☆Mr. BAD(ZAWLAIDI NEITUPA)☆ - 8 By Dingdi Pachuau

☆Mr. BAD(ZAWLAIDI NEITUPA)☆ - 8 By Dingdi Pachuau

"Eng nge ... engtizia nge? Thil awmzia hi...? Ka tih awmzia chu... a nâ em?" ka ti chhuak nawk nawk a, a piah deuhah chuan țhu ve nghâlin a hmêl chu hlau ru deuh chung chung chuan ka en a, hnaih erawh ka hnaih ngam chiah lo. A hmêl chu hmuh nuam ka ti lo va, a mit a vùn bâkah a hmui chung lam pawh chu a vûng tel bawk tih ka hmu leh zêl a, amah a ang lo țêp a ni.

A ngawi rùn mai a, en pawh min en lo, a lung a awi chiah lo a nih hmèl. Zu rim a nam bawk si a, rim tui ka tih loh êm avàng chuan tãwi tê têin thâwk ka la ringawt a, a chângin ka kain ka thaw leh rih bawk a, a hmuh laia ner khum chiam chiam chu fuh ka ti vak bîk lo a ni.

U Vid-a chuan," Vûr ka han la ang e," tiin a chhuak nghâl a, Mampuii chu dingin ka kokiah a kut a rawn nghat a, ka en vat a, hmui phun hian," Lo sawi fel r'u," a ti sap a,  a chhuak zui ve ta nghâl a. Eng nge a awmzia? Sawi fel tùr... Kut a tawrh chhan maw? A va huphurhawm sî ve!

"U Valpui, a na viau em?" ka han ti leh ngawt a, a lo rûm nghut ringawt.  Hnaih ve deuh hian," Engati nge zu i in a? I rilru ka tinâ em ni? Aizawla ka pheisan dâwn vàng che hi a ni em?" tiin ka zâwt leh sap sap a, hetianga a awm dâwn chuan pheisan pawh a huphurhawm ka ti, ka hmu phâk tawh dâwn si lo. Mipa a ni a, eng vak sawi duh lovin zu a lo in nghek nghek mai ang tih ka hlau a ni.

"Malsàwma saw i eng nge a nih?" Rei fê kan ngawih hnu chuan a rawn ti chhuak ta sup a, țawng pawh chu harsa a ti deuh a ni ang, a țhen deuh sak nghe nghe.

"U Malsàwma maw? Engati nge ni?Ka eng mah a ni lo," ka lo tih chuan," Dâwt min hrilh miah suh! In nui dùn lai ka hmuh chian khawp che u kha, ka mi hmuhte kha in pahnih ngei in ni tih lah ka chiang," a lo ti bung nghut nghut a, a țawng zâwng pawh chuan a la thinrim hmèl viau mai, a mitmeng pawh chu hmuh a nuam viau lo.

"Dàwra ka kal laiin a lo awm ve a, Pu Duhawmate ina a kal dáwn vàngin min zui a, chu chu min lo hmu a nih dâwn chu. Eng mah kan inkârah a awm lo," zaidam tak hian ka ti leh a, țawngkam eng emaw deuh hlek ka hmang ngam lo, a thin a rim hmèl riau mai si a. A dik chiah rêng a ni, chuti chung pawh chuan lungawi lo tih hriat tak hian a la rûm ngul ngul a," Kal pahin in nui a, a lam hawiin hlim takin i nui bawk," a rawn ti leh a, ka en reng ringawt, a thíkthu lo chhiatzia ka hriat phah ta a ni.

"U Valpui, ani nèn khân min ringhlel chu a ni lo tiraw?" zaidam tak chuan ka ti leh a, ani chuan," Ka ngaih dàn a pawimawh lo, i thinlung kha a ni pawimawh zâwk chu," a lo ti ve leh nghut a, a mit vúng bui deuh chuan min rawn en lêt kur a, a lungawi lo hmêl, mit bui sen rûm leh a hmui vûng chu a inchâwbê kual țha lutuk a, mi dang chu ni se ka hlau ngawt ang; mahse, mak tak maiin ka hlau miah lo, ka khawngaih tlat zâwk a nih chu. Zu rùi ka nèl loh theih tehlul nèn, ani hi zawng, a dang tlat.

"U Valpui, nang ka nei che a, mipa dang ka duh hlei nêm, ka mamawh miah lo bawk. Chuan, ka thinlung a pawimawh ang bawkin i thinlung pawh kha a pawimawh tho, i hre thiam tiraw? I thîk theih tùra mipa dang ka lo siam a nih chuan min ngaidam hrâm ang che, kan inkâr hi buai tùrin ka duh lo," ka thiam ang tâwka fiah leh thutak chuan ka ti ta a.

Kan inkâr boruak a ziaawm hnuah chauh ka hawsan a, ka rilruah erawh a awm reng thung. Rilru puitling tak a put ka rin ve țhin nèn, kei ai mah hian a rilru hi a la naupang chhia țhìn em maw ni ka ti, zanina ka hriat chhuah thar tâk chu a thîkthu a chhe viau a ni tih hi. Chuan, min lo duh ve viau a ni tih a thîk thu a tihlan ațang khân ka hre thar leh a, ka lãwm viau zâwk a ni. U Malsàwma kha a thîk theih tùra ka biak pawh ka hre hran lo, țawng pah khân nuih chu ka nui ngei mai a, U Malsàwma ka va nuih pawh kha a ni chuang lo; mahse, mipa dang hrim hrim thîkna mita lo thlîrtu tân zawng a lo thîk theih viau a lo nih dâwn kha.

Mahse, U Valpuia nèn kan inkawp a ni tih miin an hriat chhuah phah ta thung. An insual chhan kha keimah vàng a ni tih a insualpuite khân an hre si a, an thãwm hre phate'n an lo hre lo thei lo bawk a, keini khua ang thingtlângah zawng a darh chak ngang mai lehnghâl. Ka nute pawh a kân chuang lo, chaw ei laiin min han zâwt ta a nih chu, a zahthlâk ve det.

An insual chhan dik tak nia U Valpuia sawi dàn chuan U Malsàwma nèna kan inzui kha a lo hmu a, ka kawp a nih ringin a thinrim chuan zu a in ta vak a, zànah U Malsàwma hmu tùr leh ka laka inthiar fihlîm tùra hrilh tùrin a chhuak ta a. U Malsàwmate țhian thum, Kàwn hulhliap hnuaia lo awm khâwm chu hmuin a va pawh phei dâwn chuan ka chanchin an sawi thãwm chu a hria a, a ding deuh dat a. U Malsàwma'n," Vawiinah kan kal dùn a, ka lo en chiang ngai miah lo kha a nia, a hmêl țha ka ti riau, ka  try dâwn a ni," a tih rî chuan a thin a tirim zual a, a sawi dàn takin va pan hnai sawt sawta va hnek âwrh âwrh a tum laiin U Malsàwma vêk chuan," A âwmbâwr pawh a tâwk tiu teu viau, ka duh tâwk khawp mai, hmai han phûm vang vang mai ila... a nuam dâwn asin; mahse, saw ai pawh sâwn han lian deuh hret mah se pawi ka ti chuang lo, a manhla ting mai dâwn a. A vun ni se a ngo phek a, hnuai lam pawh--" a la tih lai mêkin U Valpuia chuan," Duh tâwk rawh!" tia au țhawtin a va hnek zui ta ni àwm tak a ni. U Malsàwma țhiante chuan rawn zawm vein an sual rawn chu a ni ta mai a, U Vid-a lêng chhuakin a rawn hmu ta hlauh a, mi dangin an lo chelh ve tawh bawk nèn, an inah a hruai haw ta a ni.

"Lo thinrim sa tawh nèn, khatia i chanchin a sawi kha ka ngaithla zo thei ngang lo a ni. Rùi lo ngat phei ila chuan ka khawih na ngawt ang! Damdawi ina a awm loh vëk pawhin tu emaw zâwk zâwk chu ramtuileilo kan ni hial maithei," a la ti ngal ngal mai a, a thin a la dam zân lo a nih ka ring. Hei hi an insual chhan dik tak ka zawh luih ngat ngat vànga sawi chhuak chauh a ni, a chêt dàn kha duh viau lo mah ila dem lohna chin ka nei tho. A bialnu mawihnai lo taka lo hisàpa a hisàp dàn sawi chhuaktu a zilh ve hlakah ka ngai a, kawng lehlamah chuan àwm ka tihpui viau a ni.

Ka nuin kan chanchin a hriat ve tâk vàng ka ti mai, Aizawla phei thuai tùr chuan min tur ta sek mai a, U Puii a be bawk a, kâr lovah ticket pawh min tihfelsak ta vek mai. Tûn kâr Nilàini hian ka phei dâwn, naktip mai tihna a nih chu. A hmanhmawh tut tut chhan ka hria a, hnialna thu erawh ka chhâk chhuak lêm lo.

Thuamhnaw ka siam fel vek tawh a, ka kal dâwn hma nîah U Valpuia nèn Mampuiite inah kan inhmu a, Aizawl ka phei hmaa a fâla kan hun neih dun tàwpna a nih tawh dâwn vàngin kan ãm dùn viau a, U Vid-a room-ah innghèng rialin kan țhu a, țawng vak lêm lovin kan inen a, kan innuih a, kan infâwp bawk a, a hmaite chu ka chùlsak a. A mit leh a hmui vûngte kha a dam tawh a, a biangah erawh belkàng a la awm thung; mahse, a inhmeh ka ti tlat tawh a ni, hmai khem deuh nian leh inrîn deuh riak tih vêl hi a inhmeh tawh.

Zànah țhiante an rawn kal khâwm a, inthlah nân ei tùr kan buatsaih a, hlim takin nui ve tho mah ila rilru kil khatah erawh U Valpuia a awm ve reng a, ka lung a lêngin ka ngai dâwn tih ka hre chiang êm a ni. Tunah pawh hian ka ngai veng veng tawhin ka hria, khaw hmuna awm reng chung pawhin ka ngai țan tawh a nia, khua hmun lova kan awm hunah phei chuan... ka sawi peih lo.

Dâr 10 chhuakah Aizawl lam pan chuan kan chhuak ta a, lung a lèn ruih avàng chuan ka țawng peih lo va, ka bula tlangvâl țhu chuan min biak a tum sateh nain ka muhìl der tlat a, a peih rei ta bîk lo. Lunglèn leh tlangvâl kawm zawng a inrem lo êm mai, U Valpuia pawh ni hlei lo.

Kawnga kan tlàn laiin min rawn be miah lo va, Aizâwl kan lût ta tihah erawh min rawn be ta chauh a," I mut duh ka ring a, rawn biak buai che ka duh lo a nih kha," a rawn ti a, a ti țha ka ti phian. Min rawn be ta se ka chhàn a ngai ang a, kan inbiak zawhah ka bula țhu khân min biak chhunzawm a tum ngèi ngéi dâwn bawk a, chu chu ka peih loh ber thil a ni.

U Puiite inah ka innghat phawt a, min hmu chu min lo làwm thiam khawp mai. Ka rilțàm ringin chaw ei kan siam thuai a, ei zawha kan tihfel hnuah kan naute Bawihpuii chu ka awm nghâl a, a fel tawh bawk nèn, min nël ve nghâl mai. Naktûk lamah hostel-ah chuan ka lût ang, thingtlâng ngawt ai chuan khawpuiah chuan thil zir tùr a tam a, zirna tùr hmun lah a tam, hmanrua dap khâwm țha ila, hmanrua neih țhat chuan mahnia inzir pawh ka huphurh lêm lo.

Ka lunglèn dàn chu ka sawi fiah thiam lo zâwk!! Thinlungah hian min kher nget nget ni maiin ka hria, han hawi ila ka thil hmuh apiang hian U Valpuia min hriat chhuahtîr ka ti mai, min ngaihtîr zêl a, hostel-a ka luh zàn phei chuan U Valpuia ka ngaih êm vàngin ka țap nghe nghe a ni. Ka zak hran lo, ka mittui hi a phû ve êm asin, ka ngai êm a ni.

Lunglèn vànga eng mah ti thei lova kùr erawh ka tum bîk lo, U Valpuia nèn inhmu thei lova kan awm phahna a nih vàngin hun chu ho mai maia khawhral ka tum lo va, a hlutzia ngaihtuah ràn chungin class ka kalna tùr ka tifel a, ka zirlai ka la exam zawh loh pawh kha ka zir ngawrh chho leh ta a, lehkha zir bâk thil dang tih tùr awm hran hek lo le, chaw ei, inbual, insûk leh mut hun tih lohah chuan lehkha zir char char a ni mai. U Valpuia nèn erawh kan inbiakin dârkâr khat chuang kan inbe lo thei lo va, video call kherin kan inbe bawk; mahse, kan inbe zing viau lo thung. A châng zeuhin be hmasatu-ah ka țang ve a, amah zâwkin min rawn be hmasa zâwk zêl ti ila a dik. Ka țhiante nèn erawh text message kan hmang țangkai deuh a, min rawn fiamin U Valpuia lunglêng an khawngaih thu hi min rawn hrilh ve ziah a, ka rin dàn chu ni tho mah se kei aia a lunglèn bîk erawh ka ring chuang lo. Kan inbiaka ka zawh châng erawh hi chuan," Tunah hi chuan lunglèn awmzia tak tak ka hre ve ta," ti chauhin min chhâng țhìn thung. "Ka ngai lutuk che," emaw ," Ka ngai chein ka lung a lêng," emaw pawh a ti ngai lo, a sawi chhuak hreh ve deuh a nih ka ring.

Hun a kal a, kei pawhin coaching class ka kalna lamah țhiante ka chhar chho ve zêl a, mipa țhian erawh ka kàwm duh vak lo, rawn hmu thei lo mah se U Valpuia'n a thîk leh a hriat thiam loh ka hlauh vàng a ni pakhat; mahse, min betu ka tawng ve leh nawlh nawlh a, ka hming hre lo tùra ka ngaihte pawh hian min ko leh nawlh fo; mahse, ka fîmkhurin mitmei ka hmuh lo ve êm hlawm a, min hawi deuh hleka ka hriatte pawh hian min beisei ngam bîk lo, hmeichhiain mitmei ka hmuh loh miau a, a àwm ve tho.

Lehkha zir reng pahin hna ruak ka ngaihven ru pah reng a, exam ve lâwp lâwp châng pawh ka nei; mahse, beisei ka nei sâng vak lo hlawm hrim hrim a, post a tlêm thei bawk nèn, ka tling lo chiang thei khawp mai. Zahah leh tlàwmah erawh ka la duh chuang lo, tûnlaiah chuan thiamna a sâng tawh a, bâkah, political fitness a lo ngai ve zêl tawh bawk a, hmêl hriat nei ve lo ta chu, tlin ngaihna a awm lo bawk a ni. 'Ka la naupang tho a, M.Com hi chhuak tê tê ila, tih tak takin ka bei ang' tiin ka rilru ka siam sauh sauh a.

U Valpuiate insual thãwm rî sawi hriat tùr a awm lo va, khuaa ka awm loh vàngin ka hre lo nge ka hre tawh bîk lo, ka țhiante'n an rawn sawi si lo va, țha takin a awm ve zêl ni tùrah ka ngai. Kan inbiak châng lah hian a hmaiah pem hliam hnuhma ka hmu ngai lo va, ka ngaih a țha ve ngawt mai a ni. "In lo insual leh tawh em?" tia han zawh dawt chu a nuam chiah bîk si lo va, indual chu ni se ka țhiante tal pawhin min hrilh chu ka ring, an sawi lo êm mai a, buaina a awm lo a ni ang.

Hun a ral a, dam țhat chuan kum tàwp pawh kan thleng ve leh mai a, rei lo tê chauh U Valpui nèn hun nei thei dâwn mah ila haw phei ka tum ve tho a, bazàr pawh ka bazâr hma rêng a; mahse, ka haw thei dâwn ta lo. Ka u chiah, Lungleia pasal nei Tĕțani kha Durtlângah an zai dâwn a, a rîlphír paih mai bâkah a chi kawngah bâwk a awm a, cancer erawh a ni lo a ni ang, an rawn phei remchàn lai niin an zai nghâl dâwn a, a eng zâwk chu nge an zai hmasak dâwn pawh ka hre thiam lo, rilru a buai nuai nuai mai.

U Valpuia ka hrilh chuan a lungawi lo dâwn dâwn a, hrehawm ka va ti tak! A hnuah ka phei thei loh chhan ka hrilh fiah erawh a hre thiam ve leh mai a, ani ngaih dàn chuan haw phei ka tum loh hrim hrim vàngah a lo ngai deuh a ni. A àwm ang lo lutuk chuan ka nuih a tiza thei hial zâwk! Kei pawhin haw phei te chu ka châk asin, Tĕțani chu ka ngei ve dâwn dâwn a; mahse, han lungawi loha han ngei chiamna chi pawh a ni lo, natna vàng a nia, ani pawhin damdawi ina hun hman ai chuan dam taka an in ngeia Krismas hman chu a duh daih zâwk ang chu.

Nuamin Krismas hunpui pawh kan hmang thei ve lo, damdawi inah kan awm a, Tĕțani pasal nèn. Kan khawvêl a zau lo khawp a ni, khua a vâwt nasa mai si a, nikum lama kan hun hman dàn nèn chuan inthlau rem rem tak chu a ni; mahse, hlim lo hmêl put ka duh lo va, an pahniha hmuh lai chuan nuam ti àwm takin ka nui lui hrâm hrâm zêl.

Zàn lama min rawn biak a tum lai chuan video call a nih avàngin pâwnah ka chhuak rih a, váwt var mah se min tiharh sawng sawng a, nuam ka ti zâwk. A hmêl ka hmu leh chiah erawh chu ka thinlung a na vawng vawng mai, insualnaah a lo tel leh tawh a ni tih hriat takin a hmai chu a him dam leh tawh lo a ni! Bâkah, a men dàn leh chezia ațang chuan a rùi tih ka hre bawk.

"U Valpui..." ka ti ringawt a, ka rilru nâ erawh lan chhuahtîr lo tùrin ka insûm ve hrâm hrâm a, ani chuan rùi tih hriat tak hian," Nunu, i tel lo chuan a nuam lo lutuk a, kan khua hi a reh țhuap ni maiin ka hria, min ngaihtuah ve lo em ni, ka khawngaihthlâkzia hi?" a rawn ti sup sup a, a khap lup lup a, a mut a chhuak em ni zâwk aw ka ti hial a ni.

Ka ngaihtuah alawm, ka ngaihtuah lutuk asin, ni tin dârkâr tinin ka ngaihtuah a, tuna a awm dàn ang hian hmuh ka duh lo asin.

"I hmai kha, a nâ em?" ka tih chuan," A na lo, min ngaihtuah suh, i zirlai chauh kha ngaihtuah rawh," a rawn ti leh lawi a, 'Min ngaihtuah ve lo em ni' ti zo hlawttu khân 'Min ngaihtuah suh' a rawn ti leh daih a! A inpèrsan viau a ni.

"U Valpui, insual tawh lo ula, aw??? I hmai kha hmuh a hrehawm ka ti êm mai, khawngaihin, khawngaih takin insualnaah tel tawh lo hrãm teh," tiin ka ngèn ta ringawt a, ka khawngaih si, ka ngaiin ka rilru a hrehawm a, ka hmuh theih leh khawih phâkah chuan awm se a hmai chu chûlin damdawite ka hnawihsak thei ang a, a lunglêng hrehawm tiin zû pawh a in țeuh lo tùr hi a nia.

"Nunui chu, heta i lo awm daih vàng a nih chiah hi reh ruih ka lo tih ni? I hmêl hmuh loh hlek chuan khua a har tlat tawh," tiin ka hnung lam ațang chuan U Tlana chuan min rawn bia a, ka phu deuh zawk nghe nghe. U Valpuia chuan a țawng chu a rawn hre ve chiang, phone lama rawn ãwn hnãiin," Tu nge?!!" a rawn ti a, sawi mai dàn tùr ka hriat loh avàng chuan ka ngawi a, thinrim hmèl tak hian min rawn en a," Min rawn be tawh suh," ti vutin phone chu a off zui nghâl ta daih a, ka hrilh a tihai hlê a ni.

"Zanin chu zàn dang aiin a vâwtin ka hria," ka boruak hre thiam ve lo takin, ka bula rawn țhut ve pah chuan U Tlana chuan a ti leh a, phone la en deuh vung vung chung hian," Nia..." ka lo ti ringawt a, U Valpuia hnêna thil awmzia han hrilh fiah leh dâwn chu, huphurhawm leh tîk têk viau a ni. Hmaichhanah a ni dâwn bawk si lo, ka hrilh fiah zo thei ang em? A lo hre thiam duh lo a nih phei chuan...

U Tlana hi chuan min ngaizâwng deuh chiang a, damdawi inah a u awmpuiin a awm ve tho a, ni tina inhmu ve țhìn ta chu kan lo inbe lo thei bîk lo va. Mi ã nilêng ni bîk lo ta chuan min melh dàn, a mitmei ațangin thil awm dàn ka hai lo; mahse, ka fìmkhur phah sawt a ni. Min beisei theih tùrin ka awm lo va, mi fel ve tak ni lo phei se chuan ka be ngai mang mang lo ang; mahse, a fel ve êm mai a, kawm loh theih pawh a ni bîk lo a ni, bâkah, kan dinhmun a inang êm bawk a.

Hun remchâng ka neih veleh U Valpuia chu biak ka han tum a, ka rin ang ngeiin biak theihin a awm miah lo, message pawh a tlang thei chuang lo. A thin a rim nasa a ni chiang mai, U Vid-a ka be leh chhin a, ani pawh a theih loh, tlêmin ka ngaih a țha deuh ngawt a, signal a chiang lo a ni ngei ang. A hnu deuhah Mampuii ka tum chhin leh a, ani chu a lo theih ta thung a, thil awmzia ka hrilh chuan," Chu vàng a lo ni maw buaina a..." a ti a, sawi zawm lo chuan a tàwp leh ta daih a.

"Eng nge buaina... buaina a siam tihna em ni?!!" tia hlauthãwng taka ka zawh chuan," Ka țawng sual a nih kha, buaina in lo neih vàng a nih chu tih ka tum zâwk a nih kha, U Vid-a bulah a rawn kal a, eng eng emaw a rawn sawi sup sup kha chu chu a lo nih dâwn chu," a rawn ti mai a, tlêmin ka ngaih a țha deuh. 'Buaina a siam vak mai' a rawn ti dâwn em maw ni ka ti deuh a nia, a zia hlauh e.

"A nih, tûn hnaiah tu nèn nge an insual leh a? A hmai pilh khem deuh nuan kha ka hmu thei a," ka ti leh a, ani chuan," A, insual thãwm a awm em ni le? Theihai a lawhna a hnâiin a perna kha a ni ang," a rawn ti ban deuh chat a, Theihai hnâiin vun no deuh lai a pera hna a thawh theih vezia ka hre ve tawh a, ka ring ve nghâl mai bawk.

"Ka be thei si lo va, amah be lo tùr chuan min ti tho nain thil awmzia hria se ka duh a, hrilh fiah ka tum tehlul nèn, i hmuh remchàn hunah lo hrilh tum teh mai aw, hrehawm ka ti êm mai," ka tih chuan," Aw le, ka lo hrilh dâwn nia, hrehawm ti duh suh, a hre thiam êm êm ang," a lo ti ve leh a, min hnemna thu chuan min tizãng deuh huaiin ka thaw huai a," A thîk thu a chhe ve si a, amah bâk mi dang ka hawi lohzia kha lo hrilh ngun hlê mai teh," tiin ka chah leh mawlh mawlh a.

Kâr khat chuang zet chu min be duh ta lo, ka biak theihin a awm lo hrim hrim a ni ber. Hrehawm ka ti a, zàn pawh ka mu thei lo, Mampuii a rim deuh a ni. Ka be tlut tlut mai a, ani hian min hre thiam ber dâwn a, U Valpuia pawh a hrilh fiah thei ber dâwn tih ka hria. Biak pawh a be fo tawh rêng bawk a, thil awmzia a hrilh vek a; mahse, chuti chung chung pawh chuan U Valpuia chu ka biak theihin a awm duh chuang lo.

Kum a thar a, damdawi ina awm nèn, U Valpuia'n min be duh lo bawk nèn, ka harh lo takzet a ni. Intihharh nân tiin chhùnah U Puiite in lamah inbual tùrin ka chhuak a, Tĕțani lo awmpuitu an awm tho bawk nèn, ka hmanhmawh duh lêm lo va, muangchângin ka inbual nghe nghe.

Tui luma inphuh sar sar chu a nuam dangdai khawp mai, nuam tak a ni, lu sûk ka tum lai mêk chuan phone chu a rawn rì a, ka rin loh lutuka U Valpuia hming ka hmuh tâkah chuan ka chhâng vat a, inbual zo hlawt, towel-a intuam chauh ka ni tih pawh ka ngaihtuah hman tawh lo.

"I inbual elo?" a rawn tih chiah chuan ka harh chhuak chauh a," Aw... min en lo lawk mai teh, ngawi lawk," tiin ka kawr chu ka ban a, chu chuan ka towel khuh phâk loh chin ka koki vêl chu ka han khuh ta ngawt a, a rawn nui hawk mai.

Thil dang sawi lova," Ka bulah awm la chuan aw..." a rawn tih chuan," I hur!" ka han ti teh ngawt a, a nuih a za viau a ni ang, a nui leh hawk hawk a," Teh ngawt chuan! Hur loh hi thil hlauhawm deuh mai asin," a rawn ti leh a. A thinrim awka hriat tùr awm lo chuan ka awm a tinuam. A sawi dik ve tho bawk si a, zak ru viau mah ila thinrim lova kan inbia chuan ka rilru a tizãng huai huai a ni.

*A RILRU I HRE DUH A NIH CHUAN THIL A SAWI DUH DÀNAH CHÎK LA, A THINLUNG I HRE DUH A NIH CHUAN A CHÊTZIA ENTHLA RAWH*