☆Mr. BAD(ZAWLAIDI NEITUPA)☆ - 12 By Dingdi Pachuau

☆Mr. BAD(ZAWLAIDI NEITUPA)☆ - 12 By Dingdi Pachuau

Ka țhiante hnênah ka haw dâwn tih ka hrilh lêm lo bawk a, tu mah an rawn lêng lo va. A tûk lamah erawh hrilh hriat loh theih loh an nih vàngin ka be kual a, thingpui leh ei in min siampui tùrin ka duh bawk si a ni. Mipa lamah sàwm tùr ka hre mai lo va, U Vid-a ka ngam ve deuh ber lah pa dik tak a ni ve tawh si a, sàwm tùr ka vài viau laiin U Malsawma a rawn lang hlauh mai a, kan buai ringin a lo kal ve tawp a ni àwm e, ka haw tih pawh a hre lo, a bengvàr ka ti tak tak a ni.

Kan kawt sîr lam, kalkâ atâna kan hman loh lamah thuk siamin mei kan nun vut vut a, a țhenin thingpui tùr tui kan chhuang a, programme dâr 1-a țan tùr mah ni se ka nuin a thawhpuite leh school naupangte chu tlai lama chawhlui eipui ngei a duh tlat avàngin chêt muan ringawt chi a ni lo. 

Tĕțanite chhûngkua an rawn thleng ve hlawl mai a, naute cute tak pawh an rawn hruai ngei e. Têțani pasal, U Ngura'n min rawn pui ve nghâl vat vat a, a rawn inchei lëm loh dànah hetiang tih tum hrim hrima rawn kal hi a nih ka ring, ani pawh a fel khawp mai.

Buai zualpui a reh deuh hnu chuan țhu khâwmin thingpui kan in a, kan titu a, chutah chuan nizàn lama thil thleng U Malsawma chuan a rawn sawi chhuak ta zauh a, ka beng a lo verh nghâl zar mai. Feli'n a lo zâwt chiang nghâl zat a, a sawi dànin U Valpuia leh an țhenawm tlangvâl an lo insual ni àwm tak a ni, a chhan ber nia a sawi dàn chuan U Valpuia woofer play chu a ring deuh a, an in chu inhnaih lua lo mah se a ring pha viau tho a ni ang, play zàwi deuh hlek tùrin țhenawm tlangvâl chuan a va hrilh a, tah chuan ani chu lo thinrimin an insual ta ni àwm tak a ni.

"A rùi chhe ve thei êm bawk a ni, mi rùi ang a ni ve ngai bawk si lo va, a thin a chhiain a chak êm êm tho si nèn, insualpui hi a nei ziah lehnghâl a, tumah phei chuan amah zilhtu ber a pa a awm tawh bawk si lo va, a khawngaihthlâkin a buaithlâk khawp a ni," U Malsawma'n a tih leh chuan Feli chuan," Ni e, a hmêlte hi a chhiat loh țhin theih tehlul nèn, a lang tar zo vek tawhin ka hria," a lo ti ve a, Zmi chuan," Zu hi chu ka haw țhìn ngawt mai! Mi ang pawh mi ang lova siamtu a ni a, tlangvâl fel leh tlàwmngai êm êm tia mi sawi țhìn kha tunah chuan zu vàngin mi sual enin kan en ta chu a ni si a," a lo ti ve charh charh a. Rini erawh chuan," Zu rùiin insual peih viau mah se eng emaw thil tih nikhua, khawtlâng thil tihnaah tlàwmngai ber a nih loh pawhin a ber pâwl chu a ni leh tho ang," a lo ti ve leh a. Feli chuan," Hei vàng tak hian alawm YMA lam hruaitute pawh hian han zilhin han dem viau țhìn mah se an khawngaih leh tlat țhin ni. A ruih viau pawh hian khawtlâng hruaitute leh a aia upate hi chu a zah thiam leh viau țhìn bawk si a, an lu pawh a tihai țhìn viau rêng a ni," a lo ti ve a.

Kan lo inzui ve tawh a ni tih hretute vek an ni a, U Ngura tih loh chuan. A hnu deuhah phei chuan min fiam a, huat hleih theih ni mang bawk si lo, za lo tak takin ka nui ka nui ringawt mai. U Malsawma pawh chu," Nang nèn pawh khân in insual ve tawh tak tiraw?" an ti a, an insual chhan dik tak an han zâwt chîk leh rih bawk a, thil ngaihthlâk nuam tak chu a va ni lo chiang tak!

Subject danga kan pakai tawh hnu nia ka hriatah pawh chuan 'insualte' bawk chuan rilru a la luah a ni ang e, naupangte thingpui pêk dàn tùr kan sawi laiin Rini chuan," A pa boral kha atân chuan a pawi êm a ni, an pafa khân an inkàwmngeih asin, hetia kan lo ngaih ve ang ngawt ai hian an inkàwmngeih ang, a boral ta hi a tuar a ni tih sawi chhuak kher lo mah se a awm dàn leh a cheziaah hian a hriat hliah hliah si a," a rawn ti chhuak leh hluai a, mi dang chuan mak tih hmèl deuh tak hian an en deuh hâ hlawm tih ka hria, kei erawh chuan a sawia chu ka hriat chian êm avàngin amah chu ka en ve hauh lo va, mak pawh ka ti hek lo.

Rilru pindan sîra thil dang awm rùn chungin hlim hmêl tak chuan mi chu ka chhàwn tho a, U Valpuia vànga hlim lo hmêl lo tihlan chiam kha a țûl hek lo, hlim taka hun hmang tùr kan ni alawm le.

Chaw ei kham hnu lawkah Tĕțanite chhûngkua chu an haw a, U Ngura hi an vêng GSA lamah a inhmang ve viau a, zàn dâr 7-a meeting an neih dâwn vànga haw hma deuh pawh an ni. Riak ve mai tùrin kan sáwm ve viau a; mahse," Ni dangah ni mai rawh se," tiin kan inthlah liam ta zâwk a ni.

A tûkah ka inkhâwm a, chawhnu lamah U Valpuia pa râl tùrin kan kal a, keimaha kal ka duh loh vàngin ka țhiante ka sâwm a. U Lynn-i nèn an innei lo va, an chêng dùn lo bawk tih chu ka hre tawh a; mahse, mahnia kal chu ka duh chuang lo, U Vid-a'n a lo awmpui ngeiin ka ring a, a lo ruih buai loh hrâm ka beisei bawk a ni.

An ina kan luh hma chuan an in bul vêl chu ka thlêk kual a, a chul deuh rup maiin ka hria, ka hmehbel deuh vàng nge ni, a pa awm lo ta chu an in pawhin a tuar țan a ni maw ka tih phah nghe nghe. Mi dang chu kal pah chuan titi sap sap reng a, kei erawh ka ngawi reng thung.

U Vid-a chu a lo awm tak tak a, amah ngeiin min lo chhàwn nghe nghe. Ka mit ka lèn kual a, U Lynn-i emaw U Valpuia emaw ka hmu mai lo, room lamah an awm rih a ni ngei ang, nge ani hi a lo rui leh tawh le. Ka ngaihtuah rei hman lo, U Vid-a koh pawh ni lo hian room ațang chuan U Valpuia chu amah chauhin a rawn chhuak thuai a, a hmêl hmuh han nawm lohzia chu a! A mu tho deuh chiah a nih hmèl, a sam a seiin a thur suang mai a, a lang chĕr viau bawk. Chutah, a hmai a la khem deuh nuan zui a, a mit veilam a vûng deuh hlek bawk. A hnunglam ka thlêk leh deuh a, U Lynn-i'n a rawn zui chhuak miah lo!

"In va fel ve! Lèn luhna tlâk pawh ka nih loh tehlul nèn!" a rawn ti dût a, a aw chhuak chu rùi aw chhuak a ni pawhin ka hre lo; mahse, a in tho chu a nih ka ring, a nih loh pawhin a in nasa tawh a, rùi reng tawh angin ka hria pawh a ni maithei. Hmuh loh kârin a lo chĕr hman hlê a ni, chaw a ei țha lo a ni ngei ang.

"Rawn tlawh che hi a lang tlat," Rini chuan nui chung hian a han ti a, Feli pawh chuan," Inring rengin awm rawh, kan rawn zilh hrep dâwn che sia," fiamthu bawk hian a ti leh a. Țhiante an fel a, an titipui zui nghâl bawrh bawrh thei mai. Keimah ber hi ka fel lo lehpek a, țawng tùr ka hre leh mai tawh lo, ka nêp thei a nia, țawng chhuah bawrh bawrh hun tùrah hian țawng tùr ka hre tlat țhìn lo a ni. Bâkah, room lamah U Lynn-i a awm ka ring a, ka țawng a lo hre ve tùr chu ka duh vak lo a ni, min lo thîk ang a, kan haw hnuah an intihbuai phah mai mai ang.

Ka va ngaihtuah thui tak! Engah nge min thîk ngawt ang le? A bialpa min țhenna a rei tawh lutuk! Mi mãwlnu, harh rawh, i ã lutuk êm mai! Engah nge chûngte chu i ngaihtuah? A pa râl tùra kal alawm i nih. Nangmah hian i thîk zâwk a ni lo maw? Thiam lohna nei hauh lova țhentu che, he pa hi i la duh reng a nih dâwn hi.

Thingpui lum a tum chuan Feli chu tho vatin," Hmeichhe awm reng laia mipain thingpui lumte chu a," a ti a, U Vid-a pawh chuan," Ni e, nula an tam alawm," a lo ti ve a, kei pawhin ka rilru siama intihuai luiin kan kal chhante chu ka sawi ta a, a pa boral chu ka tawrhpui thu ka hrilh ve pah luam bawk a.

"Min lo hre thiam ula, ani hi ka be fâl lawk thei ang em?" 

A țawngkam polite tak avàng chuan mak ka ti a, ka en hau nghe nghe. Min lo en reng tawh avàng chuan ka zak leh deuh a; mahse, lài leh zak anga awm chu ka duh lo, hawi sawn leh daihin mi dang chu ka en kual a, U Vid-a chuan," A țha alawm, țha tê tê khân inbia ula," a lo ti a, țhiante pawh chuan," Thlang lamah khuan zu inbe fâl ta che u, kan rawn tibuai lo ang che u," nui chung hian an lo ti ve a, kei erawh chuan inbiak fàl kher chu ka duh lo kher mai; amah lah chu a kal zui nghâl vut bawk si a, han hnialna hun pawh a awm lo.

A hnu deuh hleka tîm ru taka ka zu pawh chuan ka țhutna tùr lam ni àwm tak chu a thlêk zauh a, min en kur bawk si avàng chuan nuam lo ka ti zual. Ka țhut hnu chuan ani chu a la ding reng a, țhut tum àwm pawhin a lang lo.

"Min tawrhpui thu kha i sawi a, i ti tak tak em?" 

Ka en zawk a, thlang lam melh zui leh daihin," Ti tak tak e," ka ti sap a, a pa boral lai kha kan zin bo lai a ni tih erawh ka hrilh ta kher lo mai, a țùlna pawh a awm chuang hlei nem.

"A nih, tunah, mi dang hriat lohin min tawrhpui a ni tih kha han sawi leh teh." 

Awlsam tak chuan ka tawrhpui thu chu ka hrilh leh a, sawi harsatna ka nei lo; ani erawh chuan ka rin loh deuh hian," Engati nge min tawrhpui ve ngawt?" a rawn ti ta thung a, a zawhna a mak êm avàng chuan ka melh chho chiang ngang mai. Kan inen dùn ràn a, chhàn dàn tùr vâng deuh mai asin, chhàn dàn fîmkhur ngai bawk si...

"Kan khuaa mi ngei i ni alawm, kan khaw mi leh sate lote pawh thihna an tawh chuan kan khawngaih a, kan tawrhpui țhìn, nang chu kan khaw mi leh sa dik tak i nia, kan tawrhpui ang che chu," chhàn dàn tùr ka hriat dàn ber chuan ka ti ta tawp a, chu ka chhànna chu engtin nge a lo ngaih ang tih chu ka hre tawh bîk lo; mahse, a ngawih vang vang hnua," Ka hre thiam e," a tih sup tâkah chuan ka thaw deuh huai a.

"Ka țhen hnu che khân bialpa dang i nei tawh em?" 

A zawhna hi, a buaithlâk thei si! Thu dik lo hrilh ngawt lah chu, ni leh lo, a pawi lo, hetiang mai maiah chuan dâwt hrilh mai mai pawh a pawi lo, a hre chhuak dâwn chuang lo va, a tân awmzia a awm dâwn hek lo.

"Aw..."

Ani chuan," Min chhàn har dànah i la nei lo chiang mai," intihre zet hian a rawn ti zui a, ka dâwt sawi thup nân kei erawh chuan," I ngaih dàn dàn le," ka lo ti awlsam êt thung a, ka sawi thui duah duh lo. Bâkah, ka chanchin min zâwt reng a, ka duh lêm lo, a tân a țangkai lo chiang êm mai.

"Ka chanchin min zâwt tawh suh, mi dang han fin tawh ang, mawi pawh a mawi lo, miin min hmu rêu rêu ang e," tiin ka ding hluai a, min rawn nem țhu rang teh e. Min rawn hnaih deuh tâkah chuan zu țhing rim an tih ang kha a nam a ni tih ka hre ve chiah, rimchhia ka tih avàng chuan ka hmui ka hup ta vat nghe nghe a.

"Mi dang bula awm chu ka ning, ka thaw a ipik hluah hluah!" tiin a thaw hawk a, min din hlat hrat bawk. A lu a buk si a, a lu han thing deuh nak nak chu boruakin zir viau se chuan ka nuih a za ngawt ang; mahse, tunah hi chuan nuihna hun a ni miah lo.

"Min tawrhpui tak tak a nih chuan min hnèm rawh, lo inkàwm tawh țhìn kan nihna ang tal pawhin. Min hnem chuan ka thaw ipik pawh hi a kiang hawk ngei ang."

A thil min tihtîr tum khirhkhàn theihzia hi, engtin nge ka tih anga eng nge ka sawi ang? Kei hian ka hnèm thiam lul lo mai, a thaw ipikna tikiang hawk tùr phei chuan... hnem dàn ka hriat mai loh avàng chuan ka ngawi leh rih a, a thaw ipikna kiang hawk thei tùr thil eng nge kei tehlul hian ka hrilh ang? La ințhen lovin ka bialpa kha la ni reng se chuan sawi tùr chu ka hre țeuh ngei ang, țawng kher lo pawhin ka kuah vawng vawng ang a...

"Kha maw, kei mi sual hi chu tu mahin min tawrhpui tak tak teuh lo! Tawrhpui tlâk loh khawpa mi sual kha ka ni miau a tiraw? Ka chan tâwk chiah a ni te pawh i ti ve tho ang chu? Ni e, mi sual chan tâwk a ni, min tawrhpui thute min rawn hrilh vang vang a, kei mi sual hlãwm tân hi chuan a làwmawm a ni, ka sual êm chung pawh hian min la rawn tlawh hrâm a, malsàwmna dawng mawlh mawlh rawh. Kei mi sual hi chuan chan țha ka chang pha ve lo va, mihring malsàwmna chu sawi loh, Pathian malsàwmna pawh chang ve phâk lo khawpa mi sual dum ber ka ni. Ka tân chuan he khawvêlah hian hlimna a awm lo va, mi fel zînga chĕnga dam reng tlâk pawh ka ni lo; mahse, ka pa kha chu kei vàng hi chuan diriam ve suh aw, tihsual a nei ve lo, a fapa hi min hmangaih êm êm a, kei pawhin ka hmangaih, amah kha ka neihchhun leh dam reng ka châkna chhan pawh a ni a; mahse, tunah chuan a awm tawh lo a..." sawi chhuah harsa tih hmèl fê hian a thaw hawk hawk zui a, sawi zawm tawh lo chuan a ngawi zui daih bawk a.

Kan haw hnu chuan a thil sawi chuan thil thui tak min ngaihtuahtîr zui zêl a, a beidawnzia kha a țawng chhuakah mai ni lovin a awki zawng zawngah pawh khân a hriat theih a nih kha, khati êm êm khân engtin nge a beidawn theih le? A nun lo ruakzia kha chiang takin ka hre thei a, kan inkawp hma ațang daih tawh khân a lo ni țan daih tawh hial ang chu, kha vàng khân zu inin a nun ruak hnawh khah tum nân a hmang a ni thei dâwn tlat a ni. Khawvêl thila nun ruak hnawh khah tum hi zawng, eng mah lo mai a ni asin. Ani pawh a nun a ruak a, tunah phei chuan a nun ruak tizual tùrin a hmangaih êm êm, a chènpui a pain a boralsan miau mai a, thihnaah kher hi zawng, inhnem dàn tùr hi a vâng a, ringtute hi chu Pathianah kan inhnèmin kan la innghat thei a, Pathian ngaihsak miah lo tân chuan beidawn ngawih ngawihna tham a ni thei tlat, min țhen hma deuh ațang khân a inkhâwm ngai tawh lo tih Mampuii sawi kha ka hre tawh a, tûn thlengin biak inah hmuh tùrin a awm tawh lo. A nun hrehawm hnèmtu atân țha ber tùra a rin a tlàn a; mahse, chu chuan nun beidawn lehzualna a thlen chu a ni si a.

A thu sawi mal tê tê kha ka ngaihtuah lêt leh a, a beidawnna kha chu thuhran, a pa diriam ve lo tùrin min chah a, kha kha eng nge a awmzia le? Miin amah vàngin a pa chu an lo diriam em ni le? A pa thihna kha 'a chan táwk chiah a ni' lo ti tâwkte an lo awm em ni a sawi dàn khân? Chuan, dam reng a châk chhan a pa a boral tawh a, tunah chuan dam reng a châk tawh lo. E khai, thil serious lutuk a ni! Last Warning a ni tlat, ngaihthah mai mai chi a ni lo. U Vid-a hian a hre ve ang em? A thil min hrilh zawng zawng kha a țhian țha ber U Vid-a hnênah a sawi ve ang em? A sawi kher lo a nih phei chuan U Vid-a ka hrilh ngei ngei a ngai, a țhianpa hi a vèn țhat loh chuan a chan tùr chu... ka ngaihtuah zui ngam lo, U Vid-a number chu ka hmet chhuak zui ta nghâl a.

Zànah pawh chuan ka mu thei lo va,  be tawh tho mah ila hmaichhan ngeia U Vid-a chu hmuh ka duh leh tut tut avàngin an inah ka va kalchilh a, ka va hau nghâl ringawt bawk. U Valpuia chanchin ka hrilh tawh hnua ina a la awm reng thei chu ka hre thiam lo a ni; mahse, ani chuan mi dang inlêng a neih rih thu sawiin a țhianpa chu a nunna la mai tùra a rin loh thu a lo sawi thung a. Chu erawh chuan min hnèm lêm lo khawp mai, inlêng nei pawh ni se ka la hlauthãwng ru tho, râpthlâk takin a lo inâwkhlum ve ringawt ang tih ka hlau a ni.

"Chutiangin i ngaih ti țha ngawt suh, mihring nunna hi hlu viauin nunna siam har viau mah se chu nunna lâk nân chuan second rei lo tê bâk a ngai lo, ka hlauthãwng a ni, ka rilru a nuam thei lo," ka ti leh mawlh mawlh a, ka hlauhthàwnna a reh theih loh avàng chuan țhut pawh ka țhu hlè hlé thei lo va, U Vid-ate nupa room-ah chuan ka vei tawn sek mai a ni.

"Nunu, hlauthãwng suh, ka țhianpa hi ka hre chiang ve a, i hlauhthàwn ang thil kha chu a thleng lo ang, tih pawh a ti duh lo ang; mahse, zu a in nasa viau erawh hi chu vènpui chu a ngai thung," U Vid-a'n a tih chuan," Ka hlauthãwng lo thei lo a ni, kan inkârah eng mah a awm tawh lo tih chu i hria ang a; mahse, a chungah thil țha lo chu thleng tùrin ka duh lo, he a beidawnna ațang hian chhuak se, hlimna tam takin hmuak se, hlim takin a nun hmang chho zêl se tih hi ka duh ber a ni, kei chuan hnem ngaihna ka hre lo va, a hlimna pawh ka thlensak thei lo, tling lo chung chunga Pathian hnêna a tân dìlsak mai loh chu tih theih ka nei lo, bâng lovin ka dìlsak char char ang," tiin ka chhâng a.

Ka muhìl thei lo va, ka țawngțai leh ringawt țhìn. Vawi eng zât tak nge ka țawngțai pawh ka hre lo, ka mang a ang êm mai a, ka mu thei lo a ni. Țawngțaiah ka ramțang a, U Valpuia sawi ang deuh khân mi sual ni tho mah ila mangang taka ka dìlna, ka thil duh ka dìlna chu min ngaihthlâksak ang tih ka ring.

Serchhîpa lêt pawh ka hreh zo vek mai; mahse, tih theih ka nei lo va, bâkah, amah ngaihtuah avànga awm reng thu lah a awm hek lo, hna thawh nei ka nih miau avàngin ka duh chen chen ka chàwl ve ngawt thei lo va, phúr lo zetin ka lêt leh ta a. Hna thawhnaah pawh rilru nuam takin ka awm hlei thei lo; mahse, ka țawngțai nasa a, tlêm tlêmin ka zia chho ve zêl a, ka tum ve bawk a, hun a liam leh hlek hnuah chuan ka hna lamah pawh pângngai takin ka thawk leh thei ta. U Vid-a hnênah U Valpuia chanchin ka záwt zauh zauh a, ani pawh zu chu in zêl tho mah se over takin a in chhunzawm zêl tawh rih lo va, lo ngaihtuah lo tùrin min ti ve țhìn.

Rilru hah leh hrehawm lai hian rilru hahna tùr thil dang hi a lo thleng duh bîk an tih hi a dik a nih ka ring, Mampuii'n min rawn bia a, an pa nèn an intithiam lo va, thinrimin a rawn hawsan rih tih min rawn hrilh a, U Valpuia vànga rilru hrehawma ka awm laiin ka țhiannu vàngin ka rilru a hrehawm leh ta chu a ni si a, he khawvêl tak hi chu aw...

*A TIKEH CHHE VEK CHE A, CHUTI CHUNG CHUNG PAWH CHUAN A TÂN THIL ȚHA BER I LA DUHSAK THO A, KHA THINLUNG KHÂN THU A VA SAWI RING TEHLUL ÊM!*