☆Mr. BAD(ZAWLAIDI NEITUPA)☆ - 15 By Dingdi Pachuau

☆Mr.BAD(ZAWLAIDI NEITUPA)☆ - 15 By Dingdi Pachuau

Zara han zah theih loh êm êmzia chu, Krismas hmang tùrin a rawn haw phei ve a, a fanu a ngaih thu chhuanlama hmangin Mampuii chu a rawn beisei leh a nih chu!! Zak lo hi ka ti lutuk a, ka thin a lo rim ve țûn mai. A nupui țhen phah hial nân Amy a ngaizawng a, a nupui tlàn hlànin tenawm takin an lo innei hman bawk a, tunah a nupui hlui chu a rawn beisei ngam leh a nia! Mapuii'n phone-a a rawn biak vêl dàn min hrilh phei chuan ka thin hi a rim lutuk a, àn khum phiar phiar ka châk a, a duh loha a țhen tawh Mampuii ni zâwk hial àwm ka ni. Zahna hi khawiah nge a dah bo bîk ni? A lo pian chhuah khân a pianpui ve lo em ni zâwk te ka ti, hetiang êm êma zak lo hi chu a inring lo lai khawn fawk fawk ka châk a ni.

"Au Vid-a'n a hria ang tih ka hlau lutuk! A thin a rim dâwn si, a rawn haw tih pawh hi a la hre lo ni chuan ka hri a, chutah, U Valpuia a lo awm leh bawk a!! Ani phei hi chu a them pawhin hrilh chi miah loh, insual buaina a thleng leh nghâl a ni mai. Ka rilru a hah! Haw phei leh daih se... Khati khân min en suh, ka khawngaih vàng a ni lo, min duh lova min țhen tawhtu chu engah nge ka khawngaih viau ang? Mite min sawi lehna tùr ka hre peih tawh lo zâwk a ni," nûr nanga ka lo en avàng chuan a ti a, ka hmui ka lo tih pawrh khum leh vak a.

"A rawn beisei reng che chuan i 'aw' duh maiin ka ring a ni, i rilru a nêm si, ani a zak lo si, i rilru nèmzia kha hriain zak map lovin a rawn beisei che ang a, i lo nêp zo lo ang tih ka hlau a ni," ka lo ti a, ani chuan," Teuh lo mai! Ka duh bîk tawh teuh lo mai," a ti ve thung a," I fanu pa a nia, a rawn tih a rawn tih che chuan e, i lung a lêng leh ang... ka ring deuh tlat, lo inrawlh ve viau pawh a dik kher lo maithei a; mahse, ka țhiannu ber i ni a, i nat nawn ka hlauh vàng a ni," ka ti leh țâlh a, ani pawh chuan," Ka hria asin, ka țhiannu ber i ni a, ka tâna țha tùr i duh tih ka hria e, min ring rawh. A, ka ning!! Sawi tawh lo teh ang, sawi sawi tlâk pawh a ni lo," a lo ti ve leh a.

Mampuii chu nula ni tawh hek lo le, a tel lo chuan mi dang zawng chu zànahte kan inkhâwm a, kan la zai khâwm rih loh avàng chuan bàn veleh Mampuiite inah kan lût dial a, naute awm pahin thingpui hâng kan in a. Duh duhin a chhuak ve thei tawh si lo va, an in chu lèn khâwm nân ber kan hmang lo thei lo a ni.

Kan inkhâwm bâng kan bengchhen hlawm viau lai chuan U Vid-a a rawn lût a, khua a vawh tawh avàng chuan a inha lum ve khawp mai. A hnungah rawn zuitu awm dâwna ka hriat tlat avàng chuan ka lo en deuh reng a, beisei ka nei pawh a ni mahna; mahse, tu mah an rawn lût lo va. Zmi chuan," U Vid, thingpui hâng aw?" a lo ti vat a, ani chuan," A, ka duh lo mai ang, ka chhuak leh nghâl dâwn a," a ti a, room lamah a lût zui nghâl a.

"U Vid-a hi fatu-ah khân a tel ve em kha?" Feli'n a tih chuan Rini chuan a tel loh thuin a lo chhâng vat a, ani chuan," U Valpuia an telh si a, telh ve àwm alawm le, an inkawp char char tih an hre vek si a," a rawn ti a, Ruatpuii chuan," Ni e, an tisual ve deuh chu a ni, kum tin an ruat dùn ve ziah a, tel țha duh lêm lo mah se a ruattute hian an thlauhthla ngai bîk lo. U Vid-a tel lovin U Valpuia hian nuam a ti dâwn lo chiang, a khawsak dàn zawng zawng lah tu mahin an hai lo va, a inthlahrun an hlauh vàng pawh chu a lo ni maithei a; mahse, a fuh vak lo chu a ni," a lo ti ve a.

"In sawisêl peih, an ruat loh kum te pawh a ni ve ang chu. Puitling tawh an ni a, 'ani tel lo chuan nuam a ti dâwn lo' tih mai mai, a ho thè thè êm mai, ngaihtuah duh vak s'u, in rin aiin nuam a ti ang," Mampuii chuan a lo ti ve thung a, Hruaii chuan," Ni e, nuam a tih theih nân țan la zâwk ang u, a ruattute lam sawisêl lovin. Amah pawh a lo inthlahrung dëk thei a, Biak in a rah lohna a rei tawh bawk si nèn; kan sâwm ang a, kan kawm tlat chuan mal a inti bîk lo ang," a lo ti ve bawk a, Rini chuan," U Valpuia hian tlin pawh a tlin dâwn em ni le? Nilênga chêt a ngai dâwn sia, a chèrzia leh a khawsak zia lah tlâng hriat vek a ni bawk si a," a lo ti ve leh a.

"Hei, min lo rêl elo?" U Vid-a chuan an țawng chu a rawn hre hman a ni maithei a ni; Ruatpuii chuan," Teuh lo mai!" lo ti vatin a nui sûng a, ani thung chuan," I mitmengah dâwt a lang thei," a lo ti ve a, nui pah hian," In țawng ring êm a, hriat loh theih pawh a ni lo alawm. Nia, Valpuia chu sâwm ngèi ngéi rawh u, thiam takin sâwm bawk ula, zu a in tlèm phah hlauh chuan a țha dâwn asin," a ti a, a țawng tàwp lam chu a thu tak viau mai.

U Valpuia sàwm chhuah ngei tum chuan an inrawt phûr a, 'kan' ka ti ve ngam lo, kei chuan eng mah ka lo sawi ve si lo va. Kan nunhlui hre vek an ni si a, ka lo phùr ve viau chuan ka beisei leh angah an ngai ang tih ka hlau a ni. Chu vàng tak chuan thil eng mah ka sawi ve duh lo, an tih ang ang chuan awm ve ta mai zâwk ila a țha ka ti mai.

Ţhianteho phûr miau hek le, U Valpuia sàwmnaah chuan kal loh ka tum rilru deuh a nia, "Mampuii ka lo awmpui rih ang," ka tih rûk laiin "I kal lohte chuan," an ti tlat a, phûr vak lo chuan ka kal ve ta a. Ka phûr tho a, ka phûr lo tho bawk a, a lo rùi ang tih ka hlau a, bâkah, lo inkawp tawh kan nihnaah hmuh hi ka hreh deuh țhìn a ni.

U Vid-a a lo awm a, ka rin loh deuhin U Lynn-i a lo awm ve bawk! Ka rin loh deuhin ka han ti ngawt a, U Lynn-i vàng hian min rawn țhen kha a nia, a lo awm hi a àwm hliah hliah zâwk a ni. Țawng bawrh bawrhin kan kal chhante chu an sawi bawrh bawrh nghâl a, kan inkawpna kha a rei tawh a, an theihnghilh vek tawh nge ni, ka awm dàn tùr ngaihtuah tel hauh lo chuan fiamthute thawhin an nui dar dar reng a, U Lynn-i chu an fiam pah bawk a, kei pawh an nuih apiang chuan ka lo nui lui ve ringawt zêl a, nuih erawh a za hlawl lo, haw daih ka châk.

"Nangniho hi chuan min sâwm vek tawh a, Nunui hian min la sâwm ve miah lo," a rawn tih chuan ka en vat a, min lo en lovin U Lynn-i a lo en daih thung. Ka hmui liak huh tê tê phawtin," A, mi dangin an sàwm tho che a, an sàwm che chuan ka sâwm che tihna tho a nia," ka lo ti a, țha taka ka țawng chhuak thei chu ka lãwm khawp mai.

"Min han sâwm ve hrim hrim la?" ani chuan a rawn ti leh a, tunah chuan min rawn en ta thung. Ka mit la sawnin ka hawi kual a, min rawn en deuh vekin ka hria! Zah avànga bîng deuh hlek chungin," Lo kal ngei rawh khai," ka han ti chhuak ta sap a, lài tak ka ni lài tak! Ka aw pawh a chhuak ring thei lo.

"Min kàwm peih tak tak dâwn em maw ni kei ang hi chu," a rawn tih leh chuan Rini chuan," I mal hauh lo ang, nuam i ti viau ang," a lo ti vat a, mi dang pawh chuan Rini thil sawi chu an lo tuihnih ve tliar tliar a, U Lynn-i chuan," Sâwmtu in rawn kal tam bawk a, a rawn tel ngei ang, ni e, hlim taka siam in lo tum dâwn nia, a khua hi a har ve thei a maw," nui deuh chung hian a lo ti ve a, U Vid-a pawh chuan," Ka rawn nawr lui tho tho ang," a lo ti ve leh a.

Krismas chu a unaute pahnihin an rawn hmanpui a, an fate pawh an tel, ka hriatna chhan pawh an rawn inkhâwm tlat a; mahse, U Valpuia erawh ka hmu lo. Kan han sâwm ve tak a, ruai buaipuinaah pawh chuan ka hmu lo, a inthlahrung nge ni ang, U Lynn-i nèn an awm dùn ang a, kal a peih lo zâwk ang? U Lynn-i nèn an ni zui lo tih chu ka hre tho a; mahse, U Lynn-i hian a la duh êm êm tho a, mipa dang han kawpsan lãwp lãwp țhìn mah se an ințhen veleh U Valpuia hi a pan leh mai țhìn ni àwm a ni, an sawi dànin. U Valpuia tân pawh lo hnar chu har ve tak tùr a ni, duh taka a lo kawp tawh kha a ni ve tho si a, min țhen phah hialna kha.

Fatuho zînga la naupang lam deuh chu kan infiam nak nak a, inkàwm rual êm êm chu ni lêm lo mah ila kan innêl a, pa un lam deuhte erawh chu kan fiam ngam chuang lo va, kan ri chèl chûl mai. U Malsawma chuan," Nakkum lamah Pathian zâra kan la dam te a nih chuan fatu in ni tawh dâwn miah lo a nia, tu tute emaw phei hi chuan pasal in nei tawh maithei a ni, chu vàng chuan che sauh sauh rawh u, hlim theih lai hian hlim hlê tùr," tiin hmeichheho chu min hrilh dap dap a. Rini chuan," Kei first!" a lo ti vat a, kan nui dar dar a.

"Nunu, damlo sa tùr hi in va pe ve mai dâwn em ni ang?" Fatu leader Pa Ngaihawma chuan a rawn ti làng láng a," Aw le," ka lo ti vat a, ani chuan," Ruai țheh tak tak hma hian pêk fel vek a țha. I țhiante pawh kha rawn ko nghâl mai teh, kalpui atân i duh chuan pakhat sâwm bawk la aw. Kumin chu damlo an tam lo va, a tihzia khawp mai," a ti leh a, mi dang chu ka ko zui nghâl a.

Mak deuh maiin U Valpuia sa tùr kan pe dâwn a! A damlo tih pawh ka lo hre miah lo va, chutiangin Zmi pawhin a hre chuang lo, kawnga kan kal lai chuan chaw dawh dâr chu a ri ta mang mang a; mahse, chu lam ai chuan U Valpuia damlo mak kan tih thu chu kan sawi zâwk a, Zmi chuan," A lo damloh vàng hi a ni ngei ang a rawn kal loh chhan hi," a ti sap sap a, kei pawh chuan," A ni maithei a ni," ka lo ti ve a.

An in kan va thlen chuan a chhûngte chu ruai țheh tùrin an lo chhuak vek tawh a, amah chauhin a lo awm a, puan a lo sin thûn mai. Zmi chuan," Hei, i sa tùr kan lo pe che a. Eng nge i an? I damlo tih pawh kan lo hre hlei nem," a ti nghâl bawrh bawrh a, ani chuan hnár ping aw tak hian," Ka țha e. In va fel ve!" a lo ti phawt a, a chawlh dat hnuah sawi zawm lehin," Ka damlo chiah pawh a ni lo, ka hritlâng pik lutuk vàng hi a nia," a ti leh a.

Zmi'n sa pêkna bêl a sil lai chuan U Valpuia chuan," I hah em? In buai àwm si a," a ti sup a, kei chuan," Hah lo ve, kan tlêm chhe lo bawk a, kan indaih suau suau viau mai," ka ti lêt ve a. Min en reng tih ka hriat avàng chuan ka en lêt duh vak lo va, ka lài ru tho bawk nèn, bâkah, kan pahniha awm chu nuam ka ti vak lo va, Zmi awmna lam ka hawi deuh reng nghe nghe.

"Min hlau elo?" a rawn tih tâkah erawh a mitah tak ka en lo thei lo va," Engah nge ka hlauh ngawt ang che?" ka ti ve thung a, ka mit erawh ka la sawn leh thuai a. A rawmawla a hnâr tuai zohin," Min hlau niin ka hria, ka seh dâwn lo che a nia," a ti leh a, a nui zui hawk a, duh lo teh mah ila a rûkin ka lài êm êm ringawt mai.

Zmi rawn phei chu," Thingpui in rih ta che u, kurtai tui deuh a awm kha," a lo ti vat a, ani lah chuan," A ni maw?!! A tui ngawt ang. Nunu, in lawk ang aw, kurtai chu ka ei châk," a lo ti vat a, flask-a thingpui a awm sa avàng chuan a va thli tawp a, kurtai awmna an inhrilh leh hnuah thingpui no thum nèn a rawn chawi phei a, ka lo pui ve vat a.

Kurtai chu a buang thêng a, a thlum tui hmèl khawp mai. Thingpui lah chu a takin a paw țha ve bawk si a, in man a awm khawp mai.

"Damdawi i ei em? Eng damdawi nge i ei?" tiin an han inzâwt leh rih a, a ruih hmèl bîk lo va, a hmêl hmuh a hrehawm viau loh bâkah a țawng chhuak pawh ngaihthlâk a hrehawm lo ve; mahse, a hnâr erawh a ping thung a ni. Kan chhuahsan dâwnah," Kan la rawn kan dâwn che nia, hun dangah," tiin kan inthlah liam a.

Kan hun an tihah chuan ka kal ve hman ta lo, Mala'n min rawn tlawh ve tlat mai si a! Serchhîp lamah Krismas hmangin kum thar lam chu Lungleiah an rawn hmang dâwn a lo ni a, ani chu a rawn tlang nghâl daih a lo ni. Min rawn tlawh ve vang vang ta chu lènsan daih thu a awm si lo va, țhiante paeh chu an awm ve deuh reng a, Mala pawh chu an titipui ve bawrh bawrh phawt a, U Valpuia kan an lo tum ve laklawh tawh si a, an chhuah dâwn chuan mit min siai khum sak sak pah leh awmze nei tak taka min melhin min kalsan ta hlawm a, kawng ațangin min rawn au leh hrâm a nih chu, an nghâl hlawm a nia.

"Ka rawn kal hun hi a fuh vak lo a ni maw?" Mala'n a tih chuan," Fuh lo lo ve, i rawn kal vang vang zâwk a! I chau zâwk ngawt lo maw?" ka lo ti ve thung a, ani chuan," Chau lo ve, rawn kal hlàn hi ka nghâkhlel tawh lutuk a," a ti ve leh a, thingpui hâng chu in hlakin," Hmâna hnim hnah kan hawn ang kha in huanah khân a la awm ang em?" a rawn ti leh a.

Car-a rawn kal a ni bawk a, keini ang thingtlângah hi chuan mikhual hi an langsàr khawp a, chhùn ênga rawn lêng a ni bawk nèn, min sawi duh chuan min sawi leh nasa viau ang. Khua ka fanpui pah bawk si a, ka nute school hlui hmunte fanpuiin high school tlângah ka hruai bawk a. High school tlâng hi kan khuaah chuan a tlâng sâng lai bera awm a ni bawk a, boruak a nuam a, Nipui lai phei chuan nuam tak hi a ni ringawt, ani pawh chuan nuam a ti deuh a ni ang," Nipui laiin a va nuam dâwn êm!!" a ti chhuak nghe nghe.

Chawhnu pum chuan a awm ve ta reng a, ka nu leh pate nèn pawh an titi a, anni pawhin hmãn deuha min rawn tlawhtu ka țhiante pahnih zînga pakhat zâwk kha a ni tih an hria a, an chei mikhual lêm lo. Zanriah ei tùrin an sáwm ve hial a, ani chuan," Ni dangah zâwk le, kan haw hma chuan ka la rawn tlawh leh ang che u," a lo ti thung a, kei chuan ka sâwm nawn lêm lo. A haw dâwn chuan kawngpuiah ka thlah a, a tlàn liam thlengin ka kut ka vai lauh lauh a.

Kumin Krismas ruai țheh lai khân insual buai an awm miah lo, U Valpuia hmuh tùr a awm loh vàng nge, mi dang an lo fel vek ta zâwk ni; mahse, rui hmêl hmuh tùr kha chu an awm reng tho a; mahse, an over vak lo tlat. U Valpuia hritlâng chu kan țhatpui, fel faipui zâwk a ni ngei ang. Ka thil ngaihtuah dàn hi hria se chuan a lãwm vak kher lo maithei a ni; mahse, thu dik a ni miau alawm.

*A THLEN CHIN AȚANGIN MI LO TEH NGAWT SUH, A HRINGUNAH ENGTIANGA NASAIN NGE HARSATNA A TAWH I HRE MIAH SI LO*