mak ka ti deuh a, an nuin a thunun hneh deuhah ka ngai ta ringawt a. Ni e, a țha daih zâwk, thunun hneh rawh se, zu pawh a in tlèm phahin insual pawh a hrât tawh lo deuh ang chu.

Ka rin aiin ka rawl lo. Zîng ka tho chhuak pawh chu ka zia viau a, chaw ei kham veleh Mampuiite in lamah ka phei leh vat a, man inhlan huna Hruaii nèn an sama an kilh tùr bakkilh chei mawi ka hawnsak chu ka keng nghâl bawk a, a to dùn ve reuh a, mawi pawh a mawi ve viau rêng a ni.

Kan buai sang sang a, banner kan târ a, ribbon leh pangpâr khàwiin in kan chei leh bawk a, hmuh a nuam ta viau e. Man eitute tlai lama an ei tùr chawhlui buatsaihtute pawh an phu ve suau suau mai. Mampuiite unau, hmun danga awm leh pasal nei chhuakte an rawn haw khâwm a, unau paruk lai an nih vàng hian an rual a, an han awm khâwm phei chu U Vid-a tih loh chu, fa nei vek an ni tawh bawk a, an ri ve chèl chùl mai.

Man hlan hun hmain kan haw a, inti mawi ve zetin kan kal khâwm leh vat a, Mampuiite pahnih pawh chu an lo inchei mawi ve khawp mai. A pasal tùr hi kan khuaa mi a ni nain ka lo hre ngai vak lo va, a pute bul, Lawngtlai lama a awm daih vàng a nih ka ring. An inneih hnu rei vak loah Lawngtlai lamah an phei leh daih dâwn ni àwm a ni a, Mampuii chu a ngaihawm vung vung dâwn viau a ni.

Țhian man kan ei vek a, thlâte kan laho leh zawr zawr a, keini țhianho aia nuam ti chu an awm kher lo ang.  Chaw ei tùra kan intlar lai chuan ka tum loh deuhin U Valpuia ka hmu ta chiah mai, ani pawh chuan min rawn hmu ve chiah a, ka hawi sawn rang hlê a ni, fatu zîngah a lo tel ve reng niin. Ka thin lah chu a phu rang dawt dawt hlê a, kum thum hnuah pawh a hma ang thoa ka thin a la tiphu rang thei chu ka duh lo viau mai. Muang fãn raihin boruak ka hîp lût a, muangchângin ka thaw chhuak leh a, chutianga vawi li nga vêl ka tih chuan tlêmin a zia ta. 

Chaw chu ka ei puar lêm lo, ka ril a tițâm lo zo vek a, ka țhiante'n mak min tih loh nân ka ei hrâm hrâm a ni zâwk. Chaw ei zawh lamah erawh chuan puitlingho titi bula kan awm peih loh avàngin an in piah lawka Leikhapui an dawh duaiah chuan kan țhu khâwm tal tal a, boruak a nuam a, khua a la tlai chhe lo bawk nèn, ka boruak chu nuam lo viau lo se chuan zài dal dal ka châk ngawt ang chu.

Zànah chuan Mampuii room, a thuam chhawm tùr a dah khâwm avànga chêp ta vekah chuan kan inhnawh khâwm a, a theih ang ang chu khumah dah chhovin chhuatah mutna kan phah a, kan thâwl fahran lo khawp mai. Khua a lo lum pah ve bawk nèn, kawrbah leh kekawrbùl ha farin  kan mu a, puan pawh kan sin peih lo.

Mi mãwl awm khâwm leh ta chu, an inneih zàna an chét dàn tùrte chu an sawi chhuak a, kei chuan ka lo ngaithla a, ka sawi ve lêm lo. Nuih hunah erawh ka lo nui ve a, an țawng zàwi thiam hlawm vak si lo va, room lehlama mute'n an lo hria ang tih hlauhawm tak a ni.

"Mampuii dawtah chuan Ruatpuii, a nih loh pawhin Feli. Chuan, Nunui'n a dawt leh ang a, chutiang chuan ti ang u," Hruaii chuan muang cherh chawrh hian a rawn ti chhuak a, Rini lehpek chuan," Hur dàn indawtin i ti deuh a ni maw?" rang zet hian a lo ti a, kan nui leh ta vek mai. Amah Rini ber chuan a làwm fâl a, kan nui ring deuh bawk nèn, hauh kan tuar leh ta ngei e.

Mut kan tum tâk hnu, kan ngawih tâk vek hnuah chuan ngaihtuahna ka kàwm a, duh lo viau mah ila U Valpuia hmêl kha ka mitthlà lêt a, khawvël lamah a tlãn nasa deuh a ni ang, a lang pawr êm mai. Ni e, a nun a nia, a duh duhin a hmang thei alawm, U Lynn-i'n a thunun thei vak lo a ni maithei, nge zu leh nupa nun lamah a tlãn nasa zâwk ni ang, a hmêl a chhiat phah viau tihna phei chu a ni lo, a chĕrin a pawr viau e tihna a ni mai a, a khabe leh biang hmulte a meh fai táwk loh vàng pawh a ni ang, a sam pawh a sei deuh bawk a. Kan inhmuh lohna a rei ve tawh a, hmêl lan dàn pawh dang ve deuh thei tùr a ni ve tawh tlat a ni. Chutiang lam hlîr ngaihtuah chu duh lovin thâwk ka la a, mut dàn insiam remin 'naktûk lamah chuan rilru thar leh thinlung tharin hun hman ka tum tak tak tawh ang' ti rilru rauh rauhin muthilh chu ka tum ve ta a.

A tûkah kan biak inah ngei mai chuan anmahni tâwka ropui thei ang berin an innei ta a, khua lum deuh mah se keini pawh a mawi thei ang berin kan inchei a, țhian țha ber inneih nîah chuan mawi takin kan inchei ve ang chu. Inkhâwm pawh kan tam viau mai a, mite pawh hian Dàn thianghlim ngeia inneite hi chu kan lo lawmpui deuh bîk niin ka hria.

Biak in tualah chuan thlâ kan la chuai chuai a, vul nî a ni ve bawk a, mi dangte pawhin an phone an hmet ve mawlh mawlh tho. Tu mah indem thei kan awm lo ve, nakinah hun a liam leh hret hnuah kan han en lêt ang a, lung a lêng duh dâwn êm asin.

Zànah moneitu Zârate in lamah hun kan hmang a, Mampuii kan awmpui ve rih a, rei tak erawh kan awm lo, an chàu ang a, mut thuai pawh an duh ve ang. Inneih ni hi ni hlimawm, hlim nî mah ni se a chauhthlâk ve a, khua a lum bawk nèn, mo ni lo tân pawh a chauhthlâk ngawih ngawih a ni, Mampuii pawhin sawi chhuak kher lo mah se a chau dâwn chiang.

Ka mu tùrin ka dawhkàn drawer chu ka hawng a, thlalâk lo awm reng chu la chhuakin ka en chiang a, U Valpuia nèna kan thlalâk kha a lo ni a, ama min pêk a ni nghe nghe. A print-tîr a, pahnihin; pakhat min pe a, pakhat chu amahin a kawl thung a, Mampuii min hmehsak kha a nia, tunah hian la kawl ve tak ang maw? Aih, a pawt chhe vek tawh ang, a nih loh pawhin a paih daih tawh ang chu. Rilru na ru tak chuan U Valpuia hmêl chu ka en chiang a, hun kal tawh mitthlâah rawn lang zui nghâlin min rawn țhen hun lai kha ka ngaihtuah lêt vang vang a.

~~~~~~~

"A va lêng àwm ngawih ngawih ve!" nui var var chung hian Rovi chuan a rawn ti a, ka en vat a, ka nuih ve ringawt. Hostel chungah lâwnin ka thuamhnaw ka pho e ka tia, chhuk nghâl lovin ka hawi kual a, ràl hla taka tlâng lang pãwl ruih chu thlîrin U Valpuia ka ngaihtuah chhuak a, ka lung a lêng ru veng veng a ni.

"Ani pawhin a ngai tho ang che, kan ngaih deuh hi chuan anni pawh hian min lo ngai ve țhìn tho a lo nia," a rawn tih leh chuan," Tak tak ni se," ka lo ti ve a, nui chung vêk hian," A ngai zâwk daih maithei che a ni," a ti leh a, âwih vak lo hian ka han en a," Ani chu mipa a nia, a lung a lêng ve vak lo ang, pà lo nih hi an hlau thei sia maw," ka ti a, ka nui sak a.

Zanriah ei kham hnu lawka ka phone a rawn rîk chuan ka nui sak a, ka message hmuin min rawn be hma dâwn a ni chiang mai. Ka nute chu nichîn deuh khân ka bia a, anni chu an ni lo sa, U Valpuia bâk a ni thei lo.

A lo ni ngei a. Uang zet hian," Hello? Nangmah i ni chiang mai, ka ngaih deuh kha," ka'n ti a, min rawn chhàn nghâl loh avàng chuan," Vawiinah pawh ka ngaihtuah reng che a, ka message i hmuh vàngin min rawn be hma tihna a ni tiraw?" ka ti leh a, zàn dangahte chuan dâr 9 vêlah chauh min rawn be țhìn.

"Nunu, ințhen ang."

Fiamthu mah ni se ka hlauthãwng lek lek hman tho. "Het, chutiang sawi suh, kum pawh a tàwp hnai leh tawh a, ka rawn haw thei țêp tawh a nia, ka ngai lutuk tawh che a, hmuh che ka châk viau tawh bawk," ka ti mawlh mawlh a, kei hi chuan amah fiam mai mai nân pawh ințhen thu hi chu ka sawi chhuak ngai lo ang.

"Ka fiamthu lo a nia, mipain ințhen thu a sawi chuan ințhen a duh tihna a ni," a rawn tih leh pawh chuan ka ring phal lo, thu dik ni tùrin ka phal lo a ni ber. Ka thin erawh a phu dik lo țan deuh tawh thung a, chuti chung pawh chuan fiamthu a ni tiin ka la inhrilh ru mawlh mawlh tho.

"Hmeichhia min duh huam huamtu hi mipain kan ngaithei lo fo, ințhen thu ka sawi a nih chuan kan ințhen țhìn bawk. Ka bialnu hluite pawh kha ka țhen vek an ni, ințhen thu ka sawi tawh chuan ka ning che tihna a ni mai."

Na khawl khawl tak a ni. Hetiang taka țawngkam nâ hian min țawng khum ang tih ka la suangtuah chhin lo asin. Nâ ka ti lutuk chu ka mittui a tla zawih zawih a, insùm tum pawh ni ila awmzia a awm lo, ka thei lo bawk. Țap ri chhuak lo tùrin ka kut chu ka kaah ka hnawh a, a hnuah chuan lukhamah ka hmai ka phûm a, ka țap tlawk tlawk mai a ni, tunah tak hi chuan dam thlâkhlelhna rêng ka nei lo, thi ila a nuam zâwk daih ang.

Tlêma ka pângngai hnuah Mampuii thil awmzia ka zâwt a, ani pawhin a lo hre miah lo va, mak a ti viau zâwk a ni. Thil awmzia hriat chian a lo tum tùr thu min chah a, khumah țhuin ka meng reng a, mut chhuak awm hek lo, ka țhu meng reng a, ka rilru erawh a buai nuai nuai thung. U Valpuia kha a rui sual ang a, a tum loh deuhin khatiang thil kha a rawn sawi a ni ang tihte ka ngaihtuah a, naktûk lamah zâwt chiang leh ta ila, mumang hrehawm deuh mang hi ka intehkhin, a hrehawm êm mai.

Ka tlaivâr chiang asin, chhìn khat tê mah ka chhîng lo. Khumah țhu rengin kal sawn ka tum lo va, inphih harh lam pawh a lang chuang lo, Mampuii chuan thil awmzia chu hre chiang vat vat se ka ti, ka nghâkhlel tawh lutuk! U Valpuia ruih vàng lo ni se, min rawn be chiang leh se...

Mampuii pawh chuan thu dik tak a hre bîk lo va, U Valpuia'n a hrilh hek lo; mahse, a hnuah thinrim zetin U Valpuia'n zu a in nasat thu leh U Lynn-i a tawmpui thu chu min rawn hrilh ta a, zàn pawh a riahpui ni àwm tak a ni. U Valpuia kâ ațang chuan a hre lo va, a U Vid-a sawi a hriat zâwk a ni àwm e. U Vid-a chu U Valpuia țhianpa ber a nia, a hre dik ngei ang, dâwt a ni lo ang.

Kár khat chhûng chu mumal lo takin hun ka hmang a, Rovi a fel ëm mai a, min ngaihtuahin min awmpui reng a, class pawh kal lovin min awmpui a, min hnèm a, ka tân min țawngțaisak bawk a, zahthlâk chu ti ru viau mah ila ka zak zo lo va, tihngaihna lah ka hre hek lo, hetia awm hi ka duh bîk lo asin; mahse, ka duh dànin ka awm thei si lo.

Ka țap a, thil ka ei thei lo va, zànah ka mu thei bawk si lo, Rovi'n chaw min dawhsak ziah a, ka ei ngai lo thung. Ka taksain a tlin ta ngang lo a ni ang, hmai phih tùra ka kal chu nikhaw hre lovin ka tlu ta nghe nghe a, U Valpuia min țhenna avàng chuan damdawi in hial ka thleng ta a nih chu. Ni khat chauh ka awm a, ka harh chhuah hnuah doctor-in inenkawl țha tùra min hrilh hnuah min hawtîr a, chauh erawh ka la chau khawp mai.

Mahse, tihngaihna awm tawh hek lo ta chu, zàwi zâwiin ka rilru ka siam a, hetia awm tùr hi ka ni lo tiin. Chak tak leh huai taka awm tùr ka ni, mite pawh an lo ințhen ve fo tho a, rilru siamin hma lam an pan a, hlimna an chhar thar leh țhìn a ni. Hnung lama thil awm chu theihnghilhin hma lama hlimna chu an ban țhìn, chu chu kei pawh hian ka ti ve thei tùr a ni ka ti a, rilru siam tharin ei tùr pawh tui ti lo chung chungin ka ei lui hlek hlek a, ei ve hlek hlek ta chu thâ pawh ka nei chho ve hret hret a, ka chak chho ve ta zêl a, ka tum bawk a, taksa lamah buaina ka nei ta lo.

Na taka min siamtu chungah chuan phubâ lâk ka tum lo va, thil thleng ngai lo a ni lo tiin ka infuih sauh sauh zêl a, harsa viau mah se ka zirlaiah ka rilru ka sâwrbing a, Krismas hmanga haw pawh ka tum lo. Mampuiite chuan min ngaihtuah hlê a, min rawn be reng a; mahse, U Valpuia chanchin min hrilh an tum hi chuan kan inbiakna ka titàwp daih zêl a, a chanchin them hlek pawh hriat ka duh lo a ni. Min rawn be dâwn lo tih hre mah ila a number chu ka delete zui ta bawk, na taka min siamtu hi ka contact list-a a hming leh a number a awm ve reng a ngai lo, paih bo vang vang ang.

Mahse, ngaihtuah loha theihnghilh tum mah ila ka thei lo chiang lutuk! Zînga ka harh veleh ka ngaihtuah chhuak a, zànah ka mut dâwnah ni se ka mitthlaa lang ngei ngei chu amah tho a ni. Lehkha ka zir lai ngei ngei pawhin ka lehkhabuah chuan a hmêl ka hmu țhìn, theihnghilh hi chu ka tum peih ta lo va, ngaihtuah reng loh erawh ka tum bawk a, ka thei ve hret hret a; mahse, ni khat chauh pawh amah ngaihtuah lova hun hman hi chu a har thláwt a ni. Chu vàng chuan rilru siam thar lehin min tihnatna ațang chuan hlawhtlinna țha zâwk chang ngei tùrin ngawrh lehzual záwkin lehkha chu ka zir a, Pathian zârah ka hlawhtling ta rêng a; mahse, hna ka țan nîah duh lo teh mah ila ka hre chhuak leh vawng vawng a, ka ngai thar ta tlat a nih chu.

Mipa, a bîkin tlangvâl lakah ka invêng ta khawp mai a, min biak hmasak loh phei chuan kei chuan țûl tàwpah lo chuan ka be ngai lo, hna lama ka pute leh ka thawhpuite an nih ngawt loh chuan. Mipaah chuan College ka kalpui, kan khuaah pawh rawn kal tawh, Mala leh Ruatsaka kha ka be ngun ve ber a, anni pawh hna an nei ve ve tawh a, hna nghet ni mah se hna sâng tak a nih hran loh ve ve avàngin hna sâng zâwk dîlin exam leh interview an la hmachhawn ve pah reng tho a ni.

*I RILRU PUTHMANG LEH I THIL THLÌR DÀN A DIK PHAWT CHUAN TU MAHIN AN TICHHE THEI NGAI LO ANG CHE*