☆Mr. BAD(ZAWLAIDI NEITUPA)☆ - 16 By Dingdi Pachuau

☆Mr. BAD(ZAWLAIDI NEITUPA)☆ - 16 By Dingdi Pachuau

Mala rawn kal kha ka țhiante khân an hmu ve vek si a, min dem laih laih a," A hmêl pawh a chhiat loh kha, a hmêl ațang lah khân a fel tih a hriat tawp a, in inhmeh khawp mai," an ti a, kan inkawpah an ngai nghâl hmiah mai niin a lang. Ka nu leh pate pawhin ka bialpaah an ngai a, a hma daih tawh khân min rawn tlawhin an lo hmêl hriat sa ve tawh bawk nèn, ka nu chuan," Mi fel hi chu an pâwn lam lan dàn ațang pawh hian an hriat theih ruak asin, a hawihhâwm roh bawk si a, khawpui tlangvâl fel tak a nih dâwn kha," a ti a, ka pa pawhin," Khawpui tlangvâl hi chu an hawihhâwm thei viau mai a, a mimir hrim hrim pawh hi an fel, thingtlâng lam hian kan tluk miah lo a ni. Tûnlai chhanah tlangvâl hlawh nei, khawsak harsa lo, ruih theih thil ti miah bawk si lo leh tlâwntlai țha bawk si hi chu khawvàr lam arsi ang pharh an ni asin," a lo ti ve a, ka lo inrawlh ve lo, ka thaw huai ringawt.

Ka lèn chhuahpui ve bawk a, min lo hmu an awm lo thei lo va, min fiam ngam chin chuan min fiam bawrh bawrh mai," Aizawl lam mâkpa ngat aw ni ang," an tih loh leh," Pasal i neih hunah chuan kan inhmu khât tawh dâwn mang e, i lawi hla dâwn si a," an ti a, a țhen lahin," Nang tal hi chu i man ka ei ve ang," an ti a, ka nuih an tiza hlawm viau a, fiamthuin ka chhâng kual vêl mai mai, chhàn dàn thiam an har hlawm êm mai.

Mampuii chuan," A takah ka hmu ve châk asin, rawn lènpui tùr alawm," a ti a, kei chuan," Ka bialpa a ni teivet lo, ka țhianpa alawm. Hmân kumah pawh a rawn kal tawh kha, kha khân i hmu lo em ni?" ka ti ve thung a, ani chuan," Hmu pawh ni ila ka hre tawh nâng, a rei tawh si. A rawn kal leh hunah chuan rawn lènpui tawh ang che, mâkpa hual chu belhchian ka châk ve alawm," a ti leh a, ka ner khum sak a, ani lah chuan," Chiang taka a hmêl ka hmuh a ngai, keimah anga i tihsual ve loh nân, i hma ka ngaihpui che a, ka fîmkhurpui che a nih chu aw," a ti leh a, nui hawk chung hian," Aw le, Boss, lal ber," ka ti a, chutianga ka ko kher chu a nuih a za ve bawk a ni ang, kan nui dùn hawk hawk a.

Zara pawh Lawngtlai lamah a phei leh tawh a ni àwm e, a phei hnuah chauh U Vid-a'n a lo phei thu a hre ve a, a tihzia tak tak. U Valpuia lah hritlângin a tibuai a, pâwnah a tam loh phah bawk a, a fuh vêl vek mai.

Bialpa nei lo hlawm ta chu chhuak ve thei lo ber Mampuiite inah kan inhmu khâwm tal tal reng a, nula rual awm khâwm kan ni bawk a, kan awm ve duah bawk nèn, bengchhen pawh kan bengchheng thei khawp mai, U Vid-a ina a lo awm lai a nih hi chuan," In bengchheng êm mai, lêng chhuak daih teh ang," a ti ve ziah a, U Latei hian," I ho thei e, hlim hun lai a la ni ve a, an la bengchheng ve rih a nih hi," tiin kan thlavàng a lo hauh țhìn.

Kan khuaah hian Pathian zârah khawsak harsa lutuk, berh lutuk kan tih ang chi kha kan awm lo tlat a, sum lâk luhna țha tak tak nei lo pawhin thlai thar ațangin sum chu tlêm tlêmin kan la lût ve țheuh a, țanpui ngai ngawih ngawih ang chi kha kan awm ngai lo. Krismas laiin damlo awm ve tho mah se na deuh ang kha an awm lo bawk a; mahse, kum tharah erawh damlo inkhâwm thei lo an awm ta nual a, U Valpuia ngei pawh hritlâng pik lutuk vàngin a chhuak thei lo va, kum thar ruai țheh zawh hnuah kan tùrin kan kal ta dial a.

Damloh hi chu thil nuam tak a ni lo bawk a, ani pawh khumah rizaiin a lo inkhuh lûk a; mahse, kan thãwm hriain a rawn tho chhuak a, thawh kher a ngaih loh thu kan hrilh nain a rawn țhu chhuak tho a ni, a sam hnawk niai leh a biang hmul vêl chu enkawl ngun loh tih a hriat viau.  

Mampuii chuan," Rawn thawh kher a ngai hlei nem, kan rawn luhchilh mai dâwn che alawm, khawnge a changtunu pawh hi? A rawn awmchilh deuh char char che ka rin tehlul nèn," a ti nghâl barh barh a. U Lynn-i a sawina a ni tih ka hria a, a rûk tak chuan ngaihthlâk nuam ka ti miah lo.

"In fel țhìn e, thingpui kha chu inlum mai ula," U Valpuia chuan a ti thung a, a aw ațang ringawt pawh chuan a pik viau tih a hriat ngawih ngawih. A khawngaihthlâk roh mang tak e. A ute kha an haw tawh a ni ngei ang, vawiin lamah pawh an hmêl hmuh tùr a awm lo êm mai. Mahse, engtin nge ani damlo lehnghâl hi an hawsan theih rêng rêng ni? An ti àwm lo deuh ka ti, ani tân chêt vêl pawh a hrehawm dâwn tehlul nèn.

An titi hlut hlawm a, kei chu ka ngawi deuh rauh rauh thung. U Valpuia bulah hian sawi tùr hi ka hre țhìn lo, min țhen hnu ațang khân a nia ka tih. Kan inkawp laite kha chuan sawi tùr kha a rawn awm chawp ve zêl mai kha a nia, kan in-video call pawhin sawi tùr kha chu ka hre ve țeuh zêl, min ngaithla deuh ngar ngar zêl kha a nia, tunah hi chuan englim a dang tawh a, sawi tùr pawh ka vàn tawh a ni.

"I va ngaihtuah nasa rauh rauh ve!!" ti paha Zmi'n min rawn kheuh zauh chuan ka phu deuh zawk a, Zmi ka en chuan a mitko a lo sàn ãk ãk a, Hruaii chuan," Ngaihtuah nasa ang, a intinei țha deuh a, a rawn kan leh țêp tawh ang chu," a lo ti vat a, Feli chuan," Aizawl lamah mo làwmin kan rûm phei vut vut ang chu!" a lo ti ve leh a, an nui țhû hlawm a.

"Chu, ha tah hriam a ngai țan dâwn tihna a ni maw?" Aw chhãng thám chhàla U Valpuia'n a rawn tih chuan," An ti ve mai mai a nih hi," ka lo ti ve a, Mampuii chuan," Zêp zêp lo khân sawi ve mai mai teh, tu mah han zah tùr pawh kan awm loh hi," a lo ti ve leh a, Rini pawh chuan," A dik chiah, țhiante chu inzah a ngai lo, kan inhrilh kual vêl mai mai alawm ti raw, Zm? Nang pawhin rawn rûk haw i tum a, i phuarna hrui a lo seh chat palh hlauh mai a, kut ruakin i rawn haw mai mai ti raw?" a lo ti a, ani chuan," Dik lutuk! Thlalâk pawh ka rawn thawn che u kha, a chhe lo mai sia e, nakinah hruikhâu ngatin phuar tùrin ka kal leh ang," a lo tih zawm ve zat a, kan nui zo ta vek a.

U Valpuia khua a rawn sik a, a tlun a ni ngei ang, a rawn khùr deuh hlawk hlawk mai. Mampuii chuan," I tlun a nih kha, damdawi ei la, mu lum vat rawh," a ti thuai a, khum lamah a duh lo chungin kan nawr lût lui a, rizaiin kan vûr hlûn a, a țhenin a kea a tlawh tùr tui lum ip an buaipui laiin a țhenin a kut hmâwr leh a ke hmâwr chu tih lumsak an tum bawk a, mi dang an chêt vek avàng chuan che lo bîka țan chu a nuam miah lo, chêt dàn tùr erawh ka hre lo thlâwt.

Mampuii chuan," Nunu, a kut hi lo tuaisak teh, sikri ka'n chhêm ang e," a ti ta hlauh a, a thawh nghâl avàng chuan a kut ding lam chu ka vuan ve nghâl zat a. Rizaia a inkhuh pil vek avàng chuan keini pawhin rizai hnuaiah chuan kan hmet a ni mai a, kei tak pawh ka kut a lum êm êm lo va, awmzia a awm phah viau pawh ka ring hran lo.

Ka kut nghet zetin a rawn hmer ta, ka tuaina chu nâ a ti a ni ang tiin ka han chàwl deuh a; mahse, ani chuan  min thlah lo chuan a kut chu tipharh zauin ka kut kârah chuan a kut chu a rawn rawlh a, nghet zetin a vuan zui leh ta a, U Lynn-i kut a vuan emaw a ti a ni ngei ngei ang. Mi dangin min hmu ang tih hlau zetin ka hawi kual a; mahse, mahni buai buaiin kan lo buai vek a, bâkah, rizaia a inkhuh vek avàngin kan kut chu hmuh theih a ni lo hrim hrim bawk, a kut lehlam tuaisaktu Feli kut saw a vawnsak ve tho ang em tih ka ngaihtuah rauh rauh mai.

Mampuii'n a sikri chhèm a rawn hùn luh pawh chuan ka kut chu a la thlah chuang lo va," Tui ka chhawp theihnghilh," tiin a tlãn chhuak leh a, Feli pawhin tukverh chu zau vak lovin a va hawng nghâl a, boruak ûp deuh hleka sikri chhèm zawng a hrisêl lo a ni. Ka kut lehlam chu sikri-ah hemin chu chuan a kut chu ka hùmsak zêl a, rei a ngai lêm lo, a kut pawh chu a rawn lum ta thuai a, a hnu deuhah phei chuan ka kut chu a kut aiin a vâwt ta zâwk mah a.

A damdawi eiin a hneh a ni ang, a muhìl zui nghâl daih a, keini pawh chu room-ah awm reng lovin kan chhuak ta thuai a; mahse, kan haw nghâl lo, hawsan nghâl vek chu a fuh chiah lo kan ti a ni. Mampuii erawh a nuin a rawn bia a, naute a harh tawh si a, a haw dáwn chuan keini chu lo la awm rih tùra min tiin U Vid-a a rawn kaltîr thuai tùr thu min hrilh a. Ani pawh a rawn thleng thuai a, rei lo te hnuah U Lynn-i a rawn lang zui ve bawk a, keini pawh chu kan awm rei zui ta lo.

A tûkah Mala a rawn kal leh tak tak a! A tûk lama haw nghâl mai an tum tawh avàngin min rawn tlawh leh a lo ni. Inah rei ve tâwk tak kan titi hnuah Mampuiite inah ka va lènpui a, ani chuan a lo hre sa deuh reuh tawh bawk a, a lo be nghâl hlut mai. Mala lah chu naute làwm mi tak a ni chêk ang chu, Mampuii fanu pawh chu a pawm ve nghãl dâwrh dâwrh mai a, ani lah chuan a lo duh phian zui, a nuin," A rit ve si a, i hah lutuk ang," tia lâk chhâwk a tum leh chuan naute chuan a lo duh miah lo a nih chu! 

"Awi, a zah lohzia hi, lâk a duh miah lo nia! A mak hlé mai, a nèl deuh leh a hmuh țhante tih loh hi chuan an la mai mai thei hlei nem," Mampuii chuan a ti barh barh a, Mala chuan," Naute hi chuan duattu hi an hre ve thei riau asin," nui chung hian a lo ti a," A nih dâwn hi, han pawm pawh i thiam sa riau mai. Nunui nèn in neih ve hunah phei chuan i pawm hlù hlú reng dâwn a nih kha," fiamthu hian Mampuii chuan a ti zui hlak a, Mala chuan min rawn enin," A phùrawm ka tih zâwng tak a ni," nui chungin a ti a, kei erawh chu Mampuii ngei ru tak hian ka lo nui ve ringawt a, Mala awm loh hnuah a châk dâwn lo nasa a ni tih ka ngaihtuah rauh rauh a.

U Vid-a ram kal rawn haw lah chuan nui duh miah lo hian," Kha kha maw in pa chu?" a rawn ti zui a, min fiam a ni tih hre mah ila Mala chuan a hre thiam ve kher lo thei a, ka zak tak tak a ni. Hetiang lam hi kan sawi dùn ngai si lo, infiam zauh zauh tih loh chu, Mala chuan amah chu ka ngaizâwngah leh kan chanchin pawh mi dang bula sawi vek angah a ngai ngei ngei ang, a fuh lo e.

Haw kawngah chuan," Fiamthu hi an duh bawrh bawrh hlawm a nia, kan fiamthute hi a sâng a, i hre thiam hrâm hrâm dâwn nia," ka ti a, ani lah chuan," Min fiam khân nuam ka ti, fiamthu mai mai ni lovin tak tak ni se ka lo ti asin," thu tak zet hian a lo ti thung a, a fiamthu a nih ka ring deuh a nia; mahse, a thu tak si a, chu chuan min tihamhaih deuh tlat a, han sawi leh mai tùr pawh ka hriat loh phah.

A haw hmain thingpui a in leh tê tê a, chumi chhûng chuan ka nu chuan chîk zetin a lo kàwm a, amah chu hriat chian këlh tum hi ang ka ti ber mai. A hahthlâk țhìn a nia, kan nì-ah a ngai chu a ni ngéi ang a, nakinah chiang deuhin ka la hrilh ang chu.

A kal dâwn chuan ka nu chuan," Hun ãwl i neih hunah i lo la zin dâwn nia, chiang zâwkin kan la inkàwm leh ang a," a ti a, ani pawh chuan," Ni e, hun a awm phawt chuan le," a ti ve a, car a hùnna thlengin ka thlah a, a luh dâwn chuan," Zànah ka rawn bia ang che aw, khawngaihin ka tân hun lo insiam la," a ti sap a, kei chuan," Big Boss-in i tih tlatte chuan," nui chung hian ka ti a, a nui ve sak a.

Ina ka luh leh chuan ka nu chuan," A kal ta maw? A fel roh ka ti êm mai, a bula awm a hahdam si, a puitling ru tlat," tiin a fak zui mawlh mawlh a, kei pawh chuan," Puitling e, a rilru hi a puitling bîk lutuk asin, upa ber a nih vàng pawh a ni maithei a ni," ka lo ti ve a. Ka nu chuan," Ni thei tho; mahse, a pianpui pawh a ni thei tho bawk a, mi fel tak chu a ni," a ti leh a, ka sawi ve tawh lo, ka bialpaah a ngai palh ang.

Zànah min rawn be ta ngei a, min duh thu a sawi chhuah chiah chuan U Valpuia ka hre chhuak zawk mai. Ka lo rin sa deuh chu ni tho mah se chhàn dàn tùr erawh ka hre mai lo va," Nunu, min chhâng nghâl tùrin ka ti lo che a, min duh lét tùr pawhin ka ti thei hek lo che, kei hian ka duh che tih thu ka hrilh mai che a ni. I rilru tihhrehawm phah nân te khân i lo hmang ang e, chutiang tùrin ka sawi lo a nia, ka duh êm che a, ka zêp zo tawh ngang lo a ni," a rawn ti dap dap a, ani meuhin min duh thu a sawi ta a nia, lãwm hlê tùr ka ni. Mampuii phei chuan min duhpui chiang sa a, ka hria. Hma lam pana hlim taka awm tùrin min duh a, hma ka la sâwn hlei thei lo mai mai zâwk a ni.

Mut hmunah ka ngaihtuah zui a, kei hi ka nunhluiah ka la tâng reng a, ka chhuak thei reng a, ka chhuak duh tlat lo ni maiin ka inhria. U Valpuia hi ka tân nimin lama thil thleng ang a ni tawh a, kan pahnihin nunhlui kan nei a, nunhlui chu hun kal tawha mi niin tûn hun a ni lo va, nunhlui a ni tawh. Nunhlui chu tu mahin an ko kîr thei tawh lo, ani pawh hma lam panin a kal tawh a, tûn hun hi kei pawhin hma lam ka pan ve hun tùr ni àwm tak a ni a, ka pan thei ang em? Eng nge harsatna ka la neih? Nunhlui lamah beisei ka la nei reng em? Nge beisei tùr la awm tlata hriain ka la beisei reng zâwk?

Ka kal hun a hnaih leh tawh avàngin ka huphurh leh țùng tawh a, ka pa chuan," Ka thlah dâwn che em ni ang? Nangmah chauha i kal țhìn hi chu ka ngaihtuah ru țhìn che a," a ti a, kei chuan," A ngai lo ang, scooty ka rawn hàwn bawk si a, a buaithlâk mai mai, eng êm ka ti nâng," ka ti ve thung a, amah chauha haw leh tùr chuan ka ngaihtuah zâwk a ni.

U Valpuia pawh a zia chho ve hret hret tih Mampuii hnên ațangin ka hria a, rin ai erawh chuan hma a sâwn har ka ti; mahse, dam lam hi zawng hun hi a duh rei ve deuh a, a țha chho zêl tùrah ngai ang. Ka kal hma ngeia vawi khat tal tlawh leh erawh chu ka duh viau a, Mampuii bulah erawh ka sawi ngam dèr lo; mahse, amah zâwk chuan," I kal hmain vawi khat tal chu va tlawh dùn ila, kei pawhin kum thar ruai țheh hnua kan tlawh bâk kha ka tlawh leh tawh miah lo va, a lo vui ru viau maithei a ni," a ti a, ka hnial lo.

A lo zia deuh tawh tak tak a; mahse, a âwm a lo na ve leh tawh thung a, hritlâng tàwp lam hi chu âwmnaah a kal țhìn rêng bawk a ni. U Lynn-i a lo awm a; mahse, a haw thuai a, kan kal vàng chu nge ni ang aw ka ti rilru mai mai a, nuam lo ka ti angreng.

"I lo dam țha vek tawh ang chu tih laiin, tlangvàl lai ațanga hrisèl loh chu a fuh vak lo asin," tiin Mampuii chuan a fiam bawrh bawrh a, ani erawh chu a nui ngam lo, a khuh nghâl zêl si a. Mampuii chuan tui lumah chi alsak hlekin chu chu a in a," Tui saa inur hi an fak hlê țhìn tak asin, hritlâng pawhin an ngeih an tih țhin tak kha, ka hre chhuak chiah," ka tih chuan ani chuan," I hre chhuak har e, a hma khân sawi daih tawh tùr alawm," a lo ti vat a, hriat chhuah loh miau si chuan sawi a har ve e.

"Zànah mut a har viau lo'ng maw?" tia zâwtin Mampuii chuan naute chu a àwi pah a, naute chu a muhìl nain a mu nghet vak tawh lo a ni ang, a täl țat țat reng a, țhut pawh a țhutpui thei tawh lo.

"Har ve tho, khuh hi a chhuak reng mai a," a lo ti ve mai a, mut dâwna hrawk a zat tlat reng hi chuan khuh loh hi a har a, insùm tlat theih pawh a ni lo. Ka lo hriat thiampui viau mai a, ka lo bu nghat nghat a.

"Dãl, biscuits leh Alu lam hian hrawk chu a tiza zual duhin ka hria," ka ti a, ani pawh chuan," Ni e," a lo ti ve a, a aw chu a thûm chhur chhur mai a, nau awi pah chuan Mampuii chuan," Chutiang lam chu insûm la, siam awlsam chi hlîr ei tum rawh," a lo ti a, ani chuan," Chaw ka ei peih loh êm vàng hian ka siam peih vak lo, lem nuam deuh tùr Artui hi ka siam mai," a lo ti a, a han khuh leh rih a, Mampuii chu veranda lamah a chhuak zui ta vat a.

"Engtikah nge i kal leh dâwn?" a khuh reh hnu chuan a ti a," Naktûk zîng chaw ei kham lamah khian a nih ka ring," tiin ka lo chhâng a, ani chu a lo thaw hak a, a khuh chhuah vàng a ni ngei ang; mahse, a khuh chhuak ta lo va, a insûm leh thei a ni ang.

"I lo haw har tawh àwm mang e," a ti leh sap a, kei pawh chuan," Nia, a dik alawm, chawlh hi kan nei thei lo ve riau a," ka ti ve mai a, min rawn enin," Sèrchhîp khawi vêngah nge i awm kha?" tiin min zâwt leh a, ka hrilh ve mai bawk a," Pasal neih i tum hnai em?" tia min zawh leh thut chuan mak ka ti nasa.

"Âwihawm loh e!!" ka ti teh ngawt a, ani chuan," I nei thutin ka ring deuh a," a ti a, za lo tak chung hian ka nui lui sak a," Neih tùr pawh kan hmuh zawh loh hi maw," ka ti a, ani chuan," A hun takah i nei mai ang," a lo ti leh mai bawk a, a bulah hetiang lam hi chu sawi ka duh vak lo, nunhlui ka hre chhuak lo thei si lo va.

A tûkah chuan Sèrchhîp lam pan chuan ka inkhalh chhuak leh ta a, khua nuam viau mah se lung a lêng nghâl ruih mai. Rilruah tum loh deuhin U Valpuia a awm ve leh rùn bawk a, dam țha zêl se, hrisêl takin lo awmin lo hlim se tih ka duhsak a ni.

Mala pawhin min ngaihsak a, min rawn be fo a, amah ka duh leh duh loh min zâwt ngai lo va, țhian ngaihsak hian min rawn ngaihsak ni berin ka hria. Ani pawh hna dang beiseiin exam a hmachhawn leh dâwn a, inzir nasat a ngaih thute min rawn hrilh ve nual a, duhsakna hlànin inzir nasa tùr chuan ka fuih ve a, a tlin ngei theih nân ka lo dìlpui tùr thute ka hrilh chuan làwm thu min hrilh lêt a.

Vawiina min rawn dàwrtu nu pakhat mitthlà lét rauh rauh chung chuan ka in pëng chu ka thleng a, ka in chung chiah dàwr ațanga min ko ri ka hriat chuan ding chawtin ka ngaihtuahna ațang chuan a tak ramah ka chêng zui nghâl a. Min en rengtu U Valpuia hmêl dawldâng tak ka hmuh chuan mak ka ti nada mai, a dam țha tawh chu a ni ang a, eng nge a rawn tih dâwn? Teh hlawl chuan!

"Ka lo nghâk ngawt che a," a tih chuan," Aw... eng nge i lo tih dâwn? I dam țha tawh em ni?" ka ti a, ani chuan," Țha a ni tawh mai," a ti mai a, dàwr kawta dinpui reng chi ni lo ta chu inah ka chhukpui ta thuai a.

"Lo țhu rawh, thingpui ka'n lum nghâl ang e," tiin ka indah fel a, ani pawh chu țhutthlèngseiah chuan a lo țhu ve mai bawk a, min en zui zêl tih ka hriat avàng chuan ka che chu ka khawr deuh tlat mai, no pawh ka thlauh țêp a ni.

"Eng maw i rawn tih dâwn tak tak a? I la damkawr hmèl bawk si," zahzèlah chuan ka ti leh a, ani chuan," Thil pawimawh tak ka rawn ti dâwn a," tiin," I in tê chu a zau vak lo nain a awmna hi a nuam reuh a nih hi," a ti leh daih a, kei pawh chuan," Nia, a nuam ve reuh asin, a thengthaw reuh a," ka ti ve vat a.

Thingpui ka pe a, chhang ka chhawp nghâl bawk a, a bula țhu ve mai àwm ka nih laiin dining chair-ah chuan ka țhu ta daih a, dik tak chuan amah hnaih deuha țhut ka duh loh vàng a ni, kan pahnih chauhin kan awm lehnghâl si a.

"Thil ka zâwt ang che aw, dik takin min chhâng la, tunah hian bialpa i nei em?"

Vawi hnih min zawhna a ni ta. Mak ti takin a zawhna pawh chhâng lo chuan ka en reng ringawt.

*TUTE EMAW AN NIH VÀNG CHAUH LEH AN LAK AȚANGA THIL ENG EMAW DAWN LÊT I BEISEI VÀNG NI LOVIN NANGMAH I NIH VÀNG TAK KHÂN MITE CHUNGAH THIL ȚHA TI RAWH*