☆Mr. BAD(ZAWLAIDI NEITUPA)☆ - 11 By Dingdi Pachuau

☆Mr. BAD(ZAWLAIDI NEITUPA)☆ - 11 By Dingdi Pachuau

Ka pain," Kan inhmu khâtin hmun dangah hna thawkin i awm a, ei tùr siam leh thuamhnaw sûk engkim i kutah a awm tawh si a, rei lo tê i awm chhûng tal hi chuan duat che ka duh," a ti a, eirawng ka bàwl leh ka insûk pawh chu a phal lo va, ka nu chuan," Puitlin a zir chho ve zêl zâwk dâwn alawm; mahse, duat êm êm hi chu a phû reng tho. Thla tina pawisa tam tak hlawh chhuak thei fanu ka nei hi nuam ka ti takzet a, ka chhuang bawk a, a thawh chhuah ngeia min leisak ka puan pheikhawkte hi bun nuam ka ti asin, a chhiat rak thlengin ka bun dâwn a ni," a lo ti ve a, ka hlawh lâk hmasak bera puan pheikhawk ka leisak, hlui ve tawh deuh tak chu a lek valh valh a. Ka pa kha chapal bun nuam tak tùr ka leisak bawk kha a ni a, ani pawhin a la bun chhe lo, a roh viau tih ka hria a, kan inbiak chânga a bun țhat phal loh thu a rawn sawi te hian ka nuih a tiza țhìn a nia.

"Vawiin chu lovah kan kal dâwn em ni? Kan lo pawh ka hmu ve châk a nia," ka tih chuan ka pa chuan," Ni a sain khua a lum êm mai a, i chàu chhe palh ang tih a hlauhawm, thlai tuh erawh țo țan tawhin hmuh pawh a nuam ve țan tawh a," a lo ti a, chutiang tak chu ka hmu ve châk alawm, hnim thlawh tùr erawh a la têt dâwn avàngin a la thlawh theih rih dâwn chuang lo va, kal ka châk tho a ni.

Kan kal ta tho a, khua lumin ni sa viau mah se thingtlâng hna thawk rilru puin thlai țo țantìr chu hmuh nuam ka ti a, a țo lohna chu ka pa hmuh loh laiin ka hai chhin a, hmuh theihin páwn lamah a lo la țo chhuak lo mai mai a lo ni, ka vûr leh vat a, chutiang chuan a țo lohna chu ka en kual zêl a, Vaimîm pawh bi sàwm vêl chiah chiah chu ka tuh leh  bawk a.

Haw lamah khaw chhûng luh dâwnin Pu Bela ram chhuak tùr nèn kan intâwk a, ka pa nèn chuan an inbe rih a, Pu Bela biak hi chu duh aia rei biak a awl țhìn a, hman deuh hlek a ngai țhìn. An inbe rei leh dâwn tih hriain zàwi muangin ka kalsan a, nî a sa deuh hlek nèn, in thlen thuaia inbual ka châk tawh a ni.

Pi Lalite in ka pèl tùr chu min lo hmu a ni chêk ang chu," I pa i fehpui ve a ni maw? I va fel ve!" tia min lo biak avàng chuan ka ding leh rih a, thingpui ina chàwl rih tùrin min han sâwm ve ngial nain mawihnai takin ka hnial a, ka kal leh chiah tihah ka lam pana rawn phei ka hmuh chuan ka inhûm ruh a, che buai miah lo tùr leh ka taksa leh ka rilru thunun tùrin ka inbuatsaih ru nghâl a, kan intâwk ngei dâwn, pumpelhna tùr kawng dang a awm lo. Pawi lo, engah nge pumpelhna ka zawn ngawt ang? He pa hi hêl reng tùr ka ni lo, ka hêl lo ang, ka thiam loh pawh awm lovah engah nge ka intihhrehawm viau zêl ang? 

En pawh ka duh lo, dàr pho deuh ah leh induhtâwk tak chuan ka kal lui ve tlat a, ani erawh chuan min rawn en ngei a ni tih ka hre chiang, a duh phawt chuan min en mai mai rawh se, a pawi lo, ka hek phah nâng. Ka kal pelh hnu chuan a rûkin thâwk ka la huai huai a, min en zui zêl a nih ka ring, ka tukkhum a hik deuh mep mep tlat. A laka ka induhtâwk êm avàng hian mak min ti a ni ngei ang, a dik alawm, kum thum chuang kal taa tleirãwl tê kha ka ni tawh bîk lo, nula puitling tâwk tak, thla tina pawisa ka mamawh aia tam la lût thei kha ka ni ve tawh tlat.

Chhùn lama ni a sat êm avàng chuan zàn mut dâwn thlengin ka biang a la sa vat vat reng a, ka vut tihuhin ka han dep leh ringawt țhìn a, kawngro erawh a su tehchiam lo. Ka pa pawh a chau deuh a ni ang, țhutthlènga a zâl mai mai chu a lo muhìl niin, ka kai tho nghe nghe a, a inthiam lo viau zui. Tunah chuan a lo upa zual ve ta deuh a, ni sa pawh a tuar thei viau tawh bîk lo a lo nih dâwn hi ka tih phah. Ni e, a upa ve deuh tawh a, kum 60 a pèlhna pawh kum 5 lai a lo ni ve ta, feh lah hi a la peih si a, hahdam taka hna thawh a thiam bawk si lo, a nuam tih ber a ni ve miau bawk si a, a buaithlâk chu a nih hi. Hahdam taka hna a thawh theih dàn tùr hi hre chhuak ila...

WhatsApp message tone a rawn rîk chuan ka ngaihtuahna ram ațang chuan ka harh chhuak a, ka han en a, ka save loh number mah ni se tu number nge a nih tih zawng ka hre chiang ngang mai. A va zak lo tak, message min la rawn thawn ngam a nia! Hmeichhe dang min pansan avànga min ţhentu khân message min la rawn thawn ngam a nih chu, mihring hi a lo va inan loh theih ngai êm!! Chhiarsak ka tum lo hrim hrim, a țùlna pawh ka hre lo.

Kan khuaa ka awm chhûng chuan ka lêng tam lo va, ka țhiante'n min rawn lènchilh zâwk a, Mampuiite inah erawh vawi hnih ka lêng ve a, ka inkhâwm leh tawp a, chu zawng chu a ni mai. Ka țhiannu ve ber a nih avàngin Mampuii chu an pa nèn chaw eiah kan sâwm a, chaw ei khamah pawh haw nghâl mai lovin an lêng ve reng a, kan titi nasa. A pasal pawh ka rin aiin a lo țawng duh ve roh a, ka pate nèn pawh an titi thei ve viau mai.

Hna zawma ka kal leh hnuah chuan ka lung a lêng ve reuh kher mai. Kan khua leh kan in ka ngai a, ka nu leh pa ka ngai bawk a, haw leh ka châk viau a ni; mahse, Mampuii'n pasal min neihsan tawh a, a pasal khawsakna hmun Lawngtlai lamah an phei thuai dâwn a, haw leh theih hunah pawh a hma ang kha chuan nuam ka ti tawh chuang lo ang, kan țhianho zînga ka kawm berin pasal min neihsan tawh si a. 

Ka nu sawi ka hre reng țhìn. "Hna nei kan nih chuan kan hnaah kan rinawm tùr a ni. Eng hna pawh ni rawh se, rinawm taka kan thawh phawt chuan malsàwmnain min zui țhìn. Sawrkâr hna hlauh phei chu mi nazawng thawh theih loh leh thawh phâk loh a ni a, kan hlawh hmuhna a nih vàngin țha takin, taima tak leh rinawm takin kan thawk tùr a ni, mi sawi theiha thawh miah loh tùr," a ti țhìn a, ka la vawng țha rih khawp mai. Ka la thawh rei loh vàng pawh a la ni maithei a; mahse, rinawm taka thawh hi chu ka tum ve a ni.

Dam hi chuan hun hi kâr lovah a ral ve zung zung a, Fùr a rawn ințan leh a, ruah sûr hi chu nuam ti tho mah ila a sùr tluk tluk hi chuan ka ning țhìn. Thuamhnaw sûk pho ro a theih loh țhinna lai tak hi buaithlâk ka ti bawk. Kei phei chu ni tin chhuah ka ngai si a, duh hunah thil pho senga haw ve theih ni bawk si lo ta chu, current hmang thuamhnaw hem rona ka lei tawp a, zànah ka hem ve mai zêl.

Zàna thuamhnaw hem tùr ka buaipui lai chuan Mampuii'n min rawn biain ruah sûr kan nin tawh thu chuan bul kan han țan phawt a, ani pawh chuan a lo ning ve ngang tawh a ni, fiamthua," Kekawrte hul pawh ka nei lo țêp tawh a ni," a rawn tih chuan fiamthu vêk hian," Ha lovin kal teu teu la ni mai alawm," ka ti a, kan nui dùn vak vak a, a hnu deuhah erawh chuan thutak ve ta deuhin a ruak lo țan tih chu min hrilh ta a," Yes!!" tiin hlim takin ka nui a," Awi, in thil tih chu a lang chhuak dâwn ta chu a nia?" ka ti leh phawt a, thutak leh thutinin," Nutei ka ni thuai dâwn e, a làwmawm tak tak a ni," ka ti leh ta zâwk a.

Kan inbiak zawh chuan ka ngaihtuahna ka kàwm zui ta a, hun kal tawh ngaihtuah chhuakin hlim taka kan inkawm laite, thil dang ngaihtuah hauh lova inhmu khâwm lât lâta kan nuih huat huat țhin laite kha tunah chuan nun hlui mai an lo chang zo ta si, tunah chuan inhmuh leh inkawm chu sawi loh, khua hmunah pawh awm thei tawh lovin phone chauhin kan inbe thei ta a, Mampuii hlauh phei chu pasal, mi nupui a ni tawh a, fa hial a pai tawh a ni si. Dinhmun hi a lo va danglam thei tak! Ngaihtuah thui zêlin U Valpuia khân min țhen lo ta se, tunah hian kan la inzui reng ang em? Inzui zêl ni ta ang ila kan innei ve tawh hial lo'ng maw? Nge kan tintuah ve țan chauh zâwk ang? Ka lu ka thing nak a, tunah zawng, ani chuan a duh ber ber a kawp thei ang a, nupui atân pawh a nei tawh hial maithei; mahse, kan khuaa ka haw lai khân nupui a nei nia an sawi àwm chu ka hre hauh lo; mahse, innei lo pawh ni se nupa ang chu an ni tawh tho ang chu, an tawm dun tawh kha, hetiang hi chuan an zawngchhang duh an tih kha; kei chu hei ka la single tluang zêl chu a nih hi. Mipa lak ațangin ka inla hrang ve êm mai a, min bêm tumtu tân pawh ka hawi lo lutuk hian a ti tîm zo vekin ka ring, dik tak chuan nat leh ka hlau tawh a ni. A vawi khatnaah ka na êm mai a, ka tisual nawn leh ang tih ka hlau ngawih ngawih tawh a, chu vànga inthiar fihlîm chu ka ni. Engtiziaa zanin chu hetiang lam ngaihtuah chhuak ta vak nge maw ka nih le? Țûl lo lutuk mai.

Weather forecast ka han en a, ruah sûr nasa tùrin a lo la hrilh lâwk a, tûn kâr chhûng a la ni zui. Mampuii sawi ang deuhin inhem rona nei lo chu kekawrte hâk tùr nei lo an awm thei tak tak ngei ang, thingtlâng lam hna thawk mite phei chu an ni thei dâwn lutuk; kei zawng ka la vànnei a, current a awm țha hlauh a. Khawi lai kawng emaw minin ban titluin emaw a hrui vaw chatin emaw a awm ang tih hlauhawm tak a ni.

Zàna ka nute ka biak pawh chuan ruah sùr nasat thu chu an lo sawi ve tho a, ka in bul chu min hlauhawm a awm leh awm lohte min zâwt a, a awm loh thu ka hrilh chuan," A țhat hlauh chu, kan ngaihtuah deuh che a, he lam chu ngaihtuah kan ngai lo a nia, i ute pahnih pawh ka bia a, an ngaihtuahawm loh e, i lo ngaihtuah ang e," a rawn ti a. Chutia a rawn tih tâkah chuan U Puiite in luah ka han mitthlà nghâl a, an in hmun kha chu a rem ve viau a; mahse, an in piah lawka in rawn sa thar ve deuh khân lei kha an lài nasa a, tuihâwk kawng kha an siam țhat viau loh chuan a hawrh thei maithei a, chu chuan min a siamsak ve thei tho mai tihte chu ka ngaihtuah kai zêl a, ruah sûr chu bâng tawh se, sûr tawh rih lo se ka ti ta viau mai, motor accident bâkah in hmun min, lei tawlh vànga kawng ping leh mihring thi hriat tùr a awm leh nawk ang tih ka hlau a ni.

Kâr khat chhûng chu a sûr ti ila a dik ang, sûr bur bur erawh chuan a ni reng bîk lo va. Chanchin thar lamah lei min leh chènna in min hlauhawm vànga chhuahsan thãwm hriat tùr a awm nawk rêng a, fùr lai ngang a ni a, Mizoram phei chu a ram leilung a nghet lo si, in sak kan huai bawk si a, tlâng ram a ni bawk nèn, fùr lai hi chuan lei min thu hriat tùr a awm reng dâwn chu a nih hi.

Tĕțani pawhin tunah chuan fanu cute deuh a nei ve tawh a, a tĕ reuh bawk si a, a lawmawm reuh tak tak a ni. U Puii erawh a insiam tawh a, fa pali lai an neih tawh avàngin an duh tâwk tawh a ni àwm e. Bâkah, nau neih a harsat thei si a, doctor-in nei tawh lo tùrin a ti a, doctor thu an âwih ta a ni. Nakinah Pathian zâra ka dam chhoh ve zêla pasal ka la hmu zo ve te a nih ngai chuan ka fa chu U Puii fatehovin an la awm ve hman ang chu.

Krismas-ah ka haw lo va, haw àwm tak ka nih vei nèn, ka thawhpuite nèn intiamrualin kan zin daih a, zin nân hun kan neih loh êm vàng a ni pakhat a. Ka pate pawhin min khap bîk lo va, zin ka tum thu ka hrilh lai chuan," Rawn haw la chu a pawi lo viau a; mahse, in lo tum tawh a nih chuan hlim takin zin rawh u khai, hun ãwl in neih lai a ni ve a, hlim tak leh fîmkhur tak siin hun in hmang dâwn nia," tiin min chah thlap nghe nghe.

Nuam ti takin hun kan zu hmang a; mahse, hmun khatah kan awm rei hman lo, hmun fan tam kan duh si a, kan insawn zung zung reng mai. Ka la kal ngai lohna hmun hlîr a ni a, nuam ka ti viau a, hlâwkthlâk pawh ka ti, vànglai ka chèn ve ni maiah ka ngai, Pathian pawhin vànglai chen chu min phalsak kha.

Ka nu leh pa tân thil ka leisak ve ve a, an hmuh hunah chuan an lãwm ve ngawt ang. Ka țhiante tân pawh man to tak leisak thei vek lo mah ila țha ve tâwk tak ka leisak vek, ka zin tih kha ka hrilh hlawm si a, thil ka hawnsak ngei kha an lo beisei ngei dâwn tih ka hria a ni.

Ka zin haw ațanga ni rei lo tê hnuah ka nu hnên ațangin U Valpuia pa boral thu ka hre ve ta chiah a, kan zin lai, Krismas leh kum thar inkâr khân a boral a ni àwm e. Ka hriatna chhan pawh kan inbiakin ka pa a awm ve leh awm ve loh ka zâwt mai mai a, khawhar ina a lèn thu min hrilh ta a, tu nge thi tih ka zâwt vat a, tah chuan min hrilh ta chiah a ni.

"I zin lai a nia, hlim taka hun hmang tùra kan duh vàng chein kan hrilh lo che a nih kha, tlêm laia accident a tawh ațang khân dam nî a hmu țha hlei thei ta lo va, a khawngaihthlâk khawp mai," a rawn ti a, min țhâwng êm mai a, sawi tùr hre lovin ka ngawi reng ringawt a ni.

U Valpuia chu ka ngaihtuahnaah a lo lût vat a, engtin tak tuar ang maw? A tuar viau ang em? A tuar ang, an pafa chauhin an awm tawh a, a chènpui, amah hringtu a pa ngeiin a boralsan a ni a, a tuar lo thei lo ang. Thihna kher hi zawng, a na ngawt ang, ka pa hi lo boral ve ta se, nâ ka tiin ka tuar dâwn lutuk! Ka khawngaih hlê mai U Valpuia chu. Engati nge mi dang pawhin min rawn hrilh miah loh le? Hetiang thil serious lutuk hi chu min rawn hrilh ve tùr an ni asin. Ka nute hi chuan min rawn hrilh duh lo pawh ni se anni tal chuan...

Mahse, thil kal tawh ka han ngaihtuah lêt a, min țhen ațang khân U Valpuia chanchin rêng rêng ka hre duh lo a nih kha, titi nikhua leh kan inbiak chãnga min hrilh an tum deuh pawhin ka ngaithla duh lo va, a hming lam hawi an sawi hlek lahin thil dang ka sawi hnan nghâl zêl a nih kha. An tân chuan sawi rîk ngam a ni tawh lo, bâkah, ni e, ka zin daih a, ka haw thei dâwn chuang lo va.

Mahse, hei hi chu chhiat lam thil a nia, min hrilh ve àwm chu ka ti tho; mahse... a, ka tih dik loh a ni, anni chu ka mawhchhiat ngam lo, min hrilh ngam lo a ni mai. U Valpuia chu aw... engtin nge a awm ang? Amah maiin a awm tawh àwm si a, a khua a har duh àwm mang e; ni leh lo, U Lynn-i a bulah a awm reng thei tak ang.

Chumi zàn chuan ka muhìl lo chiang kher mai. Ka țap chu ka ti lo; mahse, U Valpuia tân, amah ka khawngaih vàngin ka mittui a tla a ni. Duh lo teh mah ila U Valpuia chu ka ngaihtuah lo thei lo a ni, a chan tùr ka ngaihtuah a, a nu a chân tawh a, tunah a pa, a unau dang awmpui a nei tawh si lo, a tân a hrehawm dãwn êm a ni. Ka rilruin a tân ka țawngțaisak mawlh mawlh a, a tawrh a zia deuh nân leh Pathian thlamuanna a chan theih nân ka dìlsak a, chumi rual chuan a pa thihna ațanga amah ngei pawhin a thil tih țha lote a bànsan theih nân ka dìlsak bawk a ni.

Ka mu thei lo chuan phone chu lain a message ka la 'open' miah loh chu ka han hawng a, message 10 lai a lo ni nghe nghe. Ka han chhiar thla dan dan a. A hmasa ber hi chu Mampuii pasal neiha kan khuaa ka haw țuma min thawn kha a ni tih ka hria, khata mi pawh kha hei tunah ka chhiarsak ta chauh a nia, ka lo va sual tak! Chhiar mai mai chu a har loh tehlul nèn, ka chhâng lo mai ang a... hmm... mi sual tak ka lo ni.

*Mi fel tak kha mi sualah ka chhuah che niin ka hria, kan lo ințhen hma kha i tân a țha zâwk a ni*   tih ka chhiar phei chuan sual ka intihna a zual ngawih ngawih. Nula leh tlangvâl inngaizâwng chu an ințhen ve fo a, engah nge ka dem viau lêm ni? Mi tawn ang tho alawm ka tawn, ka tawng danglam viau bîk pawh a ni lo va, khua hmuna awm lo kan ni a, mipa tân hi chuan thlèmna hi tawrh zawh loh a awl bîk dâwn êm asin, a bul lawkah amah lo duh êm êmtu a lo awm ve reng bawk si a.

A tûka Mampuii ka phone chuan ka sawi chhuak ta nge nge a, ani pawh chuan inthiam loh hmèl tak hian," I zin lai kha a ni ve sia, ka hre rauh rauh che a, rawn hrilh tùr che ka ni ve reng; mahse, i rawn haw thei dâwn chuang si lo va, bâkah, hlim taka hun hmang tùrin ka duh che a, ka hrilh buai ta lo che a nih kha, tihngaihna a awm chuang bawk si lo va," a rawn ti a, 'a chanchin lam hawi rêng rêng kha i hre duh si lo va, ka hrilh ngam lo che a nih kha' tiin min mawhpuh duh miah lo, thiam loh min pe duh lo tihna a nih chu, ka țhiannu ve êm êm hi chu aw...

A nau neih hun tùr kan sawi a, a huphurh ru ve khawp mai a, kan khuaa a nu leh pate bulah erawh nau neiiin a haw thei dâwn thung a, Lunglei damdawi inah a nei thei ang chu. Ni e, lo haw phei rawh se, nu leh pate, chhûngte bula nau neih chu a nuam deuh ang chu, a inthlahrunthlâk loh deuh bawk ang a.

~~~~~~~

A hna ațangin ka nu a pension dâwn a, school naupang leh a thawhpuite'n an thlah ve dâwn a, chumi hun hmang tùr chuan min chah ve a, chawlh lâk kher ngai lovin Inrinniah a lo ni lehzêl bawk nèn, ka haw ve leh ta rih a. A rûk tak chuan haw chu ka hreh lutuk, U Valpuia hmuh ka hreh a, ka hmuh ngei ka ring bawk si a, bâkah, a pa pawh ka ràl ve ngei a ngai ang chu, rei ve deuh hlek tawh mah se; mahse... chu tak chu ka huphurh viau a ni.

Remchâng takin Zirtàwpni tlaiah ka thawhpui Zari ute nupa, Lungleia phei tùr motor-ah ka chuang phei ta hlauh a, Lunglei ațangin Tĕțani pasalin min thlah haw a, zànah ka haw a nih chu. Ka pate'n min lo ngaihtuah khawp mai a, ka thleng chu an lo thaw huai mai. Têțani pasal pawh chu riak mai tùrin an sâwm a; mahse, khua a țha a, kawng a țha ve tho bawk a, a haw leh thuai zâwk a ni.

*THIL ȚHA LAM A NIH PHAWT CHUAN 'A, KEI CHU...' TIA MI DANG TÂN KIAN MAI LOVIN 'MITE PAWHIN AN TIH THEIH CHUAN ENGAH NGE KA TIH THEIH LOH BÎK ANG?' TI ȚHÌN ANG CHE*