☆Mr. BAD(ZAWLAIDI NEITUPA)☆- 9 By Dingdi Pachuau

☆Mr. BAD (ZAWLAIDI NEITUPA)☆ - 9 By Dingdi Pachuau

A hnu deuhah chuan," Min rawn be miah lo va?" a rawn ti a, rang zet hian," Rawn biak che ka tum nasatzia kha!! I phone i off tlat a, min be duh lo zâwk a nih kha. Bâkah, be lo tùr chein min hrilh bawk a; mahse, chuti chung chung pawh chuan..." ka lo ti zat zat a, hemi kawngah kher hi chuan thiam ka inpe ve tlat, thu dik tak a ni bawk.

"I sual hlê a ni," a rawn ti nghat a, ka lo nui hak ringawt, chhàn ka tum lo. Ka chhàn hlauh chuan kan inchhâng buai leh mai mai palh ang tih ka hlau, a duh duhin min puh mai mai teh se, a thinrim tawh loh phawt chuan a țha a ni mai.

"Engati nge min va chhâng lo ve? I sual ka tih chu i pawm tihna a ni maw? Min chhâng la?" a rawn ti leh a, chhàn dàn tùr ngaihtuahin ka chil ka lem dak phawt a, chutah, ka sam țawn țha leh mawlh mawlhin," Nang berin sual min tih te chuan... ka sual ni mai teh se," ka ti a, a nui leh hawk hawk a. A nui thãwm ngaihthlâk chu nuam ka ti veng veng mai, elsèn nui ri a ni lo tih ka hre thiam ve tlat a.

Ka biak theih loh laia ka awm dànte chu ka hrilh a, ani chuan min lo nuih a, ka thinrim der leh a, chutiang mai mai chuan rei fê chu kan inbia a ni. Kan inbiak tàwp dâwnah," Hla ka rawn thawn ang che, ngun takin lo ngaithla rawh aw, a hlathu zawng zawng kha," tiin min chah thlap a, kan inbe zo chiah tihah hla chu a rawn thawn zui nghâl a, download-in lu su pah chuan ka ngaithla chhin a, Mizo hla hi ngaithla tam lua lo mah ila mawi ka ti phian nia. A satu ka hre lo va, a sa lungrun thiam ka ti ve tlat. A hlathu ngaithla ngun tùra min tih angin lu sûk zawh chuan ngun takin ka ngaithla a, rinawm tùra min duhna hla a ni deuh berin ka hria. Khua hmunah kan awm dùn ta si lo va, kan pahniha inkârah rinawmna hi a pawimawh zual ta êm bawk a ni, min chah kher lo mah se phatsan ka tum ngai rêng rêng lo. 

Tĕțani damdawi in ațanga a chhuak chu a chhuah tlaiah a lawm nân U Puiite inah chaw kan ei khâwm a, hlim takin hun kan hmang ho a, a tûkah Tĕțanite chu an haw phei zui ta nghâl a, damdawi ina riah ngai ta lo chu ka thaw huai mai. U Valpuia pawh tunah chuan pângngai takin ka be thei tawh ang, damdawi inah kha chuan hmanhmawh leh invêng rêng rênga inbiak a ngai a, Tĕțani'n kan inbe țhìn a ni tih a hriat kha ka hlau a, inbiak dâwna pâwn chhuah zêl ngai kha ka ning a ni.

U Valpuia leh ka țhiante ka ngaihna deuhna pawh kha a reh chho ve zêl a, hostel-a ka awmpuite nèn kan inkàwmngeih chho a, mahni room-a tawmsen reng theih ni bîk lo ta chu, chaw ei khamahte hian kan țhu khâwm leh tel tel țhìn. Mi hi an lo fel hlawm hi ka tia, pakhatin ei tùr nei se a room-ah min ko khâwm vek a, an thilphalin ui rêng an nei lo em maw ni tih tùr a ni. Kei pawhin ei tùr ka neih chuan ka ko khâwm ve zêl tawh a, ka tawm reng ngai ta bîk lo. Kan inpawh tlângin ka room bul chiaha awm Rovi nèn phei chuan kan inpawh zual a, nunnêm deuh mai hi a ni lehnghâl a, thingtlâng ațanga rawn awm ve tho a ni bawk nèn, kei aiin nau deuh hlek mah se kan inkàwm tâwk viau tho a ni.

A bialpa chungchângte min hrilh ve keuh keuh țhìn a, ani hi chuan hetah Aizawl mi bialpa a nei thung a, thla 5 zet chu an lo inzui ve tawh nghe nghe. A mipa zâwk chuan a duh ve viauin a ngaihsak ve viau a ni ngei ang, hna thawh nei a ni bawk a, ei tùr leh eng ilo hi leisakin a chhuah tawh hi chuan a rawn khai haw țawk ve ziah. Mi hausa tak fapa ni lo mah se an khawsak a pângngai viau a, a nuin dàwr lian ve tâwk tak a nei a, amahin hna thawh a lo nei ve bawk nèn, inneih mai pawh a sawi ri tawh a ni àwm e.

"Innei tùr êm chuan kan la inzui rei lo mah mah ka ti a, a bula ka sawi chuan,' Innei tùrin rei tak inzui kher a ngai hlei nem,' a ti ve thung a, hma ka la tih vàngin ka nute bulah pawh ka la sawi ri lo hrim hrim, ka zirlai hi han zir zo phawt ila ka ti deuh bawk a," a ti sap sap a, sawipui vak dàn ka hriat loh avàng chuan," A nih tak chu, a țha alawm," ka lo ti ve ringawt a, ani chuan," Ka tân chuan a țha lutuk tih ka hria, tûnlaiah chuan hna nei hi an hlû a, kei thingtlâng nula tân hlauh lehnghâl chuan ani anga țha leh min duhtu chu ka hmu tawh kher lo ang; mahse, a la hma deuh mah mah ka ti a, i ti ve lo maw?" a ti leh a.

"A, ni e, i zirlai han zo phawt ila, ani pawhin a nghâk thei tho chein ka ring, a bulah pawh chiang takin i sawi leh ang a, a hre thiam êm êm ang," ka lo ti a, a lu chu a bu nghat nghat a," Nia... min nawr viau hran lo nain amah hi a upa ve deuh tawh a, chu vàng chu a ni pakhat a, kum 38 lai a ni tawh a, a upa tawh i ti em? A nau pakhat pawhin nupui a neih khalh tawh nghe nghe a," a ti a, a nui pah bawk a.

Mut hmunah ka ngaihtuah a, Rovi chu a bialpain thla 5 chauh la inzui mah se inneih lam a sawipui tawh a nia, a duh àwm hlê a ni. Keini ve hi, inneih lam chu sawi loh, ngaihtuah pawh ka la ngaihtuah chhin hauh lo a nia! Bâkah, ka la ngam lo, tunah hian inneih puiah min sâwm ta thut se, engtin tak chhâng ve ang maw? Hnial ta ila, thinrimin mi dang min neihsan ta daih se, hrehawm ka ti àwm mang e! A, ani pawhin inneih chu a la duh bîk chuang lo ang, a la inpeih chhuak bîkin ka ring lo. 

U Valpuia'n kumin atân hma a la zau viau tih Mampuii'n min hrilh a, thlai chìn vak a tum thu min hrilh chuan," A hah viau dâwn a ni maw?" ka lo ti sap a, ani chuan," Hah ang, a thawh vêk vêk hi chuan a thawk nasa ve thei êm asin, a pa hian hlawhfa man pêk a tum lah hian a ngai loh thuin a chhâng mai țhìn a, a tih loh lamah hi chuan a tihluih theih loh, a tih tawhna lamah erawh hi chuan a ti vak zêl a, kumin pawh hian thlài a chîng țeuh ang a, chìn tam na nâ nâ chuan a thar chhuak țeuh ngei ang a, a hralh chhuak țeuh bawk ang. Awi, pawisa in ngah dâwn bîk mang e!" a rawn ti kher pek a, amah lah chu a nui uar uar zui a, a va tiho mai mai tak! Min rawn hmu thei lo hlauh chu a làwmawm, fiamthu mah ni se ka sen awp awp hialin ka ring a ni.

Kan inbiaka chumi chungchâng ka zawh chuan," Ka thawh nasat loh te chuan nakinah hrehawm i ti viau dâwn asin, ka thawh chhuah zawng zawng hi i tã vek tùr a nia, hrehawm tia i awm hi ka duh lo," a rawn ti vei duah a! Ani hi, inneih lam a sawina em ni? A rawn sawi thawi deuh tlat. 'Nakinah hrehawm i ti ang' te kha a tia, inneih hnuah a tihna a ni chiang. Awi, a ni chiang lutuk. Innei tùr angin ka han insuangtuah chhin zui nghâl a, ka zãm, ka zak ringawt nia.

"Nupui neih i tum thu i sawi tihna a ni em?" tiin ka zâwt lui ve hrâm a, ani chuan," Dam chhûnga tlangvàl chu tum bîk lo ve. Ka hmu zo ve te a a nih ngai chuan, lo intuak lâwk ve a ngai ang chu," a rawn ti awlsam ve mai a, min sawi chhan ni ngeia ka hriat avàng chuan nui chung hian," Inla luck țha duh lo vêl a!" ka lo ti a, ani pawh chu a rawn nui ve hawk a," Luck vak pawh ka tum lo, nang i awm chhûng chuan mi dang ka ngai lo," a rawn ti ve leh a.

"Hmm... vêl a che! Thil ka hria a nia aw, nimin lamah pawh..." tiin ka han sawi zo duh lo kher a, ani chuan," Ka va hre ve lo ve! Min han hrilh ve la?" a rawn ti a, Mampuii'n Pi Tlanite dàwr kawta U Lynn-i nèn a hmuh dun thu kha min hrilh a, an inkawp leh ta tihna pawh ni chuang lovin a hmuh dun thu a rawn sawi ve mai a nia, thîkna tlêm telin ka han chhaih ve hrim hrim a ni.

"I hriat daih zâwk kha, min hrilh chiang zâwk rawh," ka ti ve thung a, ka fiamthu deuh tho nain sawi fiah deuh hlek se chu ka ti rilru tho. A bialnu hlui a nihnaah tlêmin ka la thîk ve deuh tho a, khua hmunah kan awm ta bawk si lo, U Lynn-i lahin a la duh nasa tih ka hre ve tho bawk si a.

"Ka Nunui bîk liau liau i nih kha, ka tã liau liau."  Hetia min tih hi chuan ka lungawiin amahah lungawi lohna nei pawh ni ila a bo vek zêl! Min tihlàwm dàn lah hi a hre si a, tunah pawh ka lãwm leh veng veng tawh.

Hun leh tui lianin tu mah a nghâk lo va, dam țhat chuan thlà pawh a liam duak duak mai. Hna dìlna lamah pawh vawi hnih exam ka nei leh tawh a, pakhatah phei chuan written ka pal tlang a, interview nei tùrin ka inpuahchah a, chutih rualin ka zirlai ka thlahthlam thei chuang lo va, hun ãwl nei hlei thei lovin ka bei ngawrh ve viau a ni.

Inrinniah chhùn thingpui kan in zo deuh chiah chu hostel-a awm ve tho Betty chuan min rawn ko vak a, tlawhtu ka neih thu a rawn sawi chuan mak ka ti nasa! Tu tak ni ang maw tiin sûk ka tum avànga oil-a ka chiah ka sam chu ka tuai țha nghâl mawlh mawlh a, min rawn tlawhtu tùr chu ka ngaihtuah kual chiam pawhin ka hre lo a ni.

Inlêng kawmna hmun ka han thlen chuan ka hawi kual a, tukverh lam hawia ding, min hnungchhawn tlata ding mipa ka hmuh chuan ka thin a phu rang sauh a, U Valpuia ang ka ti a, ka ring ngam si lo; mahse, ka thãwm hriaa a rawn hawi tãkah erawh chuan ka hmui ka hup ta vat, làwm avàngin ka au chhuak vak lo chauh a ni!

Ka va hlim tak! Inlêng kawmna hmun chu a ualau deuh hlek avàngin a hnu deuhah Garage hlui chungah kan insawn ta daih a, ei tùr min rawn kensakte chu kan ei dùn a, ei dùn ti ila ani chuan a ei ve leh si lo. Kan awmna hi saron-in a khuh deuh chûk avàngin chhak lam ațang bâkin kan hmuh theih loh a, tunah chuan a kutah pawh ka chelhsak ngam ta, nichîn kha chuan țhiante'n min rawn 'ehem' nasa deuh a, ka zak ve a ni, tunah chuan ka zak tawh lo.

Àwl lai denchhenin a rawn kal ni àwm tak a ni, a sawi dànin. Niminah a rawn phei a, Thawhțanniah a haw phei leh ang, min hmu tùra a rawn kal vang vang chu ka lãwm zual a, hmangaih a phû hliah hliah zualin ka hre bawk.

Kan awm dùn ta reng a, a haw ka phal rih lo a ni, tih tùr dang a nei chuang lo va. Chawhnu dâr 3 a lo rîk tâkah chuan tûkțhuan ei kham hnu lama țhiante, bazâr tùra chhuakte pawh an rawn haw phak phak a, min rawn hmuh chuan an kal lai ding meuhin an aw an rawn thian sap sap hlawm a, nakinah min fiam nasa viau ang chu.

Zanriah ei laia min fiam nasatzia chu, dâwt belh hlekin kan awm dàn chu an sawi a, a nih duh hmèl thei bawk si a, fiamthu mah ni se ka zak lek lek a ni; mahse, zak lo ang takin ka nui mai mai a, rei tak min fiam zui lo.

A tûkah pawh chuan a rawn kal leh a, Pathianni mah ni se inlêng neih phal tho a ni a, Garage hlui chungah bawk chuan awm lehin Rovi bialpa pawh a rawn kal ve a, kan paliin kan țhu a nih ber chu; mahse, inhnaih vak lovin kan țhu thung. Rovi bialpa chu a taka ka hmuh vawi khatna a ni a, thlalâk ai chuan tlêm chuan a lang upa lo deuh chuan ka hria a; mahse, a kum a upa ve tawh tho a, Rovi neih atân a lo sâwm tawh pawh kha thil àwm lo tak a ni lovin ka hria, a aw han hriat phei chuan a puitling mah mah tawh tlat a ni.

U Valpuia kan khuaa a haw phei leh hnuah chuan ka ngaih a zual leh roh khawp mai a, ka lung a lêng thar leh a, rei lo tê kan inhmu leh zuk a, chu vàng vek chu a ni; mahse, a rawn kal kha ka lãwm bawk si a, min hmu tùra a rawn kal leh ka awmna hmun min rawn hmuhpui hrim hrim kha ka lãwm lo thei lo a ni, fel ka ti êm!

Ningàniah interview ka nei a, ka huphurh deuh vàng nge ni, ka rin ai daihin ka la zãm zui a! Ka kut khùr der der kha an hmuh loh hrâm ka beisei, zawhna erawh ka chhâng pângngai thei viau a; ka aw erawh duh ai chuan a zàwi deuh ka ti.

Ka luck lo ve hrim hrim nge ni, chutah pawh chuan ka tling leh ta chuang lo va. Tuna mi kherah kha chuan politics a inrawlh ka ring lo va, mak erawh ka ti deuh. Ka tlin erawh ka inring vak lo nain a ti țha pâwl ka nih chu ka ring tho a. Mi 5 lâk tùr an ni a, tlingte hming zâwna an pa hming an tàr chhuah ațang chuan ka tling lo pawh kha mak ka ti leh ta lo, ka tâna ruat a la ni lo a ni ang e ka ti ta mai. Ka zirlai lamah ka rilru sâwrbingin hna ruak lam chu ka dah țha ta rih a, lehkhabu ka nei țha a, exam zawh veleh ka bei leh tlut tlut mai ang chu.

Hun a liam leh hret a, ka zirlai ka exam zawh hnu chuan eng exam pawh hmachhawn thei chuan a hma aia ngawrhin lehkha ka zir leh a, tunah hi chuan bank lam hian ka rilru a àwn ta deuh tlat. An hna a ngheh mai bâkah an hlawh a țha ka ti a, a hahthlâk deuh ang tih chu a hriat a; mahse, 'mite pawhin an theih chuan engah nge ka theih loh bîk ang' ka ti rilru a, bâkah, ka subject lâk hian a zir deuh bawk a, a fuh ngeiin ka ring bawk a ni.

*******

Tunah chuan bank-a hna ka thawh ațangin kum thum chuang zet a lo liam ve ta. Ka thawh chhuah ngei pawisa hmuha hlawh neih chu nuam ka ti a, bâkah, ka rin aiin ka tui phian bawk, chinchâng hre lo ve tak tak lo țanpui vêl kha nuam ka ti ve tlat a nih chu. A țantìr berah khân Mamitah ka thawk phawt a, tunah hi chuan Serchhîpah ka awm leh tawh, kan thawhna ngai rengah thawk lovin min sîksàwi kual ve a, sîksàwi zîngah ka tel a; mahse, a țha ka ti phian mai, khua ka hmuh tam ve phah alawm.

Mampuii'n pasal a neih dâwn vàngin kan khuaah ka haw dâwn a ni. Kan khuaah hian kum thum chuang zet ka haw tawh lo nain tuna ka haw tùr pawh hi ka phûr hran lêm lo; mahse, ka țhiannu ve berin pasal a nei dâwn a, phûr lo lutuka lan erawh a tihchi dâwn loh avàngin phûr deuh ang chuan ka awm ve hrâm hrâm a, min rawn biak châng pawhin hlim takin ka be ve tho.

U Valpuia ka hmu ngèi ngéi dâwn a, chu chu ka duh loh ber a ni. Aizâwla ka awm laia phone kal tlanga min rawn țhen ațang khân kan khuaah hian lêt châkna ka nei tawh lo va, chhuanlam tùr tingin hna ka nei bawk nèn, ka haw lo ta char char rêng a; mahse, tunah zawng hnialna leh pehhêlna tùr a awm tawh lo va, ka țhiannu bulah hian chhuanlam tùr ka hre tawh lo a ni.

Lungleiah tak hi chuan hna ka thawh hnu khân vawi hnih thum vêl chu ka phei ve a, tuna ka han phei leh erawh a dàn a dang ta deuh, ka pan lam tùr ka hre chiang a, a hmêl ka hmu thut ang tih hlauin kan vêng panna kawng lam chu ka thlîr zauh zauh a, engati nge ka thiam lohna vànga ințhen pawh ni lo hian a hmêl hmuh ka hreh êm êm ni. Ka hreh tùr a ni lo, zah pawh ka zak tùr a ni lo, hmeichhe dang pana min țhentu hi engah nge hmuh ka hreh tehlul ang, ani pawhin min țhen thei a, ka tel lovin hmeichhe dang lakah a tlei thei a nih chuan engah nge ka zah anga hmuh ka hreh viau lĕm ang.

*A ÊNG ZÂWNGA THLÎR TLAT MI HI AN HLIM RENG BÎK TIHNA A NI LO, HUN HARSA AN TAWH CHÂNG PAWHIN AN TÂN HUN ȚHA ZÂWK A RAWN INHER CHHUAK ANG TIH BEISEINAA AN THLÌR ȚHIN VÀNG A NI ZÂWK*